ຕາມການລາຍງານ ຂອງສູນຂ່າວສານການແພດສຸຂະສຶກສາປະຈຳວັນທີ 23 ມີນາ 2022 ໃຫ້ຮູ້ວ່າ:
ຊຽງຂວາງ ກຽມພ້ອມເປັນເມືອງແຫ່ງສະເໜ່ໃນງານວາງສະແດງ ຈີນ-ອາຊຽນ
ງານວາງສະແດງສິນຄ້າຈີນ-ອາຊຽນເປັນປາງບຸນໃຫຍ່ທາງດ້ານການຄ້າ-ການລົງທຶນຂອງ ສປ ຈີນ ແລະ 10 ປະເທດອາຊຽນທີ່ຈັດຂຶ້ນທຸກໆປີ, ເຊິ່ງປີ 2022 ນີ້ຈະເປັນຄັ້ງທີ 19 ແລ້ວ ສຳລັບງານດັ່ງກ່າວໃນທຸກໆປີ ຈະມີເມືອງແຫ່ງສະເໜທີ່ເປັນຕົວແທນຂອງແຕ່ລະປະເທດ ແລະປະເທດເຮົາແມ່ນແຕ່ລະແຂວງໝູນວຽນປ່ຽນກັນໄປ ປີນີ້ແມ່ນແຂວງຊຽງຂວາງ.
ໂດຍປະຕິບັດຕາມແຈ້ງການຂອງຫ້ອງວ່າການສໍານັກງານນາຍົກລັດຖະມົນຕີ ສະບັບເລກທີ 248/ຫສນຍ, ລົງວັນທີ 23 ກຸມພາ 2022 ວ່າດ້ວຍການອະນຸມັດໃຫ້ ແຂວງ ຊຽງຂວາງ ເປັນເມືອງແຫ່ງສະເໜ່ ຂອງ ສປປ ລາວ ເຂົ້າຮ່ວມງານວາງສະແດງ ຈີນ-ອາຊຽນ ຄັ້ງທີ 19 ປະຈໍາປີ 2022 ທີ່ຈະໄດ້ຈັດຂື້ນໃນລະຫວ່າງວັນທີ 16-19 ກັນຍາ 2022 ທີ່ນະຄອນໜານໜິງ, ເຂດປົກຄອງຕົນເອງເຜົ່າຈ້ວງກວາງຊີ, ສປ ຈີນ.
ສໍາລັບ ສປປ ລາວ ແມ່ນໄດ້ເຂົ້າຮ່ວມງານວາງສະແດງ ຈີນ-ອາຊຽນ ນັບແຕ່ປີ 2004 ເປັນຕົ້ນມາ ເຊິ່ງໃນແຕ່ລະປີຝ່າຍຈີນໄດ້ມີການກຳນົດຫົວຂໍ້ຂອງ ງານວາງສະແດງແຕ່ລະປີ ແຕກຕ່າງກັນອອກໄປ. ສໍາລັບ ງານວາງສະແດງຈີນ-ອາຊຽນ ຄັ້ງທີ 19 ປະຈໍາປີ 2022 ຈະໄດ້ສືບຕໍ່ຈັດຂຶ້ນດ້ວຍຮູບແບບປົກະຕິ (Physical CAEXPO) ແລະ ຮູບແບບອອນໄລ (Online CAEXPO) ໄປຄຽງຄູ່ກັນ.
ເພື່ອສືບຕໍ່ກະກຽມຄວາມພ້ອມໃຫ້ແກ່ການເຂົ້າຮ່ວມງານວາງ ສະແດງຈີນ-ອາຊຽນ ໃຫ້ມີປະສິດທິຜົນສູງສຸດ, ໂດຍສະເພາະກິດຈະກຳທີ່ຕິດພັນກັບ ແຂວງ ຊຽງຂວາງ ກໍ່ຄື ເມືອງແຫ່ງສະເໜ່ ໂດຍສະເພາະແມ່ນ ການສ້າງຮ້ານວາງສະແດງແຫ່ງຊາດລາວ (ຫລື ແບບຈໍາລອງເມືອງແຫ່ງສະເໜ່), ການສ້າງສື່ໂຄສະນາດຶງດູດການຄ້າ-ລົງທຶນ ແລະ ການທ່ອງທ່ຽວ, ລະດົມຄັດເລືອກຫົວໜ່ວຍທຸລະກິດທີ່ມີທ່າແຮງເຂົ້າຮ່ວມວາງສະແດງສິນຄ້າ-ພົບປະຈັບຄູ່ທຸລະກິດ ແລະ ປຶກສາຫາລືຄົ້ນຄວ້າບາງກິດຈະກຳຮ່ວມກັນ.
ເມືອງແຫ່ງສະເໜ່ຄວາມໝາຍຄວາມສໍາຄັນຫຼາຍ ສະນັ້ນກ່ອນຮອດງານ ຈິ່ງຕ້ອງຮ່າງແຜນການລະດົມຄວາມຄິດເຫັນທີ່ຫຼາກຫຼາຍກະກຽມຮູບແບບງານພ້ອມນໍາສະເໜີແບບຈໍາລອງຮ້ານວາງສະແດງແຫ່ງຊາດລາວ ໃຫ້ມີຄວາມສວຍງາມສ່ອງແສງເຖິງເອກະລັກຂອງເມືອງແຫ່ງສະເໜ່ ກໍ່ຄື ເອກະລັກ ຂອງແຂວງ ທີ່ຢາກຈະສື່ສານໃຫ້ ຜູ້ເຂົ້າຊົມງານວາງສະແດງມາສຳພັດແຂວງທີ່ເປັນເມືອງແຫ່ງສະເໜຫຼາຍທີ່ສຸດ.
ແຫຼ່ງຂ່າວ ແລະ ພາບ: ເສດຖະກິດການຄ້າ
ສະຫຼຸບແຜນວຽກ ໃນ 5 ຂົງເຂດວຽກງານ
ທ່ານ ນ. ທິບພະກອນ ຈັນທະວົງສາ, ຮອງລັດຖະມົນຕີ, ຮອງຫົວ ໜ້າຫ້ອງວ່າການສຳນັກງານນາ ຍົກລັດຖະມົນຕີ, ຜູ້ປະຕິບັດໜ້າທີ່ໂຄສົກລັດຖະບານ ໄດ້ຖະແຫລງຂ່າວກ່ຽວກັບຜົນສຳເລັດຂອງກອງປະຊຸມລັດຖະບານ ປະຈຳເດືອນມີນາ 2022, ທີ່ຫ້ອງວ່າການສຳນັກງານນາຍົກລັດຖະມົນຕີ ໃນຕອນແລງຂອງວັນທີ 22 ມີນາ 2022.ສໍາລັບແຜນວຽກລະອຽດ ໃນແຕ່ລະຂົງເຂດ ມີດັ່ງນີ້:
ກອງປະຊຸມລັດຖະບານ ສະໄໝສາມັນ ປະຈຳເດືອນມີນາ 2022 ໄດ້ໄຂຂຶ້ນຢ່າງເປັນທາງການ ໃນຕອນເຊົ້າວັນທີ 21 ແລະ ປິດລົງ ໃນຕອນແລງ ວັນທີ 22 ມີນາ 2022 ທີ່ສຳນັກງານນາຍົກລັດ ຖະມົນຕີ, ພາຍໃຕ້ການເປັນປະທານ ຂອງທ່ານ ສອນໄຊ ສີພັນດອນ, ຮອງນາຍົກລັດຖະ ມົນຕີ; ມີບັນດາທ່ານ ຮອງນາຍົກລັດຖະມົນຕີ, ສະມາຊິກລັດຖະ ບານ ແລະ ຜູ້ຕາງໜ້າຈາກກະຊວງເຂົ້າຮ່ວມ.
ສໍາລັບແຜນວຽກລະອຽດ ໃນແຕ່ລະຂົງເຂດ ມີດັ່ງນີ້:
1) ຂົງເຂດປ້ອງກັນຊາດ-ປ້ອງກັນຄວາມສະຫງົບ.
ສືບຕໍ່ຈັດຕັ້ງປະຕິບັດແຜນງານໂຄງການຂອງສອງກໍາລັງ ປກຊ- ປກສ ໂດຍຕິດພັນຢ່າງສະນິດແໜ້ນກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຢາເສບຕິດ ດ້ວຍມາດຕະການຕ່າງໆ ໃຫ້ແຂງແຮງກວ່າເກົ່າ ທັງສຸມກໍາລັງເຂົ້າໃນປ້ອງກັນຕາມຊາຍແດນ ເພື່ອສະກັດກັ້ນ ການລັກລອບເຂົ້າເມືອງ ເພື່ອປ້ອງກັນ ແລະ ຄວບຄຸມການລະບາດຂອງພະຍາດໂຄວິດ-19 ໃຫ້ມີປະສິດທິຜົນ.
2) ຂົງເຂດເສດຖະກິດ.
- ສືບຕໍ່ສົ່ງເສີມ ແລະ ອຳນວຍຄວາມສະດວກ ໃນການລົງທຶນທັງພາຍໃນ ແລະ ຕ່າງປະເທດ ໃຫ້ເພີ່ມຂຶ້ນ, ຊຸກຍູ້ການຈັດເກັບລາຍຮັບ ດ້ວຍມາດຕະການຕ່າງໆ ລວມທັງການຕິດຕັ້ງອຸປະກອນຈັດເກັບລາຍຮັບແບບທັນສະໄໝໃຫ້ສຳເລັດ, ສືບຕໍ່ອອກໃບຕາດິນໃຫ້ບັນລຸຕາມແຜນ ຕິດພັນກັບການສ້າງຖານລາຍຮັບໃຫ້ຫຼາຍຂຶ້ນ. ສືບຕໍ່ເອົາໃຈໃສ່ຄຸ້ມຄອງລາຍຈ່າຍງົບປະມານຂອງລັດ ຕາມທິດປະຢັດ ແລະ ຕ້ານການຟຸມເຟືອຍ ໃຫ້ເປັນຮູບປະທໍາຫຼາຍຂຶ້ນ ແລະ ຮັບປະກັນ ການປະຕິ ບັດລາຍຈ່າຍເງິນເດືອນພະນັກ ງານ ທັງສູນກາງ ແລະ ທ້ອງຖິ່ນ ໃຫ້ທັນຕາມແຜນ.
- ສືບຕໍ່ສົມທົບ ແລະ ຈັດສັນງົບປະມານ ເຂົ້າໃສ່ການປະຕິບັດແຜນພັດທະນາເສດຖະກິດສັງຄົມ.
- ສືບຕໍ່ເອົາໃຈໃສ່ໃນການຄຸ້ມຄອງ ແລະ ຮັກສາສະຖຽນລະພາບດ້ານເງິນຕາ ໃຫ້ມີຄວາມໝັ້ນທ່ຽງ ດ້ວຍມາດຕະການຕ່າງໆ ທີ່ກໍານົດໄວ້, ປັບປຸງກົນໄກການຊໍາລະສະສາງໃນຂະແໜງການຕ່າງໆ ແບບທັນສະໄໝ ໂດຍຜ່ານລະບົບທະນາຄານ ໃຫ້ຫຼາຍຂຶ້ນ.
- ສືບຕໍ່ຊຸກຍູ້ການຜະລິດໃນລະດູແລ້ງ ເພື່ອຮັບປະກັນການສະ ໜອງສະບຽງອາຫານໃຫ້ແກ່ສັງຄົມ ໄດ້ຕາມຄວາມຕ້ອງການ ແລະ ເປັນສິນຄ້າສົ່ງອອກ ຕາມເງື່ອນໄຂຂອງແຕ່ລະທ້ອງຖິ່ນ ໂດຍຕິດພັນກັບການແກ້ໄຂຄວາມຫຍຸ້ງຍາກ ໃນການສົ່ງອອກສິນຄ້າ ຢູ່ບັນດາດ່ານຊາຍແດນໃນທົ່ວປະເທດ.
- ສືບຕໍ່ຄຸ້ມຄອງລາຄາສິນຄ້າ ລວມທັງນໍ້າມັນເຊື້ອໄຟທຸກປະເພດ ຕາມກົດໝາຍ ແລະ ລະບຽບການກ່ຽວຂ້ອງ ຢ່າງເຂັ້ມງວດ.
- ສືບຕໍ່ຄຸ້ມຄອງການຂຸດຄົ້ນ- ສົ່ງອອກແຮ່ທາດຕ່າງໆ ໃນຮູບແບບປົກກະຕິ ແລະ ໃນຮູບແບບທົດລອງ ໃຫ້ມີປະສິດທິຜົນສູງຂຶ້ນ.
- ສືບຕໍ່ຕິດຕາມ ແລະ ຊຸກຍູ້ໂຄງການກໍ່ສ້າງທາງລົດໄຟ ລາວ-ໄທ ໄລຍະທີ 2, ການກໍ່ສ້າງທາງດ່ວນ, ໂຄງການໂລຈິດສະຕິກ ແລະ ໂຄງການອື່ນໆ ໃຫ້ສໍາເລັດຕາມແຜນການ ລວມທັງຊຸກຍຸ້ພາກສ່ວນກ່ຽວຂ້ອງປັບປຸງການບໍລິການ ລົດໄຟ ລາວ-ຈີນ ໃຫ້ມີຄວາມສະດວກຂຶ້ນ. – ສືບຕໍ່ຜັນຂະຫຍາຍ ນະໂຍບາຍການພັດທະນາເສດຖະກິດດີຈີຕອນ ໃຫ້ເປັນຮູບປະທໍາໃນບາງຂົງເຂດໃຫ້ໄດ້ຮັບຜົນດີຂຶ້ນ.
3). ຂົງເຂດວັດທະນະທໍາ-ສັງຄົມ:
- ສືບຕໍ່ເປີດການຮຽນ-ການສອນ ທຸກສາຍ ແບບເຊິ່ງໜ້າ ແລະ ຮູບແບບຕ່າງໆ ໃນສະຖານການສຶກ ລວມທັງປຸກລະດົມນັກຮຽນ-ນັກສຶກສາ ຕາມເກນອາຍຸ ທີ່ກະຊວງສາທາລະນະສຸກກຳນົດໄວ້ ໃຫ້ໄປຮັບວັກຊິນປ້ອງກັນໂຄວິດ-19 ຕາມແຜນການ. ນອກຈາກນັ້ນ, ກໍກະກຽມຄວາມພ້ອມດ້ານຕ່າງໆ ເພື່ອເຂົ້າຮ່ວມງານມະຫາກໍາກິລາ ຊີເກມ ຄັ້ງທີ 35 ທີ່ຈະຈັດຂຶ້ນຢູ ສສ ຫວຽດນາມ.
- ເພີ່ມທະວີການຕິດຕາມ, ກວດກາ ແລະ ຊຸກຍູ້ ການຈັດຕັ້ງປະຕິບັດມາດຕະການປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດຂອງພະຍາດໂຄວິດ-19 ໂດຍສະເພາະການກວດຫາເຊື້ອ, ການຈໍາກັດບໍລິເວນ, ການປິ່ນປົວ, ການສັກວັກຊີນ ແລະ ການປະຕິບັດນະໂຍບາຍຕ່າງໆ ໃຫ້ແກ່ເປົ້າໝາຍກ່ຽວຂ້ອງ ຢ່າງເປັນລະບົບ.
- ສືບຕໍ່ເອົາໃຈໃສ່ຊຸກຍູ້ ແລະ ຕິດຕາມ ການປະຕິບັດບົດບາດຂອງຂະແໜງການຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ໃຫ້ແຂງແຮງກວ່າເກົ່າ ຕິດພັນກັບການໂຄສະນາເຜີຍແຜ່ແນວທາງ, ນະໂຍບາຍຂອງພັກ-ລັດ ແລະ ຕອບໂຕ້ສະພາບຫາງສຽງຂອງສັງຄົມ ທີ່ເຄື່ອນໄຫວໂຄສະນາໂຈມຕີ ບິດເບືອນຕໍ່ແນວທາງ ແລະ ນະໂຍບາຍຂອງພັກ-ລັດ ເຮົາໃຫ້ທັນກັບສະພາບການ.
4). ຂົງເຂດການປົກຄອງ ແລະ ຍຸຕິທໍາ.
- ຮີບຮ້ອນປັບປຸງຮ່າງກົດໝາຍສ້າງໃໝ່ ແລະ ສະບັບປັບປຸງ ທີ່ຂະແໜງການຕົນຮັບຜິດຊອບ ເພື່ອສະເໜີຄະນະປະຈຳສະພາແຫ່ງຊາດ ນຳເຂົ້າພິຈາລະນາ ໃນກອງປະຊຸມສະໄໝສາມັນ ເທື່ອທີ 3 ຂອງສະພາແຫ່ງຊາດ ຊຸດທີ IX ຕາມແຜນທີ່ວາງໄວ້.
- ສືບຕໍ່ກະກຽມການສະຫຼຸບຕີລາຄາການປະຕິບັດວຽກງານ 3 ສ້າງ, ການແຂ່ງຂັນຮັກຊາດ ແລະ ພັດທະນາ ໃຫ້ສໍາເລັດຕາມແຜນການທີ່ກໍານົດໄວ້.
- ສືບຕໍ່ເອົາໃຈໃສ່ກວດກາ ແລະ ປະຕິບັດຄໍາຕັດສິນຂອງສານໃຫ້ຖືກຕ້ອງ ແລະ ບັນລຸຕາມແຜນການ ທີ່ໄດ້ກໍານົດໄວ້.
5). ວຽກງານການຕ່າງປະເທດ:
- ສືບຕໍ່ຕິດຕາມສະພາບການຂອງໂລກ ທີ່ມີການຜັນແປຢ່າງສັບສົນ ແລະ ເຄັ່ງຮ້ອນ ຢ່າງໃກ້ຊິດ ໂດຍມີການວິເຄາະວິໄຈຢ່າງເລິກເຊິ່ງ ກ່ຽວກັບຄວາມສ່ຽງ ແລະ ທ່າອ່ຽງຜົນກະທົບທາງການເມືອງ, ເສດຖະກິດ ແລະ ສັງຄົມ ຕໍ່ປະເທດເຮົາ ໃຫ້ເປັນລະບົບ. ນອກຈາກນັ້ນ, ກໍໃຫ້ຂຶ້ນແຜນ ການເຄື່ອນໄຫວວຽກງານການຕ່າງປະເທດຂອງການນໍາ ໃຫ້ສອດຄ່ອງກັບສະພາບການຜັນແປ ໃນແຕ່ລະໄລຍະ, ສືບຕໍ່ຜັນຂະຫຍາຍ ແລະ ຈັດຕັ້ງປະຕິບັດ ຜົນຂອງການພົບປະລະຫວ່າງ ການນໍາຂອງພັກ-ລັດ ເຮົາ ກັບບັນດາປະເທດເພື່ອນມິດ ແລະ ກອງປະຊຸມທີ່ສໍາຄັນຕ່າງໆ ທີ່ພົວພັນເຖິງປະເທດພວກເຮົາ ໃຫ້ຖືກຕ້ອງ-ທັນການ ແລະ ໄດ້ຮັບຜົນດີ.
ເພື່ອໃຫ້ທິດທາງວຽກຈຸດສຸມ ເດືອນເມສາ ປີ 2022 ໄດ້ຮັບການຈັດຕັ້ງປະຕິບັດ ຢ່າງເປັນຮູບປະທໍາ, ບັນດາຂະແໜງການຂັ້ນສູນກາງ ຕະຫຼອດຮອດອົງການປົກຄອງທ້ອງຖິ່ນ ຕ້ອງໄດ້ຫັນເປັນແຜນປະຕິບັດລະອຽດ, ມີການແບ່ງຄວາມຮັບຜິດຊອບໃຫ້ການຈັດຕັ້ງ ແລະ ບຸກຄົນ ຢູ່ແຕ່ລະຂັ້ນ ໃນແຕ່ລະໄລຍະໃຫ້ຈະແຈ້ງ ທັງສອດຄ່ອງກັບເງື່ອນໄຂ ແລະ ສະພາບຄວາມເປັນຈິງຂອງແຕ່ລະທ້ອງຖິ່ນ.
ນອກຈາກນັ້ນ, ໃຫ້ບັນດາຂະແໜງການຂັ້ນສູນກາງ ແລະ ທ້ອງຖິ່ນ ເພີ່ມຄວາມເອົາໃຈໃສ່ໃນການປະສານ ທັງພາກລັດ ແລະ ພາກທຸລະກິດ ເພື່ອອໍານວຍຄວາມສະດວກໃນການແກ້ໄຂບັນຫາ ຕາມພາລະບົດບາດ ແລະ ເປັນເຈົ້າໃນການຈັດຕັ້ງປະຕິບັດ 02 ວາລະແຫ່ງຊາດ ໃຫ້ສໍາເລັດຕາມແຜນທີ່ກຳນົດໄວ້ ແລະ ໃຫ້ລາຍງານຜົນການຈັດຕັ້ງປະຕິບັດວຽກງານຂອງຕົນ ໃຫ້ລັດຖະບານຊາບ ເປັນປົກກະຕິ ແລະ ທັນກັບສະພາບການ.
ທັງໝົດນັ້ັນ ແມ່ນຜົນຂອງກອງປະຊຸມລັດຖະບານ ສະໄໝສາມັນ ປະຈຳເດືອນມີນາ 2022.
ສໍາລັບເດືອນ ເມສາ ເຊິ່ງເປັນເດືອນແຫ່ງການສະເຫຼີມສະຫຼອງບຸນປີໃໝ່ລາວ, ຂ້າພະເຈົ້າ ຂໍອວຍພອນ ໃຫ້ບັນດາທ່ານ ຈົ່ງມີສຸຂະພາບແຂງແຮງ, ມີພະລານະໄມສົມບູນ, ປອດໄພຈາກພະຍາດໂຄວິດ-19, ສໍາເລັດທຸກໜ້າທີ່ວຽກງານຂອງຕົນ, ແຕ່ໃນສະພາບທີ່ການລະບາດຂອງພະຍາດໂຄວິດ-19 ສາຍພັນ ໂອມິຄຣອນ ໃນທົ່ວໂລກ ແລະ ປະເທດອ້ອມຂ້າງ ສົມທົບກັບ ການເລີ່ມມີລາຍງານຈຳນວນຜູ້ຕິດເຊື້ອ ສາຍພັນດັ່ງກ່າວນີ້ ພາຍໃນປະເທດ ເພິ້ມຂຶ້ນ ໃນແຕ່ລະວັນ, ຂ້າພະເຈົ້າ ຖືໂອກາດນີ້ ຮຽກຮ້ອງມາຍັງພໍ່ແມ່ປະຊາຊົນລາວໃນທົ່ວປະເທດ ຈົ່ງສະຫຼອງປີໃໝ່ລາວດ້ວຍຄວາມປະຢັດມັດທະຍັດ, ກະທັດຮັດ ຖືກຕ້ອງຕາມຮີດຄອງປະເພນີ. ບັນຫາສຳຄັນ ໃຫ້ເອົາໃຈໃສ່ຄວາມເປັນລະບຽບຮຽບຮ້ອຍ ແລະ ຄວາມສະຫງົບ-ຄວາມປອດໄພ ແລະ ຮ່ວມໃຈກັນປ້ອງກັນ ແລະ ສະກັດກັ້ນການແຜ່ລະບາດຂອງພະຍາດໂຄວິດ ຕາມມາດຕະການຂອງຄະນະສະເພາະກິດ ແຕ່ລະຂັ້ນວາງອອກຢ່າງເຂັ້ມງວດ.
ອ່ານຕໍ່: ສະຫຼຸບ 5 ທິດຊີ້ນຳ ຕໍ່ບັນດາເອກະສານສຳຄັນ
ຂ່າວ ແລະ ພາບ: ກົມປະຊາສຳພັນ ສຳນັກງານນາຍົກລັດຖະມົນຕີ
ສະຫຼຸບ 5 ທິດຊີ້ນຳ ຕໍ່ບັນດາເອກະສານສຳຄັນ
ທ່ານ ນ. ທິບພະກອນ ຈັນທະວົງສາ, ຮອງລັດຖະມົນຕີ, ຮອງຫົວໜ້າຫ້ອງວ່າການສຳນັກງານນາ ຍົກລັດຖະມົນຕີ, ຜູ້ປະຕິບັດໜ້າທີ່ໂຄສົກລັດຖະບານ ໄດ້ຖະແຫລງຂ່າວກ່ຽວກັບຜົນສຳເລັດຂອງກອງປະຊຸມລັດຖະບານ ປະຈຳເດືອນມີນາ 2022, ທີ່ຫ້ອງວ່າການສຳນັກງານນາຍົກລັດຖະມົນຕີ ໃນຕອນແລງຂອງວັນທີ 22 ມີນາ 2022.
ກອງປະຊຸມລັດຖະບານ ສະໄໝສາມັນ ປະຈຳເດືອນມີນາ 2022 ໄດ້ໄຂຂຶ້ນຢ່າງເປັນທາງການ ໃນຕອນເຊົ້າວັນທີ 21 ແລະ ປິດລົງ ໃນຕອນແລງ ວັນທີ 22 ມີນາ 2022 ທີ່ສຳນັກງານນາຍົກລັດ ຖະມົນຕີ, ພາຍໃຕ້ການເປັນປະທານ ຂອງທ່ານ ສອນໄຊ ສີພັນດອນ, ຮອງນາຍົກລັດຖະ ມົນຕີ; ມີບັນດາທ່ານ ຮອງນາຍົກລັດຖະມົນຕີ, ສະມາຊິກລັດຖະ ບານ ແລະ ຜູ້ຕາງໜ້າຈາກກະຊວງເຂົ້າຮ່ວມ.
ກອງປະຊຸມ ໄດ້ຮັບຟັງການລາຍງານ, ຄົ້ນຄວ້າ, ປຶກສາຫາລື ພ້ອມທັງ ໄດ້ຕົກລົງ ແລະ ມີທິດຊີ້ນຳ ຕໍ່ບັນດາເອກະສານສຳຄັນ ດັ່ງນີ້:
1.ຮ່າງບົດສະຫຼຸບຕີລາຄາການປະຕິບັດວຽກງານຈຸດສຸມ ປະຈຳເດືອນມີນາ ແລະ ທິດທາງແຜນວຽກຈຸດສຸມ ປະຈຳເດືອນ ເມສາ 2022 ຂອງລັດຖະບານ, ຊຶ່ງກອງປະຊຸມ ໄດ້ເຫັນດີດ້ານຫຼັກການ ຮັບຮອງເອົາຮ່າງບົດສະຫຼຸບລາຍງານດັ່ງກ່າວ ແລະ ມອບໃຫ້ຫ້ອງວ່າການສໍານັກງານນາຍົກລັດຖະມົນຕີ ປັບປຸງເນື້ອໃນ ຕາມການປະກອບຄໍາເຫັນ ຂອງສະມາຊິກລັດຖະບານ ໃຫ້ຄົບຖ້ວນ, ສົມບູນ ຂຶ້ນຕື່ມ. ນອກຈາກນີ້ ກໍໄດ້ຊີ້ນໍາໃຫ້ຂະແໜງການກ່ຽວ ຂ້ອງ ສືບຕໍ່ຈັດຕັ້ງປະຕິບັດວຽກ ງານຈຸດສຸມປະຈຳເດືອນ ເມສາ ຕາມຂອບເຂດຄວາມຮັບຜິດ ຊອບຂອງຕົນເອງ; ຖ້າຫາກບັນ ຫາໃດເຄັ່ງຮ້ອນຮີບດ່ວນ ກໍ່ໃຫ້ຄົ້ນຄວ້າຫາວິທີການແກ້ໄຂ ອະທິ ບາຍຊີ້ແຈງ ໃຫ້ສັງຄົມ ໄດ້ຮັບຮູ້ ແລະ ເຂົ້າໃຈ ເປັນເອກະພາບ ພ້ອມທັງ ລາຍງານຄວາມຄືບໜ້າ ຕໍ່ກອງປະຊຸມລັດ ຖະບານ ໃນເດືອນຕໍ່ໄປ.
2.ຮ່າງກົດໝາຍ ວ່າດ້ວຍການຄຸ້ມຄອງອາວຸດ ແລະ ວັດຖຸລະເບີດ (ສ້າງໃໝ່) ແລະ ຮ່າງກົດໝາຍ ວ່າດ້ວຍນໍ້າ ແລະ ຊັບພະຍາກອນນໍ້າ (ປັບປຸງບາງມາດຕາ). ກອງປະຊຸມ ເຫັນດີດ້ານຫຼັກການ ຮັບຮອງເອົາສອງຮ່າງກົດໝາຍດັ່ງກ່າວ, ພ້ອມທັງ ຊີ້ນຳຂະແໜງການກ່ຽວຂ້ອງ ນຳໄປປັບປຸງຄືນ ຕາມການປະກອບຄຳເຫັນ ຂອງສະມາຊິກລັດຖະ ບານ ເພື່ອໃຫ້ມີເນື້ອໃນຄົບຖ້ວນ, ຮັດກຸມ, ແທດເໝາະກັບເງື່ອນໄຂຕົວຈິງ, ສາມາດຄຸ້ມຄອງວຽກງານດັ່ງກ່າວ ໄດ້ຢ່າງມີປະສິດທິພາບ ແລະ ປະສິດທິຜົນ. ພາຍຫຼັງປັບ ປຸງແລ້ວ ໃຫ້ສົມທົບກັບກະຊວງຍຸຕິທຳ ແລະ ຫ້ອງວ່າການສຳນັກ ງານນາ ຍົກລັດຖະມົນຕີ ເພື່ອຮຽບຮຽງຄືນ ແລ້ວສົ່ງຂໍຄຳເຫັນ ຈາກທ່ານຮອງນາຍົກລັດຖະ ມົນຕີ, ຜູ້ຊີ້ນໍາວຽກງານຂົງເຂດການປົກຄອງ ເພື່ອໃຫ້ທັນນຳສະ ເໜີພິຈາລະນາ ໃນກອງປະຊຸມສະພາແຫ່ງຊາດ ໃນຂັ້ນຕໍ່ໄປ.
3.ຮ່າງລັດຖະບັນຍັດ ວ່າດ້ວຍລາຍການສິນຄ້າ ແລະ ອັດຕາພາ ສີຂາອອກ (ສະບັບປັບປຸງ) ແລະ ຮ່າງດໍາລັດ ວ່າດ້ວຍໃບເກັບເງິນ (ສະບັບປັບປຸງ). ກອງປະຊຸມ ເຫັນດີດ້ານຫຼັກການ ຮັບຮອງເອົາສອງນິຕິກຳດັ່ງກ່າວ, ພ້ອມທັງ ຊີ້ນຳຂະແໜງການກ່ຽວຂ້ອງ ນຳໄປປັບປຸງຄືນ ຕາມການປະກອບຄຳເຫັນ ຂອງສະມາຊິກລັດຖະ ບານ ເປັນຕົ້ນ ຊື່ຂອງຮ່າງດຳລັດ, ການນຳໃຊ້ຄຳສັບ, ການໃຫ້ນິຍາມເພີ່ມຕື່ມບາງຄຳສັບ, ການກຳນົດມາດຕະການຄຸ້ມຄອງວຽກງານ ແລະ ອື່ນໆ ເພື່ອໃຫ້ມີເນື້ອໃນ ຄົບຖ້ວນ, ລະອຽດ, ຈະແຈ້ງ, ຮັດກຸມ ສອດຄ່ອງກັບຕົວຈິງ, ສາ ມາດຈັດຕັ້ງປະຕິບັດໄດ້ ຢ່າງມີປະສິດທິພາບ ແລະ ປະສິດທິຜົນ.
4.ຮ່າງດໍາລັດ ວ່າດ້ວຍພົນລະ ເມືອງກິດຕິມະສັກ, ຮ່າງດຳລັດ ວ່າດ້ວຍຫ້ອງການໄກ່ເກ່ຍຂໍ້ຂັດ ແຍ່ງທາງດ້ານເສດຖະກິດເອກະ ຊົນ ແລະ ຮ່າງດໍາລັດ ວ່າດ້ວຍຄ່າແຮງງານຂອງຜູ້ແກ້ໄຂຂໍ້ຂັດແຍ່ງທາງດ້ານເສດຖະກິດ. ກອງປະ ຊຸມ ເຫັນດີດ້ານຫຼັກການ ຮັບຮອງຮ່າງດຳລັດດັ່ງກ່າວ ໂດຍໄດ້ຊີ້ນຳໃຫ້ພາກສ່ວນກ່ຽວຂ້ອງ ນຳໄປປັບປຸງຄືນ ຕາມຄຳເຫັນຂອງສະມາຊິກລັດຖະບານ ເປັນຕົ້ນ ການກຳນົດເງື່ອນໄຂຕ່າງໆ ແລະ ຂັ້ນຕອນ ການເປັນພົນລະເມືອງກິດຕິມະສັກ; ການກໍານົດ ຄະນະຮັບຜິດຊອບຄົ້ນຄວ້າ ແລະ ພິຈາ ລະນາ ການເປັນພົນລະເມືອງກິດຕິມະສັກ; ການກຳນົດສິດ ແລະ ພັນທະ ຂອງພົນລະເມືອງກິດຕິມະສັກ; ໄລຍະເວລາ ແລະ ກົນໄກ ໃນການຄົ້ນຄວ້າ, ການອະນຸມັດ ແລະ ການມອບນາມ ມະຍົດ ພົນລະເມືອງກິດຕິມະ ສັກ; ສ່ວນ ຮ່າງດຳລັດ ວ່າດ້ວຍຫ້ອງການໄກ່ເກ່ຍຂໍ້ຂັດແຍ່ງທາງດ້ານເສດຖະກິດເອກະຊົນ ແລະ ຮ່າງດໍາລັດ ວ່າດ້ວຍຄ່າແຮງງານຂອງຜູ້ແກ້ໄຂຂໍ້ຂັດແຍ່ງທາງດ້ານເສດຖະກິດ ກໍ່ໃຫ້ປັບປຸງເນື້ອໃນ ໃຫ້ຄົບຖ້ວນ, ຮັດກຸມ, ສອດຄ່ອງກັບກົດໝາຍ ແລະ ລະບຽບການທີ່ມີຢູ່ແລ້ວ ເພື່ອຮັບປະກັນການຈັດຕັ້ງປະຕິບັດຕົວຈິງ ມີປະສິດທິຜົນ.
5.ຮ່າງຍຸດທະສາດແຫ່ງຊາດ ວ່າດ້ວຍການແກ້ໄຂບັນຫາລະເບີດບໍ່ທັນແຕກ ທີີ່ຕົກຄ້າງ ຢູ່ ສປປ ລາວ. ກອງປະຊຸມ ເຫັນດີດ້ານຫຼັກການ ຮັບຮອງເອົາຮ່າງຍຸດ ທະສາດດັ່ງກ່າວ, ພ້ອມທັງ ຊີ້ນຳໃຫ້ຂະແໜງການກ່ຽວຂ້ອງ ປັບປຸງຄືນ ຕາມຄຳເຫັນຂອງສະມາຊິກລັດຖະບານ ເປັນຕົ້ນ ການກຳນົດວິທີການ ແລະ ກົນໄກການບໍລິ ຫານຄຸ້ມຄອງວຽກງານ; ຈັດລຽງບູລິມະສິດ ຂອງວຽກງານ; ຂຶ້ນແຜນງົບປະມານຮັບໃຊ້ວຽກງານ; ສ້າງແຜນພັດທະນາບຸກຄະລາກອນ ຮັບໃຊ້ວຽກງານ; ແຜນວຽກໂຄສະນາເຜີຍແຜ່; ການເກັບກຳຂໍ້ມູນພື້ນທີ່ ແລະ ລະເບີດບໍ່ທັນແຕກ ເພື່ອວາງແຜນແກ້ໄຂ ໃຫ້ລະອຽດ ແລະ ຈະແຈ້ງ; ນອກ ຈາກນັ້ນ ກໍ່ໃຫ້ຖອດຖອນບົດ ຮຽນຄືນ ການຈັດຕັ້ງປະຕິບັດວຽກງານດັ່ງກ່າວ ໃນໄລຍະຜ່ານມາ ເພື່ອນຳມາເປັນຂໍ້ມູນ ປັບປຸງຮ່າງແຜນຍຸດທະສາດ ໃຫ້ມີເນື້ອໃນແທດຕົວຈິງ, ສາມາດຈັດຕັ້ງປະຕິບັດ ມີຄວາມຄືບໜ້າໄວ, ມີປະສິດພາບ, ປະສິດທິຜົນສູງ ປະກອບສ່ວນເຂົ້າໃນການແກ້ໄຂບັນຫາກົດໜ່ວງຖ່ວງດຶງການພັດທະນາຊີວິດການເປັນຢູ່ຂອງປະຊາຊົນ ຢ່າງແທ້ຈິງ.
ສໍາລັບແຜນວຽກຈຸດສຸມ ປະຈຳເດືອນເມສາ 2022 ຊຶ່ງແມ່ນໄລຍະບຸນປີໃໝ່ລາວ ແລະ ໃນສະພາບການລະບາດຂອງພະຍາດໂຄວິດ-19 ທີ່ຍັງມີທ່າອ່ຽງເພີ່ມສູງຂຶ້ນ, ລັດຖະບານ ຈະສືບຕໍ່ສຸມທຸກກໍາລັງແຮງຂອງທຸກພາກສ່ວນໃນສັງຄົມ ເພື່ອເລັ່ງຟື້ນຟູເສດຖະກິດຂອງປະເທດເຮົາ ໃຫ້ຄືນສູ່ສະພາບປົກກະຕິໂດຍໄວ, ປັບປຸງຊີວິດການເປັນຢູ່ຂອງປະຊາຊົນລາວໃຫ້ດີຂຶ້ນ ໄປຄຽງຄູ່ກັບການຈັດຕັ້ງປະຕິບັດ 2 ວາລະແຫ່ງຊາດ ໃຫ້ເປັນຮູບປະທຳ ແລະ ປະສົບຜົນສຳເລັດ ຕາມແຜນທີ່ກຳນົດໄວ້ ໂດຍສະເພາະ ສຸມໃສ່ປະຕິບັດດຳລັດວ່າດ້ວຍລົດຂອງລັດ, ແກ້ໄຂລົດນຳເຂົ້າບໍ່ຖືກກົດ ໝາຍ, ການຄຸ້ມຄອງ ແລະ ຮັກສາສະຖຽນລະພາບດ້ານເງິນຕາ ໃຫ້ມີຄວາມໝັ້ນທ່ຽງ ແລະ ເໜັງຕີງ ໃນລະດັບທີ່ກໍານົດໄວ້, ຄຸ້ມຄອງລາຄານໍ້າມັນເຊື້້ອໄຟ ທີ່ສົ່ງຜົນກະທົບທາງກົງ ແລະ ທາງອ້ອມ ຕໍ່ການພັດທະນາເສດຖະກິດ- ສັງ ຄົມ ຂອງປະເທດເຮົາ ຢ່າງໜັກ ຜ່ອນຄາຍລົງ.
ອ່ານຕໍ່: ສະຫຼຸບແຜນວຽກ ໃນ 5 ຂົງເຂດວຽກງານ
ຂ່າວ ແລະ ພາບ: ກົມປະຊາສຳພັນ ສຳນັກງານນາຍົກລັດຖະມົນຕີ
ແຈ້ງການມອດໄຟໃນຂອບເຂດນະຄອນຫຼວງວຽງຈັນ
ຟຟລ ສາຂາໄຟຟ້ານະຄອນຫລວງ2 ແຈ້ງການມອດໄຟ ວັນທີ່ 24, 25, 26, 27, 28, 29, 31 ມີນາ 2022
.
.
.
.
.
.
.
.
.
.
.
.
.
.
.
.
.
.
.
.
ປະເທດສະມາຊິກ ແມ່ນໍ້າຂອງ-ແມ່ນໍ້າລ້ານຊ້າງ ຂະຫຍາຍຂົງເຂດການຮ່ວມມື ໃນດ້ານຕ່າງໆຫຼາຍຂຶ້ນ
ໃນໂອກາດວັນສ້າງຕັ້ງຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ຄົບຮອບ 6 ປີ, ທ່ານ ສະເຫລີມໄຊ ກົມມະສິດ ລັດຖະມົນຕີ ກະຊວງການຕ່າງປະເທດ ແຫ່ງ ສປປ ລາວ ໄດ້ຂຽນບົດຄວາມກ່ຽວກັບວັນດັ່ງກ່າວວ່າ: ໃນວັນທີ 23 ມີນາ 2016, ບັນດາຜູ້ນຳຈາກປະເທດແມ່ນໍ້າຂອງ (ກໍາປູເຈຍ, ສປປ ລາວ, ສສ ມຽນມາ, ໄທ ແລະ ສສ ຫວຽດນາມ) ແລະ ສປ ຈີນ ໄດ້ຮ່ວມກັນປະກາດສ້າງຕັ້ງຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ຂຶ້ນຢ່າງເປັນທາງການໃນກອງປະຊຸມຜູ້ນຳແມ່ນໍ້າຂອງ-ແມ່ນໍ້າລ້ານຊ້າງ ຄັ້ງປະຖົມມະລືກ ທີ່ ເມືອງຊັນຢາ, ໄຫໜານ, ສປ ຈີນ.
ບັນດາປະເທດສະມາຊິກຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ໄດ້ຮ່ວມກັນວາງເປົ້າໝາຍເພື່ອການພັດທະນາເສດຖະກິດ-ສັງຄົມຮອບດ້ານ ບົນພື້ນຖານຄວາມສະເໝີພາບ ແລະ ຕ່າງຝ່າຍຕ່າງມີຜົນປະໂຫຍດ ແລະ ແນໃສ່ຫລຸດຜ່ອນຄວາມແຕກໂຕນທາງດ້ານການພັດທະນາ ໂດຍແນໃສ່ 3 ເສົາຄໍ້າຄື: ການ ເມືອງ-ຄວາມໝັ້ນຄົງ, ເສດຖະກິດ-ການພັດທະນາແບບຍືນຍົງ, ສັງຄົມ-ວັດທະນະທໍາ ແລະ ການແລກປ່ຽນລະຫວ່າງປະຊາຊົນກັບປະຊາຊົນ, ໃນນີ້ໄດ້ສຸມໃສ່ 5 ຂົງເຂດບູລິມະສິດເຊັ່ນ: ການເຊື່ອມຈອດ, ສົ່ງເສີມຄວາມອາດສາມາດການຜະລິດເສດຖະກິດຂ້າມຊາຍແດນ, ການຄຸ້ມຄອງແຫລ່ງຊັບພະ ຍາກອນນໍ້າ, ກະສິກໍາ ແລະ ການຫລຸດຜ່ອນຄວາມທຸກຍາກ.
ນັບແຕ່ນັ້ນມາ, ການຮ່ວມມືລະຫວ່າງປະເທດສະມາຊິກແມ່ນໍ້າຂອງ-ແມ່ນໍ້າລ້ານຊ້າງ ຍິ່ງເພີ່ມທະວີການພົວພັນ ແລະ ຂະຫຍາຍຂົງເຂດການຮ່ວມມືໃນດ້ານຕ່າງໆຫລາຍຂຶ້ນ ເປັນຕົ້ນ ການສຶກສາ, ສາທາລະນະສຸກ, ສ້າງສະພາບແວດລ້ອມທີ່ເອື້ອອໍານວຍຄວາມສະດວກດ້ານການຂົນສົ່ງສິນຄ້າ ແລະ ອື່ນໆ ໂດຍສະແດງອອກຈາກໝາກຜົນຂອງການຮ່ວມມືໃນໄລຍະຜ່ານມາ ເຊິ່ງໄດ້ໃຫ້ການຊ່ວຍເຫລືອດ້ານທຶນຮອນ ແລະ ເຕັກນິກວິຊາການ ເພື່ອສ້າງຄວາມອາດສາມາດໃນການຍົກລະດັບການເຕີບໂຕທາງດ້ານເສດຖະກິດ ກໍຄື ການຍົກລະດັບຊີວິດການເປັນຢູ່ຂອງປະຊາຊົນໃນເຂດແມ່ນໍ້າຂອງ-ແມ່ນໍ້າລ້ານຊ້າງ.
ເລີ່ມຕັ້ງແຕ່ທ້າຍປີ 2019 ເປັນຕົ້ນມາ, ປະຊາຄົມໂລກ ໄດ້ປະເຊີນໜ້າກັບການແພ່ລະບາດຂອງພະຍາດໂຄວິດ-19 ເຊິ່ງໄດ້ສົ່ງຜົນກະທົບຕໍ່ວິຖີການດຳລົງຊີວິດ, ການໄປມາຫາສູ່ ລະຫວ່າງປະ ເທດ ແລະ ສະພາບເສດຖະກິດຢ່າງໜັກໜ່ວງ ລວມທັງການສູນເສຍຊີວິດຂອງປະຊາຊົນເປັນຈຳນວນຫລວງຫລາຍ, ທ່າມກາງສະພາບຄວາມຫຍຸ້ງຍາກ ແລະ ສິ່ງທ້າທາຍດັ່ງກ່າວ ບັນດາປະເທດສະມາ ຊິກແມ່ນໍ້າຂອງ-ແມ່ນໍ້າລ້ານຊ້າງ ກໍບໍ່ເຄີຍລົດລະຄວາມພະຍາຍາມຕໍ່ຄວາມໝາຍໝັັ້ນຂອງການຮ່ວມມື ແລະ ໄດ້ສືບຕໍ່ເພີ່ມທະວີການຮ່ວມມືຢ່າງສະເໝີຕົ້ນສະເໝີປາຍ ພ້ອມທັງໄດ້ໃຫ້ການຊ່ວຍເຫລືອເຊິ່ງກັນ ແລະ ກັນ ຕໍ່ສູ້ກັບໄພຂົ່ມຂູ່ຄັ້ງນີ້.
ເພື່ອເປັນການເພີ່ມທະວີການຮ່ວມມື ດັ່ງກ່າວ, ສປ ຈີນ ກໍໄດ້ເປັນເຈົ້າພາບຈັດກອງປະຊຸມລັດຖະມົນຕີຕ່າງປະເທດແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 6 ຂຶ້ນ ທີ່ນະຄອນສົງຊິງ, ສປ ຈີນ ໃນປີ 2021 ພາຍໃຕ້ການເປັນປະທານຮ່ວມຂອງ ສປ ຈີນ ແລະ ສສ ມຽນມາ, ກອງປະຊຸມໃນຄັ້ງນີ້ ໄດ້ມີຂໍ້ລິເລີ່ມທີ່ດີໃນການຂະຫຍາຍຂົງເຂດການຮ່ວມມືສູ່ລວງເລິກ ແລະ ລວງກວ້າງ ເຊັ່ນ: ການສົ່ງເສີມການຮ່ວມມືເພື່ອການພັດທະນາແບບຍືນຍົງ, ການຮັດແໜ້ນການຮ່ວມມືລະຫວ່າງອົງການປົກຄອງທ້ອງຖິ່ນ ແລະ ອື່ນໆ. ໄປຄ່ຽງຄູ່ກັບການຍົກສູງຖານະບົດບາດຂອງ ສປປ ລາວ ໃຫ້ສູງເດັ່ນຂຶ້ນໃນເວທີອະນຸພາກພື້ນ, ພາກພື້ນ ແລະ ສາກົນ ຈາກການເຂົ້າຮ່ວມ ແລະ ປະກອບສ່ວນໃນດ້ານຕ່າງໆແລ້ວ, ສປປ ລາວ ຍັງໄດ້ຮັບຜົນປະໂຫຍດ ທີ່ເປັນຮູບປະທໍາຈາກການຈັດຕັ້ງປະຕິບັດບັນດາໂຄງການຮ່ວມມືຕ່າງໆພາຍໃຕ້ຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ເປັນຕົ້ນ ການຈັດຕັ້ງປະຕິບັດໂຄງການເຫັນຜົນໄວ ເຊັ່ນ:
ໂຄງການທົດລອງແກ້ໄຂຄວາມທຸກຍາກລາວ-ຈີນ ມູນຄ່າ 33 ລ້ານຢວນ ຢູ່ ນະຄອນຫລວງວຽງຈັນ ແລະ ແຂວງຫລວງພະບາງ ທີ່ ສໍາເລັດໃນປີ 2020 ເຊິ່ງໄດ້ສ້າງພື້ນຖານໂຄງລ່າງຂະໜາດນ້ອຍຄື: ສ້າງສຸກສາລາ, ຫໍພັກຄູ-ອາຈານ, ສູນບໍາບັດຂີ້ເຫຍື້ອ ແລະ ສູນຝຶກອົບຮົມການເຮັດກະສິກໍາສະອາດໃຫ້ປະຊາຊົນໃນລະດັບບ້ານ ເພື່ອເປັນການສ້າງລາຍຮັບໃຫ້ປະຊາຊົນໃນເຂດດັ່ງກ່າວ. ພ້ອມກັນນີ້, ແຕ່ປີ 2017 ເປັນຕົ້ນມາ, ພາຍໃຕ້ກອງທຶນພິເສດແມ່ນໍ້າຂອງ-ແມ່ນໍ້າລ້ານຊ້າງ, ສປປ ລາວ ໄດ້ຮັບໂຄງການທັງໝົດ 56 ໂຄງການ, ຄິດເປັນມູນຄ່າລວມປະມານ 15 ລ້ານກວ່າໂດລາສະຫະລັດ. ມາເຖິງປັດຈຸບັນສາມາດປະຕິບັດສໍາເລັດແລ້ວ 11 ໂຄງການ, ກໍາລັງຈັດຕັ້ງປະຕິບັດຢູ່ 45 ໂຄງການ, ບັນດາໂຄງການເຫລົ່ານັ້ນໄດ້ປະກອບສ່ວນສຳຄັນເຂົ້າໃນການພັດທະນາເສດຖະກິດ-ສັງຄົມ ຂອງ ສປປ ລາວ ແລະ ພາກພື້ນແມ່ນໍ້າຂອງ.
ສປປ ລາວ ຕີລາຄາສູງຕໍ່ໝາກຜົນການຮ່ວມມືພາຍໃຕ້ຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ບົນຈິດໃຈການຮ່ວມມືເພື່ອສັນຕິພາບ, ສະຖຽນລະພາບ, ຄວາມສາມັກຄີປອງດອງ ແລະ ເປັນຈິດໜຶ່ງໃຈດຽວ ໃນການພັດທະນາອະນຸພາກພື້ນແມ່ນໍ້າຂອງ ກໍຄື ການສົ່ງເສີມການຮ່ວມມື ໃຫ້ນັບມື້ນັບແໜ້ນແຟ້ນ, ຂະຫຍາຍໄປສູ່ລວງກວ້າງ ແລະ ລວງເລິກ ຢ່າງມີປະສິດທິຜົນ ແລະ ມີຜົນປະໂຫຍດຮ່ວມກັນ ລະຫວ່າງປະເທດສະມາຊິກ. ສປປ ລາວ ຂໍຖືໂອກາດນີ້ ສະແດງຄວາມຂອບໃຈຢ່າງຈິງໃຈ ມາຍັງ ລັດຖະບານ ແຫ່ງ ສປ ຈີນ ທີ່ໄດ້ໃຫ້ຄວາມສຳຄັນ ແລະ ສະໜັບສະໜູນຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ຕະຫລອດມາ ໂດຍສະເພາະການສະໜັບສະໜູນທຶນຊ່ວຍ ເຫລືອ ເຂົ້າໃນກອງທຶນພິເສດແມ່ນໍ້າຂອງ-ແມ່ນໍ້າລ້ານຊ້າງ ເຊິ່ງເຮັດໃຫ້ບັນດາໂຄງການຮ່ວມມືຕ່າງໆໃນອະນຸພາກພື້ນແມ່ນໍ້າຂອງ ໄດ້ຮັບການຈັດຕັ້ງປະຕິບັດຢ່າງມີໝາກຜົນ ແລະ ເປັນຮູບປະທຳ.
ຂ້າພະເຈົ້າ ຕາງໜ້າໃຫ້ລັດຖະບານແຫ່ງ ສປປ ລາວ ຂໍສະແດງຄວາມຊົມເຊີຍຕໍ່ການສ້າງຕັ້ງກົນໄກການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ຄົບຮອບ 6 ປີ ແລະ ຂໍອວຍພອນໃຫ້ການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ນັບມື້ນັບເຕີບໃຫຍ່ຂະຫຍາຍຕົວຂຶ້ນເລື້ອຍໆ ເພື່ອປະກອບສ່ວນເຂົ້າໃນການພັດທະນາອະນຸພາກພື້ນແມ່ນໍ້າຂອງໃຫ້ມີຄຸນນະພາບ ແລະ ຍືນຍົງ ກໍຄື ຮັບປະກັນໃຫ້ເປັນອະນຸພາກພື້ນ ທີ່ມີສັນຕິພາບ, ສະຖຽນລະພາບ ແລະ ການພັດທະນາ ຢ່າງຮອບດ້ານ ທັງປະກອບສ່ວນ ເຂົ້າໃນການສ້າງປະຊາຄົມອາຊຽນ, ການຈັດຕັ້ງປະຕິບັດຂໍ້ລິເລີ່ມ ໜຶ່ງແລວ ໜຶ່ງເສັ້ນທາງ, ການຮ່ວມມືໃຕ້-ໃຕ້ ແລະ ການບັນລຸເປົ້າໝາຍພັດທະນາແບບຍືນຍົງ ຮອດປີ 2030 ຂອງອົງການສະຫະປະຊາຊາດ. ສປປ ລາວ ໃນຖານະປະເທດສະມາຊິກ ຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ຈະສືບຕໍ່ຮ່ວມມືຢ່າງໃກ້ຊິດ ກັບ ສປ ຈີນ ແລະ ບັນດາປະເທດແມ່ນໍ້າຂອງໃນການປະກອບສ່ວນ ແລະ ເຂົ້າຮ່ວມກິດຈະກຳຕ່າງໆ ກໍຄື ການຈັດຕັ້ງຜັນຂະຫຍາຍບັນດາຖະແຫລງການກອງປະຊຸມຜູ້ນຳແມ່ນໍ້າຂອງ-ແມ່ນໍ້າລ້ານຊ້າງ ກໍຄື ແຜນປະຕິບັດງານປີ (2018-2022) ແລະ ຈະສືບຕໍ່ຈັດຕັ້ງປະຕິບັດໂຄງການຕ່າງໆພາຍໃຕ້ຂອບການຮ່ວມມືດັ່ງກ່າວຢ່າງຫ້າວຫັນ ຮັບປະກັນໝາກຜົນຕົວຈິງໃຫ້ແກ່ບັນ ດາປະເທດສະມາຊິກຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ.
ແຫຼ່ງຂ່າວ: ຂປລ
ກະຊວງແຮງງານ ແລະ ສະຫວັດດີການສັງຄົມ ອອກແຈ້ງການ
ກະຊວງແຮງງານ ແລະ ສະຫວັດດີການສັງຄົມ ອອກແຈ້ງການ ເລື່ອງ: ໃຫ້ຈັດຕັ້ງການຜັດປ່ຽນກັນມາປະຈໍາການ ເພື່ອປ້ອງກັນການແຜ່ລະບາດຂອງພະຍາດ COVID-19 ໃນ ຮອບໃຫມ່.
ຫ້ອງການກະຊວງແຮງງານແລະສະຫວັດດີການສັງຄົມຂໍຖືເປັນກຽດແຈ້ງການມາຍັງບັນດາທ່ານຊາບວ່າ:ມາຮອດ ປັດຈຸບັນ, ສະພາບການແຜ່ລະບາດແລະຕິດເຊື້ອພະຍາດໂຄວິດຂອງປະຊາຊົນຢູ່ນະຄອນຫລວງວຽງຈັນແລະບັນດາແຂວງ ນັບມື້ມີທ່າອ່ຽງເພີ່ມຂຶ້ນໃນແຕ່ລະມື້, ສະນັ້ນ, ເພື່ອເປັນການປ້ອງກັນແລະສະກັດກັ້ນການແຜ່ລະບາດຂອງເຊື້ອພະຍາດໂຄ ວິດ-19 ບໍ່ໃຫ້ມີການຂະຫຍາຍອອກເປັນວົງກວ້າງ, ຈິ່ງແຈ້ງມາຍັງບັນດາກົມ, ອົງການອ້ອມຂ້າງກະຊວງ ໃຫ້ມີການຈັດຕັ້ງ ການຜັດປ່ຽນກັນມາປະຈໍາການເພື່ອແກ້ໄຂວຽກຂອງຕົນນັບແຕ່ວັນທີ 23-25 ມີນາ 2012 ໂດຍຂັ້ນຄະນະນໍາກະຊວງ ແລະ ຂັ້ນກົມ ໃຫ້ມາປະຈໍາການປົກກະຕິທັງຫມົດ.
ສ່ວນຂັ້ນພະແນກ ແລະ ວິຊາການແມ່ນມອບໃຫ້ແຕ່ລະພາກສ່ວນເປັນຜູ້ ຈັດແບ່ງກັນມາປະຈໍາການ ແລະ ໃຫ້ຮັບປະກັນການເວັ້ນໄລຍະຫ່າງ ຊຶ່ງຢ່າງຫນ້ອຍໃຫ້ມີຂັ້ນພະແນກຂອງແຕ່ລະພະແນກ 1 ທ່ານ ແລະ ຂັ້ນວິຊາການຢູ່ແຕ່ລະພະແນກ 1 ທ່ານ, ຍົກເວັ້ນບາງພາກສ່ວນທີ່ມີຄວາມຈໍາເປັນຕ້ອງໄດ້ມາແກ້ໄຂວຽກຮີບ ດ່ວນຂອງຕົນ ແຕ່ຕ້ອງຮັບປະກັນໃນການປ້ອງກັນການແຜ່ລະບາດຢູ່ພາຍໃນກົມກອງຕົນຕາມມາດຕະການປ້ອງກັນໂຄວິດ ຂອງຄະນະສະເພາະກິດ, ກໍລະນີ, ຫາກພະນັກງານມີອາການບໍ່ສະບາຍ, ໄຂ້, ເຈັບຄໍ ແມ່ນໃຫ້ພັກຈັກໂຕເອງເພື່ອຕິດຕາມ ຮັກສາຕົນເອງ ແລະ ກວດຫາເຊື້ອພະຍາດໂຄວິດ-19 ຢ່າງທັນການ ພ້ອມລາຍງານຜົນໃຫ້ກົມກອງຂອງຕົນຮັບຊາບ ເພື່ອ ຫລີກຫລ່ຽງການແຜ່ລະບາດເປັນວົງກວ້າງຢູ່ພາຍໃນກະຊວງ ກໍ່ຄືຢູ່ໃນສັງຄົມ, ພ້ອມນັ້ນ, ກໍ່ໃຫ້ສືບຕໍ່ຕິດຕາມສະພາບການ ລະບາດຂອງພະຍາດໂຄວິດ-19 ຕໍ່ໄປ ແລະ ຖ້າຍັງມີລັກສະນະຮ້າຍແຮງຫລັງວັນທີ 25 ມີນາ 2022 ຈິ່ງຈະມີແຈ້ງການ ແນະນໍເພີ່ມຕື່ມ.
ເປີດເທສະການ ຫຸ່ນເຟືອງທົ່ງນາແຊງບ້ານນາ ຢູ່ນະຄອນຫລວງວຽງຈັນ
ເທສະການ ຫຸ່ນເຟືອງທົ່ງນາແຊງບ້ານນາ ຈັດຂຶ້ນໃນລະວ່າງວັນທີ 21-27 ມີນາ 2022 ຢູ່ບ້ານໜອງບົວທອງ ເມືອງສີໂຄດຕະບອງ ນະຄອນຫລວງວຽງຈັນ ໂດຍມີການວາງສະແດງ ຫຸ່ນເຟືອງ ທີ່ເປັນຮູບສັດຕ່າງໆ ເປັນຕົ້ນ, ເສືອ, ສິງ, ລິງ (ຄິງຄ໋ອງ), ຊ້າງ, ຄວາຍ ເພື່ອສ້າງສີສັນ ໃຫ້ມວນຊົນ ໄດ້ມາທ່ຽວ, ມາຊົມ, ໄດ້ຖ່າຍພາບ ເກັບເອົາບັນຍາກາດທົ່ງນາແບບບ້ານໆທີ່ສວຍງາມ, ພ້ອມນັ້ນ, ຍັງ ມີບ່ອນຫລິ້ນເດັກນ້ອຍ, ມີການສະແດງສິລະປະ, ຟ້ອນ, ຮ້ອງເພງ ສະລັບສັບປ່ຽນກັນ ໃນແຕ່ລະວັນ, ນອກນັ້ນ, ຍັງມີຮ້ານອາຫານ ແລະ ເຄື່ອງດື່ມປະເພດຕ່າງໆ ແລະ ວາງສະແດງລົດ ຕື່ມອີກ.
ທ່ານນາງ ວົງຈັນ ບົວແພງ ຮອງປະທານໂຮງແຮມລາວເທວ, ປະທານຈັດງານເທສະການ ຫຸ່ນເຟືອງທົ່ງນາແຊງບ້ານນາ ກ່າວໃນພິທີເປີດງານຄັ້ງນີ້ວ່າ: ເທສະການນີ້, ຈັດຂຶ້ນເພື່ອສົ່ງເສີມການທ່ອງທ່ຽວ ແນໃສ່ສ້າງບັນຍາກາດແບບເກົ່າໆ, ແບບບ້ານນາຢູ່ກາງທົ່ງນາ, ເພື່ອໃຫ້ມວນຊົນທັງພາຍໃນ ແລະ ຕ່າງປະເທດ ໄດ້ເຂົ້າມາທ່ຽວຊົມ, ທັງເປັນການສ້າງເງື່ອນໄຂໃຫ້ຜູ້ປະກອບການ ຊາວຄ້າຂາຍ ໃນເຂດໃກ້ຄຽງ ໄດ້ມີລາຍຮັບ ນຳເອົາສິນຄ້າປະເພດຕ່າງໆມາວາງຈຳໜ່າຍ ພາຍໃນງານ.
ທ່ານນາງ ວິໄລວອນ ຈັນທະລາຕີ ຫົວໜ້າ ພະແນກຖະແຫລ່ງຂ່າວ, ວັດທະນະ ທຳ ແລະ ທ່ອງທ່ຽວ ນະຄອນຫລວງວຽງຈັນ ກ່າວວ່າ: ໃນໄລຍະຜ່ານມາ, ນັບແຕ່ມີການລະບາດຂອງພະຍາດໂຄວິດ-19 ຂົງເຂດບໍລິການການທ່ອງທ່ຽວ ຢູ່ນະຄອນຫລວງວຽງຈັນ ໄດ້ຮັບຜົນກະທົບຢ່າງໜັກໜ່ວງ, ແຕ່ເຖິງຢ່າງໃດກໍຕາມ, ພັກ ແລະ ລັດຖະ ບານ ກໍໄດ້ເອົາໃຈໃສ່ໃນການຟື້ນຟູ ໂດຍສະເພາະຂະແໜງທ່ອງທ່ຽວ ສະເພາະນະ ຄອນຫລວງວຽງຈັນ ມີ 2 ໂຄງການ ຄື: ໂຄງການທົດລອງນຳເຂົ້ານັກທ່ອງທ່ຽວມາຕີກ໊ອບ ແລະ ໂຄງການທ່ອງທ່ຽວໃນເຂດທ່ອງທ່ຽວສີຂຽວ. ສະນັ້ນ, ການຈັດງານ ຄັ້ງນີ້ ກໍເປັນແຜນວຽກໜຶ່ງໃນກິດຈະກໍາ ເພື່ອຊຸກຍູ້ສົ່ງເສີມການທ່ອງທ່ຽວຂອງລາວ ກໍຄື ແຜນວຽກການທ່ອງທ່ຽວ “ລາວທ່ຽວລາວ” ເຊິ່ງເປັນງານທີ່ມີຄວາມໝາຍສຳຄັນ ໃນການປະກອບສ່ວນຍູ້ໜູນການທ່ອງທ່ຽວ ຢູ່ນະຄອນຫລວງວຽງຈັນ ໃຫ້ມີຫລາກຫລາຍກິດຈະກຳ, ຫລາກຫລາຍສີສັນ ພາຍໃຕ້ເງື່ອນໄຂທີ່ພັກ-ລັດຖະບານ ໄດ້ມີນະໂຍບາຍສົ່ງເສີມ.
ແຫຼ່ງຂ່າວປະເທດລາວ
ລາວ-ບຣາຊິນ ລົງນາມສັນຍາການຮ່ວມມືດ້ານເຕັກນິກ
ເມື່ອບໍ່ດົນມານີ້, ຢູ່ສະຖານເອກອັກຄະລັດຖະທູດແຫ່ງ ສປປ ລາວ ປະຈຳຣາຊະອານາຈັກໄທ ໄດ້ມີພິທີລົງນາມໃນສັນຍາວ່າດ້ວຍ ການຮ່ວມມືດ້ານເຕັກນິກ ລະຫວ່າງ ສປປ ລາວ ແລະ ສາທາລະນະລັດ ສະຫະພັນ ບຣາຊິນ ໂດຍມີເປົ້າໝາຍໃນການສົ່ງເສີມການຮ່ວມມືທາງດ້ານວິຊາການ ໃນຂະແໜງການທີ່ເປັນບູລິມະສິດຂອງສອງຝ່າຍ ເຊັ່ນ: ກະສິກໍາ, ລ້ຽງສັດ, ສາທາລະນະສຸກ, ການສຶກສາ, ການຫລຸດຜ່ອນຄວາມທຸກຍາກ, ຄວາມໝັ້ນຄົງດ້ານອາຫານ, ການເປັນມືອາຊີບ ແລະ ຂະແໜງການ ອື່ນໆ ທີ່ມີຄວາມສົນໃຈ ເພື່ອການສົ່ງເສີມການພັດທະນາເສດຖະກິດ-ສັງຄົມ.
ໃນພິທີລົງນາມໃນຄັ້ງນີ້, ຕາງໜ້າໃຫ້ລັດຖະບານລາວ ແມ່ນທ່ານ ແສງ ສຸຂະທິວົງ ເອກອັກຄະລັດຖະທູດວິສາມັນ ຜູ້ມີອຳນາດເຕັມແຫ່ງ ສປປ ລາວ ປະຈຳຣາຊະອານາຈັກໄທ ແລະ ຕາງໜ້າໃຫ້ລັດຖະບານ ແຫ່ງ ສາທາລະນະລັດ ສະຫະພັນ ບຣາຊິນ ແມ່ນທ່ານ ໂຈເຊ ໂບເຈດ ໂດດ ຊານໂຕດ ຈູເນຍ (José Borges dos Santos Júnior) ເອກອັກຄະລັດຖະທູດວິສາມັນ ຜູ້ມີອຳນາດເຕັມ ແຫ່ງ ສາທາລະນະລັດ ສະຫະພັນ ບຣາຊິນ ມີສຳນັກງານຕັ້ງຢູ່ບາງກອກ, ຣາຊະອານາຈັກໄທ.
ໂອກາດນີ້, ທ່ານເອກອັກຄະລັດຖະທູດ ຂອງສອງປະເທດ ໄດ້ສະແດງຄວາມປິຕິຍິນດີ ແລະ ເຊື່ອໝັ້ນວ່າ ສັນຍາວ່າດ້ວຍການຮ່ວມດ້ານເຕັກນິກ ຈະສ້າງເງື່ອນໄຂສະດວກໃຫ້ແກ່ການຮ່ວມມື ໃນຂະແໜງການຕ່າງໆ ໂດຍສະເພາະການສົ່ງເສີມການພັດທະນາເສດຖະກິດ-ສັງຄົມ ລະຫວ່າງ ສອງປະເທດ ໃຫ້ມີການຂະຫຍາຍຕົວເພີ່ມສູງຂຶ້ນ ເພື່ອນຳເອົາຜົນປະໂຫຍດຕົວຈິງມາສູ່ສອງປະເທດ ແລະ ປະຊາຊົນສອງຊາດລາວ ແລະ ບຣາຊິນ ໃນຊຸມປີຕໍ່ໜ້າ.
ສາທາລະນະລັດ ປະຊາທິປະໄຕ ປະຊາຊົນລາວ ແລະ ສາທາລະນະລັດ ສະ ຫະພັນ ບຣາຊິນ ໄດ້ສ້າງຕັ້ງສາຍພົວພັນການທູດນຳກັນ ໃນວັນທີ 12 ມິຖຸນາ 1995, ນັບແຕ່ການສ້າງຕັ້ງສາຍພົວພັນການທູດຮ່ວມກັນເປັນຕົ້ນມາ ສາຍພົວພັນມິດຕະພາບ ແລະ ການຮ່ວມມື ສອງຝ່າຍ ລາວ-ບຣາຊິນ ໄດ້ມີການຂະຫຍາຍຕົວຢ່າງຕໍ່ເນື່ອງ, ສອງຝ່າຍ ໄດ້ມີການແລກປ່ຽນການຢ້ຽມຢາມຂອງຄະນະຜູ້ແທນໃນຫລາຍລະດັບ, ການພົວພັນສອງຝ່າຍ ແມ່ນມີການພົວພັນ ຮ່ວມມືກັນຢ່າງປົກກະຕິນໍາກັນຕະຫລອດມາ ໂດຍສະເພາະໃນໂອກາດສໍາຄັນຕ່າງໆ, ການນໍາຂັ້ນສູງ ຂອງສອງປະເທດ ກໍໄດ້ສົ່ງສານອວຍພອນ ເຊິ່ງກັນ ແລະ ກັນ.
ພ້ອມກັນນັ້ນ, ໃນໄລຍະຜ່ານມາ, ລັດຖະບານບຣາຊິນ ເຄີຍໃຫ້ທຶນຝຶກອົບຮົມສໍາ ລັບນັກການທູດໜຸ່ມນ້ອຍ, ກິລາບານເຕະ ແລະ ຂໍ້ລິເລີ້ມໂຄງການຊົນລະປະທານ ແກ່ພາກສ່ວນກ່ຽວຂ້ອງຂອງ ສປປ ລາວ.
ພ້ອມນີ້, ບຣາຊິນ ສະແດງຄວາມສົນໃຈ ການສຶກສາຄວາມເປັນໄປ ໄດ້ໃນການຮ່ວມມືດ້ານການລ້ຽງງົວພັນຊີ້ນ ເພື່ອສົ່ງອອກຂາຍໃຫ້ແກ່ ສປ ຈີນ.
ແຫຼ່ງຂ່າວ: ປະເທດລາວ
ປະຊາຊົນ ບ້ານໂພນໂຮມ ຕື່ນຕົວມອບອາວຸດລ່າເນື້ອຄືນໃຫ້ເຈົ້າໜ້າທີ່
ເມື່ອບໍ່ດົນມານີ້, ທີ່ບ້ານໂພນໂຮມ ເມືອງນໍ້າບາກ ແຂວງຫຼວງພະບາງ ໄດ້ຈັດພິທີມອບອາວຸດລ່າເນື້ອ (ປືນແກັບ) ໃຫ້ກອງບັນຊາການປ້ອງກັນຄວາມສະຫງົບເມືອງ ໂດຍການເປັນປະທານຂອງທ່ານ ພັທ ຈັນທາ ພັນທະວົງ ຫົວໜ້າກອງບັນຊາການ ປ້ອງກັນຄວາມສະຫງົບເມືອງ, ມີຂະແໜງການທີ່ກ່ຽວຂ້ອງ, ອົງການປົກຄອງບ້ານ ຕະຫຼອດຮອດປະຊາຊົນເຂົ້າຮ່ວມ.
ທ່ານ ຫົງຄໍາ ດົງຂະສິດ ນາຍບ້ານໂພນໂຮມ ໄດ້ລາຍງານໃຫ້ຮູ້ວ່າ: ບ້ານໂພນໂຮມ ໄດ້ກຳນົດເປັນບ້ານພັດທະນາ, ບ້ານປອດຢາເສບຕິດ, ບ້ານປອດຄະດີ, ບ້ານປ້ອງກັນຊາດເຂັ້ມແຂງ ຊຶ່ງເປັນບ້ານຊົນເຜົ່າກຶມມຸ, ມີທັງໝົດ 131 ຄອບຄົວ, ພົນລະເມືອງທັງໝົດ 768 ຄົນ ຍິງ 399 ຄົນ. ຜ່ານການຈັດຕັ້ງເຊື່ອມຊຶມເອກະສານຕິດພັນກັບການແກ້ໄຂວາລະແຫ່ງຊາດເປັນຕົ້ນແມ່ນ ແຈ້ງການຂອງກອງບັນຊາການປ້ອງກັນຄວາມສະຫງົບ ເມືອງນ້ຳບາກ ສະບັບເລກທີ 307/ປກສ-ມນບ, ວ່າດ້ວຍການຫ້າມນໍາໃຊ້ອາວຸດເສິກ, ອາວຸດລ່າເນື້ອ, ທາດແຕກ, ທາດລະເບີດ ແລະ ເຄື່ອງຊັອດປາ.
ເອກະສານຂອງກອງບັນຊາການ ປກສ ເມືອງນ້ຳບາກ ສະບັບເລກທີ 308/ປກສ-ມນບ, ວ່າດ້ວຍກົດລະບຽບການຄຸ້ມຄອງອາວຸດ, ທາດແຕກ, ທາດລະເບີດ ແລະ ເຄື່ອງຊັອດປາ, ຜ່ານການຈັດຕັ້ງເຊື່ອມຊຶມເອກະສານດັ່ງກ່າວເຫັນວ່າ ປະຊາຊົນຈຳນວນຫຼວງຫຼາຍແມ່ນເຂົ້າໃຈດີ ແລະ ສະໝັກໃຈນຳເອົາອາວຸດຊະນິດປືນແກັບ ມາສົ່ງໃຫ້ທາງອຳນາດການປົກຄອງບ້ານ ແລ້ວບ້ານກໍສັງລວມນຳສົ່ງໃຫ້ກອງບັນຊາການປ້ອງກັນຄວາມສະຫງົບເມືອງ ມີທັງໝົດ 69 ກະບອກ.
ແຫຼ່ງຂ່າວ: ປະຊາຊົນ