ເຫດລົດຕຳກັນ ເຂດເສັ້ໜທາງພູເກົ້າຫຼັກ

ໃນຕອນບ່າຍ ເວລາ14:34ນາທີ ຂອງວັນທີ 10 ຕຸລາ 2021 ໜ່ວຍກູ້ຊີບອົງການກາແດງລາວຫຼວງພະບາງ ລາຍງານໃຫ້ຮູ້ວ່າ: ໄດ້ຮັບແຈ້ງຈາກປະຊາຊົນຜ່ານເບີ 071 1625 ວ່າ​: ມີ​ອຸບັດຕິເຫດ​ຂັບຂີ່ລົດໃຫຍ່+ລົດໃຫຍ່ ຢູ່ບ້ານນາເມືອງ ເສັ້ນທາງພູເກົ້າຫຼັກ ເມືອງນານ ແຂວງຫລວງພະບາງ.

ເມື່ອຫນ່ວຍກູ້ຊີບອົງການກາແດງລາວກວດສອບພົບຜູ້ບາດເຈັບທັງຫມົດ2ຄົນ ເພດຊາຍ, ເສຍຊີວິດ01ຄົນ​ ເພດຊາຍ.

ພ້ອມຜູ້ບາດເຈັບຜູ້ທີ່01 ມີບາດແຜຢູ່ຂາໂຕ້ເບື້ອງຊ້າຍ ແລະ ແໜ້ນຫນ້າເອິກ (ບໍ່ປະສົ່ງໄປໂຮງໝໍ)

+ຜູ້ທີ່ 02 ມີບາດແຜເຫລີ້ນຢູ່ແຂນສອກເບື້ອງຊ້າຍ,ເຈັບບ່າໄຫ່ລເບື້ອງຊ້າຍ.

+ອີກສອງຄົນແມ່ນນຳສົ່ງໂຮງໜໍນາເມືອງກ່ອນ

+ຜູ້ເສຍຊິວິດ ຊື່ທ້າວ ກຸດສະລາດ ອາຍຸ 48ປີ ບ້ານເຊໂນ ເມືອງອຸທຸມພອນ ແຂວງສະຫວັນນະເຂດ.

ດັ່ງນັ້ນທາງທີມງານຫນ່ວຍກູ້ຊີບອົງການກາແດງລາວຈື່ງໄດ້ທຳການຫໍ່ສົບແລ້ວນຳສົ່ງໂຮງເຢັນໂຮງໜໍແຂວງ.ເພື່ອຕິດຕໍ່ໃຫ້ຍາດພີ່ນ້ອງມາຮັບເພືອເຮັດພິທີຕາມສາສະຫນາຕໍ່ໄປ

ກະຊວງປ້ອງກັນຄວາມສະຫງົບ ເຜີຍແຜ່ແຜນການຈັດຕັ້ງ ປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ຢູ່ແຂວງບໍ່ແກ້ວ

ວັນທີ 11 ຕຸລາ ນີ້, ກະຊວງ ປກສ ໄດ້ຈັດຕັ້ງເຜີຍແຜ່ແຜນການຈັດຕັ້ງປະຕິບັດວາລະແຫ່ງຊາດວ່າດ້ວຍ ການແກ້ໄຂບັນຫາຢາເສບຕິດ(2021 – 2023 ) ຢູ່ທີ່ແຂວງບໍ່ແກ້ວ, ເປັນປະທານໂດຍ ພົນຕີ ດຣ. ທອງເຫຼັກ ມັງໜໍ່ເມກ ຮອງລັດ ຖະມົນຕີ ກະ ຊວງ ປກສ, ມີ ທ່ານ ຈອມສີ ລັດຕະນະປັນ ຮອງເຈົ້າແຂວງບໍ່ແກ້ວ, ພ້ອມດ້ວຍຫົວໜ້າ- ຮອງຫົວ ໜ້າກອງບັນຊາການ ປກສ ແຂວງ, ທະຫານແຂວງ, ອົງການໄອຍະການ, ສານປະຊາ ຊົນ ແລະ ພາກ ສ່ວນທີ່ກ່ຽວຂ້ອງເຂົ້າຮ່ວມ.

ໃນພິທີ, ຄະນະຮັບຜິດຊອບ ໄດ້ຜ່ານແຜນການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ( 2021-2023 ) ໂດຍມີຈຸດປະສົງເພື່ອຍົກສູງຄວາມຮັບຮູ້,ເຂົ້າໃຈ, ຄວາມເປັນ ເອກະພາບທາງດ້ານທັດ ສະນະແລະຄວາມຮັບຜິດ ຊອບໃນການນຳພາ-ຊີ້ນຳ ຂອງຄະນະພັກ-ຄະນະບັນຊາແຕ່ລະຂັ້ນຂອງກຳລັງປ້ອງກັນຄວາມສະ ຫງົບ ໃນການປະຕິບັດຕົວຈິງ; ເພື່ອເຮັດໃຫ້ຄະນະ ພັກ-ຄະນະບັນຊາແຕ່ລະຂັ້ນ ກໍາແໜ້ນເນື້ອໃນສຳ ຄັນທີ່ເປັນພື້ນຖານ ຮັບປະກັນໃຫ້ແກ່ການແກ້ໄຂບັນຫາຢາເສບຕິດ ດຳເນີນໄປຢ່າງເປັນລະບົບ, ຕໍ່ເນື່ອງ, ປະຕິບັດຕາມຂັ້ນຕອນຂອງກົດ ໝາຍ,ເດັດຂາດ, ໂປ່ງໃສ, ເຂັ້ມງວດ, ເປັນມືອາຊີບ ແລະ ທັນເວລາ; ເພື່ອແກ້ໄຂສາເຫດ ແລະ ເງື່ອນໄຂພາໃຫ້ເກີດບັນຫາຢາເສບຕິດ ໃຫ້ຖືກກັບສະພາບຈຸດພິ ເສດ ຂອງແຕ່ລະກົມກອງ, ຂະແໜງການ ແລະ ທ້ອງຖິ່ນແຕ່ລະຂັ້ນ, ເສີມຂະຫຍາຍຜົນງານ, ຜົນ ສຳເລັດທີ່ຍາດມາໄດ້.

ພ້ອມກັນນັ້ນ,ກໍປັບປຸງແກ້ໄຂດ້ານອອ່ນ, ຂໍ້ຄົງຄ້າງ ໃນໄລຍະທີ່ຜ່ານມາ. ວິທີຈັດຕັ້ງປະຕິບັດວາລະແຫ່ງຊາດ ໄດ້ແບ່ງ ອອກເປັນ 3 ໄລຍະ ຄື:

– ໄລຍະທີ 1: ເລີ່ມແຕ່ເດືອນ ກັນຍາ-ທັນວາ 2021 ແມ່ນໄລຍະກະກຽມຄວາມພ້ອມ ແລະ ເຊື່ອມຊື່ມເອກະສານ ເຊັ່ນ: ຄຳສັງຂອງກົມການເມືອງສູນ ກາງພັກ ເລກທີ 02/ກມສພ, ລົງວັນທີ 26 ກໍລະ ກົດ 2021 ວ່າດ້ວຍເພີ່ມທະວີການນຳພາ ຊີ້ນຳຂອງຄະນະພັກແຕ່ລະຂັ້ນ ຕໍ່ການສະກັດກັ້ນ ແລະ ແກ້ໄຂບັນຫາ ຢາເສບຕິດ; ມະຕິຂອງສະພາແຫ່ງ ຊາດ ເລກທີ 04/ສພຊ, ລົງວັນທີ 10 ສິງຫາ 2021 ວ່າດ້ວຍການຮັບຮອງເອົາວາລະແຫ່ງຊາດວ່າດ້ວຍ ການແກ້ໄຂບັນຫາ ຢາເສບຕິດ ( 2021-2023); ວາລະແຫ່ງຊາດ ວ່າດ້ວຍການແກ້ໄຂບັນຫາຢາ ເສບຕິດ; ກົດໝາຍວ່າດ້ວຍການປັບປຸງ ບາງມາດ ຕາຂອງກົດໝາຍວ່າດ້ວຍຢາເສບຕິດ ເລກທີ02/ສພຊ, ລົງວັນທີ 9 ສິງຫາ 2021; ແຈ້ງການຂອງຫ້ອງວ່າ ການສຳນັກງານນາຍົກລັດຖະມົນຕີ ເຖິງ ບັນດາກະຊວງ, ອົງການທຽບເທົ່າ ແລະ ບັນດາແຂວງ-ນະຄອນຫຼວງ ກ່ຽວກັບການຈັດຕັ້ງຜັນຂະ ຫຍາຍວາລະແຫ່ງຊາດ ແລະ ເອກະສານ, ນິຕິກຳອື່ນໆທີ່ກ່ຽວຂ້ອງ.

– ໄລຍະທີ 2: ແຕ່ເດືອນມັງກອນ 2022 – ເມສາ 2023 ( ໄລຍະເກັບຂໍ້ມູນ-ວິໄຈຂໍ້ມູນ,ຈັດຕັ້ງປະຕິບັດແຜນການ ແລະ ແກ້ໄຂບັນຫາຢາເສບຕິດຕາມ 6 ແຜນວຽກຈຸດສຸມ ທີ່ໄດ້ກຳນົດໃນວາລະແຫ່ງຊາດ ສ້າງຄວາມຮັບຮູ້ໃນທົ່ວສັງຄົມດ້ວຍການສຶກ ສາອົບຮົມ, ໂຄສະນາເຜີຍແຜ່ລະບຽບກົດໝາຍ ແລະ ຜົນຮ້າຍຂອງຢາເສບຕິດ; ສ້າງຂະບວນການ ສະເຫຼີມສະຫຼອງວັນແຫ່ງຊາດ, ວັນສາກົນຕ້ານຢາເສບຕິດ ແລະ ປຸກລະດົມຂົນຂວາຍເງິນເຂົ້າກອງທຶນຄວບຄຸມ, ສະກັດ ກັ້ນ ແລະ ຕ້ານຢາເສບຕິດ; ລົງໂຄສະນາເຜີຍແຜ່ສຶກສາອົບຮົມບັນດາບ້ານເປົ້າ ໝາຍທີ່ກໍານົດໄວ້ ໃຫ້ໄດ້ 80% ຂຶ້ນໄປຂອງຈຳ ນວນບ້ານເປົ້າໝາຍທັງໝົດ.

– ໄລຍະທີ 3: ແຕ່ເດືອນກັນຍາ ຫາ ເດືອນທັນວາ 2023 ( ໄລຍະສະຫຼຸບ, ປະ ເມີນຜົນການຈັດຕັ້ງປະຕິບັດວາລະແຫ່ງຊາດ ) ມອບໃຫ້ຄະນະ ພັກ- ການນຳຂັ້ນກະຊວງ, ຂະແໜງການທີ່ກ່ຽວຂ້ອງ ແລະ ອຳນາດການປົກຄອງທ້ອງຖິ່ນແຕ່ລະຂັ້ນຈັດຕັ້ງ ການສະຫຼຸບ, ປະເມີນຜົນ, ຕີລາ ຄາຄືນການຈັດຕັ້ງປະຕິບັດ,ຖອນຖອນບົດຮຽນຂອງວາລະແຫ່ງຊາດ ແລະ ຈັດຕັ້ງການຍ້ອງຍໍຊົມ ເຊີຍຕໍ່ກົມກອງ ແລະ ບຸກຄົນຜູ້ທີ່ມີຜົນງານດີເດັ່ນ ໃຫ້ສຳເລັດພາຍໃນ ເດືອນ ທັນວາ 2023.

ພ້ອມນີ້, ຄະນະຮັບຜິດຊອບ ຍັງໄດ້ເຜີຍແຜ່ຄໍາສັງຂອງກົມການເມືອງສູນກາງພັກ ເລກທີ 02/ກມສພ, ລົງວັນທີ 26 ແຫ່ງ ຊາດວ່າດ້ວຍການແກ້ ໄຂບັນຫາຢາ ເສບຕິດ; ກົດໝາຍວ່າດ້ວຍການປັບ ປຸງ ບາງມາດຕາຂອງກົດໝາຍວ່າດ້ວຍຢາເສບ ຕິດ ເລກທີ 02/ສພຊ,ລົງວັນທີ 9 ສິງຫາ 2021; ຄຳສັ່ງ ເລກທີ 19/ ນຍ,ລົງວັນທີ 4 ຕຸລາ 2021 ກ່ຽວກັບການຈັດຕັ້ງປະ ຕິບັດວາລະແຫ່ງຊາດ ວ່າດ້ວຍການແຂ້ໄຂບັນຫາຢາເສບຕິດ ( 2021-2023 ); ແຈ້ງ ການຂອງຫ້ອງວ່າ ການສຳນັກງານນາຍົກລັດຖະ ມົນຕີ ເຖິງບັນດາກະຊວງ, ອົງ ການທຽບເທົ່າ ແລະ ບັນດາແຂວງ- ນະ ຄອນຫຼວງ ກ່ຽວກັບການຈັດຕັ້ງຜັນຂະ ຫຍາຍວາລະແຫ່ງຊາດ ແລະ ເອກະສານ, ນິຕິກຳອື່ນໆທີ່ກ່ຽວຂ້ອງ.

ໂອກາດດັ່ງກ່າວ, ຄະນະປະທານ ຍັງໄດ້ເນັ້ນໃຫ້ຜູ້ເຂົ້າຮ່ວມ ກໍຄື ຄະນະຮັບຜິດ ຊອບຕ້ອງກຳແໜ້ນ ບັນດາມະຕິ, ຄຳສັ່ງຂອງຂັ້ນເທິງ ເພື່ອນຳໄປຈັດຕັ້ງຜັນຂະ ຫຍາຍວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ໃຫ້ເກີດດອກອອກຜົນ ແລະ ມີຜົນສຳເລັດຕາມລະດັບຄາດໝາຍທີ່ກໍານົດໄວ້.

ພິທີ ບວດປ່າ, ບວດວັງນໍ້າ ບໍລິເວນອ່າງນໍ້າຕໍາ-ພູຍ່າຫງອກ

ຕາມການລາຍງານ ຂອງຫ້ອງການຖະແຫຼງຂ່າວ ແລະ ວັດທະນາທຳ ເມືອງແກ່ຂ່າວ: ເມືອງແກ່ນທ້າວ ແຂວງໄຊຍະບູລີ ໄດ້ຈັດຂຶ້ນ ໃນວັນທີ 8 ຕຸລາ 2021 ທີ່ຜ່ານມາ, ຢູ່ທີ່ພູຍ່າຫງອກ, ໂດຍການເປັນກຽດເຂົ້າຮ່ວມຂອງທ່ານ ອໍາຄາ ລັດສະໝີ ກໍາມະການພັກແຂວງ, ເລຂາພັກເມືອງ, ເຈົ້າເມືອງແກ່ນທ້າວ, ມີກໍາມະການປະຈໍາພັກເມືອງ, ກໍາມະການພັກເມືອງ, ຫົວໜ້າ, ຮອງຫົວໜ້າຫ້ອງການ, ກົມກອງ, ອົງການຈັດຕັ້ງ, ລັດວິສາຫະກິດ, ຜູ້ຊົງຄຸນວຸດທິ, ຄອບຄົວການນໍາ, ນັກທຸລະກິດຜູ້ປະກອບການ, ແລະ ນາຍບ້ານເທດສະບານເຂົ້າຮ່ວມຢ່າງພ້ອມພຽງ.

ໃນພິທີ ທ່ານ ປະເສີດ ອິນວົງຄໍາ ຮອງເລຂາພັກເມືອງ, ປະທານແນວລາວສ້າງຊາດເມືອງ ໄດ້ລາຍງານວ່າ: ພູຍ່າຫງອກຕັ້ງຢູ່ບ້ານນາບອນ ເມືອງແກ່ນທ້າວ ແຂວງໄຊຍະບູລີ ເຊິ່ງຫ່າງຈາກເທດສະບານເມືອງ ໄປທາງທິດເໜືອປະມານ 3 ກິໂລແມັດ ຕິດກັບເສັ້ນທາງຫຼວງແຫ່ງຊາດເລກ 4.

ພູຍ່າຫງອກໄດ້ກໍານົດເປັນຂອບເຂດດິນອະນຸລັກທາງດ້ານວັດທະນະທໍາ, ເຂດພັດທະນາແຫຼ່ງທ່ອງທ່ຽວທາງປະຫວັດສາດ ແລະ ທໍາມະຊາດຂອງເມືອງ ຕາມຂໍ້ຕົງລົງຂອງທ່ານເຈົ້າເມືອງ ສະບັບເລກທີ 855/ຈມ.ກທ, ລົງວັນທີ 2 ຕຸລາ 2017, ມີເນື້ອທີ່ທັງໝົດ 46,98 ເຮັກຕາ. ພາຍຫຼັງ ໄດ້ຮັບການແຕ່ງຕັ້ງຈາກທ່ານເຈົ້າເມືອງ, ຄະນະຮັບຜິດຊອບໄດ້ຄົ້ນຄ້ວາປຶກສາຫາລື ແບ່ງຄວາມຮັບຜິດຊອບໃຫ້ແຕ່ລະອານຸກໍາມະການ ສົມທົບກັບ ອົງການປົກຄອງບ້ານເທດສະບານ ເປັນເຈົ້າການໃນການຫ້າງຫາກະກຽມຄວາມພ້ອມຮອບດ້ານ ເພື່ອເຮັດໃຫ້ການຈັດພິທີບວດປ່າ, ບວດວັງນໍ້າ ມີເນື້ອໃນ, ມີຄວາມໝາຍ ໂດຍສະເພາະແມ່ນການປູກຈິດສໍານຶກໃຫ້ພໍ່ແມ່ປະຊາຊົນ ຮູ້ເຖິງຄວາມໝາຍ, ຄວາມສໍາຄັນ, ຮູ້ອະນຸລັກຮັກສາປ່າໄມ້, ສັດນໍ້າ-ສັດປ່າ ຢູ່ບໍລິເວນດັ່ງກ່າວ. ຜ່ານການຈັດຕັ້ງປະຕິບັດ ການຫ່າງຫາກະກຽມຂອງແຕ່ລະອະນຸກໍາມະການ ເຫັນວ່າມີທັງຂໍ້ສະດວກ, ຂໍ້ຫຍຸ້ງຍາກຫຼາຍປະການ, ບາງວຽກງານຍັງເຄື່ອນໄຫວບໍ່ທັນໄດ້ດີເທົ່າທີ່ຄວນ. ແຕ່ເຖິງຢ່າງໃດກໍ່ຕາມ ດ້ວຍຄວາມພະຍາຍາມຈຶ່ງເຮັດສໍາເລັດຫຼາຍຢ່າງ ເປັນຕົ້ນແມ່ນການຈັດສະຖານທີ່, ປະດັບປະດາ, ອະນາໄມ, ກະກຽມທາງດ້ານເນື້ອໃນ, ການແຕ່ງເຄື່ອງທາງດ້ານສາສະໜາ ແລະ ອື່ນໆ.

ຈົນສາມາດເຮັດໃຫ້ພິທີ ບວດປ່າ, ບວດວັງນໍ້າໃນຄັ້ງນີ້ ໄດ້ຈັດຂຶ້ນ. ຈາກນັ້ນ, ທ່ານ ອໍາຄາ ລັດສະໝີ ເຈົ້າເມືອງແກ່ນທ້າວ ໄດ້ມີຄໍາເຫັນຕໍ່ພິທີ ເຊິ່ງກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍ ຕໍ່ຄະນະຮັບຜິດຊອບທີ່ໄດ້ເອົາໃຈໃສ່ໃນການຫ້າງຫາກະກຽມ ແລະ ສ້າງທຸກເງື່ອນໄຂ ເຮັດໃຫ້ທຸກວຽກງານ ໄດ້ຮັບຜົນສຳເລັດ ແລະ ຮຽກຮ້ອງມາຍັງການຈັດຕັ້ງທຸກຂັ້ນ, ທຸກພາກສ່ວນ ທັງພາກລັດ ແລະ ເອກະຊົນຈົ່ງໄດ້ພ້ອມກັນຍົກສູງຄວາມຮັບຜິດຊອບ ມີການປູກ, ການບົວລະບັດຮັກສາ, ການປ່ອຍສັດນໍ້າ, ສັດປ່າ ເພື່ອເຮັດໃຫ້ເມືອງແກ່ນທ້າວ ປົກຫຸ້ມໄປດ້ວຍປ່າໄມ້ເວົ້າລວມ, ເວົ້າສະເພາະ ຄືສະຖານທີ່ແຫ່ງນີ້ໃຫ້ອຸດົມສົມບູນໄປດ້ວຍສັດນໍ້າ, ສັດປ່ານາໆພັນ. ພ້ອມກັນເອົາໃຈໃສ່ໃນການປະຕິບັດລະບຽບວ່າດ້ວຍການຄຸ້ມຄອງປ່າ ແລະ ວັງນໍ້າອ່າງນໍ້າຕໍາເຂດພູຍ່າຫງອກທີ່ໄດ້ກໍານົດ ແລະ ບໍລິເວນທີ່ໄດ້ບວດແລ້ວ ໃຫ້ເປັນເຂດອະໄພຍະທານ, ຄືນຄວາມອຸດົມສົມບູນໃຫ້ແກ່ທໍາມະຊາດ ແລະ ໃນຊຸມປີຕໍ່ໜ້າ ໃຫ້ສ້າງແຜນຈັດໃໝ່ ເປັນຄັ້ງທີ 2 ໃນສະຖານທີ່ແຫ່ງອື່ນຕື່ມອີກ ໃຫ້ໃຫຍ່ ແລະ ກວ້າງຂວາງກວ່າເກົ່າ ຖ້າຫາກບໍ່ມີການລະບາດຂອງພະຍາດ ໂຄວິດ-19.

ໃນພິທີຄັ້ງນີ້, ຍັງມີການໄຫວ້ພຣະສະມະທານສິນ, ສູດຈະເລີນພຸດທະມົນ ໂດຍພະສົງ 9 ອົງ, ຟັງພຣະທໍາມະເທດສະໜາ, ຖວາຍສັງຄະທານ, ເບ້ຍໄມ້, ນົກ, ປາ ແລະ ອື່ນໆ, ຈາກນັ້ນ, ໄດ້ຜ່ານກົດລະບຽບ ວ່າດ້ວຍການຄຸ້ມຄອງປ່າໄມ້ ເຂດພູຍ່າຫງອກ ແລະ ອ່າງນໍ້າຕໍາ , ຄາຣະວະຮັບພອນຢາດນໍ້າອຸທິດສ່ວນບຸນກຸສົນ, ນໍາເຄື່ອງໝາຍສັນຍາລັກ ຜ້າເຫຼືອງໄປຜູກມັດຕົ້ນໄມ້, ປ່ອຍນົກ, ປ່ອຍປາ ແລະ ປູກຕົ້ນໄມ້ຕື່ມອີກ.

ເຈົ້າແຂວງສະຫວັນນະເຂດ ລົງຢ້ຽມຢາມຜູ້ປະກອບການຟາມລ້ຽງສັດ ແລະເບິ່ງການກໍ່ສ້າງລະບົບຊົນລະປະທານຢູ່ເມືອງໄຊພູທອງ

ໃນວັນທີ 5 ຕຸລາ 2021 ນີ້, ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ ພ້ອມດ້ວຍຫົວໜ້າພະແນກກະສິກໍາ ແລະປ່າໄມ້ແຂວງ, ຫົວໜ້າຫ້ອງວ່າການປົກຄອງແຂວງ, ຫົວໜ້າພະແນກສາທາລະນະສຸກແຂວງ ແລະພາກສ່ວນທີ່ກ່ຽວຂ້ອງ ໄດ້ລົງພົບປະຢ້ຽມຢາມຜູ້ປະກອບການທຸລະກິດຟາມລ້ຽງສັດ ພ້ອມທັງລົງຕິດຕາມເບິ່ງການກໍ່ສ້າງລະບົບຊົນລະປະທານ ຢູ່ເມືອງໄຊພູທອງ. ໃນໂອກາດນີ້, ທ່ານເຈົ້າແຂວງສະຫວັນນະເຂດ ພ້ອມຄະນະກໍ່ໄດ້ລົງຢ້ຽມຢາມບໍລິສັດນາກ້າຟາມ ບ້ານດົງຄໍາຫຼວງ ນະຄອນໄກສອນພົມວິຫານ ເຊິ່ງເປັນບໍລິສັດທີ່ລ້ຽງໄກ່ລາດເພື່ອຈໍາໜ່າຍ ມີເນື້ອທີ່ທັງໝົດ 6,82 ເຮັກຕາ ມີແມ່ພັນ 1 ໝື່ນໂຕ ເພື່ອຜະລິດລູກໄກ່ຈໍາໜ່າຍ, ສາມາດຜະລິດ 7 ແສນກວ່າໂຕ/ປີ.

ຈາກນັ້ນກໍ່ໄດ້ລົງຢ້ຽມຢາມຟາມລ້ຽງໄກ່ CRS ພອນປະເສີດ ເຊິ່ງເປັນຟາມໄກ່ທີ່ເລີ່ມກໍ່ຕັ້ງເມື່ອບໍ່ດົນມານີ້ ມີພໍ່ແມ່ພັນ350 ໂຕ, ສາມາດຜະລິດລູກໄກ່ໄດ້1.400 ກວ່າໂຕ/ເດືອນ ແລະຈໍາໜ່າຍລູກໄກ່ອາຍຸ 1 ເດືອນເທົ່ານັ້ນ ໃນລາ ໂຕລະ 9.000 ກີບ. ຈາກນັ້ນ, ທ່ານເຈົ້າແຂວງ ຍັງໄດ້ລົງຕິດຕາມເບິ່ງຟາມລ້ຽງໝູສົມພົງ ຢູ່ບ້ານມ່ວງໄຂ່ ເມືອງໄຊພູທອງ ເຊິ່ງເປັນຟາມໝູຂະໜາດໃຫຍ່ມີພໍ່ພັນ 9 ໂຕ ແລະແມ່ພັນ 300 ໂຕ ແລະຈະນໍາເຂົ້າມາເພີ່ມອີກ 100 ໂຕໃນໝໍ່ໆນີ້, ຟາມໝູດັ່ງກ່າວນີ້ແມ່ນຜະລິດລູກເພື່ອຈໍາໜ່າຍໃຫ້ຊາວກະສິກອນສະເລ່ຍປະມານ 12.000 ໂຕ. ຈາກນັ້ນ.

ທ່ານ ເຈົ້າແຂວງສະຫວັນນະເຂດ ກໍ່ໄດ້ສະແດງຄວາມຊົມເຊີຍຕໍ່ບັນດາເຈົ້າຂອງຟາມ ທີ່ກ້າຕັດສິນໃນລົງທຶນເຮັດທຸລະກິດເພື່ອຍົກລະດັບຊິວິດການເປັນຢູ່ຂອງຄົນໃນບໍລິເວນໃກ້ຄຽງໃຫ້ມີວຽກເຮັດງານສ້າງລາຍຮັບໃຫ້ສູງຂຶ້ນ ແຕ່ສິ່ງສໍາຄັນໃນການເຮັດທຸລະກິດແມ່ນການຊອກຫາແຫຼ່ງທຶນເປັນຕົ້ນແມ່ນການກູ້ຢືມຈາກທະນາຄານ ແມ່ນຕ້ອງໄດ້ເນັ້ນໜັກພິຈາລະນາຢ່າງຖີ່ຖ້ວນ ພ້ອມທັງແນະນໍາໃຫ້ສອບຖາມລາຍລະອຽດຈາກວິຊາການຂອງທະນາຄານກາງ ເພື່ອເຮັດໃຫ້ຜູ້ປະກອບການທຸລະກິດໄດ້ຮັບຜົນປະໂຫຍດສູງສຸດ. ໃນວັນດຽວກັນນີ້, ທ່ານເຈົ້າແຂວງ ກໍ່ໄດ້ລົງຕິດຕາມເບິ່ງການກໍ່ສ້າງໂຄງການປັບປຸງ-ຍົກລະດັບຊົນລະປະທານ ແລະທາງຊອຍ ຢູ່ເມືອງໄຊພູທອງ ເຊິ່ງທ່ານ ໂອໄດ ເສນສອນ ຕາງໜ້າໃຫ້ບໍລິສັດຈະເລີນໄຊກໍ່ສ້າງ-ສ້ອມແປງຊົນລະປະທານ, ຂົວທາງ ແລະເຄຫາສະຖານຈໍາກັດ ໄດ້ລາຍງານໃຫ້ຮູ້ວ່າ: ໂຄງການດັ່ງກ່າວນີ້ ປະກອບມີ 2 ຈຸດກໍ່ສ້າງຄື: ບ້ານຄັນທ່າຈານ ແລະດອນຖ້ຳເງິນ ໃນນີ້, ຈຸດບ້ານຄັນທ່າຈານສາມາດສະໜອງນໍ້າໃຫ້ແກ່ເນື່ອທີ່ການຜະລິດໄດ້ 351 ເຮັກຕາ ແລະຈຸດດອນຖໍ້າເງິນ ສາມາດສະໜອງນໍ້າໃຫ້ແກ່ເນື້ອທີ່ການຜະລິດໄດ້ 76,10 ເຮັກຕາ.

ຈາກນັ້ນ, ທ່ານເຈົ້າແຂວງກໍ່ໄດ້ໃຫ້ທິດຊີ້ນໍາຕໍ່ອໍານາດການປົກຄອງຂັ້ນເມືອງກໍ່ຄືຂັ້ນບ້ານວ່າ: ໃນເມື່ອສາມາດສູບນໍ້າໄດ້ຕາມຄວາມຕ້ອງການຂອງປະຊາຊົນແລ້ວ ອໍານາດການປົກຄອງແຕ່ລະຂັ້ນຕ້ອງໄດ້ປຸກລະດົມພໍ່ແມ່ປະຊາຊົນຊາວກະສິກອນໃຫ້ຫັນມາເຮັດການຜະລິດໃຫ້ຫຼາຍຂຶ້ນ ແລະນອກຈາກການປູກເຂົ້າແລ້ວກໍ່ຕ້ອງໃຫ້ປະຊາຊົນຫັນມາປູກຖົ່ວດິນເພີ່ມເນື່ອງຈາກວ່າປະເທດຈີນມີຄວາມຕ້ອງການຖົ່ວດິນສູງ.

ຂໍ້ມູນ: ສະຫວັນພັດທະນາຂ່າວ