ທ່ານ ປອ. ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ ກ່າວອວຍພອນເນື່ອງໃນໂອກາດປີໃໝ່ລາວ ຈສ 1384 ພສ. 2565

ພໍ່ແມ່ນພີ່ນ້ອງປະຊາຊົນລາວບັນດາເຜົ່າ ທີ່ຮັກແພງທັງຫຼາຍ.

ເນື່ອງໃນໂອກາດສົ່ງທ້າຍປີເກົ່າ ພສ. 2564 ແລະ ຕ້ອນຮັບປີໃໝ່ ພສ 2565 ທີ່ຈະມາເຖິງນີ້, ຂ້າພະເຈົ້າ ຕາງໜ້າໃຫ້ ສູນກາງພັກ, ສະພາແຫ່ງຊາດ, ຄະນະປະຈໍາສະພາແຫ່ງຊາດ, ສະມາຊິກສະພາແຫ່ງຊາດ ກໍຄື ພະນັກງານ-ລັດຖະກອນ ຂອງສະພາແຫ່ງຊາດ, ສະພາປະຊາຊົນແຂວງ, ນະຄອນຫຼວງວຽງຈັນ ຂໍຖືເອົາລືກງາມຍາມດີ, ວັນທີ່ເປັນສິລິມຸງຄຸນນີ້ ສົ່ງຄໍາອວຍພອນໄຊອັນປະເສີດ ມາຍັງພະນັກງານ, ທະຫານ, ຕໍາຫຼວດ ກໍຄື ພໍ່ແມ່ພີ່ນ້ອງປະຊາຊົນລາວບັນດາເຜົ່າ ຈົ່ງມີສຸຂະພາບແຂງແຮງ, ມີຄວາມສຸກກາຍສະບາຍໃຈ, ຫ່າງໄກຈາກພະຍາດໂລຄາ, ປະສົບຜົນສໍາເລັດໃນໜ້າທີ່ວຽກງານທຸກປະການ.

ປີ ພສ. 2564 ທີ່ຜ່ານໄປນັ້ນ ເຖິງວ່າສະພາບແວດລ້ອມຂອງພາກພື້ນ ແລະ ສາກົນ ໄດ້ມີການຜັນແປໄປຢ່າງສັບສົນ ສະຫຼັບສັບຊ້ອນ ແລະ ຄາດເດົາໄດ້ຍາກ ມີທັງກາລະໂອກາດ ແລະ ສິ່ງທ້າທາຍຫຼາຍຢ່າງ ຕໍ່ການພົວພັນ ແລະ ຮ່ວມມື ສາກົນ ທີ່ບໍ່ພັດທະນາ ເສດຖະກິດ ໂດຍລວມໃນໂລກ ກໍ່ຄືຕໍ່ປະເທດພວກເຮົາ. ສຳລັບປະເທດເຮົາແລ້ວຄວາມຫຍຸ້ງຍາກທາງດ້ານເສດຖະກິດ- ການເງິນ, ໄດ້ສົ່ງຜົນກະທົບຫຼາຍດ້ານຕໍ່ການສ້າງສາພັດທະນາເສດຖະກິດ-ສັງຄົມ. ແຕ່ດ້ວຍຄວາມເອົາໃຈໃສ່ນໍາພາຊີ້ນໍາຂອງສູນກາງພັກ, ຄວາມເປັນເອກະພາບສູງໃນວຽກງານຕ່າງໆ ລະຫວ່າງ ສະພາແຫ່ງຊາດ ແລະ ລັດຖະບານ, ຄວາມບຸກບືນຫ້າວຫັນຂອງບັນດາທ່ານ ສະມາຊິກສະພາແຫ່ງຊາດ, ກົງຈັກເສນາທິການ, ການສະໜັບສະໜູນຂອງພໍ່ແມ່ພີ່ນ້ອງປະຊາຊົນລາວບັນດາເຜົ່າ ເຮັດໃຫ້ການເຄື່ອນໄຫວຈັດຕັ້ງປະຕິບັດພາລະບົດບາດ, ສິດ ແລະ ໜ້າທີ່ຂອງ ສະພາແຫ່ງຊາດ ຕາມທີ່ໄດ້ກໍານົດໄວ້ໃນລັດຖະທໍາມະນນ, ກົດໝາຍ ໄດ້ຮັບຜົນສໍາເລັດຫຼາຍດ້ານ ເປັນຕົ້ນ ພວກເຮົາໄດ້ເຮັດສໍາເລັດໜ້າທີ່ການ ເມືອງອັນສໍາຄັນ ໃນການດໍາເນີນການເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະມາ ຊິກສະພາປະຊາຊົນຂັ້ນແຂວງ ຊຸດທີ II ຊຶ່ງໄດ້ສ້າງເງື່ອນໄຂໃຫ້ປະຊາຊົນລາວບັນດາເຜົ່າ ໄດ້ໃຊ້ສິດປະຊາທິປະໄຕ ເລືອກຕັ້ງເອົາຕົວແທນຂອງຕົນ ເພື່ອປະຕິບັດໜ້າທີ່ພິຈາລະນາບັນຫາສໍາຄັນພື້ນ ຖານຂອງປະເທດຊາດ ຢູ່ສະພາແຫ່ງຊາດ ກໍຄື ສະພາປະຊາຊົນແຂວງ, ນະຄອນຫຼວງ; ໄດ້ສໍາເລັດການດໍາເນີນກອງປະຊຸມຄັ້ງປະຖົມມະລືກຂອງສະພາແຫ່ງຊາດ ຊຸດທີ IX ເພື່ອພິຈາລະນາຮັບຮອງເອົາບັນຫາສໍາຄັນພື້ນຖານຂອງປະເທດຊາດ ໂດຍສະເພາະ ການເລືອກຕັ້ງ ແລະ ການຮັບຮອງເອົາການແຕ່ງຕັ້ງ ບຸກຄະລາກອນໃນຕໍໍາແໜ່ງສໍາຄັນຂອງລັດ, ຮັລຮອງແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX ແລະ ວຽກງານສໍາຄັນອື່ນ ຕາມລັດຖະທໍາມະນູນ, ກົດໝາຍກໍານົດ; ການດໍາເນີນກອງປະຊຸມສະໄໝວິສາມັນ ເທື່ອທີ 1 ຂອງສະພາແຫ່ງຊາດ ຊຸດທີ IX ເພື່ອພິຈາລະນາຮັບຮອງເອົາວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ, ການແກ້ໄຂບັນຫາຢາເສບຕິດ; ການດໍາເນີນກອງປະຊຸມສະໄໝສາມັນ ເທື່ອທີ 2 ຂອງສະພາແຫ່ງຊາດ ຊຸດທີ IX ເພື່ອພິຈາລະນາຮັບຮອງເອົາບັນຫາສໍາຄັນພື້ນຖານຂອງປະເທດຊາດ ໂດຍສະເພາະ ການຈັດ ຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ ປະຈໍາປີ 2021 ແລະ ແຜນການປະຈໍາປີ 2022 ແລະ ວຽກງານສໍາຄັນອື່ນ. ຜົນສໍາເລັດໃນການເຄື່ອນໄຫວວຽກງານຂອງສະພາແຫ່ງຊາດ ຕະລອດໄລຍະ 1 ປີທີ່ຜ່ານມາ ຊຶ່ງເນື້ອແທ້ມັນແມ່ນ ຄວາມພະຍາຍາມ, ຄວາມບຸກບືນສູ້ຊົນ ໃນການຈັດຕັ້ງຜັນຂະຫຍາຍແນວທາງນະໂຍບາຍຂອງພັກ ເຂົ້າໃນການຈັດຕັ້ງປະຕິບັດພາລະບົດບາດຂອງສະພາແຫ່ງຊາດ ໃຫ້ນັບມື້ມີປະສິດທິຜົນສູງຂຶ້ນ, ນໍາເອົາຜົນປະໂຫຍດຕົວຈິງມາສູ່ປະເທດຊາດ ກໍຄື ປັບປຸງຊີວິດການເປັນຢູ່ຂອງພໍ່ແມ່ພີ່ນ້ອງປະຊາຊົນລາວບັນດາເຜົ່າ ໃຫ້ນັບມື້ດີຂຶ້ນ.

ພໍ່ແມ່ພີ່ນ້ອງ ປະຊາຊົນລາວບັນດາເຜົ່າ ທີ່ຮັກແພງທັງຫຼາຍ

ປີ ພສ. 2565 ທີ່ກໍາລັງກ້າວເຂົ້າມານີ້ ເປັນປີທີ່ມີຄວາມໝາຍສໍາຄັນຫຼາຍ ສໍາລັບປະເທດເຮົາ ຊຶ່ງເປັນປີທີ 2 ຂອງການຈັດຕັ້ງປະຕິບັດເນື້ອໃນຈິດໃຈ ມະຕິກອງປະຊຸມໃຫຍ່ ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX ເຂົ້າໃນທຸກຂົງເຂດວຽກງານ ໃຫ້ມີການຫັນປ່ຽນຢ່າງຕັ້ງໜ້າ ແລະ ມີປະສິດທິຜົນ. ສໍາລັບສະພາແຫ່ງຊາດ ກໍຈະໄດ້ສຸມໃສ່ຍົກສູງບົດບາດ, ຄຸນນະພາບ ແລະ ຄວາມສາມາດ ໃນການສ້າງ ແລະ ປັບປຸງກົດໝາຍ ໃຫ້ເປັນລະບົບຄົບຊຸດ ເພື່ອເປັນບ່ອນອີງທີ່ໜັກແໜ້ນໃຫ້ແກ່ ການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ; ການພິຈາລະນາບັນ ຫາສໍາຄັນພື້ນຖານຂອງປະເທດຊາດ ໃຫ້ຮັບປະກັນຄວາມສອດຄ່ອງກັບ ແນວທາງນະໂຍບາຍຂອງພັກ, ນໍາຜົນປະໂຫຍດມາສູ່ປະເທດ ກໍຄື ປະຊາຊົນລາວບັນດາເຜົ່າຢ່າງແທ້ຈິງ; ເພີ່ມທະວີການຕິດຕາມກວດກາ ການເຄົາລົບ ແລະ ປະຕິບັດລັດຖະທໍາມະນູນ ແລະ ກົດໝາຍ ຂອງບັນດາອົງການລັດຂັ້ນຕ່າງໆ ແນໃສ່ສ້າງສະຕິກົດໝາຍໃຫ້ແກ່ສັງຄົມນັບມື້ສູງຂຶ້ນ, ຜົນຂອງການຕິດຕາມກວດກາ ຕ້ອງໄດ້ຮັບການພິຈາລະນາແກ້ໄຂຈາກອົງການລັດທີ່ກ່ຽວຂ້ອງ ຢ່າງເຂັ້ມງວດ, ທັນເວລາ; ເພີ່ມທະວີການລົງພົບປະກັບ ພໍ່ແມ່ປະຊາຊົນບັນດາເຜົ່າໃຫ້ກວ້າງຂວາງ ແລະ ທົ່ວເຖິງ, ສ້າງເງື່ອນໄຂອໍານວຍຄວາມສະດວກ ໃຫ້ສະມາຊິກ ສະພາແຫ່ງຊາດ, ສະມາຊິກສະພາປະຊາຊົນຂັ້ນແຂວງ ໄດ້ພົບປະໃກ້ຊິດກັບ ພໍ່ແມ່ປະຊາຊົນ ຜູ້ມີສິດເລືອກຕັ້ງ ດ້ວຍວິທີການຕ່າງໆທີ່ເໝາະສົມ ທັງນັ້ນກໍ່ເພື່ອຮັບຟັງຄວາມຄິດຄວາມເຫັນ, ຄວາມມຸ້ງມາດປາຖະໜາຂອງ ພໍ່ແມ່ປະຊາຊົນບັນດາເຜົ່າ ແລະ ປະສານສົມທົບກັບພາກສ່ວນກ່ຽວຂ້ອງຄົ້ນຄວ້າແກ້ໄຂ ຕໍ່ບັນຫາຕ່າງໆ ທີ່ພົວພັນກັບການດຳລົງຊີວິດຂອງປະຊາຊົນ. ພ້ອມກັນນັ້ນ ກໍ່ເພື່ອເຜີຍແຜ່ຜົນສຳເລັດຂອງກອງປະຊຸມ ສະພາແຫ່ງຊາດໃນແຕ່ລະຄັ້ງ ກໍ່ຄືກອງປະຊຸມ ສະພາປະຊາຊົນແຂວງ ໃຫ້ຜູ້ມີສິດເລືອກຕັ້ງໄດ້ຮັບຮູ້, ເຂົ້າໃຈ, ທັງສຶກສາອົບຮົມພໍ່ແມ່ ພີ່ນ້ອງ ຜູ້ທີ່ມີສິດເລືອກຕັ້ງ ປະກອບສ່ວນ ຫ້າວຫັນເຂົ້າໃນວຽກງານ ພັດທະນາທ້ອງຖິ່ນ ປະຕິບັດພັນທະຂອງພົນລະເມືອງອີກດ້ວຍ

ເພື່ອເຮັດສໍາເລັດໜ້າທີ່ວຽກງານທີ່ສໍາຄັນດັ່ງກ່າວ ຮຽກຮ້ອງໃຫ້ ພະນັກງານ, ທະຫານ, ຕໍາຫຼວດ ກໍຄື ພໍ່ແມ່ພີ່ນ້ອງປະຊາຊົນລາວບັນດາເຜົ່າ ຈະຕ້ອງໄດ້ພ້ອມພຽງຮຽງໜ້າເປັນຈິດໜຶ່ງໃຈດຽວ ພ້ອມກັບ ພັກ-ລັດ ກໍຄືສະພາແຫ່ງຊາດ ໃນການຈັດຕັ້ງປະຕິບັດແນວທາງນະໂຍບາຍຂອງພັກ, ລັດຖະທໍາມະນູນ, ກົດ ໝາຍ, ມະຕິກອງປະຊຸມສະແຫ່ງຊາດ ທີ່ວາງອອກໃນແຕ່ລະໄລຍະ ຢ່າງເຂັ້ມງວດ; ເປັນເຈົ້າການປະກອບ ສ່ວນຢ່າງຕັ້ງໜ້າ ເຂົ້າໃນການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ; ວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ໃຫ້ບັນລຸຜົນສໍາເລັດຕາມແຜນການທີ່ວາງໄວ້; ສ້າງການຫັນປ່ຽນໃໝ່ ໃນວິຖີການດຳລົງຊີວິດ ແລະ ທໍາມາຫາກິນແບບໃໝ່ໃນເງື່ອນໄຂຂອງການແຜ່ລະບາດ ຂອງໂຄວິດ-19 ດ້ວຍການນໍາໃຊ້ຄວາມກ້າວໜ້າ ຂອງເຕັກໂນໂລຊີ ແລະ ນຳໃຊ້ທ່າແຮງທາງດ້ານຊັບພະຍາກອນທໍາມະຊາດ ເຂົ້າໃນການຜະລິດກະສິກໍາເປັນສິນຄ້າ, ສ້າງວຽກເຮັດງານທໍາ, ສ້າງລາຍຮັບແກ່ຄອບຄົວ ຈະເຮັດໃຫ້ຊີວິດການເປັນຢູ່ໄດ້ຮັບການຍົກລະດັບດີຂຶ້ນ; ເປັນເຈົ້າການເຂົ້າຮ່ວມໃນການແກ້ໄຂປະກົດການຫຍໍ້ທໍ້ໃນສັງຄົມເຮົາ ໃຫ້ກາຍເປັນສັງຄົມທີ່ປອດໃສ, ມີລະບຽບວິໄນ.

ພໍ່ແມ່ພີ່ນ້ອງປະຊາຊົນລາວບັນດາເຜົ່າ ທີ່ຮັກແພງທັງຫຼາຍ

ກ້າວເຂົ້າສູ່ປີໃໝ່ ພ.ສ 2565 ນີ້, ຂໍຖືໂອກາດທີ່ເປັນສິລິມົງຄຸນ ແລະ ລືກງາມຍາມດີ ນີ້, ຂ້າພະເຈົ້າ ຮຽກຮ້ອງມາຍັງພໍ່ແມ່ພີ່ນ້ອງປະຊາຊົນລາວບັນດາເຜົ່າ ເພີ່ມທະວີນໍ້າໃຈຮັກຊາດ, ຮັກບ້ານເກີດເມືອງນອນ ຊຶ່ງມໍລະດົກຕົກທອດຈາກປູ່ຍ່າຕາຍາຍ, ບັນດາບັນພະບູລຸດຂອງຊາດເຮົາແຕ່ລະຍຸກ ແຕ່ລະສະໄໝ ໄດ້ນໍາພາຕໍ່ສູ້ກູ້ຊາດ, ປົກປັັກຮັກສາ ແລະ ສ້າງສາພັດທະນາດິນແດນທີ່ອຸດົມຮັ່ງມີ ດ້ວຍອະລິຍະທຳຕ່າງໆແຫ່ງນີ້ ຈົນມາຮອດຍຸກສະໄໝຂອງພວກເຮົາ ຊຶ່ງເປັນລູກຫຼານຂອງວົງເຊື້ອຄະນາຍາດລາວ ຈົ່ງສືບຕໍ່ ແລະ ສານຕໍ່ອຸດົມການທີ່ບັນພະບູລຸດປະໄວ້ນັ້ນໃຫ້ຈະເລີນຮຸ່ງເຮືອງ; ເພີ່ມທະວີຄວາມສາມັກຄີອັນເປັນປຶກແຜ່ນແໜ້ນໜາ, ພ້ອມກັນຜ່ານຜ່າຄວາມຫຍຸ້ງຍາກ ແລະ ສິ່ງທ້າທາຍທົດສອບນາໆປະການ ເພື່ອພ້ອມພາກັນ ສ້າງສາພັດທະນາປະເທດເຮົາ ໃຫ້ຈະເລີນກ້າວໜ້າຂຶ້ນໄປຢ່າງບໍ່ຢຸດຢັ້ງ.

ທ້າຍສຸດນີ້, ຂໍອວຍພອນໃຫ້ປີໃໝ່ ພ.ສ 2565 ນີ້, ຈົ່ງເປັນປີທີ່ປວງຊົນລາວບັນດາເຜົ່າ ຈົ່ງຍາດໄດ້ຜົນສໍາເລັດໃນການສ້າງສາພັດທະນາເສດຖະກິດ-ສັງຄົມ, ເປັນປີທີ່ນໍາເອົາຄວາມຢູ່ເຢັນເປັນສຸກມາສູ່ພໍ່ແມ່ປະຊາຊົນລາວບັນດາເຜົ່າ !

ສະບາຍດີປີໃໝ່!

(ຂໍຂອບໃຈ)

ລາຍງານສະພາບໂຄວິດ-19 ສປປລາວ ວັນທີ 14 ເມສາ 2022

ແຂວງຕ່າງໆ

.

ທາບທາມການປັບປຸງກົດໝາຍວ່າດ້ວຍການແກ້ໄຂຄໍາຮ້ອງທຸກ

(ສພຊ) ເພື່ອຮັບປະກັນໃຫ້ແກ່ການປັບປຸງກົດໝາຍວ່າດ້ວຍ ການແກ້ໄຂຄໍາຮ້ອງທຸກ ໄດ້ດໍາເນີນໄປຕາມຂັ້ນຕອນຂອງການປັບປຸງກົດໝາຍ ຕາມທີ່ໄດ້ກໍານົດໄວ້ໃນກົດໝາຍວ່າດ້ວຍ ການສ້າງນິຕິກໍາ, ພ້ອມທັງຮັບປະກັນໃຫ້ເນື້ອໃນຂອງກົດໝາຍມີຄວາມຄົບຖ້ວນ, ສົມບູນ ແລະ ສອດຄ່ອງກັບແນວທາງ-ນະໂຍບາຍຂອງພັກ-ລັດ ໃນການຄຸ້ມຄອງເສດຖະກິດ-ສັງຄົມ ຕາມກົດໝາຍ ແລະ ສອດຄ່ອງກັບພາລະບົດບາດ, ສິດ ແລະ ໜ້າທີ່ຂອງບັນດາອົງການລັດ ທີ່ຮັບຜິດຊອບໃນການຮັບ ແລະ ແກ້ໄຂຄໍາຮ້ອງທຸກ ຕາມເນື້ອໃນຈິດໃຈ ມະຕິຂອງຄະນະບໍລິຫານງານສູນກາງພັກປະຊາຊົນປະຕິວັດລາວ ວ່າດ້ວຍການຄຸ້ມຄອງລັດ ຄຸ້ມຄອງສັງຄົມ ດ້ວຍກົດໝາຍ ສະບັບເລກທີ 037/ຄບສພ, ລົງວັນທີ 18 ມິຖຸນາ 2018 ແລະ ມະຕິກົມການເມືອງສູນກາງພັກ ວ່າດ້ວຍການຍົກສູງຄຸນນະພາບການດໍາເນີນຄະດີຕາມຂະບວນການຍຸຕິທໍາ ສະບັບເລກທີ 112/ກມສພ, ລົງວັນທີ 02 ມິຖຸນາ 2020 ແລະ ເພື່ອຮັບປະກັນໃຫ້ການຄົ້ນຄວ້າເນື້ອໃນການປັບປຸງກົດໝາຍວ່າດ້ວຍການແກ້ໄຂຄໍາຮ້ອງທຸກ, ການຈັດຕັ້ງການທາບທາມປະກອບຄໍາເຫັນຢ່າງກວ້າງຂວາງ ແລະ ທັນຕາມກໍານົດເວລາ ຕາມແຜນການທີ່ໄດ້ກໍານົດໄວ້.

ໃນລະຫວ່າງວັນທີ 8-9 ເມສາຜ່ານມາ, ທີ່ຫ້ອງປະຊຸມຫ້ອງວ່າການປົກຄອງແຂວງຈໍາປາສັກ ໄດ້ມີກອງປະຊຸມປັບປຸງກົດໝາຍວ່າດ້ວຍການແກ້ໄຂຄໍາຮ້ອງທຸກ ສະບັບປັບປຸງ ຄັ້ງທີ 4 ໂດຍການເປັນປະທານຂອງທ່ານ ສີສູນທອນ ສ.ຜາບມີໄຊຍ໌ ຮອງປະທານກຳມາທິການຍຸຕິທຳ, ມີບັນດາທ່ານຕາງໜ້າຈາກກຳມາທິການກົດໝາຍ, ກໍາມາທິການປ້ອງກັນຊາດ-ປ້ອງກັນຄວາມສະຫງົບສະພາແຫ່ງຊາດ, ຫ້ອງວ່າການສໍານັກງານປະທານປະເທດ, ກະຊວງຍຸຕິທໍາ, ອົງການກວດກາແຫ່ງລັດ, ອົງການໄອຍະການປະຊາຊົນສູງສຸດ, ສານປະຊາຊົນສູງສຸດ, ສູນກາງຊາວໜຸ່ມ, ສູນກາງກໍາມະບານລາວ, ສະຫະພັນນັກຮົບເກົ່າ, ສານປະຊາຊົນພາກໃຕ້, ອົງການໄອຍະການປະຊາຊົນພາກໃຕ້; ບັນດາທ່ານສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ, ສານປະຊາຊົນ ແລະ ອົງການໄອຍະການປະຊາຊົນ ແຂວງຈໍາປາສັກ, ຄໍາມ່ວນ, ສະຫວັນນະເຂດ, ສາລະວັນ, ເຊກອງ ແລະ ອັດຕະປື ເຂົ້າຮ່ວມ.

ໂອກາດນີ້, ທ່ານ ສີສູນທອນ ສ.ຜາບມີໄຊຍ໌ ໄດ້ກ່າວເປີດກອງປະຊຸມວ່າ: ກອງປະຊຸມທາບທາມຄວາມເຫັນ ການປັບປຸງກົດໝາຍວ່າດ້ວຍການແກ້ໄຂຄໍາຮ້ອງທຸກ ຢູ່ແຂວງຈໍາປາສັກ ເທື່ອນີ້ ແມ່ນເປັນກອງປະຊຸມ ຄັ້ງທີ 4 ທີ່ຄະນະຮັບຜິດຊອບ ໄດ້ດຳເນີນຜ່ານມາ, ກອງປະຊຸມຄັ້ງນີ້ ໄດ້ຮັບການເຂົ້າຮ່ວມຈາກຫລາຍພາກສ່ວນ ເຊິ່ງຈະໄດ້ຮັບການປະກອບຄໍາເຫັນຢ່າງກວ້າງຂວາງ ແລະ ເລິກເຊິ່ງພໍສົມຄວນ; ກອງປະຊຸມ ຈະໄດ້ສຸມໃສ່ຄົ້ນຄວ້າ ແລະ ປຶກສາຫາລື ກ່ຽວກັບການປັບປຸງກົດໝາຍວ່າດ້ວຍການແກ້ໄຂຄໍາຮ້ອງທຸກ ໃຫ້ມີຄວາມເປັນເອກະພາບ, ຕໍ່ບາງເນື້ອໃນ ໃຫ້ມີຄວາມຈະແຈ້ງ, ຮັດກຸມ ຖືກຕ້ອງ, ສອດຄ່ອງກັບກົດໝາຍທີ່ກ່ຽວຂ້ອງ ແລະ ແທດເໝາະກັບສະພາບຕົວຈິງ, ຮັບປະກັນໃຫ້ ການກໍານົດ ພາລະບົດບາດ, ສິດ ແລະ ໜ້າທີ່ຂອງບັນດາອົງການທີ່ຮັບຜິດຊອບ ໃນການແກ້ໄຂຄໍາຮ້ອງທຸກ ໃຫ້ມີຄວາມສອດຄ່ອງ, ກົມກຽວກັນ ແນໃສ່ເຮັດໃຫ້ການປະຕິບັດ ລັດຖະທໍາມະນູນ ແລະ ກົດໝາຍ ມີຜົນສັກສິດ, ໂປ່ງໃສ ແລະ ຍຸຕິທໍາ.

ກອງປະຊຸມດັ່ງກ່າວ ໄດ້ຮັບການສະໜັບສະໜູນຈາກແຜນງານເຊກາ (CEGA).

(ພາບ ແລະ ຂ່າວ: ນາງ ອານິຕາ ມ່ວນສະຫວັດ)

ຕາມການລາຍງານຂອງ Viengchan Police newsໃຫ້ຮູ້ວ່າ: ໃນວັນທີ 11 ເມສາ 2022 ນີ້ ເຈົ້າໜ້າທີ່ພະແນກຕຳຫຼວດສຶບສວນ-ສອບສວນ ຫ້ອງຕຳຫຼວດ ປກສ ແຂວງວຽງຈັນ ໄດ້ມອບລົດຮຸນໄດຄືນເຈົ້າຂອງເດີມ ເຊິ່ງລົດຄັນດັ່ງກ່າວແມ່ນລົດຂອງທ່ານ ຫງຽນຫວັນຮົນ ອາຍຸ 32 ປີ ອາຊີບຄ້າຂາຍ ພັກເຊົາຢູ່ບ້ານໂພນແຮ່ ເມືອງທຸລະຄົມ ແຂວງວຽງຈັນ ທີ່ຖືກຄົນບໍ່ດີລັກໄປໃນຄັ້ງວັນທີ 1 ມີນາ 2022.

ໃນວັນວັນທີ 2 ມີນາ 2022 ເຈົ້າໜ້າທີ່ຕຳຫຼວດຈະລາຈອນ ປກສ ແຂວງວຽງຈັນ ໄດ້ລົງປະຈຳປ້ອມດ່ານບ້ານດົງ ເມືອງທຸລະຄົມ ແຂວງວຽງຈັນ ເພື່ອກວດກາການສັນຈອນ ໃນນັ້ນໄດ້ລັດກວດລົດຮຸນໄດສີປອນເງີນ ບໍ່ຕິດປ້າຍທະບຽນ ຜ່ານການກວດກາເອກະສານເຫັນວ່າເອກະສານລົດຄັນດັ່ງກ່າວບໍ່ມີ, ເຈົ້າໜ້າທີ່ຈຶ່ງຂໍອະນຸຍາດກັກລົດຄັນດັ່ງກ່າວໄວ້ຊົ່ວຄາວ ແລ້ວເອົາມາຮັກສາໄວ້ຢູ່ພະແນກຈະລາຈອນ ກອງບັນຊາການ ປກສ ແຂວງວຽງຈັນ ເພື່ອກວດກາຄືນຄວາມຖືກຕ້ອງ.

ມາຮອດວັນທີ 3 ມີນາ 2022 ເຈົ້າຂອງລົດຮຸນໄດຄັນດັ່ງກ່າວໄດ້ນຳບົດບັນທຶກຮັບແຈ້ງຄວາມລົດຮຸນໄດເສຍຄັ້ງວັນທີ 1 ມີນາ 2021 ແລະ ປື້ມທະບຽນລົດມາຢັ້ງຢືນ ຢູ່ພະແນກສືບສວນ-ສອບສວນ ຫ້ອງຕຳຫຼວດ ປກສ ແຂວງວຽງຈັນ ທາງເຈົ້າໜ້າທີ່ພວກເຮົາກໍ່ໄດ້ກວດກາເລກຈັກ, ເລກຖັງ ປະຫວັດຂຶ້ນທະບຽນແມ່ນຖືກຕ້ອງ ເຊິ່ງອອກຊື່ ທ້າວ ລໍ່ປາວລໍ່, ບ້ານທ່າດີນແດງໃຕ້ ເມືອງໄຊທານີ ນະຄອນຫຼວງວຽງຈັນ ໝາຍເລກທະບຽນ ກຈ 0751 ກໍາແພງນະຄອນຫຼວງວຽງຈັນ ທີ່ ທ່ານ ຫງຽນຫວັນຮົນ ຊື້ມານຳໃຊ້ເພື່ອສົ່ງເຄື່ອງໃນຮ້ານຂາຍເຄື່ອງກໍ່ສ້າງ.

ສະນັ້ນມາໃນວັນທີ 11 ເມສາ 2022 ເຈົ້າໜ້າທີ່ພະແນກສືບສວນ-ສອບສວນ ປກສ ແຂວງວຽງຈັນ ຈຶ່ງໄດ້ນຳເອົາລົດຮຸນໄດຄັນດັ່ງກ່າວມາມອບຄືນໃຫ້ເຈົ້າຂອງເດີມ ຕາງໜ້າມອບລົດຈັກດັ່ງກ່າວໂດຍແມ່ນ ທ່ານ ພັທ ແສງເພັດ ສຸທຳມະວົງ ຫົວໜ້າພະແນກຕໍາຫຼວດສືບສວນ-ສອບສວນ ຫ້ອງຕຳຫຼວດ ປກສ ແຂວງວຽງຈັນ ຕາງໜ້າຮັບໂດຍແມ່ນ ທ່ານ ຫງຽນຫວັນຮົນ ອາຊີບຄ້າຂາຍ ພັກເຊົາຢູ່ບ້ານໂພນແຮ່ ເມືອງທຸລະຄົມ ແຂວງວຽງຈັນ ໂອກາດດຽວກັນນີ້ເຈົ້າຂອງຊັບກໍ່ໄດ້ສະແດງຄວາມຂອບອົກຂອບໃຈມາຍັງເຈົ້າໜ້າທີ່ ທີ່ໄດ້ເອົາໃຈໃສ່ປະຕິບັດໜ້າທີ່ວຽກງານຈົນສາມາດເກັບກູ້ລົດຄັນດັ່ງກ່າວຄືນມາໄດ້ ແລະ ທ່ານ ພັທ ແສງເພັດ ສຸທຳມະວົງ ຫົວໜ້າພະແນກສືບສວນ-ສອບສວນ ຫ້ອງຕຳຫຼວດ ປກສ ແຂວງວຽງຈັນ ຍັງໄດ້ຮຽກຮ້ອງໃຫ້ເຈົ້າຂອງຊັບຈົ່ງເອົາໃຈໃສ່ໃນການປົກປັກຮັກສາວັດຖຸສິ່ງຂອງທີ່ມີຄ່າໄວ້ໃຫ້ດີເພື່ອບໍ່ໃຫ້ຄົນບໍ່ດີສວຍໂອກາດລັກຊັບຂອງທ່ານພ້ອມນັ້ນຍັງໄດ້ຮຽກຮ້ອງໃຫ້ພໍ່ແມ່ປະຊາຊົນບັນດາເຜົ່າຈົ່ງຊ່ວຍກັນເປັນຫູເປັນຕາຊ່ວຍເຈົ້າໜ້າທີ່.

#ຂ່າວ ປກສ ແຂວງວຽງຈັນ: ຈັນດາລາ

ຕາມການລາຍງານຂອງ ອຸດສາຫະກຳ ແລະ ການຄ້າ ນະຄອນຫຼວງ ໃນວັນທີ 12 ເມສາ ໃຫ້ຮູ້ວ່າ: ເຈົ້າໜ້າທີ່ກວດກາການຄ້າ ພະແນກ ອຸດສາຫະກໍາ ແລະ ການຄ້າ ນະຄອນຫຼວງວຽງຈັນ, ຫ້ອງການອຸດສາຫະກໍາ ແລະ ການຄ້າ ເມືອງສົມທົບກັບພາກສ່ວນກ່ຽວຂ້ອງ ລົງກວດກາ, ຕິດຕາມ ການຈັດຕັ້ງປະຕິບັດແຈ້ງການຂອງພະແນກ ບໍ່ໃຫ້ມີການກັກຕຸນສິນຄ້າ ແລະ ສວຍໂອກາດຂຶ້ນ ລາຄາສິນຄ້າ ໃນໄລຍະບຸນປີໃໝ່ລາວ ພ.ສ. 2565.

.

.

.

.

ຄວາມເສຍຫາຍ ຂອງໂຮງຮຽນປະຖົມຜາແກ້ວ ເມືອງປາກລາຍ ແຂວງໄຊຍະບູລີ ຖືກລົມພາຍຸພັດ.

ຕາມເຟສບຸກ ທ່ານ Chomephon Phonekeo ໃຫ້ຮູ້ວ່າ: ເວລາປະມານ 17:50ໂມງ ຂອງວັນທີ 11 ເມສາ 2022 ໂຮງຮຽນປະຖົມຜາແກ້ວ ເມືອງປາກລາຍ ແຂວງໄຊຍະບູລີ ຖືກລົມພາຍຸພັດຄວາມ ເຮັດໃຫ້ອາຄານຮຽນເສຍຫາຍພໍສົມຄວນ.

.

.

.

.

ສຳລັບລາຍງານຜູ້ບາດເຈັບແມ່ນຍັງບໍ່ທັນມີລາຍງານເຂົ້າມາ.

ຫາກທ່ານໃດຢາກປະກອບສ່ວນໃນການສ້ອມແປງຫຼັງຄາຂອງໂຮງຮຽນຄືນໃໝ່ແມ່ນພົວພັນນຳການຈັດທີ່ກຽ່ວຂ້ອງໄດ້ຕະຫລອດ24ຊົ່ວໂມງ.

ຕາມການລາຍງານ ຂອງສູນຂ່າວສານການແພດສຸຂະສຶກສາ

ຕາມການລາຍງານ ຂອງກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ໃຫ້ຮູ້ວ່າ ວັນທີ 12/04/2022, ຫຼາຍເມືອງໃນທົ່ວປະເທດມີຝຸ່ນລະອອງຂະໜາດນ້ອຍ 2.5 ໄມຄຣອນ ຫຼື (PM 2.5) ທີ່ມີລະດັບເລີ່ມມີຜົນກະທົບເລັກນ້ອຍຕໍ່ສຸຂະພາບ ຕາມລາຍລະອຽດລຸ່ມນີ້:

.

ພະແນກຈະລາຈອນນະຄອນຫຼວງວຽງຈັນ ນໍາໃຊ້ກໍາລັງ 529 ຄົນ ເພື່ອປະຕິບັດໜ້າທີ່ເຄື່ອນໄຫວລົງກວດກາບັງຄັບໃຊ້ກົດໝາຍ ແລະ ລະບຽບການຈະລາຈອນທາງບົກຢູ່ນະຄອນຫຼວງວຽງຈັນ ໃນໄລຍະບຸນປີໃໝ່ລາວ ພສ 2565 ເພື່ອແນໃສ່ປ້ອງກັນອຸບັດຕິເຫດທີ່ອາດຈະເກີດຂຶ້ນ.

ພັທ ຈັນທະບູນ ມະນີວົງ, ຮອງຫົວໜ້າຫ້ອງຕໍາຫລວດ, ຜູ້ຊີ້ນໍາວຽກງານຈະລາຈອນ, ພະແນກຄວບຄຸມກ້ອງວົງຈອນປິດ ແລະ ພະແນກມອດໄຟນະຄອນຫຼວງວຽງຈັນ ໃຫ້ສໍາພາດຕໍ່ສື່ມວນຊົນໃນຕອນເຊົ້າວັນທີ 11 ເມສາ 2022 ວ່າ: ເພື່ອເຄື່ອນໄຫວລົງກວດກາບັງຄັບໃຊ້ກົດໝາຍ ແລະ ລະບຽບການກ່ຽວກັບການຈະລາຈອນທາງບົກຢູ່ນະຄອນຫຼວງວຽງຈັນ ໃນໄລຍະບຸນປີໃໝ່ລາວ ພສ 2565, ຫ້ອງຕໍາຫລວດ ໄດ້ມອບໃຫ້ພະແນກຈະລາຈອນນະຄອນຫຼວງວຽງຈັນ ສົມທົບກັບຈະລາຈອນ 9 ຕົວເມືອງ ມີກໍາລັງທັງໝົດ 529 ຄົນ ລົງປະຈໍາຕັ້ງດ່ານຢູ່ບັນດາເສັ້ນທາງສໍາຄັນ ມີ 8 ດ່ານ, ຕາມວັດວາອາຮາມ 9 ຈຸດ ແລະ ປະຈໍາປ້ອງຍາມທັງໝົດ 60 ປ້ອມ.

ແບ່ງອອກເປັນ 3 ຈຸດ ເພື່ອສົມທົບກັບ 19 ສະຖານີ 1191 ຢູ່ໃນນະ ຄອນຫຼວງວຽງຈັນ ເຄື່ອນໄຫວກວດກາລາດຕະເວນຢູ່ຕາມເສັ້ນທາງຕ່າງໆ ທັງກາງເວັນ ແລະ ກາງຄືນ ເພື່ອເຮັດໃຫ້ການສະເຫລີມສະຫຼອງບຸນປີໃໝ່ລາວຢູ່ນະຄອນຫຼວງວຽງຈັນ ປີນີ້ ຖືກຕ້ອງ ແລະ ຮັກສາໄດ້ຮີດຄອງປະເພນີອັນດີງາມຂອງຊາດ, ທັງຮັບປະກັນຄວາມເປັນລະບຽບຮຽບຮ້ອຍ ແລະ ເຮັດໃຫ້ການສັນຈອນໄປ-ມາ ມີຄວາມສະດວກສະບາຍ.

ສໍາລັບເຈົ້າໜ້າທີ່ຕໍາຫຼວດຈະລາຈອນນະຄອນຫຼວງວຽງຈັນ ໄດ້ເລີ່ມປະຈໍາຢູ່ຈຸດຕ່າງໆ ຕາມການມອບໝາຍໃນລະຫວ່າງວັນທີ 11-17 ເມສານີ້ ເຊິ່ງ ພັທ ຈັນທະບູນ ມະນີວົງ ຮຽກຮ້ອງໃຫ້ຜູ້ນໍາໃຊ້ລົດໃຊ້ຖະໜົນພາຍໃນນະຄອນຫຼວງວຽງຈັນ ເອົາໃຈໃສ່ປະຕິບັດຕາມກົດໝາຍຈະລາຈອນ ກໍຄື ລະບຽບການ ແລະ ການແນະນໍາຂອງເຈົ້າໜ້າທີ່ກ່ຽວຂ້ອງຢ່າງເຂັ້ມງວດ ແລະ ມີສະຕິທຸກຄົນໃນການຂັບຂີ່ ເພື່ອແນໃສ່ປ້ອງກັນສະພາບອຸບັດຕິເຫດທີ່ອາດຈະເກີດຂຶ້ນຕາມທ້ອງຖະໜົນໃນໄລຍະສະເຫຼີມສະຫຼອງຕ້ອນຮັບປີໃໝ່ລາວ ພສ 2565 ເຊີ່ງຈະນໍາໄປສູ່ການສູນເສຍຊີວິດ ແລະ ຊັບສິນ.

ສໍາລັບອຸບັດຕິເຫດໃນປີກາຍນີ້, ນະຄອນຫຼວງວຽງຈັນ ໃນໄລຍະການສະເຫຼີມສະຫຼອງບຸນປີໃໝ່ລາວ ພສ 2564 ນັບແຕ່ວັນທີ 14-16 ເມສາ 2021 ມີອຸບັດຕິເຫດເກີດຂຶ້ນທັງໝົດ 18 ກໍລະນີ, ມີຜູ້ເສຍຊີວິດຈຳນວນ 8 ຄົນ, ຍິງ 1 ຄົນ, ເມືອງທີ່ເກີດຫຼາຍກວ່າໝູ່ແມ່ນ ເມືອງສີໂຄດຕະບອງ ແລະ ເມືອງໄຊທານີ ເກີດຂຶ້ນເມືອງລະ 5 ກໍລະນີ.

ແຫຼ່ງຂ່າວ: Lao National Radio