ເພື່ອນຳພາ ສປປ ລາວ ກ້າວໄປສູ່ຍຸກ 5.0 ໂດຍສຶກສາຄວາມເປັນໄປໄດ້ ໂຄງການບໍລິການຂໍ້ມູນຂະໜາດໃຫຍ່ (Big Data) ແບບທັນສະໄໝ ຄຸ້ມຄອງລວມສູນ ໃນລະດັບປະເທດ.
ໃນຕອນແລງວັນທີ 26 ມິຖຸນາ 2023, ໄດ້ຈັດພິທີເຊັນບົດບັນທຶກຄວາມເຂົ້າໃຈ (MOU) ສຶກສາຄວາມເປັນໄປໄດ້ ໂຄງການບໍລິການຂໍ້ມູນຂະໜາດໃຫຍ່ (Big Data) ແບບທັນສະໄໝ ຄຸ້ມຄອງລວມສູນ ໃນລະດັບປະເທດ ໂດຍເປັນກຽດເຂົ້າຮ່ວມໃນພິທີ ປະກອບມີ: ທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີ ລັດຖະມົນຕີກະຊວງການຕ່າງປະເທດ, ທ່ານ ຄໍາເຈນ ວົງໂພສີ ລັດຖະມົນຕີກະຊວງແຜນການ ແລະ ການລົງທຶນ, ທ່ານ ບັນດິດ ສາດສະດາຈານ ປະລິນຍາເອກ ບໍ່ວຽງຄໍາ ວົງດາລາ ລັດຖະມົນຕີກະຊວງເຕັກໂນໂລຊີ ແລະ ການສື່ສານ ແລະ ບັນດາລັດຖະມົນຕີ ຈາກກະຊວງກ່ຽວຂ້ອງ ເຂົ້າຮ່ວມຢ່າງພ້ອມພຽງ.
![](https://tholakhong.com/wp-content/uploads/2023/06/mou.jpeg)
ໂຄງການບໍລິການຂໍ້ມູນຂະໜາດໃຫຍ່ (Big Data) ແບບທັນສະໄໝ ຄຸ້ມຄອງລວມສູນ ໃນລະດັບປະເທດ ຊຶ່ງໂຄງການນີ້ ຈະຖືກພັດທະນາໃນຮູບແບບ ການຮ່ວມມືລະຫວ່າງພາກລັດແລະເອກະຊົນ Public–Private Partnership (PPP) ຖ້າພັດທະນາຢ່າງເຕັມຮູບແບບ.
![](https://tholakhong.com/wp-content/uploads/2023/06/mou1.jpeg)
Big Data ແມ່ນການປະມວນຜົນທາງດ້ານຂໍ້ມູນ ຊ່ວຍຍູ້ໜູນໃຫ້ແກ່ການຖ່າຍໂອນຂໍ້ມູນຢ່າງວ່ອງໄວ ທາງດ້ານທຸລະກໍາການເງິນ, ການຈັດເກັບຂໍ້ມູນຂະໜາດໃຫຍ່ ລວມທັງກວມລວມເຖິງການບໍລິຫານຄຸ້ມຄອງລັດ-ຄຸ້ມຄອງສັງຄົມ, ຄຸ້ມຄອງວຽກງານຕ້ານອາຍະກໍາ ແລະ ຄວາມປອດໄພທາງໄຊເບີ້ ຢ່າງມີປະສິດທິຜົນ. Big Data ໄດ້ປະກອບສ່ວນທີ່ສໍາຄັນຕໍ່ເສດຖະກິດຂອງໂລກລວມທັງອໍານວຍຄວາມສະດວກໃຫ້ແກ່ທຸກພາກສ່ວນ ເຂົ້າເຖິງຂໍ້ມູນໄດ້ຢ່າງສະດວກ, ຊັດເຈນ, ວ່ອງໄວ ແລະ ທັນການ.
![](https://tholakhong.com/wp-content/uploads/2023/06/mou2.jpeg)
ສປປ ລາວ ນໍາໃຊ້ເຕັກໂນໂລຊີຂໍ້ມູນຂ່າວສານ ເຂົ້າໃນວຽກງານຂອງພາກລັດ, ພາກທຸລະກິດ ແລະ ພາກປະຊາຊົນ ຫຼາຍສົມຄວນ ແຕ່ຍັງຈໍາກັດໃນວົງແຄບ, ເຮັດແບບກະແຈກກະຈາຍ ບໍ່ລວມສູນ, ແຕ່ລະຂະ ແໜງການ ໄດ້ພັດທະນາເປັນຂອງຕົນເອງ ສົ່ງຜົນໃຫ້ສິ້ນເປືອງຄ່າໃຊ້ຈ່າຍເປັນຈໍານວນຫຼວງຫຼາຍ.
![](https://tholakhong.com/wp-content/uploads/2023/06/2P0A9215-scaled.jpg)
ຖ້າໂຄງການດັ່ງກ່າວ ຫາກໄດ້ຮັບການພັດທະນາ ກໍ່ຈະເປັນການປະກອບສ່ວນຢ່າງໃຫຍ່ຫຼວງຕໍ່ວຽກງານລວມຂອງຊາດ ໃນການຫັນເປັນການຄຸ້ມຄອງລັດແບບທັນສະໄໝ ແລະ ມີປະສິດທິຜົນ ຫຼຸດຜ່ອນງົບປະມານຂອງລັດ, ບໍ່ສະເພາະແຕ່ຜົນປະໂຫຍດທາງກົງ ຈາກການເກັບພາສີ-ອາກອນ ທີ່ລັດຖະບານຈະໄດ້ຮັບ ແຕ່ຍັງສ້າງຜົນປະໂຫຍດທາງທາງອ້ອມໃຫ້ແກ່ປະຊາຊົນ ໃນການສ້າງວຽກເຮັດງານທໍາ, ການພັດທະນາຊັບພະຍາກອນມະນຸດ, ການເຊື່ອມໂຍງການຄ້າການລົງທຶນລະຫວ່າງປະເທດ, ຊຸກຍູ້ເສດຖະກິດດິຈິຕ້ອນ ແລະ ຫັນເປັນອຸດສາຫະກໍາ 4.0 ຕາມຍຸດທະສາດ ແລະ ວິໃສທັດ ຂອງ ລັດຖະບານ ເຮັດໃຫ້ການຄ້າການລົງທຶນບໍ່ມີພົມແດນ ປະກອບສ່ວນອັນສໍາຄັນໃນການພັດທະນາເສດຖະກິດສັງຄົມຂອງປະເທດ ຊຶ່ງກຸ່ມບໍລິສັດໄຊຊະນະ ຈະພັດທະນາໂຄງການດັ່ງກ່າວ ດ້ວຍ ວິໃສທັດ ທີ່ວ່າ: ສ້າງຄວາມທັນສະໄໝຮອບດ້ານ ພັດທະນາເສດຖະກິດດິຈີຕ້ອນ ເຊື່ອມໂຍງເຊື່ອມຈອດກັບພາກພື້ນແລະສາກົນ.
![](https://tholakhong.com/wp-content/uploads/2023/06/Website-01.png)