ບໍລິສັດ ປັນຍາທິບ ແພລນບີ ມີເດຍ ລາວ ຈຳກັດ ຈັດງານລ້ຽງຂອບໃຈລູກຄ້າ

0
2050

ບໍລິສັດ ປັນຍາທິບ ແພລນບີ ມີເດຍ ລາວ ຈຳກັດ ຈັດງານລ້ຽງຂອບໃຈລູກຄ້າ ທີ່ມອບຄວາມໄວ້ວາງໃຈໃຫ້ເປັນສ່ວນໜຶ່ງໃນການໂຄສະນາ.

ໃນຕອນແລງ ວັນທີ 24 ກຸມພາ 2023, ທີ່ຮ້ານອາຫານແສງລາວ, ບ້ານນາໄຊ, ເມືອງໄຊເຊດຖາ, ນະຄອນຫຼວງວຽງຈັນບໍລິສັດ ປັນຍາທິບ ແພລນບີ ມີເດຍ ລາວ ຈຳກັດ (PPB), ຊຶ່ງເປັນຜູ້ນຳດ້ານສື່ໂຄສະນາໃຫຍ່ທີ່ສຸດໃນລາວ ໄດ້ຈັດງານລ້ຽງຂອບໃຈບັນດາລູກຄ້າທຸກທ່ານ ທີ່ໃຫ້ການສະໜັບສະໜູນບໍລິສັດຕະຫຼອດມາ.

ໃນພິທີອັນມີຄວາມໝາຍສໍາຄັນນີ້, ໃຫ້ກຽດເຂົ້າຮ່ວມຂອງທ່ານ ດາວວອນ ພະຈັນທະວົງ, ຮອງປະທານສະພາການຄ້າ ແລະ ອຸດສະຫະກໍາແຫ່ງຊາດລາວ; ທ່ານ ສຸລິວັນ ພົມມະຫາໄຊ, ຫົວໜ້າພະແນກໂຍທາທິການ ແລະ ຂົນສົ່ງ ນະຄອນຫຼວງວຽງຈັນ; ທ່ານ ນາງ ວິໄລວອນ ຈັນທະລາຕີ, ຫົວໜ້າພະແນກຖະແຫຼງຂ່າວ-ວັດທະນະທຳ ແລະ ທ່ອງທ່ຽວ ນະຄອນຫຼວງວຽງຈັນ; ທ່ານ ສອນໄຊ ສີສົມພັນ, ຮອງຫົວໜ້າຫ້ອງວ່າການປົກຄອງນະຄອນຫຼວງວຽງຈັນ ແລະ ບັນດາລູກຄ້າເຂົ້າຮ່ວມ.

ໂອກາດນີ້, ທ່ານ ໄຊຍະສອນ ປັນຍາທິບ, ໃນນາມຜູ້ສ້າງຕັ້ງ ແລະ ຜູ້ອຳນວຍການໃຫຍ່ ບໍລິສັດ ປັນຍາທິບ ແພລນບີ ມີເດຍ ລາວ ຈຳກັດ ກ່າວບາງຕອນສໍາຄັນ ວ່າ: ຂ້າພະເຈົ້າຮູ້ສຶກເປັນກຽດຢ່າງຍິ່ງທີ່ໄດ້ຕ້ອນຮັບທ່ານ ເຂົ້າສູ່ງານລ້ຽງຂອບໃຈລູກຄ້າ ແລະ ຂອບໃຈເປັນຢ່າງສູງ ທີ່ທ່ານສະຫຼະເວລາອັນມີຄ່າເຂົ້າຮ່ວມງານຂອງພວກເຮົາ.

ບໍລິສັດ ດໍາເນີນທຸລະກິດມາໄດ້ 5 ປີ ຮອດປັດຈຸບັນ, ພວກເຮົາກາຍເປັນຜູ້ນໍາດ້ານສື່ໂຄສະນາທີ່ໃຫຍ່ທີ່ສຸດ ຢູ່ໃນນະຄອນຫຼວງວຽງຈັນ ທີ່ໃຫ້ບໍລິການຢ່າງຄົບວົງຈອນ ລວມມີ: ປ້າຍບິວບອດຂະໜາດໃຫຍ່, ຂະໜາດນ້ອຍ, ປ້າຍໃນອາຄານສະໜາມບິນ, ທາງດ່ວນ, ທາງເຂົ້າ-ອອກສະຖານີລົດໄຟລາວ-ຈີນ ແລະ ຈຸດສໍາຄັນຕ່າງໆໃນຕົວເມືອງ.

ຍ້ອນໄດ້ຮັບຄວາມເຊື່ອໝັ້ນ ແລະ ອໍານວຍຄວາມສະດວກຈາກພາກລັດ, ຄູ່ຮ່ວມທຸລະກິດ ແລະ ບັນດາທ່ານທີ່ໃຫ້ການສະໜັບສະໜູນບໍລິສັດຕະຫຼອດມາ, ຈຶ່ງເຮັດໃຫ້ພວກເຮົາປະສົບຜົນສໍາເລັດໃນມື້ນີ້ ແລະ ພວກເຮົາໄດ້ກ້າວເຂົ້າສູ່ການປ່ຽນແປງອີກບາດກ້າວໜື່ງທີ່ທັນສະໄໝຍິ່ງຂຶ້ນ ຄືການສ້າງເຄືອຂ່າຍຈໍແອວອີດີ ທີ່ຫາກໍ່ສ້າງສໍາເລັດ 8 ຈໍ ພາຍໃນຕົວເມືອງນະຄອນຫຼວງວຽງຈັນ; ຊຶ່ງຈໍທັງໝົດແມ່ນມີຄວາມລະອຽດສູງ, ຄົມຊັດ, ມີລະບົບປັບແສງແບບອັດຕະໂນມັດ ແລະ ໄດ້ມາດຕະຖານສາກົນ ເພື່ອໃຫ້ພາບໂຄສະນາຂອງທ່ານມີຄ່າທີ່ສຸດ ແລະ ສັນຍາວ່າ: ຈະສືບຕໍ່ພັດທະນາສ້າງສັນຮູບແບບສື່ໂຄສະນາໃຫ້ມີຄວາມທັນສະໄໝຂຶ້ນໄປເລື້ອຍໆ.

ໃນຕອນທ້າຍ, ທ່ານ ໄຊຍະສອນ ປັນຍາທິບ ຍັງໄດ້ກ່າວສະແດງຄວາມຂອບໃຈລູກຄ້າຢ່າງສຸດໃຈ ແລະ ຂໍອວຍໄຊໃຫ້ພອນແກ່ບັນດາທ່ານ ຈົ່ງມີສຸຂະພາບເຂັ້ມແຂງ, ໂຊກໝານລໍ້າລວຍ ແລະ ກິດຈະການຈະເລີນຮຸ່ງເຮືອງຍິ່ງໆຂຶ້ນໄປ.

LEAVE A REPLY

Please enter your comment!
Please enter your name here