ຈໍາປາສັກ: ໃນຕອນບ່າຍວັນທີ 14/10/2020, ທ່ານ ພັນໂທ ໄພຈິດ ໄຊຍະເດດ ຮອງຫ້ອງຕຳຫຼວດ ຜູ້ຊີ້ນໍາວຽກງານສືບສວນ-ສອບສວນ ກອງບັນຊາການ ປກສ ແຂວງຈຳປາສັກ ໄດ້ຖະແຫຼງກ່ຽວກັບຄະດີຄາຕະກຳ ຢູ່ບ້ານໃໝ່ວັງໝາກແຊວ(ຄຸ້ມທ່າດ່ານ) ເມືອງສຸຂຸມາ ໃນວັນທີ 2/10/2020 ທີ່ຜ່ານມາ ເຊິ່ງມີຜູ້ເສຍຊິວິດ 3 ຄົນ ຄື:
- ທ.ຫົງທອງ ຄຳພູມີ ອາຍຸ 39 ປີ ຫົວໜ້າໝໍລໍາເລື່ອງຄະນະ ເກດແກ້ວ ເພັດນໍ້າໃສ ຢູ່ບ້ານໃໝ່ວັງໝາກແຊວ.
- ທ.ໄພວັນ ວົງຈັນທາ ອາຍຸ 31 ປີ, ອາຊີບກຳມະກອນ ຢູ່ບ້ານສາມຂາ ເມືອງສຸຂຸມາ.
- ທ.ເຕີ້ນ ອາຍຸ 12 ປີ, ເປັນນັກຮຽນ ຢູ່ບ້ານໃໝ່ວັງໝາກແຊວ.
ຜູ້ຖືກຫາ ຊື່ ທ.ຄໍາໃໝ່ ດວງສາ ອາຍຸ 27 ປີ, ອາຊີບຊາວນາ ຢູ່ບ້ານໃໝ່ວັງໝາກແຊວ.
ຜ່ານການສືບສວນ-ສອບສວນ ພະຍານບຸກຄົນ ແລະ ການເກັບກຳຂໍ້ມູນຫຼັກຖານຢ່າງລະອຽດຈະແຈ້ງແລ້ວ ສາມາດສະຫຼຸບໄດ້ວ່າ: ຜູ້ລົງມືກໍ່ເຫດຄາຕະກໍາຄັ້ງນີ້ ແມ່ນ ທ.ຄໍາໃໝ່ ດວງສາ ແທ້ ແລະ ລົງມືກໍ່ເຫດພຽງຄົນດຽວ.
ສາເຫດ ແລະ ແຮງຈູງໃຈໃນການລົງມືກໍ່ເຫດ ແມ່ນຍ້ອນຄວາມຄຽດແຄ້ນສ່ວນຕົວ.
ຍ້ອນແນວນັ້ນ ເຈົ້າໜ້າທີ່ກ່ຽວຂ້ອງ ຈິ່ງໄດ້ນຳຕົວຜູ້ກ່ຽວໄປທຳແຜນທົດສອບ ປະກອບສໍານວນຄະດີ ເພື່ອສົ່ງອົງການໄອຍະການປະຊາຊົນແຂວງ ດຳເນີນຄະດີຕາມຂັ້ນຕອນຂອງກົດໝາຍ.
.
