ເມືອງໂຂງ ເປີດນຳໃຊ້ສູນກັກກັນ ເຝົ້າລະວັງພະຍາດໂຄວິດ-19 ຫລັງໃໝ່ ແຫລ່ງຂ່າວຈາກ ເມືອງໂຂງ ແຂວງຈຳປາສັກ ໃຫ້ຮູ້ວ່າ: ວັນທີ 1 ຕຸລາ 2021 ນີ້, ເມືອງໂຂງ ຈັດພິທີເປີດນໍາໃຊ້ສູນກັກກັນ ເຝົ້າລະວັງພະຍາດໂຄວິດ-19 ຫລັງໃໝ ພາຍຫລັງລົງມືກໍ່ສ້າງໃນຕົ້ນເດືອນສິງຫາ 2021 ແລະ ສຳເລັດລົງໃນທ້າຍເດືອນ ກັນຍາ 2021 ລວມມູນຄ່າການກໍ່ສ້າງທັງໝົດ 341 ລ້ານກວ່າກີບ.
![](https://tholakhong.com/wp-content/uploads/2021/10/savv.jpeg)
ເຂົ້າຮ່ວມໃນພິທີມີ ທ່ານ ບົວທອງ ສຸວັນນະສານ ຫົວໜ້າພະແນກສຶກສາທິການ ແລະ ກິລາແຂວງ, ທ່ານນາງ ຄຳພູ ລິດທິສັກ ເຈົ້າເມືອງໂຂງ, ມີຜູ້ຕ່າງໜ້າບໍລິສັດເຂື່ອນໄຟຟ້າ ດອນສະໂຮງ ແລະ ພາກສ່ວນກ່ຽວຂ້ອງເຂົ້າຮ່ວມ.
![](https://tholakhong.com/wp-content/uploads/2021/10/svda.jpeg)
ໂອກາດນີ້, ທ່ານ ວິໄຊ ສາຍອຸບົນ ປະທານແນວລາວສ້າງຊາດເມືອງໂຂງ ໄດ້ໃຫ້ຮູ້ວ່າ: ໂຄງການກໍ່ສ້າງອາຄານສູນກັກກັນ ເຝົ້າລະວັງພະຍາດໂຄວິດ-19 ປະກອບມີ 2 ອາຄານ, ແຕ່ລະຫລັງມີຂະໜາດ 15×20 ແມັດ, ແຕ່ລະຫລັງສາມາດບັນຈຸໄດ້ 30 ຕຽງ, ມີຫ້ອງນ້ຳ, ລະບົບນ້ຳປະປາ ແລະ ໄຟຟ້າຄົບຊຸດ.
![](https://tholakhong.com/wp-content/uploads/2021/10/sdvv.jpeg)
ສຳລັບແຫລ່ງທຶນໃນການກໍສ້າງແມ່ນໄດ້ມາຈາກ ກອງທຶນພັດທະນະຊຸມຊົນ ໂຄງການເຂື່ອນໄຟຟ້າດອນສະໂຮງຈຳນວນ 150 ລ້ານກີບ, ທຶນຈາກພາກສ່ວນຫົວໜ່ວຍທຸລະກິດ, ບໍລິສັດ, ພາກສ່ວນສັງຄົມພາຍໃນເມືອງຈຳນວນ 191 ລ້ານກວ່າກີບ. ຂ່າວ-ພາບ: ພຸດທະສິນ ວົງວິໄລທອງ
ຂໍ້ມູນ: ຂປລ