ໃນໄລຍະ 3 ເດືອນຜ່ານມາ, ກອງບັນຊາການ ປກສ ແຂວງອຸດົມໄຊ ໄດ້ນໍາພາບັນດາພະນັກງານວິຊາ ສະເພາະຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ສາມາດເກັບກໍາ ແລະ ມ້າງຄະດີຢາເສບຕິດໄດ້ 60 ກວ່າເລື່ອງ ພ້ອມທັງຢຶດຂອງກາງໄດ້ເປັນຈໍານວນຫຼວງຫຼາຍ.

ພັຕ ໄຊສະຫວາດ ວົງສະຫວັນ ຫົວຫນ້າພະແນກຕໍາຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງໄດ້ລາຍງານ ໃນກອງປະຊຸມສະຫຼຸບຖອດຖອນບົດຮຽນວ່າ ດ້ວຍການແກ້ໄຂບັນຫາຢາເສບຕິດ ໃນ ວັນທີ 3 ສິງຫາ 2022 ໂດຍການເປັນປະທານຂອງ ພັທ ສອນວິໄລ ຕຸລາທອງ ຮອງຫົວຫນ້າ ກອງ ບັນຊາການ ປກສ ແຂວງ ວ່າ: ການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ 3 ເດືອນຜ່ານມາ, ເຊິ່ງເລີ່ມແຕ່ເດືອນພຶດສະພາ-ເດືອນກໍລະກົດ 2022; ໃນນັ້ນ, ຜ່ານການດໍາເນີນໄລຍະ 3 ເດືອນຜ່ານມາ ສາມາດເກັບກໍາ ແລະ ມ້າງຄະດີຢາເສບຕິດໄດ້ທັງຫມົດ 61 ເລື່ອງ, ກັກຕົວຜູ້ຖືກຫາໄດ້ 75 ຄົນ ຍິງ 13 ຄົນ ຄື: ຢູ່ ແຂວງ 16 ເລື່ອງ ມີຜູ້ຖືກຫາ 20 ຄົນ ແລະ ຢູ່ບັນດາເມືອງ 45 ເລື່ອງ ມີຜູ້ຖືກຫາ 55 ຄົນ; ພ້ອມດຽວກັນ, ຍັງສາມາດຢຶດຂອງກາງທີ່ພົວພັນກັບຄະດີໄດ້ຫຼາຍລາຍການ ຄື: ເຄື່ອງອັດເມັດຢາບ້າ 2 ເຄື່ອງ, ຢາເສບຕິດ ປະເພດຢາບ້າ 94.348 ເມັດ, ເຮ ໂຣອິນ 2,5 ກຼາມ, ຢາໄອສ໌ 12,9 ກຼາມ, ຢາ ຝີນ 340,7 ກຼາມ, ແປ້ງຝຸ່ນປະສົມສານເສບຕິດ 10,1 ກິໂລກຼາມ, ແກ່ນຝົນ 11 ກິໂລ ກຼາມ, ອາວຸດປືນ CKC 1 ກະ ບອກພ້ອມລູກປືນ 8 ລູກ, ປືນແວັງ 1 ກະບອກ, ປືນລົມ 1 ກະບອກ, ປືນແກັບ 2 ກະບອກ, ລູກປືນເບີ 28 ລູກ, ຫມາກແຕກ 1 ຫນ່ວຍ, ພາຫະນະລົດໃຫຍ່ 2 ຄັນ, ລົດຈັກ 11 ຄັນ, ເງິນກີບ 280.889.000 ກີບ, ເງິນບາດ 256.250 ບາດ, ເງິນໂດລາ 2.208 ໂດລາ, ສາຍ ຄໍຄໍານໍ້າຫນັກ 14,2 ກຼາມ, ໂທ ລະສັບ 36 ເຄື່ອງ ແລະ ເຄື່ອງ ຂອງກາງອື່ນໆອີກຈໍານວນຫນຶ່ງ.

ນອກນັ້ນ, ຍັງສາມາດດໍາເນີນຄະດີສໍາເລັດ 39 ເລື່ອງ, ມີຜູ້ຖືກຫາ 49 ຄົນ, ສະຫຼຸບສໍານວນຄະດີ ສົ່ງໃຫ້ອົງການກ່ຽວຂ້ອງ 25 ເລື່ອງ, ຜູ້ຖືກຫາ 30 ຄົນ, ສຶກສາອົບຮົມ ແລະ ເຂົ້າບໍາບັດ-ດັດສ້າງ 14 ເລື່ອງ, ຜູ້ຖືກຫາ 18 ຄົນ; ຍັງສືບ ຕໍ່ດໍາເນີນມີ 89 ເລື່ອງ, ຜູ້ຖືກຫາ 115 ຄົນ ຍິງ 20 ຄົນ, ສານ ພິຈາລະນາຕັດສິນແລ້ວ 31 ເລື່ອງ, ມີນັກໂທດ 3.873 ຄົນ, ໃນນີ້, ມີ ໂທດປະຫານຊີວິດ 1 ຄົນ, ຕະຫຼອດຊີວິດ 2 ຄົນ, ຕັດອິດສະລະພາບແຕ່ 3 ປີ – 20 ປີ ມີ 35 ຄົນ, ສ່ວນຊັບສິນທີ່ຢິບເປັນຂອງລັດມີ ພາຫະນະລົດໃຫຍ່ 2 ຄັນ, ລົດຈັກ 10 ຄັນ, ໂທລະສັບ 6 ເຄື່ອງ, ເງິນກີບ 295.000 ກີບ. ຄຽງຄູ່ກັນນັ້ນ, ກອງປະຊຸມຍັງໄດ້ຜ່ານເນື້ອໃນຂອງເອກະສານນິຕິກໍາຕ່າງໆທີ່ກ່ຽວພັນວຽກງານປ້ອງກັນຄວາມສະຫງົບອີກ ຈໍານວນຫນຶ່ງ ພ້ອມທັງມີ ການແລກປ່ຽນຄໍາຄິດ-ຄໍາເຫັນຕໍ່ຮ່າງບົດສະຫຼຸບ ແລະ ທິດທາງແຜນການໃນ ສະເພາະຫນ້າ ເພື່ອປັບປຸງຍົກລະດັບມາດຕະການຈັດຕັ້ງປະຕິບັດໄລຍະຕໍ່ໄປໃຫ້ມີປະສິດທິຜົນສູງຂື້ນຕື່ມອີກ.

ຕອນທ້າຍ, ມັທ ສອນວິໄລ ຕຸລາທອງ ຍັງໄດ້ກ່າວສະແດງຄວາມຍ້ອງຍໍຊົມເຊີຍຕໍ່ຜົນງານທີ່ພົ້ນເດັ່ນ ໄລຍະຜ່ານມາ ແລະ ພ້ອມທັງເນັ້ນໃຫ້ຄະນະຊີ້ນໍາ-ບັນຊາແຕ່ລະພາກສ່ວນພ້ອມກັນເອົາໃຈໃສ່ເພີ່ມທະວີ ການນໍາພາ-ຊີ້ນໍາຢ່າງໃກ້ຊິດຕິດແທດກັບວຽກງານຕົວຈິງ, ເພີ່ມທະວີຄວາມຮັບຜິດຊອບຕໍ່ ຫນ້າທີ່ຄວາມ ຮັບຜິດຊອບຢ່າງຕັ້ງຫນ້າ, ສືບຕໍ່ເຄື່ອນໄຫວເກັບກໍາເປົ້າຫມາຍທີ່ເຄື່ອນໄຫວກໍ່ການກະທໍາ ຜິດຢູ່ໃນສັງຄົມໃຫ້ຫມົດໄປເທື່ອລະກ້າວ.

ແຫຼ່ງຂ່າວ: ປ້ອງກັນຄວາມສະຫງົບ

ໃນຕອນບ່າຍຂອງວັນທີ 16 ສິງຫາ ມີຄົນໄປລັກຮົ້ວປ້ອງກັນຄວາມປອດໄພທາງລົດໄຟອີກຄັ້ງ

ເຊິ່ງກ່ອນໜ້ານີ້ກໍໄດ້ມີເຫດການຄົນໄປລັກຮົ້ວກັ້ນລົດໄຟເປັນຈຳນວນຫຼາຍຄັ້ງ, ຫຼັງຈາກກວດພົບກໍໄດ້ຮີບໃຫ້ຍາມ ແລະ ທະຫານເຂົ້າໄປຈຸດເກີດເຫດ, ພ້ອມທັງຕຳຫຼວດລົດໄຟທີ່ໄດ້ເດີນທາງໄປທຳການກວດສອບຄວາມເສຍຫາຍ ແລະ ສືບຕໍ່ຕິດຕາມສືບສວນເພື່ອຈັບເອົາຄົນຜິດມາລົງໂທດ ເນື່ອງຈາກການລັກ, ມ້າງເພ, ທຳລາຍຮົ້ວກັ້ນຄວາມປອດໄພລົດໄຟ ແລະ ອຸປະກອນທາງລົດໄຟທຸກຊະນິດ ແມ່ນມີຄວາມຜິດຕາມກົດໝາຍການລົດໄຟທີ່ໄດ້ວາງອອກ.

ຕາມການລາຍງານໃຫ້ຮູ້ວ່າ: ຮົ້ວກັ້ນຄວາມປອດໄພລົດໄຟໄດ້ຖືກລັກເປັນຄວາມຍາວກວ່າ 26 ແມັດ, ເຊິ່ງເປັນອັນຕະລາຍຕໍ່ການເດີນລົດ ແລະ ຊີວິດຜູ້ໂດຍສານເທິງລົດເປັນຢ່າງຍິ່ງ ແລະ ຍັງເປັນການທຳລາຍຊັບສິນຂອງບ້ານເມືອງ.

ສະນັ້ນ, ຈິ່ງຮຽກຮ້ອງໃຫ້ພໍ່ແມ່ປະຊາຊົນໃຫ້ຄວາມຮ່ວມມື, ຮ່ວມແຮງຮ່ວມໃຈກັນ, ປະຕິບັດຕາມລະບຽບກົດໝາຍ, ຫາກພົບເຫັນຜູ້ຈະກະທຳຜິດຄືດັ່ງເຫດການດັ່ງກ່າວ ແມ່ນສາມາດໂທຫາສາຍດ່ວນ 021 891000 ຫຼື 021 891010 ເພື່ອແຈ້ງເຫດສຸກເສີນ.

ທາງລົດໄຟແມ່ນຊັບສົມບັດຂອງຊາດ ຂໍໃຫ້ທຸກຄົນຊ່ວຍກັນປາບປາມການລັກຂະໂມຍ, ມ້າງເພ ອຸປະກອນລົດໄຟທຸກຊະນິດ ຫາກພົບເຫັນຜູ້ຈະກະທຳຜິດຄືດັ່ງເຫດການດັ່ງກ່າວ ກໍໃຫ້ຫ້າມປາມ ແລະ ຕັກເຕືອນຊ່ວຍກັນ, ເພື່ອຄວາມປອດໄພຂອງຊີວິດ ແລະ ຊັບສິນຂອງຜູ້ໂດຍສານຢູ່ເທິງຂະບວນລົດໄຟ ແລະ ເພື່ອປ້ອງກັນບໍ່ໃຫ້ມີການສູນເສຍໃດໆເກີດຂຶ້ນ.

ທາງລົດໄຟແມ່ນຊັບສົມບັດຂອງຊາດ ຂໍໃຫ້ທຸກຄົນຊ່ວຍກັນປາບປາມການລັກຂະໂມຍ, ມ້າງເພ ອຸປະກອນລົດໄຟທຸກຊະນິດ ຫາກພົບເຫັນຜູ້ຈະກະທຳຜິດຄືດັ່ງເຫດການດັ່ງກ່າວ ກໍໃຫ້ຫ້າມປາມ ແລະ ຕັກເຕືອນຊ່ວຍກັນ, ເພື່ອຄວາມປອດໄພຂອງຊີວິດ ແລະ ຊັບສິນຂອງຜູ້ໂດຍສານຢູ່ເທິງຂະບວນລົດໄຟ ແລະ ເພື່ອປ້ອງກັນບໍ່ໃຫ້ມີການສູນເສຍໃດໆເກີດຂຶ້ນ.

ແຫຼ່ງຂ່າວ: Laos – China Railway Company Limited

ວັນທີ 15 ສິງຫາ 2022, ຢູ່ຫ້ອງປະຊຸມ ກອງບັນຊາການ ປກສ ນະຄອນຫຼວງວຽງຈັນ ໄດ້ມີພິທີມອບ-ຮັບໜ້າທີ່ ຫົວໜ້າກອງບັນຊາການ ປກສ ນວ (ຜູ້ໃໝ່) ລະຫວ່າງ ພັອ ສຸກພະຈັນ ບຸດດາຄໍາ ຫົວໜ້າກອງບັນຊາການ ປກສ ນວ (ຜູ້ເກົ່າ) ແລະ ພັອ ປອ ບົວພັນ ຟອງມະນີ ຫົວໜ້າກອງບັນຊາການ ປກສ ນວ (ຜູ້ໃໝ່) ເພື່ອເປັນການປັບປຸງຕາມຄວາມຮຽກຮ້ອງ ຕ້ອງການຂອງໜ້າທີ່ວຽກງານໃນໄລຍະໃໝ່ ໃຫ້ມີຄຸນນະພາບສູງຂຶ້ນກວ່າເກົ່າ.

ໂດຍມີ ພຈົວ ສີພອນ ຈັນສົມວົງ ຮອງເລຂາຄະນະບໍລິຫານງານພັກ ນະຄອນຫຼວງວຽງຈັນ ພ້ອມດ້ວຍ ຄະນະພັກ-ຄະນະບັນຊາ, ຄະນະກອງບັນຊາການ, ຄະນະຫ້ອງ, ຫົວໜ້າ-ຮອງກອງບັນຊາການ ປກສ ເມືອງ ແລະ ພະນັກງານຫຼັກແຫຼ່ງກອງບັນຊາການ ແລະ ຜ່ານລະບົບ ກອງປະຊຸມທາງໄກ Video comferent ເຂົ້າຮ່ວມ ເປັນສັກຂີພະຍານ.

ໃນພິທີ ພັອ ສຸກພະຈັນ ບຸດດາຄໍາ ຫົວໜ້າກອງບັນຊາການ ປກສ ນວ (ຜູ້ເກົ່າ) ໄດ້ກ່າວອຳລາໜ້າທີ່ ເພື່ອໄປຮັບໜ້າທີ່ໃໝ່ ຢູ່ກົມໃຫຍ່ຕໍາຫຼວດ ກະຊວງ ປກສ ແລະ ພັອ ປອ ບົວພັນ ຟອງມະນີ ໄດ້ກ່າວຮັບໜ້າທີ່ ເປັນຫົວໜ້າກອງບັນຊາການ ປກສ ນວ (ຜູ້ໃໝ່) ທັງໃຫ້ຄຳໝັ້ນສັນຍາວ່າ:

ຈະສືບຕໍ່ຊີ້ນຳ-ນຳພາ ວຽກງານທີ່ໄດ້ຮັບມອບໝາຍ ໃຫ້ສຸດຄວາມສາມາດ ຈະນໍາເອົາຄວາມຮູ້, ຄວາມສາມາດ ແລະ ປະສົບການຕົວຈິງຜ່ານມາ ນໍາມາໝູນໃຊ້ເຂົ້າໃນການຊີ້ນໍາ-ນໍາພາ, ພ້ອມທັງ ຈະປັບປຸງ ແລະ ແກ້ໄຂຈຸດອ່ອນ, ຂໍ້ຄົງຄ້າງບາງດ້ານ ເພື່ອໃຫ້ບັນລຸຜົນຕາມລະດັບຄາດໝາຍ ໃຫ້ໄດ້ຮັບຜົນສໍາເລັດທາງດ້ານປະລິມານ ແລະ ຄຸນນະພາບສູງ, ສາມາດຕອບສະໜອງກັບຄວາມຮຽກຮ້ອງຕ້ອງການຂອງໜ້າທີ່ ການເມືອງໃນໄລຍະໃໝ່.

ຫຼັງຈາກນັ້ນ ທັງ 2 ທ່ານ ກໍໄດ້ລົງນາມ ເຊັນໃນບົດບັນທຶກມອບ-ຮັບໜ້າທີ່ ຢ່າງເປັນທາງການ.

ຂ່າວ: ຮອ ນ. ອ່າງ, ປ້ອງກັນຄວາມສະຫງົບນະຄອນຫຼວງວຽງຈັນ

ເຈົ້າໜ້າທີ່ ສູນປະສານງານ 4 ຝ່າຍ ສະກັດຈັບເປົ້າໝາຍຢາເສບຕິດ ຈັບໄດ້ທັງຄົນ ແລະ ຂອງກາງຈຳນວນຫຼາຍ

ປກສ ແຂວງບໍ່ແກ້ວ ໃຫ້ຮູ້ວ່າ: ອີງຕາມຂໍ້ມູນແຫຼງຂ່າວຂອງສູນປະສານງານ 4 ຝ່າຍປະຈຳບ້ານມອມ ເມືອງຕົ້ນເຜິ້ງ ແຂວງບໍ່ແກ້ວ ວ່າ ຈະມີກຸ່ມຄົນບໍ່ດີລັກລອບຂົນສົ່ງຢາເສບຕິດຈາກປະເທດມຽນມາເຂົ້າມາແຂວງບໍ່ແກ້ວ ( ເມືອງຕົ້ນເຜິ້ງ ). ຈາກນັ້ນ, ກອງບັນຊາການ ປກສ ແຂວງ ໄດ້ຊີ້ນຳຫ້ອງວິຊາສະເພາະທີ່ກ່ຽວຂ້ອງລົງສົມທົບກັບສູນປະສານງານ 4 ປະເທດ ( ຝ່າຍຈີນ ) ທີ່ປະຈຳຢູ່ດ່ານບ້ານມອມ ຕິດຕາມເປົ້າໝາຍ. ມາຮອດວັນທີ 6 ສິງຫາ 2022 ເວລາ 12:05 ນາທີ, ເຈົ້າໜ້າທີ່ຕຳຫຼວດ ປກສ ເມືອງຕົ້ນເຜິ້ງແມ່ນໄດ້ເຫັນເປົ້າໝາຍຂີ່ລົດຈັກເຂົ້າໄປບ້ານ ສີບຸນເຮືອງ ເມືອງຕົ້ນເຜິ້ງ ເຈົ້າໜ້າທີ່ຈຶ່ງໄດ້ຕິດຕາມ ແລະ ສາມາດກັກຕົວເປົ້າໝາຍໄດ້ 2 ຄົນຄື: ທ້າວ ພອນ ສຸຕະວົງ ອາຍຸ 45 ປີ ແລະ ນາງ ມອນ ສຸຕະວົງ ອາຍຸ 43 ປີ ຢູ່ບ້ານສີບຸນເຮືອງ ເມືອງຕົ້ນເຜິ້ງ ແຂວງບໍ່ແກ້ວ ທັງສອງຄົນແມ່ນເປັນຜົວເມຍກັນ,

ພ້ອມທັງກວດຄົນເຮືອນ ( ເຄຫະສະຖານ ) ຜ່ານການກວດຄົ້ນແມ່ນສາມາດຍຶດໄດ້ເຄື່ອງຂອງກາງຢາເສບຕິດ ( ປະເພດຢາບ້າ ) ຈຳນວນ 3.304ມັດ ເທົ່າກັບ 6.608.000 ເມັດ, ນ້ຳໜັກລວມ 733 ກິໂລກຼາມ ແລະ ຢາເສບຕິດ ( ປະເພດໄອສ໌ ) 1 ກິໂລກຼາມ, ລົດໃຫຍ່ 3 ຄັນ, ລົດຈິບປຼາໂດ 1 ຄັນ, ລົດກະບະລີໂວ 1 ຄັນ, ລົດກະບະນິດ 1 ຄັນ, ເງິນກີບ ຈຳນວນ 80.000.000, ເງິນບາດຈຳນວນ 4.109.000 ບາດ, ເງິນຢວນຈຳນວນ 10.000 ຢວນ. ຕໍ່ກັບຄະນະດັ່ງກ່າວປັດຈຸບັນທາງເຈົ້າໜ້າທີ່ທີ່ກ່ຽວຂ້ອງພວມດຳເນີນການສືບສວນ-ສອບສວນຂະຜົນຫາກຸ່ມແກ້ງເຄື່ອຂ່າຍ.

ຂ່າວ: ປກສ ແຂວງບໍ່ແກ້ວ, ຄວາມສະຫງົບ

ລັດຖະມົນຕີ ກຕສ ຕ້ອນຮັບການເຂົ້າຢ້ຽມຂ່ຳນັບຜູ້ອໍານວຍການສູນການສຶກສາຕົວເມືອງ

ໃນຕອນເຊົ້າຂອງ ວັນທີ 15 ສິງຫາ 2022 ທີ່ຫ້ອງຮັບແຂກກະຊວງ, ທ່ານ ບັນດິດ ສຈ. ບໍ່ວຽງຄຳ ວົງດາລາ, ລັດຖະມົນຕີກະຊວງເຕັກໂນໂລຊີ ແລະ ການສື່ສານ (ກຕສ) ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບຂອງ ທ່ານ Andrey Andreyevich Litvinov, ຜູ້ອໍານວຍການສູນການສຶກສາຕົວເມືອງ, ມະຫາວິທະຍາໄລ ຊິຣິອຸດ ແຫ່ງ ສະຫະພັນ ຣັດເຊຍ ພ້ອມດ້ວຍຄະນະ ເນື່ອງໃນໂອກາດທີ່ໄດ້ເດີນທາງມາເຮັດວຽກຢູ່ ສປປ ລາວ.

ໂອກາດດັ່ງກ່າວ, ທ່ານ ບັນດິດ ສຈ. ບໍ່ວຽງຄຳ ວົງດາລາ ໄດ້ກ່າວສະແດງຄວາມຍິນດີຕ້ອນຮັບການເຂົ້າຢ້ຽມຂໍ່ານັບຂອງທ່ານຜູ້ອໍານວຍການສູນການສຶກສາຕົວເມືອງ ເນື່ອງໃນໂອກາດທີ່ໄດ້ເດີນທາງມາເຮັດວຽກຢູ່ ສປປ ລາວ ແລະ ໄດ້ເຂົ້າຢ້ຽມຂ່ຳນັບໃນຄັ້ງນີ້ ຊຶ່ງທ່ານໄດ້ຕີລາສູງການປະກອບສ່ວນຮັດແໜ້ນສາຍພົວພັນມິດຕະພາບ ແລະ ການຮ່ວມມືລະຫວ່າງ ສປປ ລາວ-ສະຫະພັນ ຣັດເຊຍ.

ໂອກາດດັ່ງກ່າວ, ທ່ານ Andrey Andreyevich Litvinov ໄດ້ສະແດງຄວາມຂອບໃຈຕໍ່ທ່ານລັດຖະມົນຕີທີ່ໄດ້ໃຫ້ກຽດຕ້ອນຮັບອັນອົບອຸ່ນໃນຄັ້ງນີ້, ພ້ອມທັງໄດ້ລາຍງານສະພາບການໂດຍຫຍໍ້ກ່ຽວກັບມະຫາວິທະຍາໄລ ຊີຣິອຸດ ຊຶ່ງມະຫາວິທະຍາໄລແມ່ນໄດ້ມີການສ້າງຊັບພະຍາກອນມະນຸດໃນຫຼາຍຂົງເຂດເປັນຕົ້ນແມ່ນ ຂົງເຂດວິທະຍາສາດ, ການສຶກສາ, ສ້າງຕົວເມືອງ ແລະ ຂົງເຂດວັດທະນະທຳ ໃນນັ້ນ, ມີຫຼາກຫຼາຍສູນການຮຽນຮູ້ເຊັ່ນ: ສູນສຶກສາຄົ້ນຄວ້າທາງດ້ານມັນສະໝອງມະນຸດ, ສູນຮຽນຮູ້ປັນຍາປະດິດ, ສູນຮຽນຮູ້ການສ້າງຕົວເມືອງອັດສະລິຍະ, ສູນພັນທຸກຳ ທີ່ມີຫ້ອງທົດລອງທີ່ທັນສະໄໝ ແລະ ອື່ນໆອີກ. ພ້ອມດຽວກັນນັ້ນ, ທ່ານຍັງໄດ້ສະແດງຄວາມຍິນດີທີ່ຈະໃຫ້ການຮ່ວມມື ແລະ ຊ່ວຍເຫຼືອ ກະຊວງເຕັກໂນໂລຊີ ແລະ ການສື່ສານ ພ້ອມທັງໄດ້ເຊື້ອເຊີນທ່ານ ລັດຖະມົນຕີ ພ້ອມດ້ວຍຄະນະໄປຢ້ຽມຢາມ ແລະ ຢ້ຽມຊົມຜົນງານຕາງໆຂອງມະຫາວິທະຍາໄລໃນອະນາຄົດ.

ໃນຕອນທ້າຍ, ທ່ານລັດຖະມົນຕີ ໄດ້ສະແດງຄວາມຂອບໃຈຕໍ່ທ່ານຜູ້ອໍານວຍການສູນການສຶກສາຕົວເມືອງ ແລະ ສະແດງຄວາມຫວັງວ່າຈະໄດ້ຮັບການຮ່ວມມື ແລະ ຊ່ວຍເຫຼືອຈາກ ມະຫາວິທະຍາໄລ ຊິຣິອຸດ ໃນຂົງເຂດວຽກງານການພັດທະນາເຕັກໂນໂລຊີ ສປປ ລາວ ກໍຄືການພັດທະນາດ້ານຊັບພະຍາກອນມະນຸດ.

ພາບ ແລະ ຂ່າວ: ຂ່າວສານ ເຕັກໂນໂລຊີ ແລະ ການສື່ສານ