ພະແນກອຸດສາຫະກຳ ແລະ ການຄ້າ ນະຄອນຫຼວງວຽງຈັນ ໄດ້ອອກແຈ້ງການແນະນຳ ກ່ຽວກັບການເພີ່ມທະວີ ແລະ ມາດຕະການສະກັດກັ້ນ, ຄວບຄຸມເພື່ອຕ້ານການລະບາດຂອງພະຍາດໂຄວິດ-19 ຢູ່ໃນໂຮງງານອຸດສາຫະກໍາປຸງແຕ່ງ ແລະ ຫັດຖະກໍາໃນນະຄອນຫຼວງວຽງຈັນ ໃນໄລຍະວັນທີ 5 – 19 ມິຖຸນາ 2021.

ພະແນກ ອຸດສາຫະກໍາ ແລະ ການຄ້າ ນະຄອນຫລວງວຽງຈັນ ແນະນໍາໃຫ້ປະຕິບັດ ດັ່ງນີ້:

1.ໂຮງງານອຸດສາຫະກໍາປຸງແຕ່ງ ແລະ ຫັດຖະກໍາ ທີ່ນອນຢູ່ໃນເຂດ/ບ້ານແດງ ບໍ່ສາມາດດໍາເນີນກິດຈະການໄດ້ (ໃຫ້ປິດ) ຍົກເວັ້ນໂຮງງານທີ່ມີຫໍພັກ ຂອງແຮງງານຢູ່ໃນບໍລິເວນໂຮງງານຂອງຕົນ, ໂຮງງານຜະລິດສິນຄ້າບໍລິໂພກ, ຢາປົວພະຍາດ, ເຄື່ອງປ້ອງກັນການລະບາດ ແລະ ອຸປະກອນການແພດ ແຕ່ໃຫ້ມີການຄຸ້ມຄອງການປະຕິບັດມາດຕະການປ້ອງກັນ ຂອງຄະນະສະເພາະກິດວາງອອກຢ່າງເຂັ້ມງວດ, ໃນໄລຍະພັກວຽກໃຫ້ແຈ້ງຕໍ່ພະນັກງານກໍາມະກອນ ຂອງຕົນໃຫ້ປະຕິບັດຕາມລະບຽບການບໍ່ໃຫ້ອອກຈາກທີ່ພັກເຊົາຂອງຕົນ ຖ້າມີຄວາມຈໍາເປັນຕ້ອງຂໍອະນຸຍາດ ຈາກອໍານາດການປົກຄອງບ້ານ;

2.ໂຮງງານອຸດສາຫະກໍາປຸງແຕ່ງ ແລະ ຫັດຖະກໍາ ທີ່ຕັ້ງຢູ່ນອກເຂດແດງ ຫລື ບ້ານແດງ ສາມາດດໍາເນີນກິດຈະການໄດ້ແຕ່ຕ້ອງປະຕິບັດຕາມມາດຕະການຄື:

• ໃຫ້ສ້າງແຜນກໍານົດມາດຕະການສະກັດກັ້ນ, ຄວບຄຸມ ເພື່ອຕ້ານພະຍາດໂຄວິດ-19 ຢູ່ໃນໂຮງງານ, ຈັດຕັ້ງ ປະຕິບັດ ແລະ ລາຍງານຂະແໜງອຸດສາຫະກໍາ ແລະ ການຄ້າເປັນປະຈໍາ
• ໃຫ້ສືບຕໍ່ປະຕິບັດມາດຕະການຮັກສາໄລຍະຫ່າງຂອງການເຮັດວຽກ ເພື່ອຫລຸດຄວາມແອອັດຢູ່ໃນສະຖານທີ່ ເຮັດວຽກ, ຫ້ອງອາຫານ ແລະ ບ່ອນພັກເຊົ້າຂອງໂຮງງານ, ໝາຍສັນຍາລັກເພື່ອກໍານົດຮັກສາໄລຍະຫ່າງ, ຖ້າບໍ່ສາມາດປະຕິບັດຮັກສາໄລຍະຫ່າງ 1 ແມັດໄດ້ ຕ້ອງມີແນວຂັ້ນລະຫວ່າງບຸກຄົນຕໍ່ບຸກຄົນ
• ຕ້ອງກວດວັດແທກອຸນຫະພູມ, ກໍລະນີພົບເຫັນຜູ້ມີອາການໄຂ້ (ອຸນຫະພູມຮ່າງກາຍສູງກວ່າ 37,5 ອົງສາ), ໄອ, ຈາມ, ຫາຍໃຈຍາກ ຫລື ມີອາການສົງໄສວ່າເປັນພະຍາດໂຄວິດ-19 ຕ້ອງສົ່ງເຂົ້າຫ້ອງແຍກປ່ຽວຂອງໂຮງ ງານ ແລ້ວໂທປຶກສາສາຍດ່ວນ 165, 166 ແລະ ພົວພັນໃຫ້ແພດໝໍເຂົ້າກວດທັນທີ
• ຕ້ອງກວດວັດແທກອຸນຫະພູມ, ກໍລະນີພົບເຫັນຜູ້ມີອາການໄຂ້ (ອຸນຫະພູມຮ່າງກາຍສູງກວ່າ 37,5 ອົງສາ), ໄອ, ຈາມ, ຫາຍໃຈຍາກ ຫລື ມີອາການສົງໄສວ່າເປັນພະຍາດໂຄວິດ-19 ຕ້ອງສົ່ງເຂົ້າຫ້ອງແຍກປ່ຽວຂອງໂຮງ ງານ ແລ້ວໂທປຶກສາສາຍດ່ວນ 165, 166 ແລະ ພົວພັນໃຫ້ແພດໝໍເຂົ້າກວດທັນທີ
• ຕ້ອງໃສ່ຜ້າອັດປາກ-ດັງ ທຸກຄັ້ງ ໃນເວລາຢູ່ສະຖານທີ່ເຮັດວຽກ ແລະ ສະຖານທີ່ທີ່ມີຄົນຈໍານວນຫລາຍ; ຕ້ອງມີນໍ້າດື່ມສະອາດ, ມີບ່ອນລ້າງມືດ້ວຍນໍ້າສະອາດໃສ່ສະບູ ຫລື ເຈວລ້າງມືຖືກຕາມຫລັກການອະນາໄມ; ໃຫ້ອະນາໄມ ແລະ ຂ້າເຊື້ອ ອຸປະກອນ, ສິ່ງຂອງທີ່ມີການສໍາພັດເລື້ອຍໆ ແລະ ສະຖານທີ່ພາຍໃນໂຮງງານ
• ໂຮງງານທີ່ມີຈໍານວນກໍາມະກອນຫລາຍ ຕ້ອງຈັດແບ່ງເວລາການກິນເຂົ້າເປັນຫລາຍຈຸ ແລະ ບ່ອນນັ່ງກິນເຂົ້າຕ້ອງ ມີແຜ່ນກັ້ນບັງ ເພື່ອຮັກສາໄລຍະຫ່າງ ແລະ ຫລຸດຜ່ອນຄວາມສ່ຽງໃນການແຜ່ລະບາດຂອງພະບາດໂຄວິດ-19
• ຫ້າມເຮັດກິດຈະກໍາຊຸມແຊວ ຫລື ພົວພັນແບບໃກ້ຊິດທີ່ບໍ່ສາມາດຮັກສາໄລຍະຫ່າງ ຫລື ກິດຈະກໍາອື່ນໆ ທີ່ມີຄວາມສ່ຽງຕໍ່ການຕິດເຊື້ອ.

3.ພະນັກງານ ກໍາມະກອນຜູ້ໃດທີ່ພັກເຊົາຢູ່ບ້ານທີ່ມີຜູ້ຕິດເຊື້ອ(ເຂດແດງ) ແມ່ນໃຫ້ຢຸດການມາເຮັດວຽກ ແລະ ຈໍາກັດບໍລິເວນໃຫ້ຄົບ 14 ວັນ ຖ້າບໍ່ມີອາການຈຶ່ງສາມາດມາເຮັດວຽກໄດ້.

4.ສໍາລັບໂຮງງານທີ່ມີຜູ້ຕິດເຊື້ອຕ້ອງໄດ້ປິດຊົ່ວຄາວ 14 ວັນ ເພື່ອດໍາເນີນການອານາໄມ ແລະ ຂ້າເຊື້ອ ພ້ອມກັນນັ້ນ ພະນັກງານ-ກໍາມະກອນ ກໍຕ້ອງຈໍາກັດບໍລິເວນຕົນເອງຄົບ 14 ວັນເຊັ່ນດຽວກັນ

5.ລົດຮັບ-ສົ່ງພະນັກງານ ກໍາມະກອນ ຕ້ອງມີຄວາມຮັບປະ ກັນການນັ່ງໃນລົດຕ້ອງຮັກສາໄລຍະຫ່າງໃຫ້ໄດ້ 1 ແມັດຂຶ້ນໄປ ຫລື ມີແຜ່ນກັ້ນບັງລະຫວ່າງບ່ອນນັ່ງ

6.ໃຫ້ຊຸກຍູ້ພະນັກງານ ແລະ ກໍາມະກອນ ທີ່ເຮັດວຽກຢູ່ໃນໂຮງງານ ໄປສັກຢາວັກຊິນປ້ອງກັນພະຍາດໂດວິດ-19

7.ໃຫ້ຂະແໜງອຸດສາຫະກຳ ແລະ ຫັດຖະກຳ ຫ້ອງການອຸດສາຫະກຳ ແລະ ການຄ້າ ເມືອງ ເຜີຍແຜ່ ແລະ ຈັດຕັ້ງປະຕິບັດແຈ້ງການສະບັບນີ້ຢ່າງເຂັ້ມງວດພ້ອມທັງສະຫຼຸບລາຍງານໃຫ້ພະແນກອຸດສາຫະກຳ ແລະ ການຄ້າ ນະຄອນຫຼວງວຽງໃຈເປັນແຕ່ລະວັນ

8.ໃຫ້ໂຮງງານທີ່ດໍາເນີນການຜະລິດ ແລະ ບໍ່ດໍາເນີນການຜະລິດໃຫ້ແຈ້ງເປັນລາຍລັກອັກສອນ ໃຫ້ພະແນກອຸດສາຫະກໍາ ແລະ ການຄ້າ ນະຄອນຫລວງວຽງຈັນ ຕາມເບີປະສານງານໂທ ແລະ ວອດແອັບ: 020 55669694, 020 22226438

9.ການຈັດຕັ້ງປະຕິບັດ ແລະ ມາດຕະການປັບໃໝ: ໂຮງງານອຸດສາຫະກໍາປຸງແຕ່ງ ແລະ ຫັດຖະກໍາ ທີ່ນອນຢູ່ໃນເຂດ/ບ້ານແດງ ມອບໃຫ້ຫ້ອງການອຸດສາຫະກໍາ-ການ ຄ້າເມືອງ ສົມທົບກັບຄະນະສະເພາະກິດຂັ້ນເມືອງ ແລະ ອໍານາດການປົກຄອງບ້ານ ເປັນເຈົ້າການໃນການໂຄສະນາ, ເຜີຍແຜ່ແຈ້ງການສະບັບນີ້ໃຫ້ແກ່ໂຮງງານອຸດສາຫະກໍາປຸງແຕ່ງ ແລະ ຫັດຖະກໍາ ໃນເມືອງຂອງຕົນຈັດຕັ້ງປະຕິບັດ ຢ່າງເຂັ້ມງວດ, ພ້ອມທັງກວດກາຕິດຕາມ ແລະ ປະຕິບັດມາດຕະການຕໍ່ຜູ້ລະເມີດ ຄື: ປັບໃໝ ແຕ່ 1.000.000 ກີບ – 5.000.000 ກີບ/ຄັ້ງ ຕາມແຕ່ລະກໍລະນີ.

ອີງຕາມການລາຍງານຂອງ National Radio, ໃນວັນທີ 7 ມິຖຸນາ 2021ນີ້, ທີ່ກະຊວງປ້ອງກັນປະເທດ ໄດ້ເປີດກອງປະຊຸມຄະນະກໍາມະການຄຸ້ມຄອງໄພພິບັດຂັ້ນສູນກາງຂຶ້ນ ໂດຍການເປັນປະທານຂອງ ພົນເອກ ຈັນສະໝອນ ຈັນຍາລາດ ກໍາມະການກົມການເມືອງສູນກາງພັກ ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນປະເທດ ປະທານຄະນະກໍາມະການຄຸ້ມຄອງໄພພິບັດຂັ້ນສູນກາງ, ມີ ທ່ານ ນາງ ໃບຄໍາ ຂັດຕິຍະ ກໍາມະການສູນກາງພັກ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ຮອງປະທານຜູ້ປະຈໍາການຄະນະກໍາມະການຄຸ້ມຄອງໄພພິບັດຂັ້ນສູນກາງ, ມີບັນດາຮອງລັດຖະມົນຕີ ແລະ ພາກສ່ວນກ່ຽວຂ້ອງເຂົ້າຮ່ວມ.

ທ່ານ ນາງ ໃບຄໍາ ຂັດຕິຍະ ໄດ້ຂຶ້ນຜ່ານບົດລາຍງານຫຍໍ້ ກ່ຽວກັບການຈັດຕັ້ງປະຕິບັດວຽກງານຟື້ນຟູ ເມືອງສະໜາມໄຊ ທີ່ໄດ້ຮັບຜົນກະທົບ ຈາກສັນເຂື່ອນ D ຂອງເຂື່ອນເຊປຽນ-ເຊນໍ້ານ້ອຍແຕກໃນໄລຍະເດືອນກໍລະກົດ 2018 – ພຶດສະພາ 2021 ຄະນະກໍາມະການຄຸ້ມຄອງໄພພິບັດຂັ້ນສູນກາງ ໄດ້ປະຕິບັດຕາມແຈ້ງການຫ້ອງວ່າການສໍານັກງານນາຍົກລັດຖະມົນຕີ ແລະ ກົນໄກການນໍາໃຊ້ເງິນບໍລິຈາກ ໃຫ້ສອດຄ່ອງກັບກົດໝາຍວ່າດ້ວຍງົບປະມານ ໂດຍໄດ້ໂອນເງິນບໍລິຈາກ ຈໍານວນ ( 153 ຕື້ ກວ່າກີບ ) ໃຫ້ແຂວງອັດຕະປື ເພື່ອຈ່າຍຊໍາລະບັນດາໂຄງການສຸກເສີນ, ຮີບດ່ວນ ໃຫ້ແກ່ການຟື້ນຟູ ເມືອງສະໜາມໄຊ ກ່ອນ, ເມື່ອທາງບໍລິສັດ ຜູ້ພັດທະນາເຂື່ອນເຊປຽນ-ເຊນ້ໍານ້ອຍ ຊົດເຊີຍຄືນໃຫ້ທາງແຂວງແລ້ວ ໃຫ້ແຂວງໂອນກັບເຂົ້າບັນຊີເງິນບໍລິຈາກຢູ່ຄັງເງິນແຫ່ງຊາດ ທີ່ກະຊວງແຮງງານ ແລະ ສະຫວັດດີການສັງຄົມຄຸ້ມຄອງ.

ພ້ອມກັນນັ້ນ, ຄະນະກໍາມະການຄຸ້ມຄອງໄພພິບັດຂັ້ນສູນກາງ ກໍໄດ້ລົງຕິດຕາມຊຸກຍູ້ ໃນການຟື້ນຟູ ເມືອງສະໜາມໄຊ, ແຂວງອັດຕະປື ດ້ວຍການຈັດກອງປະຊຸມຮ່ວມກັນເປັນໄຕມາດທຸກໆ ສາມເດືອນ ເພື່ອຮັບຟັງການລາຍງານຄວາມຄືບໜ້າການຟື້ນຟູ ແລະ ປຶກສາຫາລືໃນການແກ້ໄຂຂໍ້ຄົງຄ້າງຕ່າງໆ, ພ້ອມນັ້ນ, ກໍເປັນໃຈກາງປະສານສົມທົບກັບພາກສ່ວນຕ່າງໆ ຈັດກອງປະຊຸມປຶກສາຫາລື ກັບ ບໍລິສັດ PNPC/SK ໃນການເລັ່ງລັດຟື້ນຟູເມືອງສະໜາມໄຊ ໂດຍສະເພາະແມ່ນ ຄວາມເອກະພາບບັນດາຂໍ້ມູນການປະເມີນຜົນເສຍຫາຍ, ການພັດທະນາແຜນແມ່ບົດໃນການຊົດເຊີຍການຟື້ນຟູ ເມືອງສະຫມາມໄຊ, ເຈລະຈາຕໍ່ລອງບັນຫາຕ່າງໆດ້ວຍຄວາມເປັນເຈົ້າການ ຕັ້ງໜ້າປະສານສົມທົບກັບອົງການເຄືອຄ່າຍ ສປຊ ແລະ ບັນດາອົງການຈັດຕັ້ງສາກົນ ຈັດຕັ້ງປະຕິບັດບັນດາກິດຈະກໍາຟື້ນຟູຫຼັງໄພພິບັດ.

ເຊິ່ງປັດຈຸບັນມີໂຄງການສ້າງຄວາມເຂັ້ມແຂງ ໃນການຮັບມືກັບສະພາບດິນຟ້າອາກາດແບບປະສົມປະສານ ຢູ່ແຂວງອັດຕະປື ມີໄລຍະໂຄງການ ແຕ່ປີ 2020-2023 ເຊິ່ງປະກອບມີ 6 ວຽກໃຫຍ່ ຄື: ວຽກພັດ ທະນາສີມືແຮງງານ, ວຽກປົກປ້ອງເດັກ, ວຽກ ສຶກສາທິການ ແລະ ກິລາ, ວຽກສາທາລະນະສຸກ, ວຽກກະສິກໍາ ແລະ ປ່າໄມ້ ແລະ ວຽກຄຸ້ມຄອງໄພພິບັດ. ແຂວງອັດຕະປື ແລະ ບໍລິສັດຜູ້ພັດທະນາເຂື່ອນເຊປຽນ-ເຊນ້ໍານ້ອຍ PNPC/SK ໄດ້ເຊັນບົດບັນທຶກຄວາມເຂົ້າໃຈຮ່ວມກັນ ໃນການຮັບຮອງເອົາມູນຄ່າຊົດເຊີຍ ແລະ ຟື້ນຟູ ຕາມແຜນແມ່ບົດ ສະບັບເລກທີ 01/ຄກພ.ອປ, ລົງວັນທີ 10 ເມສາ 2020 ໃນມູນຄ່າ (835 ຕື້ກວ່າກີບ) 835.880.000.000 ກີບ, ເຊິ່ງມູນຄ່ານີ້ ລັດຖະບານ ໄດ້ມີແຈ້ງການຮັບຮອງແຜນແມ່ບົດ ສະບັບເລກທີ 739/ ຫສນຍ, ລົງວັນທີ 13 ກໍລະກົດ 2020 ແຕ່ມູນຄ່າດັ່ງກ່າວ ບໍ່ໄດ້ລວມ ການຊົດເຊີຍໃນລາຍການທີ 6 ທີ່ມີ: ສິ່ງປຸກສ້າງ, ເງິນສົດ-ວັດຖຸ ມີຄ່າທີ່ເສຍຫາຍ, ອັດຖິ, ຂໍ້ມູນຕົກຫຼົ່ນ ທີ່ຍັງບໍ່ສາມາດເອກະພາບຕົວເລກເສຍຫາຍໄດ້ ເຊິ່ງທາງແຂວງ ແລະ ບໍລິສັດ PNPC/SK ຈະຕ້ອງ ໄດ້ສືບຕໍ່ເຈລະຈາ ການຈັດຕັ້ງປະຕິບັດໂຄງການຟື້ນຟູ ເມືອງສະໜາມໄຊ ທຸກໆໂຄງການທີ່ນໍາໃຊ້ງົບປະມານ ຕາມແຈ້ງການລັດຖະບານ, ເຊິ່ງປະກອບມີ: ງົບປະມານການຊ່ວຍເຫຼືອປຸກເຮືອນຂອງອົງການຈັດຕັ້ງສາກົນ, ການຊ່ວຍເຫຼືອປຸກເຮືອນ ແລະ ຂົວ ຂອງລັດຖະບານໄທ ແລະ ບ້ວງການຊົດເຊີຍແຜນແມ່ບົດ ຂອງບໍລິສັດ PNPC/SK ນັ້ນ ແມ່ນທາງແຂວງ ເປັນຜູ້ຮັບຜິດຊອບຄຸ້ມຄອງ ແລະ ຈັດຕັ້ງປະຕິບັດ.

• ວຽກສົງເຄາະ ປະຊາຊົນທີ່ອາໄສຢູ່ສູນພັກຊົ່ວຄາວໃນ 5 ສູນ ແມ່ນໄດ້ມີການເບີກຈ່າຍເງິນອັດຕາກິນ ແລະ ເງິນແຮຖົງ ໃຫ້ປະຊາຊົນ ຈໍານວນ 250.000 ກີບ/ຄົນ/ເດືອນ ເຊິ່ງໄດ້ຈັດຕັ້ງປະຕິບັດມາຮອດເດືອນ 12/2020, ເບີກຈ່າຍເຂົ້າໃຫ້ປະຊາຊົນໃນ 5 ສູນພັກເຊົາ 20 ກິໂລ/ຄົນ/ເດືອນ ຮອດເດືອນ 12 ປີ 2020 (ມີຜູ້ໄດ້ຮັບນະ ໂຍບາຍສົງເຄາະທັງຫມົດ 3.612 ຄົນ, ຍິງ 1.211 ຄົນ).

ມາຮອດປີ 2020, ຄະນະກໍາມະການຄຸ້ມຄອງໄພພິບັດຂັ້ນສູນກາງ ແລະ ແຂວງໄດ້ເຮັດການປະເມີນຊີວິດການເປັນຢູ່ຂອງປະຊາຊົນ ເຊິ່ງເຫັນວ່າມີຫຼາຍຄອບຄົວ ສາມາດກຸ້ມຕົນເອງ ແລະ ໄດ້ລາຍງານຜົນການປະເມີນໃຫ້ລັດຖະບານຮັບຊາບ, ປັດຈຸບັນ ທາງແຂວງກໍາລັງ ອອກຂໍ້ຕົກລົງຮັບຮອງຜົນການລົງປະເມີນຊີວິດການເປັນຢູ່ຂອງປະຊາຊົນ ຕາມບົດບັນທຶກກອງປະຊຸມ ຄັ້ງທີ 4 ໃນຄັ້ງວັນທີ 21 ກຸມພາ 2021 ຄື: ຫຼຸດນະໂຍບາຍເຂົ້າກິນ ຈາກ 20 ກິໂລ/ຄົນ/ເດືອນ ມາເປັນ 12 ກິໂລ/ຄົນ/ເດືອນ; ສໍາລັບນະໂຍບາຍເງິນສົດ 250.000 ກີບ/ຄົນ/ເດືອນນັ້ນ ແມ່ນປະຕິບັດໃຫ້ພຽງແຕ່ ກຸ່ມເປົ້າໝາຍສະ ເພາະ ເປັນຕົ້ນ: ຄອບຄົວທີ່ຍັງບໍ່ສາມາດກຸ້ມຕົນເອງໄດ້ເທື່ອ, ຄອບຄົວທີ່ມີ ຫົວ ໜ້າຄອບຄົວເປັນເພດຍິງ, ຜູ້ພິການ ແລະ ຜູ້ອາຍຸສູງໃນຄອບຄົວທຸກຍາກ, ເດັກນ້ອຍກໍາພ້າ-ກໍາພອຍ, ສ່ວນຄອບຄົວຜູ້ປະສົບໄພພິບັດ ອື່ນໆ ແມ່ນຫັນໄປສູ່ຮູບແບບການພັດທະນາ ແລະ ສົ່ງເສີມການຜະລິດ, ຊຸກຍູ້ໃຫ້ເຂົາເຈົ້າເຂົ້າຮ່ວມກຸ່ມການຜະລິດໃຫ້ຫຼາຍຂຶ້ນ ໂດຍເລີ່ມປະຕິບັດແຕ່ເດືອນ 1/2021 ເປັນຕົ້ນມາ. ກອງປະຊຸມຄັ້ງນີ້, ປະທານ ແລະ ຜູ້ເຂົ້າຮ່ວມໄດ້ພ້ອມກັນປະກອບຄໍາຄິດຄໍາເຫັນໃສ່ບົດລາຍງານຢ່າງຕັ້ງໜ້າດ້ວຍຄວາມຮັບຜິດຊອບສູງແບບພາວະວິໄສກົງໄປກົງມາ.

ອີງຕາມການລາຍງານ ຂອງໜັງສືພິມບໍ່ແກ້ວ Bokeo Newspaper ໃຫ້ຮູ້ວ່າ: ໃນວັນທີ 04 ມິຖຸນາ 2021 ນີ້, ສະຫາຍ ພັນໂທ ຈັນພອນເພັດ ຄຳສີ ຮອງຫົວໜ້າກອງບັນຊາການ ປກສ ແຂວງບໍ່ແກ້ວ ແລະ ສະຫາຍ ພັນໂທ ເນັງສີດາ ເບຼຍລືມົວ ຄະນະພັກກອງບັນຊາການ ຫົວໜ້າຫ້ອງການບັນຊາທະຫານແຂວງບໍ່ແກ້ວ ພ້ອມດ້ວຍຄະນະ ໄດ້ສືບຕໍ່ລົງສຸກຍູ້ວຽງານຕ້ານ ແລະ ສະກັດກັ້ນພະຍາດລະບາດໂຄວິດ-19 ຢູ່ຈຸດກວດດ່ານນ້ຳທຸງ.

ຈາກການລົງກວດກາຕົວຈິງເຫັນວ່າທຸກພາກສ່ວນ ແມ່ນໄດ້ເປັນເຈົ້າການປະຕິບັດຕາມມາດຕະການຕ່າງໆ ທີ່ຂັ້ນເທິງວາງອອກ ເວົ້າລວມ ເວົ້າສະເພາະ ຢູ່ດ່ານກວດຄົນເຂົ້າ-ອອກລະຫ່ວາງ ແຂວງ ຕໍ່ ແຂວງ, ເມືອງ ຕໍ່ ເມືອງ, ບ້ານ ຕໍ່ ບ້ານ, ແມ່ນມີຄວາມເຂັ້ມງວດ. ການຈັດຕັ້ງປະຕິບັດມາດຕະການຕ່າງໆ ທີ່ຂັ້ນເທິງວາງອອກໃນການສະກັດກັ້ນ ແລະ ຕອບຕ້ານກັບພະຍາດໂຄວິດ-19 ຢູ່ຈຸດດ່ານດັ່ງກ່າວໄດ້ຈັດຕັ້ງຫຼາຍພາກສ່ວນໃນການກວດຄົນເຂົ້າ-ອອກເມືອງ ເຊິ່ງໃນໄລຍະຜ່ານມາການຈັດຕັ້ງປະຕິບັດແມ່ນມີຄວາມສະຫງົບ ໂດຍພື້ນຖານ ການສັນຈອນໄປມາແມ່ນມີຄວາມເປັນລະບຽບຮຽບຮ້ອຍ ສາມາດຮັບປະກັນໄດ້ຕາມມາດຕະການປ້ອງກັນພະຍາດໂຄວິດ-19. ແຕ່ເຖິ່ງຢ່າງໃດກໍ່ຕາມການເຂົ້າ-ອອກເມືອງ ຕ້ອງໄດ້ຮັບອະນຸຍາດຈາກທາງການກໍ່ຄືໜ່ວຍງານສະເພາະກິດ ແລະ ໜ່ວຍງານຮັບຜິດຊອບຂອງບ້ານດັ່ງກ່າວຢ່າງເຄັ່ງຂັດ.

ຮູ້ບໍ່ວ່າ ແຕ່ລະປີທົ່ວໂລກໄດ້ຜະລິດຢາສູບ ຈຳນວນ 6 ລ້ານ ລ້ານ ກອກ ແລະ ຖິ້ມບໍ່ເປັນບ່ອນເມື່ອສູບແລ້ວໆ , ເຮັດໃຫ້ເຮົາຈະເຫັນຢາສູບ ຖິ້ມກະແຈກກະຈາຍ ບໍ່ເປັນບ່ອນ ຫຼາຍກວ່າ 100 ລ້ານ ກອກ ຕໍ່ມື້ ເຮັດໃຫ້ເກີດການປ່ອຍສານເຄມີ, ເຮັດໃຫ້ນໍ້າມີສານປົນເປື້ອນ ຈົນກາຍມາເປັນໜຶ່ງໃນບັນຫາ ຂອງສິ່ງແວວລ້ອມ.

ເປັນທີ່ມາເຮັດໃຫ້ນັກວິໄຈ ຂອງມະຫາວິທະຍາໄລ RMIT ປະເທດອົດສະຕາລີ ຄິດຄົ້ນວິທີນີ້ຂື້ນມາ ໂດຍພຽງເອົາກົ້ນຢາສູບ ທີ່ສູບແລ້ວນັ້ນ ມາປະສົມເປັນສ່ວນປະກອບ 1 % ໃນການຜະລິດດິນຈີ່ ນອກຈາກນີ້ຍັງເຮັດໃຫ້ດິນຈີ່ແຮງແຂງຂຶ້ນ ແຖມໃຊ້ພະລັງງານໜ້ອຍກວ່າການຜະລິດທົ່ວໄປ ເພາະການໃຊ້ກົ້ນຢາສູບ 1 % ເຂົ້າການຜະລິດ ສາມາດປະຢັດເວລາໃນການເຜົາດິນຈີ່ໄດ້.

ກົ້ນຢາສູບມີສານເຄມີຫຼາຍກວ່າ 60 ຊະນິດ ດັ່ງນັ້ນການເອົາມາປະກອບໃນການເຮັດດິນຈີ່ເປັນວິທີ ທີ່ດີທີ່ສຸດ ແລະ ໃຊ້ງານໄດ້ແທ້ ແລະ ເປັນການຫຼຸດຜ່ອນຂີ້ເຫຍື້ອໄປນຳ.

ເຫດເກີດຂຶ້ນ ວັນທີ 4 ມິຖຸນາ 2021 ທີ່ຜ່ານມາ ທີ່ແຂວງລຳພູນ,ປະເທດໄທ. ບ່ອນເກີດເຫດເປັນບ້ານ 2 ຊັ້ນ, ພົບສົບຜູ້ເສຍຊີວິດ ອາຍຸ 57 ປີ ເປັນເຈົ້າຂອງບ້ານ ຖືກຍິງດ້ວຍອາວຸດປືນ ຂະໜາດ.38 ທີ່ບໍລິເວນແກ້ມ ແລະ ໜ້າເອິກ ລວມ 3 ນັດ. ສ່ວນຜູ້ກໍ່ເຫດກໍແມ່ນເມຍ ຂອງຜູ້ເສຍຊີວິດເອງ ອາຍຸ 52 ປີ ໄດ້ເຂົ້າມອບໂຕກັບຕຳຫຼວດ ແລະ ສາລະພາບວ່າ ເປັນຄົນຍິງຜູ້ເປັນຜົວ ຈົນເສຍຊີວິດເອງ.

ຈາກການສອບຖາມຜູ້ກໍ່ເຫດ ກໍຄືເມຍຜູ້ເສຍຊີວິດ ໄດ້ເລົ່າວ່າ: ຕົນເອງກັບຜົວນັ້ນ ຢູ່ນຳກັນມາດົນ ຮ່ວມທຸກຮ່ວມສຸກກັນມາຫຼາຍປີ ໂດຍການຄ້າຂາຍຫອມແດງ ຈຶ່ງມີຖານະຂຶ້ນມາເລື້ອຍໆ
ເມື່ອຖານະປ່ຽນໄປ ຜູ້ເປັນຜົວກໍເລີ່ມມີນິໄສເຈົ້າຊູ້ຂຶ້ນ ມັກຫາເລື່ອງຜິດຖຽງກັບຕົນເອງ ແລະ ລູກຕະຫຼອດ. ເຊິ່ງໃນມື້ເກີດເຫດ ຕົນເອງ ແລະ ຜົວຜິດຖຽງກັນຮ້າຍແຮງ ເພາະວ່າຜູ້ເປັນຜົວມາຢົວະເຢີ້ຍ ໂດຍການໂຊຮູບຜູ້ສາວ ງາມໆ ມາອ້າງ ພ້ອມທັງໂຊຂໍ້ຄວາມແຊັດກັນໃນລັກສະນະຊູ້ສາວ, ຕອນນັ້ນ ຕົນເອງໃຈຮ້າຍແຮງ ທົນບໍ່ໄດ້ ເລີຍຈັບປືນມາຍິງຜູ້ເປັນຜົວ ແລະ ຍິງຊໍ້າອີກຈົນເສຍຊີວີດ.

ເບື້ອງຕົ້ນ, ຕຳຫຼວດໄດ້ເກັບພາບບ່ອນເກີດເຫດໄວ້ເປັນຫຼັກຖານ ກ່ອນຈະຄຸມໂຕຜູ້ກໍ່ເຫດໄປສອບສວນຕື່ມ ເພື່ອດຳເນີນຄະດີຕໍ່ໄປ.