ເປີດນຳໃຊ້ ລະບົບຢັ້ງຢືນການສັກວັກຊິນແບບດິຈິຕອນ ແລະ ລະບົບການປິ່ນປົ່ວຕົນເອງຢູ່ບ້ານ

ນະຄອນຫລວງວຽງຈັນ ຮ່ວມກັບ ກະຊວງເຕັກໂນໂລຊີ ແລະ ການສື່ສານ ແລະ ກະຊວງສາທາລະນະສຸກ ຈັດພິທີເປີດນຳໃຊ້ບໍລິການ ການຢັ້ງຢືນການສັກວັກຊິນ ປ້ອງກັນໂຄວິດ-19 ແບບດີຈິຕອນ (Vaccine ID/Vaccine Passport) ແລະ ລະບົບການປິ່ນປົ່ວຕົວເອງຢູ່ບ້ານ (Home isolation) ໃນຕອນບ່າຍຂອງວັນທີ 8 ມິຖຸນາ 2022, ໂດຍການເປັນປະທານຂອງ ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫລວງວຽງຈັນ, ທ່ານ ສັນຕິສຸກ ສິມມາລາວົງ ຮອງລັດຖະມົນຕີກະຊວງເຕັກໂນໂລຊີ ແລະ ການຊື່ສານ, ທ່ານ ໄພວັນ ແກ້ວປະເສີດ ຮອງລັດຖະມົນຕີກະຊວງສາທາລະນະສຸກ ແລະ ພາກສ່ວນກ່ຽວຂ້ອງ ເຂົ້າຮ່ວມ.ທ່ານ ທະວີສັກ ມະໂນທັມ ຫົວໜ້າສູນບໍລິການລັດດີຈິຕອນ, ຄະນະຮັບຜິດຊອບປັບປຸງ, ພັດທະນາ ແລະ ສົ່ງເສີມການນຳໃຊ້ບໍລິການ Vaccine ID/Vaccine Passport ແລະ Home isolation ໄດ້ລາຍງານຄວາມເປັນມາຂອງການພັດທະນາ ບໍລິການດັ່ງກ່າວ ເຊິ່ງເປັນການຕໍ່ຍອດຈາກການບໍລິການ ລາວ ສູ້ສູ້ ທີ່ກະຊວງເຕັກໂນໂລຊີ ແລະ ການສື່ສານ (ກຕສ) ໄດ້ນໍາສະເໜີ ຮ່ວມກັບກະຊວງສາທາລະນະສຸກ ໃນວັນທີ 5 ກໍລະກົດ 2021.

ຈາກນັ້ນ, ກຕສ ໄດ້ສືບຕໍ່ຮ່ວມກັບ ກະຊວງສາທາລະນະສຸກ, ບໍລິສັດ ເອັສບີເລັບ-856 ຈໍາກັດ ແລະ ບໍລິສັດ ລາຍລາວແລັບ ໄອທີຊີໂຊລູເຊີນ ຈໍາກັດ ພັດທະ ນາລະບົບ Vaccine ID/Vaccine Passport ແລະ ລະບົບ Home isolation ເພື່ອໃຫ້ບໍລິການປະຊາຊົນລາວທົ່ວປະເທດ ແບບບໍ່ເສຍຄ່າ, ປະກອບສ່ວນເຂົ້າໃນການຕ້ານ ແລະ ສະກັດກັ້ນ ການລະບາດຂອງພະຍາດໂຄວິດ-19 ແລະ ທັງເປັນການກະກຽມໃຫ້ແກ່ການເປີດປະເທດໃຫ້ມີຄວາມປອດໄພ ໂດຍໄລຍະທຳອິດແມ່ນນຳແມ່ນເລັ່ງນໍາໃຊ້ຢູ່ບັນດາເມືອງ ໃນນະຄອນຫລວງວຽງຈັນ ແລ້ວຈຶ່ງຂະຫຍາຍໄປບັນດາແຂວງໃນທົ່ວປະເທດ.ສຳລັບລະບົບ Vacin ID/Vaccine Passport ເປັນການໝູນໃຊ້ເຕັກໂນໂລຊີທີ່ທັນສະໄໝ ເຂົ້າມາຊ່ວຍໃນການຢັ້ງຢືນການສັກວັກຊິນ ແລະ ອໍານວຍຄວາມສະດວກໃຫ້ແກ່ຄະນະແພດໝໍ ໃນການຕິດຕາມການເດີນທາງ ຫລື ການເຄື່ອນໄຫວຂອງຜູ້ຕິດເຊື້ອ ແລະ ມີຄວາມສ່ຽງໄດ້ຢ່າງຖືກຕ້ອງ ແລະ ຊັດເຈນ. ສ່ວນລະບົບປິ່ນປົວຢູ່ບ້ານ Home isolation ເປັນລະບົບທີ່ຊ່ວຍໃຫ້ປະຊາຊົນ ສາມາດລົງທະບຽນປິ່ນປົວພະຍາດໂຄ ວິດ-19 ດ້ວຍຕົນເອງ ໂດຍຜູ້ຕິດເຊື້ອສາມາດກັກໂຕ ປິ່ນປົວຕົນເອງຢູ່ບ້ານ ແລະ ແພດໝໍ ສາ ມາດຄັດເລືອກຄົນເຈັບທີ່ມີອາການໜັກ ເຂົ້າມາປິ່ນປົວຢູ່ໂຮງໝໍໄດ້ທັນເວລາ ແລະ ໃຫ້ຄໍາແນະນໍາໃນການປິ່ນປົວ ແກ່ຄົນເຈັບທີ່ກັກໂຕປິ່ນປົວຢູ່ບ້ານໂດຍກົງ ຜ່ານຂະບົບອອນລາຍ.

ທ່ານ ອາດສະພັງທອງ ສີພັນດອນ ໄດ້ເນັ້ນໃຫ້ເຫັນຄວາມສຳຄັນຂອງການນຳໃຊ້ເຕັກໂນໂລຊີໃນການຫັນເປັນທັນສະໄໝ ວ່າ: ເຖິງວ່າສະພາບການລະບາດຂອງພະຍາດໂຄວິດ-19 ໃນປັດຈຸບັນຈະບໍ່ຮຸນແຮງແລ້ວກໍຕາມ ແຕ່ກໍຍັງມີຄວາມຈໍາເປັນທີ່ຈະຕ້ອງສືບຕໍ່ຕິດຕາມຄວບຄຸມ ແລະ ເຝົ້າລະວັງຕໍ່ໄປ ດ້ວຍການຫັນເປັນທັນສະໄໝ ຕາມທ່າອ່ຽງຂອງໂລກ ການນໍາໃຊ້ Vaccine ID/Vaccine Passport ແລະ Home isolation ແມ່ນເຄື່ອງມືທີ່ຈໍາເປັນແກ່ພົນລະເມືອງລາວ ແລະ ຊາວຕ່າງດ້າວທີ່ດຳລົງຊີວິດຢູ່ ສປປ ລາວ ໃນການຂຶ້ນທະບຽນສະຖານະພາບການໄດ້ຮັບວັກຊິນ ຂອງຕົນແບບລວມສູນ ສະດວກ ວ່ອງໄວ ປອດໄພ ແລະ ໂປ່ງໃສ, ທັງເປັນພື້ນຖານ ແລະ ເປັນທາງເລືອກໃນການນໍາໃຊ້ ເພື່ອເດີນທາງເຂົ້າ-ອອກປະເທດ.

ແຫຼ່ງຂ່າວ: ປະເທດລາວ

ທ້າຍອາທິດຜ່ານມານີ້, ເມືອງ ຕົ້ນເຜິ້ງ ໄດ້ຈັດພິທີທຳລາຍອາຫານແຫ້ງ – ເຄື່ອງດື່ມໝົດອາຍຸ – ເສຍຄຸນ ແລະ ເຄື່ອງສໍາອາງຕ້ອງຫ້າມ ທີ່ຫ້ອງການສາທາລະນະສຸກເມືອງ ໃຫ້ກຽດເຂົ້າຮ່ວມເປັນປະທານຂອງ ທ່ານນາງ ສາຍຊົນ ອຸ່ນອົກ ຄະນະປະຈໍາພັກເມືອງ ຮອງເຈົ້າເມືອງໆ ຕົ້ນເຜິ້ງ, ມີ ທ່ານ ທອງຄຸນ ໄຍສະຫວັນ ຮອງຫົວໜ້າຫ້ອງການສາທາລະນະສຸກເມືອງ, ມີຄະນະກຳມະການກວດກາອາຫານ ແລະ ຢາຂັ້ນເມືອງ, ບັນດາຫ້ອງການອ້ອມຂ້າງ ແລະ ອຳນາດການປົກຄອງບ້ານ ເຂົ້າຮ່ວມ.

ໃນພິທີ ວິຊາການໜ່ວຍງານອາຫານ ແລະ ຢາ ໄດ້ລາຍງານການລົງຈັດຕັ້ງປະຕິບັດຂອງທີມງານກວດກາຮ້ານຈໍາໜ່າຍອາຫານແຫ້ງ – ເຄື່ອງດື່ມໝົດອາຍຸ ແລະ ຮ້ານຂາຍເຄື່ອງສຳອາງຢູ່ພາຍໃນເມືອງ ຕົ້ນເຜິ້ງ ເຊິ່ງທາງທີມງານໄດ້ລົງກວດກາ ໃນລະຫວ່າງ ວັນທີ 24 – 27 ພຶດສະພາ 2022 ຢູ່ໃນຕະຫຼາດຂາຍເຄື່ອງຍົກ – ຍ່ອຍ, ຮ້ານອາຫານຕາມເທດສະບານເມືອງ, ເຂດສີເມືອງງາມ, ນໍ້າເກິ່ງ, ຂຸນບົງ, ບ້ານມອມ ແລະ ສີບຸນເຮືອງ. ຜ່ານການລົງກວດກາພົບວ່າຍັງມີອາຫານ, ເຄື່ອງດື່ມໝົດອາຍຸວາງຈໍາໜ່າຍຢູ່ຕາມຮ້ານຄ້າ, ຜູ້ປະກອບການບາງຮ້ານເວລາທີມງານກວດພົບເຄື່ອງໝົດອາຍຸ ແລະ ເສຍຄຸນແມ່ນບໍ່ຢາກໃຫ້ທາງທີມງານເກັບໄປທຳລາຍຖິ້ມ, ຜູ້ປະກອບການບໍ່ເອົາໃຈໃສ່ເບິ່ງ ວັນ, ເດືອນ, ປີ ໝົດອາຍຸໃນເວລາຊື້ເຄື່ອງເຂົ້າຮ້ານ ເຊິ່ງເຄື່ອງໝົດອາຍຸທີ່ກວດພົບສ່ວນໃຫຍ່ແມ່ນເຄື່ອງດື່ມປະເພດນໍ້າອັດລົມ, ນົມ, ໜີ່ສຳເລັດຮູບ, ຄີມທາໜ້າ ແລະ ອື່ນໆ ລວມທັງໝົດ 61 ລາຍການ ມູນຄ່າ 24,213,000 ກີບ. ໂອກາດນີ້ ທ່ານນາງ ສາຍຊົນ ອຸ່ນອົກ ຮອງເຈົ້າເມືອງໆ ຕົ້ນເຜິ້ງ ກໍ່ໄດ້ມີຄຳເຫັນຕໍ່ບັນຫາເຄື່ອງໝົດອາຍຸ ແລະ ເສຍຄຸນ ວ່າ:

ບັນຫາເຄື່ອງເປັນອາຍຸເປັນບັນຫາທີ່ພາກສ່ວນກ່ຽວຂ້ອງ, ອຳນາດການປົກຂັ້ນບ້ານ ແລະ ທຸກພາກສ່ວນໃນສັງຄົມຕ້ອງໄດ້ເປັນເຈົ້າການນໍາກັນທັງໃນເວລາລົງກວດກາຕົວຈິງຂອງຄະນະກຳມະການ ແລະ ໃນເວລາຊື້ເຄື່ອງອຸປະໂພກ – ບໍລິໂພກໃນຊີວິດປະຈໍາວັນ ເວລາຊື້ເຄືີ່ອງຕ້ອງໄດ້ກວດກາເບິ່ງ ວັນ, ເດືອນ, ປີ ໝົດອາຍຸໃຫ້ດີ ເນື່ອງຈາກຮ້ານຄ້າຈໍາໜ່ວຍໜຶ່ງຍັງມີການວາງຈໍາໜ່າຍສິນຄ້າທີ່ໝົດອາຍຸ ແລະ ເສຍຄຸນ ຍ້ອນເຫັນແກ່ຜົນກຳໄລຂອງຕົນເອງ ໂດຍບໍ່ຄຳນຶງເຖິງບັນຫາສຸຂະພາບຂອງຜູ້ບໍລິໂພກ ແລະ ບາງຄັ້ງຜູ້ບໍລິໂພກເອງກໍ່ບໍ່ໄດ້ເອົາໃຈໃສ່ກວດກາເບິ່ງ ວັນ, ເດືອນ,ປີ ໝົດອາຍຸ, ບາງຄັ້ງທັງທີ່ຮູ້ວ່າສິນຄ້າໃກ້ໝົດອາຍຸແຕ່ກໍຍັງຊື້ ຍ້ອນເຫັນແກ່ລາຄາທີ່ຖືກ ຍ່ອມເຍົາ ເຊິ່ງມັນຈະສົ່ງຜົນເສຍຕໍ່ສຸຂະພາບຜູ້ທີ່ບໍລິໂພກເຄື່ອງດັ່ງກ່າວທັງໄລຍະສັ້ນ ແລະ ໄລຍະຍາວ.

ຈາກນັ້ນ, ປະທານ ແລະ ບັນດາພາກສ່ວນທີ່ເຂົ້າຮ່ວມກໍ່ໄດ້ຮ່ວມກັນທຳລາຍອາຫານແຫ້ງ – ເຄື່ອງດື່ມໝົດອາຍຸ – ເສຍຄຸນ ແລະ ເຄື່ອງສໍາອາງຕ້ອງຫ້າມ ທີ່ເດີນຫ້ອງການສາທາລະນະສຸກ.

ແຫຼ່ງຂ່າວ: ໜັງສືພິມບໍ່ແກ້ວ Bokeo Newspaper

ປະທານສະມັດຊາໃຫຍ່ ສປຊ ສະໄໝທີ 77 ໄດ້ຮັບການເລືອກຕັ້ງໃນວັນທີ 7 ມິຖຸນາ 2022, ທ່ານ Csaba Kőrösi ຈາກປະເທດ ຮົງກາຣີ, ເຊິ່ງເປັນຕົວແທນຈາກ ພາກພື້ນເອີຣົບຕາເວັນອອກ ໄດ້ຮັບການເລືອກຕັ້ງ ໃຫ້ເປັນປະທານສະມັດຊາໃຫຍ່ ສປຊ ສະໄໝທີ 77.

ກ່ອນຫນ້ານີ້, ທ່ານ Csaba Kőrösi ເຄີຍດໍາລົງຕໍາແໜ່ງເປັນອະທິບໍດີຮັບຜິດຊອບວຽກງານ ຄວາມຍືນຍົງດ້ານສິ່ງແວດລ້ອມ (Director for Environmental Sustainability) ປະຈໍາສໍານັກງານປະທານນາທິບໍດີ ຮົງກາຣີ.

ໃນລະຫວ່າງປີ 2010-2014, ທ່ານເຄີຍດໍາລົງຕໍາແຫນ່ງເປັນ ເອກອັກຄະລັດຖະທູດ, ຜູ້ຕາງໜ້າຖາວອນ ຮົງກາຣີ ປະຈໍາ ອົງການ ສປຊ ທີ່ ນິວຢອກ ເຊິ່ງໃນໄລຍະດັ່ງກ່າວ ໄດ້ເຄີຍເຮັດໜ້າທີ່ເປັນ ຮອງປະທານສະມັດຊາໃຫຍ່ ສປຊ ສະໄໝທີ 66 (2011-2012) ແລະ ປະທານຮ່ວມ ເພື່ອນໍາພາຂະບວນການເຈລະຈາ ເພື່ອກໍານົດເປົ້າໝາຍການພັດທະນາແບບຍືນຍົງ. ກ່ອນການເລືອກຕັ້ງ, ທ່ານ Csaba Kőrösi ໄດ້ຖະແຫຼງກ່ຽວກັບວິໄສທັດ ແລະ ບຸລິມະສິດ ໃນການເປັນປະທານສະມັດຊາໃຫຍ່ ສະໄໝທີ 77 ພາຍໃຕ້ຄຳຂວັນ “Solutions through Solidarity, Sustainability and Science” ເຊິ່ງປະກອບດ້ວຍ:

1) ຍຶດໝັ້ນຕໍ່ກັບຫຼັກການພື້ນຖານຂອງ ກົດບັດ ສປຊ; 2) ສ້າງຄວາມຄືບໜ້າເພື່ອການຫັນປ່ຽນສູ່ຄວາມຍືນຍົງ; 3) ແນໃສ່ແກ້ໄຂບັນຫາຢ່າງເປັນລະບົບ ແລະ ປະສານງານໃຫ້ສອດຄ່ອງ; 4) ສົ່ງເສີມບົດບາດຂອງວິທະຍາສາດ ເຂົ້າໃນຂະບວນການຕັດສິນບັນຫາ; ແລະ 5) ເພີ່ມທະວີຄວາມປອງດອງ ເພື່ອກຽມພ້ອມຮັບມືກັບບັນດາວິກິດການໃນອະນາຄົດ.ໃນໂອກາດນີ້, ທ່ານ António Guterres, ເລຂາທິການໃຫຍ່ ສປຊ ໄດ້ສະແດງຄວາມຍິນດີ ຕໍ່ປະທານສະມັດຊາໃຫຍ່ ຄົນຕໍ່ໄປ ແລະ ຍ້ຳຄືນບົດບາດສຳຄັນຂອງ ສະມັດຊາໃຫຍ່ ສປຊ ໂດຍສະເພາະ ໃນທ່າມກາງສະພາບການຂອງໂລກໃນປັດຈຸບັນ ພ້ອມທັງສະແດງຄວາມເຊື່ອໝັ້ນວ່າ ດ້ວຍຄວາມຄຸ້ນເຄີຍໃນວຽກງານ ສປຊ, ຄວາມຊ່ຽວຊານໃນວຽກງານຄວາມຍືນຍົງດ້ານສິ່ງແວດລ້ອມ ແລະ ຄວາມໝາຍໝັ້ນໃນວຽກງານຫຼາຍຝ່າຍ, ທ່ານ ຈະສາມາດຂັບເຄື່ອນວຽກງານຂອງ ສປຊ ໄດ້ຢ່າງມີປະສິດທິພາບ. ທ່ານ Abdulla Shahid, ປະທານສະມັດຊາໃຫຍ່ ຄົນປັດຈຸບັນ ກໍ່ໄດ້ສະແດງຄວາມຊົມເຊີຍຕໍ່ ປະທານຄົນໃໝ່ ແລະ ຊີ້ແຈງກ່ຽວກັບບັນດາໜ້າວຽກທີ່ຍັງຈະໄດ້ສືບຕໍ່ຈັດຕັ້ງປະຕິບັດໃຫ້ສຳເລັດ ກ່ອນຈະສິ້ນສຸດພາລະກິດ ໃນຖານະປະທານສະມັດຊາໃຫຍ່ ສະໄໝປັດຈຸບັນ.

ໃນໂອກາດດຽວກັນ, ສະມັດຊາໃຫຍ່ ໄດ້ເລືອກຕັ້ງຮອງປະທານ ສະໄໝທີ 77 ຈຳນວນ 21 ປະເທດ ເຊິ່ງປະກອບດ້ວຍ 6 ປະເທດ ຈາກພາກພື້ນອາຟຣິກາ, 5 ປະເທດ ຈາກພາກພື້ນອາຊີ-ປາຊິຟິກ, 3 ປະເທດ ຈາກພາກພື້ນ ອາເມຣິກາລາຕິນ-ຄາຣິບຽນ, 2 ປະເທດ ຈາກພາກພື້ນ ເອີຣົບຕາເວັນຕົກ ແລະ ອື່ນໆ ແລະ 5 ປະເທດ ສະມາຊິກຖາວອນຂອງ ສະພາຄວາມໝັ້ນຄົງ. ສະມັດຊາໃຫຍ່ ສປຊ ສະໄໝທີ 77 ແມ່ນຈະເລີ່ມປະຕິບັດວຽກງານເປັນໄລຍະເວລາ 1 ປີ ພາຍຫຼັງຈາກທີ່ຄະນະໃນປັດຈຸບັນ ສະໄໝທີ 76 ສິ້ນສຸດພາລະກິດ ໃນວັນທີ 12 ກັນຍາ 2022 ນີ້.

ຂໍ້ມູນຈາກ: Permanent Mission of the Lao PDR to the United Nations

ກະຊວງ ໂຍທາທິການ ແລະ ຂົນສົ່ງ ໄດ້ເຫັນດີອະນຸຍາດ ແລະ ຢຸດຕິມາດຕະການຕ່າງໆຜ່ານມາໃນ ການເຂົ້າ-ອອກ ສປປ ລາວ ແລະ ການຂົນສົ່ງສິນຄ້າທັງພາຍໃນ ແລະ ຕ່າງປະເທດ ໃນທຸກຮູບແບບເພື່ອໃຫ້ສາມາດດໍາເນີນໄປດ້ວຍຄວາມສະດວກ, ປອດໄພ ແລະ ໂລ່ງລ່ຽນ ໂດຍຕິດພັນກັບ ການຂົນສົ່ງໂດຍສານ ແລະ ສິນຄ້າ ທາງລົດໄຟ, ການຂົນສົ່ງໂດຍສານ ແລະ ສິນຄ້າ ທາງອາກາດ, ການຂົນສົ່ງໂດຍສານ ແລະ ສິນຄ້າ ທາງນ້ໍາ ແລະ ການຂົນສົ່ງໂດຍສານ ແລະ ສິນຄ້າທາງບົກ.

ອີງຕາມ ອອກແຈ້ງການ ຂອງ ກະຊວງໂຍທາທິການ ແລະ ຂົນສົ່ງ (ຍທຂ) ກ່ຽວກັບ ມາດຕະການຜ່ອນຜັນ ການເຂົ້າ-ອອກ ສປປ ລາວ ແລະ ພາຍໃນປະເທດ ສໍາລັບການຂົນສົ່ງໂດຍສານ ແລະ ສິນຄ້າ ໃນໄລຍະມີການລະບາດຂອງພະຍາດໂຄວິດ-19, ເລກທີ 260/ຍທຂ, ລົງວັນທີ 15 ພຶດສະພາ 2022. ເຊິ່ງມີລາຍລະອຽດດັ່ງລຸ່ມນີ້:

1. ການຂົນສົ່ງໂດຍສານ ແລະ ສິນຄ້າ ທາງລົດໄຟ

• ອະນຸຍາດໃຫ້ດໍາເນີນການຂົນສົ່ງໂດຍສານ ແລະ ສິນຄ້າທາງລົດໄຟ ພາຍໃນປະເທດໃຫ້ເປັນປົກກະຕິ;
• ອະນຸຍາດໃຫ້ດໍາເນີນການຂົນສົ່ງໂດຍສານ ແລະ ສິນຄ້າທາງລົດໄຟ ລະຫວ່າງປະເທດ ຕາມສັນຍາສອງ ຝ່າຍ ສປປ ລາວເປັນຄູ່ພາຄີ.
• ສໍາລັບຂາອອກຂອງການຂົນສົ່ງລະຫວ່າງປະເທດ ແລະ ຜ່ານແດນ ໃຫ້ປະຕິບັດຕາມມາດຕະການຂອງປະເທດປາຍທາງ.

2. ການຂົນສົ່ງໂດຍສານ ແລະ ສິນຄ້າ ທາງອາກາດ

• ອະນຸຍາດໃຫ້ດໍາເນີນການຂົນສົ່ງໂດຍສານ ແລະ ສິນຄ້າ ທາງອາກາດພາຍໃນປະເທດໃຫ້ເປັນປົກກະຕິ;
• ອະນຸຍາດໃຫ້ດໍາເນີນການຂົນສົ່ງໂດຍສານ ແລະ ສິນຄ້າ ທາງອາກາດລະຫວ່າງປະເທດ ຕາມສັນຍາສອງ ຝ່າຍ ແລະ ຫລາຍຝ່າຍ ທີ່ ສປປ ລາວ ເປັນພາຄີ, ສໍາລັບຂາອອກແມ່ນ ໃຫ້ປະຕິບັດຕາມມາດຕະການ ຂອງປະເທດປາຍທາງ.

3. ການຂົນສົ່ງໂດຍສານ ແລະ ສິນຄ້າ ທາງນ້ໍາ

• ອະນຸຍາດໃຫ້ດໍາເນີນການຂົນສົ່ງໂດຍສານ, ສິນຄ້າ ແລະ ທ່ອງທ່ຽວທາງນ້ໍາພາຍໃນປະເທດໃຫ້ເປັນປົກກະຕິ;
• ອະນຸຍາດໃຫ້ດໍາເນີນການຂົນສົ່ງໂດຍສານ, ສິນຄ້າ ແລະ ທ່ອງທ່ຽວທາງນ້ໍາ ລະຫວ່າງປະເທດ ໃຫ້ສອດຄ່ອງກັບກັບສົນທິສັນຍາ ແລະ ສັນຍາສາກົນ ທີ່ ສປປ ລາວ ເປັນພາຄີ;
• ສໍາລັບຂາອອກຂອງການຂົນສົ່ງລະຫວ່າງປະເທດ ແລະ ຜ່ານແດນ ໃຫ້ປະຕິບັດຕາມມາດຕະການຂອງ ປະເທດປາຍທາງ.

4. ການຂົນສົ່ງໂດຍສານ ແລະ ສິນຄ້າທາງບົກ

• ອະນຸຍາດໃຫ້ດໍາເນີນການຂົນສົ່ງໂດຍສານທາງບົກພາຍໃນປະເທດໃຫ້ເປັນປົກກະຕິ;
• ອະນຸຍາດໃຫ້ລົດສ່ວນຕົວ, ລົດໂດຍສານປະຈໍາທາງ ແລະ ລົດທ່ອງທ່ຽວລະຫວ່າງປະເທດສາມາດເດີນທາງເຂົ້າ-ອອກ ສປປ ລາວ ໄດ້ ຕາມສັນຍາສອງຝ່າຍ ແລະ ຫລາຍຝ່າຍທີ່ ສປປ ລາວ ເປັນຄູ່ພາຄີ;
• ອະນຸຍາດໃຫ້ ການຂົນສົ່ງສິນຄ້າພາຍໃນປະເທດແມ່ນສາມາດດໍາເນີນໄດ້ຢ່າງເປັນປົກກະຕິ.

ພ້ອມກັນນັ້ນ, ກໍ່ໃຫ້ສືບຕໍ່ປະຕິບັດ ແຈ້ງການ ຂອງ ຫ້ອງການ ກະຊວງໂຍທາທິການ ແລະ ຂົນສົ່ງ ກ່ຽວກັບ ການເພີ່ມທະວີຄວາມເຂັ້ມງວດ ໃນການຕິດຕາມ, ກວດກາລົດຂົນສົ່ງຕ່າງປະເທດ ທີ່ເຂົ້າມາ ສປປ ລາວ, ສະບັບເລກທີ 04718/ຍທຂ.ຫກ, 23 ກຸມພາ 2022. 

ນອກຈາກນັ້ນ, ການເດີນທາງເຂົ້າມາ ສປປ ລາວ ຂອງ ຄົນຂັບຍານພາຫະນະຂົນສົ່ງ (ເຮືອ, ລົດ, ຍົນ ແລະ ລົດໄຟ), ພະນັກງານ ແລະ ຜູ້ໂດຍສານ ແມ່ນໃຫ້ປະຕິບັດຕາມແຈ້ງການຂອງຫ້ອງວ່າການສໍານັກງານນາຍົກລັດຖະມົນຕີ ກ່ຽວ ກັບທິດຊີ້ນໍາມາດຕະການໃນການເຂົ້າ-ອອກ ສປປລາວ ແລະ ການຜ່ອນຜັນພາຍໃນປະເທດ ໃນໄລຍະມີການລະບາດ ຂອງພະຍາດໂຄວິດ-19, ສະບັບເລກທີ 627/ຫສນຍ, ລົງວັນທີ 07 ພຶດສະພາ 2022. 

ຂໍ້ມູນຈາກ: ສູນຂໍ້ມູນຂ່າວສານທາງດ້ານການຄ້າ ຂອງ ສປປ ລາວ / Lao PDR Trade Portal