ພົບຄົນເສຍຊີວິດ 2 ສົບ ເພດຊາຍບໍ່ຊາບຊື່
ຕາມການລາຍງານຂອງເຈົ້າໜ້າທີ່ ປກສ ນະຄອນຫຼວງໃຫ້ຮູ້ວ່າ:ໃນເວລາ 13 ໂມງ ຂອງວັນທີ 26 ມີນາ 2022 ເຈົ້າໜ້າທີ່ ພະແນກຕຳຫຼວດສືບສວນ-ສອບສວນ ປກສ ນະຄອນຫຼວງວຽງຈັນ ໄດ້ຮັບແຈ້ງຜ່ານໂທລະສັບຈາກ ປກສ ເມືອງສີໂຄດຕະບອງ ວ່າມີຄົນເສຍຊີວິດຢູ່ບ້ານໃຫມ່ ເມືອງສີໂຄດຕະບອງ ນະຄອນຫຼວງວຽງຈັນ ຈຶ່ງໄດ້ແຕ່ງຕັ້ງພະນັກງານວິຊາສະເພາະ ລົງກວດກາຊັນນະສູດ.
![](https://tholakhong.com/wp-content/uploads/2022/03/fb_img_1648388241946532595345916260530.jpg)
ຜ່ານການເກັບກຳຂໍ້ມູນຫຼັກຖານ ພົບວ່າ: ວັນທີ 26 ມີນາ 2022 ເວລາ 8:30 ໂມງ ປະຊາຊົນຢູ່ບ້ານຈັນສະຫວ່າງ ເຊິ່ງເປັນແມ່ລູກ ໄດ້ຂັບຂີ່ລົດຈັກໄປຫາໜໍ່ໄມ້ຢູ່ເຂດບ້ານໃໝ່ ແລ້ວພົບເຫັນຄົນເສຍຊີວິດຖືກຝັງດິນ ໂດຍເຫັນແຕ່ຂາສອງຂາຊີ້ອອກມາຈາກຂຸມ ສ່ວນຕົວແມ່ນຖືກຝັງ. ເມື່ອເຫັນແນວນັ້ນຈຶ່ງຕົກໃຈແລ້ວກັບຄືນມາເຮືອນ ແລ້ວແຈ້ງຕໍ່ຄອບຄົວ ແລະ ແຈ້ງຕໍ່ເຈົ້າໜ້າທີ່ທີ່ກ່ຽວຂ້ອງ ເພື່ອເຂົ້າກວດກາຈຸດທີ່ພົບຊາກສົບ.
![](https://tholakhong.com/wp-content/uploads/2022/03/fb_img_16483882442167032635972652139619.jpg)
ຜົນຂອງການຊັນນະສູດ ພົບວ່າ ຜູ້ເສຍຊີວິດແມ່ນເພດຊາຍ ຈຳນວນ 2 ຄົນບໍ່ຊາບຊື່. ສົບຜູ້ທີ່ 1 ພົບຮ່ອງຮອຍບາດແຜທີ່ເກີດຈາກຂອງມີຄົມ ຈຳນວນ 8 ບາດແຜຄື ທາງຫຼັງ 7 ບາດແຜ ທາງຂ້າງ 1 ບາດແຜ. ສົບທີ 2 ພົບບາດແຜທີ່ເກີດຈາກຂອງມີຄົມ 4 ບາດແຜ ທາງຫຼັງ 3 ທາງຂ້າງ 1 ບາດແຜ.
![](https://tholakhong.com/wp-content/uploads/2022/03/fb_img_16483882464172159990996814074207.jpg)
ສາເຫດຂອງການເສຍຊີວິດທັງສອງ ແມ່ນຂາດອາກາດຫາຍໃຈ ຍ້ອນຖືກສະກັອດຄຽນດັງ ແລະ ປາກ. ປັດຈຸບັນສົບຂອງທັງສອງແມ່ນເກັບໄວ້ທີ່ໂຮງຫມໍມະໂຫສົດ.
ເຫດການນີ້ ເຈົ້າໜ້າທີ່ກຳລັງເລັ່ງສືບສວນ-ສອບສວນ ຫາຜູ້ກໍ່ເຫດມາລົງໂທດຢູ່.
Cr: ໜັງສືພິມຄວາມສະຫງົບ
![](https://tholakhong.com/wp-content/uploads/2022/03/photocollage_20220327_2040128118604888569422302149-scaled.jpg)