ຕາມການລາຍງານຈາກ ແຟນເພຈ ຂອງລັດວິສາຫະກິດໄຟຟ້າລາວ ສາຂາແຂວງຫຼວງພະບາງໃຫ້ຮູ້ວ່າ: ໃນຕອນທ່ຽງຂອງວັນທີ 01 ກຸມພາ 2022 ລັດວິສາຫະກິດໄຟຟ້າລາວ ສາຂາແຂວງຫຼວງພະບາງ ສົມທົບກັບ ປກສ ກຸ່ມມະໂນ ແລະ ປກສ ບ້ານນາຫຼວງ ລົງກວດກາໝໍ້ນັບໄຟລູກຄ້າ ຈາກກໍລະນີກວດພົບ ການລັກໃຊ້ໄຟຟ້າ ແລະດັດແປງໝໍ້ນັບໄຟ ຂອງ ຜູ້ຊົມໃຊ້ໄຟຟ້າ ປະເພດທີ່ຢູ່ອາໄສ ຢູ່ບ້ານນາຫຼວງ ນະຄອນຫຼວງພະບາງ ແຂວງຫຼວງພະບາງ.
![](https://tholakhong.com/wp-content/uploads/2022/02/berwb.jpeg)
ໃນເບື້ອງຕົ້ນທາງ ລັດວິສາຫະກິດໄຟຟ້າລາວ ສາຂາແຂວງຫຼວງພະບາງ ໄດ້ທໍາການຕັດໄຟ ແລະປົດໝໍ້ນັບໄຟໜ່ວຍດັ່ງກ່າວ ແລະ ມອບໃຫ້ກັບເຈົ້າໜ້າທີ່ ເພື່ືື່ອດຳເນີນຄະດີ ຕາມລະບຽບກົດໝາຍ ພ້ອມທັງຄິດໄລຄ່າປັບໄໝຕໍ່ຜູ້ກະທຳຜິດດັ່ງກ່າວ ຕາມທີ່ໄດ້ລະບຸໄວ້ໃນ ຂໍ້ກໍານົດ ວ່າດ້ວຍການປະຕິບັດ ມາດຕະການຕໍ່ຜູ້ທີ່ ລັກກະແສໄຟຟ້າ ແລະ ດັດແປງໝໍ້ນັບໄຟ ເລກທີ 2162/ຟຟລ.ຝລຈ.
![](https://tholakhong.com/wp-content/uploads/2022/02/vfeb.jpeg)
“ ການລັກໃຊ້ ກະແສໄຟຟ້າ ແລະດັດແປງໝໍ້ນັບໄຟ” ເປັນການກະທໍາຜິດທີ່ລະເມີດຕໍ່ ກົດໝາຍ ທັງທາງແພ່ງ, ທາງອາຍາ, ເຮັດໃຫ້ ລັດວິສາຫະກິດໄຟຟ້າລາວ ໄດ້ຮັບຄວາມເສຍຫາຍທາງດ້ານຊັບສິນ, ສູນເສຍລາຍຮັບອັນມະຫາສານ ຈາກການ ຖືກລັກໃຊ້ກະແສໄຟຟ້າ; ສໍາຄັນກ່ວານັ້ນ ການກະທໍາດັ່ງກ່າວເປັນການກະທໍາທີ່ອັບປະໂຫຍດ ເພາະອາດຈະເກີດຄວາມ ເສຍຫາຍ ຕໍ່ຊີວິດ ແລະ ຊັບສິນ ຕໍ່ຜູ້ທີ່ລັກໃຊ້ ກະແສໄຟຟ້າ ແລະ ສັງຄົມອີກດ້ວຍ.
ເພື່ອຄວາມປອດໄພໃນການໃຊ້ໄຟຟ້າ ແລະຫລຸດຜ່ອນຜົນກະທົບທີ່ອາດຈະເກີດຂື້ນ, ຖ້າທ່ານພົບເຫັນ ການລັກໃຊ້ກະແສໄຟຟ້າ ແລະດັດແປງໝໍ້ນັບໄຟ ກະລຸນາໂທສາຍດ່ວນ ຟຟລ 0711199 ຂໍ້ມູນຂອງທ່ານຈະຖືກເກັບໄວ້ເປັນຄວາມລັບ, ພ້ອມດຽວກັນນັ້ນ ທ່ານຍັງຈະໄດ້ຮັບການສົມມະນາບຸນຄຸນ ຕາມທີ່ໄດ້ລະບຸໄວ້ໃນ ໝວດທີ III ມາດຕາ 6 ການປະຕິບັດ ນະໂຍບາຍຕໍ່ຜູ້ທີ່ມີຜົນງານ ຂອງ “ ຂໍ້ກໍານົດ ວ່າດ້ວຍການປະຕິບັດ ມາດຕະການຕໍ່ຜູ້ທີ່ ລັກກະແສໄຟຟ້າ ແລະ ດັດແປງ ໝໍ້ນັບໄຟ”