ໃນເດືອນ ຕຸລາ, ດຣ ກຸນ ຢາງ ຜູ້ອໍານວຍການໃຫຍ່ ແລະ ປະທານບໍລິຫານບໍລິສັດ ແພນອອສ໌ ເຊິ່ງຖືຮຸ້ນໂດຍບໍລິສັດ ກວາງດົງ ຣາຍຊິງ ເອທເຄ (ໂຮນດິງ) ຈໍາກັດ ເຊິ່ງແມ່ນບໍລິສັດໃນເຄືອລັດວິສາຫະກິດ ສປ ຈີນ ແລະ ເປັນເຈົ້າຂອງບໍລິສັດ ພູເບ້ຍ ມາຍນິງ ໄດ້ເຂົ້າລາຍງານການນໍາລັດຖະບານລາວຂັ້ນສູງຫຼາຍທ່ານ ໃນໄລຍະການຢ້ຽມຢາມຫວ່າງບໍ່ດົນມານີ້.
ດຣ ຢາງ ໄດ້ເຂົ້າພົບ ພະນະທ່ານ ສອນໄຊ ສີພັນດອນ, ຮອງນາຍົກລັດຖະມົນຕີ, ລັດຖະມົນຕີກະຊວງ ແຜນການ ແລະ ການລົງທຶນ; ພະນະທ່ານ ພົນເອກ ຈັນສະໝອນ ຈັນຍາລາດ, ຮອງນາຍົກລັດຖະມົນຕີ, ລັດຖະມົນຕີກະຊວງ ປ້ອງກັນປະເທດ; ພະນະທ່ານ ນາງ ບຸນຄໍາ ວໍລະຈິດ, ລັດຖະມົນຕີກະຊວງ ຊັບພະຍາກອນທໍາມະຊາດ ແລະ ສິ່ງແວດລ້ອມ; ທ່ານ ທອງພັດ ອິນທະວົງ, ຮອງລັດຖະມົນຕີກະຊວງ ພະລັງງານ ແລະ ບໍ່ແຮ່; ທ່ານ ນາງ ທິບພະກອນ ຈັນທະວົງສາ, ຮອງຫົວໜ້າຫ້ອງວ່າການສໍານັກງານນາຍົກລັດຖະມົນຕີ; ທ່ານ ຄໍາລຽງ ອຸທະໄກສອນ, ເຈົ້າແຂວງໆ ໄຊສົມບູນ ແລະ ທ່ານ ບຸນຈັນ ສີວົງພັນ, ເຈົ້າແຂວງໆ ຊຽງຂວາງ.
ການເດີນທາງມາສປປ ລາວໃນຄັ້ງນີ້ ເປີດໂອກາດໃຫ້ ດຣ ຢາງ ສະແດງຄວາມຮູ້ບຸນຄຸນຕໍ່ລັດຖະບານລາວ ສໍາລັບການສະໜັບສະໜູນອັນຕໍ່ເນື່ອງທີ່ມີຕໍ່ບໍລິສັດ ພູເບ້ຍ ມາຍນິງ ແລະ ບໍລິສັດ ແພນອອສ໌. ດຣ ຢາງ ຍັງໄດ້ລາຍງານການນໍາລັດຖະບານລາວ ຊາບກ່ຽວກັບຄວາມມຸ້ງໝັ້ນຂອງບໍລິສັດ ແພນອອສ໌ໃນການສ້າງຄວາມເຕີບໃຫຍ່ ແລະ ຄວາມມັ້ງຄົງທາງທຸລະກິດໃນປະເທດສືບຕໍ່ໄປຜ່ານການດໍາເນີນງານປະຈຸບັນຂອງບໍລິສັດ ແລະ ບໍລິສັດມີຄວາມສົນໃຈປຶກສາຫາລືໂອກາດໃນການພັດທະນາ ແລະ ການຂະຫຍາຍທຸລະກິດຕໍ່ໜ້າທີ່ບໍລິສັດ ກໍາລັງຈັດຕັ້ງໃນລາວ.
ດຣ ຢາງ ກ່າວວ່າ: “ລັດວິສາຫະກິດ ສປ ຈີນ ຍັງຄົງໃຫ້ການສະໜັບສະໜູນການດໍາເນີນທຸລະກິດໃນລາວຫຼາຍຍິ່ງຂຶ້ນ ແລະ ເປັນວິໄສທັດອັນໜຶ່ງ ເພື່ອສືບຕໍ່ດໍາເນີນທຸລະກິດຢູ່ລາວ ໃນໄລຍະຍາວ ຜ່ານການພັດທະນາໂອກາດໃໝ່ໆເພື່ອຜົນປະໂຫຍດດ້ານການຄ້າຮ່ວມກັນທັງສປປ ລາວ ແລະ ສປ ຈີນ. ນີ້ແມ່ນສິ່ງທີ່ໜ້າຕື່ນເຕັ້ນ ເພາະໂອກາດທີ່ບົ່ມຊ້ອມເຫຼົ່ານີ້ ຈະຊ່ວຍພັດທະນາເສດຖະກິດຂອງລາວ ແລະ ສ້າງໄລຍະໃໝ່ແຫ່ງຄວາມວັດທະນະຖາວອນສໍາລັບປະເທດຊາດ.ໃນຕອນທ້າຍ, ດຣ ຢາງ ຂໍຂອບໃຈມາຍັງລັດຖະບານ ລາວ ສໍາລັບການຕ້ອນຮັບອັນອົບອຸ່ນໃນໄລຍະການຢ້ຽມຢາມລາວຂອງທ່ານຄັ້ງທໍາອິດ ນັບແຕ່ມີສະພາບການລະບາດຂອງໂຄວິດ-19 ແລະ ສ້າງຄວາມເຊື່ອໝັ້ນວ່າບໍລິສັດ ແພນອອສ໌ ແລະ ລັດວິສາຫະກິດສປ ຈີນ ຈະສືບຕໍ່ສະໜັບສະໜູນບໍລິສັດ ພູເບ້ຍ ມາຍນິງ, ລັດຖະບານ ແລະ ປະຊາຊົນລາວໃນໄລຍະການລະບາດຂອງໂຄວິດ-19.
