ປັດຈຸບັນ, ສປປ ລາວ ຍັງມີຜູ້ຕິດເຊື້ອເພີ່ມຂຶ້ນແຕ່ລະວັນຈົນເຖິງ 2000 ກວ່າຄົນ ຕໍ່ມື້, ຕາມການລາຍງານຂອງຄະນະສະເພາະກິດ ປະຈຳວັນທີ 1 ເມສາ 2022 ໃຫ້ຮູ້ວ່າ: ສຳລັບ ສປປ ລາວ, ການລະບາດໃນທົ່ວປະເທດ ຍັງບໍ່ທັນມີທ່າອ່ຽງທີ່ຈະຢຸດຕິລົງເທື່ອ, ຍິ່ງໄປກວ່ານັ້ນ ອັດຕາການກວດພົບເຊື້ອ ກໍ່ສູງເຖິງ 50% ຂອງຈຳນວນຕົວຢ່າງທີ່ເກັບມາກວດວິເຄາະ, ໃນນັ້ນ ຈຳນວນຜູ້ຕິດເຊື້ອປະຈຳວັນ ທີ່ພົ້ນເດັ່ນກວ່າໝູ່ ອັນດັບໜຶ່ງ ກໍ່ຍັງແມ່ນ ນະຄອນຫຼວງ ເຊິ່ງມີຜູ້ຕິດເຊື້ອຫຼັກພັນຄົນຕໍ່ວັນ, ຖັດລົງມາ ແມ່ນ ແຂວງ ສະຫວັນນະເຂດ, ໄຊຍະບູລີ ແລະ ແຂວງວຽງຈັນ ທີ່ມີຜູ້ຕິດເຊື້ອຫຼັກຮ້ອຍຄົນຕໍ່ວັນ. ເພື່ອສະກັດກັ້ນການລະບາດ ບໍ່ໃຫ້ຂະຫຍາຍເປັນວົງກວ້າງໃນປະເທດຂອງພວກເຮົາ, ຈຶ່ງຂໍຮຽກຮ້ອງມາຍັງ ທຸກພາກສ່ວນໃນສັງຄົມ ເປັນເຈົ້າການຕົນເອງ ໃນການປະຕິບັດມາດຕະການປ້ອງກັນການຕິດເຊື້ອຢ່າງເຂັ້ມງວດ ເພື່ອຄວາມປອດໄພຂອງໂຕທ່ານເອງ, ຄົນອ້ອມຂ້າງ ແລະ ຊຸມຊົນຂອງທ່ານ.

ໃນວັນທີ 31 ມີນາ 2022, ໄດ້ກວດວິເຄາະທົ່ວປະເທດ 5,270 ຕົວຢ່າງ ແລະ ກວດພົບເຊື້ອໂຄວິດ-19 ເຖິງ 2,665 ຄົນ, ເຊັ່ນ: ນະຄອນຫຼວງວຽງຈັນ ກວດ 2,318 ຕົວຢ່າງ ພົບເຊື້ອ 1,348 ຕົວຢ່າງ, ສະຫວັນນະເຂດ ກວດ 347 ພົບເຊື້ອ 200 ຕົວຢ່າງ, ສາລະວັນ ກວດ 74 ຕົວຢ່າງ ພົບເຊື້ອ 50 ຕົວຢ່າງ, ໄຊຍະບູລີ ກວດວິເຄາະ 358 ພົບ 173 ຕົວຢ່າງ, ຫົວພັນ ກວດວິເຄາະ 106 ຕົວຢ່າງ ພົບເຊື້ອ 42 ຕົວຢ່າງ.

ຈາກຕົວເລກທີ່ກວດວິເຄາະເຮົາຈະເຫັນວ່າອັດຕາການພົບຜູ້ຕິດເຊື້ອໃໝ່ຍັງສູງ.

ຂໍໃຫ້ທຸກຄົນຮັກສາມາດຕະການ ແລະ ປ້ອງກັນຕົນເອງຢ່າງເຂັ້ມງວດ.

LEAVE A REPLY

Please enter your comment!
Please enter your name here