ໃນທ້າຍເດືອນມັງກອນ ທີ່ຜ່ານມາ ເຈົ້າໜ້າທີ່ພະແນກຕຳຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງຄຳມ່ວນ ໄດ້ຮັບການລາຍງານຂ່າວຈາກພົນລະເມືອງດີວ່າ: ຈະມີກຸ່ມແກ໋ງຄ້າຂາຍ ຈຳໜ່າຍ ນັດສົ່ງຢາເສບຕິດ ຢູ່ເຂດບ້ານໃໝ່ໂພສີ ເມືອງທ່າແຂກ ແຂວງຄຳມ່ວນ, ເມື່ອໄດ້ຮັບການລາຍງານຈາກແຫຼ່ງຂ່າວຄືແນວນັ້ນ ທາງເຈົ້າໜ້າທີ່ວິຊາສະເພາະ ຈຶ່ງໄດ້ລົງຕິດຕາມຢູ່ເຂດດັ່ງກ່າວເຫັນວ່າມີມູນຄວາມຈິງແທ້. ຕົກມາຮອດເວລາ 13:00 ໂມງ ຂອງວັນດຽວກັນ ແມ່ນເຫັນເປົ້າໝາຍ ຍ່າງເຂົ້າມາເຮືອນຂອງຕົນ ດັ່ງນັ້ນທາງເຈົ້າໜ້າທີ່ພວກເຮົາຈຶ່ງໄດ້ສະແດງຕົວນຳກຳລັງເພື່ອເຂົ້າຈັບກຸມ ແລະ ສາມາດກັກຕົວຜູ້ຕ້ອງຫາໄດ້ 01 ຄົນ ພ້ອມທັງ ໄດ້ກວດຄົ້ນເຮືອນຂອງຜູ້ກ່ຽວຈິ່ງພົບເຫັນຢາບ້າ ຈຳນວນ 01 ມັດ, ເທົ່າກັບ 2.000 ເມັດ ແລະ ຢາໄອສ໌ 01 ຖົງນ້ອຍ, ນອກນັ້ນຍັງໄດ້ກວດພົບປືນແກັບ 01 ກະບອກ, ປືນລົມ 01 ກະບອກທີ່ໄດ້ຊຸກເຊື່ອງໄວ້ຢູ່ຫ້ອງນອນຂອງຜູ້ກ່ຽວ.
ຜ່ານການສືບສວນ-ສອບສວນ ທ້າວ ພົມມາ ຄຳມະນີ ອາຍຸ 28 ປີ, ອາຊີບ ເຮັດນາ, ຢູ່ບ້ານໃໝ່ໂພສີ ເມືອງທ່າແຂກ ແຂວງຄຳມ່ວນ, ຜູ້ກ່ຽວຍອມຮັບສາລະພາບວ່າ ຢາບ້າຈຳນວນດັ່ງກ່າວ ແມ່ນເປັນຂອງຜູ້ກ່ຽວແທ້ ເຊິ່ງໄດ້ຊື້ມາຈາກກຸ່ມແກ໋ງດຽວກັນ ເພື່ອນຳມາເສບ ແລະ ນຳໄປຈຳໜ່າຍຕໍ່ໃຫ້ກັບໄວລຸ້ນທົ່ວໄປໃນເທສະບານເມືອງທ່າແຂກ.
ປະຈຸບັນຄະດີດັ່ງກ່າວທາງເຈົ້າໜ້າທີ່ຕຳຫຼວດ ພວກເຮົາແມ່ນກຳລັງດຳເນີນຄະດີຕາມຂັ້ນຕອນຂອງກົດໝາຍ ແລະ ສືບສວນ-ສອບສວນຫາຜູ້ຮ່ວມຂະບວນການຄ້າຂາຍ ແລະ ຈຳໜ່າຍຢາເສບຕິດໃນຄັ້ງນີ້ມາດຳເນີຄະດີຕາມລະບຽບກົດໝາຍຕໍ່ໄປ.
ແຫຼ່ງຂ່າວ ແລະ ພາບຈາກ: Khammouane News
