ວຽກງານການທ່ອງທ່ຽວ ເປັນຂະແໜງເສດຖະກິດສຳຄັນໜຶ່ງ ແລະ ເປັນກໍາລັງແຮງຍູ້ດັນ, ຂັບເຄື່ອນການຂະຫຍາຍຕົວເສດຖະກິດຂອງປະເທດ, ລັດຖະບານ ໄດ້ມີນະໂຍບາຍຊຸກຍູ້ສົ່ງເສີມ “ລາວທ່ຽວລາວ” ໃຫ້ຫຼາຍຂຶ້ນ.

ໃນກອງປະຊຸມຖະແຫຼງຂ່າວ, ວັດທະນະທຳ ແລະ ທ່ອງທ່ຽວທົ່ວປະເທດ ທີ່ດຳເນີນໃນລະຫວ່າງວັນທີ 10-11 ກຸມພາ 2022, ທ່ານ ວັນສີ ກົວມົວ ຮອງລັດຖະມົນຕີ ກະຊວງຖະແຫຼງຂ່່າວ, ວັດທະນະທຳ ແລະ ທ່ອງທ່ຽວ ໄດ້ລາຍງານວຽກງານພັດທະນາການທ່ອງທ່ຽວຕໍ່ກອງປະຊຸມສະຫຼຸບວຽກງານ ຖວທ ທົ່ວປະເທດ 2021 ວ່າ: ມາຮອດປັດຈຸບັນ, ສະຖານທີ່ທ່ອງທ່ຽວທາງທໍາມະຊາດທົ່ວປະເທດ ມີ 1.145 ແຫ່ງ, ທ່ອງທ່ຽວວັດທະນະທໍາ 534 ແຫ່ງ, ທ່ອງທ່ຽວປະຫວັດສາດ 278 ແຫ່ງ. ຂະນະດຽວກັນ, ໂຄງລ່າງພື້ນຖານ ແລະ ສິ່ງອໍານວຍຄວາມສະດວກໄດ້ຮັບການປັບປຸງຢ່າງຕໍ່ເນື່ອງ ຊຶ່ງແຕ່ລະແຂວງກໍໄດ້ມີການປັບປຸງບູລະນະແຫຼ່ງທ່ອງທ່ຽວໃຫ້ມີຄວາມສວຍງາມໜ້າທ່ຽວໜ້າຊົມ ເພື່ອດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດ.

ໃນນັ້ນ, ແຂວງອຸດົມໄຊ ສໍາເລັດການປັບປຸງເສັ້ນທາງເຂົ້າເຖິງສະຖານທີ່ທ່ອງທ່ຽວຖໍ້າຈອມອອງ ມີຄວາມຍາວ 56 ກິໂລແມັດ, ປັບປຸງສິ່ງອໍານວຍຄວາມສະດວກ ແລະ ຂໍ້ມູນຂ່າວສານການທ່ອງທ່ຽວພາຍໃນຖໍ້າຈອມອອງ. ແຂວງຫຼວງພະບາງ ສໍາເລັດການປັບປຸງສິ່ງອໍານວຍຄວາມສະດວກຢູ່ບ້ານຊ່າງໄຫ ແລະ ບ້ານປາກອູ ເມືອງປາກອູ ປັບປຸງທາງຍ່າງພາຍໃນບ້ານ, ຫ້ອງຂໍ້ມູນຂ່າວສານ, ຫ້ອງນໍ້າສາທາລະນະສະອາດອາຊຽນ, ລານຈອດລົດ, ຂັ້ນໄດລົງນໍ້າຂອງ, ປັບປຸງຖໍ້າຕິ່ງ, ທ່າທຽບເຮືອ, ສິ່ງອໍານວຍຄວາມສະດວກພາຍໃນຖໍ້າ). ບ້ານຈ່ານເໜືອ ເມືອງຈອມເພັດ ປັບປຸງສູນສາທິດເຄື່ອງປັ້ນດິນເຜົາ, ສູນວາງສະແດງ, ຫ້ອງນໍ້າມາດຕະຖານອາຊຽນ, ເສັ້ນທາງຍ່າງໃນບ້ານ, ທາງລົງທ່າເຮືອ, ຂົວອູ່ຂ້າມລະຫວ່າງບ້ານຈ່ານເໜືອ ຫາບ້ານຈ່ານໃຕ້ ແລະ ອື່ນໆ. ບ້ານຊຽງແມນ ເມືອງຈອມເພັດ (ປັບປຸງທ່າເຮືອບັກ, ສູນຂໍ້ມູນຂ່າວສານ, ເສັ້ນທາງປູຢາງ 3 ກມ, ຕະຫຼາດຊຸມຊົນ ແລະ ທາງຍ່າງພາຍໃນບ້ານ. ບ້ານນາຍາງ ເມືອງນໍ້າບາກ ໄດ້ປັບປຸງເຮືອນພັກແຮມປະຊາຊົນ ແລະ ການທ່ອງທ່ຽວແບບປະຊາຊົນມີສ່ວນຮ່ວມ. ແຂວງວຽງຈັນ ໄດ້ເລີ່ມດໍາເນີນການປັບປຸງເສັ້ນທາງເຂົ້າອ່າງນໍ້າງື່ມ 1 ແລະ ປັບປຸງສິ່ງອໍານວຍຄວາມສະດວກດ້ານການທ່ອງທ່ຽວບໍລິເວນໜ້າອ່າງນໍ້າງື່ມ 1 ເຊັ່ນ: ທ່າເຮືອ, ລານຈອດລົດ, ຮ້ານຂາຍເຄື່ອງ, ຮ້ານອາຫານ, ບ່ອນນັ່ງຫຼິ້ນ ແລະ ອື່ນໆ. ພ້ອມກັນນີ້, ເມືອງວັງວຽງ ໄດ້ເລີ່ມປັບປຸງເສັ້ນທາງເບຕົງເຂົ້າເຖິງນໍ້າຕົກຕາດແກ້ງຍຸຍ ມີຄວາມຍາວ 6 ກິໂລແມັດ ແລະ ສ້າງສິ່ງອໍານວຍຄວາມສະດວກດ້ານການທ່ອງທ່ຽວຢູ່ບໍລິເວນຕາດແກ້ງຍຸຍ, ປັບປຸງເສັ້ນທາງວົງແຫວນເບື້ອງຕາເວັນຕົກຂອງສາຍນໍ້າຊອງ ຍາວ 26 ກມ ເປັນທາງປູຢາງ 2 ຊັ້ນ, ສ້າງຂົວຂ້າມນໍ້າຊອງ ຍາວ 80 ແມັດ, ກວ້າງ 11 ແມັດ, ກໍາລັງດໍາເນີນການປັບປຸງສະໜາມເກັບມ້ຽນຂີ້ເຫຍື້ອເມືອງວັງວຽງ ໂດຍການສະໜັບສະໜູນຈາກໂຄງການພັດທະນາໂຄງລ່າງພື້ນຖານ ເພື່ອສົ່ງເສີມການທ່ອງທ່ຽວໄລຍະ 1 ແລະ 2 ຈາກທະນາຄານພັດທະນາອາຊີ (ADB).

ກອງປະຊຸມຄງນີ້, ໄດ້ຮັບຮອງເອກະສານດ້ານນະໂຍບາຍການທ່ອງທ່ຽວ 7 ສະບັບຄື: ແຜນພັດທະນາການທ່ອງທ່ຽວຂອງ ສປປ ລາວ ສຳລັບປີ (2021-2025). ມາດຕະຖານການຈັດລະດັບສະຖານທີ່ທ່ອງທ່ຽວ ຂອງ ສປປ ລາວ; ປຶ້ມແນວທາງການຟື້ນຟູການທ່ອງທ່ຽວຂອງ ສປປ ລາວ ຈາກການແຜ່ລະບາດຂອງພະຍາດໂຄວິດ-19 ສໍາລັບ ປີ (2021-2025); ປຶ້ມຄູ່ມືປະເມີນຜົນການທ່ອງທ່ຽວແບບຍືນຍົງຂອງ ສປປ ລາວ; ແຜນພັດທະນາການທ່ອງທ່ຽວ ແຂວງໄຊສົມບູນ ສຳລັບປີ (2021-2025); ປຶ້ມບັນຊີຮຽກການລົງທຶນແຫຼ່ງທ່ອງທ່ຽວບຸລິມະສິດທົ່ວປະເທດ; ສໍາເລັດການຈັດພິມປຶ້ມບົດລາຍງານສະຖິຕິການທ່ອງທ່ຽວປະຈໍາປີ 2020 ເພື່ອລາຍງານສະພາບການທ່ອງທ່ຽວໃນປີຜ່ານມາ. ສຳເລັດການພັດທະນາລະບົບການເກັບກໍາສະຖິຕິ ແລະ ລາຍງານສະຖິຕິນັກທ່ອງທ່ຽວລາວ ພ້ອມທັງຈັດຝຶກອົບຮົມໃຫ້ແກ່ພະນັກງານຂັ້ນສູນກາງ ແລະ ແຂວງເປົ້າໜາຍ; ສຳເລັດການເກັບກຳສະຖິຕິນັກທ່ອງທ່ຽວພາຍໃນລະຫວ່າງເດືອນມັງກອນ-ທັນວາ ປີ 2021. ໄດ້ຈັດກອງປະຊຸມສົ່ງເສີມການທ່ອງທ່ຽວເຊື່ອມຕໍ່ 6 ແຂວງພາກກາງ ຄັ້ງທີ X ທີ່ແຂວງໄຊສົມບູນ; ໄດ້ຮັບລາງວັນມາດຕະຖານການທ່ອງທ່ຽວອາຊຽນ ໃນເດືອນມັງກອນ ປີ 2022 ໃນງານມະຫະກໍາການທ່ອງທ່ຽວອາຊຽນ ທີ່ປະເທດກໍາປູເຈຍຄື: ລາງວັນເມືອງທ່ອງທ່ຽວສະອາດອາຊຽນ ຈໍານວນ 3 ລາງວັນຄື:

ນະຄອນ-ຫຼວງພະບາງ, ນະຄອນປາກເຊ ແລະ ເມືອງວຽງໄຊ; ໄດ້ຮັບລາງວັນການທ່ອງທ່ຽວແບບຍືນຍົງອາຊຽນໃນເດືອນມັງກອນ ປີ 2022 ທີ່ປະເທດກຳປູເຈຍ ຄື: ລາງວັນການທ່ອງທ່ຽວແບບຍືນຍົງອາຊຽນໃນເຂດຊົນນະບົດ ແມ່ນໍ້າຕົກຕາດກວາງຊີ ແຂວງຫຼວງພະບາງ ແລະ ລາງວັນການທ່ອງທ່ຽວແບບຍືນຍົງອາຊຽນໃນເຂດຕົວເມືອງ, ນໍ້າຕົກຕາດເຍືອງ ແຂວງຈໍາປາສັກ. ໄດ້ສໍາເລັດການລົງເກັບກໍາຂໍ້ມູນຄຸນລັກສະນະນັກທ່ອງທ່ຽວພາຍໃນຢູ່ແຂວງເປົ້າໝາຍຈໍານວນໜຶ່ງ, ໄດ້ຊຸກຍູ້ ແລະ ສະໜອງງົບປະມານ ຈາກໂຄງການພັດທະນາໂຄງລ່າງພື້ນຖານເພື່ອສົ່ງເສີມການທ່ອງ ທ່ຽວໄລຍະ 1 ແລະ ໄລຍະ 2 ໃຫ້ບັນດາແຂວງ ໂຄງການ ເພື່ອສົມທົບກັບອົງການປົກຄອງທ້ອງຖິ່ນ ແລະ ພາກທຸລະກິດປັບປຸງສະຖານທີ່ທ່ອງທ່ຽວບຸລິມະສິດ ໃຫ້ມີຄວາມພ້ອມໃນການເປີດບໍລິການຕ້ອນຮັບນັກທ່ອງທ່ຽວຄືນໃໝ່ 21 ແຫ່ງຄື: ແຂວງອຸດົມໄຊ, ຫຼວງພະບາງ, ຄໍາມ່ວນ, ແຂວງວຽງຈັນ ແລະ ແຂວງຈໍາປາສັກ. ຄຽງຄູ່ກັນນັ້ນ ກໍໄດ້ສໍາເລັດການຈັດກອງປະຊຸມຕ່າງໆເຊັ່ນ: ກອງປະຊຸມປຶກສາຫາລືຮ່ວມກັບພະແນກ ຖວທ 4 ແຂວງພາກໃຕ້ ກຳນົດກິດຈະກໍາ ແລະ ຜັນຂະຫຍາຍແຜນພັດທະນາການທ່ອງທ່ຽວໃນເຂດສາມຫຼ່ຽມພັດທະນາ ລາວ-ຫວຽດນາມ-ກໍາປູເຈຍ (CLV DTA) ສໍາລັບປີ (2022-2025); ກອງປະຊຸມກັບບັນດາແຂວງເປົ້າໝາຍ ຈາກພາກລັດ ແລະ ພາກທຸລະກິດ ເພື່ອກະກຽມເປີດການທ່ອງທ່ຽວໃນເຂດພື້ນທີ່ສີຂຽວ ແລະ ເສັ້ນທາງທ່ອງທ່ຽວສີຂຽວ; ຈັດກອງປະຊຸມກັບບັນດາພະແນກ ຖວທ ແຂວງ ແລະ ນະຄອນຫຼວງ ໃນຂອບເຂດທົ່ວປະເທດ ຜ່ານທາງອອນລາຍ ເພື່ອເຜີຍແຜ່ມາດຕະ ຖານການທ່ອງທ່ຽວອາຊຽນເຊັ່ນ: ມາດຕະຖານເມືອງທ່ອງທ່ຽວສະອາດອາຊຽນ, ມາດຕະຖານເຮືອນພັກແຮມປະຊາຊົນ, ມາດຕະຖານການທ່ອງທ່ຽວແບບປະຊາຊົນມີສ່ວນຮ່ວມ ແລະ ມາດຕະຖານຫ້ອງນໍ້າສາທາລະນະສະອາດອາຊຽນ. ກອງປະຊຸມທາງໄກຮ່ວມກັບອົງການທ່ອງທ່ຽວໂລກ ກ່ຽວກັບການທ່ອງທ່ຽວພາຍໃນ ເພື່ອຊ່ວຍຟື້ນຟູການທ່ອງທ່ຽວ. ກອງປະຊຸມທາງໄກກັບຝ່າຍໄທ ກ່ຽວກັບແຜນລະອຽດ ກິດຈະກໍາການທ່ອງທ່ຽວແບບອະນຸລັກ ພາຍໃຕ້ໂຄງການ (Project on Eco-tourism); ກອງປະຊຸມທາງໄກວິຊາການທ່ອງທ່ຽວ ຄັ້ງທີ 48 ແລະ ກອງປະຊຸມກັບຫ້ອງການຜູ້ປະສານງານການທ່ອງທ່ຽວລຸ່ມແມ່ນໍ້າຂອງ. ກອງປະຊຸມສຳມະນາທາງໄກກ່ຽວກັບການພັດທະນາການທ່ອງທ່ຽວແບບຍືນຍົງ ແລະ ການພັດທະນາການທ່ອງທ່ຽວໃນເຂດຊົນນະບົດ

ໂດຍ: ບຸນອູ້ມ ກອງແກ້ວມະນີວົງ

ວັນທີ 10 ກຸມພາ 2022, ທີ່ ຫ້ອງປະຊຸມ ສະພາການຄ້າ ແລະ ອຸດສາຫະກຳແຫ່ງຊາດລາວ ໄດ້ມີພິທີຖະແຫຼງຂ່າວ ມະຫາກຳສົ່ງເສີມແຮງງານລາວ ປີ 2022

ໂດຍການເປັນ ປະທານ ທ່ານ ປອ. ໄຊບັນດິດ ຣາຊະພົນ, ຮອງປະທານ ສະພາການຄ້າ ແລະ ອຸດສາຫະກໍາແຫ່ງຊາດລາວ ( ສຄອຊ)

ໂດຍໃຫ້ກຽດເປັນປະທານຮ່ວມ ຂອງ ທ່ານ ວັນນະເລກ ເຫຼື້ອງ, ຮອງຫົວໜ້າກົມອາຊີວະສຶກສາ, ກະຊວງສຶກສາທິການ ແລະ ກິລາ, ທ່ານ ສຸລິສັກ ສຸພັນທອງ ຮອງຫົວໜ້າກົມພັດທະນາສີມືແຮງງານ ແລະ ຈັດຫາງານ, ກະຊວງແຮງງານ ແລະ ສະຫວັດດີການສັງຄົມ,

ທ່ານ ນາງ ຈັນເພັງ ມະນີແສງ, ຫົວໜ້າກົມປົກປ້ອງແຮງງານ, ສູນກາງສະຫະພັນກຳມະບານລາວ ພ້ອມຄະນະບໍລິຫານງານສະພາການຄ້າ ແລະ , ສະມາຄົມ, ກຸ່ມທຸລະກິດ ແລະ ບັນດາສື່ມວນຊົນ ເຂົ້າຮ່ວມ.

ງານມະຫາກຳສົ່ງເສີມແຮງງານລາວ Lao Employment 2022 ຈະຈັດຂຶ້ນໃນລະຫວ່າງ ວັນທີ 16-20 ມີນາ 2022 ທີ່ ສູນການຄ້າ ວຽງຈັນເຊັນເຕີ້, ນະຄອນຫຼວງວຽງຈັນ ໂດຍທາງ ສະພາການຄ້າ ແລະ ອຸດສາຫະກໍາແຫ່ງຊາດລາວ ຮ່ວມກັບ ກະຊວງແຮງງານແລະສະຫວັດດີການສັງຄົມ, ກະຊວງສຶກສາທິການແລະກິລາ, ສະຫະພັນກຳມະບານລາວ ໄດ້ຮ່ວມກັນຈັດງານດັ່ງກ່າວຂື້ນມາ. ເພື່ອສ້າງຄວາມເຂັ້ມແຂງໃຫ້ກັບ ບັນດາແຮງງານທີ່ຫວ່າງງານ ແລະ ຫົວໜ່ວຍທຸລະກິດ ທີ່ໄດ້ຮັບຜົນກະທົບຈາກການແຜ່ລະບາດຂອງເຊື້ອໄວຣັດ COVID-19 ໂດຍມີສ່ວນຮ່ວມກັບຜູ້ສຳຄັນໃນຂົງເຂດແຮງງານ ແລະ ສະຫວັດດີການສັງຄົມ, ສູນຝຶກອົບຮົມ, ວິທະຍາໄລເຕັກນິກວິຊາຊີບ, ບໍສັດ ສະມາຄົມທຸລະກິດທີ່ກ່ຽວຂ້ອງ, ອົງກອນຜູ້ໃຫ້ການສະໜັບສະໜູນ ແລະ ຜູ້ໃຊ້ແຮງງານ

ເປົ້າໝາຍ

1. ເປັນງານເປີດກວ້າງ ໃຫ້ຜູ້ປະກອບການ ແລະ ແຮງງານໄດ້ມາພົບປະ-ແລກປ່ຽນ.

2. ສົ່ງເສີມການສ້າງວຽກເຮັດງານທຳ ໃຫ້ກັບແຮງງານທີ່ຫວ່າງງານ.

3. ຍົກລະດັບສີມືການເຮັດວຽກຂອງແຮງງານດ້ວຍການຝຶກອົບຮົມຕ່າງໆ.

4. ເປັນເວທີແລກປ່ຽນປະສົບການ ແລະ ເຜີຍແຜ່ແນວທາງໃນການພັດທະນາສີມືແຮງງານ ຂອງຜູ້ ອອກແຮງງານ ແລະ ຜູ້ໃຊ້ແຮງງານ.

5. ເປັນເວທີໃຫ້ນັກສຶກສາໄດ້ມີການແລກປ່ຽນບົດຮຽນ ເພື່ອກຽມເຂົ້າສູ່ຕະຫຼາດແຮງງານໃນອະນາຄົດ.

6. ຮັບຮູ້ຂໍ້ມູນຂ່າວສານຕະຫຼາດແຮງງານ ແລະ ນະໂຍບາຍທີ່ຕິດພັນການຈ້າງງານ.

ກິດຈະກໍາສໍາຄັນໃນງານ

1. ຮ່ວມສົນທະນາ / ຝຶກອົບຮົມ (ໃຫ້ຄວາມຮູ້, ສ້າງແຮງບັນດານໃຈ)

2. ນັກສຶກສາກຽມເຂົ້າສູ່ຕະຫຼາດແຮງງານ

3. ຊ່ວຍເຫຼືອໃນການພັດທະນາທັກສະດ້ານແຮງງານ ແລະ ຍົກລະດັບສີມືແຮງງານ

4. ງານວາງສະແດງ ແລະ ສາທິດທັກສະດ້ານສີມືແຮງງານ, ເວທີສ້າງສ້າງຄວາມຮັບຮູ້ແກ່ສັງຄົມ

5. ການແຂ່ງຂັນສີມືແຮງງານ ແລະ ປະກາດໂຄງການສົ່ງເສີມສີມືແຮງງານຕ່າງໆ

6. ການພົບປະລະຫວ່າງອົງກອນ, ເຂດເສດຖະກິດ, ຫົວໜ່ວຍທຸລະກິດ ກັບຜູ້ຫວ່າງງານ,ແຮງງານທີ່ສົນໃຈ ແບບເປີດກວ້າງ.

7. ການສະໜັບສະໜູນທຶນການສຶກສາ ເພື່ອສ້າງແຮງງານຄຸນນະພາບ

ຕອນເຊົ້າຂອງ ວັນທີ 10 ກຸມພາ 2022 ທີ່ ກະຊວງການຕ່າງປະ ເທດ ໄດ້ຈັດກອງປະຊຸມຕີລາຄາທົບທວນວຽກງານຈັດຕັ້ງ 5 ປີຜ່ານມາ ແລະ ວາງທິດທາງແຜນການຕໍ່ໜ້າ, ໂດຍພາຍໃຕ້ການເປັນປະທານຂອງ ສະຫາຍ ສະເຫຼີມໄຊ ກົມມະສິດ, ກຳມະ ການກົມການເມືອງສູນກາງພັກ, ເລຂາຄະນະບໍລິຫານງານພັກກະຊວງການຕ່າງປະເທດ ຊຶ່ງມີບັນດາ ສະຫາຍ ຄະນະບໍລິຫານງານພັກກະຊວງ, ເລຂາໜ່ວຍພັກ, ຫົວໜ້າກົມ, ຮອງກົມ ແລະ ພະ ນັກງານຫຼັກແຫຼ່ງ ຂອງກະຊວງການຕ່າງປະເທດ ເຂົ້າຮ່ວມທັງໝົດ ຈໍານວນ 108 ສະຫາຍ, ຍິງ 33 ສະຫາຍ.

ຈຸດປະສົງຫຼັກຂອງກອງປະຊຸມຄັ້ງນີ້, ແມ່ນເພື່ອເປັນການຜັນຂະ ຫຍາຍມະຕິຂອງຄະນະບໍລິຫານງານສູນກາງພັກເລທີ 04/ຄລສພ ວ່າດ້ວຍການເພີ່ມທະວີການນໍາພາຂອງພັກ ເພື່ອສ້າງການຫັນປ່ຽນຢ່າງແຂງແຮງ ແລະ ເລິກເຊິ່ງວຽກງານພະນັກງານ ແລະ ຜັນຂະຫຍາຍເນື້ອໃນກອງປະຊຸມວຽກງານຈັດຕັ້ງທົ່ວປະເທດ ຄັ້ງທີ XI ໃຫ້ເປັນຮູບປະທໍາ ໃນວຽກພັກ ແລະ ພະນັກງານ.

ກອງປະຊຸມ ໄດ້ຮັບຟັງບົດລາຍ ງານ ການຕີລາຄາສະພາບການຈັດຕັ້ງປະຕິບັດວຽກງານພັກ-ພະ ນັກງານ ໃນ 5 ປີ ຜ່ານມາ ໂດຍໄດ້ຍົກໃຫ້ເຫັນຜົນງານອັນພົ້ນເດັ່ນໃນຫຼາຍດ້ານ, ໃນວຽກງານກໍ່ສ້າງພັກ, ວຽກງານພະນັກງານ, ວຽກ ງານປັບປຸງການຈັດຕັ້ງ, ເປັນຕົ້ນ ຄະນະພັກ ຄະນະນໍາກະຊວງການຕ່າງປະເທດໄດ້ເອົາໃຈໃສ່ຊີ້ນໍານໍາພາທາງດ້ານການເມືອງແນວຄິດ, ເຮັດໃຫ້ສະມາຊິກພັກ-ພະ ນັກງານ ເຊື່ອມຊຶມແນວທາງນະໂຍ ບາຍຂອງພັກ-ລັດ, ມີຄວາມອຸ່ນອ່ຽນທຸ່ນທ່ຽງ ແລະ ບຸກບືນ ຫ້າວ ຫັນ ໃນການປະຕິບັດໜ້າທີ່ວຽກ ງານທີ່ໄດ້ຮັບມອບໝາຍ; ໄດ້ສຸມໃສ່ວຽກງານກໍ່ສ້າງພັກ ເຮັດໃຫ້ພັກມີການຈັດຕັ້ງທີ່ເຂັ້ມແຂງ ແລະ ມີແບບແຜນວິທີນໍາພາຕາມຫຼັກການລວມສູນປະຊາທິປະໄຕ ແລະ ສ້າງພັກໄປຕາມທິດສ້າງພັກໃຫ້ປອດໃສ ເຂັ້ມແຂງ ໜັກແໜ້ນ, ເຊິ່ງໃນປີ 2020 ມີ 20 ໜ່ວຍພັກໄດ້ຮັບນາມມະຍົດໜ່ວຍພັກປອດໃສ ເຂັ້ມແຂງ ໜັກແໜ້ນ.

ໃນວຽກພະນັກງານ ກໍ່ໄດ້ມີການປັບປຸງ ແລະ ສ້າງນິຕິກໍາເປັນອັນສະເພາະຂອງກະຊວງການຕ່າງປະເທດ ແລະ ມີການສ້າງພະນັກງານໄປຕາມແຜນກໍານົດພະນັກງານ ທີ່ໄດ້ຜ່ານຂະ ບວນການທາບທາມຢ່າງມີປະ ຊາທິປະໄຕ, ມີການບໍາລຸງ-ກໍ່ສ້າງພະນັກງານ ຊຶ່ງໃນ 5 ປີຜ່ານມາ ໄດ້ສົ່ງພະນັກງານໄປຍົກລະດັບວິຊາສະເພາະຢູ່ພາຍໃນ ແລະ ຕ່າງປະເທດ 554 ຄົນ, ຍິງ 346 ຄົນ, ກໍ່ສ້າງ ແລະ ຝຶກອົບຮົມທິດ ສະດີການເມືອງຢູ່ພາຍໃນ ແລະ ຕ່າງປະເທດໄດ້ 160 ຄົນ, ຍິງ 55 ຄົນ, ມີການຄຸ້ມຄອງ, ແຕ່ງຕັ້ງ, ສັບຊ້ອນ, ຈັດວາງພະນັກງານ ຢ່າງເປັນລະບົບ, ລວມເຖິງມີການປະເມີນຜົນພະນັກງານຢ່າງເປັນປົກກະຕິ, ມີການປະຕິບັດນະ ໂຍບາຍ ລວມເຖິງປະຕິບັດວິໄນຕໍ່ພະນັກງານທີ່ເສຍທາດຂາດຄຸນ ລະເມີດກົດລະບຽບພັກ ແລະ ກົດໝາຍລັດ. ໃນວຽກງານປັບປຸງການຈັດຕັ້ງ, ຄະນະພັກແຕ່ລະຂັ້ນ ໄດ້ສຸມໃສ່ປັບປຸງໄປຕາມທິດກະ ທັດຮັດ ແລະ ມີການກໍານົດແບ່ງພາລະບົດບາດຢ່າງຊັດເຈນ ຫຼີກ ເວັ້ນການປະຕິບັດວຽກງານທັບຊ້ອນກັນ, ມາເຖິງປັດຈຸບັນ 8 ກົມ ຈາກທັງໝົດ 17 ກົມ ຂອງກະ ຊວງ ສາມາດສໍາເລັດການປັບປຸງ ການກໍານົດຕໍາແໜ່ງງານແລ້ວ ແລະ ຄາດວ່າ ຈະສູ້ຊົນໃຫ້ສໍາເລັດໃນອະນາຄົດອັນໃກ້ນີ້.

ນອກຈາກນີ້, ບົດລາຍງານຍັງໄດ້ຊີ້ໃຫ້ເຫັນບາງຈຸດທີ່ຈະຕ້ອງໄດ້ພ້ອມກັນເອົາໃຈໃສ່, ບົດຮຽນທີ່ຖອດຖອນໄດ້ ແລະ ໄດ້ວາງທິດ ທາງແຜນການຕໍ່ໜ້າ ຊຶ່ງໄດ້ກໍານົດໜ້າວຽກຕ່າງໆທີ່ສໍາຄັນ ເພື່ອແນໃສ່ເຮັດໃຫ້ວຽກງານພັກ-ພະ ນັກງານ ຂອງກະຊວງການຕ່າງປະ ເທດ ກ້າວເຂົ້າສູ່ຄຸນນະພາບອັນໃໝ່ສູງຂຶ້ນກ່ວາເກົ່າ.

ໃນກອງປະຊຸມໄດ້ມີການປະກອບຄໍາຄິດຄໍາເຫັນຕໍ່ບົດລາຍງານຢ່າງກ້ວາງຂວາງ ແລະ ກົງໄປກົງມາ, ພ້ອມທັງສະເໜີແນະວິທີການ ແລະ ມາດຕະການ ໃນການຍົກສູງຄຸນນະພາບວຽກງານກໍ່ສ້າງພັກ-ພະນັກງານ ຂອງກະຊວງການຕ່າງປະເທດໃນຕໍ່ໜ້າ ແລະ ມີການຮັບຮອງເອົາມະຕິກອງປະຊຸມຢ່າງເປັນເອກະສັນ. ໃນຕອນທ້າຍກອງປະຊຸມ ສະຫາຍ ສະເຫຼີມໄຊ ກົມມະສິດ, ກໍາມະການກົມການເມືອງສູນກາງພັກ, ເລຂາຄະນະບໍລິຫານງານພັກກະ ຊວງການຕ່າງປະເທດ ໄດ້ໂອ້ລົມໃຫ້ທິດຊີ້ນໍາຕໍ່ກອງປະຊຸມ ໂດຍໄດ້ເນັ້ນໜັກບາງບັນຫາ ເປັນຕົ້ນວຽກງານກໍ່ສ້າງພັກ ຕ້ອງການເພີ່ມທະວີການນໍາພາການເມືອງ- ແນວຄິດ ຂອງບັນດາສະຫາຍຄະນະພັກໃຫ້ຫຼາຍຂຶ້ນກວ່າເກົ່າ, ເພື່ອເຮັດໃຫ້ຖັນແຖວພະນັກງານນຳພາ ໄດ້ຮັບການປະກອບຄວາມຮູ້ລັດທິມາກ-ເລນິນ ແລະ ແນວຄິດປະທານ ໄກສອນ ພົມວິຫານ ເພື່ອເປັນພື້ນຖານທິດສະດີໃນພາລະກິດປະຕິບັດໜ້າທີ່ວຽກ ງານຂອງຕົນ, ໂດຍຕິດພັນກັບການກໍ່ສ້າງພັກໃຫ້ມີຄວາມປອດໃສ, ເຂັ້ມແຂງ ແລະ ໜັກແໜ້ນ, ມີແບບແຜນນໍາພາທີ່ຖືກຕ້ອງ, ປະຕິບັດຕາມຫຼັກການລວມສູນປະຊາທິປະໄຕ, ຕົກລົງເປັນໝູ່ ຄະນະ, ແບ່ງວຽກ ໃຫ້ບຸກຄົນຮັບຜິດຊອບ, ມີການຕິດຕາມກວດກາ, ປະເມີນຜົນການຈັດຕັ້ງປະຕິບັດໜ້າທີ່ຢ່າງປົກກະຕິ, ເດັດດ່ຽວແກ້ໄຂປະກົດການຫຍໍ້ທໍ້ຢູ່ພາຍໃນພັກ.

ວຽກງານພະນັກງານ ໃຫ້ເອົາໃຈໃສ່ ສືບຕໍ່ກໍ່ສ້າງພະນັກ ງານນຳພາ-ຄຸ້ມຄອງ ແລະ ພະນັກ ງານສືບທອດປ່ຽນແທນຢູ່ແຕ່ລະຂັ້ນ ຢ່າງເປັນລະບົບ ແລະ ຕໍ່ ເນື່ອງ, ເລືອກເຟັ້ນ ແລະ ສັບຊ້ອນພະນັກງານ ດ້ວຍການວາງລະ ບຽບ, ກົນໄກ, ມາດຕະຖານຕໍ່ພະນັກງານນຳພາຄຸ້ມຄອງແຕ່ລະປະເພດໃຫ້ລະອຽດ, ຊັດເຈນ ແລະ ຈະແຈ້ງ; ໃຫ້ເອົາໃຈໃສ່ປະຕິບັດນະໂຍບາຍຢ່າງທົ່ວເຖິງ, ຍຸຕິທໍາ ແລະ ໂປ່ງໃສ ແລະ ຕ້ອງສືບຕໍ່ປັບປຸງກົງຈັກການຈັດຕັ້ງໃຫ້ເຂັ້ມແຂງ ແລະ ມີປະສິດທິພາບ ໄປຕາມທິດກະທັດຮັດ, ບຸກຄົນໜຶ່ງຮັບຜິດຊອບຫຼາຍວຽກ.

ສຸດທ້າຍ, ສະຫາຍ ສະເຫຼີມໄຊ ກົມມະສິດ ໄດ້ເນັ້ນໜັກໃຫ້ຄະນະພັກແຕ່ລະຂັ້ນນໍາເອົາເນື້ອໃນຈິດໃຈທີ່ໄດ້ຕົກລົງກັນ ໃນກອງປະຊຸມໄປຈັດຕັ້ງຜັນຂະຫຍາຍໃຫ້ເປັນຮູບປະທຳ.

ຂ່າວ;ພາບ: ກົມການຂ່າວ ກະຊວງການຕ່າງປະເທດ