ປະຊາຊົນບ້ານຊາຍຈະເລີນ ເມືອງຫ້ວຍຊາຍ ແຂວງບໍ່ແກ້ວ ຈັດງານບຸນກິນຈຽງ ໜໍ່ເປ້ເຈົ່າ ປະຈຳປີ 2022

0
1762

ດັ່ງທີ່ທຸກຄົນຮູ້, ງານບຸນກິນຈ້ຽງ ຫຼື ໜໍ່ເປເຈົ່າ ເປັນຮີດຄອງປະເພນີຂອງຊົນເຜົ້າມົ້ງທີ່ເຄີຍຈັດຕັ້ງມາແຕ່ດຶກດໍາບັນ, ຫຼາຍບ້ານໃນບັນດາເມືອງແຂວງຕ່າງໆກໍໄດ້ເລີ່ມຈັດງານບຸນດັ່ງກ່າວ. ໃນນັ້ນຄະນະພັກອຳນາດການປົກຄອງບ້ານພ້ອມດ້ວຍປະຊາຊົນ ບ້ານຊາຍຈະເລີນ ເມືອງຫ້ວຍຊາຍ ແຂວງບໍ່ແກ້ວ ກໍ່ບໍ່ໄດ້ລະຮີດໃຫ້ມອງລະຄອງໃຫ້ເສົ້າ ແລະ ໄດ້ຈັດງານບຸນກິນຈຽງ ໜໍ່ເປ້ເຈົ່າ ປະຈຳປີ 2022. ເຊິ່ງໄດ້ເລີ້ມມາແດ່ວັນທີ 3 ມັງກອນ2022 ແລະ ຈະສຳເລັດໃນ ວັນທີ 7 ມັງກອນ 2022 ນີ້.

ທ້າວ ນໍ່ຈື ກາໄຈລີ ເລຂາຄະນະພັກຮາກຖານ ນາຍບ້ານ ບ້ານຊາຍຈະເລີນ ໄດ້ສຳພາດຕໍ່ຜູ້ສື່ຂ່າວວ່າ: ເຜົ່າມົ້ງມີເອກະລັກທາງດ້ານຮີດຄອງປະເພນີ ເຊື່ອຖືຜີເຮືອນ, ສືບສາຍຕະກຸນທາງພໍ່ ຫຼື ຝ່າຍຊາຍເປັນຫຼັກ, ໜໍເປ້ເຈົ່າ ແມ່ນການສະຫຼອງຜົນງານການເກັບກ່ຽວ ທີ່ຍາດມາໄດ້ໃນຕະຫຼອດໄລຍະໜຶ່ງປີ, ເປັນການສົມມາຄາລະວະຕໍ່ພໍ່ແມ່, ຜູ້ອາວຸໂສ ແລະ ຜູ້ນຳພາ, ເປັນການສ້າງໂອກາດເຕົ້າໂຮມບັນດາພໍ່ແມ່ຍາດຕິພີ່ນ້ອງ, ແຂກຄົນທັງຢູ່ໃກ້ ແລະ ຢູ່ໄກໄດ້ມາພົບພໍ້ຢ້ຽມຢາມ ເພື່ອສະແດງຄວາມ ສາມັກຄີ, ຄວາມຂອບອົກຂອບໃຈ, ຄວາມຮູ້ບຸນຄຸນເຊິ່ງກັນ ແລະ ກັນ ພ້ອມຍັງເປັນການສ້າງໂອກາດໃຫ້ຜູ້ເປັນພໍ່ແມ່ໄດ້ເລືອກໄພ້, ເລືອກເຂີຍ, ຊາຍໜຸ່ມຍິງສາວໄດ້ເລືອກຄູ່ຊີວິດຂອງຕົນເອງ, ການເອ້ຢ້ອງ, ອວດອ້າງຄວາມຮັ່ງມີຂອງໃຜລາວ ທັງເປັນການຟື້ນຟູ, ເຜີຍແຜ່ຮີດຄອງປະເພນີອັນດີງາມ ແລະ ວັດທະນະທໍາຂອງຕົນນຳອີກ.

ທ່ານໄດ້ກ້າວຕື່ມວ່າ: ການຈັດງານໃນຄັ້ງນີ້ ມີຄວາມແຕກຕ່າງໃນໄລຍະຜ່ານມາເນື່ອງຈາກມີການລະບາດຂອງເຊື້ອພະຍາດໂຄວິດ-19 ຈິ່ງໄດ້ຈັດຕາມຮີດຕາມຄອງກິດຈະກຳບາງຢ່າງບໍ່ສາມາດນໍາມາສະແດງ, ມາໃຫ້ຊົມມີພຽງແຕ່ກິດຈະກຳໂຍນໝາກຄອນ, ການວາງຂາຍສິນຄ້າເທົ່ານັ້ນຈິ່ງເຮັດໃຫ້ບັນຍາດກາດບໍ່ຄຶກ ຄັກແຕ່ການປະຕິບັດມາດຕະການ ແມ່ນໄດ້ພ້ອມກັນປະຕິບັດຢ່າງເຂັ້ມງວດມີການວັດແທກອຸ່ນຫະພຸມ.

ທ່ານ ເຍ້ ວື ອສບ ບ້ານ ໄດ້ສຳພາດຕື່ມວ່າ: ການປະຕິບັດມາດຕະການປ້ອງກັນໂຄວິດ-19 ຕົນເອງ ພ້ອມຄະນະໄດ້ເອົາໃຈໃສ່ປະຕິບັດຕາມໜ້າທີ ໂດຍຕັ້ງຈຸດວັດແທກອຸ່ນຫະພຸມຢູ່ຈຸດທາງເຂົ້າໃນງານ ແຈກຜ້າປິດປາກປິດດັງຊີດຢາຂ້າເຊື້ອທຸກຄົນທີ່ເຂົ້າໃນງານ ຫຼື ຕ້ອງລ້າງມືດ້ວຍເຈວປະສົມເຫຼົ້າ 70 ຫຼື ເຫຼົ້າ 90 ເພື່ອຮັບປະກັນຄວາມປອດໄພຂອງທຸກຄົນ ຖ້າຮາກທ່ານໃດກວດບໍ່ຜ່ານ ແມ່ນໃຫ້ພັກຜ່ອນ ຫຼື ກວດ 2 ຄັ້ງ ແລະ ແນະນຳໃຫ້ຮູ້ຈັກຮັກສາຕົນເອງ ແລະ ບັນຍາກາດການຫຼິ້ນບຸນກິນຈຽງປີນີ້ ເຫັນວ່າບໍ່ຄຶ້ກຄື້ນປານໃດ ເພາະວ່າມີການແຜ່ລະບາດຂອງພະຍາດໂຄວິດ-19 ມີແຕ່ຫຼິ້ນຕາມຮີດຄອງພາຍໃນບ້ານເທົ່ານັ້ນ, ຕ່າງບ້ານບໍ່ໄດ້ເຂົ້າຮ່ວມ ທັງນີ້ ກໍ່ເພື່ອການປ້ອງກັນການແຜ່ລະບາດຂອງພະຍາດໂຄວິດ-19 ໄປໃນວົງກວ້າງ.

ແຫຼ່ງຂ່າວ: ໜັງສືພິມບໍ່ແກ້ວ

LEAVE A REPLY

Please enter your comment!
Please enter your name here