ໃນຕອນເຊົ້າວັນທີ 1 ພະຈິກ 2021 ທີ່ນະຄອນ ຫລວງວຽງຈັນ, ໃນວາລະການດຳເນີນກອງປະຊຸມສະໄໝສາມັນ ເທື່ອທີ 2 ຂອງສະພາແຫ່ງຊາດ ຊຸດທີ IX, ທ່ານ ບຸນໂຈມ ອຸບົນປະເສີດ ລັດຖະມົນຕີກະຊວງການເງິນ ໄດ້ລາຍງານ ກ່ຽວກັບການຈັດ ຕັ້ງປະຕິບັດແຜນງົບປະມານແຫ່ງລັດປະຈຳປີ 2021 ແລະ ແຜນການ ປະຈຳປີ 2022 ວ່າ: ການຈັດຕັ້ງປະຕິບັດແຜນງົບປະມານແຫ່ງລັດ 10 ເດືອນຜ່ານມາ ເຫັນວ່າມີຄວາມທ້າທາຍຫລາຍສົມຄວນ, ແຕ່ເຖິງຢ່າງກໍຕາມ ກະຊວງການເງິນ ກໍໄດ້ມີຄວາມພະຍາຍາມໃນການປະສານສົມທົບກັບຂະແໜງການສູນກາງແລະທ້ອງຖິ່ນ ເພື່ອຕິດຕາມ, ຊຸກຍູ້ຈັດເກັບລາຍຮັບໃນຂອບເຂດທົ່ວປະເທດ, ໂດຍສະເພາະການຂຸດຄົ້ນແຫລ່ງລາຍຮັບໃໝ່ ຈາກຂະແໜງບໍ່ແຮ່, ການລະດົມພາກທຸລະກິດເຂົ້າ ຮ່ວມ ຮຸ້ນໃນລັດວິສາຫະກິດ, ເງິນປັນຜົນເພີ່ມອີກຈຳນວນໜຶ່ງ ແລະ ອື່ນໆ, ເຊິ່ງສາມາດຄາດຄະເນລາຍຮັບໝົດປີຈະສາມາດປະຕິບັດໄດ້ ປະມານ 26.957 ຕື້ກີບ, ເທົ່າກັບ 98% ຂອງແຜນການປີ.

ພ້ອມດຽວກັນນັ້ນ, ກະຊວງການເງິນ ຈະໄດ້ສືບຕໍ່ສຸມໃສ່ການຈັດຕັ້ງປະຕິບັດບັນດາລາຍຈ່າຍ ທີ່ຈຳເປັນ ແລະ ບູລິມະສິດຂອງລັດຖະບານ ໂດຍສະ ເພາະລາຍຈ່າຍເງິນເດືອນ, ເງິນບໍລິຫານ, ຊຳລະໜີ້ສິນ,ປ້ອງກັນພະຍາດໂຄວິດ-19 ໃຫ້ສາມາດເຄື່ອນ ໄຫວໄດ້ເປັນປົກກະຕິ,ພ້ອມທັງຄົ້ນຄວ້າຫລຸດລາຍ ຈ່າຍ, ສະລໍລາຍຈ່າຍ ແລະ ເລື່ອນຈ່າຍບາງຮ່ວງລາຍຈ່າຍຈຳນວນໜຶ່ງ ຂອງຂະແໜງການຂັ້ນສູນ ກາງ 15%, ທ້ອງຖິ່ນ 10% ແລະ ບາງລາຍຈ່າຍ ຂອງລັດຖະບານທີ່ເຫັນວ່າບໍ່ຈຳເປັນ ເຊິ່ງສາມາດຫລຸດຜ່ອນ (ປະຢັດ) ໄດ້ປະມານ 558 ຕື້ກີບ.

ແຕ່ເຖິງຢ່າງໃດກໍ່ຕາມ ເຫັນວ່າຍັງມີຄວາມຈຳເປັນຕ້ອງໄດ້ດັດສະເລ່ຍເພີ່ມໃສ່ບາງລາຍຈ່າຍ ທີ່ເປັນບູລິມະສິດ ຕາມນະໂຍບາຍຂອງລັດຖະບານ ເປັນຕົ້ນ: ເພີ່ມລາຍຈ່າຍເງິນແຮລັດຖະບານ ເພື່ອສືບຕໍ່ຮັບມືກັບພະຍາດໂຄວິດ-19 ແລະ ໄພພິບັດ 50 ຕື້ກີບ,ເພີ່ມແຜນລາຍຈ່າຍເງິນເດືອນແລະເງິນນະໂຍ ບາຍ ຕາມການສະເໜີ ຂອງບັນດາຂະແໜງການ ແລະ ທ້ອງຖິ່ນ ປະມານ 100 ກວ່າຕື້ກີບ ແລະ ຈັດສັນແຜນລາຍຈ່າຍເງິນບຳເນັດເກັບລາຍຮັບເກີນແຜນຂອງທ້ອງຖິ່ນ ປີ 2020 ປະມານ 408 ຕື້ກີບ ຕາມມາດຕາ 49 ຂອງກົດໝາຍ ວ່າດ້ວຍງົບປະ ມານແຫ່ງລັດ. ສ່ວນການຂາດດຸນງົບປະມານ ບົນພື້ນຖານ ການຄາດຄະເນລາຍຮັບຈະບໍ່ໄດ້ 2% ຫລື ປະມານ 670 ຕື້ກີບ ຈະເຮັດໃຫ້ການຂາດດຸນເພີ່ມຈາກ 3.955 ຕື້ກີບ ເທົ່າກັບ 2,17% ຂອງ ຈີດີພີ ມາເປັນ 4.626 ຕື້ກີບ ເທົ່າກັບ 2,53% ຂອງ ຈີດີພີ.

ທ່ານ ບຸນໂຈມ ອຸບົນປະເສີດ ກ່າວຕື່ມວ່າ: ສຳ ລັບ ຄວາມຕ້ອງການແຫລ່ງທຶນທັງໝົດ 18.701 ຕື້ກີບ ໃນນັ້ນ, ການດຸນດ່ຽງງົບປະມານໃນປີ 4.626 ຕື້ກີບ, ການທົດແທນຕົ້ນທຶນເງິນກູ້ 14.075 ຕື້ກີບ ໃນນີ້, ການທົດແທນຕົ້ນທຶນເງິນກູ້ພາຍໃນ 4.138 ຕື້ກີບ, ການທົດແທນຕົ້ນທຶນເງິນກູ້ຕ່າງປະເທດ 9.937 ຕື້ກີບ. ສ່ວນແຫລ່ງທຶນເພື່ອມາດຸນດ່ຽງທັງໝົດ 18.701 ຕື້ກີບ.ໃນນັ້ນ ໄດ້ຈາກ ແຫລ່ງທຶນພາຍໃນ 4.778 ຕື້ກີບ, ໃນນີ້, ພັນ ທະບັດ 3.390 ຕື້ກີບ, ມີຍອດເງິນເຫລືອງົບປະ ມານປີ 2020 ຈຳ ນວນ 1.388 ຕື້ກີບ (ລວມມີເງິນບຳເນັດເກີນແຜນຂອງທ້ອງຖິ່ນ 408 ຕື້ກີບ), ໄດ້ຈາກຕ່າງປະເທດ 13.923 ຕື້ກີບ ໃນນີ້: ກູ້ຢືມເປັນໂຄງການເພື່ອການພັດທະນາ 3.986 ຕື້ກີບ, ອອກພັນທະບັດເພື່ອທົດແທນຕົ້ນທຶນຕ່າງປະເທດ 9.937 ຕື້ກີບ.

ທຫລ ດໍາເນີນຫຼາຍນະໂຍບາຍດ້ານສິນເຊື່ອ ຫຼຸດຜົນກະທົບໂຄວິດ ພ້ອມຄຸມອັດຕາແລກປ່ຽນບໍ່ໃຫ້ຜັນຜວນ.

ການລະບາດຂອງພະຍາດໂຄວິດ-19 ທີ່ແກ່ຍາວ ມາເປັນເວລາກວ່າ 2 ປີ ສົມທົບກັບສະ ພາບການເໜັງຕີງ ແລະ ຫຼຸດໂຕນກັນຂອງອັດຕາແລກ ປ່ຽນ ເງິນຕາລະຫວ່າງທາງການ ກັບຕະຫຼາດນອກ, ໄດ້ສົ່ງຜົນກະທົບໂດຍກົງຕໍ່ ລະບົບເສດຖະກິດມະຫາພາກຂອງລັດຖະບານ ແລະ ການດໍາເນີນທຸລະກິດຂອງພາກເອກະຊົນ ລວມເຖິງການດໍາລົງຊີວິດຂອງປະຊາຊົນ.

ສາເຫດຍ້ອນການແຂງຄ່າ ຂອງເງິນຕາຕ່າງປະເທດສະກຸນຫຼັກ, ການເພີ່ມຂຶ້ນຂອງລາຄາຄໍາ, ນໍ້າມັນດິບ, ລາຄາສະບຽງອາຫານຢູ່ຕະຫຼາດສາກົນ, ຄວາມຕ້ອງການໃນການຊໍາລະກັບ ຕ່າງປະເທດຢູ່ໃນລະດັບສູງ ແຕ່ແຫຼ່ງລາຍຮັບຂອງປະເທດຫຼຸດລົງຫຼາຍ ແລະ ກ້າວໄປສູ່ການຂາດດຸນການຄ້າກັບຕ່າງປະເທດສູງສົມຄວນ.

ຕໍ່ສະພາບດັ່ງກ່າວ, ທະນາຄານແຫ່ງ ສປປ ລາວ (ທຫລ) ຈຶ່ງໄດ້ຄົ້ນ ຄວ້າ ແລະ ດໍາເນີນ ຫລາຍນະໂຍບາຍດ້ານສິນເຊື່ອເພື່ອແກ້ໄຂຜົນກະທົບຈາກການລະບາດຂອງພະຍາດໂຄວິດ-19, ພ້ອມທັງເພີ່ມທະວີຄວາມເຂັ້ມງວດໃນການຄຸ້ມຄອງອັດຕາແລກປຽນເງິນຕາບໍ່ໃຫ້ເກີດການຜັນຜວນເໜັງຕີງແຮງ.

ທ່ານ ສອນໄຊ ສິດພະໄຊ ຜູ້ວ່າການທະນາຄານແຫ່ງ ສປປ ລາວ ໄດ້ລາຍງານຕໍ່ກອງປະຊຸມສະໄໝສາມັນເທື່ອທີ 2 ຂອງສະພາແຫ່ງ ຊາດ ຊຸດທີ IX ທີ່ພວມດໍາເນີນມື້ທຳອິດ ທີ 1 ພະຈິກ 2021 ໂດຍຊີ້ໃຫ້ເຫັນວ່າ: 9 ເດືອນຜ່ານມານີ້, ປະເທດເຮົາຍັງຂາດດຸນດ້ານການບໍລິການ ແລະ ຂາດດຸນລາຍຮັບ ຂັ້ນໜຶ່ງກັບຕ່າງປະເທດ ເຮັດໃຫ້ມີກະແສເງິນໄຫລອອກນອກປະເທດປະມານ 303 ລ້ານໂດລາສະຫະລັດ (ປະມານ 34 ລ້ານໂດລາສະຫະລັດຕໍ່ເດືອນ).

ເພື່ອແກ້ໄຂບັນຫາດັ່ງກ່າວ ທຫລ ໄດ້ສືບຕໍ່ປະຕິບັດນະໂຍບາຍເງິນຕາ ຕາມທິດແກ້ໄຂຜົນກະທົບຈາກພະຍາດໂຄວິດ-19 ແລະ ຊຸກຍູ້ການຂະ ຫຍາຍຕົວ ຂອງເສດຖະກິດ ໂດຍໄດ້ດໍາເນີນການຮັກສາອັດຕາດອກເບ້ຍພື້ນຖານຂອງ ທຫລ ໄວ້ໃນລະດັບເທົ່າກັບລະດັບທີ່ມີການປັບຫລຸດໃນຕົ້ນປີຜ່ານມາ, ຮັກສາ ອັດຕາສ່ວນເງິນແຮຝາກບັງຄັບໄວ້ ໃນລະດັບເທົ່າທີ່ມີການປັບຫລຸດໃນເດືອນພຶດສະພາ 2021,ເພື່ອສ້າງເງື່ອນໄຂອໍາ ນວຍດ້ານສະພາບຄ່ອງໃຫ້ແກ່ລະບົບທະນາຄານ. ສືບຕໍ່ປະຕິບັດນະໂຍບາຍສິນເຊື່ອ ເພື່ອຊຸກຍູ້ການຜະລິດ ແລະ ແກ້ໄຂຜົນກະທົບຈາກພະຍາດໂຄວິດ-19 ທີ່ໄດ້ອະນຸມັດທັງໝົດແລ້ວໃຫ້ແກ່ ລູກຄ້າຈໍານວນ 503 ລາຍ, ມາຮອດເດືອນກັນຍາ 2021 ໄດ້ເບີກຖອນນໍາໃຊ້ແລ້ວຫລາຍກວ່າ 1.665 ຕື້ກີບ.

ໃນນັ້ນ, ເປັນສິນເຊື່ອໃຫ້ຂະແໜງກະສິກໍາ, ປູກຝັງ ແລະ ລ້ຽງສັດ ກວມ 58% ຂອງຍອດການປ່ອຍກູ້ທັງໝົດ ແລະ ສ່ວນທີ່ເຫລືອແມ່ນໃຫ້ຂະ ແໜງຫັດຖະກໍາ, ອຸດສາຫະກໍາປຸງແຕ່ງ, ຂະແໜງການ ທ່ອງທ່ຽວ, ການບໍລິການປິ່ນອ້ອມ ແລະ ທຸລະກິດອື່ນໆ ທີ່ສົ່ງເສີມການຜະລິດ ແລະ ການສົ່ງອອກໃນຂອບເຂດທົ່ວປະເທດ ຄື: ນະຄອນ ຫລວງວຽງຈັນ ກວມ 39%, ແຂວງວຽງຈັນ ກວມ 18%, ຈໍາປາສັກ ກວມ 11% ຂອງຍອດການ ປ່ອຍກູ້ທັງໝົດ ແລະ ຢູ່ບັນດາແຂວງອື່ນໆ ໃນທົ່ວປະ ເທດ. ພ້ອມນີ້,ໄດ້ສະໜອງແຫລ່ງທຶນໃຫ້ແກ່ກອງທຶນສົ່ງເສີມວິສາຫະກິດຂະໜາດນ້ອຍ-ກາງ(SME) ຜ່ານກະຊວງການເງິນ ຈໍານວນ 100 ຕື້ກີບ, ໄດ້ປະ ກອບສ່ວນແກ້ໄຂສະພາບຄ່ອງດ້ານງົບປະມານດ້ວຍຫລາຍຮູບການ ຄື: ຈັດຕັ້ງປະມູນຂາຍ ພັນ ທະ ບັດຄັງເງິນໃຫ້ທະນາຄານທຸລະກິດ ແລະ ບັນດາກອງທຶນໄດ້ຈໍານວນ 968 ຕື້ກີບ, ພ້ອມທັງຂາຍພັນທະບັດລັດຖະບານ ຜ່ານຕະຫລາດຫລັກຊັບລາວ ໄດ້ກວ່າ 1.073 ຕື້ກີບ ແລະ 33,3 ລ້ານໂດລາສະຫະລັດ. ປະຕິບັດການແກ້ ໄຂບັນຫາໜີ້ໂຄງການລົງທຶນຂອງລັດ (ບ້ວງ 10.000 ຕື້ກີບ) ດ້ວຍຮູບການ ອວ່າຍໜີ້ 3 ແຈ ເປັນສອງໄລຍະ ເຊິ່ງປະຕິບັດໄດ້ປະມານ 3.300 ຕື້ກີບ ກວມ 82,5% ຂອງແຜນການອວ່າຍໜີ້ 3 ແຈ (ໃນນີ້, ທະນາຄານກາງໄດ້ ຮັບຊື້ພັນທະບັດບ້ວງອວ່າຍໜີ້ 3 ແຈ ຈໍານວນໜຶ່ງ ເພື່ອຊ່ວຍເພີ່ມສະພາບຄ່ອງໃຫ້ແກ່ທະນາຄານທຸລະກິດ ສາມາດສະໜອງສິນເຊື່ອໃຫ້ພາກສ່ວນເສດຖະກິດໄດ້ຫລາຍຂຶ້ນ).

ສ່ວນດ້ານນະໂຍບາຍເງິນຕາ ແມ່ນໄດ້ສືບຕໍ່ນໍາໃຊ້ນະໂຍບາຍອັດຕາແລກປ່ຽນຕາມກົນໄກຕະຫຼາດ ທີ່ມີການຄຸ້ມຄອງ ຂອງລັດ. ໃນນີ້ນະໂຍບາຍ ແລະ ມາດຕະການທີ່ພົ້ນເດັ່ນ ທີ່ໄດ້ປະຕິບັດ ແມ່ນປັບປຸງກົນໄກການຄຸ້ມຄອງຮ້ານແລກປ່ຽນເງິນຕາໃຫ້ຮັດກຸມ ໂດຍໄດ້ຢຸດຮັບການສະເໜີ ແລະ ຢຸດການອອກໃບອະນຸ ຍາດເຄື່ອນໄຫວທຸລະກິດແລກປ່ຽນເງິນຕາໃນ ເດືອນມິຖຸນາ 2021 ແລະ ດໍາເນີນການຫັນຮ້ານແລກປ່ຽນເງິນຕາໄປເປັນຮ້ານ ແລກປ່ຽນຕົວແທນຂອງທະນາຄານທຸລະກິດໃນການແລກປ່ຽນເງິນຕາ.

ມາຮອດ ປັດຈຸບັນ ມີ 419 ແຫ່ງຈາກ 550 ແຫ່ງຂອງຮ້ານແລກປ່ຽນເງິນຕາທັງໝົດໃນ ເມື່ອກ່ອນ ແລະ ຮ້ານທີ່ບໍ່ຫັນເປັນຮ້ານຕົວແທນຂອງທະນາຄານທຸລະກິດແມ່ນ ບໍ່ອະນຸຍາດໃຫ້ເຄື່ອນ ໄຫວແລກປ່ຽນເງິນຕາຕາມລະບຽບກົດໝາຍ. ປັດຈຸບັນ,ກໍາລັງຢູ່ໃນຂັ້ນຕອນຍົກເລີກຖອດ ຖອນ ໃບອະນຸຍາດຂອງບັນດາຮ້ານດັ່ງກ່າວ ແລະ ສືບຕໍ່ດໍາເນີນການຫັນຮ້ານແລກປ່ຽນເງິນຕາໄປຂຶ້ນກັບທະນາຄານທຸລະກິດໃຫ້ສໍາເລັດໃນປີ 2021 ນີ້.

ນອກນີ້, ກໍໄດ້ປັບປຸງກົນໄກການກໍານົດອັດຕາ ແລກປ່ຽນໃນກາງເດືອນກັນຍາ 2021, ສ້າງເງື່ອນໄຂໃຫ້ທະນາຄານທຸລະກິດ ສາມາດເກັບຊື້ເງິນຕາຕ່າງປະເທດໄດ້ຫລາຍຂຶ້ນ ແລະ ເຮັດໃຫ້ສ່ວນຕ່າງລະຫວ່າງອັດຕາແລກປ່ຽນທາງການ ແລະ ຕະຫລາດນອກລະບົບແຄບເຂົ້າ, ໂດຍໄດ້ອະນຸຍາດໃຫ້ທະນາຄານທຸລະກິດ ແລະ ຮ້ານແລກປ່ຽນເງິນຕາ ສາມາດກໍານົດອັດຕາແລກປ່ຽນຂອງຕົນໄດ້ໃນຂອບທີ່ກວ້າງອອກເປັນ ±1,5% ທຽບກັບອັດຕາແລກປ່ຽນອ້າງອີງຂອງທະນາຄານກາງ ຈາກລະດັບ ±0,25% ທີ່ເຄີຍໄດ້ກໍານົດມາແຕ່ປີ 2008. ຜູ້ວ່າການທະນາຄານແຫ່ງ ສປປ ລາວ ໃຫ້ຮູ້ວ່າ: ມາເຖິງປັດຈຸບັນ, ການປະຕິບັດນະໂຍບາຍ ດັ່ງກ່າວເວົ້າໄດ້ວ່າປະສົບຜົນສໍາເລັດຕາມຄາດໝາຍວາງໄວ້ໃນລະດັບດີສົມຄວນ, ເຮັດໃຫ້ສ່ວນຕ່າງລະຫວ່າງອັດຕາແລກປ່ຽນເງິນກີບທຽບເງິນໂດລາຂອງ ທະນາຄານ ແລະ ຕະຫລາດນອກລະບົບແຄບເຂົ້າຢູ່ໃນລະດັບ 17,4% ແລະ ແຄບລົງຕື່ມຢູ່ໃນລະດັບ 13,36% ໃນວັນທີ 31 ຕຸລາ 2021.

ພ້ອມນີ້ ສ່ວນ ຕ່າງລະຫວ່າງອັດຕາແລກປ່ຽນເງິນກີບທຽບເງິນບາດແມ່ນຢູ່ໃນລະດັບທີ່ຕໍ່າກວ່າ 1% ແລະ ຫຍັບເຂົ້າຫາ 0% ຈາກທີ່ເຄີຍກວ້າງອອກສູງສຸດໃນປີນີ້ເຖິງ 6,13% ໃນຕົ້ນເດືອນກໍລະກົດ.

ຂ່າວ: ສຸພາສະຫວັນ ສີຊະນະມຸງຄຸນ.

ນາຍົກລັດຖະມົນຕີ ລາຍງານການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ.

ໃນວາລະການດຳເນີນກອງປະຊຸມສະໄໝສາມັນ ເທື່ອທີ 2 ຂອງສະພາແຫ່ງຊາດ ຊຸດທີ IX ໃນຕອນເຊົ້າວັນທີ 1 ພະຈິກ 2021 ທີ່ນະຄອນຫລວງວຽງຈັນ, ທ່ານ ພັນຄໍາ ວິພາວັນ ນາຍົກລັດ ຖະມົນຕີ ໄດ້ລາຍງານໂດຍສັງເຂບກ່ຽວກັບການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ປະຈຳປີ 2021 ແລະ ແຜນການ ປະຈໍາປີ 2022 ເຊິ່ງໃນໄລຍະ 7 ເດືອນຜ່ານມາ ລັດຖະບານໄດ້ພະຍາຍາມບຸກບືນ, ສູ້ຊົນຢ່າງຕັ້ງໜ້າ ແລະ ເຮັດສຸດຄວາມສາມາດແກ້ໄຂບັນຫາ ໂດຍໄດ້ໃຊ້ມາດຕະການເບື້ອງຕົ້ນຈຳນວນໜຶ່ງເປັນຕົ້ນ ໄດ້ພະຍາຍາມສ້າງລາຍຮັບ, ຄຸ້ມຄອງລາຍຈ່າຍ, ສູ້ຊົນຊຳລະສະສາງໜີ້ສິນທັງພາຍໃນ ແລະ ຕ່າງປະເທດ, ພ້ອມທັງໄດ້ລະດົມການປະ ກອບສ່ວນຂອງຜູ້ປະກອບການພາຍໃນ ເຂົ້າຮ່ວມໃນການຊຳລະສະສາງໜີ້ສິນ ຕໍ່ຕ່າງປະເທດ ສຳເລັດຕາມແຜນການ.

ສາມາດປະຄັບປະຄອງບໍ່ໃຫ້ເສດຖະກິດຕົກຢູ່ໃນສະພາບວິກິດ, ພ້ອມກັນນີ້ ກໍໄດ້ສ້າງພື້ນຖານສຳຄັນຈຳນວນໜຶ່ງ ເພື່ອບືນຕົວກ້າວຕໍ່ໄປ ຄາດວ່າໝົດປີ 2021 ຈີດີພີຈະຂະຫຍາຍຕົວໃນລະດັບ 3% (ມະຕິສະພາ 4% ຂຶ້ນໄປ). ສຳລັບດ້ານລາຍຮັບງົບປະມານ ໃນ 10 ເດືອນຜ່ານມາປະຕິບັດໄດ້ທັງໝົດ 20.436 ຕື້ກີບ ເທົ່າກັບ 74% ຂອງແຜນການປີ ເຊິ່ງເຫັນວ່າຍັງມີຄວາມທ້າທາຍຫລາຍສົມຄວນ ເມື່ອທຽບໃສ່ໄລຍະເວລາທີ່ຍັງເຫລືອ, ແຕ່ລັດຖະບານຈະພະຍາຍາມ ຊຸກຍູ້ການຈັດເກັບລາຍຮັບ ແລະ ຂຸດຄົ້ນແຫລ່ງລາຍຮັບໃໝ່ຈາກຂະແໜງບໍ່ແຮ່, ການລະດົມພາກທຸລະກິດເຂົ້າຮ່ວມຮຸ້ນໃນລັດວິສາຫະກິດ, ເງິນປັນຜົນເພີ່ມອີກຈຳນວນໜຶ່ງ ແລະ ອື່ນໆ ບົນພື້ນຖານນັ້ນ ຈະສາມາດຄາດຄະເນສະເລ່ຍລາຍຮັບ ຈະປະຕິບັດໄດ້ປະມານ 26.957 ຕື້ກີບ, ເທົ່າກັບ 98% ຂອງແຜນການປີ. ສຳລັບດ້ານລາຍຈ່າຍງົບປະມານປະຕິບັດໄດ້ທັງໝົດ 19.012 ຕື້ກີບ, ເທົ່າກັບ 60% ຂອງແຜນການປີ, ລາຍຈ່າຍສ່ວນໃຫຍ່ ແມ່ນການເບີກຈ່າຍເງິນເດືອນ ແລະ ເງິນນະໂຍບາຍຕ່າງໆ ພ້ອມກັນນີ້, ຍັງໄດ້ແກ້ໄຂບັນຫາຮ້ານແລກປ່ຽນເງິນຕາໃຫ້ເຂົ້າສູ່ລະບົບ.ທ່ານ ພັນຄໍາ ວິພາວັນ ຍັງໃຫ້ຮູ້ຕື່ມວ່າ:

ລັດຖະບານຍັງໄດ້ຈັດຕັ້ງປະຕິບັດແຜນງານທີ່ສຳຄັນຈຳນວນໜຶ່ງໃນການສົ່ງເສີມການຜະລິດ, ການແກ້ໄຂໄພວ່າງງານ, ການພັດທະນາຂົງເຂດວັດທະນະ ທຳ-ສັງຄົມ ລວມທັງປະຕິບັດນະໂຍບາຍໃນການເອົາແຮງງານລາວ ທີ່ກັບຄືນປະເທດຍ້ອນການລະບາດຂອງພະຍາດໂຄວິດ-19 ຢູ່ປະເທດໃກ້ຄຽງມີທັງໝົດ 61.497 ຄົນ ຍິງ 28.083 ຄົນ ໃນນີ້ ຜູ້ມີເອກະສານຖືກຕ້ອງ 25.085 ຄົນ. ສຳລັບວຽກງານປ້ອງກັນ ແລະ ຕ້ານການແຜ່ລະບາດຂອງພະຍາດໂຄວິດ-19 ຮອດວັນທີ 1 ພະຈິກ 2021 ມີຜູ້ຕິດເຊື້ອສະສົມ 40.956 ຄົນ, ປະມານ 0,52% ຂອງພົນລະເມືອງ, ກຳລັງປິ່ນປົວ 7.381 ກໍລະນີ, ປິ່ນປົວຫາຍດີຫລາຍກວ່າ 31.000 ກໍລະນີ ແລະ ເສຍຊີວິດ 67 ກໍລະນີ. ສ່ວນການສັກຢາວັກຊິນໃຫ້ປະຊາຊົນ ເຂັມທີ 1 ໄດ້ 3.306.082 ຄົນ ກວມ 45,06% ແລະ ສັກຄົບໂດສ 2.841.465 ຄົນ ກວມ 38,72%.

ຮອດທ້າຍປີ 2021 ນີ້ ຄາດວ່າຈະບັນລຸການສັກວັກຊິນໄດ້ຄົບໂດສບໍ່ຕ່ຳກວ່າ 70%.

ພ້ອມກັນນີ້, ລັດຖະບານຍັງໄດ້ເອົາໃຈໃສ່ປະຕິບັດແນວທາງ ປກຊ-ປກສ ທົ່ວປວງຊົນຮອບດ້ານຂອງພັກຢ່າງຕັ້ງໜ້າ ແລະ ຕໍ່ເນື່ອງ ທັງໄດ້ສຸມໃສ່ຜັນຂະຫຍາຍວາລະແຫ່ງຊາດ ວ່າດ້ວຍບັນຫາຢາເສບຕິດອອກເປັນນິຕິກຳ, ແຜນງານ ແລະ ແບ່ງຄວາມຮັບຜິດຊອບລະອຽດ ເຊິ່ງເລີ່ມປະຕິບັດຢ່າງຈິງຈັງ ແຕ່ເດືອນ ສິງຫາ 2021 ເປັນຕົ້ນມາ ແລະ ໄດ້ມີຄວາມຄືບໜ້າຫລາຍດ້ານເປັນຕົ້ນ ທຳລາຍແຫລ່ງຜະລິດ, ເຄືອຂ່າຍການຂົນສົ່ງ ແລະ ຈຳໜ່າຍ ໄດ້ຈຳນວນຫລວງຫລາຍ ສາມາດມ້າງຄະດີໄດ້ 1.106 ເລື່ອງ, ຈັບຜູ້ຕ້ອງຫາໄດ້ 1.562 ຄົນ, ຍຶດຢາບ້າໄດ້ 10.158 ກິໂລກຣາມ (101.586.361 ເມັດ) ແລະ ຍັງມີຢາເສບຕິດປະເພດອື່ນໆເຊັ່ນ: ຢາໄອສ, ຝິ່ນ, ເຮໂລອິນອີກຈຳນວນຫລາຍ. ທ່ານ ນາຍົກລັດຖະມົນຕີ ກ່າວຕື່ມວ່າ:

ຄຽງຄູ່ກັບຈຸດດີ ແລະຜົນງານ ພວກເຮົາຍັງມີຈຸດອ່ອນ ແລະ ຂໍ້ຄົງຄ້າງຫລາຍດ້ານ ທີ່ບໍ່ບັນລຸຕາມຄາດໝາຍທີ່ວາງໄວ້ເຊັ່ນ: ການຂະຫຍາຍໂຕຂອງຈີດີພີ ຍັງບໍ່ໄດ້ຕາມຄາດໝາຍ, ການຊຸກຍູ້ສົ່ງເສີມການຜະລິດ ເພື່ອທົດແທນການນຳເຂົ້າ ແລະ ສົ່ງອອກ ຍັງບໍ່ທັນຕັ້ງໜ້າ, ການສົ່ງເສີມການລົງທຶນຜ່ານປະຕູດຽວ ຍັງບໍ່ສາມາດບຸກທະລຸໄດ້, ອັດຕາມການວ່າງງານເພີ່ມສູງຂຶ້ນ, ການເກັບລາຍຮັບ, ການປະຕິບັດລາຍຈ່າຍ, ອັດຕາເງິນເຟີ້, ການຄຸ້ມຄອງອັດຕາແລກ ປ່ຽນ ຍັງບໍ່ທັນດຸນດ່ຽງ ແລະ ໝັ້ນທ່ຽງ. ການແກ້ໄຂການແຜ່ລະບາດຂອງພະຍາດໂຄວິດ-19 ເຖິງແມ່ນວ່າຢູ່ໃນລະດັບດີ ເມື່ອທຽບໃສ່ຫລາຍປະເທດໃນໂລກ ແລະ ພາກພື້ນ, ແຕ່ມາເບິ່ງສະເພາະພາຍໃນປະເທດເຮົາ ແມ່ນຍັງມີລັກສະນະເພີ່ມຂຶ້ນ, ການຊ່ວຍເຫລືອປະຊາຊົນທີ່ໄດ້ຮັບຜົນກະທົບ ຈາກມາດຕະການແຜ່ລະບາດຂອງພະຍາດດັ່ງກ່າວ ເຖິງມີຄວາມພະຍາຍາມ ແຕ່ກໍຍັງບໍ່ທັນໄດ້ພຽງພໍ ແລະ ທົ່ວເຖິງ, ການປະສານສົມທົບ ເຊິ່ງກັນ ແລະ ກັນ ເພື່ອແກ້ໄຂບັນຫາຕ່າງໆມີຄວາມຊັກຊ້າ ແລະ ອື່ນໆ.

ບັນດາຈຸດອ່ອນ ແລະ ຂໍ້ຄົງຄ້າງເຫລົ່ານີ້ ແມ່ນມາຈາກຫລາຍສາເຫດ ແຕ່ສາເຫດຕົ້ນຕໍກໍຍັງແມ່ນ ຄວາມຮັບຜິດຊອບການເມືອງຂອງພະນັກງານ ທີ່ໄດ້ຮັບການມອບໝາຍ ຍັງບໍ່ທັນສູງແທ້, ຍັງຄອງເດີມ, ຫັນປ່ຽນຍາກ, ບໍ່ກ້າຄິດກ້າເຮັດ ແລະກ້າຮັບຜິດຊອບ, ເສຍສະຫລະເພື່ອສ່ວນລວມບໍ່ທັນສູງ ແລະ ແບບແຜນວິທີເຮັດວຽກ ຍັງບໍ່ທັນໄດ້ສະດຸ້ງໄວ ແລະ ອື່ນໆ, ແຕ່ລັດຖະບານ ຍັງຈະຕ້ອງໄດ້ຕັ້ງໜ້າປັບປຸງແກ້ໄຂໃນຕໍ່ໄປ.

ຂ່າວ: ມະນີທອນ, ພາບ: ອ່າຍຄຳ, ເກດສະໜາ

ອີງຕາມການລາຍງານ ຂອງຄະນະສະເພາະກິດປະຈຳວັນທີ 1 ພະຈິກ 2021 ໃຫ້ຮູ້ວ່າ: ກວດພົບຜູ້ຕິດເຊືື້ອໃໝ່ 685 ຄົນ (ຕິດເຊື້ອພາຍໃນ ມີ 673 ຄົນ ແລະ ຕິດເຊື້ອນໍາເຂົ້າ 12 ຄົນ). ຕົວເລກຜູ້ຕິດເຊື້ອສະສົມ ພະຍາດໂຄວິດ-19 ຢູ່ ສປປ ລາວ 40.956 ຄົນ, ເສຍຊີວິດສະສົມ 67ຄົນ (ໃໝ່ 02), ປິ່ນປົວຫາຍດີ ແລະ ກັບບ້ານໃນມື້ວານ ມີ 219ຄົນ, ກໍາລັງປິ່ນປົວ 7.381ຄົນ.

ລາຍລະອຽດຜູ້ເສຍຊີວິດໃໝ່ 02 ຄົນ ມີດັ່ງນີ້:

ຜູ້ທີ 1: ເປັນເພດຊາຍ, ອາຍ 46 ປີ, ສັນຊາດ: ລາວ, ບ້ານໂພນສະຫວາດ, ເມືອງໂພນໂຮງ, ແຂວງວຽງຈັນ (ເສຍຊີວິດ ຢູ່ນະຄອນຫລວງວຽງຈັນ)

• ຜູ້ກ່ຽວ ໄດ້ກັກໂຕ ຢູ່ຄ້າຍຄຸມຂັງນາໄຫນາໂນ ຍ້ອນເສບຢາ ແລະ ກໍານົດໂທດ ເປັນເວລາ 02 ປີ
• ປະຫວັດພະຍາດຜ່ານມາ: ຄົນເຈັບບໍ່ມີອາການສະແດງອອກ, ຄົນເຈັບນອນປ່ວຍຕິດຕຽງຊ່ວຍເຫລຶອຕົນເອງບໍ່ໄດ້ ແລະ ຄົນເຈັບເປັນພະຍາດວັນນະໂລກປອດ ແລ້ວເລີ້ມປີ່ນປົວ ແຕ່ວັນທີ 13ກັນຍາ 2021
• ເວລາ 09:00 ໂມງ ຂອງວັນທີ 31 ຕຸລາ 2021 ຜູ້ກ່ຽວໄດ້ເສຍຊີວິດ.

ຜູ້ທີ 2:  ເປັນເພດຍິງ, ອາຍຸ 48 ປີ, ອາຊີບ: ປະຊາຊົນ, ບ້ານຢູ່ປະຈຸບັນ ບ້ານໜອງປຸ່ງ, ເມືອງໂພນໂຮງ, ແຂວງວຽງຈັນ)

• ຄອບຄົວທັງໝົດ ມີ 4 ຄົນລວມທັງຜູ້ກ່ຽວ ຊື່ງທີ່ຕິດເຊື້ອມີ 2 ຄົນ (ຜົວ ແລະ ຫຼານສາວ).
• ພະຍາດປະຈໍາຕົວ: ຄົນເຈັບເປັນຄວາມດັນເລືອດສູງ ບໍ່ໄດ້ກີນຢາປະຈໍາ ແລະ ພະຍາດຫືດ ບໍ່ໄດ້ກິນຢາປະຈຳ
• ໄດ້ຮັບການສັກຢາວັກຊີນ 02 ເຂັມຄົບແລ້ວ.
• ຜູ້ມີອາການປວດຕົນໂຕ, ໄອ, ອີດເມື່ອຍ, ເປັນຫວັດຕະຫຼອດ, ຄະນະສະເພາະກິດເມືອງ ຈື່ງໄດ້ໄປເກັບຕົວຢ່າງໃນວັນທີ 25 ຕຸລາ 2021
• ວັນທີ 26 ຕຸລາ 2021: ຜົນກວດແມ່ນພົບເຊື້ອພະຍາດໂຄວິດ-19 ຈື່ງໄດ້ເຂົ້ານອນປີ່ນປົວຢູ່ສູນປີ່ນປົວໂຄວິດ-19 ຢູ່ ມສ ໂພນໂຮງ, ແຂວງວຽງຈັນ
• ໄລຍະທີ່ນອນປິ່ນປົວຢູ່ໂຮງໝໍດັ່ງກ່າວ ແມ່ນແຕ່ວັນທີ 26-31 ຕຸລາ 2021 ເປັນເວລາ 5 ວັນ
• ເວລາ 14:30 ໂມງ ຂອງວັນທີ 31 ຕຸລາ 2021: ມີອາການໄອຢ່າງຕໍ່ເນື່ອງ, ເຈັບແຫ້ນນຫນ້າເອິກ ແລະ ຫາຍໃຈຝຶດ
• ມາຮອດເວລາ 19:30 ໂມງ ຂອງມືດຽວກັນ: ຄົນເຈັບບໍ່ໄດ້ສະຕິ, ບໍ່ຕອບສະຫນອງຕໍ່ການກະຕຸ້ນ, ຄົນເຈັບຢຸດຫາຍໃຈ, ຫົວໃຈຢຸດເຕັ້ນ, ໄດ້ເຊິດຊູຄົນເຈັບ, ຄົນເຈັບບໍ່ຕອບສະຫນອງ ເເລະ ເສຍຊີວິດເວລາຕໍ່ມາ

ຂໍ້ມູນໂດຍຫຍໍ້ກ່ຽວກັບການຕິດເຊືື້ອພາຍໃນໃໝ່ ທັງໝົດ 673 ຄົນ ຈາກ 14 ແຂວງ ເຊິ່ງລາຍລະອຽດ ດັ່ງນີ້:

1.ນະຄອນຫຼວງວຽງຈັນ 345 ຄົນ: ມາຈາກ 90 ບ້ານ, ໃນ 8 ເມືອງ

• ກອງບັນຊາການປ້ອງກັນເຄຶ່ອນທີ    2 ຄົນ
• ໂຮງງານ CKL      83 ຄົນ
• ໂຮງງານ VL         39 ຄົນ
• ວິທະຍາຄານ ໄກສອນ  11 ຄົນ
• ຫຼັກ 27             07 ຄົນ

2.ຫຼວງພະບາງ, ມີ 102 ຄົນ ໃນ 15 ບ້ານ ແລະ 4 ເມືອງ

3.ວຽງຈັນ, ມີ 75 ຄົນ ໃນ 23 ບ້ານ ແລະ 8 ເມືອງ

4.ບໍ່ແກ້ວ, ມີ 35 ຄົນ ໃນ 12 ບ້ານ ແລະ 1 ເມືອງ

5.ຫຼວງນໍ້ທາ, ມີ 20 ຄົນ ໃນ 11 ບ້ານ ແລະ 3 ເມືອງ

6.ສະຫວັນນະເຂດ, ມີ 19 ຄົນ ໃນ 8 ບ້ານ ແລະ 5 ເມືອງ

7.ອຸດົມໄຊ, ມີ 19 ຄົນ ໃນ 13 ບ້ານ ແລະ 2 ເມືອງ

8.ຈໍາປາສັກ, ມີ 15 ຄົນ ໃນ 9 ບ້ານ ແລະ 2 ເມືອງ

9.ຄໍາມ່ວນ, ມີ 14 ຄົນ ໃນ 8 ບ້ານ ແລະ 1 ເມືອງ

10.ບໍລິຄໍາໄຊ, ມີ 12 ຄົນ ໃນ 5 ບ້ານ ແລະ 2 ເມືອງ

11.ເຊກອງ, ມີ 9 ຄົນ ໃນ 5 ບ້ານ ແລະ 1 ເມືອງ

12.ໄຊສົມບູນ, ມີ 5 ຄົນ ໃນ 2 ບ້ານ ແລະ 2 ເມືອງ

13.ສາລະວັນ, ມີ 2 ຄົນ ໃນ 1 ບ້ານ ແລະ 1 ເມືອງ

14.ອັດຕະປື, ມີ 1 ຄົນ ໃນ 1 ບ້ານ ແລະ 1 ເມືອງ.

ສ່ວນການຕິດເຊືື້ອນໍາເຂົ້າ ຂອງຜູ້ທີ່ເດີນທາງເຂົ້າປະເທດມີຈໍານວນ 12 ຄົນ: 4 ຄົນຈາກແຂວງສະຫວັນນະເຂດ, 4 ຄົນຈາກນະຄອນຫຼວງວຽງຈັນ, 2 ຄົນຈາກບໍລິຄໍາໄຊ ແລະ 2 ຄົນຈາກ ຈໍາປາສັກ, ບຸກຄົນດັ່ງກ່າວນີ້ ແມ່ນໄດ້ເກັບຕົວຢ່າງ ແລະ ສົ່ງໄປຈໍາກັດບໍລິເວນຢູ່ສູນຈໍາກັດບໍລິເວນຂອງແຕ່ລະແຂວງ. ເມື່ອຜົນກວດເປັນບວກ ພວກກ່ຽວໄດ້ຖືກນຳສົ່ງໄປສະຖານທີ່ປິ່ນປົວທີ່ແຂວງກໍານົດໄວ້.