ວັນທີ 10 ມີນາ 2022 ຜ່ານມາ, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ແຫ່ງ ສປປ ລາວ ພ້ອມດ້ວຍບັນດາຮອງລັດຖະມົນຕີກະຊວງທີ່ກ່ຽວຂ້ອງ ໄດ້ເຄື່ອນໄຫວເຮັດວຽກຢູ່ແຂວງຄຳມ່ວນ ໂດຍມີທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ, ບັນດາທ່ານການນຳຂອງແຂວງ, ຫົວໜ້າພະແນກການອ້ອມຂ້າງແຂວງ ຮ່ວມຕ້ອນຮັບ.

ໂອກາດນີ້ທ່ານຮອງນາຍົກ ພ້ອມດ້ວຍຄະນະ ແລະ ການນຳຂອງແຂວງຄຳມ່ວນ ກໍ່ໄດ້ລົງຕິດຕາມ ເບິ່ງຄວາມຄືບໜ້າຂອງການກໍ່ສ້າງໂຮງຮຽນມັດທະຍົມວິຊາຊີບ ຕົວແບບ ມິດຕະພາບ ລາວ-ຫວຽດນາມ ຢູ່ທີ່ບ້ານສອງເໝືອງ ເມືອງໜອງບົກ ໂດຍໄດ້ຮັບທຶນໃນການກໍ່ສ້າງ ຈາກຂອງຂວັນປະທານປະເທດ ສສ ຫວຽດນາມ ມູນຄ່າ 5 ລ້ານໂດລາສະຫະລັດ ເພື່ອຕອບສະໜອງການຝຶກອົບຮົມວິຊາຊີບ ໃນລະດັບ 1+3 ໃຫ້ແກ່ນັກຮຽນມັດທະຍົມຕອນປາຍ ແລະ ຜູ້ຫວ່າງງານ, ຜູ້ດ້ອຍໂອກາດ ລວມທັງ ແຮງງານລາວ ທີ່ກັບມາຈາກປະເທດໃກ້ຄຽງ ໃນຊ່ວງການແຜ່ລະບາດຂອງພະຍາດໂຄວິດ-19 ໂດຍມີເປົ້າໝາຍ ພາຍໃນ 5 ສາຂາວິຊາຊີບ ເຊັ່ນ:

ຕິດຕັ້ງ-ສ້ອມແປງເຄື່ອງໃຊ້ໄຟຟ້າ, ສ້ອມແປງເຄື່ອງຈັກນ້ອຍທົ່ວໄປ, ກໍ່ສ້າງເຄຫາ ສະຖານ, ດ້ານກະສິກຳ (ປູກຝັງ-ລ້ຽງສັດ) ແລະ ປຸງແຕ່ງຜະລິດຕະພັນດ້ານກະສິກຳ. ເຊິ່ງໂຄງການແມ່ນໄດ້ເລີ່ມລົງມື ຈັດຕັ້ງປະຕິບັດໃນເດືອນມັງກອນ 2022 ມາຮອດປະຈຸບັນແມ່ນມີຄວາມຄືບໜ້າແລ້ວປະມານ 13% ແລະ ຄາດວ່າຈະໃຫ້ສຳເລັດໃນການກໍ່ສ້າງພາຍໃນໄລຍະເວລາ 11 ເດືອນ ຕາມແຜນຂອງໂຄງການ. ພ້ອມດຽວກັນ ທ່ານຮອງນາຍົກ ຍັງໄດ້ລົງພົບປະກັບພໍ່ແມ່ປະຊາຊົນ ແລະ ຮ່ວມພິທີການ ມອບ-ຮັບ ໂຄງການກໍ່ສ້າງປ້ອງກັນ ຕາຝັ່ງເຈື່ອນ ຂອງແມ່ນໍ້າເຊບັ້ງໄຟ ຢູ່ບ້ານນາວາງໃຫຍ່ (ເຂດວັດຕຸ້ມພະວັງ) ເມືອງໜອງບົກ ເຊິ່ງມີຄວາມຍາວ 300 ແມັດ ໂດຍໄດ້ສຳເລັດໃນເດືອນກໍລະກົດ 2021 ຜ່ານມາ ໃຊ້ໄລຍະເວລາໃນການກໍ່ສ້າງ 3 ເດືອນ ໂດຍແມ່ນບໍລິສັດ ດີເອັມ ຈຳກັດຜູ້ດຽວ ເປັນຜູ້ຮັບເໝົາ ລວມມູນຄ່າ 7,9 ຕື້ກວ່າກີບ.

ໂອກາດນີ້ ທ່ານຮອງນາຍົກລັດຖະມົນຕີ ກໍ່ໄດ້ໂອ້ລົມ ໂດຍເນັ້ນໃຫ້ອຳນາດການປົກຄອງ ແລະ ພໍ່ແມ່ ປະຊາຊົນບ້ານນາວາງໃຫຍ່ ສືບຕໍ່ເອົາໃຈໃສ່ການຜະລິດກະສິກຳ ປູກຝັງ-ລ້ຽງສັດ ໃຫ້ແຂງແຮງ ເພື່ອກາຍ ເປັນສິນຄ້າ ສ້າງລາຍຮັບໃຫ້ແກ່ຄອບຄົວໃຫ້ສູງຂຶ້ນ ໂດຍມອບໃຫ້ຂະແໜງການກ່ຽວຂ້ອງຂອງແຂວງ, ຂອງເມືອງ ລົງຊຸກຍູ້ທາງດ້ານເຕັກນິກວິຊາການ, ວິທີການ, ຂັ້ນຕອນໃນການຜະລິດ ລວມເຖິງການຊອກຫາຕະຫຼາດຮອງຮັບ ຜົນຜະລິດຂອງພໍ່ແມ່ປະຊາຊົນ, ສືບຕໍ່ປັບປຸງວຽກງານກໍ່ສ້າງຮາກຖານການເມືອງຢູ່ໃນຂັ້ນບ້ານໃຫ້ມີຄວາມແຂງແຮງ, ຍູ້ແຮງທາງດ້ານການພັດທະນາເສດຖະກິດ ແກ້ໄຂຊີວິການເປັນຢູ່ຂອງຄອບຄົວໃຫ້ດີຂຶ້ນ, ເອົາໃຈໃສ່ປັບປຸງລະບົບ ການຈັດຕັ້ງ, ການຄຸ້ມຄອງບ້ານ ໃຫ້ມີຄວາມໜັກແໜ້ນ ເພື່ອນຳພາບໍລິຫານບ້ານໃຫ້ມີຄວາມເຂັ້ມແຂງ, ສືບຕໍ່ ເອົາໃຈໃສ່ຕໍ່ວຽກງານປ້ອງກັນຊາດ-ປ້ອງກັນຄວາມສະຫງົບ ໂດຍສະເພາະແມ່ນການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ເພື່ອບໍ່ໃຫ້ຊາວໜຸ່ມ-ໄວໜຸ່ມ ລູກຫຼານ ທີ່ເປັນອະນາຄົດໜໍ່ແໜງຂອງຊາດ ໄດ້ຖືກເບືອເມົາດ້ວຍຢາເສບຕິດ. ໂອກາດຽວກັນນີ້ທ່ານຮອງນາຍົກ ຍັງໄດ້ມອບເງິນຈຳນວນໜຶ່ງໃຫ້ແກ່ ບ້ານນາວາງໃຫຍ່ ເພື່ອຊຸກຍູ້ບໍລິຫານວຽກງານພາຍໃນບ້ານໃຫ້ມີຄວາມສະດວກຂຶ້ນ.

ແຫຼ່ງຂ່າວ: Khammouane News

ພາຍຫຼັງທີ່ມີຂ່າວອອກມາວ່າຈະມີການປັບຂຶ້ນຄ່າແຮງຂັ້ນຕໍ່າຈາກ 1,1 ລ້ານເປັນ 1,5 ລ້ານກີບ ຕໍ່ຄົນຕໍ່ເດືອນ ແລະ ຈະປະຕິບັດນັບແຕ່ວັນທີ 1 ພຶດສະພາ 2022 ເປັນຕົ້ນໄປ; ຢ່າງໃດກໍຕາມ, ເລື່ອງນີ້ຍັງຈະຕ້ອງລໍຖ້າລັດຖະບານພິຈາລະນາຄືນໃຫມ່ອີກຄັ້ງຫຼັງຈາກທີ່ສະພາການຄ້າ ແລະ ອຸດສາຫະກໍາແຫ່ງຊາດລາວສະເຫນີຂໍເລື່ອນ.

ຈາກບັນຫາຄ່າຄອງຊີບທີ່ຖີບຕົວສູງຂຶ້ນຊຶ່ງມາຈາກຫຼາຍປັດໄຈຊຶ່ງກະທົບຕໍ່ຊີວິດການເປັນຢູ່ຂອງທົ່ວສັງຄົມຢ່າງຫຼີກລ່ຽງບໍ່ໄດ້, ຕໍ່ຫນ້າສະພາບເຂົ້າຍາກຫມາກແພງ; ອົງການ3ຝ່າຍ (ສູນກາສະຫະພັນກໍາມະບານລາວ, ກະຊວງແຮງງານ ແລະ ສະຫວັດດີການສັງຄົມ,ສະພາການຄ້າ ແລະ ອຸດສາຫະກໍາແຫ່ງຊາດລາວ) ທີ່ມີ ບົດບາດຄຸ້ມຄອງ,ປົກປ້ອງ ແລະ ພັດທະນາແຮງງານລາວ, ກໍ່ມີຄວາມເປັນຫ່ວງເປັນໃຍຈຶ່ງໄດ້ມີການຫາລື 3 ຝ່າຍມາແລ້ວຫຼາຍຄັ້ງເພື່ອສະເຫນີປັບຂຶ້ນຄ່າແຮງຂັ້ນ ຕ່ໍາ, ຫຼ້າສຸດ,ເລື່ອງນີ້ກໍ່ເປັນຫນຶ່ງໃນຫົວຂໍ້ສໍາຄັນຂອງກອງປະຊຸມ 3 ຝ່າຍກ່ຽວກັບວຽກງານສາຍພົວພັນແຮງງານ ຄັ້ງທີ 19 ຊຶ່ງຈັດຂຶ້ນເມື່ອວັນທີ 4 ມີນາ 2022 ທີ່ ນະຄອນຫຼວງວຽງຈັນ, ໂດຍການເປັນປະທານຂອງທ່ານ ນາງ ໃບຄໍາ ຂັດທິຍະ, ລັດຖະມົນຕີກະຊວງແຮງງານແລະສະຫວັດດີການສັງຄົມ (ຮສສ). ທ່ານ ນາງອາລີ ວົງຫນໍ່ບຸນທໍາ, ປະທານຄະນະບໍລິຫານສູນກາງສະຫະພັນກໍາມະບານລາວ ແລະທ່ານ ວັນທອງ ສິດທິກຸນ, ຮອງປະທານສະພາການຄ້າ ແລະ ອຸດສາຫະກໍາ ແຫ່ງຊາດລາວ.

ທັງນີ້, ມີຫຼາຍບັນຫາທີ່ກອງປະຊຸມໄດ້ນໍາຂຶ້ນປຶກສາຫາລື, ໂດຍສະເພາະກໍແມ່ນຊ່ອງທາງເພື່ອນໍາໄປສູ່ການຊ່ວຍເຫຼືອແຮງງານລາວທີ່ພວມປະສົບບັນຫາຢຸດຈ້າງ. ງານເພາະຫຼາຍກິດຈະການຕ້ອງປິດຕົວລົງຈາກຜົນກະທົບໂຄວິດ-19. ເຮັດໃຫ້ອັດຕາຫວ່າງງານເພີ່ມຂຶ້ນຈາກ 9,7% ມາເປັນ 21,8% ໃນປີ2021.

ທີ່ສໍາຄັນແມ່ນລັດຖະມົນຕີ ຮສສ ກໍ່ໄດ້ກ່າວເຖິງການຄົ້ນຄວ້າພິຈາລະນາປັບປຸງຄ່າແຮງງານຂັ້ນຕ່ໍາ, ໂດຍລະບຸວ່າ ໄດ້ມອບໃຫ້ແຕ່ລະຝ່າຍນໍາໄປຄົ້ນຄວ້າເຖິງຄວາມ ເປັນໄປໄດ້. ຊຶ່ງເບື້ອງຕົ້ນກໍຄາດການວ່າຈະປັບຂຶ້ນໃນວັນທີ 1 ພຶດສະພາປີນີ້, ຢ່າງໃດກໍຕາມ, ເນື່ອງຈາກເງື່ອນໄຂ ແລະ ຄວາມພ້ອມຕ່າງໆຍັງບໍ່ທັນອໍານວຍ, ດັ່ງນັ້ນສະພາການຄ້າ ແລະອຸດສາຫະກໍາແຫ່ງຊາດລາວຈຶ່ງສະເຫນີຂໍເລື່ອນການປັບຂຶ້ນຄ່າແຮງງານ ໄປເປັນວັນທີ 1 ພຶດສະພາ 2023, ແຕ່ນັ້ນກໍເປັນພຽງຂໍ້ສະຫຼຸບທີ່ຍັງຕ້ອງລໍຖ້າການພິຈາລະນາຄືນອີກຄັ້ງຂອງລັດຖະບານ. ຄ່າແຮງຂັ້ນຕໍ່າທີ່ຈ່າຍກັນຢູ່ໃນປັດຈຸບັນ, ແມ່ນປະຕິບັດມາໄດ້3ປີກວ່າແລ້ວ,ນັບຈາກການປັບປຸງຄັ້ງທີ 8 ເມື່ອປີ 2018 ຊຶ່ງປັບຂຶ້ນ 2ແສນກີບ ຈາກ 9 ແສນກີບເປັນ 1,1 ລ້ານກີບຕໍ່ຄົນຕໍ່ເດືອນ.

ແຫຼ່ງຂ່າວ: ເສດຖະກິດສັງຄົມ

ຫ້ອງວ່າການ ແລະ ວິທະຍາຄານຕຳຫຼວດປະຊາຊົນ (ວຕປ) ປະກາດເລື່ອນຊັ້ນໃຫ້ນາຍຕຳຫຼວດທີ່ມີຜົນງານດີເດັ່ນ.

ຕາມການລາຍງານ ຂອງປ້ອງກັນຄວາມສະຫງົບໃຫ້ຮູ້ວ່າ: ຫ້ອງວ່າການ ແລະ ວິທະຍາຄານຕຳຫຼວດປະຊາຊົນ (ວຕປ) ກະຊວງ ປກສ ໄດ້ປະກາດເລື່ອນຊັ້ນໃຫ້ນາຍຕຳຫຼວດ ທີ່ມີຜົນງານດີເດັ່ນ ແລະ ຄົບມາດ ຖານເງື່ອນໄຂໃນການເລື່ອນຊັ້ນ, ປະດັບຊັ້ນແຕ່ລະພາກສ່ວນໂດຍ ພົຕ ສົມວັນ ສາຍລ້ອງພາ ຫົວໜ້າຫ້ອງວ່າການກະຊວງ ປກສ ແລະ ພັອ ຄໍາພັດ ສາລິວອນ ຮອງຫົວໜ້າອຳນວຍການ ວຕປ, ມີບັນດາຄະນະພັກ-ຄະນະບັນຊາ ແລະ ພະ ນັກງານ-ນັກຮົບ ເຂົ້າຮ່ວມ.

ຫ້ອງວ່າການ ກະຊວງ ປກສ ໄດ້ຈັດຂຶ້ນໃນວັນທີ 10 ມີນາ 2022 ມີຈຳນວນ ນາຍຕຳຫຼວດທີ່ໄດ້ຮັບການເລື່ອນຊັ້ນ 21 ສະຫາຍ ຍິງ 5 ສະຫາຍ; ໃນນີ້, ມີ ພັນຕີ ຂຶ້ນ ພັນໂທ 3 ສະຫາຍ, ຮ້ອຍເອກ ຂຶ້ນ ພັນຕີ 9 ສະຫາຍ ຍິງ 2 ສະ ຫາຍ ແລະ ຮ້ອຍໂທ ຂຶ້ນ ຮ້ອຍເອກ 9 ສະ ຫາຍ ຍິງ 3 ສະຫາຍ; ພ້ອມທັງ, ຜ່ານຂໍ້ຕົກລົງ ຂອງກະຊວງ ປກສ ວ່າດ້ວຍການແຕ່ງຕັ້ງນາຍຕຳຫຼວດທີ່ຂຶ້ນກັບຫ້ອງວ່າການ; ໃນນີ້, ໄດ້ແຕ່ງ ຕັ້ງ ພັອ ວິໄລຄຳ ສີຊານົນ ເປັນຫົວ ໜ້າກົມນິຕິກຳ ແລະ ກົດໝາຍ ແລະ ພັທ ຄຳຜູ ຈັນທະລາສີ ເປັນຮອງຫົວໜ້າກົມທີ່ຂຶ້ນກັບຫ້ອງວ່າການກະຊວງ ປກສ.

ສຳລັບ ວຕປ ໄດ້ຈັດຂຶ້ນໃນວັນທີ 7 ມີນາ 2022, ມີຈຳນວນ 13 ສະຫາຍ ຍິງ 4 ສະຫາຍ; ໃນນີ້, ເລື່ອນຊັ້ນ ພັນຕີ ຂຶ້ນ ພັນໂທ 3 ສະຫາຍ ຍິງ 1 ສະຫາຍ, ຮ້ອຍເອກ ຂຶ້ນ ພັນຕີ 2 ສະຫາຍ ແລະ ຮ້ອຍໂທ ຂຶ້ນ ຮ້ອຍເອກ 8 ສະຫາຍ ຍິງ 3 ສະຫາຍ.

ໃນວັນທີ 10 ມີນາ 2022 ນີ້ ຢູ່ທີ່ຫ້ອງປະຊຸມພະແນກແຮງງານສະຫວັດດີການ-ສັງຄົມແຂວງ ໄດ້ມີພິທີມອບເງິນນະໂຍບາຍອຸດໜູນເທື່ອດຽວ ໃຫ້ແກ່ຜູ້ເສຍສະ ຫລະຊີວິດໃນປາງສົງຄາມ ປະຈໍາປີ 2020 ແລະ ປີ 2021. ໂດຍການເຂົ້າຮ່ວມຂອງທ່ານ ບຸນຮຽນ ແກ້ວບົວພາດ ຮອງເລຂາພັກແຂວງອັດຕະປື, ມີທ່ານ ນາງ ອໍາຄາ ສີຫາລາດ ຫົວໜ້າພະແນກແຮງງານສະຫວັດດີການ ແລະສັງຄົມແຂວງ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ທ່ານ ໄຊຍະລາດ ຊຸມພົນພັກດີ ຮອງຫົວໜ້າພະ ແນກ ແຮງງານສະຫວັດດີການ ແລະ ສັງຄົມແຂວງ ໄດ້ຂື້ນຜ່ານຂໍ້ຕົກລົງຂອງທ່ານເຈົ້າແຂວງວ່າການດ້ວຍຕົກລົງອະ ນຸມັດຈ່າຍເງິນນະໂຍບາຍອຸດຫນູນຜູ້ເສຍຊີວິດໃນປາງສົງຄາມ ປະຈຳປີ 2020 ແລະ ປີ2021ຈຳນວນ 23 ທ່ານ, ຍິງ 1 ທ່ານ, ໃນນັ້ນ; ໄດ້ມອບນະໂຍບາຍອຸດໝູນເທື່ອດຽວຜູ້ທີ່ຍັງມີຊີວິດຢູ່ປີ 2020 ມີ 1 ທ່ານ, ປີ 2021 ມີ 5 ທ່ານ, ອຸດໝູນຜູ້ເສຍສະຫລະຊີວິດໃນປາງສົງຄາມງວດ lll ປີ 2021 ມີ 18 ທ່ານ, ຍິງ 1 ທ່ານ, ລວມເປັນເງິນທັງໝົດ 513.982.125 ກີບ.

ເງິນດັ່ງກ່າວແມ່ນໄດ້ມອບ-ຮັບ ໃຫ້ສາຍຍາດພີ່ນ້ອງ,ລູກຫລານຜູ້ສືບທອດ ຢ່າງເປັນທາງການ ແລະ ໃຫ້ກຽດກ່າວມອບຂອງທ່ານ ບຸນຮຽນ ແກ້ວບົວພາດ ຮອງເລຂາພັກແຂວງ.

ແຫຼ່ງຂ່າວ: ປະເທດລາວ

ກອງປະຊຸມຜູ້ບໍລິຫານການສຶກສາ ແລະ ກິລາ ປະຈຳປີ 2021 ໄດ້ໄຂຂຶ້ນຢ່າງເປັນທາງການ ໃນຕອນເຊົ້າວັນທີ 10 ມີນາ 2022 ທີ່ຫ້ອງປະຊຸມກະຊວງສຶກສາທິການ ແລະ ກິລາ (ຕຶກໄອຊີທີ) ນະຄອນຫຼວງວຽງຈັນ, ໂດຍພາຍໃຕ້ການເປັນປະທານຂອງທ່ານ ຮສ.ປອ ພຸດ ສິມມາລາວົງ ກຳມະການສູງກາງພັກ, ເລຂາພັກ, ລັດຖະມົນຕີ ກະຊວງສຶກສາທິການ ແລະ ກິລາ, ມີທ່ານ ນາງ ມະນີວັນ ເຢຍປາວເຮີ ຮອງປະທານກຳມາທິການວັດທະນະທຳ-ສັງຄົມ ສະພາແຫ່ງຊາດ ພ້ອມດ້ວຍບັນດາຮອງລັດຖະມົນຕີ ສສກ, ຫົວໜ້າກົມ, ຮັກສາການກົມ, ຕາງໜ້າຫ້ອງວ່າການສຳນັກງານນາຍົກລັດຖະມົນຕີ ແລະ ກະຊວງ ຕະຫຼອດຮອດຜູ້ບໍລິຫານການສຶກສາ ແລະ ກິລາ ທີ່ຢູ່ຂັ້ນສູນກາງ ແລະ ທ້ອງຖິ່ນໃນຂອບເຂດທົ່ວປະເທດ ທີ່ເຂົ້າຮ່ວມແບບເຊິ່ງໜ້າ ແລະ ຜ່ານລະບົບທາງໄກ.

ການຈັດກອງປະຊຸມຄັ້ງນີ້, ແມ່ນເພື່ອເປັນການທົບທວນຄືນການຈັດຕັ້ງປະຕິບັດແຜນພັດທະນາການສຶກສາ ແລະ ກິລາ ປີ 2021 ໃນທ່າມກາງທົ່ວຂະແໜງການສຶກສາ ແລະ ກິລາທົ່ວປະເທດ ພວມຜັນຂະຫຍາຍວາລະແຫ່ງຊາດ ວ່າດ້ວຍການແກ້ໄຂບັນຫາຫຍຸ້ງຍາກດ້ານເສດຖະກິດ-ການເງິນ ແລະ ແກ້ໄຂບັນຫາຢາເສບຕິດໃນສະພາບແວດລ້ອມທີ່ມີການແຜ່ລະບາດຂອງພະຍາດໂຄວິດ-19 ແລະ ປະກອບສ່ວນຢ່າງຕັ້ງໜ້າເຂົ້າໃນການສ້າງການຫັນປ່ຽນໃໝ່ຢ່າງແຂງແຮງ, ເລິກເຊິ່ງ ແລະ ຮອບດ້ານໃນວຽກງານການສຶກສາ, ວິທະຍາສາດ ແລະ ກິລາໃຫ້ປະສົບຜົນສຳເລັດຢ່າງຈົບງາມ.

ໃນກອງປະຊຸມ, ທ່ານ ປອ ບຸນປັນ ໄຊມຸນຕຣີ ຫົວໜ້າແຜນການ ສສກ ໄດ້ລາຍງານຫຍໍ້ກ່ຽວກັບຜົນການຈັດຕັ້ງປະຕິບັດແຜນພັດທະນາການສຶກສາ ແລະ ກິລາ ປະຈຳປີ 2021 ແລະ ແຜນວຽກຈຸດສຸມປີ 2022 ຂອງຂະແໜງການຍ່ອຍ ເປັນຕົ້ນແມ່ນ ຂະແໜງການສຶກສາກ່ອນໄວຮຽນ, ຂະແໜງການຍ່ອຍປະຖົມສຶກສາ, ຂະແໜງການຍ່ອຍມັດທະຍົມຕອນຕົ້ນ, ຂະແໜງການຍ່ອຍມັດທະຍົມສຶກສາຕອນປາຍ, ຂະແໜງການຍ່ອຍການສຶກສານອກໂຮງຮຽນ, ຂະແໜງການຍ່ອຍການສຶກສາຄູ, ຂະແໜງການຍ່ອຍອາຊີວະສຶກສາ ແລະ ອົບຮົມວິຊາຊີບ, ຂະແໜງການຍ່ອຍການສຶກສາຊັ້ນສູງ, ວຽກງານກິດຈະການນັກສຶກສາ, ຂະແໜງການຍ່ອຍກິລາ-ກາຍະກໍາ (ກິລາມວນຊົນ, ພະລະ ແລະ ສິລະປະສຶກສາ), ວຽກງານກິລາລະດັບສູງ, ຂະແໜງການຍ່ອຍບໍລິຫານ-ຄຸ້ມຄອງ ແລະ ຂະແໜງການຍ່ອຍວິທະຍາສາດ, ຊຶ່ງທຸກຂະແໜງການລ້ວນແລ້ວມີຜົນສໍາເລັດທີ່ພົ້ນເດັ່ນ, ຄຽງຄູ່ກັບຜົນສຳເລັດດັ່ງກ່າວນັ້ນ, ກໍຍັງມີບັນຫາ ແລະ ສິ່ງທ້າທາຍທີ່ແຕ່ລະຂະແໜງການຈະຕ້ອງໄດ້ສຸມໃສ່ຈັດຕັ້ງປະຕິບັດ ເພື່ອແກ້ໄຂໃຫ້ບັນລຸຜົນສຳເລັດຕາມລະດັບຄາດໝາຍທີ່ວາງໄວ້.

ນອກຈາກນີ້, ຍັງໄດ້ມີການວາງແຜນວຽກຈຸດສຸມ ປະຈໍາປີ 2022 ອີກດ້ວຍ.

ສຳລັບກອງປະຊຸມຜູ້ບໍລິຫານການສຶກສາ ແລະ ກິລາ ປະຈຳປີ 2021 ແມ່ນຈະໄດ້ດໍາເນີນໄປເປັນເວລາ 2 ວັນ ລະຫວ່າງວັນທີ 10-11 ມີນາ 2022, ຊຶ່ງໃນກອງປະຊຸມ ນອກຈາກໄດ້ຮັບຟັງການລາຍງານຫຍໍ້ຂອງການຈັດຕັ້ງປະຕິິບັດແຜນພັດທະນາການສຶກສາ ແລະ ກິລາ ປະຈຳປີ 2021, ທິດທາງແຜນການປີ 2022 ແລ້ວ, ຍັງໄດ້ມີການລາຍງານຜົນການຈັດຕັ້ງປະຕິບັດມະຕິກອງປະຊຸມ ປະຈຳປີ 2021, ແນວທາງການປັບປຸງຄຸນນະພາບຂອງວຽກງານກິລາ ເພື່ອເຂົ້າແຂ່ງຂັນ, ລາຍງານການບັນຈຸ ຈັດສັນຄູ ແລະ ບັນຫາຄູອາສາສະໝັກ ປີ 2021, ການແກ້ໄຂຜົນກະທົບຂອງພະຍາດໂຄວິດ-19 ຕໍ່ຂະແໜງການສຶກສາ ແລະ ກິລາ, ການຈັດສັນງົບປະມານທີ່ຕິດພັນກັບນະໂຍບາຍປະຢັດຂອງລັດຖະບານ, ເຜີຍແຜ່ບົດລາຍງານກອງປະຊຸມໂຕະມົນລະດັບສູງຄັ້ງທີ 13, ແນວທາງໃນການປັບປຸງວຽກງານວິທະຍາສາດໃນອະນາຄົດ ແລະ ແຜນການສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ ປີ 2022.

ແຫຼ່ງຂ່າວ: ໜັງສືພິມສຶກສາ-ກິລາລາຍວັນ