ເມືອງແກ່ນທ້າວ ແຂວງໄຊຍະບູລີ ດຳເນີນໂຄງການບັນພະຊາສາມະເນນ ບວດທົດແທນບຸນຄຸນພໍ່ແມ່ ແລະ ອົບຮົມ ສິລະທຳ ແກ່ເດັກຄັ້ງທີ 1 ປະຈຳປີ ພສ 2561

ໂຄງການບັນພະຊາສາມະເນນ ບວດທົດແທນບຸນຄຸນພໍ່ແມ່ ແລະ ອົບຮົມສິລະທຳແກ່ເດັກ ຄັ້ງທີ1 ປະຈຳປີ ພສ 2561 ໄດ້ໄຂຂື້ນໃນຕອນແລງຂອງວັນທີ 12 ສິງຫາ 2018 ນີ້,ຢູ່ທີ່ວັດປ່າຫາຍໂສກຊົງທຳ ບ້ານເມືອງໝໍ ເມືອງແກ່ນທ້າວ ແຂວງໄຊຍະບູລີ.

ໂດຍການເປັນປະທານຂອງພະອາຈານ ເຮົ້າ ຈັນທະວົງ ປະທານ ອພສ ເມືອງແກ່ນທ້າວ,ມີພະເຖລານຸເຖລະ,ທ່ານ ບົວລອງ ແກ້ວພິລາ ຫົວໜ້າຫ້ອງການພາຍໃນເມືອງ,ມີຕາງໜ້າຫ້ອງການແນວລາວສ້າງຊາດເມືອງ,ຫ້ອງການຖະແຫຼງຂ່າວ,ວັດທະນະທຳ ແລະ ທ່ອງທ່ຽວເມືອງ,ອຳນາດການປົກຄອງບ້ານ,ເຖົ້າແກ່ແນວໂຮມ,ຜູ້ຊົງຄຸນວຸດທິ ແລະ ອອກຕົນຍາດໂຍມພາຍໃນບ້ານເມືອງໝໍ ແລະ ບ້ານໃກ້ຄຽງເຂົ້າຮ່ວມຢ່າງຫຼວງຫຼາຍ.

ໂຄງການບັນພະຊາສາມະເນນ ບວດທົດແທນບຸນຄຸນພໍ່ແມ່ ຫຼື ບວດຈົວລວມໝູ່ ເປັນອີກວິທີໜຶ່ງ ໃນການອົບຮົມສິລະທຳ ໃຫ້ແກ່ຊາວໜຸ່ມເຍົາວະຊົນ ໃນໄລຍະພັກພາກຮຽນ ເຮັດໃຫ້ເຂົາເຈົ້າໄດ້ໃຊ້ເວລາຫວ່າງໃຫ້ເປັນປະໂຫຍດ ເພື່ອເປັນການສົ່ງເສີມໃຫ້ຊາວໜຸ່ມ-ເຍົາວະຊົນ ໄດ້ເຂົ້າບວດໃນພະພຸດທະສາສະໜາ ເພື່ອທົດແທນບຸນຄຸນຂອງພໍ່ແມ່ ແລະ ຜູ້ມີອຸປະກາລະຄຸນ,ເພື່ອພັດທະນາຊາວໜຸ່ມ-ເຍົາວະຊົນ ແລະ ຄົນທົ່ວໄປໃຫ້ຕັ້ງຢູ່ໃນສີລະທຳ ເຊິ່ງຈະເປັນການຊ່ວຍແກ້ໄຂບັນຫາ ແລະ ປະກົດການຫຍໍ້ທໍ້ໃນສັງຄົມ,ທັງເປັນການເຜີຍແຜ່ຫຼັກສິນທຳ ຂອງພະພຸດທະສາດສະໜາ ອອກສູ່ສັງຄົມຢ່າງກ້ວາງຂວາງ,ເຮັດໃຫ້ຜູ້ເຂົ້າຮ່ວມໂຄງການ ໄດ້ຮູ້ຈັກເຝິກຝົນຫຼໍ່ຫຼອມຕົນເອງ ໃຫ້ກາຍເປັນແບບຢ່າງທີ່ດີ ຂອງສັງຄົມ ແລະ ປະເທດຊາດ.

ຜູ້ເຂົ້າຮ່ວມໂຄງການ ຈະໄດ້ຮັບຟັງການບັນຍາຍທຳ ແລະ ລົງພາກປະຕິບັດຕົວຈິງກ່ຽວກັບກິດຈະກຳຕ່າງໆ.ຫຼັກສູດການຮຽນ-ການສອນປະກອບມີ ສາດສະໜາພິທີ,ພຸດທະປະຫວັດ,ທຳມະປະຍຸກ,ພະວິໄນ,ແສງທຽນແສງທຳກັບຄຳວ່າແມ່ ແລະ ອື່ນໆ.ພາກກິດຈະກຳ ແລະ ປະຕິບັດ ລວມມີ ໄຫວ້ພະສູດມົນ,ຝຶກກຳມະຖານ ນັ່ງສະມາທິ,ພາວະນາ,ເດີນຈົມກົມ,ຝຶກການຂາບໄຫວ້,ຫຼິ້ນເກມທຳມະ ແລະ ທັກສະການສຶກສາ,ຟັງການບັນຍາຍທຳປາຖະກະຖາພິເສດ,ລົງບິນທະບາດ ແລະອື່ນໆ.

ໂຄງການດັ່ງກ່າວ ມີຜູ້ເຂົ້າຮ່ວມບວດເປັນສະມະເນນທັງໝົດ 44 ຕົນ,ບວດເປັນພໍ່ຂາວ ແລະ ແມ່ຂາວ 36 ຄົນ.ແລະ ຈະດຳເນີນໄປຈົນເຖິງວັນທີ 18 ສິງຫາ ຈຶ່ງຈະສຳເລັດ.ທັງນີ້ ເພື່ອເປັນການສ້າງບຸນກຸສົນ ສ້າງສົມບາລະມີໃຫ້ກັບຕົນເອງ ແລະ ທັງເປັນໂອກາດທີ່ຈະໄດ້ສະແດງຄວາມກະຕັນຍູ ຕອບແທນບຸນຄຸນຂອງພໍ່ແມ່ ຜູ້ໃຫ້ກຳເນິດອີກດ້ວຍ.

ຊົມຄລິບ ມ່ວນໆ ມັນໆ ມີສາລະ

ອອກ​ຈາກ ບ່ອນໃຫ້ຄໍາເຫັນ

ກະລຸນາໃຫ້ຄໍາຄິດເຫັນ
ກະລຸນາໃສ່ຊື່