ອີງຕາມການຖະແຫຼງຂ່າວ ຂອງຄະນະສະເພາະກິດໃຫ້ຮູ້ວ່າ: ໃນວັນທີ 09 ສິງຫາ 2021 ໄດ້ເກັບຕົວຢ່າງມາກວດຫາເຊື້ອໂຄວິດ-19 ຈໍານວນ 3.345 ຄົນ ໃນນັ້ນກວດພົບຜູ້ຕິດເຊື້ອໃໝ່ 315 ຄົນ, ຕິດເຊື້ອພາຍໃນຊຸມຊົນຈໍານວນ 14 ຄົນຈາກ ແຂວງ ນະຄອນຫຼວງ 03 ຄົນ, ບໍ່ແກ້ວ 08 ຄົນ ແລະ ຄໍາມ່ວນ 03 ຄົນ ແລະ ຕິດເຊື້ອກໍລະນີນໍາເຂົ້າ ຈໍານວນ 301 ຄົນ ຈາກ ນະຄອນຫລວງວຽງຈັນ 39 ຄົນ, ຄໍາມ່ວນ 69 ຄົນ, ສະຫວັນນະເຂດ 77 ຄົນ, ຈໍາປາສັກ 43 ຄົນ, ສາລະວັນ 64 ຄົນ, ວຽງຈັນ 07 ຄົນ ແລະ ຫຼວງພະບາງ 02 ຄົນ. ສໍາລັບຜູ້ຕິດເຊື້ອໃນຊຸມຊົນໃນ 03 ແຂວງນັ້ນ ແມ່ນມີປະຫວັດສໍາຜັດກັບຜູ້ຕິດເຊື້ອເກົ່າ.

ປະຫວັດຂອງຜູ້ຕິດເຊື້ອໃນຊຸມຊົນ 03 ຄົນ ໃນວັນທີ 09 ສິງຫາ 2021 ຈາກນະຄອນຫຼວງ ມີລາຍລະອຽດດັ່ງນີ້:

ຜູ້ທີ 1 : ເພດຊາຍ ອາຍຸ 32 ປີ​ ອາຊີບ: ພະນັກງານແພດປະຈຳຢູ່ສູນຈຳກັດບໍລິເວນ ທີ່ຄະນະສະເພາະກິດກຳນົດໄວ້ ບ້ານນາຕານ ເມືອງໄຊທານີ ນະຄອນຫຼວງວຽງຈັນ. ຜູ້ກ່ຽວສັກວັກຊີນ ຄົບ 2 ເຂັມ. ໃນໄລຍະປະຕິບັດວຽກງານຢູ່ສູນຈຳກັດບໍລິເວນ ນັບແຕ່ວັນທີ 26 ກໍລະກົດ ຮອດ ວັນທີ 7 ສິງຫາ 2021 ເຮັດໜ້າທີ່ຕິດຕາມສຸຂະພາບຂອງແຮງງານ ແລະ ຊ່ວຍຢາຍອາຫານໃຫ້ແຮງງານ ເຊິ່ງຜູ້ກ່ຽວບໍ່ມີອາການສະແດງຫຍັງ. ໃນວັນທີ 7 ສິງຫາ 2021 ໄດ້ເກັບຕົວຢ່າງກວດ ແລະ ຜົນກວດແມ່ນພົບເຊື້ອໂຄວິດ-19 ໃນວັນທີ 9 ສິງຫາ 2021. ຜູ້ສຳຜັດໃກ້ຊິດ ມີ 11​ ຄົນ.

ຜູ້ທີ 2 : ເພດຊາຍ ອາຍຸ 42 ປີ ອາຊີບ: ພະນັກງານ ປກສ ປະຈຳຢູ່ສູນຈຳກັດບໍລິເວນ ທີ່ຄະນະສະເພາະກິດກຳນົດໄວ້ ຢູ່ບ້ານອາມອນ​ ເມືອງໄຊເສດຖາ ນະຄອນຫຼວງວຽງຈັນ. ຜູ້ກ່ຽວບໍ່ມີພະຍາດປະຈຳໂຕ, ສຸຂະພາບແຂງແຮງ, ບໍ່ມີອາການສະແດງ ແລະ ບໍ່ໄດ້ຮັບວັກຊິນ. ໃນໄລຍະປະຕິບັດວຽກງານຢູ່ສູນຈຳກັດບໍລິເວນ ແມ່ນເຮັດໜ້າທີ່ປ້ອງກັນຄວາມສະຫງົບ ແລະ ຊ່ວຍຢາຍອາຫານໃຫ້ແຮງງານ. ໃນວັນທີ 30 ກໍລະກົດ 2021 ໄດ້ເກັບຕົວຢ່າງກວດ (ບໍ່ພົບເຊື້ອ) ແລະ ໃນວັນທີ 7 ສິງຫາ 2021 ເກັບຕົວຢ່າງກວດຄັ້ງທີ 2 ຜົ

-ຜູ້ທີ 3 ແມ່ນກວດພົບໃນຜູ້ທີ່ຈະເດີນທາງໄປຕ່າງປະເທດ.

ມາຮອດປະຈຸບັນນີ້ ສປປ ລາວ ມີຜູ້ຕິດເຊື້ອສະສົມທັງໝົດ 8.876 ຄົນ ໃນນີ້ມີກໍລະນີຕິດເຊື້ອໃໝ່ 315 ຄົນ, ເສຍຊີວິດສະສົມທັງໝົດ 08 ຄົນ ແລະ ຍັງຕິດຕາມການປິ່ນປົວຢູ່ທົ່ວປະເທດທັງໝົດ 4.240 ຄົນ.

ແຂວງຈຳປາສັກ ຫາລືໃຊ້ຢາພື້ນເມືອງ ຄຽງຄູ່ ເພື່ອປິ່ນປົວຜູ້ຕິດເຊື້ອພະຍາດ COVID-19, ໃນວັນທີ 6 ສິງຫາ 2021 ຜ່ານມານີ້ ທີ່ຫ້ອງວ່າການແຂວງ, ແຂວງຈຳປາສັກ ໄດ້ປະຊຸມ ປຶກສາຫາລື ເພື່ອຮັບຮອງ ໂຄງການນໍາໃຊ້ຢາພື້ນເມືອງເພື່ອປິ່ນປົວຜູ້ຕິດເຊື້ອພະຍາດ COVID-19 ໂດຍການເປັນປະທານ ຂອງທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ, ທ່ານ ພອນເທບ ພົນເສນາ ທີ່ປຶກສາວຽກຕ້ານໂຄວິດ-19 ຢູ່ແຂວງຈຳປາສັກ.

ໂດຍມີ ພຣະອາຈານ ຄໍາຕູ້ ອິນທະວົງ, ຮອງເຈົ້າຄະນະແຂວງ, ຫົວໜ້າກໍາມາທິການສາທາລະນຸປະການ, ມີ ຄະນະຊ່ຽວຊານ ຈາກ ໂຮງໝໍແຂວງ ແລະພະແນກສາທາລະນະສຸກ, ພາກສ່ວນທີ່ກ່ຽວຂ້ອງ ເຂົ້າຮ່ວມ.ກອງປະຊຸມດັ່ງກ່າວ ແມ່ນໄດ້ປຶກສາຫາລື ແລະເພື່ອຮັບຮອງ ໃນການທົດລອງ ນໍາໃຊ້ຢາພື້ນເມືອງເພື່ອປິ່ນປົວຜູ້ຕິດເຊື້ອພະຍາດ COVID-19 ຢູ່ແຂວງຈໍາປາສັກ ໂດຍມີ ຈຸດປະສົງໂຄງການ ແມ່ນ ເພື່ອສຶກສາເບິ່ງປະສິດທິພາບຂອງຢາພື້ນເມືອງລາວ ແລະສົມທຽບຜົນ ທີ່ໃຊ້ເຂົ້າໃນການປິ່ນປົວຄົນເຈັບຕິດເຊື້ອພະຍາດໂຄວິດ-19.

ເນື່ອງຈາກວ່າ: ຈໍານວນຜູ້ຕິດເຊື້ອນັບມື້ເພີ້ມຂື້ນ, ມາຮອດ ເດືອນສິງຫາ ປີ 2021 ມີຜູ້ຕິດເຊື້ອທີ່ຍັງປິ່ນປົວຢູ່ ທັງໝົດ 845 ຄົນ ແລະ ມີຜູ້ເສຍຊີວິດຢູ່ແຂວງຈໍາປາສັກແລ້ວ 1 ຄົນ, ແລະ ຢາທີ່ໃຊ້ປິ່ນປົວ COVID-19 ແມ່ນມີບໍ່ພຽງພໍ ແລະ ການກິນຢາສະໝຸນໄພລາວ ເພື່ອປິ່ນປົວຄົນເຈັບຕິດເຊື້ອ ແມ່ນຍັງບໍ່ທັນມີການຈັດຕັ້ງປະຕິບັດ ແລະ ສຶກສາຢູ່ໃນປະເທດລາວ.

ເຊິ່ງຢາພື້ນເມືອງທີ່ຈະນຳໃຊ້ ເປັນຢາທີ່ສະກັດ ຈາກກະຊາຍຂາວ ແລະ ຢາຕົ້ມ.

ໃນໂອກາດດັ່ງກ່າວ, ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ, ໄດ້ມີຄຳເຫັນໃຫ້ ພາກສ່ວນທີ່ກ່ຽວຂ້ອງ ຕ້ອງຮິບຮ້ອນແຕ່ງຕັ້ງຄະນະຮັບຜິດຊອບ, ກຳນົດການຈັດຕັ້ງປະຕິບັດ, ແບ່ງວຽກ ຂອງຄະນະຊ່ຽວຊານ ສ້າງແຜນ ແລະກຳນົດຈຸດໃນການປິ່ນປົວ, ເພື່ອການເກັບ ແລະວິເຄາະຂໍ້ມູນ ໃຫ້ເຮົາສາມາດຮູ້ໄດ້ເຖິງປະສິດທິຜົນໃນການປິ່ນປົວພະຍາດ ໂດຍນໍາໃຊ້ຢາພື້ນເມືອງລາວ ທີ່ຜະລິດມາຈາກພູມປັນຍາຂອງຄົນລາວ.

ພ້ອມທັງ ເປັນຂໍ້ມູນພື້ນຖານໃຫ້ແກ່ການສຶກສາໃນຂັ້ນຕໍ່ໄປ ເພື່ອພັດທະນາຢາພື້ນເມືອງລາວ ໃຫ້ມີຄວາມກ້າວໜ້າ.

ຕາມ ຂປລ ລາຍງານ: ສປປ ລາວ ແລະ ສສ.ຫວຽດນາມ ໄດ້ລົງນາມ ແລະ ແລກປ່ຽນເອກະສານຮ່ວມມື ຈຳນວນ 14 ສະບັບ ເພື່ອປະກອບສ່ວນເຂົ້າໃນການເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງປະເທດ ລາວ ແລະ ຫວຽດນາມ, ໃນນີ້ ມີ 7 ເອກະສານ ຂອງພາກລັດ ແລະ 7 ເອກະສານ ຂອງພາກເອກະຊົນ.

ພິທີລົງນາມເອກະສານຮ່ວມມືສອງຝ່າຍດັ່ງກ່າວ, ໄດ້ຈັດຂຶ້ນໃນວັນທີ 9 ສິງຫາ 2021 ທີ່ຜ່ານມາ ທີ່ທຳນຽບປະທານປະເທດ ໃນໂອກາດທີ່ ສະຫາຍ ຫງວຽນ ຊວັນ ຟຸກ ກໍາມະການກົມການເມືອງສູນກາງພັກກອມມູນິດຫວຽດນາມ, ປະທານປະເທດ ແຫ່ງສາທາລະນະລັດ ສັງຄົມນິຍົມ ຫວຽດນາມ, ພ້ອມດ້ວຍພັນລະຍາ ແລະ ຄະນະຜູ້ແທນຂັ້ນສູງ ໄດ້ເດີນທາງມາຢ້ຽມຢາມສັນຖະວະໄມຕີຢ່າງເປັນທາງການ ຢູ່ ສາທາລະນະລັດ ປະຊາທິປະໄຕປະຊາຊົນລາວ ໃນວັນທີ 9-10 ສິງຫາ 2021.

ເຊິ່ງໃຫ້ກຽດເປັນສັກຂີພິຍານ ໃນການລົງນາມເອກະສານ ກ່ຽວກັບການຮ່ວມມືສອງຝ່າຍ ຈໍານວນ 14 ສະບັບນີ້, ໂດຍ ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະຊາຊົນປະຕິວັດລາວ, ປະທານປະເທດ ແຫ່ງສາທາລະນະລັດ ປະຊາທິປະໄຕ ປະຊາຊົນລາວ ແລະ ສະຫາຍ ຫງວຽນ ຊວັນ ຟຸກ ກໍາມະການກົມການເມືອງສູນກາງພັກກອມມູນິດຫວຽດນາມ, ປະທານປະເທດ ແຫ່ງສາທາລະນະລັດສັງຄົມນິຍົມຫວຽດນາມ ໂດຍມີບັນດາຄະນະຜູ້ແທນຂັ້ນສູງລາວ ແລະ ຫວຽດນາມເຂົ້າຮ່ວມ.

7 ເອກະສານ ຂອງພາກລັດປະກອບມີ ຄື: ບົດບັນທຶກວ່າດ້ວຍໂຄງການກໍ່ສ້າງ ໂຮງຮຽນ ວັດທະນະທຳ ຊົນເຜົ່າ ກອງທັບ ແລະ ໜັງສືເຈດຈໍານົງ ວ່າດ້ວຍການຮ່ວມມືກອບກູ້ໄພ ລະຫວ່າງສອງກະຊວງປ້ອງກັນປະເທດລາວ ແລະ ຫວຽດນາມ, ບົດບັນທຶກເພີ່ມເຕີມແຜນການຮ່ວມມືປະຈໍາປີ 2020 ລະຫວ່າງ ກະຊວງປ້ອງກັນຄວາມສະຫງົບ ແຫ່ງ ສປປ ລາວ ແລະ ກະຊວງປ້ອງກັນຄວາມສະຫງົບ ແຫ່ງ ສສ ຫວຽດນາມ, ບົດບັນທຶກການຮ່ວມມື ລະຫວ່າງຫ້ອງວ່າການປະທານປະເທດ ໄລຍະ 2021-2025, ແຜນການຮ່ວມມື ປີ 2022 ລະຫວ່າງ ສອງກະຊວງຍຸຕິທໍາ ໃນຂົງເຂດກົດໝາຍ ແລະ ຍຸຕິທໍາ, ບົດບັນທຶກຊ່ວຍຈໍາ ວ່າດ້ວຍການຮ່ວມມື ສະກັດກັ້ນ, ຕ້ານຢາເສບຕິດ ລະຫວ່າງ ສອງກະຊວງປ້ອງກັນຄວາມສະຫງົບ ແລະ ຂໍ້ຕົກລົງຮ່ວມມື ລະຫວ່າງ ແຂວງໄຊສົມບູນ ແລະ ແຂວງບັກຢາງ.

ສຳລັບ 7 ເອກະສານ ຂອງພາກເອກະຊົນ ປະກອບມີ ຄື: ສັນຍາສຳປະທານພັດທະນາບໍ່ແຮ່ ຢູ່ເມືອງບໍລິຄັນ ແຂວງບໍລິຄຳໄຊ, ສັນຍາການສໍາຫລວດແຮ່ກົ່ວ ແລະ ແຮ່ຕິດພັນ ຢູ່ເຂດບ້ານນ້ຳສາງ ເມືອງປາກກະດິງ ແຂວງບໍລິຄຳໄຊ, ບົດບັນທຶກຄວາມເຂົ້າໃຈ ເພື່ອສຶກສາສຳຫລວດຄວາມເປັນໄປໄດ້ ໃນການພັດທະນາເຂື່ອນໄຟຟ້ານ້ຳຕົກ ຢູ່ສາຍນ້ຳມ້າ ແຂວງຫົວພັນ, ບົດບັນທຶກການຮ່ວມມືສຶກສາ ການຊື້-ຂາຍໄຟຟ້າ ຈາກເຂື່ອນໄຟຟ້ານຳອູ ແລະ ເຂື່ອນໄຟຟ້ານ້ຳງື່ມ 4, ບົດບັນທຶກການຮ່ວມມືສຶກສາ ການຊື້-ຂາຍໄຟຟ້າ ຈາກເຂື່ອນໄຟຟ້ານ້ຳຈຽນ, ບົດບັນທຶກການຮ່ວມມືສຶກສາ ການຊື້-ຂາຍໄຟຟ້າ ຈາກເຂື່ອນໄຟ ຟ້ານ້ຳເຊກອງ 5, ນ້ຳງ່ອນ 1 ແລະ ນ້ຳງ່ອນ 2 ແລະ ບົດບັນທຶກການຮ່ວມມືສຳຫລວດ, ຂຸດຄົ້ນ ແລະ ແປຮູບແຮ່ທາດ.

ສສຊ ສະເໜີໃຫ້ລັດຖະບານເກັບອາກອນລາຍໄດ້ຈາກຜູ້ຂາຍເຄື່ອງອອນລາຍ

ຕາມ Lao National Radio ລາຍງານ: ການດໍາເນີນກອງປະຊຸມສະໄໝ ວິສາມັນ ເທື່ອທີ 1 ຂອງສະພາແຫ່ງຊາດ ຊຸດທີ IX ໃນວັນທີ 7 ສິງຫາ 2021 ສະມາຊິກສະພາແຫ່ງຊາດ (ສສຊ) ໄດ້ພ້ອມກັນຄົ້ນຄ້ວາປະກອບຄໍາເຫັນ ແລະ ຮັບຮອງເອົາການປັບປຸງບາງມາດ ຕາຂອງ 4 ຮ່າງກົດໝາຍໃນຂົງເຂດເສດຖະກິດ ຄື: ກົດ ໝາຍວ່າດ້ວຍການຄຸ້ມຄອງສ່ວຍສາອາກອນ, ກົດໝາຍວ່າດ້ວຍອາກອນມູນຄ່າເພີ່ມ, ກົດໝາຍວ່າດ້ວຍອາກອນລາຍໄດ້ ແລະ ກົດໝາຍວ່າອາກອນຊົມໃຊ້. ສສຊ ໄດ້ຜັດປ່ຽນກັນປະກອບຄໍາເຫັນ ແລະ ສະເໜີຫລາຍບັນຫາຕໍ່ລັດຖະບານເພື່ອແນໃສ່ເຮັດໃຫ້ການປັບປຸງບາງມາດຕາຂອງທັງ 4 ກົດໝາຍສົມບູນ ແລະ ຮັດກຸມຂຶ້ນກວ່າເກົ່າ.

ໃນນີ້ ບັນຫາການຄ້າຂາຍອອນລາຍ ແມ່ນບັນ ຫາໜຶ່ງທີ່ ສສຊ ໃຫ້ຄວາມສົນໃຈ ແລະ ສະເໜີໃຫ້ລັດຖະ ບານເກັບອາກອນລາຍໄດ້ຈາກຜູ້ຄ້າຂາຍອອນລາຍເຫລົ່ານີ້. ທ່ານ ບຸນມີ ພິມມະສອນ ສສຊ ເຂດເລືອກຕັ້ງທີ 12 ແຂວງຄໍາມ່ວນ ປະກອບຄໍາເຫັນວ່າ: ປັດຈຸບັນ ຜູ້ຄ້າຂາຍອອນລາຍມີລາຍຮັບຈໍານວນບໍ່ໜ້ອຍໃນແຕ່ລະວັນ, ດັ່ງ ນັ້ນ ລັດຖະບານ ຄວນມີວິທີຄຸ້ມຄອງ ແລະ ມີມາດຕະການເກັບອາກອນລາຍໄດ້ຈາກເຂົາເຈົ້າ ເພາະຈະເປັນແຫລ່ງລາຍຮັບໜຶ່ງທີ່ສໍາຄັນຂອງລັດຖະບານ. ສ່ວນ ທ່ານ ລິນຄໍາ ດວງສະຫວັນ ສສຊ ເຂດເລືອກຕັ້ງທີ 1 ນະຄອນຫລວງວຽງຈັນ ປະກອບຄໍາເຫັນວ່າ: ລັດຖະບານ ຄວນພິຈາລະນາເພີ່ມຕື່ມກັບກຸ່ມທີ່ຂາຍເຄື່ອງອອນລາຍທີ່ນັບມື້ເພີ່ມຂຶ້ນໃນປັດຈຸບັນ, ຄວນມີກົນໄກ ຫລື ມາດຕະການໃນການເກັບພາສີລາຍໄດ້ ຫລື ອາກອນມູນຄ່າເພີ່ມຈາກກຸ່ມຄົນທີ່ປະກອບການໃນດ້ານນີ້ເພາະຈະເຮັດໃຫ້ລັດຖະບານມີລາຍຮັບເພີ່ມຕື່ມອີກຫລາຍສົມຄວນ. ນອກຈາກທັງສອງທ່ານດັ່ງກ່າວ, ຍັງມີ ສສຊ ອີກຫຼາຍທ່ານກໍ່ໄດ້ສະເໜີ້ກ່ຽວກັບການວາງມາດຕະການເພື່ອເກັບລາຍຮັບຈາກຜູ້ຄ້າຂາຍເຄື່ອງອອນລາຍເຊັ່ນດຽວ ກັນ.

ຢ່າງໃດກໍ່ຕາມ, ໃນໂອກາດທີ່ຜູ້ຕາງໜ້າຄະນະຮັບຜິດຊອບປັບປຸງບາງມາດຕາຂອງທັງ 4 ກົດໝາຍໃນຂົງເຂດເສດຖະ ກິດຕໍ່ກອງປະຊຸມສະພາໃນຄັ້ງນີ້ ໄດ້ຢືນຢັນວ່າ: ຜ່ານມາມີຜູ້ປະກອບທຸລະກິດດ້ານອອນລາຍຈໍານວນໜຶ່ງທີ່ໄດ້ໄປຂຶ້ນທະບຽນ ແລະ ເສຍອາກອນນໍາຂະແໜງການກ່ຽວຂ້ອງຫລາຍສົມຄວນໃນແຕ່ລະປີ ໂດຍສະເພາະ ຟຸດແພນດາ. ສ່ວນຜູ້ຄ້າຂາຍເຄື່ອງອອນລາຍອື່ນໆ ຂະ ແໜງການທີ່ກ່ຽວຂ້ອງຈະພະຍາຍາມຫາວິທີ ຫລື ມີມາດຕະການຄຸ້ມຄອງຕໍ່ຜູ້ປະກອບການເຫລົ່ານີ້ໃຫ້ດີຂຶ້ນກວ່າເກົ່າໃນຕໍ່ໜ້າ.