ກອງປະຊຸມສ້າງຄວາມເຂັ້ມແຂງໃນການສຳຫຼວດ ແລະ ອະນຸລັກຊີວະນາໆພັນພູເບ້ຍລະຫວ່າງຄະນະວິທະຍາສາດທຳມະຊາດ ມະຫາວິທະຍາໄລແຫ່ງຊາດ (ມຊ) ແລະ ບໍລິ ສັດກຸ່ມຄຳໄພ ຊະນະ ຈຳກັດຜູ້ດຽວ (KPG) ຈັດຂຶ້ນໃນວັນ ທີ 04.03.2022 ທີ່ຫ້ອງປະຊຸມແຂວງໄຊສົມບູນ (ຊສບ) ໂດຍການເຂົ້າຮ່ວມຂອງທ່ານ ສົມບູນ ຄຳຕາງ ຮອງຫົວໜ້າຫ້ອງວ່າການແຂວງ ຊສບ, ທ່ານ ຄຳໄພ ສົມຊະນະ ປະທານ KPG ແລະ ທ່ານ ປ.ອ ແຫຼມທອງ ລັດດາວົງ ຮອງຄະນະບໍດີຄະນະວິທະຍາສາດທຳມະຊາດ ມຊ ແລະພາກສ່ວນ ທີ່ກ່ຽວຂ້ອງ.

ທ່ານ ຄຳໄພ ສົມຊະນະ ປະທານ KPG ໃຫ້ຮູ້ວ່າ: ແຫຼ່ງທ່ອງທ່ຽວອະນຸລັກທຳມະຊາດ ສະຫວັນທະເລ ໝອກພູເບ້ຍ ຊສບ ເປັນການພັດທະນາແຫຼ່ງທ່ອງທ່ຽວ ແບບອານຸລັກທຳມະຊາດ ເປັນມິດກັບສິ່ງແວດລ້ອມ ຕາມທິດສີຂຽວ ແລະ ຍືນຍົງ ຊຶ່ງເຊັນສັນຍາສຶກສາສຳຫຼວດ ແຕ່ປີ 2019 ເປັນຕົ້ນມາ ແລະໃນປີ 2020 ກໍ່ໄດ້ເປີດຂະບວນຄາລະວານ ພີຊິດຂຶ້ນຈອມພູເບ້ຍ ຊຶ່ງມີຫຼາຍຂະບວນການໂດຍສະເພາະ ຂະບວນຂອງບັນດາການນຳຂັ້ນສູງ; ມາຮອດປະຈຸບັນທາງບໍລິສັດ ກຳລັງຕັດທາງບ່ອນ ທີ່ມີຄວາມສູງຊັນ ເປັນທາງເບຕົງໄລຍະ 20 ກິໂລແມັດໄປຫາປ່າກ້ວຍ ເພື່ອຂຶ້ນໄປຈອມພູເບ້ຍ.

ການຮ່ວມມື ລະຫວ່າງຄະນະວິທະຍາສາດທຳມະຊາດ ມຊ ແລະ KPG ເພື່ອສຶກສາສຳຫຼວດ, ເກັບກຳຂໍ້ມູນ ແລະ ຄົ້ນຄວ້າວິໃຈຊັບພະຍາກອນທຳມະຊາດ ແລະ ຊີວະນາໆພັນ ທີ່ເກີດຂຶ້ນ ແລະ ມີຢູ່ນຳທຳມະຊາດ ເປັນຕົ້ນ: ພືດພັນນາໆຊະນິດ, ຕົ້ນໄມ້,ສັດ, ສະພາບແວດລ້ອມອາກາດ, ດິນ ແລະ ແຫຼ່ງນຳ້ ທີ່ຢູ່ໃນຂອບເຂດບໍລິເວນດັ່ງກ່າວ ເພື່ອເປັນຂໍ້ມູນປະກອບໃສ່ບົດວິພາກເສດຖະກິດໃຫ້ KPG ເພື່ອກະ ກຽມເຊັນສັນຍາພັດທະນາເປັນແຫຼ່ງທ່ອງທ່ຽວ ອະນຸລັກທຳມະຊາດ ສະຫວັນທະເລໝອກ ພູເບ້ຍ ຕາມຂັ້ນຕອນຢ່າງເປັນທາງການໃນຕໍ່ໜ້າ ຊຶ່ງເປັນການປະກອບສ່ວນທີ່ສຳຄັນ ເຂົ້າໃນການພັດທະນາເສດຖະກິດ-ສັງຄົມ ໃຫ້ແກ່ແຂວງ ຊສບ ແລະ ພາຍຫຼັງໂຄງການນີ້ສຳເລັດແລ້ວ ຈະກາຍເປັນແຫຼ່ງທ່ອງທ່ຽວ ທີ່ສວຍງາມທີ່ສຸດຂອງປະເທດ ສົມດັ່ງຂະໜານນາມວ່າ: “ຫຼັງຄາຂອງປະເທດລາວ” ຈະກາຍເປັນ ທີ່ດຶງດູດໃຫ້ແກ່ນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າມາທ່ຽວຊົມແຂວງ ຊສບ ໃຫ້ຫຼາຍຂຶ້ນ.

ຫຼັງຈາກນັ້ນຄະນະທິມງານນັກຄົ້ນຄ້ວາ ມຊ ແລະ ທິມງານ KPG ກໍ່ໄດ້ພ້ອມກັນເດີນທາງຂຶ້ນຍອດພູເບ້ຍ ເພື່ອສຶກ ສາສຳຫຼວດ, ເກັບກຳຂໍ້ມູນ ແລະ ຄົ້ນຄົ້ວວິໃຈຕົວຈິງ ແລະຍັງຈະໄດ້ສືບຕໍ່ສຳຫຼວດຂໍ້ມູນ ເຂດຍອດນຳ້ຈັ້ງ ແລະ ວັງນຳ້ຂຽວ ຕື່ມອີກ.

ແຫຼ່ງຂ່າວ: ສະມາຄົມນັກຂ່າວແຫ່ງ ສ ປ ປ ລາວ

ຮູບພາບພູເບຍຈາກ: ໝໍແຂ້ວພາທ່ຽວ

ຕາມການລາຍງານຂອງປ້ອງກັນຄວາມສະຫງົບນະຄອນຫຼວງວຽງຈັນໃຫ້ຮູ້ວ່າ: ກຸ່ມຄ້າຂາຍ ແລະ ມົ້ວສຸມເສບຢາເສບຕິດ ຢູ່ເຂດບ້ານທົ່ງຂັນ ຄຳ ເມືອງຈັນທະບູລີ ນະຄອນຫຼວງວຽງຈັນ ທັງ 6 ຄົນ, ຖືກເຈົ້າໜ້າທີ່ ປກສ ກຸ່ມທົ່ງຕູມສົມທົບກັບບ້ານ ລົງແກ້ໄຂ ພາຍຫຼັງທີ່ໄດ້ຮັບຂໍ້ມູນ ທີ່ໜ້າເຊື່ອຖືຈາກຜູ້ຫວັງດີ, ເຊິ່ງຜ່ານການລົງແກ້ໄຂພົບໄວລຸ້ນ 6 ຄົນ, ຍິງ 3 ຄົນ ພ້ອມຢາບ້າອີກ 53 ເມັດ ມາດໍາເນີນການສອບປາກຄໍາເບື້ອງຕົ້ນໃນວັນທີ 7 ກຸມພາ 2022.

ຜ່ານການສອບພວກກ່ຽວທັງ 6 ຄົນ ຮັບສາລະພາບວ່າ: ຢາບ້າ 53 ເມັດ ເປັນຂອງພວກກ່ຽວແທ້ ແລະ ໄດ້ຮ່ວມກັນມົ້ວສຸມເສບຢາເສບຕິດ, ອີກສາເຫດໜຶ່ງທີ່ພາໃຫ້ພວກກ່ຽວມີການມົ້ວສຸມໄດ້ໃຫ້ຂໍ້ມູນວ່າ: ຍ້ອນມີຄວາມອິດເມື່ອຍຈາກການເຮັດວຽກ ຕໍ່ກັບກຸ່ມຄົນດັ່ງກ່າວ ເຈົ້າໜ້າທີ່ ປກສ ກຸ່ມ ໄດ້ນຳສົ່ງໃຫ້ກອງບັນຊາການ ປກສ ເມືອງຈັນທະບູລີ ສືບຕໍ່ດຳເນີນຄະດີຕາມຂັ້ນຕອນຂອງກົດໝາຍ.

ຖ້າພົບເຫັນການກະທຳທີ່ຜິດຕໍ່ລະບຽບກົດໝາຍ ໃຫ້ແຈ້ງຕໍ່ເຈົ້າໜ້າທີ່ ຫຼື ວອັດແອັບເບີ 020 28899774 ຫຼື ເຟັສ໌ບຸກປ້ອງກັນຄວາມສະຫງົບ ນະຄອນຫຼວງວຽງຈັນ.

ຕາມການລາຍງານຂອງປ້ອງກັນຄວາມສະຫງົບນະຄອນຫຼວງວຽງຈັນໃຫ້ຮູ້ວ່າ: ກອງບັນຊາການ ປກສ ເມືອງໄຊທານີ ສົມທົບກັບຫ້ອງຕຳຫຼວດ ປກສ ນະຄອນຫຼວງວຽງຈັນ ແກ້ໄຂເປົ້າໝາຍຄ້າຂາຍຢາເສບຕິດ ພາຍຫຼັງເປີດກວ້າງ ຕາມການຊັດທອດ ເຖິງຜູ້ຮ່ວມກະທຳຜິດຢູ່ບ້ານຄົກເພີງ ເມືອງສັງທອງ ກັກຕົວໄດ້ 3 ຄົນຊື່ ນາງ ຫັດສະດີ ອາຍຸ 29 ປີ ຄ້າຂາຍ, ນາງ ລັດສະໝີ ອາຍຸ 28 ປີ ຄ້າຂາຍ ແລະ ທ້າວ ປ໋ອບປີ້ ອາຍຸ 28 ປີ ທັງສາມຄົນຢູ່ບ້ານຄົກເພີງ ພ້ອມຢາບ້າ 8.000 ເມັດ ໃນວັນທີ 19 ກຸມພາ 2022.

ຜ່ານການສືບສວນ-ສອບສວນ ພວກກ່ຽວຮັບສາລະພາບວ່າ: ໃນທ້າຍປີ 2021 ໄດ້ມີການ ວາງແຜນຄ້າຂາຍຢາເສບຕິດ, ແຕ່ຍັງບໍ່ທັນໄດ້ລົງມືເຮັດ ຕົກມາຮອດວັນທີ 19 ກຸມພາ 2022 ໄດ້ມີໄວລຸ້ນ ໂທຫາ ຈຶ່ງສັ່ງຊື້ຢາບ້າ 8.000 ເມັດ ນຳໍ ນາງ ລັດສະໝີ ເມື່ອໄດ້ຢາບ້າມາແລ້ວ ນາງ ຫັດສະດີ ໄດ້ນຳເອົາມາເກັບຮັກສາໄວ້ຢູ່ເຮືອນ ໂດຍມີທ້າວ ປ໋ອບປີ້ ແຟນຊາຍ ຮູ້ເຫັນເຫດການນຳ ຕໍ່ມາເວລາ 15:30 ໂມງ ຈິ່ງຖືກເຈົ້າໜ້າທີ່ເຂົ້າກັກຕົວພວກກ່ຽວທັງສອງ ຜ່ານການກວດຄົ້ນພົບເຫັນຂອງກາງຈຳນວນດັ່ງກ່າວ, ສ່ວນ ນາງ ລັດສະໝີ ໄດ້ໃຫ້ຮູ້ອີກວ່າ: ພາຍຫຼັງທີ່ນາງ ຫັດສະດີ ໄດ້ໂທສັ່ງຊື້ຢາບ້າຕົນເອງໄດ້ໄປຊື້ຢາບ້ານຳຜູ້ຍິງຄົນໜຶ່ງ ອາຍຸປະມານ 30 ປີ ຢູ່ບ້ານທາດຫຼວງເໜືອ ຈຳນວນ 8.000 ເມັດ ແລະ ເອົາໄປສົ່ງໃຫ້ ນາງ ຫັດສະດີ ຈາກນັ້ນ ຈິ່ງກັບມາຂາຍເຄື່ອງຢູ່ຮ້ານປົກກະຕິ ຢູ່ບ້ານຄົກເພີງ ຕົກມາຮອດເວລາ 16: 00 ໂມງ ຂອງວັນດຽວກັນ ຈິ່ງຖືກເຈົ້າໜ້າທີ່ກັກຕົວ.

ປັດຈຸບັນ ກອງບັນຊາການ ປກສ ເມືອງໄຊທານີ ພວມເລັ່ງຕິດຕາມຫາກຸ່ມແກ້ງຮ່ວມຄ້າຂາຍຢາເສບຕິດ ເພື່ອນຳຕົວມາດຳເນີນຄະດີຕາມຂັ້ນຕອນຂອງກົດໝາຍ.

ດອນຊາຍມຸງຄຸນ ແຂວງຫຼວງພະບາງ ກຽມພ້ອມເປີດເປັນແຫຼ່ງທ່ອງທ່ຽວ ແລະ ຈັດກິດຈະກໍາບຸນປີໃໝ່ລາວ.

ໂຄງການກໍ່ສ້າງຟື້ນຟູດອນຊາຍມຸງຄຸນ ເມືອງຈອມເພັດ ນະຄອນ-ຫຼວງພະບາງ ແຂວງຫຼວງພະບາງ ໄດ້ເລີ່ມລົງມືກໍ່ສ້າງມາແຕ່ຕົ້ນປີ 2022 ໂດຍແມ່ນ ບໍລິສັດ ຊໍການຊ່າງ (ປະເທດໄທ) ເປັນຜູ້ຮັບເໝົາຟຶ້ນຟູກໍ່ສ້າງໃນເນື້ອທີ່ 1,16 ເຮັກຕາ, ມີຂະນາດ 337×47 ແມັດ, ມີຂັ້ນໄດຂຶ້ນ 6 ຈຸດ, ເບື້ອງລະ 3 ບ່ອນ, ມີຂະໜາດ 8×5 ແມັດ ລວມມູນຄ່າການກໍ່ສ້າງທັງໝົດ 55 ລ້ານບາດ (ສະກຸນເງິນໄທ) ມາຮອດປັດຈຸບັດແມ່ນສໍາເລັດ 100% ແລະ ໄດ້ຈັດພິທີມອບ-ຮັບຢ່າງເປັນທາງການ.

ທ່ານ ບຸນຄົງ ສຸກສະຫວັດ ຮອງຫົວໜ້າພະແນກໂຍທາທິການ ແລະ ຂົນສົ່ງແຂວງ ທັງເປັນຄະນະຮັບຜິດຊອບໂຄງການກໍ່ສ້າງຟຶື້ນຟູດອນຊາຍມຸງຄຸງ ໄດ້ລາຍງານວ່າ: ດອນຊາຍມຸງຄຸນ ເປັນໜຶ່ງດອນ ຢູ່ກາງແມ່ນໍ້າຂອງຂ້ອນໄປເບື້ອງເມືອງຈອມເພັດ ຊຶ່ງເປັນສະຖານທີ່ຈັດກິດຈະກໍາການຫຼິ້ນບຸນປີໃໝ່ລາວ ຂອງຊາວຫຼວງພະບາງ ໃນທຸກໆປີ. ສໍາລັບດອນທີ່ກໍ່ສ້າງກວມເນື້ອທີ່ທັງໝົດແມ່ນ 1,16 ເຮັກຕາ, ດອນທີ່ສ້າງໃໝ່ໄດ້ຖົມດິນປະສົມຫີນອັດ ແໜ້ນທັງໝົດ 66.716 ແມັດກ້ອນ, ການກໍ່ສ້າງແບ່ງອອກເປັນ 4 ໄລຍະ, ຄືໄລຍະ A, B, C ແລະ D. ມີການອອກແບບໃຫ້ມີຄວາມເນີນ, ຄວາມສູງ ເພື່ອບໍ່ໃຫ້ນໍ້າຖ້ວມ, ຕາມການຄິດໄລ່ແມ່ນ 30 ປີໃດຈະມີນໍ້າຖ້ວມເທື່ອໜຶ່ງ.

ພິທີມອບ-ຮັບ ໂຄງການຟື້ນຟູ ດອນຊາຍມຸງຄຸນ ໄດ້ຈັດຂຶ້ນຫວ່າງບໍ່ດົນມານີ້, ໂດຍການເຂົ້າຮ່ວມຕັດແຖບຜ້າຂອງ ທ່ານ ສົມສະຫວາດ ເລັ່ງສະຫວັດ ອະດີດຮອງນາຍົກລັດຖະມົນຕີ, ທ່ານ ຄໍາຂັນ ຈັນທະວີສຸກ ເຈົ້າແຂວງຫຼວງພະບາງ ພ້ອມດ້ວຍແຂກຖືກເຊີນ ແລະ ພະແນກການກ່ຽວຂ້ອງເຂົ້າຮ່ວມ.

ແຫຼ່ງຂ່າວ: ປະຊາຊົນ

ປີ 2021 ຜ່ານມານີ້, ມູນຄ່າການນໍາເຂົ້າ ແລະ ສົ່ງອອກສິນຄ້າຂອງ ແຂວງສາລະວັນ ສາມາດປະຕິບັດໄດ້ທັງຫມົດ 1.669,28 ຕື້ກວ່າກີບ ໃນນັ້ນ: ສິນຄ້ານໍາເຂົ້າ ປະຕິບັດໄດ້ 158,60 ຕື້ກວ່າກີບ, ເທົ່າກັບ 93,20% ຂອງແຜນການປີ ແລະ ສິນຄ້າສົ່ງອອກ: ປະຕິບັດໄດ້ 1.510,68 ຕື້ກວ່າກີບ, ທຽບໃສ່ປີ 2020 ເພີ່ມຂື້ນ 17,42%, ລື່ນແຜນການປີທີ່ວາງໄວ້ 38,43%.

ທ່ານ ຄໍາຜ່ານ ສີລາວີ, ຫົວໜ້າພະແກນອຸດສາຫະກໍາ ແລະ ການຄ້າ ແຂວງສາ ລະວັນ ໃຫ້ສໍາພາດວ່າ: ສິນຄ້າສົ່ງ ອອກທີ່ສໍາຄັນຂອງ ແຂວງສາລະວັນ ຕົ້ນຕໍແມ່ນ: ກາເຟ, ຮອງລົງມາແມ່ນມັນຕົ້ນ, ເປັນສິນຄ້າທີ່ມາແຮງຫລາຍ ເຊີ່ງປີ ຜ່ານມາສາມາດສົ່ງອອກໄດ້ເກືອບ 1 ລ້ານໂຕນ, ຕໍ່ມາ ແມ່ນໝາກກ້ວຍ ແລະ ສິນຄ້າຕາມລະດູການ ເປັນຕົ້ນ: ໝາກອຶ, ຖົ່ວດິນ ແລະ ສິນຄ້າອື່ນໆ. ນອກຈາກນີ້ ແມ່ນຜະ ລິດຕະພັນໄມ້ຕາມລະບຽບຂອງລັດຖະບານ ຄື: ຜະລິດ ຕະພັນໄມ້ຄຸ້ມຄອງ 2 ແລະ 3 ໃຫ້ສົ່ງອອກເປັນໄມ້ແປຮູບ ແລະ ໃຫ້ຜູ້ປະກອບການເສຍຄ່າພາສີສົ່ງອອກ 15% ແລະ 30% ເພື່ອປິດບັນຊີໄມ້ທີ່ຍັງຄ້າງຢູ່ໂຮງງານຕ່າງໆ.

ສໍາລັບຕະຫລາດສົ່ງອອກສິນຄ້າຕົ້ນຕໍແມ່ນ ໄທ, ຫວຽດນາມ, ຈີນ ແລະ ກໍາປູເຈຍ. ສ່ວນສິນຄ້ານໍາເຂົ້າ ແມ່ນສິນຄ້າອຸປະໄພກ-ບໍລິໂພກ ແລະ ເຄື່ອງກໍ່ສ້າງທີ່ບໍ່ສາມາດຜະລິດໄດ້ພາຍໃນປະເທດ ທີ່ນໍາເຂົ້າຈາກຫວຽດນາມ ແລະ ໄທ ເປັນສ່ວນໃຫຍ່.

ທ່ານ ຄໍາຜ່ານ ສີລາວີ ໃຫ້ຮູ້ຕື່ມວ່າ: ປັດຈຸບັນ ຍ້ອນຂະ ແໜງການທີ່ກ່ຽວຂ້ອງຂອງແຂວງ, ບວກກັບວິຊາການຈາກກະຊວງທີ່ກ່ຽວຂ້ອງໄດ້ໄປສົມທົບເອົາໃຈໃສ່ຊຸກຍູ້ສົ່ງເສີມປະຊາຊົນທໍາການຜະລິດຕາມທ່າແຮງ ແລະ ຄວາມເໝາະສົມຂອງແຕ່ລະທ້ອງຖິ່ນໃນແຕ່ລະໄລຍະ ນັບມື້ເປັນຂະບວນກວ້າງຂວາງກວ່າເກົ່າ ຈິ່ງເຮັດໃຫ້ແຂວງສາລະວັນ ສາມາດຢຸດການນໍາເຂົ້າສິນຄ້າທີ່ປະຊາຊົນສາມາດຜະລິດໄດ້ ແລະ ເຮັດໃຫ້ນໍາເຂົ້າແຕ່ສິນຄ້າທີ່ບໍ່ສາມາດຜະລິດໄດ້ເທົ່ານັ້ນ. ປັດຈຸບັນ ອົງການປົກຄອງແຂວງ ພວມສົມທົບກັບກະຊວງອຸດສາຫະກໍາ ແລະ ການຄ້າ ເພື່ອສ້າງເງື່ອນໄຂໃຫ້ສິນຄ້າຈາກແຂວງສາລະວັນ ສາມາດເຂົ້າເຖີງຕະຫລາດໃນປະເທດຈີນໃຫ້ຫລາຍຂຶ້ນກວ່າເກົ່າ ເນື່ອງຈາກນັກທຸລະ ກິດຈີນໃຫ້ຄວາມສົນໃຈສິນຄ້າຫລາຍຊະນິດ.

ສໍາລັບຄາດໝາຍໃນການນໍາເຂົ້າ ແລະ ສົ່ງອອກສິນຄ້າໃນປີ 2022, ໂດຍຕິດພັນກັບການຈັດຕັ້ງປະຕິບັດ ແລະ ຜັນຂະຫຍາຍວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ, ແຂວງສາລະວັນ ຈະໄດ້ສຸມໃສ່ຊຸກຍູ້ສົ່ງເສີມອໍານວຍຄວາມສະດວກທາງດ້ານການຄ້າໃຫ້ແກ່ຫົວຫນ່ວຍທຸລະກິດໃນການນໍາເຂົ້າ ແລະ ສົ່ງອອກສິນຄ້າ, ການເຈລະຈາເປີດຕະຫຼາດສົ່ງອອກສິນຄ້າທີ່ມີທ່າແຮງ ໂດຍສະ ເພາະແມ່ນສິນຄ້າກະສິກໍາ ເຊີ່ງຈະສູ້ຊົນເຮັດໃຫ້ມຸນຄ່າການນໍາເຂົ້າ ແລະ ສົ່ງ ອອກ ບັນລຸໄດ້ 1.244,61 ຕື້ກວ່າກີບ, ໃນນັ້ນ: ມູນຄ່າການໍາເຂົ້າໃຫ້ບັນລຸ 175,61 ຕື້ກວ່າກີບ ແລະ ມູນຄ່າການສົ່ງ ອອກ ໃຫ້ບັນລຸ 1.068,99 ຕື້ກວ່າກີບ.

ແຫຼ່ງຂ່າວ: Lao National Radio