ນະຄອນຫຼວງວຽງຈັນ, 20 ສິງຫາ 2021 – ເສດຖະກິດລາວ ຢູ່ໃນເສັ້ນທາງທີ່ຈະມີການຟື້ນຕົວໃນລະດັບປານກາງ ໃນປີ 2021 ເຖິງວ່າການລະບາດ ຂອງພະຍາດອັກເສບປອດສາຍພັນໃໝ່ (ໂຄວິດ-19) ຮອບສອງ ຈະສົ່ງຜົນກະທົບຕໍ່ຜົນສໍາເລັດໃນການຟື້ນຕົວທາງເສດຖະກິດທີ່ຍາດມາໄດ້ໃນຕົ້ນປີກໍຕາມ. ບົດລາຍງາຍຜົນການຕິດຕາມເສດຖະກິດຂອງ ສປປ ລາວ ໂດຍ ທະນາຄານໂລກ — ເສັ້ນທາງສູ່ການຟື້ນຕົວທາງເສດຖະກິດ — ຄາດຄະເນວ່າ: ການຂະຫຍາຍຕົວຂອງ GDP ຈະເພີ່ມຂຶ້ນ 3,6 ສ່ວນຮ້ອຍໃນປີ 2021 ທຽບໃສ່ 0,5 ສ່ວນຮ້ອຍໃນປີ 2020.

ອັດຕາການເຕີບໂຕດັ່ງກ່າວ ແມ່ນຫຼຸດຈາກການຄາດຄະເນເບື້ອງຕົ້ນ ໃນເດືອນມີນາ 2021 ເຊິ່ງຕອນນັ້ນໄດ້ຄາດຄະເນ ການຂະຫຍາຍຕົວໄວ້ທີ່ 4 ສ່ວນຮ້ອຍ ເຊິ່ງຂຶ້ນກັບຂໍ້ສົມມຸດຖານຫຼາຍຢ່າງ ເຊິ່ງໃນນັ້ນລວມມີ ປັດໄຈການຟື້ນຕົວທາງເສດ ຖະກິດຂອງບັນດາປະເທດໃກ້ຄຽງ, ການເລັ່ງສັກຢາກັນພະຍາດໂຄວິດ-19 ໃນທົ່ວປະເທດ, ແລະ ການຫຼຸດຜ່ອນການລະບາດໃນຊຸມຊົນ ໃນໄລຍະຈົນຮອດທ້າຍປີນີ້. ການຂະຫຍາຍຕົວຂອງເສດຖະກິດ ອາດຈະຫຼຸດລົງຫຼາຍກ່ວາຕົວເລກທີ່ຄາດຄະເນໄວ້ຖ້າ: ພະຍາດໂຄວິດ-19 ມີການລະບາດຮ້າຍແຮງ ແລະ ມີການສືບຕໍ່ມາດຕະການຈໍາກັດການ ເຄືີ່ອນໄຫວໄປມາຂອງພົນລະເມືອງ (ລອກດາວ) ທີ່ເຂັ້ມງວດ ຫຼື ໃນກໍລະນີ ສປປ ລາວ ຫາກຖືກກະທົບຈາກໄພພິບັດທໍາມະຊາດເຊັ່ນ: ອຸທົກກະໄພ, ໄພແລ້ງ ຫຼື ການລະບາດຂອງພະຍາດສັດລ້ຽງ ທີ່ອາດຈະເກີດຊໍ້າອີກ.

ຂະແໜງກະສິກໍາແລະອຸດສາຫະກໍາ ເປັນຂະແໜງຕົ້ນຕໍທີ່ຂັບເຄື່ອນການຂະຫຍາຍຕົວຂອງເສດຖະກິດ ໂດຍເຫັນໄດ້ຈາກ ການເພີ່ມຂຶ້ນຂອງການສົ່ງອອກສິນຄ້າກະສິກໍາ ແລະ ອຸດສາຫະກໍາ. ໃນນັ້ນ ສິນຄ້າສົ່ງອອກ ເຊັ່ນ: ໄຟຟ້າ, ບໍ່ແຮ່ ແລະ ອຸດສາຫະກໍາແປຮູບແລະປຸງແຕ່ງ ກໍ່ພົບວ່າມີການຟື້ນຕົວ ເມື່ອທຽບກັບປີກາຍ. ຢ່າງໃດກໍດີ, ໃນຂະແໜງທ່ອງທ່ຽວ, ການບໍລິການນັກທ່ອງທ່ຽວ, ການຂົນສົ່ງ ແລະ ການບໍລິການອື່ນໆ ວິສາຫະກິດສ່ວນໃຫຍ່ ແມ່ນກໍາລັງພົບຄວາມຫຍຸ້ງຍາກໃນການຟື້ນຕົວ ຍ້ອນມີການລອກດາວ ແລະ ການສືບຕໍ່ຈໍາກັດການເດີນທາງລະຫວ່າງປະເທດ ເຊິ່ງເປັນການຕັດໂອກາດຂອງປະເທດໃນການສ້າງລາຍຮັບຈາກຂະແໜງ ການສໍາຄັນນີ້.

ທ່ານ ອາເລກສ໌ ເຄຣມເມີ (Alex Kremer) ຫົວໜ້າຫ້ອງການທະນາຄານໂລກ ປະຈໍາ ສປປ ລາວ ກ່າວວ່າ: “ສປປ ລາວ ເຮັດໄດ້ດີຫຼາຍໃນດ້ານການຈໍາກັດການລະບາດຂອງພະຍາດໂຄວິດ-19 ແລະ ການຈັດຕັ້ງປະຕິບັດການສັກຢາກັນພະຍາດ ດັ່ງກ່າວໃຫ້ປະຊາຊົນ”. ທ່ານ ຍັງກ່າວຕື່ມອີກວ່າ: “ຢ່າງໃດກໍດີ, ຄວາມສ່ຽງດ້ານ ຄວາມຫຍຸ້ງຍາກ ໃນການແກ້ໄຂໜີ້ສາທາ ລະນະ, ການອ່ອນຄ່າຂອງເງິນກີບ, ແລະ ລາຍຮັບພາກລັດທີ່ຕໍ່າ ຍັງຈະສືບຕໍ່ຈໍາກັດທາງເລືອກຂອງລັດຖະບານ ໃນດ້ານ ການຟື້ນຟູເສດຖະກິດຂອງປະເທດ. ການປະຕິຮູບທີ່ຈະຊ່ວຍ ກະຕຸ້ນການລົງທຶນຂອງພາກເອກະຊົນ, ການມອບ ອາກອນ ແລະ ສົ່ງເສີມການຄ້າ ຈະຊ່ວຍແກ້ໄຂບັນຫາດັ່ງກ່າວໄດ້.”

ອີງຕາມບົດລາຍງານສະພາບເສດຖະກິດຂອງ ສປປ ລາວ, ການອ່ອນຄ່າຂອງເງິນກີບ ເປັນສາເຫດຫນຶ່ງທີ່ເຮັດໃຫ້ອັດຕາ ເງິນເຟີ້ເພີ່ມຂຶ້ນ ເຊິ່ງພາໃຫ້ມີ ຄວາມກັງວົນກ່ຽວກັບການເຂົ້າເຖິງສະບຽງອາຫານ ແລະ ສິນຄ້າພື້ນຖານ. ເວົ້າສະເພາະ ບັນຫາດັ່ງກ່າວໄດ້ເພີ່ມຄວາມກົດດັນຕໍ່ຜູ້ທຸກຍາກໃນເຂດຕົວເມືອງແລະເມືອງໃຫຍ່ຕ່າງໆ. ພາກຫົວຂໍ້ສະເພາະຂອງບົດລາຍງານ ‘ຜົນກະທົບຂອງພະຍາດລະບາດໂຄວິດ-19 ທີ່ມີຕໍ່ທຸລະກິດແລະຄົວເຮືອນ’ ສະແດງໃຫ້ເຫັນວ່າ: ການຈ້າງງານໄດ້ຫຼຸດ ລົງຫລາຍໃນເດືອນພຶດພະພາຂອງປີນີ້ ໃນຂະນະທີ່ ທຸລະກິດຄົວເຮືອນຕ່າງໆ ຫລາຍກ່ວາ 30% ຕ້ອງປິດກິດຈະການລົງ ນັບແຕ່ເກີດພະຍາດລະບາດ. ການສໍາຫຼວດທຸລະກິດ ທີ່ຈັດຕັ້ງປະຕິບັດໂດຍທະນາຄານໂລກ ບອກໃຫ້ຮູ້ວ່າ: ຍອດຂາຍ ຕໍ່ເດືອນ ຂອງທຸລະກິດ ຫຼຸດລົງ 48 ສ່ວນຮ້ອຍໃນຊ່ວງໄລຍະເດືອນມີນາ ເຖິງ ເດືອນເມສາ 2021. ເກືອບເຄິ່ງໜຶ່ງຂອງ ຈໍານວນວິສາຫະກິດທີ່ຖືກສຳຫລວດ ໄດ້ລາຍງານວ່າປະສົບບັນຫາການຂາດແຄນກະແສເງິນສົດ, ແລະ ຫຼາຍກ່ວາໜຶ່ງ ສ່ວນສີ່ຂອງຈໍານວນວິສາຫະກິດທັງໝົດ ແມ່ນຄາດວ່າຈະຕົກ ໃນສະພາວະຕິດໜີ້ໃນໄລຍະຫົກເດືອນຂ້າງໜ້າ.

ເພື່ອຫຼຸດຜ່ອນຜົນກະທົບຈາກການຂະຫຍາຍຕົວຊ້າລົງຂອງເສດຖະກິດ, ບົດລາຍງານສະບັບນີ້ ແນະນໍາໃຫ້ ສປປ ລາວ ເພີ່ມທະວີການປະຕິຮູບດ້ານທຸລະກິດ ແລະ ອໍານວຍຄວາມສະດວກດ້ານການຄ້າ ເພື່ອໃຫ້ປະເທດ ໄດ້ຮັບຜົນປະໂຫຍດທີ່ ເໝາະສົມຈາກໂຄງລ່າງພື້ນຖານທີ່ສ້າງຂຶ້ນໃຫມ່ແລະ ຈາກບັນດາສັນຍາຜ່ອນຜັນການຄ້າທີ່ ສປປ ລາວ ເປັນພາຄີ. ການ ປະຕິຮູບດັ່ງກ່າວ ຈະສາມາດບັນລຸໄດ້ດ້ວຍການປັບປຸງລະບຽບແລະຂັ້ນຕອນການລົງທຶນໃຫ້ກະທັດຮັດຂຶ້ນ, ເພີ່ມຄວາມ ສະດວກໃນການດໍາເນີນທຸລະກິດ, ເຮັດໃຫ້ຄ່າບໍລິການດ້ານການຂົນສົ່ງ, ຝາກສາງແລະປ່ຽນທ່າຍສິນຄ້າຖືກລົງ ແລະ ຊ່ວຍ ປັບປຸງຄຸນນະພາບສິນຄ້າໂດຍສະເພາະແມ່ນສິນຄ້າສົ່ງອອກຈາກກະສິກໍາ. ການຂະຫຍາຍໂຄງການ ຊ່ວຍເຫຼືອຂອງລັດຖະ ບານ ແກ່ພາກທຸລະກິດ ໄປຄຽງຄູ່ກັບການໂຄສະນາສົ່ງເສີມແຜນງານດັ່ງກ່າວ ຈະຊ່ວຍໃຫ້ບັນດາ ວິສາຫະກິດ ສາມາດ ປັບຕົວໄດ້ ແລະ ສ້າງລາຍຮັບທີ່ຈໍາເປັນແກ່ຕົນເອງ. ໃນເວລາດຽວກັນ ມາດຕະການຕ່າງໆ ເພື່ອຊ່ວຍສົ່ງເສີມ ແລະ ຊຸກຍູ້ໃຫ້ວິສາຫະກິດລາວ ໃຫ້ມາລົງທຶນໃນດ້ານເຕັກໂນໂລຊີດີຈີຕ໋ອນ ຫຼື ວິທີການໃໝ່ໃນການຈັດສົ່ງ-ສະໜອງສິນຄ້າ ແລະ ບໍລິການ ຈະສາມາດຊ່ວຍປ່ຽນວິກິດໃຫ້ເປັນໂອກາດແກ່ເຂົາເຈົ້າໄດ້.
ທະນາຄານໂລກ ພິມເຜີຍແຜ່ບົດລາຍງານສະພາບເສດຖະກິດຂອງ ສປປ ລາວ ສອງຄັ້ງຕໍ່ປີ.

ກອງປະຊຸມຈັດຕັ້ງຜັນຂະຫຍາຍ 2 ວາລະແຫ່ງຊາດ ຈັດຂຶ້ນຕອນເຊົ້າວັນທີ 20 ສິງຫາ 2021 ຢູ່ຫໍປະຊຸມແຫ່ງຊາດ ນະຄອນຫລວງວຽງຈັນ ພາຍໃຕ້ການເປັນປະທານຂອງທ່ານ ພັນຄໍາ ວິພາວັນ ນາຍົກລັດຖະມົນຕີ ໂດຍມີລັດຖະມົນຕີກະຊວງທີ່ກ່ຽວຂ້ອງ, ເຈົ້າຄອງນະຄອນຫລວງ ເຈົ້າເມືອງ ພ້ອມດ້ວຍເລຂາພັກ ບ້ານຕ່າງໆ ທົ່ວນະຄອນຫລວງເຂົ້າຮວມ.

ທ່ານອາດສະພັງທອງ ສີພັນດອນ ເຈົ້າຄອງນະຄອນຫລວງວຽຈັນ ໄດ້ລາຍງານສະພາບການຈັດຕັ້ງປະຕິບັດວຽກງານແກ້ໄຂບັນຫາຢາເສບຕິດ ຢູ່ນະຄອນຫລວງວຽງຈັນວ່າ: ບັນຫາຢາເສບຕິດ ເປັນຄືມະເລັງຮ້າຍ ທີ່ກໍາລັງກັດກິນເສດຖະກິດ-ສັງຄົມ ຂອງພວກເຮົາ, ຊຶ່ງຄະນະພັກ-ອົງການປົກຄອງພວກເຮົາ ໄດ້ພະຍາຍາມແກ້ໄຂບັນຫາດັ່ງກ່າວ ໂດຍອີງໃສ່ກົດຫມາຍ ວ່າດ້ວຍຢາເສບຕິດ ແລະ ຄໍາສັ່ງເລກທີ 27 ຂອງລັດຖະບານ ວ່າດ້ວຍການແກ້ໄຂປະກົດການຫຍໍ້ທໍ້ ໃນສັງຄົມ, ໄດ້ມີຄໍາສັ່ງ ຂອງນະຄອນຫລວງ ວ່າດ້ວຍການເພີ່ມທະວີແກ້ໄຂບັນຫາຢາເສບຕິດ ແລະ ຂໍ້ຕົກລົງ ວ່າດ້ວຍການສ້າງນະຄອນຫລວງວຽງຈັນ ສະຫງົບສຸກ (ສ. ສະຫງົບສຸກ) ເພື່ອເປັນບ່ອນອີງ ໃຫ້ແກ່ການຈັດຕັ້ງປະຕິບັດວຽກງານດັ່ງກ່າວ,

ພວກເຮົາໄດ້ສຸມໃສ່ແກ້ໄຂບັນຫາແຕ່ລະເປົ້າຫມາຍ ແລະ ແກ້ໄຂຄະດີຢາເສບຕິດຫລາຍສົມຄວນ ແລະ ປັດຈຸບັນ ໄດ້ສໍາເລັດການຂຶ້ນບັນຊີເປົ້າຫມາຍ ພົວພັນກັບຢາເສບຕິດ ມີເຖິງ 9.000 ກວ່າເປົ້າຫມາຍ (ລວມມີເປົ້າຫມາຍຄ້າຂາຍຢາເສບຕິດລາຍໃຫຍ່, ລາຍກາງ ແລະ ລາຍຍ່ອຍ ແລະ ເປົ້າຫມາຍເສບຢາເສບຕິດ), ເປົ້າຫມາຍທີ່ເປັນບ່ອນອໍານວຍຄວາມສະດວກ ແລະ ບ່ອນມົ້ວສຸມ 221 ຈຸດ, ມີສູນບໍາບັດ ແລະ ປິ່ນຜູ້ຕິດຢາເສບຕິດ 1 ແຫ່ງ ຊຶ່ງມີຜູ້ເຂົ້າປິ່ນປົວ ໃນປັດຈຸບັນ ຈຳນວນ 1.139 ຄົນ, ຍິງ 51 ຄົນ (ເຊິ່ງເກີນຄວາມສາມາດຮອງຮັບຂອງສູນ ສາມາດຮັບໄດ້ພຽງແຕ່ 350-500 ຄົນ), ແພດປິ່ນປົວ, ຢາຮັກສາກໍ່ຂາດເຂີນບໍ່ພຽງພໍ;

ນອກນັ້ນ ກໍ່ຍັງມີສູນສັງຄົມສົງເຄາະ ທີ່ພະແນກແຮງງານ ແລະ ສະຫວັດດີການສັງຄົມ ຄຸ້ມຄອງ ຊຶ່ງມີຜູ້ທີ່ເປັນບ້າໃບ້ເສຍຈິດ ຈາກການເສບຢາຕິດຢູ່ນໍາຈໍານວນຫນຶ່ງ; ຢາເສບຕິດ ນອກຈາກເປັນຮາກເຫງົ້າຂອງການເກີດປະກົດການຫຍໍ້ທໍ້ ແລະ ອາດຊະຍາກໍາທາງອາຍາຕ່າງໆ ໃນສັງຄົມແລ້ວ, ຜູ້ເສບຢາສ່ວນຫລາຍແມ່ນເປັນຄົນຮຸ່ນຫນຸ່ມ ບໍ່ໄດ້ຮັບການສຶກສາ ເຮັດໃຫ້ຂາດກໍາລັງການຜະລິດທີ່ສໍາຄັນ ຂອງປະເທດ;

ກ່ຽວກັບແຜນຜັນຂະຫຍາຍ ວາລະແຫ່ງຊາດ ວ່າດ້ວຍການປ້ອງກັນ, ປາບປາມ ແລະ ແກ້ໄຂບັນຫາຢາເສບຕິດ ອົງຄະນະພັກ-ອົງການປົກຄອງນະຄອນຫລວງວຽງຈັນ ໄດ້ສຸມໃສ່ຈັດຕັ້ງປະຕິບັດ 3 ຫລັກການ, 2 ຍຶດຫມັ້ນ, 2 ມາດຕະການ ແລະ 3 ຕ້ານ ຕາມທີ່ໄດ້ລະບຸໄວ້ ໃນຄໍາສັ່ງ ຂອງກົມການເມືອງສູນກາງພັກ ສະບັບເລກທີ 02/ກມສພ, ລົງວັນທີ 26 ກໍລະກົດ 2021 ແລະ ທິດນໍາຂອງລັດຖະບານ, ໂດຍກໍານົດອອກເປັນ 6 ຄາດຫມາຍ ແລະ 6 ແຜນວຽກຈຸດສຸມ/ມາດຕະການຈັດຕັ້ງປະຕິບັດ.

ຈາກນັ້ນ ທ່ານ ພັນຄຳ ວິພາວັນ ນາຍົກລັດຖະມົນຕີ ປະທານກອງປະຊຸມ ໄດ້ໂອ້ລົມຕໍ່ກອງປະຊຸມ ເພື່ອໃຫ້ທິດຊີ້ນໍາຕໍ່ອົງການປົກຄອງ ນະຄອນຫລວງວຽງຈັນ ນັບແຕ່ການນໍາ ນະຄອນຫລວງ, ການນຳຂັ້ນເມືອງ ຮອດບັນດານາຍບ້ານຕ່າງໆ ໃນຂອບເຂດນະຄອນຫລວງວຽງຈັນ ໃຫ້ເຂົ້າໃຈເລິກເຊິ່ງຕໍ່ 2 ວາລະແຫ່ງຊາດດັ່ງກ່າວ ໂດຍເນັ້ນເຖິງຄວາມໝາຍ, ຄວາມຈໍາເປັນ ລວມທັງເນື້ອໃນຂອງວາລະແຫ່ງຊາດ ເພື່ອເຮັດໃຫ້ຄວາມຫຍຸ້ງຍາກດ້ານເສດຖະກິດ-ການເງິນ ຜ່ອນຄາຍລົງ ເປັນຕົ້ນການຮົ່ວໄຫຼຂອງລາຍຮັບງົບປະມານ ແລະ ບັນຫາການຄ້າຂາຍຢາເສບຕິດ ກໍໃຫ້ຫຼຸດລົງ. ກົນໄກການຈັດຕັ້ງປະຕິບັດຂອງວາລະແຫ່ງຊາດ ທັງ 2 ສະບັບ ໃຫ້ຈັດຕັ້ງບັນຊາ-ຊີ້ນຳແບບຍຸດທະບັ້ນຮົບ ຊຶ່ງນະຄອນຫລວງວຽງຈັນ ເປັນໃຈກາງດ້ານຕ່າງໆຂອງຊາດ ຍ້ອນແນວນັ້ນຕ້ອງມີການຊີ້ນຳບັນຊາຢ່າງມີກົນໄກໂດຍຖືເອົາ 3 ຫຼັກການໃຫຍ່ຂອງການຈັດຕັ້ງປະຕິບັດວາລະແຫ່ງຊາດ ກໍຄື ຮັບປະກັນຄວາມເຂັ້ມງວດ-ເດັດຂາດ, ຮັບປະກັນຄວາມໂປ່ງໃສ ແລະ ຮັບປະກັນຫຼັກການດ້ານວິທະຍາສາດ-ວິຊາການ ພ້ອມທັງໃຫ້ປະຊາຊົນ ກໍຄືພາກສ່ວນກ່ຽວຂ້ອງ ໄດ້ມີສ່ວນຮ່ວມນໍາ.

ທ່ານນາຍົກລັດຖະມົນຕີ ຍັງໄດ້ເນັ້ນໃຫ້ ອຳນາດການປົກຄອງແຕ່ລະຂັ້ນ ຂອງນະຄອນຫລວງວຽງຈັນ ເອົາໃຈໃສ່ 6 ປັດໄຈທີ່ສຳຄັນຄື:

1). ຕ້ອງມີຄວາມເປັນເອກະພາບສູງ ລະຫວ່າງ ການນຳ ກັບປະຊາຊົນ ໂດຍສະເພາະອຳນາດການປົກຄອງຂັ້ນຕ່າງໆ ຈຶ່ງຈະປະກອບສ່ວນໃນການຈັດຕັ້ງປະຕິບັດວາລະແຫ່ງຊາດໄດ້ເປັນຢ່າງດີ.

2). ຕ້ອງມີຄວາມຮັບຜິດຊອບສູງ ໂດຍການເປັນເຈົ້າການ ບົນພື້ນຖານເຮັດແທ້ທຳຈິງ ໃຫ້ຕີຖອຍລັດທິຮູບການ ເພື່ອລົງເລິກແກ້ໄຂບໍ່ໃຫ້ມີການລາຍງານທີ່ມັກແກ້ຕົວ, ລາຍງານດອກໄມ້ ແຕ່ຕ້ອງພ້ອມກັນຈັດຕັ້ງປະຕິບັດທຸກວຽກງານຂອງວາລະແຫ່ງຊາດ ຕາມທີ່ໄດ້ຮັບການມອບໝາຍໃຫ້.

3). ຕ້ອງສຸມໃສ່ຈັດລຽງບຸລິມະສິດ ແລະ ເປັນເຈົ້າການອັນຮີບດ່ວນຕ້ອງຈັດຕັ້ງປະຕິບັດກ່ອນ ເປັນຕົ້ນແມ່ນ ນະໂຍບາຍປະຢັດ, ການຈຳກັດການຮົ່ວໄຫຼຂອງລາຍຮັບງົບປະມານ ຊຶ່ງເບື້ອງລັດກໍຕ້ອງຈັດຕັ້ງກ່ອນ ແລະ ຂັ້ນທ້ອງຖິ່ນ ກໍຕ້ອງແມ່ນ ນະຄອນຫລວງ ເຮັດກ່ອນແຂວງອື່ນໆ.

4). ຕ້ອງສຸມໃສ່ຍູ້ແຮງການຜະລິດພາຍໃນເພື່ອທົດແທນການນຳເຂົ້າ ໂດຍການສົມທົບກັບ ວິສາຫະກິດຂະໜາດນ້ອຍ ແລະ ກາງ ເພື່ອຍູ້ແຮງການຜະລິດທີ່ມີທ່າແຮງ, ວາງແຜນການຜະລິດ ພ້ອມທັງຫັນຄ່ານິຍົມຈາກສັງຄົມບໍລິໂພກ ໄປສູ່ສັງຄົມການຜະລິດ.

5). ຕ້ອງສຸມໃສ່ຂຶ້ນທະບຽນແຮງງານ, ຈັດສັນແຮງງານ ແລະ ປັບປຸງສີມືແຮງງານ ໂດຍໃຫ້ພະແນກພາຍໃນ ນະຄອນຫລວງ ສົມທົບກັບກະຊວງແຮງງານ ແລະ ສະພາອຸດສາຫະກຳ ແລະ ການຄ້າ ນະຄອນຫລວງ.

6). ຕ້ອງປັບປຸງກົນໄກການບໍລິຫານລັດຂັ້ນ ນະຄອນຫລວງ, ເມືອງ ແລະ ບ້ານ ໃຫ້ເຂັ້ມແຂງ ມີການບຸກທະລຸວຽກງານ ຊຶ່ງຂັ້ນບ້ານແມ່ນສຳຄັນຫຼາຍ ເຊິ່ງຕ້ອງໄດ້ມີການຕິດຕາມຊຸກຍູ້ໃຫ້ຈັດຕັ້ງປະຕິບັດຢ່າງຈິງຈັງ.

CR: Lao National Radio

ໃນການຖະແຫຼງຂ່າວ ຢ່າງເປັນທາງການ ຂອງຄະນະສະເພາະກິດ ໃນເຊົ້າ ວັນທີ 20 ສິງຫາ 2021 ໃຫ້ຮູ້ວ່າ, ເລກຜູ້ຕິດເຊື້ອສະສົມທັງໝົດ 11,753 ຄົນ (ໃໝ່ 440 ຄົນ), ຄົນເຈັບເສຍຊີວິດສະສົມ 11 ຄົນ (ໃໝ່ 2 ຄົນ) ແລະ ກໍາລັງປິ່ນປົວ ທັງໝົດ 4,604 ຄົນ.

ກໍລະນີທີ 10: ແມ່ນຜູ້ເສຍຊີວິດໃໝ່ 1 ຄົນ ຢູ່ແຂວງສະຫວັນນະເຂດ ເປັນເພດຊາຍ, ອາຍຸ 55 ປີ, ອາຊີບ ກຳມະກອນ, ບ້ານໂພນຊາຍ, ເມືອງໄກສອນ ເຂົ້ານອນປິ່ນປົວຢູ່ໂຮງໝໍ ໃນວັນທີ 11 ສິງຫາ 2021​ ຍ້ອນໄຂ້ໄອ 6 ວັນ. ພະຍາດປະຈຳໂຕ ຄວາມດັນເລືອດສູງ.​ ວັນທີ 12 ສິງຫາ 2021 ຜູ້ກ່ຽວ ຫາຍໃຈຝຶດ, ແໜ້ນໜ້າເອິກ, ຜົນຈາກການສ່ອງໄຟຟ້າລັງສີປອດ ສະແດງໃຫ້ເຫັນວ່າ ປອດອັກເສບ. ອາການຂອງຜູ້ກ່ຽວໜັກລົງເລື້ອຍໆ ຈົນມາຮອດ ເວລາ 1 ໂມງເຊົ້າຂອງວັນທີ 18 ສິງຫາ 2021 ຜູ້ກ່ຽວໄດ້ເສຍຊີວິດ.

ກໍລະນີທີ 11: ແມ່ນຜູ້ເສຍຊີວິດອີກ 1 ຄົນ ແມ່ນຢູ່ແຂວງຄຳມ່ວນ ເປັນເພດຍິງ, ອາຍຸ 26 ປີ, ອາຊີບ ພະນັກງານເສີບອາຫານ, ບ້ານດອນພູຄຳ, ເມືອງມະຫາໄຊ, ແຂວງຄຳມ່ວນ, ເດີນທາງເຂົ້າມາ ສປປ ລາວ ໃນວັນທີ 3 ສິງຫາ 2021, ຜົນກວດພົບເຊື້ອ COVID-19 ໃນວັນທີ 7 ສິງຫາ 2021. ຜູ້ກ່ຽວມີໄຂ້, ໄອ, ຫາຍໃຈຝຶດ ແລະ ກະວົນກະຕາຍ. ຜູ້ກ່ຽວເກີດລູກໄດ້ 5 ວັນ ແລະເສຍຊີວິດ ໃນວັນທີ 20 ສິງຫາ 2021 ສ່ວນລູກປອດໄພ.

ຊາປະນະກິດ ກໍລະນີທີ 11

ລາຍງານຈາກຄະນະສະເພາະກິດ ໃຫ້ຮູ້ ໃນຕອນເຊົ້າ ວັນທີ 19 ສິງຫາ 2021 ນີ້ວ່າ, ໃນວັນທີ 18 ສິງຫາ 2021 ໄດ້ມີການເກັບຕົວຢ່າງມາກວດທັງໝົດ 2456, ໃນນີ້ກວດພົບ ຄົນຕິດເຊື້ອໃໝ່ 284 ຄົນ, ຕິດໃນຊຸມຊົນ 19 ຄົນ ແລະ ນໍາເຂົ້າ 265 ຄົນ.

ກໍລະນີ ຕິດໃນຊຸມຊົນ 19 ຄົນ ມາຈາກ: ສະຫວັນນະເຂດ 17 ຄົນ ບໍ່ແກ້ວ 2

ກໍລະນີ ນໍາເຂົ້າ 265 ຄົນ ມາຈາກ: ນະຄອນຫຼວງວຽງຈັນ 7 ຄົນ, ສະຫວັນນະເຂດ 63 ຄົນ, ຈໍາປາສັກ 82 ຄົນ, ຄໍາມ່ວນ 66 ຄົນ, ໄຊຍະບູລີ 1 ຄົນ, ສາລະວັນ 44, ອຸດົມໄຊ 1 ຄົນ, ຫຼວງພະບາງ 1 ຄົນ,

ມາຮອດປະຈຸບັນ ຕົວເລກສະສົມ ທັງໝົດທົ່ວປະເທດ ແມ່ນ 11.313 ຄົນ, ເສຍຊີວິດ 10 ຄົນ (ໃໝ່ 1 ຄົນ ຈາກແຂວງສະຫວັນນະເຂດ ເຊົ້າວັນທີ 19 ສິງຫາ 2021), ກໍາລັງປິ່ນປົວ 4.435 ຄົນ.

ຄະນະສະເພາະກິດ ຮຽກຮ້ອງ ມາບັງທຸກຄົນໃນສັງຄົມ ຕ້ອງ ປະຕິບັດ ມາດຕະການ ປ້ອງກັນຕົນເອງ ຢ່າງເຂັ້ມງວດ. ພ້ອມດຽວກັນນີ້, ກໍ່ຈົ່ງຮີບຮ້ອນ ໄປຮັບວັກຊິນ ຕາມຄໍາແນະນໍາ. ເພີ່ມເຕີບ ໂທ 165 ຫຼື 166

.

ລາຍງານຈາກ ກູ້ໄພ ແຂວງສະຫວັນນະເຂດ ໃຫ້ຮູ້ ໃນຕອນເຊົ້າ ວັນທີ 19 ສິງຫາ 2021 ນີ້ວ່າ:

ເສັດສີ້ນພາລະກິດ ວັນທີ 19/08/2021 ໜ່ວຍກູ້ໄພ ສະຫວັນນະເຂດ 1629 ມ້ຽນສົບຜູ້ເສຍຊີວິດໂຄວິດ19 ກໍລະນີທີ 10 ຂອງ ສປປ ລາວ, ກໍລະນີທີ 3 ຂອງແຂວງ ສະຫວັນນະເຂດ.

ເປັນ ເພດຊາຍ ອາຍຸ55 ປີ ປະຊາຊົນ ບ້ານໂພນຊາຍ ນະຄອນໄກສອນ ແຂວງ ສະຫວັນນະເຂດ ( ແຮງງານມາແຕ່ໄທ ປີ່ນປົວທີ່ສູນຫລັກ9 )

.

.

.

.

.

ກະຊວງສຶກສາທິການ ແລະ ກິລາ ໄດ້ອອກຄໍາສັ່ງແນະນໍາ ສະບັບເລກທີ 3384/ສສກ ວ່າດ້ວຍການຈັດຕັ້ງປະຕິບັດຫລັກສູດສາຍສາມັນສຶກສາ ປະຈໍາສົກຮຽນ 2021-2022.

.

.

.

.

.

.