ສະວິດ ໃຫ້ການຊ່ວຍເຫຼືອດ້ານສະບຽງອາຫານ ໃຫ້ແກ່ແຮງງານລາວ ຢູ່ສູນຈຳກັດບໍລິເວນໃນ 6 ແຂວງ ຂອງ ສປປ ລາວ.

ວິທະຍຸກະຈາຍສຽງແຫ່ງຊາດລາວ ລາຍງານ: ໃນວັນທີ 12 ກໍລະກົດ 2021 ທີ່ກະຊວງສາທາລະນະສຸກ, ອົງການເພື່ອການພັດທະນາ ແລະ ຮ່ວມມືສະວິດ ມອບການຊ່ວຍເຫຼືອດ້ານສະບຽງອາຫານ ມູນຄ່າ 790.000 ໂດລາສະຫະລັດ ໃຫ້ແກ່ບັນ ດາສູນຈຳກັດບໍລິເວນ ໃນ 6 ແຂວງ ຄື: ນະຄອນຫລວງວຽງຈັນ, ແຂວງວຽງຈັນ, ໄຊຍະບູລີ, ບໍ່ແກ້ວ, ສະຫວັນນະເຂດ ແລະ ຈຳປາສັກ.

ການມອບການຊ່ວຍເຫຼືອໃນຄັ້ງນີ້, ຈະຊ່ວຍໃຫ້ອົງການອາຫານໂລກ ແລະ ຄູ່ຮ່ວມຈັດຕັ້ງປະຕິບັດ ເພື່ອສືບຕໍ່ສະໜອງອາຫານ ທີ່ມີໂພຊະນາການ 3 ຄາບ ໃນແຕ່ລະມື້ ໃຫ້ແຮງງານປະມານ 8.000 ຄົນ ທີ່ເດີນທາງມາຈາກປະເທດເພື່ອນບ້ານ ກັບຄືນສູ່ບ້ານເຮືອນຂອງເຂົາເຈົ້າ, ເຊິ່ງຈະສາມາດສະໜອງອາຫານໄດ້ຫຼາຍກວ່າ 335.000 ຄາບອາຫານ ໃນໄລຍະເວລາປະມານ 2 ເດືອນເຄິ່ງ. ຕາງໜ້າລົງນາມຄັ້ງນີ້, ໂດຍທ່ານ ຈອນ ຟລັງຊົວ ຄິວໂນດ ຜູ້ອຳນວຍການພາກພື້ນແມ່ນໍ້າຂອງ, ອົງການເພື່ອການພັດທະນາ ແລະ ຮ່ວມມີສະວິດ ແລະ ດຣ. ບຸນແຟງ ພູມມະໄລສິດ ລັດ ຖະມົນຕີ ກະຊວງສາທາລະນະສຸກ ແຫ່ງ ສປປ ລາວ, ມີ ທ່ານ ນາງ ແຈັກເກີລີນ ເດີ ກຣູດ ຮອງຜູ້ອຳນວຍການ ອົງ ການອາຫານໂລກ ປະຈຳ ສປປ ລາວ.

ດຣ. ບຸນແຟງ ພູມມະໄລສິດ ໄດ້ກ່າວວ່າ: ອີງຕາມຂໍ້ຕົກລົງທີ່ໄດ້ລົງນາມຮ່ວມດັ່ງກ່າວ, ແມ່ນຈະໄດ້ການສະໜອງອາຫານໃນແຕ່ລະມື້ ໃຫ້ກັບແຮງງານທີ່ກັບມາ ຈາກປະເທດເພື່ອນບ້ານ ຢູ່ໃນສູນຈຳກັດບໍລິເວນ, ແມ່ນເຮັດໃຫ້ພວກເຂົາສາມາດຢູ່ໃນສູນຈໍາກັດບໍລິເວນ ຄົບຕາມໄລຍະເວລາກໍາ ນົດ 14 ວັນ ເພື່ອຊ່ວຍຮັກສາສຸຂະພາບ ແລະ ການເປັນຢູ່ທີ່ດີ ແລະ ຍັງເປັນການຫຼຸດພາລະທາງດ້ານການເງິນ ແລະ ຄອບຄົວຂອງພວກເຂົານຳອີກ.

ທ່ານ ຈອນ ຟລັງຊົວ ກ່າວວ່າ: ການໃຫ້ຄວາມຊ່ວຍເຫຼືອ ສປປ ລາວ ໂດຍຜ່ານອົງການອາຫານໂລກໃນຄັ້ງນີ້, ແມ່ນເປັນສ່ວນໜຶ່ງຂອງຄວາມມຸ້ງໝັ້ນ ລວມຈາກປະເທດສະວິດ ເພື່ອຊ່ວຍເຫລືອ ສປປ ລາວ ໃນການຕໍ່ສູ້ກັບພະຍາດໂຄວິດ-19 ແລະ ໃນການຟື້ນຟູຈາກວິກິດທາງດ້ານເສດຖະກິດ ທີ່ໄດ້ຮັບຜົນກະທົບຈາກການລະບາດຂອງພະຍາດດັ່ງກ່າວ.

ໄລຍະຜ່ານມາ ປະເທດສະວິດໄດ້ມອບການຊ່ວຍເຫຼືອເປັນມູນຄ່າລວມ 3,5 ລ້ານໂດລາສະຫະລັດ, ໂດຍຜ່ານຫລາຍໆໂຄງການ ໂດຍອີງໃສ່ຍຸດທະສາດການປ້ອງກັນ ແລະ ຄວບຄຸມພະຍາດໂຄວິດ- 19 ຂອງລັດຖະບານ ແຫ່ງ ສປປ ລາວ.

ໂອກາດດຽວກັນນີ້, ທ່ານ ນາງ ແຈັກເກີລີນ ໄດ້ສະແດງຄວາມຊົມເຊີຍ ທີ່ລັດຖະບານແຫ່ງປະເທດສະວິດ ທີ່ໄດ້ໃຫ້ການຊ່ວຍເຫລືອແກ່ບັນດາແຮງງານ ທີ່ກັບຈາກປະເທດເພື່ອນບ້ານເຫລົ່ານີ້ ຜູ້ທີ່ໄດ້ປະເຊີນໜ້າກັບຫລາຍສິ່ງທ້າທາຍ ໂດຍສະເພາະແມ່ນເລື່ອງລາຍຮັບ ແລະ ຊີວິດການເປັນຢູ່ຂອງພວກເຂົາ ນັບຕັ້ງ ແຕ່ເດືອນມິຖຸນາ 2020, ກິດຈະກຳການຊ່ວຍເຫຼືອທາງດ້ານສະບຽງອາຫານຂອງພວກເຮົາ, ໂດຍການຮ່ວມງານກັບອົງການກາແດງ ແຫ່ງປະເທດສະວິດ, ອົງການ ກາແດງລາວ ແລະ ອົງການສຸພັນນິມິດສາກົນ ແມ່ນໄດ້ສະໜອງອາຫານ ປະມານ 1 ລ້ານຄາບ, ຜູ້ໄດ້ຮັບຜົນປະໂຫຍດຫຼາຍກວ່າ 42.000 ຄົນ ດ້ວຍມູນຄ່າການຊ່ວຍເຫຼືອ ຈາກອົງການເພື່ອການພັດທະນາ ແລະ ຮ່ວມມືສະວິດ ໃນຄັ້ງນີ້, ພວກເຮົາສາມາດສືບຕໍ່ປະຕິບັດກິດຈະກໍາອັນຈໍາເປັນນີ້ໄດ້.

ປະຊາຊົນລາຍງານ: ສະພາບການຈັດຕັ້ງປະຕິບັດແຜນງົບປະມານແຫ່ງລັດແຂວງເຊກອງໃນໄລຍະ 6 ເດືອນຜ່ານມາ ເຫັນວ່າຍັງມີຫຼາຍດ້ານພົບຄວາມຫຍຸ້ງຍາກ ແລະ ທ້າທາຍສູງ, ບັນຫາລວມແມ່ນຍັງເປັນສະພາບຝືດເຄືອງທາງດ້ານການເງິນ-ງົບປະມານ ແລະ ການແຜ່ລະບາດຂອງພະຍາດໂຄວິດ-19.

ທ່ານ ສຸກັນ ວໍລະປັນໄຊ ຮອງຫົວໜ້າພະແນກການເງິນແຂວງເຊກອງໃຫ້ສໍາພາດຕໍ່ນັກຂ່າວເມື່ອບໍ່ດົນນີ້ວ່າ: ໃນໄລຍະ 6 ເດືອນຕົ້ນປີ 2021 ແຂວງເຊກອງ ຈັດເກັບລາຍຮັບເຂົ້າງົບປະມານໄດ້ພຽງ 20,29 ຕື້ກີບ ເທົ່າກັບ 25,12% ຂອງແຜນການປີ, ຖືວ່າຍັງບໍ່ທັນໄດ້ເຄິ່ງໜຶ່ງຂອງແຜນການທີ່ວາງໄວ້ ຊຶ່ງໝົດປີນີ້ແຂວງໄດ້ຮັບໂຕເລກການຈັດເກັບລາຍຮັບໃຫ້ໄດ້ທັງໝົດ 80,77 ຕື້ກີບ. ໃນນັ້ນ, ລາຍຮັບພູດສູນກາງປະຕິບັດໄດ້ 0,27 ຕື້ກີບ ເທົ່າກັບ 5,15% ແລະ ລາຍຮັບພູດທ້ອງຖິ່ນປະຕິບັດໄດ້ 20,02 ຕື້ກີບ ເທົ່າກັບ 26,49%.

ສາເຫດທີ່ເກັບລາຍຮັບບໍ່ເຖິງຄາດໝາຍ ແມ່ນຍ້ອນການຄຸ້ມຄອງການເກັບລາຍຮັບຈາກບັນດາຂະແໜງການບໍລິຫານວິຊາການ, ພາສີທີ່ດິນ, ລາຍຮັບວິຊາການ, ລາຍຮັບທີ່ຕິດພັນກັບໂຄງການແມ່ນຫຼຸດລົງ, ຄວາມເອົາໃຈໃສ່, ຄວາມກະຕືລືລົ້ນ ແລະ ຄວາມເປັນເຈົ້າຂອງພະນັກງານທີ່ເຮັດໜ້າທີ່ຈັດເກັບລາຍຮັບໃນແຕ່ລະຂະແໜງການນັບແຕ່ຂັ້ນແຂວງລົງຮອດຂັ້ນເມືອງຍັງບໍ່ທັນດີ ແລະ ບັນຫາໃຫຍ່ກວ່າໝູ່ແມ່ນສະພາບການແຜ່ລະບາດຂອງພະຍາດໂຄວິດ-19 ເຮັດໃຫ້ການເຄື່ອນໄຫວຂອງພາກສ່ວນທຸລະກິດ, ຜູ້ປະກອບການໄດ້ຢຸດສະງັກ, ການຜ່ອນຜັນນະໂຍບາຍຂອງລັດຖະບານ ໂດຍສະເພາະປະເພດອາກອນຈໍານວນໜຶ່ງຖືກຍົກເວັ້ນເຮັດໃຫ້ການເກັບລາຍຮັບເຂົ້າງົບປະມານບໍ່ໄດ້ຕາມແຜນ ແລະ ບໍ່ທ່ວງທັນກໍານົດເວລາ.ທ່ານ ສຸກັນ ວໍລະປັນໄຊ ຍັງກ່າວຕື່ມວ່າ: ເພື່ອເຮັດໃຫ້ການເກັບລາຍຮັບເຂົ້າງົບປະມານໃນ 6 ເດືອນທ້າຍປີ 2021 ບັນລຸໄດ້ຕາມເປົ້າໝາຍ ທາງພະແນກການເງິນແຂວງໄດ້ມີທິດແກ້ໄຂ ໂດຍຈະຫັນທ່າແຮງໃໝ່ຂອງການສ້າງລາຍຮັບ, ຄຽງຄູ່ກັບການສໍາຫຼວດຄືນໃໝ່ຂອງຖານລາຍຮັບໃຫ້ລະອຽດ ແລະ ຊັດເຈນ; ສືບຕໍ່ຂະຫຍາຍ ແລະ ນໍາໃຊ້ເຄື່ອງມືທັນສະໄໝຢູ່ບັນດາເມືອງທີ່ມີເງື່ອນໄຂ, ອໍານວຍຄວາມສະດວກໃຫ້ທຸລະກິດ, ຜູ້ປະກອບການຫັນມາຊໍາລະພັນທະຕ່າງໆ ດ້ວຍຕົນເອງຜ່ານລະບົບທະນາຄານຫຼາຍຂຶ້ນ; ພ້ອມທັງເພີ່ມທະວີຢ່າງເຂັ້ມງວດກວ່າເກົ່າຕໍ່ວຽກງານວິໄນການເງິນ ເພື່ອເຮັດໃຫ້ການເກັບລາຍຮັບບໍ່ມີການຮົ່ວໄຫຼທັງຮັບປະກັນຄວາມໂປ່ງໃສ.

ວັນທີ 12 ກໍລະກົດ ແຂວງສະຫວັນນະເຂດ ຍົກລະດັບການປ້ອງກັນການລັກລອບເດີນທາງເຂົ້າເມືອງແບບຜິດກົດໝາຍ ແລະ ການຮັກສາຄວາມສະຫງົບປອດໄພ ພາຍໃນແຂວງ ເນື່ອງຈາກໃນໄລຍະນີ້ ມີແຮງງານລາວເດີນທາງກັບມາຈາກປະເທດໃກ້ຄຽງເປັນຈໍານວນຫລາຍໃນແຕ່ລະວັນ.

ພັນເອກ ສົມໝາຍ ພົມມະຈັນ, ຫົວໜ້າກອງບັນຊາການປ້ອງກັນຄວາມສະຫງົບແຂວງສະຫວັນນະເຂດ ໃຫ້ສໍາພາດວ່າ: ມາດຕະການທີ່ໄດ້ຈັດຕັ້ງປະຕິບັດ ລວມມີ ການປ້ອງກັນການລັກລອບເດີນທາງເຂົ້າເມືອງແບບຜິດກົດໝາຍຂອງແຮງງານລາວ ແລະ ບຸກຄົນຕ່າງໆ ຈາກປະເທດໃກ້ຄຽງ ຄື: ໄທ ແລະ ຫວຽດນາມ ເນື່ອງຈາກເປັນສອງປະເທດທີ່ມີຊາຍ ແດນຕິດກັບແຂວງສະຫວັນນະເຂດ ໂດຍຮ່ວມກັບທຸກພາກສ່ວນກ່ຽວ ຂ້ອງເວນຍາມຕາມເສັ້ນຊາຍແດນຕະຫລອດ 24 ຊົ່ວໂມງ, ຕິດຕາມການນໍາໃຊ້ເຮືອຫາປາຕາມລໍາແມ່ນໍ້າຂອງຂອງປະຊາຊົນຢ່າງຕໍ່ເນື່ອງ.

ນອກຈາກນີ້ ຍັງໄດ້ປັບປຸງລະບຽບການໃນການຕິດຕາມການເຂົ້າ-ອອກ ດ່ານສາກົນຂົວມິດຕະພາບລາວ-ໄທ ແຫ່ງທີ 2 ໃຫ້ເຂັ້ມງວດກວ່າເກົ່າ, ໃນນີ້ ສະເພາະລົດຂົນສົ່ງສິນຄ້າໃດທີ່ບໍ່ສາມາດຄ່ຽນຖ່າຍສິນຄ້າໄດ້ ແມ່ນມີເຈົ້າໜ້າທີ່ກ່ຽວ ຂ້ອງຕິດຕາມຂະບວນລົດຈົນເຖີງທີ່ໝາຍເພື່ອບໍ່ໃຫ້ຜູ້ຂັບລົດແວະຊະຊາຍໃນລະຫວ່າງທາງການຂົນສົ່ງ. ນອກຈາກນີ້ ໄດ້ເພີ່ມກໍາລັງຮັກສາຄວາມສະ ຫງົບຢູ່ສູນຈໍາກັດບໍລິເວນ ແລະ ສະຖານທີ່ປິ່ນປົວຜູ້ຕິດເຊື້ອພະຍາດໂຄວິດ-19 ທີ່ແຂວງກໍານົດ ເນື່ອງຈາກມີຜູ້ຈຳກັດບໍລິເວນ ແລະ ຜູ້ຕິດເຊື້ອເພີ່ມຂຶ້ນເປັນຈໍາຫລາຍໃນແຕ່ລະວັນ.

ພັນເອກ ສົມໝາຍ ພົມມະຈັນ ໃຫ້ຮູ້ຕື່ມວ່າ: ນັບແຕ່ລັດຖະບານໄດ້ມີນະ ໂຍບາຍຜ່ອນຜັນໃຫ້ປະຊາຊົນສາມາດນໍາມໃຊ້ເຮືອຫາປາຕາມລໍາແມ່ນໍ້າຂອງ ມາຮອດປັດຈຸບັນ ຢູ່ແຂວງສະຫວັນນະເຂດ ມີຜູ້ກະທໍາຜິດດ້ວຍການໃຊ້ເຮືອນ້ອຍໄປຮັບເອົາແຮງງານລາວຈາກໄທລັກລອບກັບຄືນມາລາວໄດ້ 7 ຄົນ ແລະ ຈັບແຮງງານລາວລັກລອບຂີ່ເຮືອນ້ອຍເພື່ອເດີນທາງໄປເຮັດວຽກຢູ່ໄທໄດ້ 5 ຄົນ. ຢ່າງໃດກໍ່ຕາມ ສະເພາະການປ້ອງກັນການລັກລອບເດີນທາງກັບຄືນປະເທດຂອງແຮງງານລາວຢູ່ໄທ ມີ 4 ເມືອງທີ່ຕ້ອງເອົາໃຈໃສ່ເປັນພິເສດ ຄື: ນະຄອນໄກສອນ ພົມວິຫານ, ເມືອງສອງຄອນ, ໄຊບູລີ ແລະ ເມືອງໄຊພູທອງ ເນື່ອງຈາກເປັນເມືອງທີ່ມີຊາຍແດນຕິດກັບປະເທດໄທ.

ຂອບໃຈຂໍ້ມູນຈາກເພຈ : ສື່ເພື່ອສງັຄົມ All in All

ມີເດຍລາວ ແຂວງບໍລິຄຳໄຊລາຍງານ:
ວັນທີ 8 ກໍລະກົດ 2021 ເຈົ້າໜ້າທີປະຈຳດ່ານພາສີສາກົນນໍ້າພາວ ແລະ ພາກສ່ວນກ່ຽວທີ່ຂ້ອງ ເມຶອງຄຳເກີດ ແຂວງບໍລິຄຳໄຊ ໄດ້ຢຶດສີນຄ້ານຳເຂົ້າແບບບໍ່ຖຶກຕ້ອງ ຂອງ ທ້າວ ງ້ວນມີງເລີຍ ສັນຊາດ ຫວຽດນາມ ໂດຍການນຳເຂົ້າແບບຊຸກເຊື່ອງໄວ້ໃນຖັງລົດຂົນສົ່ງນໍ້າມັນ ທີ່ຫວັງຈະລັກລອບເອົາສິນຄ້ານຳເຂົ້າແບບຜິດກົດໜາຍປະເພດໜັງຄວາຍ ເພື່ອເຂົ້າມາຈຳໜ່າຍຢູ່ ສປປ ລາວ.

ສິນຄ້ານຳເຂົ້າປະເພດໜັງຄວາຍ ມີຈຳນວນ 43 ເປົາ, ນ້ຳໜັກ 1.720 Kg ເຈົ້າໜ້າທີ່ຈຶ່ງໄດ້ດຳເນີນການ ແລະ ຜູ້ກ່ຽວຍອມຮັບວ່າ ສິນຄ້າປະເພດໜັງຄວາຍເປັນຂອງຕົນເອງ ເພື່ອນຳເຂົ້າໄປຈຳໜ່າຍຢູ່ນະຄອນຫຼວງວຽງຈັນ ສປປ ລາວ, ສະນັ້ນ ເຈົ້າໜ້າທີ່ຈື່ງໄດ້ຍຶດຂອງກາງພ້ອມທຳລາຍສິນຄ້າດັ່ງກ່າວ ແລະ ດຳເນີນຄະດີຕໍ່ຜູ້ກະທຳຜິດ.

ພົບຜູ້ຕິດເຊື້ອໂຄວິດ-19 ສາຍພັນອາວຝາ ແລະ ສາຍພັນເດວຕາ ຢູ່ໃນຄົນດຽວ ເຊິ່ງມີທັງໝົດ 7 ຄົນ.

Thairath ລາຍງານ: 12 ກໍລະກົດ 2021, ອະທິບໍດີກົມວິທະຍາສາດການແພດ ແຈ້ງ ຫຼັງກວກຫາເຊື້ອກາຍພັນໃນແຄມຄົນງານກໍສ້າງ ໃນກຸງເທບມະຫານະຄອນ ພົບວ່າ ມີການຕິດເຊື້ອແບບປະສົມ ຄື ໃນຄົນດຽວ ຕິດເຊື້ອທັງ 2 ສາຍພັນ ໄດ້ແກ່ສາຍພັນ ອາວຝາ (ອັງກິດ) ແລະ ສາຍພັນ ເດວຕາ (ອິນເດຍ) ໃນ 7 ຄົນ ຈາກທັງໝົດ 200 ກວ່າຄົນ ແລະ ຢ້ານເກີດລູກປະສົມເປັນເຊື້ອໄວຣັສກາຍພັນໃໝ່ຂື້ນມໄດ້.

ໂດຍແຈ້ງຕື່ມອີກວ່າ ປັດຈຸບັນ ທັງ 7 ຄົນ ຍັງບໍ່ມີອາການຮຸນແຮງ, ສຸຂະພາບແຂງແຮງດີ ແລະ ຍັງຢືນຢັນບໍ່ໄດ້ວ່າ ເຊື້ອປະສົມທີ່ປະສົມກັນມີຜົນຕໍ່ອາການຫຼືບໍ່. ດັ່ງນັ້ນ, ຈຶ່ງຕ້ອງໄດ້ເຝົ້າລະວັງຕໍ່ໄປ ແລະ ຫຼັງຈາກນີ້ແມ່ນຕ້ອງໄດ້ຕຽມໄປກວດຜູ້ສຳຜັດໃກ້ຊິດຕື່ມ.

ອີງຕາມຊໍ້ມູນຈາກ ຮສສ ໃຫ້ຮູ້ວ່າ: ເພື່ອເຮັດໃຫ້ວຽກງານບໍລິຫານຈັດການແຮງງານລາວ ທີ່ເຮັດວຽກຢູ່ປະເທດໄທ, ໃຫ້ກ້າວເຂົ້າລວງເລີກຫຼາຍຂຶ້ນ ແລະ ໄດ້ຮັບການປົກປ້ອງຕາມກົດໝາຍແຮງງານ, ດັ່ງນັ້ນ ໃນວັນທີ 9 ກໍລະກົດ 2021, ກົມພັດທະນສີມືແຮງງານ ແລະ ຈັດຫາງານ (ລາວ) ຮ່ວມກັບ ກົມການຈັດຫາງານ (ໄທ), ໄດ້ຈັດກອງປະຊຸມລະດັບວິຊາການລາວ-ໄທ ໃນຮູບແບບທາງໄກ ແນໃສ່ຮ່ວມຫາລືກ່ຽວກັບການບໍລິຫານຈັດການແຮງງານລາວໃນປະເທດໄທ ໄລຍະທີ່ມີການແຜ່ລະບາດຂອງພະຍາດໂຄວິດ-19, ທີ່ກະຊວງແຮງງານ ແລະ ສະຫວັດດີການສັງຄົມ.

ກອງປະຊຸມວິຊາການດັ່ງກ່າວ, ຝ່າຍ ສປປລາວ ຮ່ວມເປັນປະທານໂດຍທ່ານ ອານຸສອນ ຄຳສິງສະຫວັດ ຫົວໜ້າກົມພັດທະນາສີມືແຮງງານ ແລະ ຈັດຫາງານ, ກະຊວງແຮງງານ ແລະ ສະຫວັດດີການສັງ ຄົມ, ສ່ວນຝ່າຍຣາຊະອານາຈັກໄທ ເປັນປະທານໂດຍທ່ານ ໄພໂຣດ ໂຊຕິກະສະຖຽນ ຫົວໜ້າກົມການຈັດຫາງານ, ກະຊວງແຮງງານ ແຫ່ງຣາຊະອານາຈັກໄທ ພ້ອມດ້ວຍຄະນະທັງສອງຝ່າຍເຂົ້າຮ່ວມ.

ທ່ານ ອານຸສອນ ຄຳສິງສະຫວັດ ໄດ້ກ່າວວ່າ: ກອງປະຊຸມທາງໄກຕັ້ງນີ້ ແມ່ນຕາມບົດບັນທຶກຄວາມເຂົ້າໃຈວ່າດ້ວຍການຮ່ວມມືດ້ານແຮງງານລາວ-ໄທສະບັບລົງວັນທີ 6 ກໍລະກົດ 2016, ຂໍ້ຕົກລົງວ່າດ້ວຍການຈ້າງແຮງງານລາວ-ໄທ ສະບັບລົງວັນທີ 1 ມີນາ 2017 ແລະ ສຶບເນື່ອງມາຈາກບົດບັນທຶກກອງປະຊຸມວິຊາການລາວ-ໄທ ທີ່ໜອງຄາຍ ຄັ້ງວັນທີ 4-6 ມິຖຸນາ 2019 ແລະ ການເຫັນດີຂອງກະ ຊວງ ຮສສ ແຫ່ງ ສປປ ລາວ ແລະ ກະຊວງແຮງງານແຫ່ງ ຣາຊອານາຈັກໄທ ແນ່ໃສ່ເຮັດໃຫ້ຜູ້ອອກແຮງງານໄດ້ຮັບການປົກປ້ອງ ແລະ ຄຸ້ມຄອງສິດຜົນປະໂຫຍດຕາມກົດໝາຍຂອງສອງປະເທດ ໂດຍສະເພາະແມ່ນໄລຍະທີ່ມີການແຜ່ລະບາດຂອງເຊື້້ອພະຍາດໂຄວິດ 19.

ການຮ່ວມມືຂອງສອງຝ່າຍແມ່ນມີຄວາມໝາຍຄວາມສຳຄັນ ແລະ ຈຳເປັນຢ່າງຫຍິ່ງ ເພາະບໍ່ພຽງແຕ່ ແນ່ໃສ່ການປົກປ້ອງສິດຜົນປະໂຫຍດອັບຊອບທຳຂອງແຮງງານເທົ່ານັ້ນ ແຕ່ຍັງຮັດແໜ້ນການຮ່ວມມືຂອງສອງປະເທດນຳອີກດ້ວຍ, ເຊິ່ງການແຜ່ລະບາດຂອງພະຍາດໂຄວິດ 19 ໄດ້ສົ່ງຜົນກະທົບຢ່າງໃຫຍ່ຫຼວງຕໍ່ການພັດທະນາເສດຖະກິດ-ສັງຄົມຂອງຫຼາຍປະເທດ, ການຫຼັ່ງໄຫຼກັບຄືນປະເທດຂອງຜູ້ອອກແຮງງານລາວທີ່ເຮັດວຽກຢູ່ປະເທດໄທ ໄດ້ເປັນພາລະໃຫ້ລັດຖະບານ ຕ້ອງຮັບພາລະໜັກສົມຄວນ ໂດຍໃຫ້ການຊ່ວຍເຫຼືອຜູ້ອອກແຮງງານທີ່ກັບຄືນປະເທດໃນດ້ານຕ່າງໆ, ດັ່ງນັ້ນ ການປຶກສາຫາລືດ້ານວິຊາການຂອງສອງຝ່າຍຈະຊ່ວຍໃຫ້ຜູ້ອອກແຮງງານລາວທີ່ຍັງຄ້າງຢູ່ປະເທດໄທ ແລະ ຜູ້ອອກແຮງງານລາວທີ່ຈະກັບຄືນໄປເຮັດວຽກຢູ່ໄທ ໄດ້ຮັບການປົກປ້ອງສິດ ແລະ ຜົນປະໂຫຍດຈາກສອງລັດຖະບານ.

ຈາກນັ້ນ, ກົມພັດທະນາສີມືແຮງງານ ແລະ ຈັດຫາງານ ຍັງໄດ້ລາຍງານໃຫ້ກົມການຈັດຫາງານແຫ່ງຣາຊະອານາຈັກໄທ ຮູ້ຕື່ມວ່າ: ໃນໄລຍະທີ່ມີການລະບາດ, ພົນລະເມືອງລາວ ທີ່ຢູ່ຕ່າງປະເທດໄດ້ພາກັນຫຼັ່ງໄຫຼກັບຄືນປະເທດເປັນຈຳນວນຫຼວງຫຼາຍ, ຈາກການເກັບກຳຂໍ້ມູນ ມາຮອດເດືອນພຶດສະພາ ມີພົນລະເມືອງທີ່ກັບຄືນປະເທດທັງໝົດ 246.757 ຄົນ, ປັດຈຸບັນ ເຂົາເຈົ້າເຫຼົ່ານັ້ນ ໄດ້ກາຍເປັນຜູ້ ວ່າງງານທີ່ມີຢູ່ພາຍໃນປະເທດ, ດັ່ງນັ້ນ ກອງປະຊຸມຍັງຈະໄດ້ຫາລືກ່ຽວກັບການໃຫ້ການຊ່ວຍເຫຼືອແກ່ແຮງງານທີ່ຖືກຢຸດວຽກ, ການເຂົ້າເຖິງການສັກວັກຊິນ ແລະ ກວດຫາເຊື້ອກ່ອນມີການສົ່ງກັບປະເທດ, ເຊິ່ງປະກອບດ້ວຍການອໍານວຍຄວາມສະດວກຂອງປະເທດຕົ້ນທາງໃນການດໍາເນີນການຂະຫຍາຍອາຍຸໜັງສືເດີນທາງ, ການກະກຽມການຈັດສົ່ງ ຫຼື ນໍາເຂົ້າແຮງງານໃໝ່ເຂົ້າມາເຮັດວຽກຕາມລະບົບ MOU ແລະ ເພື່ອເຮັດໃຫ້ວຽກງານແຮງງານລະຫວ່າງ 2 ປະເທດ ເປັນໄປຕາມບົດບັນທຶກ, ຂະນະທີ່ ຝ່າຍລາວ ຍັງໄດ້ສະເໜີຝ່າຍໄທ ໃຫ້ຄວາມຊ່ວຍເຫຼືອຜູ້ອອກແຮງງານລາວ ທີ່ໄດ້ຮັບຜົນກະທົບຈາກການປິດກິດ ຈະການຂອງຫົວໜ່ວຍແຮງງານ, ການຊຸກຍູ້ໃຫ້ຜູ້ອອກແຮງງານລາວທີ່ຈະກັບຄືນປະເທດ ຜ່ານຊ່ອງທາງທີ່ຖືກຕ້ອງ ແລະ ໄດ້ຮັບການກວດກາເຊື້ອພະຍາດໂຄວິດ 19 ກ່ອນເດີນທາງກັບຄືນປະເທດ, ການສະໜອງຂໍ້ມູນຂອງຜູ້ອອກແຮງງານລາວທີ່ຖືກເລີກຈ້າງ ແລະ ຈະເດີນທາງກັບຄືນປະເທດອີກດ້ວຍ.

ຄົນບັນເທິງຫຼາຍຄົນ ຮ່ວມໄວ້ອາໄລ ກັບການສູນເສຍ ແມ່ ແລະ ພໍ່ ຂອງ ເປັດເຊີນ ຍິ້ມ ຕະຫຼົກລຸ້ນໃຫຍ່ ປະເທດໄທ ເຊິ່ງສາເຫດຂອງການເສຍຊີວິດກໍ່ຍ້ອນການຕິດເຊື້ອໂຄວິດ-19, ຜູ້ເປັນແມ່ນັ້ນໄດ້ເສຍ ໃນ ວັນທີ ກໍລະກົດ 2021 ອາຍຸ 89 ປີ (ເສຍຊິວິດວັນທີ 30 ກໍລະກົດ 2021 ຫຼັງຈາກນັ້ນບໍ່ພຽງເທົ່າໃດມື້ ຜູ້ເປັນພໍ່ກໍໄດ້ເສຍຊີວິດ ອາຍຸ 94 ປີ (ເສຍຊີວິດ 9 ກໍລະກົດ 2021), ນັບວ່າເປັນສິ່ງທີ່ຜູ້ເປັນລູກຮັບບໍ່ໄຫວກັບສະຖານະການແບບນີ້.

ເປັດ ເຊີນຍິ້ມ ໃຫ້ສຳພາດຕໍ່ນັກຂ່າວ ພ້ອມດ້ວຍນໍ້າຕາ ວ່າ: ຕົນນັ້ນເປັນນັກສູ້ມາຕະຫຼອດ ແຕ່ເທື່ອນີ້ຂໍຍອມແພ້ ເພາະມັນເປັນພາບທີ່ໂຫດຮ້າຍ ແລະ ທໍລະມານຈິດໃຈທີ່ສຸດ ພາບຂອງແມ່ທີ່ເສຍຊີວິດຍັງບໍ່ຈາງຫາຍ ຫ່າງກັນພຽງ 1 ອາທິດ, ຜູ້ເປັນພໍ່ ກໍມາເສຍຊີວິດນຳຫຼັງຫັນ ກໍມາເຫັນພາບຂອງພໍ່ເສຍຊີດວິດ, ທີ່ຜ່ານມາ ພະຍາຍາມເຮັດໜ້າທີ່ລູກທີ່ດີ ເບິ່ງແຍງພໍ່ແມ່ຕະຫຼອດ ເພື່ອໃຫ້ພໍ່ແມ່ນັ້ນມີຄວາມສຸກ ແລະ ຢູ່ກັບລູກຫຼານໄປດົນໆ.

ທາງໂທລະໂຄ່ງກໍຂໍສະແດງຄວາມເສຍໃຈກັບການສູນເສຍຄັ້ງໃຫຍ່ນີ້

ຕາມການລາຍງານ ຂອງການຄ້າແຂວງຜົງສາລີໃຫ້ຮູ້ວ່າ: ວັນທີ 09 ກໍລະກົດ 2021 ທີ່ຜ່ານມາ, ຢູ່ທີ່ສະໜາມຖິ້ມຂີ່ເຫຍື້ອ ( ຫຼັກ 06 ) ເມືອງຜົ້ງສາລີ, ໄດ້ຈັດພິທີທໍາລາຍ ສິນຄ້າໝົດອາຍຸ, ສິນຄ້າເຊື່ອມຄຸນ, ສິນຄ້າປອມແປງລອກແບບ ແລະ ສິນຄ້ານໍາເຂົ້າບໍ່ຖືກຕ້ອງ. ໂດຍເປັນກຽດເຂ້າຮ່ວມຂອງ ທ່ານ ຄໍາເຫຼັກ ແສນທະພູມ ຮອງຫົວໜ້າພະແນກອຸດສາຫະກໍາ ແລະ ການຄ້າແຂວງ, ມີບັນດາທ່ານຕາງໜ້າຈາກຂະແໜງການທີ່ກ່ຽວຂ້ອງຂັ້ນແຂວງ, ຂັ້ນເມືອງເຂົ້າຮ່ວມເປັນສັກຄີພິຍານ.

ໃນພິທີ ທ່ານ ທອງສະຫວັນ ແສງໄຊຍະລາດ ຮັກສາການຫົວໜ້າຂະແໜງການຄ້າ ໄດ້ຜ່ານບົດລາຍງານການຈັດຕັ້ງປະຕິບັດໃນຄັ້ງນີ້ ເຊິ່ງໃຫ້ຮູ້ວ່າ : ທາງເຈົ້າໜ້າທີ່ກວດກາການຄ້າຂັ້ນແຂວງ ໄດ້ສົມທົບກັບຂະແໜງການທີ່ກ່ຽວຂ້ອງໃນເທດສະບານເມືອງຜົ້ງສາລີ ພ້ອມກັນລົງກວດກາສິນຄ້າໝົດອາຍຸ ພາຍໃນຕະຫຼາດ ແລະ ຫ້າງຮ້ານຂາຍຍົກ-ຂາຍຍ່ອຍ ພາຍໃນເທດສະບານເມືອງຜົ້ງສາລີ. ຜ່ານການລົງກວດກາຕົວຈິງ ສາມາດກວດພົບ ສິນຄ້າເຊື່ອມຄຸນ, ສິນຄ້າໝົດອາຍຸ ເປັນຕົ້ນແມ່ນສິນຄ້າປະເພດແຊ່ແຂງ, ເຄື່ອງປຸງອາຫານ, ປະເພດນົມ ແລະ ຂະໜົມ ຈໍານວນ 41 ລາຍການ, ນໍ້າໜັກ 117 ກິໂລກຣາມ ໃນນີ້, ມີ ເຄື່ອງບໍລິໂພກທົ່ວໄປ 82 ກິໂລກຣາມ, ໄສ້ກອກແຊ່ແຂງ 21, 5 ກິໂລກຣາມ, ເຕົາຫູ້ໄຂແຊ່ແຂງ 02 ກິໂລກຣາມ, ເຄື່ອງຕົ້ມປາ (ແຈ່ວ, ເຕົາຫູ້ດອງ) 07 ກິໂລກຣາມ ແລະ ປູອັດແຊ່ແຂງ 05 ກິໂລກຣາມ, , ຄິດເປັນມູນຄ່າ 7, 207, 500 ກີບ.

ສໍາລັບສິນຄ້າຈໍານວນດັ່ງກ່າວ, ທາງເຈົ້າໜ້າທີ່ໄດ້ຍຶດເພື່ອຈະນໍາໄປທໍາລາຍ ພ້ອມທັງເຮັດບົດບັນທຶກກັບບັນດາຫົວໜ່ວຍທຸລະກິດ ແລະ ຫ້າງຮ້ານຈໍານວນ 08 ຮ້ານ, ທັງນີ້ ກໍ່ເພື່ອເປັນການຕັກເຕືອນໃຫ້ກັບຫົວໜ່ວຍທຸລະກິດ ເປັນເຈົ້າການໃນການຈໍາໜ່າຍສິນຄ້າທີ່ຖືກຕ້ອງຕາມມາດຕະຖານ, ສິນຄ້າມີຄຸນນະພາບ ແນ່ໃສ່ເຮັດໃຫ້ຜູ້ບໍລິໂພກໄດ້ຊົມໃຊ້ສິນຄ້າມີຄຸນນະພາບ ຖືກຫຼັກສຸກຂະອະນາໄມ ແລະ ມີຄວາມປວດໄພທາງດ້ານສຸຂະພາບ.