ອີງຕາມຖະແຫຼງຂ່າວ ຈາກກອງຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ໃຫ້ຮູ້ວ່າ : ເລີ້ມແຕ່ວັນທີ 01 ມັງກອນ – 11 ສິງຫາ 2021 ຢູ່ແຂວງຄໍາມ່ວນປະກອບມີສູນປິ່ນປົວຜູ້ຕິດເຊື້ອທັງໝົດ 03 ສູນຄື: ສູນປິ່ນປົວຢູ່ພະແນກ ຖວທ ແຂວງ (ຫຼັງເກົ່າ ), ສູນປິ່ນປົວໂຮງໝໍທະຫານແຂວງ ແລະ ສູນປິ່ນປົວຢູ່ມໍປາຍທ່າແຂກ.

ສະເພາະໃນວັນທີ 11 ສິງຫາ 2021 ນີ້ແຂວງຄໍາມ່ວນມີຈໍານວນຜູ້ຕິດເຊື້ອໃໝ່ 60 ຄົນເຊິ່ງຈະໄດ້ນໍາໃຊ້ສູນມໍປາຍທ່າແຂກເປັນສະຖານທີ່ຮອງຮັບ, ຈໍານວນຜູ້ຕິດເຊື້ອສະສົມມີທັງໝົດ 423 ຄົນ. ໃນນັ້ນ ສູນປິ່ນປົວຢູ່ພະແນກ ຖວທ ແຂວງ (ຫຼັງເກົ່າ )ມີ 220 ຄົນ, ຕ່າງແຂວງມີ 03 ຄົນ , ຍິງ 03 ຄົນ; ສູນປິ່ນປົວໂຮງໝໍທະຫານແຂວງມີ 75 ຄົນ ແລະ ສູນປິ່ນປົວຢູ່ມໍປາຍທ່າແຂກມີ 128 ຄົນ, ຕ່າງແຂວງ 06 ຄົນ, ຍິງ 02 ຄົນ . ໃນຈໍານວນຜູ້ຕິດເຊື້ອສະສົມມີຄົນທີ່ຢູ່ໃນເກນອາຍຸຕໍ່າກວ່າ 18 ປີລວມມີທັງໝົດ 29 ຄົນ , ຍິງ 12 ຄົນ ແຕ່ບໍ່ມີກໍລະນີເສຍຊີວິດ, ປິ່ນປົວຫາຍດີສະສົມ 100 ຄົນ.

ມາຮອດປະຈຸບັນມີຈໍານວນຜູ້ຕິດເຊື້ອສະສົມຍັງເຫຼືອຈາກ 03 ສູນປິ່ນປົວທັງໝົດ 323 ຄົນ,ຍິງ 181 ຄົນ. ສໍາລັບສູນກັກກັນເພື່ອຈໍາກັດບໍລິເວນຢູ່ແຂວງແມ່ນມີ 02 ຄື: ສູນສະໜາມກິລາແຂວງ ແລະ ສູນພະນົມພອນ . ເຊິ່ງໃນວັນທີ 11 ສິງຫາ 2021 ນີ້ມີຜູ້ກັກກັນຢູ່ສູນສະໜາມກິລາແຂວງຈໍານວນ 34 ຄົນ,ຈໍານວນຜູ້ກັກກັນສະສົມທັງສອງສູນລວມເຖິງບັນດາເມືອງຄື : ໜອງບົກ, ຫີນບູນ, ຍົມມະລາດ ແລະ ບົວລະພາມີ 3.345 ຄົນ ໃນນັ້ນ ສູນສະໜາມກິລາແຂວງຈໍານວນມີ 1.921 ຄົນ, ສູນພະນົມພອນ 1.048 ຄົນ, ໜອງບົກ 190 ຄົນ, ຫີນບູນ 145 ຄົນ, ຍົມມະລາດ 26 ຄົນ ແລະ ບົວລະພາ 09 ຄົນ.

ຜູ້ກັກກັນທີ່ມີອາຍຸຕໍ່າກວ່າ 18 ປີມີຈໍານວນ 278 ຄົນ , ຍິງ 145 ຄົນ , ຕ່າງແຂວງມີ 07 ຄົນ , ຍິງ 05 ຄົນ , ສໍາລັບຜູ້ກັກກັນທີ່ຄົບກໍານົດ 14 ວັນໃນວັນທີ 11 ສິງຫາ 2021 ມີຈໍານວນ 79 ຄົນ , ຄົບກໍານົດກັກກັນສະສົມມີທັງໝົດ 2.396 ຄົນ , ຍັງເຫຼືອຢູ່ສູນສະໜາມກິລາແຂວງ ແລະ ສູນພະນົມພອນມາຮອດປະຈຸບັນ 949 ຄົນ , ຍິງ 495 ຄົນ.

ໃນນັ້ນສູນສະໜາມກິລາແຂວງ 95 ຄົນ , ຍິງ 49 ຄົນ ( ໃນນັ້ນມີນັກສຶກສາຈົບຈາກຫວຽດນາມ 42 ຄົນ,ຍິງ 18 ຄົນ ); ສູນພະນົມພອນ 854 ຄົນ , ຍິງ 446 ຄົນ ( ໃນນັ້ນຮັບຈາກສູນສະໜາມກິລາແຂວງ 739 ຄົນ ) . ສະເພາະການກິນ,ຢູ່,ພັກ,ເຊົາຂອງພີ່ນ້ອງຄົນລາວເຮົາທີ່ກັບຄືນມາຈາກປະເທດເພື່ອນບ້ານນັ້ນທາງອໍານາດການປົກຄອງຂັ້ນຕ່າງໆພາຍໃນແຂວງແມ່ນໄດ້ອໍານວຍຄວາມສະດວກໃຫ້ຕາມຄວາມເໝາະສົມ.

ພ້ອມນັ້ນທາງອໍານາດການປົກຄອງຂັ້ນຕ່າງໆພາຍໃນແຂວງກໍ່ໄດ້ຮຽກຮ້ອງໃຫ້ພີ່ນ້ອງຄົນລາວເຮົາຈົ່ງກັບຄືນປະເທດຂອງຕົນໃຫ້ຖືກຕ້ອງຕາມລະບຽບກົດໝາຍ ແລະ ປະຕິບັດຕາມລະບຽບການທີ່ທາງຄະນະສະເພາະກິດວາງອອກຢ່າງເຂັ້ມງວດເພື່ອຫຼີກລ່ຽງການແຜ່ລະບາດເຊື້່ອພະຍາດໂຄວິດ-19ໄປສູ່ເຂດຊຸມຊົນເຊິ່ງຈະສົ່ງຜົນກະທົບໃນວົງກວ້າງຕໍ່ການດໍາລົງຊີວິດຂອງພໍ່ແມ່ປະຊາຊົນລວມເຖິງເສດຖະກິດ – ສັງຄົມພາຍໃນແຂວງ .

ສື່ມວນຊົນລາວ ມີຄວາມສຳຄັນໃນຫລາຍດ້ານ ໂດຍສະເພາະການປະກອບສ່ວນດ້ານການພັດທະນາເສດຖະກິດ-ສັງຄົມ ເປັນຕົ້ນແມ່ນ ໄດ້ນຳເອົາຂໍ້ມູນຂ່າວສານ ທີ່ເປັນປະໂຫຍດ ແລະ ຖືກຕ້ອງໄປຮອດປະຊາຊົນ ໂດຍຜ່ານພາຫະນະຂອງສື່ຫລາຍຮູບແບບ, ເຊິ່ງໃນເມື່ອກ່ອນແມ່ນຜ່ານໜັງສືພິມ, ວິທະຍຸ ແລະ ໂທລະພາບ, ແຕ່ມາຮອດປັດຈຸບັນ ໂລກພວກເຮົາໄດ້ມີການພັດທະນາ ແລະ ທັນສະໄໝ ສື່ກໍໄດ້ມີການປັບຕົວນຳໃຊ້ສື່ແບບໃໝ່ ໂດຍຜ່ານອິນເຕີເນັດ, ຜ່ານສື່ສັງຄົມອອນລາຍ.

ທ່ານ ສົມສະຫວາດ ພົງສາ ຫົວໜ້າກົມສື່ມວນຊົນ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ໄດ້ໃຫ້ສຳພາດຕໍ່ສື່ມວນຊົນ ໃນວັນທີ 10 ສິງຫາ 2021, ທີ່ນະຄອນຫລວງວຽງຈັນ ເນື່ອງໃນໂອກາດ ສະເຫລີມສະຫລອງວັນສື່ມວນຊົນລາວ ແລະ ການພິມຈຳໜ່າຍ ຄົບຮອບ 71 ປີ ວ່າ: ສື່ມວນຊົນແມ່ນກະບອກສຽງຂອງພັກ ເປັນຜູ້ທີ່ຈະຕ້ອງເຜີຍແຜ່ນະໂຍບາຍຂອງພັກ, ເປັນອາວຸດອັນແຫລມຄົມຂອງພັກ ເພື່ອເຮັດໃຫ້ການຕໍ່ສູ້ກູ້ຊາດໃນໄລຍະຜ່ານມາປະສົບຜົນສຳເລັດ, ມັນແມ່ນຜົນງານອັນຍິ່ງໃຫຍ່ຂອງສື່ຈຳນວນໜຶ່ງ ທີ່ໄດ້ປະກອບສ່ວນ, ສ່ວນມາຮອດໄລຍະປົກປັກຮັກສາ ແລະ ສ້າງສາພັດທະນາປະເທດຊາດ ພວກເຮົາໄດ້ສືບຕໍ່ກຳເອົາແນວທາງນະໂຍບາຍ ແລະ ໄດ້ຜັນຂະ ຫຍາຍ ເຮັດໃຫ້ແນວທາງນະໂຍບາຍດັ່ງກ່າວ ໄປຮອດໄປເຖິງປະຊາຊົນ ຈົນມາຮອດປັດຈຸບັນ ສື່ມວນຊົນຂອງພວກເຮົາ ກໍມີຄວາມໝາຍຄວາມສຳຄັນຫລາຍດ້ານ ໃນການປະກອບສ່ວນ ສ້າງສາພັດທະນາປະເທດຊາດ; ໂດຍສະເພາະ ດ້ານການພັດທະນາເສດຖະກິດ-ສັງຄົມ ສື່ພວກເຮົາແມ່ນມີຄວາມສຳຄັນຫລາຍ ເປັນຕົ້ນແມ່ນ ໄດ້ນຳເອົາຂໍ້ມູນຂ່າວສານທີ່ເປັນປະໂຫຍດໄປຮອດປະຊາຊົນ ໂດຍຜ່ານພາຫະ ນະຂອງສື່ຫລາຍຮູບແບບ, ເຊິ່ງໃນເມື່ອກ່ອນແມ່ນຜ່ານໜັງສືພິມ, ວິທະຍຸ ແລະ ໂທລະພາບ, ແຕ່ມາຮອດປັດຈຸບັນ ໂລກຂອງພວກເຮົາໄດ້ມີການພັດທະນາ ແລະ ທັນສະໄໝ ສື່ກໍໄດ້ມີການປັບຕົວນຳໃຊ້ສື່ແບບໃໝ່ ໂດຍຜ່ານອິນເຕີເນັດ, ຜ່ານສື່ສັງຄົມອອນລາຍ, ເຊິ່ງມີຄວາມໝາຍຄວາມສໍາຄັນຫລາຍ ເຮັດໃຫ້ສື່ເຮົານຳເອົາແນວທາງນະໂຍບາຍ, ນຳເອົາເຫດການສຳຄັນ, ປະຫວັດສາຂອງຊາດ ກໍຄືຂອງໂລກ ແລະ ໄດ້ນຳເອົາແຜນພັດທະນາເສດຖະກິດ-ສັງຄົມ ແຕ່ລະໄລຍະມາຜັນຂະຫຍາຍ ເຮັດໃຫ້ປະຊາຊົນໄດ້ຮັບຮູ້, ມີຄວາມເຂົ້າໃຈຂໍ້ມູນຂ່າວສານ. ພ້ອມນີ້, ສື່ມວນຊົນຍັງໄດ້ປະກອບສ່ວນສໍາຄັນໃນການໂຄສະນາເຜີຍແຜ່ ເຮັດໃຫ້ຊາວໂລກໄດ້ຮູ້ເຖິງປະເທດລາວຫລາຍຂຶ້ນ ຈາກໃນເມື່ອກ່ອນຫລາຍໆປະເທດບໍ່ຮູ້ຈັກປເທດລາວ ແຕ່ມາຮອດປັດຈຸບັນ ປະເທດລາວກໍໄດ້ເປັນທີ່ຮູ້ຈັກໄປທົ່ວໂລກ.

ໃນໄລຍະ 2016-2021 ພາຍໃຕ້ການນໍາພາຂອງຄະນະພັກກະຊວງ ສື່ມວນຊົນລາວ ໃນຖາ ນະເປັນກະບອກສຽງທີ່ແຫລມຄົມຂອງພັກ, ລັດ ໃນການໂຄສະນາເຜີຍແຜ່ແນວທາງນະໂຍບາຍ, ມະ ຕິຂອງພັກ, ກົດໝາຍ ແລະແຜນພັດທະນາເສດຖະກິດ-ສັງຄົມ ຂອງລັດຖະບານ. ອັນພົ້ນເດັ່ນແມ່ນໂຄສະນາຜົນສໍາເລັດໃນການປົກປັກຮັກສາ ແລະ ສ້າງສາພັດທະນາປະເທດຊາດໃນທຸກດ້ານ, ສ່ອງແສງ ເຫດການສໍາຄັນທີ່ເກີດຂຶ້ນຢູ່ພາຍ ໃນຄືກອງປະຊຸມໃຫຍ່ຄັ້ງທີ XI ຂອງພັກ ແລະ ບັ້ນເລືອກຕັ້ງສະພາຜູ້ແທນທົ່ວປະທດຄັ້ງທີ IX, ສື່ມວນຊົນລາວ ໄດ້ເປັນເຈົ້າການໃນການໂຄສະນາຕອບໂຕ້ ນະ ໂຍບາຍຫັນປ່ຽນໂດຍສັນຕິ ຂອງສັດຕູ ທີ່ຫວັງມ້າງເພທໍາລາຍລະບອບປະຊາທິປະໄຕ ປະຊາຊົນ, ຕີຖອຍຖ້ອຍທໍານອງບິດເບືອນ ໃສ່ຮ້າຍປ້າຍສີຂອງກຸ່ມຄົນບໍ່ດີ ແລະ ອິດທິກໍາລັງປໍລະປັກຕໍ່ການນໍາພາຂອງພັກ-ລັດ ກໍ່ຄື ໝາກຜົນໃນການປົກປັກຮັກສາ ແລະ ສ້າງສາພັດທະນາປະເທດຊາດ ເປັນຕົ້ນ ການສ້າງເຂື່ອນໄຟຟ້າ, ການສ້າງທາງລົດໄຟ ຄວາມໄວສູງ ລາວ-ຈີນ, ການສ້າງທາງດ່ວນ, ອອກຂ່າວບິດເບືອນຄວາມຈິງ, ຂ່າວປອມ ແລະ ພ້ອມທັງຕັ້ງຂໍ້ກ່າວຫາ ກ່ຽວກັບສິດທິມະນຸດ, ປະຊາທິປະ ໄຕ, ເຜົ່າ ແລະ ສາສະໜາ, ສື່ມວນຊົນລາວໄດ້ເຮັດໜ້າທີ່ ໃນການນໍາພາຫາງສຽງສັງຄົມ ໃນການຕ້ານສະກັດກັ້ນການລະບາດ ພະຍາດ COVID-19, ປະກົດການຫຍໍ້ທໍ້ທາງດ້ານເສດຖະກິດ ແລະ ວັດທະນະທໍາ-ສັງຄົມ ເປັນຕົ້ນ ການແກ້ໄຂຜົນຮ້າຍຈາກໄພທຳມະຊາດ, ອັນໄດ້ສະແດງໃຫ້ເຫັນເຖິງຜົນສໍາເລັດຢ່າງເອກອ້າງ ແລະ ໜ້າເພິ່ງພໍໃຈ.

ພ້ອມນີ້, ທ່ານ ສົມສະຫວາດ ພົງສາ ເນັ້ນຕື່ມວ່າ: ສື່ມວນຊົນ ຕ້ອງສືບຕໍ່ເປັນເຈົ້າການ ປັບ ປຸງຕົນເອງທັງທາງດ້ານເນື້ອໃນ ແລະ ຮູບການ ໃຫ້ກະທັດຮັດ, ແທດຕົວຈິງ ແລະ ມີປະສິດທິຜົນສູງຂຶ້ນ, ຮັບປະກັນຄວາມໝັ້ນຄົງດ້ານຂໍ້ມູນຂ່າວສານ, ຕິດພັນກັບການຕິດຕາມກວດກາ ຜະລິດຕະພັນຂອງສື່ມວນຊົນ ແລະ ພິມຈຳໜ່າຍ ໃຫ້ດຳເນີນໄປຖືກທິດ ເພື່ອຮັບໃຊ້ ພັກ, ລັດ ແລະ ປະຊາຊົນເຮົາ. ເອົາໃຈໃສ່ເປັນພິເສດ ຕໍ່ການຕິດຕາມກວດກາເນື້ອໃນ, ຫາງສຽງສັງຄົມ ຖ້ອຍທຳນອງທີ່ບໍ່ຫວັງດີຕໍ່ລະບອບໃໝ່ ຂອງພວກຄົນບໍ່ດີ, ຢູ່ຕາມສື່ສັງຄົມອອນລາຍ ທັງເປັນເຈົ້າການໃນການຕອບຕ້ານຢ່າງທັນການ ແລະ ຖືກທິດ.

ຂ່າວ-ພາບ: ສົມຫວັງ | ຂປລ

ການດໍາເນີນກອງປະຊຸມສະໄຫມວິສາມັນເທື່ອທີ1ຂອງສະພາແຫ່ງຊາດຊຸດທີ 9 ອັດລົງດ້ວຍຜົນສໍາເລັດຢ່າງຈົບງາມໃນຕອນບ່າຍວັນທີ 10 ສິງຫາ 2021 ຢູ່ຫໍປະຊຸມສະພາແຫ່ງຊາດຫລັງໃຫມ່ ນະຄອນຫລວງວຽງຈັນ ພາຍຫລັງດໍາເນີນມາເປັນເວລາ 5ວັນ ພາຍໃຕ້ການເປັນປະທານຂອງທ່ານ ໄຊສົມພອນ ພົມວິຫານ ກໍາມະການກົມການເມືອງສູນກາງພັກປະທານສະພາແຫ່ງຊາດ, ມີການນໍາຂັ້ນສູງ,ອະດີດການນໍາ ຂັ້ນສູງພັກລັດ, ສະມາຊິກສະພາແຫ່ງຊາດແຕ່ລະເຂດເລືອກຕັ້ງ ພ້ອມດ້ວຍ ພາກສ່ວນກ່ຽວຂ້ອງເຂົ້າຮ່ວມ.

ທ່ານໄຊສົມພອນ ພົມວິຫານ ໄດ້ກ່າວສູນທອນພົດອັດກອງປະຊຸມວ່າ: ກອງປະຊຸມສະໄໝວິສາມັນເທື່ອທີ 1 ຂອງສະພາແຫ່ງຊາດ ຊຸດທີ IX ໄດ້ດໍາເນີນມາເປັນເວລາ 5 ວັນ ດ້ວຍຈິດໃຈເຄັ່ງຮ້ອນ ທີ່ເຕັມໄປດ້ວຍບັນຍາກາດ ຟົດຟື້ນແຫ່ງການເສີມຂະຫຍາຍ ສິດປະຊາທິປະໄຕ, ການຍົກສູງຄວາມຮັບຜິດຊອບການເມືອງຂອງບັນດາທ່ານສະມາຊິກສະພາແຫ່ງຊາດ ທີ່ເຂົ້າຮ່ວມກອງະຊຸມ ອັນໄດ້ເຮັດໃຫ້ກອງປະຊຸມໃນຄັ້ງນີ້ ສາມາດບັນລຸຜົນສໍາເລັດຕາມຈຸດປະສົງລະດັບຄາດໝາຍທີ່ກໍານົດໄວ້.

ກອງປະຊຸມສະໄໝວິສາມັນເທື່ອນີ້ ໄດ້ສຸມໃສ່ ຄົ້ນຄວ້າ ແລະ ພິຈາລະນາ ເອົາວາລະແຫ່ງຊາດ ກ່ຽວກັບການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ການແກ້ໄຂບັນຫາຢາເສບຕິດ ແລະ ມີການປຶກສາຫາລື ປັບປຸງກົດໝາຍທີ່ກ່ຽວຂ້ອງ ດ້ວຍຈິດໃຈເຄັ່ງຮ້ອນ, ເຕັມໄປດ້ວຍຄວາມຮັບຜິດຊອບສູງ ແລະໄດ້ຮັບຮອງເອົາດ້ວຍຄະແນນສຽງສ່ວນຫຼາຍ. ກອງປະຊຸມສະແດງຄວາມຊົມເຊີຍ ແລະ ຕີລາຄາສູງ ຕໍ່ລັດຖະບານທີ່ໄດ້ມີຄວາມພະຍາຍາມສູ້ຊົນກະກຽມ ວາລະແຫ່ງຊາດ ທັງສອງສະບັບ ແລະ ສາມາດນໍາເຂົ້າພິຈາລະນາໃນກອງປະຊຸມສະໄໝວິສາມັນຂອງສະພາແຫ່ງຊາດເທື່ອນີ້. ກອງປະຊຸມ ສະເໜີ ລັດຖະບານສືບຕໍ່ນໍາເອົາຄວາມຄິດເຫັນຂອງກອງປະຊຸມ ໄປປັບປຸງເຂົ້າໃສ່ວາລະແຫ່ງຊາດ ໃຫ້ມີເນື້ອໃນຮັດກຸມ, ຄົບຖ້ວນ ແລະ ສາມາດຈັດຕັ້ງປະຕິບັດໄດ້, ຮີບຮ້ອນ ສ້າງ ແລະ ປັບປຸງນິຕິກໍາໃຕ້ກົດໝາຍ ທີ່ພົວພັນກັບວາລະແຫ່ງຊາດ ໃຫ້ເປັນລະບົບໂດຍໄວ ແນໃສ່ຜ່ອນຄາຍສະພາບຄວາມຫຍຸ້ງຍາກດ້ານເສດຖະກິດ-ສັງຄົມ, ສືບຕໍ່ສ້າງໃຫ້ສັງຄົມມີຄວາມສະຫງົບຂອງສັງຄົມ ເປັນລະບຽບຮຽບຮ້ອຍ, ຮັກສາສະຖຽນລະພາບທາງດ້ານການເມືອງຢ່າງໜັກແໜ້ນ ແລະ ປັບປຸງຊີວິດການເປັນຢູ່ຂອງປະຊາຊົນ ໃຫ້ນັບມື້ດີຂຶ້ນເທື່ອລະກ້າວ.

ກອງປະຊຸມ ໄດ້ພິຈາລະນາ ແລະ ຮັບຮອງເອົາການປັບປຸງເນື້ອໃນບາງມາດຕາ ຂອງກົດໝາຍວ່າດ້ວຍການຄຸ້ມຄອງສ່ວຍສາອາກອນ, ກົດໝາຍວ່າດ້ວຍອາກອນມູນຄ່າເພີ່ມ, ກົດໝາຍວ່າດ້ວຍອາກອນລາຍໄດ້, ກົດໝາຍວ່າດ້ວຍອາກອນຊົມໃຊ້ ແລະ ກົດໝາຍວ່າດ້ວຍຢາເສບຕິດ ເພື່ອສ້າງເງື່ອນໄຂ ແລະ ເປັນເຄື່ອງມືສໍາຄັນໃນການປະກອບສ່ວນເຮັດໃຫ້ການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ ດ້ວຍກົດໝາຍ ເປັນຮູບປະທໍາ. ກອງປະຊຸມ ສະເໜີໃຫ້ຄະນະຮັບຜິດຊອບ ນໍາເອົາຄວາມຄິດເຫັນຂອງສະມາຊິກສະພາແຫ່ງຊາດ ໄປສືບຕໍ່ປັບປຸງໃສ່ບັນດາຮ່າງເນື້ອໃນປັບປຸງບາງມາດຕາຂອງບັນດາກົດໝາຍດັ່ງກ່າວ ໃຫ້ຄົບຖ້ວນສົມບູນ ເພື່ອນໍາໄປສູ່ການຈັດຕັ້ງປະຕິບັດວາລະແຫ່ງຊາດ ມີຜົນສໍາເລັດເປັນຢ່າງດີ.

ກອງປະຊຸມໄດ້ຮັບຟັງການລາຍງານຂອງລັດຖະບານ ກ່ຽວກັບ ສະພາບການແຜ່ລະບາດຂອງເຊື້ອພະຍາດໂຄວິດ-19 ແລະ ມາດຕະການແກ້ໄຂຜົນກະທົບຈາກການແຜ່ລະບາດຂອງພະຍາດດັ່ງກ່າວ. ກອງປະຊຸມສະແດງຄວາມຊົມເຊີຍ ຕໍ່ທຸກຄວາມພະຍາຍາມຂອງລັດຖະບານໃນການນໍາພາ-ຊີ້ນໍາ ຂະແໜງການກ່ຽວຂ້ອງ ເອົາໃຈໃສ່ ກໍານົດນະໂຍບາຍ, ມາດຕະການ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ແຕ່ຫົວທີ, ພ້ອມທັງເປັນເຈົ້າການ ແລະ ຊຸກຍູ້ສັງຄົມເຂົ້າຮ່ວມຈັດຕັ້ງປະບັດບັນດາມາດຕະການຢ່າງເຂັ້ມງວດ ອັນໄດ້ປະກອບສ່ວນເຮັດໃຫ້ປະເທດລາວຂອງພວກເຮົາສາມາດຄວບຄຸມການລະບາດ ແລະ ຜ່ອນຜັນມາດຕະການຕ່າງໆລົງໄດ້ເທື່ອລະກ້າວ.

ນອກຈາກນັ້ນ, ກອງປະຊຸມ ຍັງໄດ້ຮັບຟັງການຊີ້ແຈງອະທິບາຍ ຈາກທ່ານນາຍົກລັດຖະມົນຕີ ແລະ ບັນດາລັດຖະມົນຕີ ທີ່ກ່ຽວຂ້ອງ ກ່ຽວກັບ ບັນຫາທີ່ກອງປະຊຸມມີຄວາມສົນໃຈ.

ພິເສດ, ກອງປະຊຸມຄັ້ງນີ້ໄດ້ຮັບກຽດຢ່າງສູງ ຕ້ອນຮັບການມາຢ້ຽມຢາມ ຂອງຄະນະຜູ້ແທນຂັ້ນສູງ ຂອງພັກ, ລັດ ສາທາລະນະລັດ ສັງຄົມນິຍົມຫວຽດນາມ ທີ່ນໍາພາໂດຍ ສະຫາຍ ຫງວຽນຊວນ ຟຸກ, ກໍາມະການກົມການເມືອງສູນກາງພັກ, ປະທານປະເທດ ສສ ຫວຽດນາມ ຊຶ່ງໄດ້ມີການກ່າວຄໍາປາໄສ ທີ່ສໍາຄັນ ຕໍ່ກອງປະຊຸມສະໄໝວິສາມັນ ຂອງສະພາແຫ່ງຊາດ ແລະ ໄດ້ເຂົ້າຮ່ວມພິທີ ມອບ-ຮັບ ຫໍສະພາແຫ່ງຊາດຫຼັງໃໝ່ ຢ່າງເປັນທາງການ ໂດຍມີການເຂົ້າຮ່ວມຂອງສະຫາຍ ທອງລຸນ ສີສຸລິດ, ເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດແຫ່ງ ສປປ ລາວ ແລະ ການນໍາຂັ້ນສູງຂອງພັກ, ລັດ ຫວຽດນາມ ແລະ ລາວ. ການຢ້ຽມຢາມ, ການກ່າວປາໄສ ແລະ ການຈັດຕັ້ງພິທີເປີດນໍາໃຊ້ ແລະມອບຮັບ ຫໍສະພາແຫ່ງຊາດຫຼັງໃໝ່ ໄດ້ກາຍເປັນເຫດການການເມືອງທີ່ສໍາຄັນ ໃນການພົວພັນ, ຮ່ວມມື ລະຫວ່າງ ສອງປະເທດ ລາວ-ຫວຽດນາມ. ພັກ, ລັດ ແລະ ສະພາແຫ່ງຊາດລາວ ໄດ້ຮັບຂອງຂວັນອັນລໍ້າຄ່າ ຈາກພັກ, ລັດ ແລະ ປະຊາຊົນຫວຽດນາມ ອ້າຍນ້ອງ, ຊຶ່ງເປັນການສະແດງໃຫ້ເຫັນເຖິງໝາກຜົນຕົວຈິງຂອງການຮ່ວມມືຮອບດ້ານ ລະຫວ່າງ ປະຊາຊົນສອງຊາດ ລາວ-ຫວຽດນາມ, ຫວຽດນາມ-ລາວ.

ທ່ານໄຊສົມພອນ ພົມວິຫານ ປະທານສະພາແຫ່ງຊາດ ກ່າວໃນຕອນທ້າຍວ່າ: ກອງປະຊຸມສະໄໝວິສາມັນ ເທື່ອທີ 1 ຂອງສະພາແຫ່ງຊາດ ຊຸດທີ IX ຄັ້ງນີ້ ເປັນກອງປະຊຸມທີ່ມີຄວາມໝາຍສໍາຄັນ ໃນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ. ຜົນສໍາເລັດຂອງກອງປະຊຸມຄັ້ງນີ້ ຖືເປັນໝາກຜົນແຫ່ງສະຕິປັນຍາ, ການຍົກສູງຄວາມຮັບຜິດຊອບການເມືອງຂອງບັນດາທ່ານສະມາຊິກສະພາແຫ່ງຊາດ, ຄວາມຕັດສິນໃຈທີ່ມີລັກສະນະຍຸດທະສາດຂອງລັດຖະບານ ໄດ້ເຮັດໃຫ້ການດໍາເນີນກອງປະຊຸມຄັ້ງນີ້ບັນລຸຕາມແຜນການກໍານົດໄວ້.

ເພື່ອສືບຕໍ່ຈັດຕັ້ງຜັນຂະຫຍາຍຜົນສໍາເລັດຂອງກອງປະຊຸມຄັ້ງນີ້, ກອງປະຊຸມ ຮຽກຮ້ອງມາຍັງ ຄະນະປະຈໍາສະພາແຫ່ງຊາດ, ບັນດາກໍາມາທິການ, ຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງ, ລັດຖະບານ ຈົ່ງໄດ້ຜັນຂະຫຍາຍມະຕິກອງປະຊຸມຄັ້ງນີ້ ເຂົ້າໃນຂອບເຂດຄວາມຮັບຜິດຊອບຂອງຕົນ ຕິດພັນກັບການເອົາໃຈໃສ່ຢ່າງເຄັ່ງຮ້ອນ ໃນການປະຕິບັດວາລະແຫ່ງຊາດ ຕິດພັນກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດປະຈໍາປີ 2021-2023 ໃຫ້ໄດ້ຮັບໝາກຜົນເປັນຢ່າງດີ.

ຜົນສໍາເລັດຂອງກອງປະຊຸມຄັ້ງນີ້ ແມ່ນໝາກຜົນແຫ່ງການຫັນເອົາແນວທາງນະໂຍບາຍ, ມະຕິກອງປະຊຸມໃຫຍ່ຄັ້ງທີ XI ຂອງພັກ ກໍຄື ມະຕິກອງປະຊຸມວິສາມັນຂອງ ຄະນະບໍລິຫານງານສູນກາງພັກ ສະໄໝ ທີ XI ມາເປັນອັນລະອຽດໄວ້ໃນກົດໝາຍ ແລະ ທິດທາງວຽກງານຂອງສະພາແຫ່ງຊາດ ກໍຄື ບັນດາຂະແໜງການທີ່ກ່ຽວຂ້ອງ ເພື່ອເປັນບ່ອນອີງໃນການຈັດຕັ້ງປະຕິບັດໃຫ້ເປັນຂະບວນການຢ່າງກວ້າງຂວາງ ແລະ ໃຫ້ໄດ້ຮັບຜົນສໍາເລັດຕາມແຜນທີ່ກໍານົດໄວ້.

CR: Lao National Radio

ອີງຕາມແຈ້ງການ ຂອງຫ້ອງວ່າການສຳນັກງານນາຍົກລັດຖະມົນຕີ ເລື່ອງ ທິດຊີ້ນຳກ່ຽວກັບການສະເໜີຮັບເອົາໂຄງການກໍ່ສ້າງທາງດ່ວນ ນະຄອນຫຼວງວຽງຈັນ ຫາ ແຂວງໄຊສົມບູນ ຫາຊຽງຂວາງ ຫາ ແຂວງຫົວພັນ ອອກໄປຊາຍແດນລາວ-ຫວຽດນາມ (ດ່ານສາກົນນຳ້ໂສຍ) ດ້ວຍຮູບແບບ BOT.

ຫ້ອງວ່າການສຳນັກງານນາຍົກລັດຖະມົນຕີ ຂໍຖືເປັນກຽດແຈ້ງການຊີ້ນຳ ຂອງທ່ານ ນາຍົກລັດຖະມົນຕີ ມາຍັງທ່ານຊາບວ່າ:  ໃຫ້ກະຊວງໂຍທາທິການ ແລະ ຂົນສົ່ງ ສົມທົບກັບພາກສ່ວນ ທີ່ກ່ຽວຂ້ອງ ຄົນຄວ້າລະອຽດ ແລະ ໃຫ້ທັດສະນະ ແລ້ວມີຄວາມເຫັນລາຍງານທ່ານ ນາຍົກລັດຖະມົນຕີ ພາຍໃນ 15 ວັນ ລັດຖະການ. 

ເຊື່ອວ່າ ນີ້ອາດຈະເປັນອີກໜຶ່ງບາດກ້າວ ທີ່ສຳຄັນ ໃນການຊ່ວຍໃຫ້ຫຼາຍແຂວງໄປມາຫາສູ່ໄດ້ສະດວກສະບາດຍິ່ງຂຶ້ນ.