ໃນຕອນເຊົ້າຂອງວັນທີ 29 ກັນຍາ 2022 ຢູ່ຫໍປະຊຸມໃຫຍ່ຂອງເມືອງໂພນໄຊ ໄດ້ຈັດກອງປະຊຸມສະຫຼຸບຖອດຖອນບົດຮຽນບັ້ນລົງແກ້ໄຂປະກົດການຫຍໍ້ທໍ້ບັນຫາຢາເສບຕິດ 2 ກຸ່ມຄຶ:

ກຸ່ມທ່າຂ້າມ ແລະ ກຸ່ມສົບເຈ້ຍ ຂຶ້ນຢ່າງເປັນທາງການ ໂດຍເປັນປະທານຂອງ ສະຫາຍ ທອງຈັນ ລັດຕະນະປະດິດ ເຈົ້າເມືອງໂພນໄຊ ປະທານປ້ອງການຊາດ-ປ້ອງກັນຄວາມສະ ຫງົບເມືອງ ມີຄະນະປະຈໍາພັກເມືອງ, ກໍາມະການພັກເມືອງ, ຫົວໜ້າຫ້ອງການ, ຮອງຫ້ອງການ, ຄະນະຊີ້ນໍາບ້ານທັງ 57 ບ້ານທົ່ວເມືອງ ເຂົ້າຮ່ວມ.

ກອງປະຊຸມດັ່ງກ່າວ ສະຫາຍ ພັນໂທ ສຸລິໂພ ຍົດສະນີ ຫົວໜ້າກອງບັນຊາການ ປກສ ເມືອງ ໄດ້ຂື້ນຜ່ານບົດສະຫຼຸບໃນການຈັດຕັ້ງປະຕິບັດໃນບັ້ນລົງແກ້ໄຂບັນຫາຢາເສບຕິດ ( ຕິດພັນກັບປະ ຕິບັດ 2 ວາລະແຫ່ງຊາດ)ຢູ່ພາຍໃນສອງກຸ່ມມີ 17 ບ້ານ, ມີ 1.371 ຄອບຄົວ, ພົນລະເມືອງ 7.753 ຄົນ, ຍິງ 3.522 ຄົນ, ມີ 107 ໜ່ວຍຄຸ້ມຄອງ, ມີກອງຫຼອນ 213 ສະຫາຍ, ຖືອາວຸດ 55 ກະບອກ,ປ້ອງກັນບ້ານ 106 ສະຫາຍ, ຖືອາວຸດ 27 ກະບອກ, ບາດກ້າວໃນການຈັດຕັ້ງປະຕິບັດ ໄດ້ເຕົ້າໂຮມການຈັດ ຕັ້ງທຸກພາກສ່ວນ ແລະ ປະຊາຊົນທີ່ມີອາຍຸ 18 ປີຂື້ນໄປ ເພື່ອເຂົ້າຮ່ວມຂະບວນການແກ້ໄຂບັນຫາຢາເສບຕິດໄດ້ເຊື່ອມຊຶມບັນດາເອກະສານມີເອກະສານວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ, ເອກະສານຢາເສບຕິດ, ຜົນຮ້າຍຂອງຢາເສບຕິດ, ຂໍ້ກໍນົດວ່າດ້ວຍການຄຸ້ມຄອງອາວຸດເສີກ ແລະ ອາວຸດລ່າເນື້ອ, ຄອບຄົວເປົ້າໝາຍພົວພັນຢາເສບຕິດມີ 534 ຄອບຄົວ ກວມເອົາ 38 %, ເປົ້າໝາຍເສບຢາເສບຕິດມີ 658 ຄົນ, ຍິງ 16 ຄົນ ກວມເອົາ 8 % ຂອງພົນລະເມືອງທັງ 17 ບ້ານ, ເປົ້າໝາຍຄ້າ-ຂາຍຢາເສບຕິດ 46 ຄົນ, ຍິງ 11 ຄົນ, ເປົ້າໝາຍມີອາວຸດລ່າເນື້ອມີ 202 ຄົນ,ກວມເອົາ 5 ສ່ວນຮ້ອຍ, ເປົ້າໝາຍມີອາວຸດເສີກ 1 ຄົນ, ເປົ້າໝາຍປະກົດການຫຍໍ້ທໍ້ຕ່າງໆມີ 27 ກໍລະນີ, ຂື້ນບັນຊີເປົ້າໝາຍເຊື່ອຖືສາສະໝາຕ່າງປະເທດ 2 ຄົນ, ຍິງ 1 ຄົນ, ພົນລະເມືອງບໍ່ທັນໄດ້ຂື້ນສໍາມະໂນຄົວ 236 ຄົນ, ຍິງ 128 ຄົນ.

ຕໍ່ກັບເປົ້າໝາຍທີມີການພົວພັນຢາເສບຕິດໄດ້ຂຽນບົດບັນທຶກຕໍ່ຄອບຄົວເປົ້າໝາຍເສບຢາເສບຕິດມີ 493 ຄອບຄົວ, ບັນລຸໄດ້ 92%, ຍັງຄ້າງ 41 ຄອບຄົວ,ໄດ້ຂຽນປະຕິຍານຕົນເອງມີ 593 ຄົນ ບັນລຸໄດ້ 90%, ໃນນັ້ນມີຢາບ້າ 581 ຄົນ, ເສບຢາຝີ່ນ 12 ຄົນ,ຍັງຄ້າງ 65 ຄົນ,ຍິງ 3 ຄົນ, ໄດ້ຂຽນບົດບັນທຶກຕໍ່ເປົ້າໝາຍຄ້າ-ຂາຍ 10 ຄົນບັນລຸໄດ້ 100%, ນໍາເຂົ້າສູນບໍາບັດດັດສ້າງ 25 ຄົນ, ຍຶດຂອງກາງໄດ້ຢາບ້າ 2,161 ເມັດ, ຢາຝີ່ນໄດ້ 2 ຄົນແລະ ອຸປະກອນເສບຢາຝີ່ນ 3 ຊຸດ,ກວດນໍ້າມຸດ 4 ຄົນ, ພົບສານເສບຕິດ 3 ຄົນ, ໄດ້ຂື້ນທະບຽນອາວຸດລ່າເນື້ອ 538 ກະບອກເທົ່າກັບ 6 ສ່ວນຮ້ອຍ, ທ້ອນໂຮມອາວຸດລ່າເນື້ອໄດ້ 207 ກະບອກ, ບັນລຸໄດ້ 38 ສ່ວນຮ້ອຍ,ອາວຸດເສີກ 1 ກະບອກບັນລຸໄດ້ຮ້ອຍສ່ວນຮ້ອຍ ແລະ ໄດ້ຂຽນບົດບັນທຶກຕໍ່ເປົ້າໝາຍມີອາວຸດລ່າເນື້ອ 1 ຄົນ, ພາຍຫຼັງສໍາເລັດກອງປະຊຸມແລ້ວຄະນະປະທານ, ແຂກທີຖືກເຊີນທຸກຂະແໜງການຂອງເມືອງ ແລະ ອົງການປົກຄອງບ້ານແຕ່ລະບ້ານທັງ 17 ບ້ານ ໄດ້ພ້ອມກັນທໍາລາຍ, ຈູດ, ເຜົາ ຢາເສບຕິດ ແລະອາວຸດລ່າສັດທຸກຊະນິດ,ທຸກປະເພດຕື່ມອີກ

ແຫຼ່ງຂ່າວ: Media Laos

ໂດຍຕອບສະໜອງຕາມຄຳເຊື້ອເຊີນຂອງ ສະຫາຍ ພັນຄຳ ວິພາວັນ, ນາຍົກລັດຖະມົນຕີ ແຫ່ງ ສປປ ລາວ, ສະຫາຍ ມານູເອັນ ມາເຣໂຣ ກຣູຊ໌ (Manuel Marrero Cruz), ນາຍົກລັດຖະມົນຕີ ແຫ່ງ ສາທາລະນະລັດ ກູບາ ແລະ ຄະນະ ໄດ້ເດີນທາງມາຢ້ຽມຢາມ ສປປ ລາວ ຢ່າງເປັນທາງການ, ໃນວັນທີ 02-04 ຕຸລາ 2022, ເພື່ອເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີ ທີ່ມີມາແຕ່ດົນນານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ກູບາ ຖານອ້າຍນ້ອງຮ່ວມອຸດົມການອັນດຽວກັນ ໃຫ້ນັບມື້ເຂັ້ມແຂງ ແລະ ແຕກດອກອອກຜົນຍິ່ງໆຂຶ້ນໃນຊຸມປີຕໍ່ຫນ້າ. ພິທີຕ້ອນຮັບຢ່າງເປັນທາງການ ໄດ້ຈັດຂຶ້ນຢ່າງສົມກຽດ ທີ່ສຳນັກງານນາຍົກລັດຖະມົນຕີ, ໃນຕອນບ່າຍຂອງວັນທີ 02 ຕຸລາ 2022,

ຈາກນັ້ນ ກໍ່ໄດ້ມີການພົບປະສອງຝ່າຍ ຢ່າງເປັນທາງການ, ເຊິ່ງ ຄະນະຜູ້ແທນຝ່າຍລາວ ນໍາໂດຍ ສະຫາຍ ພັນຄຳ ວິພາວັນ, ນາຍົກລັດຖະມົນຕີ ແຫ່ງ ສປປ ລາວ ແລະ ຝ່າຍກູບາ ນຳໂດຍ ສະຫາຍ ມານູເອັນ ມາເຣໂຣ ກຣູຊ໌, ນາຍົກລັດຖະມົນຕີ ແຫ່ງ ສາທາລະນະລັດ ກູບາ. ໃນໂອກາດດັ່ງກ່າວ, ສະຫາຍ ນາຍົກລັດຖະມົນຕີ ພັນຄຳ ວິພາວັນ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງມາຍັງ ສະຫາຍ ມານູເອັນ ມາເຣໂຣ ກຣູຊ໌, ນາຍົກລັດຖະມົນຕີ ແຫ່ງ ສ.ກູບາ ທີ່ໄດ້ນຳພາຄະນະຜູ້ແທນຂັ້ນສູງ ເດີນທາງມາຢ້ຽມຢາມ ສປປ ລາວ ເປັນຄັ້ງທຳອິດ ແລະ ເປັນຄັ້ງປະຫວັດສາດ, ເຊິ່ງເປັນ​ນິ​ມິດ​ໝາຍ​ອັນ​ດີໃນການສືບຕໍ່ຮັດແໜ້ນ ແລະ ​ເສີມຂະຫຍາຍສາຍພົວພັນ​ມິດ​ຕະ​ພາບ ແລະ ການຮ່ວມມືຖານອ້າຍນ້ອງ ທີ່ເປັນມູນເຊື້ອອັນດີມາແຕ່ດົນນານ ລະຫວ່າງ ສອງຊາດ ລາວ-ກູບາ. ການພົບປະໃນຄັ້ງນີ້ ສອງຝ່າຍ ໄດ້ປຶກສາຫາລືແລກປ່ຽນຄຳຄິດເຫັນຢ່າງກົງໄປກົງມາ, ຕີລາຄາຄືນສະພາບການພົວພັນຮ່ວມມືສອງຝ່າຍ ໃນໄລຍະຜ່ານມາ ແລະ ກຳນົດທິດທາງແຜນການຮ່ວມມືໃນຕໍ່ຫນ້າ, ເຊິ່ງ ສອງຝ່າຍ ໄດ້ຕີລາຄາສູງຕໍ່ສາຍພົວພັນຮ່ວມມືສອງຝ່າຍທີ່ເປັນມູນເຊື້ອມາແຕ່ຍາວນານ, ບົນພື້ນຖານແຫ່ງການເຂົ້າອົກເຂົ້າໃຈ ແລະ ຊ່ວຍເຫຼືອເຊິ່ງກັນ ແລະ ກັນ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ກູບາ, ພາຍຫຼັງທີ່ສອງປະເທດ ໄດ້ສ້າງຕັ້ງສາຍພົວພັນການທູດນຳກັນ ໃນວັນທີ 04 ພະຈິກ 1974 ເປັນຕົ້ນມາ, ເຊິ່ງ ການພົວພັນຮ່ວມມືດ້ານການເມືອງ ແມ່ນສືບຕໍ່ຢູ່ໃນລະດັບດີເລີດ ແລະ ນັບມື້ນັບໜັກແໜ້ນຍິ່ງໆຂຶ້ນ, ສະແດງອອກໃນການພົບປະແລກປ່ຽນການຢ້ຽມຢາມເຊິ່ງກັນ ແລະ ກັນ ຂອງການນຳຂັ້ນສູງຂອງສອງປະເທດ ລາວ-ກູບາ ເປັນແຕ່ລະໄລຍະ, ໄດ້ມີການປຶກສາຫາລື ແລະ ແລກປ່ຽນຄຳຄິດເຫັນກັນ ໃນບັນຫາຕ່າງໆຢ່າງເປັນປະຈຳ ລວມທັງ ໃນຮູບແບບກອງປະຊຸມທາງໄກໃນໄລຍະການແຜ່ລະບາດຂອງພະຍາດໂຄວິດ-19.

ພ້ອມດຽວກັນນີ້, ສອງຝ່າຍ ກໍ່ໄດ້ຕີລາຄາສູງຕໍ່ການຮ່ວມມື ດ້ານສາທາລະນະສຸກ, ດ້ານການສຶກສາ-ກິລາ, ເຊິ່ງເປັນຂະແໜງການຮ່ວມມືທີ່ມີມູນເຊື້ອມາແຕ່ດົນນານ ແລະ ພົ້ນເດັ່ນ ມີປະສິດທິພາບ ແລະ ປະສິດທິຜົນສູງ ໃນໄລຍະຜ່ານມາ. ນອກຈາກນີ້, ສອງຝ່າຍ ກໍ່ໄດ້ແຈ້ງໃຫ້ກັນຊາບໂດຍຫຍໍ້ ກ່ຽວກັບ ສະພາບການພາຍໃນທີ່ພົ້ນເດັ່ນ, ແລກປ່ຽນຄຳຄິດຄຳເຫັນຕໍ່ກັບສະພາບການພາກພື້ນ ແລະ ສາກົນ ທີ່ມີຄວາມສົນໃຈຮ່ວມກັນ. ໃນໂອກາດນີ້, ສະຫາຍ ນາຍົກລັດຖະມົນຕີ ພັນຄຳ ວິພາວັນ ໄດ້ຕາງໜ້າໃຫ້ ພັກ, ລັດຖະບານ ແລະ ປະຊາຊົນລາວ ສະແດງຄວາມຂອບໃຈ ແລະ ຮູ້ບຸນຄຸນຕໍ່ການສະໜັບສະໜູນຊ່ວຍເຫຼືອອັນລ້ຳຄ່າ ໃຫ້ແກ່ ສປປ ລາວ ຕະຫຼອດໄລຍະຜ່ານມາ ເປັນຕົ້ນແມ່ນ ການສະໜອງທຶນການສຶກສາ ເພື່ອການພັດທະນາຊັບພະຍາກອນມະນຸດ, ການສົ່ງຊ່ຽວຊານແພດຫມໍ ກູບາ ມາຊ່ວຍເຫຼືອໃຫ້ຄວາມຮູ້ແກ່ຝ່າຍລາວ, ການສົ່ງທີມຄູຝຶກມວຍສາກົນ ເພື່ອມາຝຶກແອບໃຫ້ແກ່ນັກກິລາລາວ ໃນການເຂົ້າຮ່ວມງານກິລາສຳຄັນຕ່າງໆ ແລະ ການຊ່ວຍເຫຼືອອື່ນໆ. ສອງຝ່າຍ ຢືນຢັນເຖິງຄວາມມຸ້ງໝັ້ນຈະສືບຕໍ່ຊອກຫາທຸກວິທີທາງທີ່ເປັນໄປໄດ້ ເພື່ອເສີມຂະຫຍາຍການຮ່ວມມືໃນດ້ານຕ່າງໆ ໂດຍສະເພາະດ້ານເສດຖະກິດ-ການຄ້າ ໄປສູ່ຄວາມສໍາເລັດອັນໃໝ່ຮ່ວມກັນ. ໃນຕອນທ້າຍ, ສະຫາຍນາຍົກ ລັດຖະມົນຕີ ພັນຄຳ ວິພາວັນ ໄດ້ອວຍພອນໃຫ້ ສະຫາຍ ນາຍົກລັດຖະມົນຕີ ມານູເອັນ ມາເຣໂຣ ກຣູຊ໌ ພ້ອມດ້ວຍຄະນະຜູ້ແທນຂັ້ນສູງຂອງ ກູບາ ຈົ່ງປະສົບຜົນສຳເລັດໃນໂອກາດເດີນທາງມາຢ້ຽມຢາມ ສປປ ລາວ ໃນຄັ້ງນີ້, ອວຍພອນໃຫ້ສາຍພົວພັນມິດຕະພາບ ແລະ ການຮ່ວມມືທີ່ເປັນມູນເຊື້ອອັນດີງາມທີ່ມີມາແຕ່ດົນນານ ລະຫວ່າງ ສອງປະເທດ ລາວ-ກູບາ ຈົ່ງຫມັ້ນຍືນ, ສືບຕໍ່ເຂັ້ມແຂງ, ຂະຫຍາຍຕົວ ແລະ ມີປະສິດທິຜົນຍິ່ງຂຶ້ນ.

ພາຍຫຼັງສຳເລັດການພົບປະສອງຝ່າຍ, ສະຫາຍ ນາຍົກລັດຖະມົນຕີ ພັນຄຳ ວິພາວັນ ແລະ ສະຫາຍ ນາຍົກລັດຖະມົນຕີ ມານູເອັນ ມາເຣໂຣ ກຣູຊ໌ ກໍ່ໄດ້ເຂົ້າຮ່ວມເປັນສັກຂີພິຍານໃນພິທີລົງນາມເອກະສານບົດບັນທຶກຄວາມເຂົ້າໃຈ ຈຳນວນ 4 ສະບັບ ຄື:

1.) ບົດບັນທຶກຄວາມເຂົ້າໃຈ ລະຫວ່າງ ກະຊວງສຶກສາທິການ ແລະ ກິລາ ແຫ່ງ ສປປ ລາວ ແລະ ກະຊວງສຶກສາຊັ້ນສູງ ແຫ່ງ ສ.ກູບາ ວ່າດ້ວຍການຮ່ວມມືດ້ານການສຶກສາຊັ້ນສູງ ແລະ ຄົ້ນຄວ້າວິທະຍາສາດໃນໄລຍະປີ 2022-2027;

2.) ບົດບັນທຶກຄວາມເຂົ້າໃຈ ລະຫວ່າງ ກະຊວງກະສິກໍາ ແລະ ປ່າໄມ້ ແຫ່ງ ສປປ ລາວ ແລະ ກະຊວງກະສິກໍາ ແຫ່ງ ສ.ກູບາ ກ່ຽວກັບການຮ່ວມມືໃນຂົງເຂດກະສິກໍາ;

3.) ແຜນການຮ່ວມມືດ້ານການແພດ ລະຫວ່າງ ກະຊວງສາທາລະນະສຸກ ແຫ່ງ ສປປ ລາວ ແລະ ກະຊວງສາທາລະນະສຸກ ແຫ່ງ ສ.ກູບາ;

4.) ບົດບັນທຶກຄວາມເຂົ້າໃຈການຮ່ວມມື ລະຫວ່າງ ມະຫາວິທະຍາໄລແຫ່ງຊາດລາວ ແລະ ມະຫາວິທະຍາໄລ ລາຮາວານ ໃນຂົງເຂດການສຶກສາ.

ການພົບປະສອງຝ່າຍຄັ້ງນີ້ ໄດ້ດຳເນີນໄປດ້ວຍບັນຍາກາດແຫ່ງໄມຕີຈິດມິດຕະພາບ, ສະໜິດສະໜົມ, ສ້າງສັນ, ກົງໄປກົງມາ ແລະ ມີຄວາມເຂົ້າໃຈກັນຖານສະຫາຍອ້າຍນ້ອງທີ່ແທ້ຈິງ ຮ່ວມອຸດົມການສັງຄົມນິຍົມອັນດຽວກັນ, ສ່ອງແສງໃຫ້ເຫັນເຖິງສາຍພົວພັນມິດຕະພາບທີ່ເປັນມູນເຊື້ອທີ່ມີມາຢ່າງຍາວນານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ກູບາ.

ພາບ-ຂ່າວ: ກົມການຂ່າວ, ກະຊວງການຕ່າງປະເທດ

ແຫລ່ງຂ່າວຈາກ ແຂວງເຊກອງ ໃຫ້ຮູ້ວ່າ: ກອງປະຊຸມດໍາເນີນຊີວິດການ ເມືອງ ຕິດພັນກັບການເຜີຍແຜ່ເຊື່ອມຊຶມເອກະສານສໍາຄັນຂອງພັກ ເພື່ອເປັນບ່ອນອີງໃຫ້ແກ່ການປະເມີນສະມາຊິກພັກ, ໜ່ວຍພັກປອດໃສ ເຂັ້ມແຂງ ໜັກແໜ້ນ ແລະ ການປະເມີນຄືນແຜນກໍານົດສ້າງພະນັກງານນໍາພາ-ຄຸ້ມຄອງປະຈໍາປີ 2022 ຂອງຄະນະພັກຮາກຖານພະແນກຖະແຫລງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ແຂວງເຊກອງ ຈັດຂຶ້ນໃນວັນທີ 30 ກັນຍາ 2022 ໂດຍການເປັນປະທານຂອງ ສະຫາຍ ບຸນທົງ ຖິ່ນດອນໂຂງ ປະທານກວດກາຄະນະພັກຮາກຖານ, ຮອງຫົວໜ້າພະແນກ ຖວທ, ມີຄະນະພັກຮາກຖານ, ຄະນະໜ່ວຍພັກ ແລະ ສະມາຊິກພັກສົມບູນ-ສໍາຮອງ ເຂົ້າຮ່ວມ.ສະຫາຍ ບຸນທົງ ຖິ່ນດອນໂຂງ ໄດ້ໃຫ້ຮູ້ວ່າ:

ກອງປະຊຸມເຜີຍແຜ່ເຊື່ອມຊຶມຄັ້ງນີ້ ແມ່ນມີຄວາມໝາຍສໍາຄັນ ແນໃສ່ສ້າງຄວາມຮັບຮູ້, ຄວາມເຂົ້າໃຈ ແລະ ຄວາມເປັນເອກະພາບຕໍ່ມະຕິ, ຄໍາສັ່ງແນະນໍາ ແລະ ແຈ້ງການຕ່າງໆຂອງຄະນະພັກຂັ້ນເທິງໃນການປະເມີນສະມາຊິກພັກ, ປະເມີນໜ່ວຍພັກປອດໃສ ເຂັ້ມແຂງ ໜັກແໜ້ນ ປະຈໍາປີ 2022 ແລະ ການປະເມີນຄືນແຜນກໍານົດສ້າງພະນັກງານນໍາ-ຄຸ້ມຄອງ ຂອງພະແນກ ຖວທ ແຂວງປະຈໍາປີ 2022 ໃຫ້ໄດ້ທັງດ້ານປະລິມານ ແລະ ຄຸນນະພາບ.ເອກະສານທີ່ນໍາມາເຜີຍແຜ່ຄັ້ງນີ້, ປະກອບມີ:

ຄໍາສັ່ງຂອງກົມການເມືອງສູນກາງພັກ ວ່າດ້ວຍການເພີ່ມທະວີການກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ;

ຄໍາແນະນໍາຂອງຄະນະຈັດຕັ້ງສູນກາງພັກ ກ່ຽວກັບການຈັດຕັ້ງປະຕິບັດ ຄໍາສັ່ງຂອງກົມການເມືອງສູນກາງພັກ; ມະຕິຂອງຄະນະບໍລິຫານງານສູນກາງພັກ ວ່າດ້ວຍການເພີ່ມທະວີການນໍາພາຂອງພັກ ເພື່ອສ້າງການຫັນປ່ຽນຢ່າງແຂງແຮງ ແລະ ເລິກເຊິ່ງ ວຽກງານພະນັກງານ; ຄໍາສັ່ງຂອງຄະນະເລຂາທິການສູນກາງພັກ ວ່າດ້ວຍການປັບປຸງການຈັດຕັ້ງຂອງບັນດາກະ ຊວງ-ອົງການ ແລະ ທ້ອງຖິ່ນ;

ຄໍາແນະນໍາວ່າດ້ວຍການຈັດຕັ້ງຜັນຂະຫຍາຍຄໍາສັ່ງຂອງຄະນະເລຂາທິການສູນກາງພັກ; ມະຕິຂອງຄະນະປະຈໍາພັກແຂວງ; ແຈ້ງການຂອງກະ ຊວງພາຍໃນ ແລະ ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ກ່ຽວກັບວຽກງານການກໍານົດແຜນສ້າງພະນັກງານນໍາພາ-ຄຸ້ມຄອງ ແລະ ການປັບປຸງກົງຈັກການຈັດຕັ້ງ.

ແຫຼ່ງຂ່າວ: ຂປລ

ຕາມການລາຍງານຈາກພະແນກ ແຮງງານ ແລະ ສະຫວັດີການສັງຄົມ(ຮສສ) ແຂວງອັດຕະປື ໃນນາມກອງ ເລຂາຜູ້ປະຈໍາການຄະນະກໍາມະການຄຸ້ມຄອງໄພພິ ບັດຂັ້ນແຂວງ ໄດ້ລາຍງານໃນຕອນແລງວັນທີ 29 ກັນຍາ 2022 ກ່ຽວກັບການປະເມີນຜົນກະທົບ ຈາກໄພພິບັດລົມພະຍຸ ຫົວທີ 16 ໂນຣູ ລະຫວ່າງວັນທີ 27-29 ກັນຍາ 2022 ນີ້ວ່າ:

ປັດຈຸບັນ, ແຂວງອັດຕະປື ແມ່ນໄດ້ຮັບຜົນກະທົບຈາກພາຍຸດັ່ງກ່າວ, ເຮັດໃຫ້ເຮືອນຊານບ້ານຊ່ອງ, ໂຮງຮຽນ ໄດ້ຮັບຜົນເສຍຫາຍ, ສະພາບເສັ້ນທາງຖືກຕັດຂາດ ດິນເຊາະເຈື່ອນ, ເນື້ອທີ່ທຳການຜະລິດ-ສັດລ້ຽງເສຍຫາຍ ເຮັດໃຫ້ຊີວິດການເປັນຢູ່ຂອງປະຊາຊົນພົບຄວາມຫຍຸ້ງຍາກລໍາບາກ, ໃນນັ້ນ ມີ 4 ເມືອງໄດ້ຮັບຜົນກະທົບໜັກ ຄື: ເມືອງສະໜາມໄຊ, ເມືອງພູວົງ, ສາມັກຄີໄຊ ແລະ ເມືອງຊານໄຊ. ຜ່ານການສັງລວມສະພາບຜົນກະທົບ ແລະ ຄວາມເສຍຫາຍ ເບື້ອງຕົ້ນມີຄື:

• ເມືອງສະໜາມໄຊ: ໄດ້ຮັບຜົນກະທົບຕົວຈິງມີ 8 ຄຸ້ມ 2 ບ້ານຄື: ຄຸ້ມທ່າອວນ, ຄຸ້ມໂຄກກ່ອງ, ຄຸ້ມດອນມ່ວງ, ຄຸ້ມດອນບົກ ບ້ານຫີນລາດ, ຄຸ້ມດົງບາກໃໝ່ຫີນຄຳ, ບ້ານໜອງແຂ້, ຄຸ້ມທ່າແສງຈັນ, ຄຸ້ມສະໝອງ, ມີເນື້ອທີ່ນາຖືກກະທົບ 714 ເຮັກຕາ, ສັດລ້ຽງ: ປະເພດໄກ່ 700 ໂຕ, ງົວ 28 ໂຕ, ຄວາຍ 5 ໂຕ, ໝູ 20 ໂຕ, ແບ້ 4 ໂຕ; ເມືອງພູວົງ ໄດ້ຮັບຜົນກະທົບຕົວຈິງ 15 ບ້ານ, 4.300 ຄອບຄົວ, ເນື້ອທີ່ນາຖືກກະທົບ 1.200 ເຮັກຕາ ເນື້ອທີ່ສວນ 100 ເຮັກຕາ, ສັດລ້ຽງປະເພດສັດປີກ 24 ໂຕ, ໜອງປາ 15 ໜອງ, ເສັ້ນທາງຄົມມະນາຄົມເປ້ເພ 4 ເສັ້ນ, ທາງຫລວງ 1 ເສັ້ນ ແລະ ທາງຊອຍ 3 ເສັ້ນ;

• ເມືອງສາມັກຄີໄຊ ໄດ້ຮັບຜົນກະທົບຕົວຈິງມີ 13 ບ້ານ, 831 ຄອບຄົວ ແລະ ມີຜົນເສຍຫາຍທາງດ້ານກະສິກໍາການຄົມມະນາຄົມ ແລະ ທາງດ້ານອື່ນໆ ໃນນັ້ນ, ມີເນື້ອທີ່ຖືກຜົນກະທົບທັງໝົດ 687,8 ເຮັກຕາ, ເນື້ອທີ່ເຂົ້ານາປີ 242,8 ເຮັກຕາ, ເນື້ອທີ່ພືດສະບຽງອາຫານ 19,9 ເຮັກຕາ, ເນື້ອທີ່ພືດເປັນສິນຄ້າ 96 ເຮັກຕາ, ໜອງປາເສຍຫາຍ 96 ໜອງ, ປາທີ່ເສຍຫາຍ 1.202.800 ໂຕ, ແບ້ 8 ໂຕ, ໝູ 3 ໂຕ, ສັດປີກ 703 ໂຕ, ຈັກສູບນໍ້າຄອງເໝືອງຊົນ ລະປະທານນາພອກ 1 ເຄື່ອງ, ເສັ້ນທາງຄົມມະນາຄົມ 10 ເສັ້ນ, ໄລຍະທາງ 34,8 ກິໂລແມັດ ແລະ ໂຮງຮຽນ 1 ແຫ່ງ, ຄາດຄະເນມູນຄ່າເສຍຫາຍທັງໝົດເກືອບ 13 ຕື້ກີບ;

• ເມືອງຊານໄຊ ໄດ້ຮັບຜົນກະທົບຕົວຈິງມີ 24 ບ້ານ, 1.680 ຄອບຄົວ, ມີ 840 ຫລັງຄາເຮືອນ, ເນື້ອທີ່ນາຖືກກະທົບ 1.920 ເຮັກຕາ, ເນື້ອທີ່ສວນ 79 ເຮັກຕາ, ສັດປີກ 5.463 ໂຕ, ງົວ 52 ໂຕ, ຄວາຍ 24 ໂຕ, ໂຮງຮຽນ 7 ແຫ່ງ, ນໍ້າລິນ 5 ແຫ່ງ, ວິດຖ່າຍ 52 ບໍ່, ເສັ້ນທາງຄົມມະນາຄົມເປ່ເພ 9 ເສັ້ນ, ທາງຫລວງ 1 ເສັ້ນ, ທາງຊອຍ 8 ເສັ້ນ, ລວມມູນຄ່າເສຍຫາຍ 2,8 ຕື້ກວ່າກີບ.
• ສຳລັບການຊ່ວຍເຫລືອເບື້ອງຕົ້ນ, ທາງແຂວງໄດ້ນຳເຄື່ອງຊ່ວຍເຫລືອບັນເທົ່າທຸກ ມີ: ເຂົ້າສານ 5.000 ກິໂລ (5 ໂຕນ), ນໍ້າດື່ມ 1.000 ແພັກ, ປ໋ອງປາ 100 ແກັດ, ໝີ່ໄວໆ 100 ແກັດໃຫຍ່, ສັງກະສີ 120 ແຜ່ນ, ຜ້າຫົ່ມ 120 ຜືນ ແລະ ເຄື່ອງໃຊ້ສອຍໃນຊີວິດປະຈໍາວັນອີກຈໍານວນໜຶ່ງ ລວມມູນຄ່າການຊ່ວຍເຫລືອທັງໝົດ 800 ລ້ານກວ່າກີບ.

ພ້ອມນີ້, ຄະນະກຳມະການຄຸ້ມຄອງໄພພິບັດຂັ້ນແຂວງ ໄດ້ຈັດກຳລັງ ປກຊ ລົງປະຈຳພາກສະໝາມປະສານສົມທົບກັບ ເມືອງທີ່ໄດ້ຮັບຜົນກະທົບ ນໍາໃຊເຮືອ ແລະ ກຳລັງ ປກຊ ເພື່ອຍົກຍ້າຍຊ່ວຍເຫລືອປະຊາຊົນ ທີ່ໄດ້ຮັບຜົນກະທົບ ແລະ ໄດ້ຊ່ວຍເຫລືອນັກຮຽນ-ຄູອາຈານ ທີ່ຕິດຢູ່ໂຮງຮຽນ ມຕ ຈະເລີນໄຊ, ປັດຈຸບັນໄດ້ຮັບການຊ່ວຍເຫລືອ ແລະ ປອດໄພດີ.

ແຫຼ່ງຂ່າວ: ຂປລ

ການແຂ່ງຂັນຊ່ວງເຮືອ ໃນງານບຸນອອກພັນສາປະວໍລະນາ ແລະ ບຸນຊ່ວງເຮືອ ປະຈຳປີ 2022 ທີ່ທ່າວັດຈັນ ເມືອງຈັນທະບູລີ ນະຄອນຫຼວງວຽງຈັນ ຈະເປີດສາກຂຶ້ນໃນວັນທີ 10 ຕຸລານີ້ ຊຶ່ງມີການຊິງໄຊພຽງແຕ່ 3 ລາຍການ ແຕ່ປີນີ້ບໍ່ມີເຮືອສູດ ຂະນະທີ່ປັດຈຸບັນມີບັນດາພາກສ່ວນແຈ້ງເຈດຈຳນົງເຂົ້າຮ່ວມແຂ່ງຂັນເຖິງ 40 ລຳແລ້ວ, ໃນນີ້ເຮືອກິລາ ມີ 20 ລຳ ແລະ ເຮືອປະເພນີຍິງ-ຊາຍ ມີ 20 ລຳ.

ພິທີຖະແຫຼງຂ່າວຜ່ານສື່ມວນຊົນ ກ່ຽວກັບການກຽມຄວາມພ້ອມຈັດການແຂ່ງຂັນຊ່ວງເຮືອ ໃນງານບຸນອອກພັນສາປະວໍລະນາ ແລະ ບຸນຊ່ວງເຮືອ ປະຈຳປີ 2022 ທີ່ທ່າວັດຈັນ ເມືອງຈັນທະບູລີ ນະຄອນຫຼວງວຽງຈັນ, ໂດຍທ່ານ ພຸດທະພອນ ໂຄດປັນຍາ ຮອງເຈົ້າເມືອງຈັນທະບູລີ, ຮອງປະທານຈັດງານ, ຄະນະຮັບຜິດຊອບຈັດສະຖານທີ່ງານດັ່ງກ່າວ ໃຫ້ຮູ້ວ່າ:

ເພື່ອເປັນການຮັກສາ ແລະ ເສີມຂະຫຍາຍງານບຸນປະເພນີທີ່ເຄີຍສືບທອດກັນມາແຕ່ບູຮານນະການໃຫ້ດຳລົງຄົງຢູ່ນຳຊາວລາວຕະຫຼອດໄປ ແນໃສ່ສົ່ງເສີມການໂຄສະນາ, ວາງສະແດງ ແລະ ຈຳໜ່າຍສິນຄ້າ ເພື່ອເຮັດໃຫ້ຜະລິດຕະພັນພາຍໃນ ໃຫ້ນັບມື້ເຕີບໃຫຍ່ຂະຫຍາຍຕົວຢ່າງກວ້າງຂວາງ ແລະ ໄດ້ມີໂອກາດເສີມຂະຫຍາຍທ່າແຮງບົ່ມຊ້ອນຂອງສິນຄ້າດັ່ງກ່າວ ເພື່ອໃຫ້ປະຊາຊົນລາວບັນດາເຜົ່າທີ່ໄດ້ມາທ່ຽວງານບຸນໄດ້ຊື້, ຂາຍ, ແລກປ່ຽນຜະລິດຕະພັນພາຍໃນ ແລະ ທັງເປັນການສົ່ງເສີມການທ່ອງທ່ຽວພາຍໃນ ລາວທ່ຽວລາວ ໃຫ້ກວ້າງຂວາງ ແລະ ເປັນຂະບວນການຟົດຟື້ນ.

ສະນັ້ນ, ປີນີ້ ເມືອງຈັນທະບູລີ ໃນນາມເປັນເຈົ້າການ ຈັດງານດັ່ງກ່າວ ຈະໄດ້ຈັດສັນສະຖານທີ່ໃຫ້ແທດເໝາະ ແລະ ອຳນວຍຄວາມສະດວກໃຫ້ແກ່ຊາວຄ້າຂາຍຢ່າງທົ່ວເຖິງ ຄາດວ່າຈະມີບັນດາຫົວໜ່ວຍທຸລະກິດທີ່ເກັບຝາກປີ້ລົດໃຫຍ່, ລົດຈັກ, ລົດຖີບ, ບັນດາຫ້າງຮ້ານທີ່ມາວາງສະແດງສິນຄ້າ, ຂາຍສິນຄ້າ ແລະ ຂາຍເຂົ້າຫຼາມປີ້ງໄກ່ຫຼາຍກວ່າ 600 ຫົວໜ່ວຍ.

ສຳລັບສະຖານທີ່ຈັດຂາຍສິນຄ້າ ແມ່ນກຳນົດຂອບເຂດສວນເຈົ້າອານຸວົງ, ເສັ້ນທາງເຈົ້າຟ້າງຸ່ມ ທັງສອງຟາກ ນັບແຕ່ໂຮງແຮມລ້ານຊ້າງ ຂຶ້ນມາຫາສາມແຍກປາກປ່າສັກ ແລະ ເສັ້ນທາງດ້ານໜ້າ ແລະ ດ້ານຫຼັງວິທະຍາໄລເຕັກນິກປາກປ່າສັກ ໂດຍຈະຈົ່ງທາງເຂົ້າ-ອອກ ໃຫ້ມວນຊົນ ແລະ ລົດການນຳເຂົ້າມາໄດ້ຢ່າງສະດວກ ສ່ວນຈຸດປ່ອຍເຮືອແມ່ນກຳນົດເຂດບ້ານສີຖານເໜືອ ເມືອງສີໂຄດຕະບອງ ໄປຫາ ຜາມໄຊ ໜ້າວັດຈັນ ເມືອງຈັນທະບູລີ. ແນວໃດກໍຕາມ, ຫາກວ່າພົບເຫັນກໍລະນີ ບັນດາຫົວໜ່ວຍທຸລະກິດມີການລະເມີດ ໂດຍສະເພາະຈຸດເກັບປີ້ຝາກລົດ ເກັບຄ່າບໍລິການເກີນລາຄາ ເປັນຕົ້ນ ລາຄາທີ່ກຳນົດໄວ້ ລົດຖີບ ລາຄາ 5.000 ກີບ, ລົດຈັກ 10.000 ກີບ ແລະ ລົດໃຫຍ່ 20.000 ກີບ ແມ່ນຈະປະຕິບັດກົດລະບຽບຢ່າງເຂັ້ມງວດ.

ຂະນະທີ່ ທ່ານ ບຸນເຖິງ ສຸວັນນະສີ ຮອງເລຂາພັກເມືອງ, ປະທານກວດກາພັກ-ລັດເມືອງ ທັງເປັນຮອງປະທານຈັດງານ ຄະນະຮັບຜິດຊອບຈັດການແຂ່ງຂັນ ເມື່ອອາທິດຜ່ານມາ ພວກເຮົາໄດ້ມີການລົງຕິດຕາມ ແລະ ກວດກາແລວນໍ້າທີ່ຈະຈັດການແຂ່ງຂັນ ກໍສາມາດປະເມີນລວງເລິກຂອງນໍ້າຢູ່ປະມານ 3-4 ແມັດ ຊຶ່ງໃນວັນທີ 3 ຕຸລານີ້ ທີ່ຫ້ອງວ່າການປົກຄອງເມືອງຈັນທະບູລີ ຈະມີການຈັບສະຫຼາກແບ່ງສາຍຢ່າງເປັນທາງການ ສ່ວນມື້ແຂ່ງຂັນແມ່ນກຳນົດວັນທີ 10 ຕຸລາ 2022 ຈະແຂ່ງຂັນເຮືອນກິລາ ປີນີ້ມີຈຳນວນ 20 ລຳເຂົ້າຮ່ວມ ແລະ ວັນທີ 11 ຕຸລາ 2022 ຈະແຂ່ງຂັນເຮືອປະເພນີ ມີຈຳນວນ 20 ລຳ, ຍິງ 7 ລຳເຂົ້າຮ່ວມ.

ແນວໃດກໍຕາມ, ພວກເຮົາຈະເນັ້ນຈັດໃຫ້ເປັນລັກສະນະປະເພນີ ສະນັ້ນ ປີນີ້ຈະບໍ່ມີເຮືອສູດບັນຈຸແຂ່ງຂັນ. ສ່ວນປະເພດຂັນລາງວັນ ແລະ ເງິນສົດ ປະເພດເຮືອກິລາ 12 ສີພາຍ ລາງວັນທີ 1 ຂັນໂລ 1 ໜ່ວຍ ມູນຄ່າ 1.850.000 ກີບ ພ້ອມເງິນສົດ 10.000.000 ກີບ, ລາງວັນທີ 2 ຂັນໂລ 1 ໜ່ວຍ ມູນຄ່າ 1.850.000 ກີບ ພ້ອມເງິນສົດ: 8.000.000 ກີບ, ລາງວັນທີ 3 ຂັນໂລ 1 ໜ່ວຍ ມູນຄ່າ 1.850.000 ກີບ ພ້ອມເງິນສົດ 6.000.000 ກີບ ແລະ ລາງວັນທີ 4 ບໍ່ມີຂັນ ມີເງິນສົດ 4.000.000 ກີບ; ປະເພດເຮືອປະເພນີຍິງ ແລະ ເຮືອປະເພນີຊາຍ 55 ສີພາຍ ໄດ້ຮັບເທົ່າກັນ ລາງວັນທີ 1 ຂັນເງິນນ້ຳໜັກ 1 ກິໂລກຣາມ ມູນຄ່າ 19.700.000 ກີບ ພ້ອມເງິນສົດ 20.000.000 ກີບ, ລາງວັນທີ 2 ຂັນເງິນນ້ຳໜັກ 0,75 ກຣາມ ມູນຄ່າ 15.250.000 ກີບ ພ້ອມເງິນສົດ 15.000.000 ກີບ, ລາງວັນທີ 3 ຂັນເງິນນ້ຳໜັກ 0,5 ກຣາມ ມູນຄ່າ 12.000.000 ກີບ ພ້ອມເງິນສົດ 10.000.000 ກີບ ແລະ ລາງວັນທີ 4 ບໍ່ມີຂັນ ມີແຕ່ເງິນສົດ 6.000.000 ກີບ.

ແຫຼ່ງຂ່າວ: ໜັງສືພິມສຶກສາ-ກິລາລາຍວັນ