Home Blog Page 26

ເປີດດ່ານປະເພນີຊ່ອງຕະອູ

0

ເມືອງສຸຂຸມາ ເປີດດ່ານປະເພນີຊ່ອງຕະອູ ຢ່າງເປັນທາງການ

ທ້າຍອາທິດຜ່ານມານີ້, ເມືອງສຂຸມາ ແຂວງຈໍາປາສັກ ໄດ້ມີພິທີເປີດດ່ານປະເພນີຊ່ອງຕາອູ ລະຫ່ວາງເມືອງສຸຂຸມາ ກັບ ອຳເພີບຸນທະລິກ ຈັງຫວັດອຸບົນລາຊະທານີ (ຣາຊະອານາຈັກໄທ), ໂດຍການເຂົ້າຮ່ວມຂອງ ທ່ານ ສົມເພັດ ບຸດສະດີ ເຈົ້າເມືອງສຸຂຸມາ, ທ່ານ ອະໄພ ວຸດທິໂສພາກອນ ນາຍອຳເພີບຸນທະລິກ ພ້ອມຄະນະ, ມີແຂກຖືກເຊີນ ແລະ ຂະແໜງການກ່ຽວຂ້ອງຂອງແຂວງ ແລະ ເມືອງເຂົ້າຮ່ວມ.

ໃນພິທີທ່ານເຈົ້າເມືອງສຸຂຸມາ ໄດ້ໃຫ້ຮູ້ວ່າ: ການເປີດດ່ານປະເພນີຊ່ອງຕະອູ ຄັ້ງນີ້ ມີຈຸດປະສົງເພື່ອໃຫ້ປະຊາຊົນໄດ້ມີການແລກປ່ຽນຊື້-ຂາຍສິນຄ້າປະເພດຕ່າງໆ ລະຫ່ວາງ ປະຊາຊາຊົນ 3 ເມືອງ ກັບ ອຳເພີບຸນທະລີກ ໂດຍສະເພາະກໍແມ່ນສິນຄ້າຕາມລະດູການ, ຜະລິດຕະພັນກະສິກຳ, ຫັດຖະກຳ, ສິນຄ້າໂອດັອບເປັນຕົ້ນ.ສຳລັບການເປີດດ່ານ ແມ່ນໃນ 1 ອາທິດ ເປີດ 3 ວັນຄື: ວັນຈັນ, ວັນພຸດ ແລະ ວັນສຸກ ເລີ່ມແຕ່ເວລາ 8:30 ໂມງ ຫາ 15:30 ໂມງ. ພ້ອມນັ້ນ ທ່ານ ຍັງໄດ້ຮຽກຮ້ອງໃຫ້ທຸກຄົນໃນສັງຄົມເປັນເຈົ້າການນຳກັນໃນການປະຕິບັດບັນດາມາດຕະການປ້ອງກັນຕ້ານພະຍາດໂຄວິດ-19 ຢ່າງເຂັ້ມງວດ.

ນອກນີ້, ປະຊາຊົນທີ່ຈະເຂົ້າ-ອອກດ່ານຕ້ອງຖືບັດສັກຢາວັກຊິນ, ບັດປະຈຳຕົວ ເພື່ອເປັນການຢັ້ງຢືນ, ໃນກໍລະນີຖ້າຜູ້ໃດບໍ່ມີບັດກໍຕ້ອງໄດ້ຜ່ານຂັ້ນຕອນການກວດກາພະຍາດໂຄວິດ-19 ບໍ່ເກີນ 48 ຊົ່ວໂມງ, ຕາມລະບຽບການຂອງກະຊວງສາທາລະນະສຸກ ວາງອອກ. ຈາກນັ້ນ, ທັງສອງຝ່າຍກໍໄດ້ແລກປ່ຽນບົດຮຽນຊຶ່ງກັນ ແລະ ກັນ ພ້ອມທັງຮ່ວມກັນຕັດແຖບຜ້າເພື່ອເປີດດ່ານປະເພນີຊ່ອງຕະອູ ຢ່າງເປັນທາງການ.

ດ່ານພາສີສາກົນວັງເຕົ່າ ອົບຮົມການນຳໃຊ້ລະບົບແຈ້ງພາສີປະຕູດຽວແຫ່ງຊາດ

0

ການຈັດຝຶກອົບຮົມນຳໃຊ້ລະບົບແຈ້ງພາສີປະຕູດຽວແຫ່ງຊາດ ທີ່ດ່ານພາສີສາກົນວັງເຕົ່າ ເມືອງໂພນທອງ ແຂວງຈຳປາສັກ ໄດ້ຈັດຂຶ້ນເມື່ອບໍ່ດົນມານີ້ ທີ່ດ່ານດັ່ງກ່າວ, ໂດຍການເປັນປະທານຂອງທ່ານ ວິເລືອງ ວໍລະບຸດ ຮອງຫົວໜ້າ ພາສີປະຈຳແຂວງຈຳປາສັກ, ມີທ່ານ ແກ້ວອຸດອນ ພາລີຈັນ ຫົວໜ້າດ່ານພາສີສາກົນວັງເຕົ່າ ພ້ອມດ້ວຍເຈົ້າໜ້າທີ່ພາສີພາຍໃນດ່ານເຂົ້າຮ່ວມ.

ທ່ານ ວິເລືອງ ວໍລະບຸດ ໄດ້ກ່າວວ່າ: ລະບົບແຈ້ງພາສີຜ່ານປະຕູດຽວໄດ້ຮັບການພັດທະນາມາໃນໄລຍະໜຶ່ງແລ້ວ. ຮອດປັດຈຸບັນໄດ້ສໍາເລັດການສ້າງລະບົບໂດຍພື້ນຖານ ແລະ ພ້ອມຈະທົດລອງເຂົ້າໃນວຽກງານອອກອະນຸຍາດຜ່ານລະບົບອີເລັກໂຕຣນິກ. ເປົ້າໝາຍສ້າງລະບົບດັ່ງກ່າວ ແມ່ນເພື່ອຍົກລະດັບມາດຕະຖານການບໍລິການຂະແໜງການຂອງລັດ ແລະ ເພີ່ມທະວີອຳນວຍຄວາມສະດວກທາງດ້ານການຄ້າໃຫ້ນັບມື້ສູງຂຶ້ນ.

ປັດຈຸບັນທົ່ວໂລກໄດ້ມີຫຼາຍປະເທດນຳໃຊ້ລະບົບແຈ້ງພາສີປະຕູດຽວແຫ່ງຊາດຂອງຕົນແລ້ວ ແລະ ມີຄວາມພ້ອມນຳໃຊ້ລະບົບການແຈ້ງພາສີປະຕູດຽວອາຊຽນ. ສ່ວນ ສປປ ລາວ ເຮົາຈຶ່ງມີໜ້າທີ່ໃນການກຽມຄວາມພ້ອມດັ່ງກ່າວເຂົ້າໃນການແຈ້ງພາສີປະຕູດຽວອາຊຽນໃນຕໍ່ໜ້າ ໂດຍການນຳໃຊ້ລະບົບທີ່ທັນສະໄໝ, ສະດວກ, ວ່ອງໄວ ແລະ ຖືກຕ້ອງ ຊັດເຈນກວ່າເກົ່າ.

ຊຸດອົບຮົມໃນຄັ້ງນີ້, ຍັງໄດ້ມີການລາຍງານຄວາມຄືບໜ້າໃນການປະຕິບັດລະບົບແຈ້ງພາສີປະຕູດຽວແຫ່ງຊາດໃນໄລຍະຜ່ານມາ ພ້ອມທັງວາງແຜນການທົດລອງ ແລະ ຝຶກອົບຮົມນຳໃຊ້ລະບົບດັ່ງກ່າວຕົວຈິງ ຢູ່ດ່ານສາສີສາກົນວັງເຕົ່າ ແລະ ຮັບປະກັນປະສິດທິຜົນສູງໃນການແຈ້ງພາສີ.

ແຫຼ່ງຂ່າວ: ປະຊາຊົນ

ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ຢ້ຽມຢາມ ມົງໂກລີ

0

ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ຢ້ຽມຢາມ ມົງໂກລີ ຢ່າງເປັນທາງການ.

ໃນວັນທີ 4 ກັນຍາ 2022, ທີ່ກະຊວງການຕ່າງປະເທດ ມົງໂກລີ ໄດ້ມີກອງປະຊຸມພົບປະສອງຝ່າຍ ລະຫວ່າງ ກະຊວງການຕ່າງປະເທດ ແຫ່ງ ສປປ ລາວ ແລະ ກະຊວງການຕ່າງປະເທດ ມົງໂກລີ, ໂດຍການເປັນປະທານຮ່ວມຂອງ ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ແລະ ທ່ານ ນາງ ບັດເຊເຊັກ ບັດເມີງ, ລັດຖະມົນຕີກະຊວງການຕ່າງປະເທດ ແຫ່ງ ມົງໂກລີ,

ພາຍຫຼັງສຳເລັດການພົບປະ ຂອງສອງລັດຖະມົນຕີກະຊວງການຕ່າງປະເທດລາວ ແລະ ມົງໂກລີ ກໍໄດ້ຮ່ວມລົງນາມບົດບັນທຶກ ວ່າດ້ວຍ ການຮ່ວມມື ລະຫວ່າງ ກະຊວງການຕ່າງປະເທດ ແຫ່ງ ສປປ ລາວ ແລະ ກະຊວງການຕ່າງປະເທດ ມົງໂກລີ ແລະ ເຂົ້າຮ່ວມເປັນສັກຂີພິຍານການລົງນາມສັນຍາ ວ່າດ້ວຍ ການຮ່ວມມືແລກປ່ຽນດ້ານການສຶກສາ ລະຫວ່າງ ກະຊວງສຶກສາທິການ ແລະ ກິລາ ແຫ່ງ ສປປ ລາວ ແລະ ກະຊວງສຶກສາ ແລະ ວິທະຍາສາດ ແຫ່ງ ມົງໂກລີ ສໍາລັບປີ 2022-2027, ໂດຍຮ່ວມລົງນາມຂອງ ທ່ານ ແພງສະຫວັນ ແກ້ວປະເສີດ, ເອກອັກຄະລັດຖະທູດ ແຫ່ງ ສປປ ລາວ ປະຈໍາ ມົງໂກລີ ແລະ ທ່ານ ກ. ບັງບາຢາຣ໌, ຮອງລັດຖະມົນຕີກະຊວງສຶກສາ ແລະ ວິທະຍາສາດ ແຫ່ງ ມົງໂກລີ.

ໃນໂອກາດດຽວກັນ, ສອງລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ແລະ ມົງໂກລີ ກໍໄດ້ຮ່ວມກັນຖະແຫຼງຂ່າວຕໍ່ສື່ມວນຊົນ ເພື່ອແຈ້ງໃຫ້ຊາບໂດຍຫຍໍ້ ກ່ຽວກັບ ໝາກຜົນຂອງການພົບປະສອງຝ່າຍ ໃນຄັ້ງນີ້.

ພ້ອມດຽວກັນນີ້, ທ່ານ ຮອງນາຍົກລັດຖະ ມົນຕີ ສະເຫຼີມໄຊ ກົມມະສິດ ກໍ່ໄດ້ຕາງໜ້າໃຫ້ລັດຖະບານ ແຫ່ງ ສປປ ລາວ ມອບຫຼຽນໄຊມິດຕະພາບ ໃຫ້ແກ່ ລັດຖະບານມົງໂກລີ ໂດຍມອບຜ່ານ ທ່ານ ລັດຖະມົນຕີ ບັດເຊເຊັກ ບັດເມີງ, ເຊິ່ງແມ່ນຫຼຽນໄຊມິດຕະພາບ ຈາກລັດຖະບານ ແຫ່ງ ສປປ ລາວ ມອບໃຫ້ແກ່ ລັດຖະບານ ແຫ່ງ ມົງໂກລີ ໃນໂອກາດທີ່ ລັດຖະບານມົງໂກລີ ໄດ້ມອບແກະ ຈໍານວນ 1.050 ໂຕ ໃຫ້ແກ່ ສປປ ລາວ ໃນປີ 2018 ຜ່ານມາ.

ໃນຕອນບ່າຍຂອງວັນດຽວກັນ, ທ່ານ ຮອງນາຍົກລັດຖະມົນຕີ ສະເຫຼີມໄຊ ກົມມະສິດ ພ້ອມດ້ວຍຄະນະ ໄດ້ເຂົ້າຢ້ຽມຂ່ຳນັບ ທ່ານ ໂອ. ຄູເຣນສຸກ, ປະທານາທິບໍດີ ແຫ່ງ ມົງໂກລີ ແລະ ທ່ານ ກ. ຊັງຕັງຊາທາຣ໌ (G. Zandanshatar), ປະທານສະພາຄູຣານໃຫຍ່ ແຫ່ງ ມົງໂກລີ.

.

ຂ່າວພາບຈາກ: ກົມການຂ່າວ ກະຊວງການຕ່າງປະເທດ

ມົ້ວສຸມດື່ມນໍ້າກະທ້ອມ ຖືກເຈົ້າໜ້າທີ່ກັກຕົວ ພ້ອມສຶກສາອົບຮົມ

0

ເຈົ້າໜ້າທີ່ ປກສ ນະຄອນປາກເຊ ແຂວງຈໍາປາສັກ ໃຫ້ການສຶກສາອົບຮົມກຸ່ມໄວລຸ້ນຈໍານວນ 7 ຄົນ ທີ່ຖືກກັກໂຕເນື່ອງຈາກມີການພົວພັນກັບການຄ້າ-ຂາຍ ແລະ ມົ້ວສຸມດື່ມນໍ້າໃບກະທ້ອມ. ການສຶກສາອົບຮົມມີຂຶ້ນໃນວັນທີ 5 ກັນຍາ 2022 ຢູ່ທີ່ກອງບັນຊາການ ປກສ ນະຄອນປາກເຊ, ໂດຍເຈົ້າໜ້າທີ່ ປກສ ໃຫ້ຮູ້ວ່າ:

ຄະດີຄ້າ-ຂາຍ ນໍ້າກະທ້ອມທີ່ປຸງແຕ່ງແລ້ວ ແລະ ໃບກະທ້ອມ ແມ່ນເຈົ້າໜ້າທີ່ວິຊາສະເພາະພະແນກຕໍາຫຼວດ ປກສ ກຸ່ມ 4 ກອງບັນຊາການ ປກສ ນະຄອນປາກເຊ ໄດ້ເຄື່ອນໄຫວຕິດຕາມກຸ່ມເປົ້າໝາຍໄວລຸ້ນທີ່ມີພຶດຕິກໍາເຄື່ອນໄຫວຄ້າ-ຂາຍນໍ້າກະທ້ອມທີ່ປຸງແຕ່ງແລ້ວ ແລະ ໃບກະທ້ອມ ຢູ່ຂອບເຂດບ້ານແກ້ວສໍາພັນ ນະຄອນປາກເຊ ແລະ ໃນວັນທີ 1 ກັນຍາ 2022, ເວລາ 1: 00 ໂມງ ເຈົ້າໜ້າທີ່ ປກສ ກຸ່ມ 4 ໄດ້ປະສານສົມທົບກັບ ປກສ ນະຄອນປາກເຊ ແລະ ອໍານາດການປົກຄອງບ້ານແກ້ວສໍາພັນ ລົງມ້າງຈຸດມົ້ວສຸມຈຸດດັ່ງກ່າວ ສາມາດກັກຕົວເປົ້າໝາຍໄດ້ຈໍານວນ 7 ຄົນ, ຍິງ 3 ຄົນ.

ຂອງການປະກອບມີ: ນໍ້າກະທ້ອມ 20 ລິດ, ໃບກະທ້ອມດິບ 7 ກິໂລ, ສານຕັ້ງຕົ້ນ (ນໍ້າເຊື້ອມຢາດີໄອ) 34 ແກ້ວ, ນໍ້າຕານ 5 ແກັດ ແລະ ອຸປະກອນນໍາໃຊ້ໃນການປຸງແຕ່ງນໍ້າກະທ້ອມ.

ແຫຼ່ງຂ່າວ: ໜັງສືພິມ ຈໍາປາໃໝ່

ວິນເນີ ຫຼວງພະບາງ ຄອງແຊັມຂັນຊະນະເລີດດອກປີກໄກ່

0

ວິນເນີ ຫຼວງພະບາງ ຄອງແຊັມຂັນຊະນະເລີດດອກປີກໄກ່ ຊີງຂັນປະທານສະພາແຫ່ງຊາດ ການແຂ່ງຂັນກິລາດອກປີກໄກ່ ຊີງແຊັມທົ່ວປະເທດ ຄັ້ງທີ 21 ຊີງຂັນທ່ານປະທານສະພາແຫ່ງຊາດ ປະຈຳປີ 2022 ປິດສາກລົງຢ່າງເປັນທາງການ ໃນວັນທີ 4 ກັນຍາ 2022 ນີ້ ຢູ່ສະໂມສອນດອກປີກໄກ່ເສດຖາ ນະຄອນຫຼວງວຽງຈັນ, ໂດຍສະໂມສອນດອກປີກໄກ່ ວິນເນີ ຫຼວງພະບາງ (winner LPB) ສ້າງຜົນງານໄດ້ຢ່າງໂດນເດັ່ນ ຫຼັງຈາກຍາດມາໄດ້ 5 ຫຼຽນຄໍາ 1 ຫຼຽນເງິນ ແລະ 4 ຫຼຽນທອງ ຄອງແຊັມຂັນທ່ານປະທານສະພາແຫ່ງຊາດປະຈຳປີ 2022.

ທ່ານ ໄຊບັນດິດ ຣາຊະພົນ ເລຂາທິການສະຫະພັນດອກປີກໄກ່ແຫ່ງຊາດ ກ່າວວ່າ: ການແຂ່ງຂັນຄັ້ງນີ້ ດໍາເນີນແຕ່ວັນທີ 1-4 ກັນຍາ 2022 ເຫັນວ່າການແຂ່ງຂັນມີບັນຍາກາດຟົດຟື້ນມ່ວນຊື່ນ ແລະ ມີນັກກິລາ-ຄູຝຶກ ຕະຫຼອດຮອດມວນຊົນຊາວນະຄອນຫຼວງວຽງຈັນ ແລະ ທົ່ວປະເທດເຂົ້າຮ່ວມຊົມເຊຍຢ່າງໜາແໜ້ນຕະຫຼອດ 4 ວັນ ຂອງການແຂ່ງຂັນ ແລະ ຍັງຮັກສາໄດ້ຄວາມເປັນລະບຽບຮຽບຮ້ອຍ ຕະຫຼອດການແຂ່ງຂັນ ທີ່ຂາດບໍ່ໄດ້ກໍຄືສະແດງຄວາມຂອບໃຈຜູ້ໃຫ້ການສະໜັບສະໜູນ ໂດຍສະເພາະ ບໍລິສັດ ເບຍລາວ ຈຳກັດ ສະໜັບສະໜູນຫຼັກ ເປັນປີທີ 21 ຕິດຕໍ່ກັນ, ນອກຈາກນີ້ຍັງມີ ທະນາຄານພັດທະນາລາວ (LDB), ທະນາຄານການຄ້າຕ່າງປະເທດລາວ ມະຫາຊົນ (BCEL), ບໍລິສັດ ລາວໂທລະຄົມມະນາຄົມ ມະຫາຊົນ ແລະ ພາກສ່ວນອື່ນໆອີກຈໍານວນໜຶ່ງ. ການແຂ່ງຂັນໃນຄັ້ງນີ້ ມີທັງໝົດ 11 ລາຍການ ຜ່ານການແຂ່ງຂັນຜົນປະກົດວ່າ:

ດ່ຽວເຍົາວະຊົນຊາຍ 12 ປີ ທີ 1 ທ້າວ ນັດທິວ ພົງສັກ (WINNER LPB), ທີ 2 ທ້າວ ສຸພະໄຊ (NEWPAY), ທີ 3 ຮ່ວມ ທ້າວ ບຸນທະວີ ໄຊຍະລາດ (LABDORK) ທ້າວ ສົມຈິດ ແສງຫຼ້າ (ທະນາຄານຮ່ວມທຸລະກິດລາວ-ຫວຽດ); ດ່ຽວເຍົາວະຊົນຊາຍ 15 ປີ ທີ 1 ທ້າວ ອາທິວັດ ອຸດົມສະຫວັດ (WINNER LPB), ທີ 2 ທ້າວ ພຸດນະຄອນ ແກ້ວອໍາພອນ (ຮ່ວມທຸລະກິດລາວ-ຫວຽດ), ທີ 3 ຮ່ວມ ທ້າວ ຄໍາສີ ໂຄດວົງສາ (CAPTAIN), ທ້າວ ລັກສະມີ ສີລາວັນ (WINNER LPB); ຄູ່ເຍົາວະຊົນຊາຍ 15 ປີ ທີ 1 ທ້າວ ມານະສິນ + ທ້າວ ເພັດສະນະກອນ (WINNER LPB), ທີ 2 ທ້າວ ຄໍາສີ (CAPTAIN) + ທ້າວ ເອກະລາດ (ທ່າແຂກໃໝ່), ທີ 3 ຮ່ວມ ທ້າວ ອານຸສິນ + ທ້າວ ຊະນະ (WINNER LPB) ແລະ ທ້າວ ລັກສະມີ + ທ້າວ ວາລັດ (WINNER LPB).

ດ່ຽວເຍົາວະຊົນຊາຍ 18 ປີ ທີ 1 ທ້າວ ສາຍຟ້າ ສິລິວົງ (WINNER LPB), ທີ 2 ທ້າວ ພູບັນດິດ ສຸວັນນະວົງ (WINNER LPB), ທີ 3 ຮ່ວມ ທ້າວ ໄຊຍະສອນ ແກ້ວໄຊ (CAPTAIN) ນາງ ພຸດສະຫວັນ ດາວປະສິດ (JEMBONE); ຄູ່ເຍົາວະຊົນຊາຍ 18 ປີ ທີ 1 ທ້າວ ສາຍຟ້າ + ທ້າວ ພູບັນດິດ (WINNER LPB), ທີ 2 ທ້າວ ໄຊຍະສອນ + ທ້າວ ສຸລິເດດ (CAPTAIN), ທີ 3 ຮ່ວມ ທ້າວ ສຸພະໄຊ + ທ້າວ ຈັນທະບູລີ (KT), ທ້າວ ສະຫຼອງ+ທ້າວ ວິລະເດດ (JEMBONE); ຄູ່ເຍົາວະຊົນປະສົມ 18 ປີ ທີ 1 ທ້າວ ສະຫຼອງ + ນາງ ພຸດສະຫວັນ (JEMBONE), ທີ 2 ທ້າວ ສຸລິໄຊ + ນາງ ອັດຈິມາ (FRIENDSHIP), ທີ 3 ຮ່ວມ ທ້າວ ສຸກປະເສີດ + ນາງ ສຸດາລັດ (JEMBONE), ທ້າວ ຫຼວງຕິກຸນ + ນາງ ສຸນິດາ (WINNER LPB); ດ່ຽວຊາຍທົ່ວໄປ ທີ 1 ທ້າວ ວິຊຸນນະລາດ ພິຈິດ (ກຸ່ມບໍລິສັດ ດວງຈະເລີນພັດທະນາ), ທີ 2 ທ້າວ ໄຊສົມພອນ ວົງປະຈິດ (ທະນາຄານຮ່ວມທຸລະກິດລາວ-ຫວຽດ), ທີ 3 ຮ່ວມ ທ້າວ ພອນສັກ ໂຊກທະວີ (LABDORK) ທ້າວ ມານັດ ເພຍສຸລິນ (CAPTAIN); ຄູ່ຊາຍທົ່ວໄປ ທີ 1 ທ້າວ ນາມບຸນ + ທ້າວ ດາວມີໄຊ (LABDORK), ທີ 2 ທ້າວ ແສງອາທິດ + ທ້າວ ພັນທະລັງ (LABDORK), ທີ 3 ຮ່ວມ ທ້າວ ວິຊຸນນະລາດ + ທ້າວ ຣາຊະວົງ (ກຸ່ມດວງຈະເລີນພັດທະນາກໍ່ສ້າງ) ທ້າວ ພອນປະດິດ+ທ້າວ ບຸນປະເສີດ (ຮ່ວມທຸລະກິດລາວ-ຫວຽດ), ຄູ່ປະສົມທົ່ວໄປ ທີ 1 ທ້າວ ພັນທະລັງ + ນາງ ເພັດມະນີ (LABDORK), ທີ 2 ທ້າວ ນາມບູນ + ນາງ ທິດາຈັນ (LABDORK), ທີ 3 ຮ່ວມ ທ້າວ ໄຊສົມພອນ+ນາງ ສິລິພອນ (ຮ່ວມທຸລະກິດລາວ-ຫວຽດ) ທ້າວ ໂພທິພອນ+ນາງ ວິລະກອນ (CAPTAIN). ຄູ່ຍິງທົ່ວໄປ ທີ 1 ນາງ ເພັດມະນີ + ນາງ ທິດາຈັນ (LABDORK), ທີ 2 ນາງ ວິລະກອນ + ນາງ ປາວິນາ (CAPTAIN), ທີ 3 ຮ່ວມ ນາງ ບູຜາເກສອນ + ນາງ ສິລິພອນ (ຮ່ວມທຸລະກິດລາວ-ຫວຽດ) ນາງ ນະພາວັນ+ນາງ ມະນີວອນ (CAPTAIN); ຄູ່ສະໝັກຫຼິ້ນຊາຍ ທີ 1 ທ້າວ ໂພທິທອນ +ທ້າວ ມານັດ, ທີ 2 ທ້າວ ມັງກອນ + ທ້າວ ອານາຈັກ, ທີ 3 ຮ່ວມ ທ້າວ ທະນາຫວັດ + ທ້າວ ກອາໄພ (KT) ທ້າວ ສູນນະລາດ + ທ້າວ ສຸກປະເສີດ (ສິໄຄ). ສ່ວນລາງວັນຂັນຊະນະເລີດ ທ່ານປະທານສະພາແຫ່ງຊາດ ໄດ້ແກ່ ສະໂມສອນວິນເນີ ຫຼວງພະບາງ.

ເປັນກຽດເຂົ້າຮ່ວມ ແລະ ມອບຂັນລາງວັນໂດຍ ທ່ານ ຄໍາໃບ ດໍາລັດ ຮອງປະທານສະພາແຫ່ງ ຊາດ, ທ່ານ ບຸນເຫຼືອ ສິນໄຊວໍຣະວົງ ຜູ້ວ່າການທະນາຄານແຫ່ງ ສປປປ ລາວ ທັງເປັນປະທານສະຫະພັນກິລາດອກປີໄກ່ແຫ່ງຊາດ, ທ່ານ ສົມພູ ພົງສາ ຮອງປະທານ ແລະ ເລຂາທິການໂອແລັມປິກແຫ່ງຊາດລາວ, ທ່ານ ສຸລິວັນ ເຊີນວິໄລ ຮອງຫົວໜ້າກົມກິລາລະດັບສູງ ກະຊວງສຶກສາທິການ ແລະ ກີລາ, ທ່ານ ຈັນສະໝອນ ຜ່ອງຈັນທາ ຜູ້ຈັດການຝ່າຍການຕະຫຼາດ ບໍລິສັດ ເບຍລາວ ຈໍາກັດ ພ້ອມດ້ວຍຄະນະບໍລິຫານງານສະຫະພັນດອກປີກໄກ່ແຫ່ງຊາດ ຕາງໜ້າຜູ້ໃຫ້ການສະໜັບສະໜູນຫຼັກ ຄະນະນັກກິລາ ຄູຝຶກ ແລະ ນັກກິລາ.

ແຫຼ່ງຂ່າວ: ປະຊາຊົນ

ກະຊວງ ປກສ ປະຕິບັດນະໂຍບາຍຕໍ່ນາຍຕໍາຫຼວດທີ່ໄດ້ຮັບເຄາະຮ້າຍ ຢ່າງສົມກຽດ

0

ກະຊວງ ປກສ ໄດ້ເອົາໃຈໃສ່ໃນການປະຕິບັດນະໂຍບາຍດ້ານຕ່າງໆຢ່າງສົມກຽດ ຕໍ່ນາຍຕໍາຫຼວດ ທີ່ເສຍຊີວິດ ແລະ ໄດ້ຮັບບາດເຈັບ ໃນລະຫວ່າງການປະຕິບັດໜ້າທີ່ ໃນວັນທີ 1 ກັນຍາ 2022, ເວລາປະມານ 10 ໂມງ ທີ່ໄດ້ລົງແກ້ໄຂເປົ້າໝາຍຊື້-ຂາຍ ຢາເສບຕິດ ຢູ່ບ້ານຫ້ວຍເຈາະ ກຸ່ມສາມສຸມ ເມືອງວຽງຄຳ ແຂວງຫຼວງພະບາງ, ເຊິ່ງໃນຂະນະນັ້ນ ເປົ້າໝາຍໄດ້ມີການແກະລະເບີດ ເຮັດໃຫ້ເຈົ້າໜ້າທີ່ເສຍຊີວິດ 3 ສະຫາຍ ແລະ ບາດເຈັບ 4 ສະຫາຍ, ສ່ວນເປົ້າໝາຍທີ່ກໍ່ເຫດ ຄື ທ້າວ ຄົວວ່າ ທໍ່ ແມ່ນເສຍຊີວິດຄາທີ່.

ຕໍ່ກັບເຫດການທີ່ເກີດຂຶ້ນການຈັດຕັ້ງທຸກຂັ້ນແມ່ນໄດ້ຮີບຮ້ອນ ໃຫ້ການຊ່ວຍເຫຼືອຕາມຂັ້ນຕອນ ເປັນຕົ້ນແມ່ນສົ່ງຜູ້ໄດ້ຮັບບາດເຈັບໄປປິ່ນປົວເບື້ອງຕົ້ນຢູ່ໂຮງໝໍທ້ອງຖິ່ນຢ່າງວ່ອງໄວ; ຈາກນັ້ນ, ຄະນະນໍາກະຊວງປ້ອງກັນຄວາມສະຫງົບໄດ້ຊີ້ນໍາໃຫ້ເອົາເຮືອບິນໄປຮັບຜູ້ຖືກບາດເຈັບສາຫັດເພື່ອມາປິ່ນປົວຢູ່ໂຮງໝໍໃນນະຄອນຫຼວງວຽງຈັນ.

ດ້ວຍຄວາມເປັນຫ່ວງເປັນໄຍ ແລະ ເອົາໃຈໃສ່ຂອງການ ນຳພັກ-ລັດ, ກໍຄືການນຳກະຊວງປ້ອງກັນຄວາມສະຫງົບ ໃນວັນທີ 3 ກັນຍາ 2022, ພົອ ວິໄລ ຫຼ້າຄຳຟອງ ຮອງນາຍົກລັດຖະມົນຕີ, ລັດຖະມົນຕີກະຊວງ ປກສ ໄດ້ໄປຢ້ຽມຢາມຜູ້ໄດ້ຮັບເຈັບທີ່ຖືກນຳສົ່ງມາປິ່ນປົວຢູ່ໂຮງໝໍ 103 ເພື່ອເປັນການຢ້ຽມຢາມຖາມຂ່າວ ແລະ ໃຫ້ກຳລັງໃຈຢ່າງໃກ້ສິດ.

ພ້ອມດຽວກັນນັ້ນ, ໃນລະຫວ່າງວັນທີ 2-5 ກັນຍາ 2022, ພົຕ ວັນທອງ ກອງມະນີ ຮອງລັດຖະມົນຕີ ຫົວໜ້າກົມໃຫຍ່ການເມືອງ ກະຊວງ ປກສ ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມເພື່ອແບ່ງເບົາ, ອົບອຸ່ນຈິດໃຈ ແລະ ປະຕິບັດນະໂຍບາຍ ຢ່າງສົມກຽດຕໍ່ນາຍຕໍາຫຼວດທີ່ໄດ້ຮັບບາດເຈັບ ແລະ ຄອບຄົວຂອງນາຍຕຳຫຼວດ ທີ່ເສຍຊີວິດໃນຂະນະປະຕິບັດໜ້າທີ່ 3 ສະຫາຍ.

ໃນການລົງເຄື່ອນໄຫວຢ້ຽມຢາມ, ທ່ານຮອງລັດຖະມົນຕີໄດ້ຕາງໜ້າໃຫ້ກະຊວງ ປກສ ປະຕິບັດນະໂຍບາຍພິເສດຄື: ມອບຫຼຽນພິລະອາດຫານຊັ້ນ I ໃຫ້ສະຫາຍລະ 1 ໜ່ວຍ, ເລື່ອນຊັ້ນໃຫ້ຜູ້ເສຍຊີວິດ ຈາກ ຮ້ອຍຕີ ຂຶ້ນ ຮອ 2 ສະຫາຍ ຄື: ຮອ ອາລິນ ວິໄລພອນ ແລະ ຮອ ອິນປອນ ຈັນທະລັງສີ ແລະ ເລື່ອນຊັ້ນ ສິບເອກ ຂຶ້ນເປັນ ຮຕ 1 ສະຫາຍ ຄື: ຮຕ ຊາຍ ພະລືໄຊ; ພ້ອມທັງ ມອບເງິນນະໂຍບາຍຈຳນວນໜຶ່ງ ເພື່ອແບ່ງເບົາຄວາມໂສກເສົ້າເສຍໃຈຕໍ່ກັບຄອບຄົວ ແລະ ຍາດຕິພີ່ນ້ອງຂອງນາຍ ຕຳຫຼວດທີ່ຖືກເຄາະຮ້າຍໃນຄັ້ງນີ້ ແລະ ໄດ້ເຂົ້າຮ່ວມງານຊາປະນາກິດສົບຂອງນາຍຕຳຫຼວດທັງ 3 ສະຫາຍ ຢ່າງສົມກຽດ.

ນອກນັ້ນ, ຍັງໄດ້ມອບເງິນນະໂຍບາຍຕໍ່ຄອບຄົວນາຍຕໍາຫຼວດທີ່ເສຍຊີວິດ ແລະ ໄດ້ຮັບບາດ ເຈັບ ໃນຄັ້ງນີ້, ກະຊວງ ປກສ, ກອງບັນຊາການ ປກສ ແຂວງຫຼວງພະບາງ, ບັນດາຫ້ອງ, ບັນດາເມືອງ, ຫ້ອງວ່າການປົກຄອງເມືອງວຽງຄຳ, ກອງບັນຊາການ ປກສ ເມືອງວຽງຄຳ ໄດ້ສົມທົບກັນປະຕິບັດນະໂຍບາຍໃນເບື້ອງຕົ້ນ ຕໍ່ຄອບຄົວນາຍຕໍາຫຼວດຜູ້ເສຍຊີວິດ 3 ຄອບຄົວ ໂດຍຄອບຄົວລະ 79 ລ້ານກີບ ແລະ ປະຕິບັດນະໂຍບາຍໃນເບື້ອງຕົ້ນຕໍ່ຜູ້ໄດ້ຮັບບາດເຈັບ 4 ສະຫາຍ, ສະຫາຍລະ 31 ລ້ານກີບ.

ນອກນັ້ນ, ກະຊວງ ປກສ ກໍຄືການຈັດຕັ້ງທຸກຂັ້ນ ຍັງຈະສືບຕໍ່ໃຫ້ການຊ່ວຍເຫຼືອຄອບຄົວຜູ້ເສຍຊີວິດ ແລະ ຜູ້ທີ່ໄດ້ຮັບບາດເຈັບທາງດ້ານວັດຖຸ-ຈິດໃຈ ຢ່າງເຕັມທີ່, ສືບຕໍ່ປິ່ນປ່ວຍຜູ້ໄດ້ຮັບບາດເຈັບໃຫ້ສຸດຄວາມສາມາດ ແລະ ໃຫ້ຫາຍດີໂດຍໄວ.

ນອກຈາກນັ້ນ, ໃນຕອນບ່າຍຂອງວັນທີ 4 ກັນຍາ 2022, ພົຕ ວັນທອງ ກອງມະນີ ກໍໄດ້ພົບປະໂອ້ລົມພະນັກງານ-ນັກຮົບ ກອງບັນຊາການ ປກສ ເມືອງວຽງຄຳ ເພື່ອໃຫ້ກຳລັງໃຈ ແລະ ຊຸກຍູ້ໃຫ້ ນາຍ ແລະ ພົນຕຳຫຼວດ ປກສ ເມືອງວຽງຄຳ ສືບຕໍ່ເຮັດວຽກງານວິຊາສະເພາະທີ່ພັກ-ລັດ ກໍຄືກະຊວງ ປກສ ມອບໝາຍໃຫ້ມີຜົນສຳເລັດ; ໂດຍທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານ ທີ່ຍາດໄດ້ ໃນໄລຍະຜ່ານມາ ຕ້ອງພ້ອມກັນສືບຕໍ່ຮັກສາ ແລະ ເສີມຂະຫຍາຍມູນເຊື້ອຂອງກຳລັງ ປກສ ແລະ ສຶກສາອົບຮົມການເມືອງນໍາພາ-ແນວຄິດ ໃຫ້ນາຍ ແລະ ພົນຕຳຫຼວດ ໃຫ້ມີຄຸນສົມບັດສິນທຳປະຕິວັດ, ເຊື່ອໝັ້ນຕໍ່ແນວທາງຂອງພັກ-ລັດ, ປັບປຸງແບບແຜນວິທີເຮັດວຽກ, ຝຶກຝົນຮໍ່າຮຽນຍົກລະດັບວິຊາສະເພາະ ໃຫ້ມີຄວາມຮູ້-ຄວາມສາມາດສູງຂຶ້ນ, ກໍ່ສ້າງກຳລັງໃຫ້ມີຄວາມເຂັ້ມແຂງເຕີບໃຫຍ່ທັງປະລິມານ ແລະ ຄຸນນະພາບ.

ຂ່າວ: ກົມສື່ມວນຊົນ ປກສ

ຄາດຄະເນຄວາມເສຍຫາຍຈາກໄພທຳມະຊາດ ຢູ່ແຂວງອຸດົມໄຊ

0

ເນື່ອງຈາກຜົນກະທົບຂອງພາຍຸມາອອນໃນວັນທີ 26 ສິງຫາ ທີ່ຜ່ານມາ, ໄດ້ເຮັດໃຫ້ດກີດນໍ້າຖ້ວມໜັກຢູ່ຫຼາ, ເມືອງນາໝໍ້ ແລະ ເມືອງໄຊ ແຂວງອຸດົມໄຊ ໂດຍສະເພາະຢູ່ເມືອງໄຊທີ່ເປັນເທດສະບານແຂວງ ທີ່ໄດ້ສ້າງຄວາມເສຍຫາຍໃຫ້ແກ່ຊັບສິນ, ສັດລ້ຽງ ແລະ ເນື້ອທີ່ການຜະລິດຂອງປະຊາຊົນໜັກພໍສົມຄວນ.

ນອກຈາກນີ້ ເສັ້ນທາງຫຼາຍເສັ້ນຍັງໄດ້ຮັບຜົນກະທົບຢ່າງໜັກໜ່ວງເຊັ່ນກັນ ໃນນັ້ນມີທາງຫຼວງແຫ່ງຊາດ ສອງເສັ້ນ, ຂົວຫຼາຍແຫ່ງຖືກຕັດຂາດ ແຕ່ມາຮອດປັດຈຸບັນນີ້ໄດ້ຮັບການແກ້ໄຂສຸກເສີນແແລ້ວຈຳນວນໜຶ່ງ.

ທ່ານ ຄຳແສງ ອາລີ ຫົວໜ້າພະແນກໂຍທາທິການ ແລະ ຂົນສົ່ງ ແຂວງອຸດົມໄຊ ໄດ້ໃຫ້ຮູ້ວ່າ: ຫຼັງຈາກເກີດເຫດພະແນກໂຍທາທິການ ແລະ ຂົນສົ່ງ ກໍໄດ້ສົມທົບກັບບັນດາບໍລິສັດ ທີ່ມີເງື່ອນໄຂ ເພື່ອລົງແກ້ໄຂສຸກເສີນ ເຊິ່ງໃຊ້ເວລາ 2 ວັນ ເພື່ອໃຫ້ອຳນວຍການສັນຈອນ ໂດຍຈະໃຫ້ແຕ່ລົດເບົາສາມາດໄປມາໄດ້.

ຫຼັງຈາກນັ້ນ, ກໍໄດ້ສຸມໃສ່ແກ້ໄຂ ມາຮອດປັດຈະບັນ ກໍໄດ້ອະນຸຍາດໃຫ້ລົດບັນທຸກຳໄປມາໄດ້ແລ້ວ. ຕໍ່ກັບພື້ນຖານໂຄ່ງລ່າງ, ຕາມການປະເມີນຂອງວິສາການມາຮອດວັນທີ 1 ກັນຍາ 2022 ຄາດຄະເນມູນຄ່າເສຍຫາຍ ແລະ ຄວາມຕ້ອງການໃນການຟື້ນຟູທັງໝົດຕົກຢູ່ປະມານ 60 ກ່ວາຕື້ກີບ ຕົວເລກດັ່ງກ່າວຍັງມີຫຼາຍໜ້າວຽກຍັງບໍ່ສາມາດສັງລວມໄດ້ ສຳລັບການຟື້ນຟູ ຖ້າເຮົາມີງົບປະມານພຽງພໍ ຄາດວ່າຈະໄດ້ໃຊ້ເວລາ 1-2 ປີ.

https://www.facebook.com/lnrlao/videos/1466431947211108

ແຫຼ່ງຂ່າວ ແລະ ວີດີໂອ: Lao National Radio

ໂຄງການທົດລອງຈັດຕັ້ງປະຕິບັດວິທີການນຳໃຊ້ຍຸງລາຍບ້ານ

0

ກອງປະຊຸມແນະນຳໂຄງການທົດລອງຈັດຕັ້ງປະຕິບັດວິທີການນຳໃຊ້ຍຸງລາຍບ້ານທີ່ມີເຊື້ອແບັກທີເຣຍໂວລບັກເຄຍເພື່ອຄວບຄຸມການສົ່ງເຊື້ອພະຍາດໄຂ້ຍຸງລາຍ ຢູ່ເມືອງຈັນທະບູລີ ແລະ ເມືອງໄຊເຊດຖາ, ໄດ້ຈັດຂື້ນວັນທີ 2 ກັນຍາ2022 ທີ່ໂຮງແຮມ ຄລາວພາຊາ ໂດຍການເປັນປະທານຂອງ ທ່ານ ດຣ ຣັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່ກະຊວງສາທາລະນະສຸກ, ທ່ານ ນາງ Deborah Leaver ຜູ້ອຳນວຍການອົງການຊ່ວຍເຫລືອເດັກສາກົນປະຈຳ ສປປ ລາວ, ທ່ານ Dr Breeanna McLean ຫົວໜ້າໂຄງການຄວບຄຸມປະຊາກອນຍຸງໂລກ ພ້ອມດ້ວຍຜູ້ເຂົ້າຮ່ວມຈາກ ພະແນກພົວພັນຕ່າງປະເທດ, ພະແນກສາທາລະນະສຸກນະຄອນຫລວງ, ກົມ, ສູນ, ສະຖາບັນປັດສເຕີລາວ, ຫ້ອງການສາທາລະນະສຸກເມືອງ, ຫ້ອງການປົກຄອງເມືອງ, ອົງການພັດທະນາ ແລະ ບໍລິການຕົວເມືອງ, ທ່ານນາຍບ້ານຈາກ 32 ບ້ານ ທີ່ຢູ່ໃນເຂດພື້ນທີ່ໂຄງການ ແລະ ອົງການຊ່ວຍເຫລືອເດັກ ປະຈຳ ສປປ ລາວ ກໍ່ໄດ້ເຂົ້າຮ່ວມ.

ຈຸດປະສົງກໍ່ແມ່ນເພື່ອປະກອບສ່ວນໃນການລຸດຜ່ອນການສົ່ງເຊື້ອພະຍາດໄຂ້ຍຸງລາຍຢູ່ ສປປ ລາວ ແລະ ສະໜັບສະໜູນເປົ້າໝາຍແຫ່ງຊາດ ທີ່ໄດ້ກຳນົດໄວ້ໃນແຜນປະຕິບັດງານ ກ່ຽວກັບການກັນ ແລະ ຄວບຄຸມພະຍາດໄຂ້ຍຸງລາຍ ໂດຍນຳໃຊ້ມາດຕະການເຊື່ອມສານແບບຄົບຊຸດ.

ກິດຈະກຳຫລັກຂອງໂຄງການ ແມ່ນຈະມີການເຊື່ອມສານ ແລະ ການມີສ່ວນຮ່ວມຂອງຊຸມຊົນ, ສຳລັບວິທີການປ່ອຍຍຸງລາຍບ້ານທີ່ມີເຊື້ອໂວລບັກເຄຍ ແລະ ເກັບກຳຂໍ້ມູນເພື່ອຕິດຕາມອັດຕາຂອງເຊື້ອຢູ່ປະຊາກອນຍຸງຢູ່ພາກສະໜາມ ຫລັງຈາກໄລຍະການປ່ອຍຍຸງຊຶ່ງຈະໄດ້ຈັດຂື້ນຢູ່ 32 ບ້ານ ຂອງເມືອງຈັນທະບູລີ ແລະ ເມືອງໄຊເຊດຖາ, ໃນເມື່ອເວລາຊຸມຊົນເຂດເປົ້າໝາຍເຫັນດີ ແລະ ຮັບຮອງໂຄງການ WMP ຈະເລີ່ມປ່ອຍຍຸງລາຍບ້ານທີ່ມີເຊື້ອໂວລບັກເຄຍໂດຍການເຮັດວຽກຮ່ວມກັບສາທາລະນະສຸກຂັ້ນບ້ານ ໃນຕົ້ນປີ 2023 ຊຶ່ງວ່າເຂດພື້ນທີ່ປ່ອຍຍຸງນັ້ນ ຈະກວມເອົາເນື້ອທີ່ທັງໝົດປະມານ 12 ຕາລາງກິໂລແມັດ ແລະ ຈະສາມາດຊ່ວຍປ້ອງກັນການຕິດເຊື້ອໄຂຍຸງລາຍເຖິງ 86,000 ຄົນ ຢູ່ໃນສອງເມືອງເປົ້າໝາຍ.

ແຫຼ່ງຂໍ້ມູນ: ສູນຂ່າວສານການແພດສຸຂະສຶກສາ

ມອບເຄື່ອງຊ່ວຍເຫຼືອ ຜູ້ໄດ້ຮັບຜົນກະທົບຈາກນໍ້າຖ້ວມ

0

ແຫຼ່ງຂ່າວຈາດ ແຂວງອຸດົມໄຊ ໃຫ້ຮູ້ວ່າ: ໃນວັນທີ 3 ກັນຍາ 2022 ນີ້,ທ່ານ ຄຳພັນ ເຜີຍຍະວົງ ຫົວໜ້າຄະນະໂຄສະນາອົບຮົມສູນກາງພັກ ໄດ້ນຳເອົາເງິນສົດ, ເຄື່ອງອຸປະໂພກ-ບໍລິໂພກ, ວັດຖຸ-ປັດໄຈ ຈາກຫລາຍພາກສ່ວນ ມາຊ່ວຍເຫລືອປະຊາຊົນຜູ້ທີ່ໄດ້ຮັບຜົນກະທົບາກໄພນ້ຳຖ້ວມ ຢູ່ ແຂວງອຸດົມໄຊ ເຊິ່ງຕາງໜ້າຮັບໂດຍ ທ່ານ ບຸນຄົງ ຫລ້າຈຽມພອນ ເຈົ້າແຂວງອຸດົມໄຊ.

ເຄື່ອງທີ່ນໍາມາມອບໃນຄັ້ງນີ້, ແມ່ນໃນນາມສ່ວນຕົວ ແລະ ໄດ້ລະດົມຈາກເພື່ອນມິດ ແລະ ພາກສ່ວນທຸລະກິດ ເຊັ່ນ:

ກຸ່ມບໍລິສັດ ດອກງິ້ວຄຳ ຈຳກັດ 1 ຕື້ກີບ, ບໍລິສັດ ໄຊຈະເລີນຊັບການລົງທຶນ ຈຳກັດ 50 ລ້ານກີບ, ບໍລິສັດ ຊີມັງ ອຸດົມໄຊ ຈຽງເກີ ຈຳກັດຜູ້ດຽວ 30 ລ້ານກີບ, ທະນາຄານຮ່ວມພັດທະນາ(JDB) 20 ລ້ານກີບ, ບໍລິສັດ ຟ້າໄຊໂຍ ຈຳກັດຜູ້ດຽວ (ແຂວງບໍ່ແກ້ວ) 15 ລ້ານກີບ, ບໍລິສັດ ສີສັນຈະເລີນສຸກ ກໍ່ສ້າງຂົວ-ທາງ ເຄຫາສະຖານ ພັດທະນາກະສິກຳ ການຄ້າຄົບວົງຈອນ ຈຳກັດຜູ້ດຽວ 10 ລ້ານກີບ, ກຸ່ມບໍລິສັດ ອ່າງທອງ ຈຳກັດ 5 ລ້ານກີບ ແລະ ທ່ານ ນາງ ວຽນວິໄລ ດິລະພັນ ຫົວໜ້າໂຄສະນາອົບຮົມ ແຂວງຫລວງພະບາງ 2 ລ້ານກີບ ລວມທັງໝົດ 1,1 ຕື້ກວ່າກີບ.

ເລີ່ມແຕ່ວັນທີ 27 ສິງຫາ ຫາ ວັນທີ 3 ກັນຍາ 2022 ຄະນະຮັບຜິດຊອບເສດຖະກິດ ລະດົມທຶນ, ຮັບ-ແຈກຫຍາຍ, ສະໜອງງົບປະມານ ແລະ ອາຫານ ໄດ້ປະມານ 3,2 ຕື້ກວ່າກີບ ໃນນັ້ນເປັນວັດຖຸປະມານ 700 ລ້ານກີບ.

ແຫຼ່ງຂ່າວຈາກ: ປະເທດລາວ

ທູດລາວ ຍື່ນສານຕາຕັ້ງຕໍ່ປະທານາທິບໍດີ ປອກຕຸຍການ

0

ໃນວັນທີ 25 ສິງຫາ ຜ່ານມາ, ຢູ່ທຳນຽບປະທານາທິບໍດີ ແຫ່ງ ສາທາ ລະນະລັດ ປອກຕຸຍການ, ນະຄອນຫຼວງ ລິດສະບອນ, ທ່ານ ຄຳອິນ ຄິດຈະເດດ ໄດ້ຍື່ນສານຕາຕັ້ງຕໍ່ ທ່ານ ມາເຊໂລ ຣີບີໂລ ເດີ ສຸຊາ(H.E. Marcelo Rebelo de Sousa), ປະທານາທິບໍດີ ແຫ່ງ ສາທາລະນະລັດ ປອກຕຸຍການ ເພື່ອກຳລັງຕຳແໜ່ງເປັນເອກອັກຄັດຖະທູດ ວິສາມັນ ຜູ້ມີອຳນາດເຕັມ ແຫ່ງ ສປປ ລາວ ປະຈຳ ປອກຕຸຍການ ເຊິ່ງມີສະຖານທູດຕັ້ງຢູ່ນະຄອນຫລວງປາຣີ.

ໃນໂອກາດນີ້, ທ່ານເອກອັກຄະລັດຖະທູດ ໄດ້ນຳເອົາຄວາມຢ້ຽມຢາມຖາມຂ່າວອັນອົບອຸ່ນ, ຄວາມຮັກແພງ ແລະ ຄວາມອວຍພອນໄຊອັນປະເສີດ ເພື່ອສັນຕິພາບ, ມິດຕະພາບ, ຄວາມສົມບູນພູນສຸກ ແລະ ການພົວພັນຮ່ວມມືທີ່ດີ ຂອງ ທ່ານ ທອງລຸນ ສີສຸລິດ ປະທານປະເທດ ແຫ່ງ ສປປ ລາວ ຝາກເຖິງທ່ານປະທານປະເທດ ແຫ່ງ ສາທາລະນະລັດ ປອກຕຸຍການ ແລະ ພ້ອມທັງ ຜ່ານທ່ານໄປຍັງລັດຖະບານ ແລະປະຊາຊົນປອກຕຸຍການ ທຸກທົ່ວໜ້າ.

ທ່ານເອກອັກຄະລັດຖະທູດ ໄດ້ສະແດງຄວາມດີໃຈທີ່ໄດ້ຖືກແຕ່ງເປັນເອກອັກຄະລັດຖະທູດແຫ່ງ ສປປ ລາວ ປະຈຳ ສາທາລະນະລັດ ປອກຕຸຍການ ແລະ ໄດ້ໃຫ້ຄຳໝັ້ນສັນຍາວ່າ ໃນໄລຍະທີ່ດຳລົງຕຳແໜ່ງ, ພ້ອມທັງຈະເຮັດສຸດຄວາມສາມາດໃນການເພີ່ມທະວີ ການສົ່ງເສີມສຳພັນໄມຕີ, ການຮ່ວມມືຂອງສອງປະເທດໃຫ້ດີຂຶ້ນໃນອະນາຄົດ ແລະ ໄດ້ສະແດງຄວາມຂອບໃຈຕໍ່ ທ່ານປະທານາທິບໍດີ, ລັດຖະບານ ແລະ ປະຊາຊົນ ປອກຕຸຍການ ທີ່ໄດ້ໃຫ້ການສະໜັບສະໜູນຊ່ວຍເຫລືອທາງດ້ານການພັດທະນາເສດຖະກິດ-ສັງຄົມ ຂອງ ສປປ ລາວ ໃນໄລຍະຜ່ານມາ ໂດຍສະເພາະ ດ້ານການສຶກສາ ແລະ ຫວັງວ່າ ຈະໄດ້ສືບຕໍ່ຜັນຂະຫຍາຍການຮ່ວມມືຢ່າງດີໃນຕໍ່ໜ້າ.

ພ້ອມນີ້, ທ່ານເອກອັກຄະລັດຖະທູດ ໄດ້ອວຍພອນໄຊອັນປະເສີດໃຫ້ທ່ານ ປະທານາ ທິບໍດີ ພ້ອມດ້ວຍຄອບຄົວ ແລະ ປະຊາຊົນ ປອກຕຸຍການທຸກທົ່ວໜ້າ.

ໃນໂອກາດດຽວກັນນີ້, ທ່ານ ປະທານາທິບໍດີ ມາເຊໂລ ກໍໄດ້ສະແດງຄວາມຊົມເຊີຍມາຍັງ ທ່ານເອກອັກຄະລັດຖະທູດ ຄົນໃໝ່ ແລະ ໄດ້ຝາກຄວາມຢື້ຢາມຖາມຂ່າວ, ຄວາມຮັກແພງ, ຄວາມອວຍພອນໄຊອັນປະເສີດ ແລະ ມິດຕະພາບການພົວພັນທີ່ດີ ມາຍັງທ່ານ ທອງລຸນ ສີສຸລິດ ປະທານປະເທດ ແຫ່ງ ສປປລາວ, ລັດຖະບານ ແລະ ປະຊາຊາຊົນລາວທຸກທົ່ວໜ້າ. ສາທາລະນະລັດ ປະຊາທິປະໄຕ ປະຊາຊົນລາວ ແລະ ສາທາລະນະລັດ ປອກຕຸຍການ ໄດ້ສ້າງສາຍພົວພັນການທູດນຳກັນໃນວັນທີ 31 ພຶດສະພາ1995; ສປປ ລາວ ມີສະຖານທູດຕັ້ງຢູ່ ນະຄອນຫລວງປາຣີ ຮັບຜິດຊອບ ປະເທດ ປອກຕຸຍການ ແລະ ສາທາລະນະລັດປອກຕຸຍການ ມີສະຖານທູດຕັ້ງຢູ່ ນະຄອນຫຼວງ ບາງກອກ ປະເທດໄທ ຮັບຜິດຊອບ ສປປ ລາວ.

ແຫຼ່ງຂ່າວ: ຂປລ