ຕາມຫ້ອງການຖະແຫຼງຂ່າວ ວັດທະນາທຳ ແລະ ທ່ອງທ່ຽວ ເມືອງແກ່ນທ້າວ ໃຫ້ຮູ້ວ່າ: ນໍ້າເຫືອງ ລົ້ນຝັ່ງເຂົ້າຖ້ວມເຮືອນປະຊາຊົນເມືອງແກ່ນທ້າວຍ້ອນຝົນຕົກໜັກຕິດຕໍ່ກັນ 2 ວັນ ຄື ວັນທີ 9-10 ກັນຍາ 2021 ນີ້, ເຮັດນໍ້າເຫືອງຂຶ້ນສູງລົ້ນຝັ່ງເຂົ້າຖ້ວມເຮືອນ, ນາຂອງປະຊາຊົນ ແລະ ຂົວຢູ່ເທດສະບານເມືອງແກ່ນທ້າວ ແຂວງໄຊຍະບູລີ ເຂດບ້ານຈອມແກ້ວ, ທ່າດ່ານປະເພນີສີພູມ ບ້ານທ້າວແກ່ນ, ຂົວຂ້າມນໍ້າຕໍາ ລະຫວ່າງບ້ານພວນ-ຫາດແດງ ແລະ ນາຂອງປະຊາຊົນຈໍານວນໜຶ່ງ.

ສະເພາະເຮືອນປະຊາຊົນບ່ອນທີ່ນໍ້າຖ້ວມ ແລະ ບ່ອນທີ່ມີຄວາມສ່ຽງ ແມ່ນໄດ້ຂົນເຄື່ອງອອກແລ້ວຈາກເຮືອນແລ້ວ.

ສ່ວນຂົວຂ້າມນໍ້າຕໍາ ລະຫວ່າງບ້ານພວນ-ຫາດແດງ ລົດບໍ່ສາມາດໄປ-ມາໄດ້. ປັດຈຸບັນ, ລະດັບນໍ້າຍັງສູງຂຶ້ນຢ່າງຕໍ່ເນື່ອງ.

ພ້ອມນີ້, ທາງຫ້ອງວ່າການເມືອງ ໄດ້ອອກແຈ້ງການ ໃຫ້ຕິດຕາມເຝົ້າລະວັງ ຜົນກະທົບຈາກສະພາບຝົນຕົກໜັກ ຈາກພາຍຸໂກນເຊິນ ໂດຍອີງໃສ່ແຈ້ງການເຕືອນຂອງກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ກົມອຸຕຸນິຍົມ ແລະ ອຸທົກກະສາດ ໃຫ້ຮູ້ວ່າ: ພາຍຸເຂດຮ້ອນໂກນເຊິນ ເຊິ່ງມີສູນກາງຢູ່ເຂດທະເລຈີນໃຕ້ຕອນກາງ ກໍາລັງເຄື່ອນທີ່ມາທາງທິດຕາເວັນຕົກ ດ້ວຍຄວາມໄວ 30 ກິໂລແມັດຕໍ່ຊົ່ວໂມງ ແລະ ຄາດຄະເນວ່າ ພາຍຸຫົວນີ້ ຈະເຄື່ອນຂຶ້ນຝັ່ງທາງພາກກາງ ຕອນເທິງຂອງ ສສ ຫວຽດນາມ ໃນຕອນກາງເວັນຂອງວັນທີ 13 ກັນຍາ 2021.

ຈາກນັ້ນ, ຈະອ່ອນກໍາລັງລົງເປັນພາຍຸດີເປຊັນ ເຄື່ອນທີ່ຜ່ານພາກກາງ ຫາພາກເໜືອ ຂອງ ສປປ ລາວ ໃນວັນທີ 13-14 ກັນຍາ 2021 ນີ້. ເຊິ່ງຈະສົ່ງຜົນກະທົບຕໍ່ສະພາບອາກາດ ໃນສປປລາວ ກໍ່ຄື ແຂວງໄຊຍະບູລີ ຈຶ່ງຂໍແຈ້ງເຖິງອົງການປົກຄອງທຸກພາກສ່ວນ ແລະ ປະຊາຊົນໃນທົ່ວເມືອງ ຈົ່ງມີສະຕິລະວັງຕົວ ເຊິ່ງອາດຈະເກີດດິນເຈື່ອນ, ນໍ້າຖ້ວມຊຸ ແລະ ຖ້ວມຍຶ່ງ.

ພ້ອມທັງກະກຽມຍົກຍ້າຍວັດຖຸສິ່ງຂອງທີ່ມີຄ່າ ແລະ ສັດລ້ຽງ ໄປໄວ້ບ່ອນທີ່ສູງ ແລະ ປອດໄພ,ໃຫ້ແຕ່ລະພາກສ່ວນຕິດຕາມຂ່າວພະຍາກອນອາກາດ ຈາກກົມອຸຕຸນິຍົມ ແລະ ອຸທົກກະສາດ ໃນໄລຍະນີ້ ໃຫ້ເປັນປົກກະຕິ.

ແຈ້ງການຈາກກະຊວງອຸດສາຫະກຳ ແລະ ການຄ້າ ເຖິງ: ບຸກຄົນ, ນິຕິບຸກຄົນ ແລະ ການຈັດຕັ້ງທີ່ກ່ຽວຂ້ອງ

ເລື່ອງ: ການຈັດຕັ້ງປະຕິບັດນິຕິກໍາຂົງເຂດວຽກງານ ຊັບສິນທາງປັນຍາ, ມາດຕະຖານ ແລະ ວັດແທກ ພາຍຫຼັງການຍຸບເລີກກະຊວງວິທະຍາສາດ ແລະ ເຕັກໂນໂລຊີ – ອີງຕາມ ກົດຫມາຍ ວ່າດ້ວຍການສ້າງນິຕິກໍາ ສະບັບເລກທີ 19/ສພຊ, ລົງວັນທີ 12 ກໍລະກົດ 2012; – ອິງຕາມ ມະຕິຕົກລົງຂອງກົມການເມືອງສູນກາງພັກ ວ່າດ້ວຍການຍຸບເລີກກະຊວງວິທະຍາສາດ ແລະ ເຕັກໂນໂລຊີ ສະບັບເລກທີ 09/ກມສພ, ລົງວັນທີ 25 ກຸມພາ 2001;

– ອີງຕາມ ດໍາລັດ ວ່າດ້ວຍການຈັດຕັ້ງ ແລະ ການເຄື່ອນໄຫວຂອງກະຊວງອຸດສາຫະກໍາ ແລະ ການຄ້າ, ສະບັບເລກທີ ຂ30/ນຍ, ລົງວັນທີ 24 ກໍລະກົດ 2017.

ເພື່ອຄວາມເຂົ້າໃຈເປັນເອກະພາບກັນໃນຂອບເຂດທົ່ວປະເທດໃນການຈັດຕັ້ງປະຕິບັດນິຕິກໍາຂົງເຂດວຽກງານ ຊັບສິນທາງປັນຍາ, ມາດຕະຖານ ແລະ ວັດແທກ ພາຍຫຼັງການຍຸບເລີກກະຊວງວິທະຍາສາດ ແລະ ເຕັກໂນໂລຊີ ແລະ ໄດ້ຊັບຊ້ອນວຽກງານດັ່ງກ່າວ ໃຫ້ຂຶ້ນກັບກົງຈັກການຈັດຕັ້ງຂອງກະຊວງອຸດສາຫະກໍາ ແລະ ການຄ້າ, ລັດຖະມົນຕີ ກະຊວງອຸດສາຫະກໍາ ແລະ ການຄ້າ ອອກແຈ້ງການ:

1. ການຈັດຕັ້ງປະຕິບັດນິຕິກໍາຂົງເຂດວຽກງານ ຊັບສິນທາງປັນຍາ, ມາດຕະຖານ ແລະ ວັດແທກ ທັງກົດຫມາຍ ແລະ ນິຕິກໍາໃຕ້ກົດຫມາຍ ທີ່ປະກາດໃຊ້ ກ່ອນການຍຸບເລີກກະຊວງວິທະຍາສາດ ແລະ ເຕັກໂນໂລຊີ ແມ່ນໃຫ້ ສືບຕໍ່ຈັດຕັ້ງປະຕິບັດ ຈົນກວ່າຈະມີນິຕິກໍາສະບັບໃຫມ່ປ່ຽນແທນ.

2. ໃຫ້ກົມຊັບສິນທາງປັນຍາ, ກົມມາດຕະຖານ ແລະ ວັດແທກ ຄົ້ນຄວ້າ ແລະ ກວດກາຄືນ ນິຕິກໍາໃນຂົງເຂດ. ວຽກງານຂອງຕົນ ທີ່ປະກາດໃຊ້ໃນໄລຍະຜ່ານມາທັງຫມົດ ຖ້າເຫັນວ່ານິຕິກໍາສະບັບໃດ ມີຄວາມຈໍາເປັນຕ້ອງປັບປຸງ ແມ່ນໃຫ້ສົມທົບກັບຫ້ອງການກະຊວງ ເພື່ອຄົ້ນຄວ້າດໍາເນີນການປັບປຸງຕາມຂັ້ນຕອນການສ້າງ ແລະ ປັບປຸງນິຕິກໍາ,

3. ມອບໃຫ້ ຫ້ອງການກະຊວງ ເປັນເຈົ້າການສົມທົບກັບ ກົມຊັບສິນທາງປັນຍາ, ກົມມາດຕະຖານ ແລະ ວັດ ແທກ ໃນການເຜີຍແຜ່ແນະນໍາແຈ້ງການສະບັບນີ້ ໃຫ້ບັນດາພະແນກອຸດສາຫະກໍາ ແລະ ການຄ້າ ແຂວງ, ນະຄອນ ຫຼວງ, ຫ້ອງການອຸດສາຫະກໍາ ແລະ ການຄ້າ ເມືອງ, ນະຄອນ ພ້ອມທັງ ບຸກຄົນ, ນິຕິບຸກຄົນ ແລະ ການຈັດຕັ້ງ ທີ່ກ່ຽວຂ້ອງ ຮັບຊາບຢ່າງທົ່ວເຖິງ. ດັ່ງນັ້ນ, ຈຶ່ງແຈ້ງເພື່ອຊາບ ແລະ ຈັດຕັ້ງປະຕິບັດຕາມແຈ້ງການສະບັບນີ້ຢ່າງເຂັ້ມງວດ.

ຕາມການລາຍງານຂອງ ສະຖານນີ ວິທະຍຸ ໂທລະພາບ ແຂວງອຸດົມໄຊ ໃຫ້ຮູ້ວ່າ: ຄະນະກໍາມະການແກ້ໄຂບັນຫາເດັກເລລ້ອນ ລົງເຕົ້າໂຮມເອົາເດັກເລລ້ອນຢູ່ຕາມຈຸດຕ່າງໆ ພາຍໃນເທດສະບານແຂວງ ມາຮັບການກວດສຸຂະພາບ ແລະ ສານເສບຕິດຂ່າວ: ຄານມະນີ ຮຽນດໍຈັນ ຕອນເຊົ້າວັນທີ 9 ກັນຍານີ້ ຄະນະກໍາມະການແກ້ໄຂບັນຫາເດັກເລລ້ອນ ແຂວງອຸດົມໄຊ ສົມທົບກັບ ຄະນະກຳມະການຂັ້ນເມືອງ ແລະ ອົງການປົກຄອງບ້ານພູຂຽວ ໄດ້ລົງເຄື່ອນໄຫວເຕົ້າໂຮມເອົາເດັກເລລ້ອນທີ່ເຄື່ອນໄຫວອາໄສຢູ່ຕາມຈຸດຕ່າງໆ ພາຍໃນເທດສະບານ ແຂວງອຸດົມໄຊ ເພື່ອມາຮັບການກວດສຸຂະພາບ ແລະ ສານເສດຕິດໃນຮ່າງກາຍ.

ການລົງເຄື່ອນໄຫວແກ້ໄຂບັນຫາເດັກເລລ້ອນຂອງຄະນະກຳມະການຂັ້ນແຂວງ ແລະ ເມືອງ ໃນຄັ້ງນີ້ ກໍເພື່ອເຮັດໃຫ້ພາຍໃນເທດສະບານ ແຂວງອຸດົມໄຊ ມີຄວາມເປັນລະບຽບຮຽບຮ້ອຍ ທັງເປັນການຊຸກຍູ້, ຊ່ວຍເຫຼືອເດັກເລລ້ອນດັ່ງກ່າວມີຊີວິດການເປັນຢູ່ທີ່ດີ ແລະຮັບການດູແລດ້ານສຸຂະພາບ.

ເບື້ອງຕົ້ນເປົ້າຫມາຍທີ່ຈະນຳມາເຕົ້າໂຮມຮັບການກວດສຸຂະພາບໃນຄັ້ງນີ້ ມີທັງຫມົດ 11 ຄົນ, ຍິງ 4 ຄົນ ສາມາດເຕົ້າໂຮມເຂົ້າມາຮັບການກວດຕົວຈິງ ຈຳນວນ 9 ຄົນ, ຍິງ 3 ຄົນ ທັງຫມົດແມ່ນມາຈາກບ້ານພູຂຽວ ແລະ ບ້ານມອນໃຕ້, ເມືອງໄຊ, ແຂວງອຸດົມໄຊ.

ຜົນການກວດຕົວຈິງຂອງວິຊາການແພດ ຈາກໂຮງຫມໍແຂວງອຸດົມໄຊ ພົບເຫັນ ມີເດັກຂາດສານອາຫານ, ນ້ຳຫນັກ ແລະ ລວງສູງ ຫຼຸດມາດຕະຖານ, ເກີດມີພະຍາດຕາມຜິວຫນັງ ແລະເດັກຈຳນວນໜຶ່ງມີສານເສບຕິດໃນຮ່າງກາຍ.

ພາຍຫຼັງສຳເລັດການກວດກາສຸຂະພາບໃຫ້ແກ່ເດັກ ທາງຄະນະກຳມະການແກ້ໄຂບັນຫາເດັກເລລ້ອນ ຂັ້ນແຂວງ, ຂັ້ນເມືອງ ແລະ ອົງການປົກຄອງບ້ານພູຂຽວ ໄດ້ປຶກສາຫາລື ເພື່ອຊ່ວຍເຫຼືອ, ແກ້ໄຂບັນຫາຊີວິດການເປັນຢູ່, ດ້ານອາຫານ, ການສຶກສາ, ສຸຂະພາບ ແລະ ການບຳບັດ ຜູ້ທີ່ມີສານເສບຕິດໃນຮ່າງກາຍ ແລະຊອກຫາທາງອອກທີ່ດີແກ່ເຂົາເຈົ້າ ດັ່ງນັ້ນຂໍຮຽກຮ້ອງມາຍັງທຸກຄົນໃນສັງຄົມຈົ່ງຊ່ວຍກັນຫາທາງອອກ ແລະ ບໍ່ໃຫ້ລັງກຽດເດັກເລົ່ານີ້.

ແຂວງສາລະວັນ ອອກແຈ້ງການ! ໃຫ້ກະກຽມສະບຽງອາຫານ ແລະ ເຄື່ອງໃຊ້ທີ່ຈໍາເປັນ ເພື່ອກະກຽມໃຫ້ແກ່ການລ໋ອກດາວຂັ້ນສູງ

ຫ້ອງວ່າການແຂວງສາລະວັນ, ຂໍຖືເປັນກຽດແຈ້ງ ມາຍັງທ່ານຊາບດັ່ງນີ້:

ເນື່ອງຈາກວ່າ ມາຮອດປັດຈຸບັນນີ້ ສະພາບການແຜ່ລະບາດຂອງພະຍາດ ໂຄວິດ – 19 ຢູ່ແຂວງສາລະວັນ ມີທ່າອ່ຽງຮຸນເເຮງຂຶ້ນ ໂດຍສະເພາະການລະບາດໃນຊຸມຊົນ, ສະນັ້ນ, ເພື່ອຮັບປະກັນໃຫ້ການດໍາລົງຊີວິດປະຈຳວັນຂອງພໍ່ແມ່ປະຊາຊົນ ໃນໄລຍະທີ່ຈະມີການລອ໋ກດາວ ຂັ້ນສູງແຂວງສາລະວັນ:

1. ໃຫ້ບັນດາເມືອງ, ພະແນກການ – ອົງການທຽບເທົ່າອ້ອມຂ້າງແຂວງ ແຈ້ງພະນັກງານ – ລັດຖະກອນ ແລະ ພໍ່ແມ່ປະຊາຊົນທີ່ຢູ່ໃນຄວາມຮັບຜິດຊອບຂອງຕົນ ກະກຽມຈັດຊື້ສະບຽງອາຫານ ແລະ ເຄື່ອງໃຊ້ທີ່ຈໍາເປັນ ເພື່ອແຮໄວ້ນຳໃຊ້ໃນຊ່ວງໄລຍະການລ໋ອກດາວແຂວງຂັ້ນສູງ ເພື່ອສະກັດກັ້ນ, ປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ – 10 ໃນຊຸມຊົນ ຢູ່ແຂວງສາລະວັນ.

2. ຫ້າມຊາວຄ້າ – ຂາຍ ສວຍໂອກາດກັກຕຸນສິນຄ້າ ຫຼື ຂື້ນລາຄາສີນຄ້າ ໃນຊ່ວງໄລຍະນີ້ ຢ່າງເດັດຂາດ, ມອບໃຫ້ພະແນກອຸດສາຫະກໍາ ແລະ ການຄ້າແຂວງ ລົງຕິດຕາມ, ຖ້າຜູ້ໃດຜ່າຜືນແມ່ນໃຫ້ປະຕິບັດມາດຕະການທາງກົດໝາຍຢ່າງເຂັ້ມງວດ.

3. ພະແນກກະສິກໍາ ແລະ ປ່າໄມ້ແຂວງ ຄົ້ນຄວ້າສະໜອງແນວພັນ, ແນະນຳໃຫ້ປະຊາຊົນຫັນມາປູກຝັງ – ລ້ຽງສັດກຸ້ມຕົນເອງໃຫ້ຫຼາຍຂຶ້ນໃນໄລຍະລ໋ອກດາວ.