ລາຍງານ ປະຈຳວັນທີ 26 ພະຈິກ 2021
ລັດຖະບານຈີນຊ່ວຍເຫຼືອ 5 ແຂວງພາກເໜືອ ຂອງລາວ
ແຂວງຜົ້ງສາລີເຂົ້າຮ່ວມພິທີມອບຮັບວັກຊິນທີ່ລັດຖະບານ ແລະ ປະຊາຊົນຈີນໄດ້ຊ່ວຍເຫຼືອ ແກ່ລັດຖະບານ ແລະ ປະຊາຊົນລາວ.
ໃນວັນທີ 25 ພະຈິກ 2021 ນີ້, ຢູ່ທີ່ຫຼັກໝາຍ 7 ຊາຍແດນ ລາວຈີນ ທາງອົງການປົກຄອງແຂວງ ເຊິ່ງນຳໂດຍ ທ່ານ ຄຳເຫຼັກ ໃຈອິສານ ຮອງເຈົ້າແຂວງໆຜົ້ງສາລີ, ຫົວໜ້າຄະນະສະເພາະກິດເພື່ອປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການແຜ່ລະບາດຂອງພະຍາດໂຄວິດ – 19 ຂັ້ນແຂວງ ໄດ້ເຂົ້າຮ່ວມພິທີມອບ-ຮັບ ວັກຊີນປ້ອງກັນພະຍາດໂຄວິດ-19 ຈຳນວນ 7 ແສນໂດສ ແລະ ອຸປະກອນການແພດ ຈໍານວນ 10 ລ້ານຢວນ ຫຼື 17 ຕຶ້ກີບ ທີ່ລັດຖະບານ ແລະ ປະຊາຊົນຈີນໄດ້ຊ່ວຍເຫລືອ ແກ່ລັດຖະບານ ແລະ ປະຊາຊົນລາວ ເພື່ອນຳເຂົ້າໃຊ້ໃນວຽກງານການປ້ອງກັນພະຍາດໂຄວິດ ຢູ່ບັນດາ 5 ແຂວງ ຄື: ແຂວງບໍ່ແກ້ວ, ແຂວງອຸດົມໄຊ, ແຂວງຫລວງນໍ້າທາ, ແຂວງຜົ້ງສາລີ, ແລະ ແຂວງຫຼວງພະບາງ.
ຕາງໜ້າໃຫ້ລັດຖະບານ ສປ ຈີນ ກ່າວມອບທາງກອງປະຊຸມທາງໄກ (ອອນລາຍ) ໂດຍທ່ານ ເຈັ່ນ ເຄີມິງ ຮອງລັດຖະມົນຕີກະຊວງການຄ້າຈີນ, ທ່ານ ເຕິ້ນ ໂປຊິ້ງ ຮອງປະທານອົງການຮ່ວມມືສາກົນເພື່ອການພັດທະນາແຫ່ງ ສປ ຈີນ, ທ່ານ ລີ ມາລີນ ຮອງເຈົ້າແຂວງ ແຂວງຢຸນນານ, ທ່ານ ຈ່ຽງຈ່າຍ ຕຸ່ງ ເອກອັກຄະລັດທະທູດ ວິສາມັນຜູ້ມີອຳນາດເຕັມ ແຫ່ງ ສປ ຈີນ ປະຈຳລາວ, ຮັບໂດຍທ່ານ ປອ. ດຣ.ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ ພ້ອມດ້ວຍຫົວຫນ້າຫ້ອງການ, ກົມຕ່າງໆກໍ່ໄດ້ເຂົ້າຮ່ວມ. ເຄື່ອງປ້ອງກັນພະຍາດໂຄວິດ-19 ຈຳນວນ 6 ລ້ານຢວນ ຫຼື 10 ຕື້ກີບ ມອບໃຫ້ແກ່ກະຊວງສາທາລະນະສຸກ ແລະ ອຸປະກອນການແພດຈຳນວນ 4 ລ້ານຢວນ ຫຼື 7 ຕື້ກີບ ແລະ ວັກຊີນຈຳນວນ 7 ແສນໂດສ ແມ່ນຈະມອບໃຫ້ບັນດາແຂວງພາກເຫນືອ.
ໃນນີ້ສຳລັບແຂວງຜົ້ງສາລີແມ່ນໄດ້ຮັບວັກຊິນ ຈຳນວນ 24.800 ໂດສ໌ ວັກຊິນຈຳນວນດັ່ງກ່າວນີ້ແມ່ນບຸລິມະສິດອັນດັບໜຶ່ງ ແມ່ນສັກໃຫ້ພົນລະເມືອງ ຂອງເມືອງຍອດອູສຳເລັດກ່ອນ, ສ່ວນທີ່ຍັງເຫຼືອ ກໍ່ສາມາດຈັດແບ່ງໃຫ້ອົງການປົກຄອງເມືອງບຸນເໜືອ ແລະ ເມືອງບຸນໃຕ້ ແລະ ຢາວັກຊິນຊຸດນີ້ສາມາດສັກໃຫ້ເດັກເລີ່ມແຕ່ເກນອາຍຸ 03 ປີ ຂຶ້ນໄປ.
ໃນ ພິທີ ທັງສອງຝ່າຍຍັງໄດ້ ລົງນາມເຊັນບົດບັນທືກມອບຮັບຮ່ວມກັນລະຫ່ວາງແຂວງຜົ້ງສາລີ ແຫ່ງ ສປປ ລາວ ກັບ ເມືອງຈຽງເຊີນ ນະຄອນພູເອີ ແຂວງຢຸນນານ ແຫ່ງ ສປ ຈີນ ໂດຍ ຕ່າງໜ້າຝ່າຍຈີນ ເຊັນ ມອບໂດຍທ່ານ ຫູຊິງຮົວ ເລຂາພັກເມືອງຈຽງເຊິນ ຕ່າງໜ້າຝ່າຍແຂວງຜົ້ງສາລີ ເຊັນຮັບໂດຍ ທ່ານ ຄຳເຫຼັກ ໃຈອິສານ ຮອງເຈົ້າແຂວງໆຜົ້ງສາລີ, ຫົວໜ້າຄະນະສະເພາະກິດເພື່ອປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການແຜ່ລະບາດຂອງພະຍາດໂຄວິດ – 19 ຂັ້ນແຂວງ ແລະ ໂດຍຊ່ອງໜ້າຈາກພາກສ່ວນທີ່ກ່ຽວຂ້ອງທັງສອງຝ່າຍເຂົ້າຮ່ວມເປັນສັກຄີພິຍານ.
ພາບ - ຂ່າວ: ແສງຄຳ ສາລີວັນ
ນາຍົກລັດຖະມົນຕີ ອອກດໍາລັດ ວ່າດ້ວຍການຈັດຕັ້ງ ແລະ ການເຄື່ອນໄຫວຂອງກະຊວງສສກ
ສຶກສາດໍາລັດ ວ່າດ້ວຍການຈັດຕັ້ງ ແລະ ການເຄື່ອນໄຫວຂອງກະຊວງສຶກສາທິການ ແລະ ກິລາ ອີງຕາມ ກົດຫມາຍວ່າດ້ວຍລັດຖະບານ ສະບັບເລກທີ 04/ສພຊ, ລົງວັນທີ 08 ພະຈິກ2016;
- ອີງຕາມ ຂໍ້ຕົກລົງຂອງນາຍົກລັດຖະມົນຕີ ວ່າດ້ວຍການສັບຊ້ອນວຽກງານຂອງລັດຖະບານ ສະບັບເລກທີ 17/ນຍ, ລົງວັນທີ 11 ມີນາ 2021;
- ອີງຕາມ ມະຕິກອງປະຊຸມສະພາແຫ່ງຊາດ ວ່າດ້ວຍການຮັບຮອງເອົາໂຄງປະກອບກົງຈັກ ແລະ ສະມາຊິກ ລັດຖະບານ ສະບັບເລກທີ 09/ສພຊ, ລົງວັນທີ 22 ມີນາ 2021;
- ອີງຕາມ ຫນັງສືສະເຫນີ ຂອງກະຊວງພາຍໃນ ສະບັບເລກທີ 214/ພນ, ລົງວັນທີ 10 ກັນຍາ 2021.
ນາຍົກລັດຖະມົນຕີ ອອກດໍາລັດ:ຫມວດທີ 1 ບົດບັນຍັດທົ່ວໄປ
-ມາດຕາ 1 ຈຸດປະສົງ: ດໍາລັດສະບັບນີ້ ກໍານົດທີ່ຕັ້ງ, ພາລະບົດບາດ, ຫນ້າທີ່, ຂອບເຂດສິດ, ໂຄງປະກອບການຈັດຕັ້ງ, ຫຼັກ ການ ແລະ ແບບແຜນວິທີເຮັດວຽກ ເພື່ອເປັນບ່ອນອີງໃຫ້ແກ່ການຈັດຕັ້ງ ແລະ ການເຄື່ອນໄຫວວຽກງານຂອງ ກະຊວງສຶກສາທິການ ແລະ ກິລາ ແນໃສ່ຈັດຕັ້ງຜັນຂະຫຍາຍແນວທາງນະໂຍບາຍຂອງພັກ, ປະຕິບັດກົດຫມາຍ ແລະ ລະບຽບການຂອງລັດ ໃນການຄຸ້ມຄອງ ແລະ ພັດທະນາວຽກງານ ການສຶກສາ, ວິທະຍາສາດ ແລະ ກິລາ.
ມາດຕາ 2 ທີ່ຕັ້ງ ແລະ ພາລະບົດບາດ: ກະຊວງສຶກສາທິການ ແລະ ກິລາ ຂຽນເປັນຕົວອັກສອນຫຍໍ້ວ່າ “ສສກ” ແມ່ນກົງຈັກການຈັດຕັ້ງຫນຶ່ງ ຂອງລັດຖະບານ, ມີພາລະບົດບາດເປັນເສນາທິການໃຫ້ແກ່ລັດຖະບານ ແລະ ຄຸ້ມຄອງມະຫາພາກກ່ຽວກັບ ວຽກງານການສຶກສາ, ການຄົ້ນຄວ້າວິທະຍາສາດ ແລະ ວຽກງານກິລາ-ກາຍຍະກໍາ ໃນຂອບເຂດທົ່ວປະເທດ, ເປັນໃຈກາງໃນການພັດທະນາຊັບພະຍາກອນມະນຸດ ຕາມສາມລັກສະນະ ແລະ ຫ້າຫຼັກມູນ ຂອງການສຶກສາ ແຫ່ງຊາດ.
ການລະບາດພະຍາດໂຄວິດ-19 ຮອບໃໝ່ທີ່ບັນດາປະເທດໃນຍູໂຣບກຳລັງປະເຊີນ
ຕາມການລາຍງານ ຂອງຄະນະສະເພາະກິດປະຈຳວັນທີ 26 ພະຈິກ 2021, ລາຍງານໂດຍ ທ່ານ ດຣ. ຣັດຕະນະໄຊ ເພັດສຸວັນ ໄດ້ໃຫ້ຊາບວ່າ:
ຕໍ່ສະພາບຂອງການລະບາດຮອບໃໝ່ທີ່ບັນດາປະເທດໃນຍູໂຣບກຳລັງປະເຊີນໜ້ານັ້ນ, ໄດ້ມີລາຍງານຂອງການປ່ຽນແປງພັນທຸກຳຂອງເຊື້ອຈຸລາໂລກ ໂຄວິດ 19 ຊຶ່ງເພີ່ນໃສ່ລະຫັດ B.1.1.5.29 ຊຶ່ງກາຍພັນກ່ວາ ສາຍພັນແດນຕາ. ສາຍພັນໃໝ່ແມ່ນກຳລັງລະບາດໃນຂົງເຂດອາຟຣິກາໃຕ້ ແລະ ເປັນທີ່ຕາຈັບຕາຂອງບັນດາຜູ້ຊ່ຽວຊານທົ່ວໂລກ ເພາະການປ່ຽນແປງພັນທຸກຳແມ່ນເກີດຂື້ນໂດຍສະເພາະໃນຂົງເຂດທີ່ເປັນໜາມຂອງເຊື້ອໂຄວິດ(spike protein) ຊື່ງເຮັດໃຫ້ການຕິດເຊື້ອໄດ້ໄວ ແລະ ງ່າຍຂື້ນກ່ວາເກົ່າ ນອກຈາກນັ້ນຍັງເຮັດໃຫ້ສາຍພັນໃໝ່ນີ້ສາມາດຫຼົບຫຼີກລະບົບພຸມປ້ອງກັນຂອງຮ່າງກາຍຄົນເຮົາໄດ້.
ລາຍລະອຽດຜູ້ຕິດເຊື້ອໃໝ່ມື້ນີ້ +4 ແລະ ຜູ້ຕິດເຊື້ອໃໝ່ທົ່ວປະເທດ.
ຈາກການຖະແຫຼງຂ່າວ ຂອງຄະນະສະເພາະກິດ ປະຈຳວັນທີ 26 ພະຈິກ 2021 ໃຫ້ຮູ້ວ່າ
ຂໍ້ມູນໂດຍຫຍໍ້ກ່ຽວກັບການຕິດເຊືື້ອພາຍໃນໃໝ່ ທັງໝົດ 1,509 ຄົນ ຈາກ 18 ແຂວງ ເຊີ່ງຈະລຽງລຳດັບຈາກແຂວງທີ່ມີກໍລະນີຫຼາຍຫາໜ້ອຍ ເຊິ່ງມີລາຍລະອຽດ ດັ່ງນີ້:
- ນະຄອນຫຼວງວຽງຈັນ 856 ຄົນ ໃນ 204 ບ້ານ ແລະ 9 ເມືອງ
- ຫຼວງພະບາງ ມີ 134 ຄົນ ໃນ 43 ບ້ານ ແລະ 8 ເມືອງ
- ແຂວງວຽງຈັນ ມີ 107 ຄົນ ໃນ 31 ບ້ານ ແລະ 9 ເມືອງ
- ໄຊຍະບູລີ ມີ 74 ຄົນ ໃນ 12 ບ້ານ ແລະ 2 ເມືອງ
- ບໍ່ແກ້ວ ມີ 70 ຄົນ ໃນ 27 ບ້ານ ແລະ 4 ເມືອງ
- ສະຫວັນນະເຂດ ມີ 63 ຄົນ ໃນ 28 ບ້ານ ແລະ 5 ເມືອງ
- ຈຳປາສັກ ມີ 48 ຄົນ ໃນ 25 ບ້ານ ແລະ 3 ເມືອງ
- ອຸດົມໄຊ ມີ 42 ຄົນ ໃນ 13 ບ້ານ ແລະ 2 ເມືອງ
- ບໍລິຄຳໄຊ ມີ 36 ຄົນ ໃນ 4 ບ້ານ ແລະ 2 ເມືອງ
- ຫົວພັນ ມີ 21 ຄົນ ໃນ 6 ບ້ານ ແລະ 2 ເມືອງ
- ເຊກອງ ມີ 13 ຄົນ ໃນ 1 ບ້ານ ແລະ 1 ເມືອງ
- ສາລະວັນ ມີ 12 ຄົນ ໃນ 7 ບ້ານ ແລະ 3 ເມືອງ
- ຫຼວງນ້ຳທາ ມີ 11 ຄົນ, ໃນ 3 ບ້ານ ແລະ 1 ເມືອງ
- ຜົ້ງສາລີ ມີ 6 ຄົນ ໃນ 4 ບ້ານ ແລະ 4 ເມືອງ
- ຄຳມ່ວນ ມີ 5 ຄົນ ໃນ 14 ບ້ານ ແລະ 3 ເມືອງ
- ຊຽງຂວາງ ມີ 5 ຄົນ ໃນ 3 ບ້ານ ແລະ 1 ເມືອງ
- ໄຊສົມບູນ ມີ 3 ຄົນ ໃນ 3 ບ້ານ ແລະ 1 ເມືອງ
- ອັດຕະປື 3 ຄົນ ໃນ 3 ບ້ານ ແລະ 1 ເມືອງ
ສ່ວນການຕິດເຊືື້ອນໍາເຂົ້າ ຂອງຜູ້ທີ່ເດີນທາງເຂົ້າປະເທດ ແມ່ນມີ 1 ຄົນຈາກແຂວງບໍລິຄຳໄຊ ເຊິ່ງທັງໝົດໄດ້ຖືກເກັບຕົວຢ່າງ ແລະ ສົ່ງໄປຈໍາກັດບໍລິເວນຢູ່ສູນຈໍາກັດບໍລິເວນ. ເມື່ອຜົນກວດເປັນບວກ ພວກກ່ຽວໄດ້ຖືກນຳສົ່ງໄປສະຖານທີ່ປິ່ນປົວທີ່ກໍານົດໄວ້.
ມາຮອດວັນທີ 25 ພະຈິກ 2021 ຕົວເລກຜູ້ຕິດເຊື້ອສະສົມ ພະຍາດໂຄວິດ-19 ຢູ່ ສປປ ລາວ 68,832 ຄົນ, ເສຍຊີວິດສະສົມ 148 ຄົນ (ໃໝ່ 04), ປິ່ນປົວຫາຍດີ ແລະ ກັບບ້ານໃນມື້ວານ ມີ 761ຄົນ ແລະ ກໍາລັງປິ່ນປົວ 10,981
ລາຍລະອຽດຜູ້ເສຍຊີວິດໃໝ່ 04 ຄົນ ມີດັ່ງນີ້:
ຜູ້ທີ 1: ເພດຍິງ, ອາຍຸ 64 ປີ, ອາຊີບ: ແມ່ເຮືອນ, ບ້ານນາຂ່າ, ເມືອງນາຊາຍທອງ, ນະຄອນຫລວງວຽງຈັນ.
- ມີພະຍາດປະຈຳຕົວ: ຄວາມດັນເລືອດສູງ
- ເລີ່ມວັນທີ 25 ພະຈິກ 2021: ມີອາການຖອກທ້ອງ, ອິດເມື່ອຍ ແລະ ໝົດສະຕິໄປໂຮງໝໍເມືອງນາຊາຍທອງ ເກັບຕົວຢ່າງກວດເພື່ອຊອກພະຍາດໂຄວິດ-19 ພົບເຊື້ອໄດ້ຖືກນຳສົ່ງໄປໂຮງໝໍມິດຕະພາບເພື່ອປີ່ນປົວ ແຕ່ຄົນເຈັບໄດ້ເສຍສະຕິ ແພດໄດ້ແຍ່ທໍ່ຊ່ວຍຫາຍໃຈ ເພື່ອເຊີດຊູຄົນເຈັບ
- ຮອດວັນທີ 25 ພະຈິກ 2021ເວລາ 10:30 ຂອງ: ຄົນເຈັບ ໄດ້ເສຍຊີວິດ
- ຜູ້ທີ 2: ເພດຍິງ, ອາຍຸ 72 ປີ, ບ້ານຄໍາຮຸ່ງ, ເມືອງໄຊທານີ, ນະຄອນຫລວງ ວຽງຈັນ
- ມີພະຍາດປະຈໍາຕົວ: ເບົາຫວານ, ຄວາມດັນເລືອດສູງ, ນໍ້າຖ້ວມປອດ ແລະ ມີອາການຕິດເຊື້ອ.
- ສັກຢາວັກຊີນຄົບ
- ວັນທີ 20 ພະຈິກ 2021: ມີອາການໄອ, ອິດເມື່ອຍ, ຫາຍໃຈຝືດ ແລະ ນອນພຽງບໍ່ໄດ້
- ວັນທີ 23 ພະຈິກ 2021: ມາຮອດສຸກເສີນຂອງໂຮງໝໍມິດຕະພາບ ເກັບຕົວຢ່າງກວດເພື່ອຊອກພະຍາດໂຄວິດ-19 ຜົນກວດ ແມ່ນພົບເຊື້ອ ແລະ ໄດ້ເຂົ້ານອນຕິດຕາມ
- ວັນທີ 23-25 ພະຈິກ 2021, ເປັນເວລາ 03 ວັນ
- ວັນທີ 25 ພະຈິກ 2021ມາຮອດເວລາ 19:14 ນາທີ ຄົນເຈັບ ໄດ້ເສຍຊີວິດ
ຜູ້ທີ 3: ເພດຍິງ, ອາຍຸ 44 ປີ, ບ້ານຫ້ວຍກໍ້, ເມືອງຈອມເພັດ, ແຂວງຫຼວງພະບາງ
- ບໍ່ມີພະຍາດປະຈຳຕົວ ແລະ ບໍ່ໄດ້ສັກວັກຊີນ
- ວັນທີ 08 ພະຈິກ 2021: ຜົນກວດພົບເຊື້ອ ແລ້ວເຂົ້ານອນຕິດຕາມ ຢູສູນເຂື່ອນນ້ຳຂອງ ເມືອງຈອມເພັດ ແຂວງຫຼວງພະບາງ
- ວັນທີ 15 ພະຈິກ 2021: ໄດ້ນໍາສົ່ງຄົນເຈັບຈາກສູນເຂື່ອນນ້ຳຂອງ ເມືອງຈອມເພັດ ມາໂຮງໝໍແຂວງດ້ວຍອາການອິດເມື່ອຍ, ມີອາການບວມຕາມແຂ່ງຂາ ແລະ ໃບໜ້າ.
- ເວລາ 8:10 ນາທີ ຂອງວັນທີ 21 ພະຈິກ 2021: ຄົນເຈັບມີອາການອິດເມື່ອຍ
- ຕໍ່ມາຄົນເຈັບມີອາການໜັກຂື້ນ ຈຶ່ງນຳສົ່ງເຂົ້າຫ້ອງ ICU ແລະ ເສຍຊີວິດໃນເວລາຕໍ່ມາ
ຜູ້ທີ 4 ເພດຍິງ, ອາຍຸ 51 ປີ, ບ້ານຫ້ວຍຫ້ອມ, ເມືອງສີໂຄດຕະບອງ, ນະຄອນຫລວງ
- ພະຍາດປະຈຳໂຕ: ເບົາຫວານ
- ໄດ້ສັກວັກຊີນສອງເຂັມຄົບ
- ເວລາ 23:30ໂມງຂອງວັນທີ 24 ພະຈິກ 2021: ມາກວດຢູ່ໂຮງໝໍເສດຖາທິລາດ ດ້ວຍອາການໄຂ້, ໄອ ແລະ ຫາຍໃຈຝຶດ ພ້ອມທັງເກັບຕົວຢ່າງມາກວດຊອກຫາພະຍາດໂຄວິດ-19 ພົບເຊື້ອ.
- ມາຮອດເວລາ 21:05 ນາທີ ຂອງວັນທີ 25 ພະຈິກ 2021: ຄົນເຈັບ ໄດ້ເສຍຊີວິດ
ກອງປະຊຸມສຸຂະພາບໜຶ່ງດຽວ ຄັ້ງທີ 10 ເພື່ອເຝົ້າລະວັງ 5 ພະຍາດ
ຕາມການລາຍງານ ຂອງສູນຂ່າວສານການແພດສຸຂະສຶກສາໃຫ້ຮູ້ວ່າ: ກອງປະຊຸມສຸຂະພາບໜຶ່ງດຽວ ຄັ້ງທີ 10 ສຸຂະພາບໜຶ່ງດຽວແມ່ນນອນຢູ່ໃນແຜນງານທີ 2 ຂອງກະຊວງສາທາລະນະສຸກ, ເປັນພະຍາດທີ່ເຝົ້າລະວັງ ໂດຍສະເພາະພະຍາດຈາກສັດສູ່ຄົນເປັນຕົ້ນແມ່ນ ພະຍາດວໍ້, ໄຂ້ຫວັດສັດປີກ, ພະຍາດລໍຊໍ (ພົບໃນຊີ້ນສັດ), ໄຂ້ຍ່ຽວໜູ, ພະຍາດປາກເປື່ອຍລົງເລບ (ພົບໃນງົວ, ຄວາຍ) ຊຶ່ງໄດ້ຈັດບູລິມະສິດກິດຈະກໍາ ເຂົ້າໃນການເຝົ້າລະວັງໃນ 5 ພະຍາດນີ້ ແລະ ມີຄາດໝາຍຕົວຊີ້ວັດໃນປີ 2030 ແມ່ນພະຍາດວໍ້ ຮ່ວມກັບຂະແໜງການກະສິກຳ, ຂະແໜງການສິ່ງແວດລ້ອມ ແລະ ຂະແໜງການອື່ນໆ.
ປະທານກອງປະຊຸມໂດຍທ່ານ ດຣ. ສະໜອງ ທອງຊະນະ ຮອງລັດຖະມົນຕີກະຊວງສາທາລະນະສຸກ ແລະ ທ່ານ ກິແກ້ວ ສິງນາມວົງ ຮອງລັດຖະມົນຕີ ກະຊວງກະສິກໍາ ແລະ ປ່າໄມ້ ພ້ອມດ້ວຍຜູ້ເຂົ້າຮ່ວມຈາກກະຊວງສາທາລະນະສຸກ, ກະຊວງກະສິກໍາ ແລະ ປ່າໄມ້, ກະຊວງສຶກສາທິການ ແລະ ກິລາ ພ້ອມດ້ວຍອົງການສາກົນທີ່ກ່ຽວຂ້ອງ ນະຄອນຫຼວງວຽງຈັນ, 25 ພະຈິກ 2021.
ສະຫະປະຊາຊາດ ຮັບຮອງເອົາ ສປປ ລາວ ອອກຈາກລາຍຊື່ປະເທດດ້ອຍພັດທະນາແລ້ວ!
ຕາມການລາຍງານ ຂອງ United Nations ໃຫ້ຊາບວ່າ: ໃນວັນທີ 24 ພະຈິກ 2021 ກອງປະຊຸມ ສະມັດຊາໃຫຍ່ ສະຫະປະຊາຊາດ ໄດ້ຮັບຮອງເອົາ 3 ປະເທດ ໃຫ້ຫຼຸດພົ້ນອອກຈາກ ສະຖານະປະເທດດ້ອຍພັດທະນາ ເຊິ່ງລວມມີ ສປປ ລາວ, ບັງກະລາເທດ ແລະ ເນປານ.
ໃນມະຕິກອງປະຊຸມສະມັດຊາໃຫຍ່ ສະຫະປະຊາຊາດ ໄດ້ຕັດສິນໃຈ ຈັດ 3 ປະເທດ ບົນພື້ນຖານທີ່ພິເສດ, ໂດຍໃຫ້ມີໄລຍະກະກຽມ ເປັນເວລາ 5 ປີ (ປົກກະຕິ 3 ປີ) ເພື່ອກ້າວອອກຈາກສະຖານະ ປະເທດດ້ອຍພັດທະນາ ໂດຍສະເພາະ ແມ່ນການຟື້ນຟູ ແລະ ຜັນຂະຫຍາຍ ບັນດາຍຸດທະສາດ ເພື່ອຕອບໂຕ້ ຜົນກະທົບອັນໜັກໜ່ວງ ຈາກການແຜ່ລະບາດ ຂອງພະຍາດໂຄວິດ-19.
ຖືວ່າເປັນຂ່າວດີຫຼາຍ ແລະ ຈະກາຍເປັນບາດກ້າວສຳຄັນທີ່ສຸດ ຂອງລາວເຮົາ.
ດີຕໍ່ໃຈ! ສະຖານທູດລາວ ປະຈໍາປະເທດຝຣັ່ງ ມອບພາສປອດ ໃຫ້ ບີນລີ ເກດແກ້ວພົມພອນ
ສະຖານທູດລາວ ປະຈໍາປະເທດຝຣັ່ງ ມອບ ໜັງສືເດີນທາງລາວ (Passport) ແລະ ຊຸດເຄື່ອງນຸ່ງທີມຊາດ ໃຫ້ ບີນລີ ເກດແກ້ວພົມພອນ, ນັກກິລາເຊື້ອຊາດລາວ ເພື່ອລຸຍສຶກ AFF SUZUKI CUP 2020 ທີ່ສິງກະໂປ ຈັດຂຶ້ນລະຫວ່າງວັນທີ 5 ທັນວາ 2021 ຫາວັນທີ 1 ມັງກອນ 2022ທັບນັກເຕະທີມຊາດລາວຊຸດໃຫຍ່ ມີ 30 ຄົນ ເຊິ່ງມີລາຍຊື່ຂອງ ບິນລີ້ ເກດແກ້ວພົມພອນ ໃນລາຍຊື່ກອງໜ້າ.
ໃນວັນທີ່ 25 ພະຈິກ 2021 ໂດຍຕ່າງໜ້າ ໃຫ້ ສະຫະພັນ ບານເຕະລາວ ໃນພິທີ ຈັດຂື້ນເປັນ ພິເສດ ຢູ່ຫ້ອງຮັບແຂກ ສະຖານ ເອກອັກຄະລັດຖະທູດ ສປປ ລາວ ປະຈຳປະເທດ ຝຣັ່ງ ທ່ານ ຢົງ ຈັນທະລັງສີ ເອກອັກຄະລັດຖະທູດ ວິສາມັນ ຜູ້ມີອຳນາດເຕັມ ສປປ ລາວ ປະຈຳປະເທດ ຝຣັ່ງ ໄດ້ ມອບ ປື້ມຜ່ານແດນທາງການ (Passport) ສປປ ລາວ ພ້ອມດ້ວຍ ເສື້ອເລກ 21 ຂອງ ທີມຊາດ ສປປ ລາວ ໃຫ້ແກ່ ທ່ານ ບີນລີ ເກດແກ້ວພົມພອນ ນັກເຕະບານອາຊີບ ສາຍສອງ ສັງກັດຢູ່ ສະໂມສອນ USL Dunkerque ທາງພາກເໜືອ ຂອງ ປະເທດ ຝຣັງ.ທ່ານ ບີນລີ ເກດແກ້ວພົມພອນ ແມ່ນລູກຫລານຊາວລາວເຮົາ ທີ່ດຳລົງຊີວິດ ຢູ່ປະເທດ.
ບີນລີ ເກີດຢູ່ເມືອງ Champigny-sur-Marne ໃນປີ 1990 ແລະ ໄດ້ເລິ້ມຕົ້ນເປັນນັກກີລາ ອາຊີບ ຢູ່ ສະໂມສອນ Paris Racing Club ກ່ອນຖືກສົງໄປຮຽນຢູ່ ໂຮງຮຽນ Clairefontaine ເຊີ່ງເປັນໂຮງຮຽນນັກກີລາບານເຕະດີເດັ່ນລະດັບຊາດ ຂອງ ປະເທດ ຝຣັ່ງ ໃນປີ 2006. ພາຍຫລັງໜື່ງປີ ໄດ້ຍ້າຍໄປ ສະໂມສອນ RC Strasbourg. ໃນປີ 2011 ໄດ້ເຊັນສັນຍາ ກັບ ສະໂມສອນ FC Sion ແຫ່ງປະເທດ ສະວິດສ ແລະ ຕໍ່ມາກໍ່ເຂົ້າສັງກັດ ສະໂມສອນ ຂອງ ເມືອງ Tour (ປະເທດ ຝຣັ່ງ).
ຮອດປີ 2015 ມາເຕະໃຫ້ ສະໂມສອນ Anger SCO, AJ Auxerre ແລະ SO Cholet ກ່ອນຈະມາເຕະໃຫ້ ສະໂມສອນ USL Denkerque.ນັບວ່າ ຄັ້ງທຳອິດທີ່ ບີນລີ ເກດແກ້ວ ໄດ້ຖືກຄັດເລືອກ ເຂົ້າໃນທີມຊາດລາວ ເພື່ອເຂົ້າຮ່ວມ ການແຂ່ງຂັນບານເຕະ ຊີງແຊ້ມອາຊຽນ ປະຈຳປີ 2020 ຫລຶ AFF SUZUKI CUP 2020. ສຳລັບຄວາມພ້ອມຂອງທີມຊາດລາວ ຊຸດໃຫຍ່ ໄດ້ມີການເກັບໂຕຝຶກຊ້ອມມາແຕ່ຕົ້ນເດືອນກັນຍາ ຜ່ານມາ ທີ່ສະໜາມກິລາ ແຫ່ງຊາດ (ຫຼັກ16) ໂດຍໄດ້ກຳນົດຄັດເລືອກນັກກິລາມີທັງໝົດ 46 ຄົນ, ໃນນັ້ນ ຄັດເລືອກນັກກິລາ 30 ຄົນສຸດທ້າຍເຂົ້າຮ່ວມການແຂ່ງຂັນ , ສຳລັບລາຍຊື່ນັກກິລາ 30 ຄົນສຸດທ້າຍມີ ລາຍຊື່ນັກກິລາ ກອງຫນ້າ ປະສົບການສູງ ບິນລີ້ເກດແກ້ວພົມພອນ ນັກເຕະເຊື້ອສາຍລາວ ທີ່ຫລິ້ນໃນລີກ 2 ປະເທດຝຣັ່ງ ຮ່ວມທີມ ປະສົມປະສານກັບນັກເຕະທີ່ມີປະສົບປະການສູງຫລາຍຄົນນຳໂດຍ ສຸກອາພອນ ວົງຈຽງຄຳ, ມິດສະດາ ສາຍໃຕ້ຟ້າ ແລະ ພຸດທະໄຊ ໂຄຈະເລີນ ທີ່ຫລິ້ນໃນລີກ ຂອງປະເທດໄທ, ມະໂນລົມ ເພັດພັກດີ, ພາຍໃຕ້ການຄຸມທີມຂອງ ທ່ານ ຊີວວາຣັດ ເວນກາດາລຳ ( Selvaraj S/O Vengadalam ) ຫົວຫນ້າຄູຝຶກທີມຊາດລາວ ຊາວສິງກະໂປ ໂດຍມີ ທ່ານ ກັນລະຍາ ສີສົມຫວັງ ແລະ ທ່ານ ນາງ ພອນທິບ ແສງມະນີ ເປັນຜູ້ຊ່ວຍຄູຝຶກ. ການແຂ່ງຂັນຄັ້ງນີ້ແມ່ນຈະແຕກຕ່າງຈາກການແຂ່ງຂັນແຕ່ລະຄັ້ງທີ່ຜ່ານມາ, ແຕ່ລະທີມສາມາດສົ່ງລາຍຊື່ນັກກິລາໄດ້ 30 ຄົນສຸດທ້າຍ ໂດຍໃນແຕ່ລະນັດສາມາດສົ່ງລາຍຊື່ 23 ຄົນ, ເພື່ອປະຕິບັດຕາມມາດຕະການປ້ອງກັນ COVID-19 ຂອງປະເທດສິງກະໂປ ແລະ ເພື່ອໃຫ້ລັດຖະບານສິງກະໂປ ຍົກເວັ້ນການກັກຕົວ 14 ມື້.
ຂໍ້ມູນຂ່າວໂດຍ: ສະຖານທູດລາວ ປະຈໍາປະເທດ ຝຣັ່ງ
ມ.ຊ ສຳເລັດການສອບເສັງທາງໄກເປັນຄັ້ງທຳອິດ ຄັດເລືອກເອົານັກສຶກສາເຂົ້າຮຽນປະຈຳສົກສຶກສາ 2021-2022
ມະຫາວິທະຍາໄລແຫ່ງຊາດ (ມຊ) ຈັດການສອບເສັງຄັດເລືອກເອົານັກສຶກສາ ປະຈຳສົກສຶກສາ 2021-2022. ຜ່ານທາງລະບົບທາງໄກ (ອອນລາຍ) ຂຶ້ນໃນວັນທີ 25 ພະຈິກ 2021, ໂດຍມີຈຸດສູນລວມຄະນະກຳມະການຕັ້ງຢູ່ທີ່ສະໂມສອນຂອງສະຖາບັນຂົງຈື ມ.ຊ ໂດຍການໃຫ້ກຽດລົງຕິດຕາມການສອບເສັງຂອງທ່ານ ພຸດ ສິມມາລາວົງ ລັດຖະມົນຕີ ກະຊວງສຶກສາທິການ ແລະ ກິລາ, ທ່ານ ອຸດົມ ພອນຄຳເພັງ ຮັກສາການອະທິການບໍດີ ມ.ຊ, ມີບັນດາທ່ານຮອງອະທິການບໍດີ, ບັນດາຄະນະກຳມະການຮັບຜິດຊອບການສອບເສັງຜ່ານທາງລະບົບອອນລາຍ ພ້ອມດ້ວຍບັນດາຄະນະກຳມະການທັງ 12 ຈຸດເຂົ້າຮ່ວມ.
ໃນສົກສຶກສາ 2021-2022 ນີ້ເນື່ອງຈາກມີການແຜ່ລະບາດຂອງພະຍາດໂຄວິດ-19 ທາງ ມ.ຊ ຈຶ່ງໄດ້ຫັນປ່ຽນຈາກການສອບເສັງແບບເຊິ່ງໜ້າ ມາເປັນການສອບເສັງແບບທາງໄກ (ລະບົບອອນລາຍ) ໂດຍນຳໃຊ້ Google Platform (Gmail, Classroom, Meet and Chrome).
ໃນການສອບເສັງຄັ້ງນີ້, ມ.ຊ ກໍໄດ້ວາງແຜນ ແລະ ກຽມຄວາມພ້ອມໃນທຸກໆດ້ານ ເປັນຕົ້ນແມ່ນການພັດທະນາໂປຣແກມເພື່ອຮັບຮອງໃຫ້ການສອບເສັງມີປະສິດຕິພາບ, ການແຕ່ງຕັ້ງອະນຸກຳມະການ, ຈັດຝຶກອົບຮົມດ້ານເຕັກນິກໄອທີໃຫ້ແຕ່ລະອະນຸກຳມະການ ຊຶ່ງໄດ້ຈັດການສອບເສັງທົດລອງເຖິງ 2 ຄັ້ງເພື່ອໃຫ້ນັກສອບເສັງມີຄວາມພ້ອມ ແລະ ເຂົ້າໃຈລະບົບການສອບເສັງແບບທາງໄກ. ການສອບເສັງຄັດເລືອກເອົານັກສຶກສາໃນສົກສຶກສາ 2021-2022 ໄດ້ແບ່ງອອກເປັນ 12 ຈຸດສອບເສັງ, ມີ 91 ຈຸ, ມີ 458 ຫ້ອງສອບເສັງ, ມີກຳມະການຍາມຫ້ອງສອບເສັງຈໍານວນ 458 ທ່ານ, ຫ້ອງ 1 ບັນຈຸນັກສອບເສັງຈຳນວນ 20 ຄົນ. ມີນັກຮຽນທີ່ມີໜ້າສອບເສັງຕົວຈິງຈຳນວນ 6.625 ຄົນ, ການສອບເສັງໄດ້ແບ່ງອອກເປັນ 2 ກຸ່ມຄື ກຸ່ມ A ສອບເສັງວິຊາ ຄະນິດສາດ A, ຟີຊິກສາດ, ພາສາລາວ-ວັນນະຄະດີ, ເຄມີສາດ, ຊີວະສາດ ແລະ ພາສາອັງກິດ ມີຜູ້ສອບເສັງຕົວຈິງຈຳນວນ 2.378 ຄົນ ແລະ ກຸ່ມ B ສອບເສັງວິຊາຄະນິດສາດ B, ພາສາລາວ-ວັນນະຄະດີ, ພູມີສາດ, ປະຫວັດສາດ ແລະ ພາສາອັງກິດ; ມີຜູ້ສອບເສັງຕົວຈິງຈຳນວນ 4.249 ຄົນ, ການສອບເສັງແມ່ນຈັດຂຶ້ນພາຍໃນໜຶ່ງວັນ; ເລີ່ມຕອນເຊົ້າເວລາ 9:00 ໂມງ ເຖິງ 11:00 ໂມງ ແລະ ຕອນບ່າຍເວລາ 14:00 ໂມງເຖິງ 15:30 ນາທີ.
ທ່ານ ພຸດ ສິມມາລາວົງ ກໍໄດ້ມີຄຳເຫັນຕໍ່ການສອບເສັງແບບທາງໄກຂອງ ມ.ຊ ຊຶ່ງທ່ານໄດ້ກ່າວບາງຕອນວ່າ: ທ່າມກາງການແຜ່ລະບາດຂອງພະຍາດໂຄວິດ-19 ໄດ້ສົ່ງຜົນກະທົບໃນຫຼາຍດ້ານ ໂດຍສະເພາະໃນຂົງເຂດວຽກງານການສຶກສາ, ຕາມທຳມະດາແລ້ວການສອບເສັງເຂົ້າ ມ.ຊ ແມ່ນຈະຈັດຂຶ້ນໃນໄລຍະເດືອນ ກໍລະກົດ ຫາ ເດືອນ ສິງຫາ ຂອງທຸກໆປີ ແຕ່ມາໃນສົກສຶກສານີ້ ຈຳເປັນຕ້ອງໄດ້ປັບປ່ຽນຮູບແບບການສອບເສັງຈາກການສອບເສັງແບບເຊິ່ງໜ້າ ມາເປັນການສອບເສັງແບບທາງໄກ (online) ຖືເປັນຄັ້ງທຳອິດຂອງມະຫາວິທະຍາໄລແຫ່ງຊາດ ເຖິງແມ່ນວ່າຈະພົບຄວາມຫຍຸ້ງຍາກ ແຕ່ຄະນະນຳ ແລະ ພະນັກງານ, ຄູ-ອາຈານຂອງ ມ.ຊ ກໍໄດ້ສຸມທຸກກຳລັງແຮງເພື່ອຈັດການສອບເສັງຄັ້ງນີ້ເພື່ອໃຫ້ໄດ້ຮັບຜົນສຳເລັດ ເຖິງແມ່ນວ່າຈະພົບຄວາມຫຍຸ້ງຍາກໃນການປັບປ່ຽນການສອບເສັງກໍຕາມ ແຕ່ທາງ ມ.ຊ ກໍມີການກະກຽມຄວາມພ້ອມທັງສາມາດຮັບປະກັນໄດ້ທັງຄວາມໂປ່ງໃສ ແລະ ຄຸນນະພາບ.
ຂ່າວ-ພາບ: ມຊ