ອີງຕາມສູນຂໍ້ມູນຂ່າວສານທາງດ້ານການຄ້າ, ກະຊວງອຸດສາຫະກຳ ແລະ ການຄ້າ ໃຫ້ຮູ້ວ່າ: ໃນປີ 2021 ຜ່ານມາ ສປປ ລາວ ໄດ້ສົ່ງອອກສິນຄ້າໄປຫຼາຍກວ່າ 90 ປະເທດ/ຂົງເຂດ ໃນທົ່ວໂລກ ເຊິ່ງສາມາດບັນລຸໄດ້ຫຼາຍກວ່າ 7.600 ລ້ານໂດລາສະຫະລັດ.

ໃນນັ້ນ, ມີ 12 ປະເທດທີ່ມີມູນຄ່າການສົ່ງອອກສູງກວ່າ 50 ລ້ານໂດລາ ເຊັ່ນ: ປະເທດໄທ, ສປ ຈີນ, ສສ ຫວຽດນາມ, ອົດສະຕາລີ, ກຳປູເຈຍ, ສະວິດເຊີແລນ, ສິງກະໂປ, ຮົງກົງ, ຢີ່ປຸ່ນ, ເຢຍລະມັນ, ອິນເດຍ ແລະ ສ ອາເມລິກາ.

ສຳລັບສິນຄ້າສົ່ງອອກຫຼັກ ທີ່ມີມູນຄ່າສູງສຸດເປັນຕົ້ນແມ່ນ: ໄຟຟ້າ ມີມູນຄ່າປະມານ 2.200 ລ້ານໂດລາສະຫະລັດ, ຄຳປະສົມ ແລະ ຄຳແທ່ງ ປະມານ 962 ລ້ານໂດລາສະຫະລັດ, ເຈ້ຍ ແລະ ເຄື່ອງທີ່ເຮັດດ້ວຍເຈ້ຍ 529 ລ້ານໂດລາສະຫະລັດ, ແຮ່ທອງ ປະມານ 329 ລ້ານໂດລາສະຫະລັດ, ເຍື່ອໄມ້ ແລະ ເສດເຈ້ຍ 297 ລ້ານໂດລາສະຫະລັດ, ຢາງພາລາ 270 ລ້ານໂດລາສະຫະລັດ, ມັນຕົ້ນ 265 ລ້ານໂດລາສະຫະລັດ, ແຮ່ເຫລັກ 243 ລ້ານໂດລາສະຫະລັດ, ໝາກກ້ວຍ 235 ລ້ານໂດລາສະຫະລັດ, ເຄື່ອງນຸ່ງຫົ່ມ ປະມານ 190 ລ້ານໂດລາສະຫະລັດ, ຝຸ່ນ (ປຸຍ) ປະມານ 148 ລ້ານໂດລາສະຫະລັດ, ເຄື່ອງໃຊ້ໄຟຟ້າ ແລະ ອຸປະກອນເຄື່ອງໃຊ້ໄຟຟ້າ ປະມານ 148 ລ້ານໂດລາສະຫະລັດ.

ສ່ວນໂຄງຮ່າງຊິ້ນສ່ວນກ້ອງບັນທຶກພາບ ມີມູນຄ່າປະມານ 122 ລ້ານໂດລາສະຫະລັດ, ເກີບ ປະມານ 109 ລ້ານໂດລາສະຫະລັດ, ນ້ຳຕານ 96 ລ້ານໂດລາສະຫະ ລັດ ແລະ ຊີມັງ ປະມານ 91 ລ້ານໂດລາສະຫະລັດ.

ສິນຄ້າ ທີ່ ສປປ ລາວ ສົ່ງອອກຫຼັກ ເປັນອັນດັບ 1 ແມ່ນ ປະເທດໄທ ມີມູນຄ່າການສົ່ງອອກສູງສຸດເຖິງ 2.800 ລ້ານໂດລາສະຫະລັດ.

ເຊິ່ງສິນຄ້າສົ່ງອອກແມ່ນ ໄຟຟ້າ ມີມູນຄ່າປະມານ 1.900 ລ້ານໂດລາສະຫະລັດ, ມັນຕົ້ນ ປະມານ 219 ລ້ານໂດລາສະຫະລັດ, ໂຄງຮ່າງຊິ້ນສ່ວນກ້ອງບັນທຶກພາບ ປະມານ 122 ລ້ານໂດລາສະຫະລັດ ແລະ ເຄື່ອງໃຊ້ໄຟຟ້າ, ອຸປະກອນເຄື່ອງໃຊ້ໄຟຟ້າ ປະມານ 105 ລ້ານໂດລາສະຫະລັດ ແລະ ຊີມັງ ມີມູນຄ່າປະມານ 91 ລ້ານໂດລາສະຫະລັດ;

ອັນດັບ 2 ແມ່ນສົ່ງໄປ ສປ ຈີນ ມີມູນຄ່າການສົ່ງອອກ ປະມານ 2.200 ລ້ານໂດລາສະຫະລັດ.

ສິນຄ້າສົ່ງອອກແມ່ນ ເຈ້ຍ ແລະ ເຄື່ອງທີ່ເຮັດດ້ວຍເຈ້ຍ ມູນຄ່າປະມານ 482 ລ້ານໂດລາສະຫະລັດ, ຄຳປະສົມ, ຄຳແທ່ງ ປະມານ 349 ລ້ານໂດລາສະຫະລັດ, ແຮ່ທອງ ປະມານ 328 ລ້ານໂດລາສະຫະລັດ, ເຍື່ອໄມ້ ແລະ ເສດເຈ້ຍ ປະມານ 295 ລ້ານໂດລາສະຫະລັດ, ໝາກກ້ວຍ ປະມານ 219 ລ້ານໂດລາສະຫະລັດ, ແຮ່ເຫລັກ ປະມານ 131 ລ້ານໂດລາສະຫະລັດ, ຝຸ່ນ (ປຸຍ) ປະມານ 110 ລ້ານໂດລາສະຫະລັດ ແລະ ຢາງພາລາ ມູນຄ່າປະມານ 89 ລ້ານໂດລາສະຫະລັດ;

ອັນດັບ 3 ແມ່ນ ສສ ຫວຽດນາມ ມູນຄ່າການສົ່ງອອກ ປະມານ 1.200 ລ້ານໂດລາສະຫະລັດ.

ໃນນັ້ນ, ສິນຄ້າສົ່ງອອກຫຼັກເຊັ່ນ: ຢາງພາລາ ມູນຄ່າປະມານ 180 ລ້ານໂດລາສະຫະລັດ, ແຮ່ເຫລັກ ປະມານ 112 ລ້ານໂດລາສະຫະລັດ, ນ້ຳຕານ ປະມານ 83 ລ້ານໂດລາສະຫະລັດ, ໄຟຟ້າ ປະມານ 78 ລ້ານໂດລາສະຫະລັດ, ກາເຟ (ບໍ່ທັນໄດ້ປຸງແຕ່ງ) ປະມານ 48 ລ້ານໂດລາສະຫະລັດ, ມັນຕົ້ນ ປະມານ 46 ລ້ານໂດລາສະຫະລັດ, ແຮ່ຄໍາເຂັ້ມຂຸ້ນ ປະມານ 30 ລ້ານໂດລາສະຫະລັດ ແລະ ຢາສູບ ມູນຄ່າປະມານ 27 ລ້ານໂດລາສະຫະລັດ; ອັບດັບ 4 ແມ່ນສົ່ງອອກ ປະເທດອົດສະຕາລີ ແລະ ອັນດັບ 5 ແມ່ນ ປະເທດກໍາປູເຈຍ.

ແຫຼ່ງຂ່າວ: ຂປລ

ຈຸບິນອະວະກາດເສີນໂຈ່ວ 13 ຂອງຈີນເດີນທາງເຖິງນະຄອນຫຼວງປັກກິ່ງດ້ວຍຄວາມປອດໄພ.

ຕາມຫ້ອງການໂຄງການການບິນອະວະກາດບັນທຸກມະນຸດຂອງຈີນແຈ້ງໃຫ້ຮູ້ວ່າ: ທ່ານ ໄຈຈື້ກ່າງ, ນາງ ຫວາງຢ້າຜິງ ແລະທ່ານ ເຢ້ກວ່າງຟູ້ ນັກບິນອະວະກາດຈີນທີ່ໄດ້ສຳເລັດໜ້າທີ່ການບິນຂອງຍານອະວະກາດບັນທຸກມະນຸດເສີນໂຈ່ວ 13 ຢ່າງຈົບງາມ ໄດ້ເດີນທາງເຖິງນະຄອນຫຼວງປັກກິ່ງຢ່າງປອດໄພດ້ວຍເຮືອບິນສະເພາະວຽກໃນຕອນບ່າຍວັນທີ 16 ເມສາ ຜ່ານມາ.

ຫົວໜ້າແລະສະມາຊິກຂອງກອງບັນຊາການໃຫຍ່ໜ້າທີ່ການບິນອະວະກາດໄລຍະສະຖານີອະວະກາດໄດ້ໄປຕ້ອນຮັບຢູ່ສະໜາມບິນ. ຫຼັງຈາກນັກບິນອະວະກາດ 3 ທ່ານເດີນທາງເຖິງນະຄອນຫຼວງປັກກິ່ງແລ້ວຈະເຂົ້າສູ່ໄລຍະກັກບໍລິເວນທາງການແພດ, ເພື່ອດຳເນີນການກວດກາທາງການແພດແລະການປະເມີນສຸຂະພາບຢ່າງຮອບດ້ານຕໍ່ພວກທ່ານພ້ອມທັງຈັດວາງໃຫ້ພັກຜ່ອນ.

ແຫຼ່ງຂ່າວ: CRI

ຂໍຊົມເຊີຍ! ປະທານອົງການພຸດທະສາສະໜາສໍາພັນລາວ ເມືອງຫ້ວຍຊາຍ ພ້ອມຄະນະ ໄດ້ນໍາເອົາ ເຄື່ອງອຸປະໂພກ -ບໍລິໂພກ ໄປມອບໃຫ້ຄອບຄົວທີ່ຖືກໄຟໄໝ້ເຮືອນ.

ດ້ວຍຄວາມເປັນຫວ່ງເປັນໃຍ ຕໍ່ຄອບຄົວຜູ້ທີ່ປະສົບເຄາະຮ້າຍ ຈາກໄຟໄໝ້ເຮືອນ ປະຊາຊົນ ບ້ານນໍ້າຍອນເກົ່າ ເມືອງຫ້ວຍຊາຍ ແຂວງບໍ່ແກ້ວ ໃນວັນທີ 19 ເມສາ 2022ນິ້: ພຣະອາຈານ ບຸນນໍາ ທໍາມະວົງ ປະທານອົງການພຸດທະສາສະໜາສໍາພັນລາວ ເມືອງຫ້ວຍຊາຍ ພ້ອມຄະນະ ແລະ ພະສົງສາມະເນນ ວັດປ່າອ້ອຍ ໄດ້ນໍາເອົາເຄື່ອງອຸປະໂພກ – ບໍລິໂພກ ແລະ ເຄື່ອງໃຊ້ທີ່ຈໍາເປັນຈໍານວນໜຶ່ງ ຈາກການປຸກລະດົມ ຂອງອອກຕົນສັດທາ ເພື່ອນໍາມາຊ່ວຍເຫຼື່ອ ລວມມີຜ້າເຊື່ອ 2 ຜື້ນ, ມຸ້ງ 1 ຜື້ນ ນໍ້າດື່ມ 10 ແພັກ, ຍໍາໆ 4 ແກັດ, ເຂົ້າສານ 2 ເປົ້າ, ພັດລົມ, ໝໍ້ຈ້າວເຂົ້າ, ກະຕິກນໍ້າຮ້ອນ ຢ່າງລະ 1ໜ່ວຍ ແລະ ສັງກາສີ 30 ແຜນ,ແຜ່ນລົບ 6 ແຜນ,ເຫຼັກຕະປູ 5 ກັບ ລວມມູນຄ່າທັງໝົດ 2 ລ້ານກວ່າກີບ.

ກ່າວມອບເຄື່ອງດັ່ງກ່າວໂດຍແມ່ນ ພຣະອາຈານ ບຸນນໍາ ທໍາມະວົງ ປະທານອົງການພຸດທະສາສະໜາສໍາພັນລາວ ເມືອງຫ້ວຍຊາຍ ຮັບເຄື່ອງດັ່ງກ່າວ ແມ່ນ ປ້າ ນິນ ເຈົ້າຂອງເຮືອນ ທີ່ຖືກໄຟໄໝ້ ເຂົ້າຮ່ວມມີ ທ່ານ ບຸນນອງ ດີທອງສີ ຮອງຫົວໜ້າ ຫ້ອງວ່າການ ເມືອງຫ້ວຍຊາຍ,ມີບັນດາ ຫົວໜ້າ ຫ້ອງການ ແຮງງານ ແລະ ສະຫວັດດີການສັງຄົມເມືອງ ຫ້ວຍຊາຍ ການການຈັດຕັ້ງບ້ານເຂົ້າຮ່ວມ ທ່ານ ທອງພັນ ສີວິເສດ ນາຍບ້ານໆບ້ານນໍ້າຍອນເກົ່າ ໄດ້ສະແດງຄວາມຮູ້ບຸນຄຸນ ແລະ ຂອບໃຈມາຍັງ ທາງປະທານອົງການພຸດທະສາສະໜາສໍາພັນລາວ ພາກສ່ວນທີ່ກ່ຽວຂ້ອງ ທີ່ເຫັນໄດ້ຄວາມສໍາຄັນ ແລະ ເປັນຫວ່ງ ເປັນໃຍ ຕໍ່ຄອບຄົວທີ່ຖືກເຄາະຮ້າຍ ຈາກໄຟໄໝ້ເຮືອນ ໃນເວລາ 2 ໂມງ 30 ນາທີ ຂອງວັນທີ 17 ເມສາ ນິ້ ເຊິ່ງເປັນເຮືອນໄມ້ ແຕ່ໂຊກດີບໍ່ມີຄົນທີ່ໄດ້ຮັບບາດເຈັບ ແຕ່ເຄື່ອງໃຊ້ພາຍໃນເຮືອນ ຕູ້ເຢັນ, ພັດລົມ, ລົດຈັກ 1 ຄັນ, ເຂົ້າເປືອກຫຼາຍກວ່າ 10 ເປົ້າສັງກະສີ 85 ແຜນ ແລະ ເຄື່ອງນຸ່ງຫົ່ມ ເຄື່ອງໃຊ້ປະຈໍາວັນຖືກໄຟໄໝ້ ຈົນໝົດກ້ຽງ ເຈົ້າຂອງເຮືອນຂາດທີ່ຢູ່ອາໃສ ໄປນອນຢູ່ເຮືອນລູກສາວ ປະຈຸບັນທາງການຈັດຕັ້ງບ້ານ ແມ່ນໄດ້ປຸກລະດົມປະຊາຊົນພາຍໃນບ້ານ ດ້ານແຮງງານ ເພື່ອມາປຸກເຮືອນຫຼັງໃໝ່ ໃຫ້ມີບ່ອນຢູ່ອາໃສໂດຍໄວ.

ແຫຼ່ງຂ່າວ: ໜັງສືພິມບໍ່ແກ້ວ Bokeo Newspaper

ຕາມການລາຍງານຂອງສູນຂ່າວສານການແພດສຸຂະສຶກສາ

ຜູ້ຕິດເຊື້ອໃໝ່ເພີ່ມຂຶ້ນເລື້ອຍໆ ຫຼາຍສຸດແມ່ນະຄອນຫຼວງວຽງຈັນ

ລົດສາຍຝົນເກີດອຸບັດເຫດ ເຮັດໃຫ້ລົດໜຸ້ນເຂົ້າໄປຂ້າງທາງ.

ສາຍຝົນ ຫຼື ທຸກຄົນຮູ້ຈັກ ເນັດໄອດໍ້ສາຍບັນເທີງ ທີ່ມັກໂພສຄຣິບວີດີໂອ ເພື່ອສ້າງຄວາມບັນເທິງໃຫ້ຜູ້ຊົມ, ໄດ້ເກີດອຸບັດຕິເຫດ ເຊິ່ງໃນແຟນເພຈ ຂອງ Saiyfon Fangae ໄດ້ໂພສລົງວ່າ:

“ໄປເຮັດບຸນແທ້ໆ ຄືເປັນແບບນີ້ນໍ້ຊີວິດ” ພ້ອມທັງໂພສພາບຂອງສາຍຝົນທີ່ໄດ້ຮັບບາດເຈັບ ແລະ ລົດທີ່ຖືກອຸບັດຕິເຫດ.

ສ່ວນລາຍລະອຽດເພີ່ມເຕີມຂອງອຸບັດຕິເຫດແມ່ນພາຍຫຼັງ.

ຈັງໃດກໍຕາມ ຂໍໃຫ້ສາຍຝົນ ແລະ ທີມງານປອດໄພເດີ້!

ຂໍ້ມູນ ແລະ ຮູບພາບ: Saiyfon fanpage

ໃນວັນທີ 19 ເມສາ ນີ້ ທີ່ສະໂມສອນໃຫຍ່ຫ້ອງວ່າການສູນກາງພັກ ໄດ້ເປີດກອງປະຊຸມວຽກງານກວດກາທົ່ວປະເທດ ຄັ້ງທີ IV ​ສຳ​ລັບກະຊວງ-ອົງການອ້ອມຂ້າງສູນກາງ ໂດຍໃຫ້ກຽດເປັນປະທານກອງປະຊຸມຂອງ ສະຫາຍ ຄໍາພັນ ພົມມະທັດ ກຳມະການກົມການເມືອງສູນກາງພັກ ຄະ​ນະເລຂາທິການສູນກາງພັກ ປະທານຄະນະກວດກາສູນກາງພັກ ປະທານອົງການກວດກາແຫ່ງລັດ ແລະ ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ, ມີບັນດາສະຫາຍຮອງປະທານຄະນະກວດກາສູນກາງພັກ ແລະ ອົງການກວດກາແຫ່ງລັດ, ສະຫາຍກໍາມະການສູນກາງພັກ, ເລຂາຄະນະພັກ, ປະທານກວດກາພັກ-ລັດກະຊວງ-ອົງການອ້ອມຂ້າງສູນກາງ, ບັນດາຄະນະກົມຂອງຄະນະກວດກາສູນກາງພັກ ແລະ ຄະນະຮັບຜິດຊອບຈາກຄະນະກວດກາສູນກາງພັກ, ອົງການກວດກາແຫ່ງລັດ ເຂົ້າຮ່ວມຢ່າງພ້ອມພຽງ.ກອງປະຊຸມ ສະຫາຍ ວິໄລວັນ ບຸດດາຄໍາ ກໍາມະການສໍາຮອງສູນກາງພັກ ຄະນະປະຈໍາພັກ ຮອງປະທານຄະນະກວດກາສູນກາງພັກ ແລະ ອົງການກວດກາແຫ່ງລັດ ໄດ້ຂຶ້ນສະເໜີຮ່າງບົດສະຫຼຸບ-ຕີລາຄາການເຄື່ອນໄຫວວຽກງານກວດກາແຕ່ປີ 2016 ເຖິງປັດຈຸບັນ ແລະ ບາງເນື້ອໃນຕົ້ນຕໍ ສໍາລັບການເຄື່ອນໄຫວແຕ່ນີ້ເຖິງປີ 2026 ທີ່ມີຜົນສໍາເລັດຫຼາຍດ້ານເປັນຕົ້ນແມ່ນ: ກົງຈັກການຈັດຕັ້ງຄະນະກວດກາພັກ-ອົງການກວດກາລັດແຕ່ລະຂັ້ນ ໄດ້ຮັບການປັບປຸງທາງດ້ານການຈັດຕັ້ງ, ພາລະບົດບາດ, ໜ້າທີ່, ສິດ, ສອດຄ່ອງກັບການກໍານົດ ໃນກົດລະບຽບຂອງພັກ, ກົດໝາຍຂອງລັດທີ່ກ່ຽວຂ້ອງ ຊຶ່ງເຮັດໃຫ້ກົງຈັກມີຄວາມເຂັ້ມແຂງ, ພະນັກງານທີ່ເຮັດວຽກກວດກາໄດ້ເພີ່ມຂຶ້ນທາງດ້ານປະລິມານ ແລະ ຄຸນນະພາບກວ່າເມື່ອກ່ອນ ຊຶ່ງປັດຈຸບັນ ມີພະນັກງານກວດກາອາຊີບທັງໝົດ 4.697 ຄົນ ຍິງ 1.532 ຄົນ, ໃນນີ້ ຢູ່ຄະນະກວດກາສູນກາງພັກ ແລະ ອົງການກວດກາແຫ່ງລັດ 304 ຄົນ ຍິງ 104 ຄົນ; ກະຊວງ-ອົງການ 1.130 ຄົນ ຍິງ 408 ຄົນ; ຂັ້ນແຂວງ 554 ຄົນ ຍິງ 181 ຄົນ; ຂັ້ນເມືອງ 1.182 ຄົນ ຍິງ 343 ຄົນ ແລະ ຢູ່ຂະແໜງກວດກາຂອງພະແນກການຂັ້ນແຂວງ 1.527 ຄົນ ຍິງ 496 ຄົນ.

ໃນ​ໄລ​ຍະ​ຜ່ານ​ມາ ຄະນະກວດກາສູນກາງພັກ ໄດ້ສົມທົບກັບຄະນະນໍາກະຊວງ-ອົງການ, ນະຄອນຫຼວງ, ແຂວງ ແລະ ຄະນະກວດກາແຕ່ລະຂັ້ນ ດໍາເນີນການຕິດຕາມ, ກວດກາປົກກະຕິ, ກວດກາຕາມຄຳສັ່ງ, ຕາມການສະເໜີຂອງພົນລະເມືອງ, ໃນນັ້ນອັນພົ້ນເດັ່ນແມ່ນກວດກາບັນຫາໂຄງການລົງທຶນກໍ່ສ້າງພື້ນຖານໂຄງລ່າງ, ການຄຸ້ມຄອງນໍາໃຊ້ທີ່ດິນ, ການຂຸດຄົ້ນ ແລະ ທຸລະກິດໄມ້, ການສຳຫຼວດຂຸດຄົ້ນແຮ່ທາດ ແລະ ອື່ນໆ ນັບແຕ່ປີ 2016 ເຖິງປັດຈຸບັນ ສາມາດກວດກາໄດ້ທັງໝົດ 4.185 ເປົ້າໝາຍ, ພົບເຫັນຜົນເສຍຫາຍທັງໝົດ 8.370 ຕື້ກີບ,​ 50,22 ລ້ານໂດລາ ແລະ 36,89 ລ້ານບາດ;

• ໃນເບື້ອງຕົ້ນສາມາດເກັບກູ້ຄືນມາໃຫ້ລັດໄດ້ 1.782 ຕື້ກີບ, 3,55 ລ້ານໂດລາ,​ 11,16 ລ້ານບາດ; ສະພາບໃນການກວດກາໂຄງການລົງທຶນຂອງລັດ ຕາມແຈ້ງການຂອງຫ້ອງວ່າການສຳນັກງານນາຍົກ ລັດຖະມົນຕີ ສະບັບເລກທີ 130/ຫສນຍ, ສໍາເລັດແລ້ວ 2.004 ໂຄງການ ໃນຈໍານວນ 5.542 ໂຄງການ;
• ໄດ້ດໍາເນີນການຈັດຕັ້ງປະຕິບັດຄໍາສັ່ງເລກທີ 15/ນຍ, ພົບເຫັນການລະເມີດ ແລະ ຜູ້ມີສ່ວນຮ່ວມພົວພັນ 1.119 ຄົນ, ໃນນີ້ ມີພະນັກງານລັດ 127 ຄົນ, ຜູ້ປະກອບການ 246 ຄົນ, ປະຊາຊົນ 746 ຄົນ, ຢຶດໄມ້ໄດ້ 11.351,75 ແມັດກ້ອນ ແລະ 33,17 ໂຕນ, ປັບໃໝ 22,28 ຕື້ກີບ, ພົບເຫັນການຄ້າງມອບພັນທະ ແລະ ຄ້າງຊໍາລະຄ່າໄມ້ໃຫ້ລັດ 121.120.861 ແມັດກ້ອນ ມູນຄ່າ 66,57 ຕື້ກີບ ແລະ 4,87 ລ້ານໂດລາ;
• ການຄົ້ນຄວ້າຄໍາຮ້ອງ-ຄໍາສະເໜີຂອງພົນລະເມືອງ ທີ່ມີຕໍ່ການຈັດຕັ້ງພັກ, ອົງການບໍລິຫານລັດ, ການປະຕິບັດໜ້າທີ່ຂອງສະມາຊິກພັກ-ພະນັກງານ ນັບແຕ່ປີ 2016 ເຖິງປັດຈຸບັນ ໄດ້ຮັບຄໍາຮ້ອງຄໍາສະເໜີທັງໝົດ 5.568 ສະບັບ,
• ໃນນັ້ນ ໄດ້ນໍາພາຊີ້ນໍາຄົ້ນຄວ້າພິຈາລະນາແກ້ໄຂແລ້ວ 1.685 ສະບັບ, ສົ່ງໃຫ້ພາກສ່ວນອື່ນແກ້ໄຂ 1.911 ສະບັບ, ແຈ້ງຕອບພາກສ່ວນທີ່ກ່ຽວຂ້ອງ 204 ສະບັບ, ເກັບມ້ຽນຕິດຕາມ 286 ສະບັບ, ສືບຕໍ່ຄົ້ນຄວ້າ 1.482 ສະບັບ, ຄໍາຮ້ອງ-ຄໍາສະເໜີທີ່ພົ້ນເດັ່ນກວ່າໝູ່ ແມ່ນ: ຂໍ້ຂັດແຍ່ງກ່ຽວຂ້ອງກັບທີ່ດິນ, ເຮືອນ, ການດໍາເນີນທຸລະກິດ, ຄວາມບໍ່ພໍໃຈຕໍ່ຂະບວນການສືບສວນ-ສອບສວນ ຫຼື ການປະຕິບັດຄໍາຕັດສິນຂອງສານ, ພ້ອມທັງບັນຫາການລົງວິໄນຕໍ່ພະນັກງານ-ສະມາຊິກພັກ ແລະ ບັນຫາອື່ນໆ.
• ນອກນີ້ກອງປະຊຸມຍັງໄດ້ເຜີຍແຜ່ບົດແນະນໍາຂອງຄະນະກວດກາສູນກາງພັກ ເລກທີ 194/ຄກສພ, ລົງວັນທີ 8 ຕຸລາ 2021 ວ່າດ້ວຍການຈັດຕັ້ງປະຕິບັດກົດລະບຽບຂອງພັກ ສະໄໝທີ XI ກ່ຽວກັບວຽກງານຕິດຕາມ, ກວດກາຂອງພັກ, ຄະນະກວດກາພັກ, ຄະນະວິໄນຂອງພັກແຕ່ລະຂັ້ນ;
• ເຜີຍແຜ່ມະຕິຕົກລົງ ຂອງກົມການເມືອງສູນກາງພັກ ສະບັບເລກທີ 03/ກມສພ, ​ລົງວັນທີ 19 ມັງກອນ 2021,​ ວ່າດ້ວຍການຈັດຕັ້ງ ແລະ ການເຄື່ອນໄຫວຂອງຄະນະກວດກາສູນກາງພັກ;
• ເຜີຍແຜ່ມະຕິຂໍ້ຕົກລົງ ຂອງອົງການກວດກາແຫ່ງລັດ ສະບັບ ເລກທີ 29/ອກຫລ,​ ລົງວັນທີ 24 ກຸມພາ 2022, ​ວ່າດ້ວຍການຈັດຕັ້ງ ແລະ ການເຄື່ອນໄຫວຂອງອົງການກວດກາແຫ່ງລັດ ແລະ ຕ້ານການສໍ້ລາດບັງຫຼວງ.
• ຫຼັງຈາກໄດ້ຮັບຟັງການຜ່ານເອກະສານຕ່າງໆແລ້ວ ຜູ້ແທນກອງປະຊຸມແຕ່ລະພາກສ່ວນກໍໄດ້ຜັດປ່ຽນກັນຂຶ້ນປະກອບຄຳເຫັນຕໍ່ດ້ານທີ່ຕັ້ງໜ້າ, ດ້ານອ່ອນຂໍ້ຄົງຄ້າງໃນການເຄື່ອນໄຫວວຽກງານກວດກາພັກ-ລັດໃນໄລຍະຜ່ານມາ ແລະ ບັນດາວິທີແກ້ໄຂໃນຕໍ່ໜ້າຕື່ມອີກ.

ແຫຼ່ງຂ່າວ: ປະຊາຊົນ

ເພື່ອເປັນການສະກັດກັ້ນ ແລະ ແກ້ໄຂບັນຫາການເກີດອຸບັດຕິເຫດໃຫ້ຫຼຸດຫນ້ອຍຖອຍລົງ ໃນຊ່ວງ ໄລຍະສະເຫຼີມສະຫຼອງບຸນປີໃຫມ່ລາວ ພສ 2565 ພະແນກຕໍາຫຼວດຈະລາຈອນ ນະຄອນຫຼວງວຽງຈັນ ຈຶ່ງ ໄດ້ຊີ້ນໍາ-ນໍາພາກໍາລັງຕໍາຫຼວດຈະລາຈອນແຕ່ລະເມືອງ ລົງຕັ້ງຈຸດກວດກາຕອນກາງເວັນ ແລະ ກາງຄືນ ຢູ່ ຕາມເສັ້ນທາງທົ່ວນະຄອນຫຼວງວຽງຈັນ ເລີ່ມແຕ່ວັນທີ 11-17 ເມສາ 2022 ທັງຫມົດມີ 8 ຈຸດ ແລະ ຕັ້ງ ຈຸດກວດກາກາງຄືນເພີ່ມອີກ 3 ຈຸດ ພົບເຫັນຜູ້ຂັບຂີ່ລະເມີດກົດລະບຽບຈະລາຈອນ ທັງຫມົດ 2.166 ຄົນ ຍິງ 562 ຄົນ.

ພັທ ສັງຄົມ ຍົມມະລາດ ຮອງຫົວຫນ້າພະແນກຕໍາຫຼວດຈະລາຈອນ ນວ ກ່າວວ່າ:

ໃນຊ່ວງໄລຍະສະເຫຼີມສະຫຼອງບຸນປີໃຫມ່ລາວ ພສ 2565, ພວກເຮົາໄດ້ລົງຕັ້ງຈຸດກວດກາຕອນກາງ ເວັນ ແລະ ກາງຄືນ ທົ່ວນະຄອນຫຼວງວຽງຈັນ ທັງຫມົດ 8 ຈຸດ ແລະ ໄດ້ຕັ້ງຈຸດກວດກາກາງຄືນເພີ່ມອີກ 3 ຈຸດ ຄື:

ພະແນກຕໍາຫຼວດຈະລາຈອນ ມີຈຸດເສັ້ນທາງ 13 ໃຕ້ ຫຼັກ 16 ແລະ ຈຸດເສັ້ນທາງ ເມືອງສັງທາງ ເຂດບ້ານອ່າງໃຫຍ່

• ກອງຕໍາຫຼວດຈະລາຈອນ ເມືອງນາຊາຍທອງ ຢູ່ເສັ້ນທາງ 13 ເຫນືອ ເຂດບ້ານຫນອງບຶກ
• ກອງຕໍາຫຼວດຈະລາຈອນ ເມືອງໄຊທານີ ຢູ່ເສັ້ນທາງເລກ 10 ເຂດ ບ້ານໂພນໄຮຄໍາ
• ກອງຕໍາຫຼວດຈະລາຈອນ ເມືອງປາກງື່ມ ຢູ່ເສັ້ນທາງເລກ 13 ໃຕ້ ເຂດບ້ານສົມສະຫວາດ
• ກອງຕໍາຫຼວດຈະລາຈອນ ເມືອງສັງທອງ ຢູ່ເສັ້ນທາເລກ 11 ເຂດບ້ານປາກຕອນ
• ກອງຕໍາຫຼວດຈະລາຈອນ ເມືອງຫາດຊາຍຟອງ ຢູ່ຫນ້າສວນວັດທະນະທໍາ
• ກອງຕໍາຫຼວດຈະລາຈອນ ເມືອງສີສັດຕະນາກ ຢູ່ຖະຫນົນກໍາແພງເມືອງ ເຂດບ້ານດອນກອຍ
• ກອງຕໍາຫຼວດຈະລາຈອນ ເມືອງສີໂຄດຕະບອງ ຢູ່ເສັ້ນທາງເຕ 2 ຫນ້າສວນສີໂຄດ
• ກອງຕໍາຫຼວດຈະລາຈອນເມືອງຈັນທະບູລີ ຢູ່ເສັ້ນທາງເຂດບ້ານທົ່ງຕູມ
• ກອງຕໍາຫຼວດຈະລາຈອນ ເມືອງໄຊເສດຖາ ທາງ 450 ປີ ຢູ່ເສັ້ນທາງເຂດບ້ານນາຄວາຍ

• ຜ່ານການຈັດຕັ້ງປະຕິບັດ ພົບເຫັນຜູ້ລະເມີດກົດລະບຽບຈະລາຈອນ ທັງຫນົດ 2.166 ຄົນ ຍິງ 562 ຄົນ, ສຶກສາອົບຮົມໄດ້ 928 ຄົນ ຍິງ 346 ຄົນ, ຂຽນໃບສັ່ງທັງຫມົດ 154 ໃບ, ກັກເອກະສານລົດ 154 ໃບ.
• ເຈົ້າຫນ້າທີ່ປະຈໍາປ້ອມ ມີ 60 ປ້ອມ ພົບເຫັນຜູ້ລະເມີດທັງຫນົດ 156 ຄົນ ຍິງ 53 ຄົນ, ສຶກສາ ອົບຮົມ 147 ຄົນ ຍິງ 52 ຄົນ, ຂຽນໃບສັ່ງ 9 ຄົນ ຍິງ 1 ຄົນ.
• ອອກກວດກາຈັດລະບຽບຕາມເສັ້ນທາງ, ສະຖານທີ່ຊາຊົນ ລວມທັງຫມົດ 21 ຄັ້ງ ພົບເຫັນຜູ້ລ່ວງ ລະເມີດທັງຫນົດ 251 ຄົນ ຍິງ 56 ຄົນ, ສຶກສາອົບຮົມ 239 ຄົນ ຍິງ 56 ຄົນ, ຂຽນໃບສັ່ງ 12 ຄົນ.
• ອອກກວດກາການສັນຈອນກາງເວັນ ແລະ ກາງຄືນ ທັງຫນົດມີ 64 ຄັ້ງ ພົບເຫັນຜູ້ລະເມີດທັງຫນົດ 1.384 ຄົນ ຍິງ 372 ຄົນ, ສຶກສາອົບຮົມ 1.315 ຄົນ ຍິງ 366 ຄົນ, ຂຽນໃບສັ່ງ 69 ຄົນ.
• ອອກກວດກາຈັບຄວາມໄວທັງຫນົດ 7 ຄັ້ງ ຈັບຄວາມໄວເກີນ 370 ຄັນ, ສຶກສາອົບຮົມກ່າວເຕືອນ 306 ຄົນ ຍິງ 69 ຄົນ, ຂຽນໃບສັ່ງ 64 ຄົນ.

ແຫຼ່ງຂ່າວ: ຄວາມສະຫງົບ