ເກີດອຸບັດຕິເຫດ ລົດບັນທຸກ 22 ລໍ້ ຕຳທ້າຍລົດຈັກ ເຮັດໃຫ້ມີເສຍຊີວິດ 1 ຄົນ ແລະ ບາດເຈັບ 3 ຄົນ, ເຫດການດັ່ງກ່າວ ເກີດຂຶ້ນໃນເວລາ ປະມານ 9:30 ໂມງຂອງວັນທີ 7 ກໍລະກົດ 2021ຢູ່ເສັ້ນທາງເລກທີ 9 ເຂດບ້ານດົງສະຫວັນ ເມືອງເຊໂປນ ແຂວງສະຫວັນນະເຂດ.

ອີງຕາມເຈົ້າໜ້າທີ່ຕໍາຫຼວດຈະລາຈອນ ແຂວງສະຫວັນນະເຂດ ໃຫ້ຮູ້ວ່າ: ລົດທີ່ເກີດອຸບັດຕິເຫດ ແມ່ນລົດບັນທຸກ 22 ລໍ້ ຍີຫໍ້ JAC ທະບຽນຫົວລາກ 74C– 07264 , ທະບຽນັຫາງລາກ 74R–00587, ຂັບຂີ່ມາຕາມເສັ້ນທາງເລກ 9 ດ້ວຍຄວາມໄວສູງ ມຸ້ງໜ້າມາແຕ່ທິດຕາເວັນອອກ ພໍຮອດເຂດ ບ້ານດົງ ສະຫວັນ ໄດ້ຕໍາທ້າຍລົດຈັກຮອນດາເວບ ສີດໍາ ບໍ່ຕິດໝາຍເລກທະບຽນ ຢ່າງແຮງ ເຊິ່ງຂັບຂີ່ລົດຈັກ ຊື່ທ້າວ ຄໍາເຄນ ອາຍຸ 43 ປີ ຢູ່ບ້ານ ນາທະລັງ ເມືອງພິນ ແຂວງສະຫວັນນະເຂດ, ໂດຍມີຄອບຄົວຊ້ອນທ້າຍ ມານໍາ 3 ຄົນ ຊື່: ນາງ ປິນ ອາຍຸ 8 ປີ ແລະ ນາງ ປອນ ອາຍຸ 5 ປີ ແລະ ນາງ ສາຍຄໍາ ອາຍຸ 32 ປີ, ພວກກ່ຽວທັງ 4 ຄົນ ເປັນພໍ່ແມ່ລູກ, ພາຍຫຼັງເກີດອຸບັດຕິເຫດຜູ້ຂັບຂີ່ລົດບັນທຸກ 22 ລໍ້ໄດ້ເອົາຕົວຫຼົບໜີ ຈາກຈຸດເກີດເຫດ.

ເຊີ່ງລັກສະນະການຕໍາ ລົດທັງສອງຄັນແມ່ນຂັບຂີ່ມາທິດທາງດຽວກັນ ເຊິ່ງລົດຈັກຢູ່ດ້ານໜ້າ ແລະ ລົດບັນທຸກຢູ່ດ້ານຫຼັງ, ລົດບັນທຸກໄດ້ຕໍາເອົາດ້ານຫຼັງຂອງລົດຈັກ ແລ້ວຕີນລົດບັນທຸກທາງດ້ານຊ້າຍໄດ້ຢຽບ ນາງ ສາຍຄໍາ ຜູ້ເປັນເມຍ ເສຍຊີວິດຄາທີ, ສ່ວນ ທ້າວ ຄໍາເຄນ ຜູ້ເປັນຜົວ ບາດເຈັບສາຫັດ ແລະ ລູກນ້ອຍ 2 ຄົນ ບາດເຈັບເລັກໜ້ອຍ.

ປັດຈຸບັນ ,ເຈົ້າໜ້າທີ່ຕໍາຫຼວດຈະລາຈອນ ແຂວງ ສະຫວັນນະເຂດ ກຳລັງຕິດຕາມນຳຫາຕົວຜູ້ຂັບຂີ່ລົດມາສອບສວນ ເພື່ອດຳເນີນຄະດີຕາມລະບຽບກົດໝາຍ.

ຕາມການລາຍງານ ຂອງMedia Lao ໃຫ້ຮູ້ວ່າ: ພາຍຫຼັງປິດກິດຈະການຂົ້ນສົ່ງໂດຍສານລະເມືອງຫາເມືອງ, ແຂວງຫາແຂວງ ເປັນເວລາຫຼາຍເດືອນ ຍ້ອນການລະບາດຂອງພະຍາດໂຄວິດ 19 ມາຮອດປະຈຸບັນ ໂດຍລວມ ສປປ ລາວ ກໍ່ສາມາດຄວບຄຸມພະຍາດດັ່ງກ່າວໄດ້ ໃນຂັ້ນພື້ນຖານ ລັດຖະບານຈື່ງມີມາດຕະການຜ່ອນຜັນມາດຕະການຄວບຄຸມໂຄວິດ 19 ລົງເທື່ອລະກ້າວ ຈື່ງເຮັດໃຫ້ການຂົ້ນສົ່ງໂດຍສານ ລະຫວ່າງແຂວງຫາແຂວງ ໂດຍສະເພາະນະຄອນຫຼວງວຽງຈັນ ກໍ່ໄດ້ກັບຄືນມາບໍລິການຜູ້ໂດຍສານເປັນປົກກະຕິ

ທ່ານ ຄຳເກິງ ແກ້ວວິວົງ ຫົວໜ້າວິສາຫະກິດລວມໝູ່ບໍລິການຄີວລົດໂດຍສານແຂວງບໍລິຄຳໄຊ ໄດ້ໃຫ້ສຳພາດ ໃນວັນທີ 07 ກໍລະກົດ 2021 ວ່າ: ເພື່ອປະຕິບັດຕາມຄຳສັງເລກທີ 06/ນຍ ແລະ ບັນດາຄຳສັ່ງ – ແຈ້ງການຂອງແຂວງ ໃຫ້ໄດ້ຮັບການຈັດຕັ້ງປະຕິບັດຢ່າງມີປະສິດທິພາບ ຄີວລົດໂດຍສານບໍລິຄຳໄຊ ໄດ້ເລີ່ມປິດການໃຫ້ບໍລິການແຕ່ ວັນທີ 24 ເມສາ 2021 ແລະ ໃຫ້ສະມາຊິກ ເກັບຕົວຢູ່ເຮືອນຂອງຕົນ.ມາຮອດວັນທີ 25 ພຶດສະພາ ແມ່ນໄດ້ເປີດບໍລິການການຂົນສົ່ງໄດ້ພາຍໃນແຂວງ ແລະ ໃນວັນທີ 6 ກໍລະກົດ ແມ່ນໄດ້ມີແຈ້ງການຂອງສຳນັກງານນາຍົກລັດຖະມົນຕີ ໃນການຜ່ອນຜັນສາມາດໃຫ້ບໍລິການການຂົນສົ່ງໂດຍສານໄປສູ່ຕ່າງແຂວງໄດ້ ຄື: ປາກຊັນ-ວຽງຈັນ ແລະ ປາກຊັນ-ຊຽງຂວາງ ໂດຍຈະແລ່ນ 4 ຖ້ຽວເທົ່ານັ້ນ: ເວລາອອກ ຖ້ຽວ 1 ເວລາ 08:00 ໂມງ, ຖ້ຽວ 2 ເວລາ 11:00 ໂມງ, ຖ້ຽວ 3 ເວລາ 13:40 ໂມງ ແລະ ຖ້ຽວ 4 ເວລາ 16:30 ໂມງ.

ອິງຕາມການລາຍງານ ຂອງຫ້ອງການແຮງງານ ແລະ ສະຫວັດດີການສັງຄົມເມືອງ ໃນການເກັບກໍາຂໍ້ມູນຂອງຄະນະກໍາມະການປ້ອງກັນ ແລະ ຄວບຄຸມໄພພິບັດ ໃນຄັ້ງວັນທີ 8 ກໍລະກົດ 2021 ນີ້ວ່າ: ໃນວັນທີ 7 ກໍລະກົດ 2021 ເວລາ 13​ ​ໂມງ​ 43 ນາທີ ມີແຜນດິນໄຫວຈຸດສູນກາງຢູ່ບ້ານ ດອກເກດ ເມືອງເງິນ ແຂວງໄຊຍະບູລີ ຈຳນວນ 1 ຄັ້ງ.

ຄວາມແຮງສັນສະເທືອນວັດແທກໄດ້ 4,9 ຣິກເຕີ ຊື່ງມີຄວາມເລິກຈາກໜ້າດິນລົງ​ໄປ 15 ກິໂລແມັດ, ຫ່າງຈາກຕົວເມືອງໄປທາງທິດເໜືອປະມານ 8 ກິໂລແມັດ ຊຶ່ງສ້າງຜົນເສຍຫາຍ ແລະ ຄວາມແຕກຕື່ນໃຫ້ແກ່ຊາວເມືອງເງິນ​ພໍ​ສົມ​ຄວນ ​ໂດຍ​ເຫດ​ການ​ດັ່ງ​ກ່າວ​ສົ່ງ​ຜົນກະທົບ 1 ບ້ານຄື: ບ້ານ ນາງົວ ເຮັດໃຫ້ເຮືອນປະຊາຊົນເສຍຫາຍ 1 ຫຼັງຄື: 1 ຄອບຄົວ, ຈໍານວນພົນ 4 ຄົນ ຍິງ 2 ຄົນ ມູນຄ່າເສຍຫາຍທັງໝົດ 17 ລ້ານກີບ. ສ່ວນບ້ານອື່ນໆ ແມ່ນມີຄວາມເສຍຫາຍເລັກນ້ອຍ.

ປະຊາຊົນຈຳນວນຫຼາຍພາກັນຂົນສາດມາປູນອນຕາກຝົນທັງເກືອຍຸງເພື່ອລໍຖ້າຮັບບັດຄິວກວດພະຍາດໂຄວິດ-19 ບໍ່ເສຍຄ່າ ຢູ່ໜ້າວັດພະສີມະຫາທາດ ວໍຣະມະຫາວິຫານ, ບາງເຂນ, ກຸງເທບ, ປະເທດໄທ ບາງຄົນກໍມາລໍຖ້າຄິວຕັ້ງແຕ່ 2:00 – 3:00 ໂມງເຊົ້າ ເພື່ອຈະໄດ້ເຂົ້າກວດໄວ ເນື່ອງຈາກມີການຈຳກັດຈຳນວນກວດພຽງແຕ່ 900 ຄົນຕໍ່ວັນເທົ່ານັ້ນ.

ທາງໜ່ວຍງານບໍລິການສາທາລະນະສຸກໄດ້ເລືອກເອົາວັດພະສີມະຫາທາດ ວໍຣະມະຫາວິຫານ ເປັນອີກໜຶ່ງຈຸດບໍລິການກວດໂຄວິດບໍ່ເສຍຄ່າສຳລັບປະຊາຊົນທີ່ມີສັນຊາດໄທ ໂດຍເລີ່ມມາແຕ່ວັນທີ 5 ກໍລະກົດ ຈົນຮອດວັນທີ 11 ກໍລະກົດ ໂດຍກຳນົດຈຳນວນກວດພຽງ 900 ຄົນຕໍ່ວັນເທົ່ານັ້ນ.

ນາງທິດາພອນ, ອາຍຸ 28 ປີ, ໜຶ່ງໃນກຸ່ມຄົນທີ່ລໍຖ້າບັດຄິວບອກວ່າ ຜູ້ກຽວເດີນທາງມາຈາກເຂດບາງກະປິ ເຊິ່ງຕັ້ງໃຈຈະມາກວດຫາເຊື້ອໂຄວິດ ຍ້ອນມີເພື່ອນຮ່ວມງານກວດພົບເຊື້ອ ໂດຍເດີນທາງມາເຖິງແຕ່ 9:00 ໂມງແລງ ເພາະຢ້ານບໍ່ໄດ້ບັດຄິວ, ເນື່ອງຈາກເຄີຍໄປກວດຫາເຊື້ອມາແລ້ວເຖິງສາມຄັ້ງແຕ່ກໍບໍ່ໄດ້ຮັບການກວດຍ້ອນມີການຈຳກັດຈຳນວນຄົນໃນແຕ່ລະວັນ.

ທ້າວ ຍຸດທະສານ ແທ່ນນອກ, ອາຍຸ 21 ປີ ບອກກັບຜູ້ສື່ຂ່າວວ່າ: ຜູ້ກ່ຽວມາລໍຖ້າບັດຄິວແຕ່ 11:00 ໂມງກາງຄືນ, ເພາະຢູ່ໃນກຸ່ມສ່ຽງ ຈິ່ງຮີບຮ້ອນກວດຫາເຊື້ອ ເຊິ່ງໄດ້ນຳເອົາສາດ ແລະ ເຕັນມານອນລໍຖ້າ ລວມທັງຢາກັນຍຸງ ແລະເຈລລ້າງມື ເຖິງປານນັ້ນກໍຍັງມີອຸປະສັກອື່ນຂວາງໜ້າ ໂດຍສະເພາະເລື່ອງຂອງການຈັດຄິວແມ່ນຍັງເຮັດບໍ່ໄດ້ດີ ເຊິ່ງບໍ່ມີເຈົ້າໜ້າທີ່ພະນັກງານມາບອກ ຕ້ອງໄດ້ອາໄສຈາກຄົນທາງຂ້າງ.

ພະນັກງານຮັກສາຄວາມປອດໄພຂອງວັດກ່າວວ່າ: ມີປະຊາຊົນຫຼາຍຄົນມາລໍຖ້າຮັບບັດຄິວຕັ້ງແຕ່ຕອນກາງຄືນ ເຊິ່ງເຈົ້າໜ້າທີ່ຈະແຈກບັດຄິວໃນຊ່ວງ 6:00 ໂມງເຊົ້າ ໂດຍກຳນົດພຽງ 900 ຄິວຕໍ່ວັນ ເຖິງຫຼາຍຄົນຈະພາກັນມານອນຕາກຝົນລໍຖ້າແຕ່ກໍບໍ່ໝາຍຄວາມວ່າຈະໄດ້ເຂົ້າກວດດັ່ງໃຈຫວັງ ເພາະຈຳນວນມີຈຳກັດ ຈິ່ງຈຳຕ້ອງລໍຖ້າມື້ຖັດໄປ.

ອີກບໍ່ພໍເທົາໃດອາທິດ ກໍຈະຮອດງານກິລາໂອລິມປິກ 2020 ທີ່ຈະຈັດຂຶ້ນ ທີ່ ເມືອງໂຕກຽວ ປະເທດຍີ່ປຸ່ນ. ເຖິງວ່າສະຖານນະການໂຄວິດ-19 ຍັງຄົງມີການແຜລະບາດຢູ່ກໍຕາມ, ພ້ອມທັງມີຄວາມສ່ຽງທີ່ຈະເກີດຈາກການຕິດເຊື້ອຮອບໃໝ່ ຈາກການລວມຕົວກັນ ຂອງນັກກິລາຫຼາກຫຼາຍປະເທດ ຈຶ່ງເຮັດໃຫ້ຫຼາຍຝ່າຍຂ້ອນຂ້າງບໍ່ເຫັນດີ ກັບການຕັດສິນໃຈໃນການຈັດການງານແຂ່ງຂັນໃນຄັ້ງນີ້.

ໜຶ່ງໃນນັ້ນກໍແມ່ນ ຍິງ ໄວກາງຄົນ ຄົນໜຶ່ງ ທີ່ໄປຢືນລໍຖ້າຂະບວນແຫ່ທວນໄຟໂອລິມປິກ ເພື່ອທີ່ຈະຍິງປືນສີດນໍ້າໃສ່ໃຫ້ໄຟມອດ ແຕ່ກໍບໍ່ເກີດຜົນໃດໆ ເຊິ່ງທາງເຈົ້າໜ້າທີ່ກໍໄດ້ຄຸມໂຕລາວອອກໄປ. ນີ້ບໍ່ແມ່ນເທື່ອທຳອິດ ທີ່ເກີດຂຶ້ນກັບຂະບວນແຫ່ດັ່ງກ່າວ.

ເຊິ່ງທວນໄຟນີ້ຈະເດີນທາງຮອດເມືອງໂຕກຽວ ໃນວັນສຸກ ວັນທີ 9 ກໍລະກົດ ກ່ອນຈະຖືກນຳໄປຈູດ ໃນພິທີເປີດການແຂ່ງຂັນ ທີ່ມີຂຶ້ນ ໃນວັນທີ 23 ກໍລະກົດ ນີ້