ນາຍົກລັດຖະມົນຕີ ແຫ່ງ ສປປ ລາວ ຢ້ຽມຢາມ ສ. ສິງກະໂປ ຢ່າງເປັນທາງການ.

ໃນຕອນແລງຂອງວັນທີ 27 ກັນຍາ 2022, ທ່ານ ພັນຄໍາ ວິພາວັນ, ນາຍົກລັດຖະມົນຕີ ແຫ່ງ ສປປ ລາວ ພ້ອມດ້ວຍພັນລະຍາ ແລະ ຄະນະຜູ້ແທນຂັ້ນສູງ ໄດ້ເດີນທາງເຖິງ ສາທາລະນະລັດ ສິງກະໂປ ເພື່ອດໍາເນີນການຢ້ຽມຢາມ ສ. ສິງກະໂປ ຢ່າງເປັນທາງການ ໃນວັນທີ 27-28 ກັນຍາ 2022 ເພື່ອຕອບສະໜອງຕາມຄໍາເຊື້ອເຊີນຂອງ ທ່ານ ລີ ຊຽນ ລຸງ, ນາຍົກລັດຖະມົນຕີ ແຫ່ງ ສ. ສິງກະໂປ.

ຈຸດປະສົງຂອງການຢ້ຽມຢາມຄັ້ງນີ້ ແມ່ນເພື່ອຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ ອັນເປັນມູນເຊື້ອທີ່ມີມາແຕ່ດົນນານ ແລະ ການຮ່ວມມືທີ່ດີງາມ ລະຫວ່າງ ລາວ-ສິງກະໂປ ໃຫ້ແໜ້ນແຟ້ນຍິ່ງໆຂຶ້ນໃນຕໍ່ໜ້າ.

ໃນໄລຍະການຢ້ຽມຢາມ, ທ່ານ ນາຍົກລັດຖະມົນຕີ ພັນຄໍາ ວິພາວັນ ຈະພົບປະສອງຝ່າຍກັບ ທ່ານ ນາຍົກລັດ ຖະມົນຕີ ລີ ຊຽນ ລຸງ ເພື່ອທົບທວນຄືນ ກ່ຽວກັບ ການພົວພັນຮ່ວມມືຂອງສອງປະເທດ ໃນໄລຍະຜ່ານມາ ແລະ ປຶກສາຫາລື ກ່ຽວກັບ ທິດທາງແຜນການຮ່ວມມືໃນຕໍ່ໜ້າ. ພ້ອມດຽວກັນນັ້ນ, ທ່ານ ນາຍົກລັດຖະມົນຕີ ແຫ່ງ ສປປ ລາວ ຍັງຈະເຂົ້າຢ້ຽມຂໍ່ານັບ ທ່ານ ນາງ ຮາລິມາ ຢາຄອບ, ປະທາ ນາທິບໍດີ ແຫ່ງ ສ. ສິງກະໂປ; ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ທາມັນ ຊັນມູກາຣັດນັນ, ລັດຖະມົນຕີ ອາວຸໂສ ທັງເປັນລັດຖະມົນຕີປະສານງານດ້ານນະໂຍບາຍສັງຄົມ ແຫ່ງ ສ. ສິງກະໂປ; ເຂົ້າຮ່ວມກອງປະຊຸມພົບປະພາກທຸລະກິດ ລາວ-ສິງກະໂປ ແລະ ຢ້ຽມຢາມໂຮງຮຽນວິຊາຊີບນັນຢາງໂພລີເທັກນິກຕື່ມອີກ.

ແຫຼ່ງຂ່າວ: Lao National Radio

ທ່ານ ບົວລີເພັດສົງຄາມ​ ຄະນະປະຈໍາພັກແຂວງ ເຈົ້ານະຄອນປາກເຊ​ ຕາງໜ້າຄະນະຮັບຜິດຊອບຈັດກິດຈະກໍາໃນງານ​ ໄດ້ຖະແຫຼງການຜ່ານສື່ມວນຊົນແຂວງ ໃນວັນທີ​ 27​ ກັນຍາ​ 2022​ ນີ້ວ່າ: ງານບຸນ “ ປະວໍລະນາ​ – ອອກພັນສາແລະ ຊ່ວງເຮືອປະເພນີປະຈໍາປີ​ 2022​ ທີ່ນະຄອນປາກເຊ ຈະໄດ້ຈັດເຕັມຮູບແບບ ດັ່ງທີ່ເຄີຍປະຕິບັດຜ່ານມາ​ກ່ອນຕອນບໍ່ທັນເກີດການລະບາດຂອງພະຍາດ COVID-19.

ເພື່ອສືບສານວັດທະນະທໍາ,​ ຮີດຄອງປະເພນີທີ່ມີມາແຕ່ບູຮານນາການ. ພິເສດ, ປີນີ້ ເພື່ອເປັນການສົ່ງເສີມ ແລະ​ ດຶງດູດການທ່ອງທ່ຽວ​ ຕິດພັນກັບການອະນຸລັກຮັກສາຮີດຄອງປະເພນີ ແລະ ການສົ່ງເສີມ ດ້ານການຄ້າ, ການບໍລິການ.​

ແຕ່ວັນທີ 5 -​ 11​ ຕຸລາ​ 2022 ກົງກັບ ມື້ອອກໃໝ່​ 10 ຄໍ່າ ຫາ​ ແຮມ​ 1 ຄໍ່າ​ ເດືອນ 11 ພສ 2565, ຄະນະພັກ​ – ອົງການປົກຄອງແຂວງຈໍາປາສັກ ໄດ້ຕົກລົງໃຫ້ຈັດກິດຈະກໍາຕ່າງໆ​ ຄື:

ວັນທີ 8​ ຕຸລາ,​ ຈັັດການແຂ່ງຂັນກ໊ອຟ ຊິງຂັນຮອງນາຍົກລັດຖະມົນຕີ​ ລັດຖະມົນຕີກະຊວງປ້ອງກັນຄວາມສະຫງົບ.​

ວັນທີ 8​ -​ 11​ ຕຸລາ​ ຈະຈັດງານວາງສະແດງ ແລະ​ ຈໍາໜ່າຍ​ສິນຄ້າ​ ໜຶ່ງເມືອງ​ ໜຶ່ງຜະລິດພັນ​ ຈາກ 4 ປະເທດ ຄື: ກໍາປູເຈຍ,​ ລາວ, ໄທ​ ແລະ​ ຫວຽດນາມ​ ທີ່ສູນກາງຄ້າແຟຣັນຊິບມໍ (ຫຼັກ 2);

ວັນທີ 8 10 ຕຸລາ,​ ຕອນເຊົ້າ​ ຈະມີພິທີໃສ່ບາດຖວາຍທານ,​ ຂະບວນແຫ່ເຮືອໄຟ, ແຫ່ຜາສາດດອກເຜີ້ງ, ແຫ່ທຽນໄຊ​ ຈາກວັດຕ່າງໆ​ ເຊິ່ງມີທັງໝົດ 6 ຂະບວນໃຫຍ່, 46 ຂະບວນແຫ່(ກ້ອນກໍາລັງ) ຈາກວັດຕ່າງໆ ແລະ​ ບ້ານ 42 ບ້ານ ພາຍໃນນະຄອນປາກເຊ, ລວມທັງກ້ອນກໍາລັງຂອງສະຖາບັນການສຶກສາ ແລະ ໂຮງຮຽນ 9 ແຫ່ງ; ຂະບວນແຫ່ຂອງກຸ່ມທະນາຄານ ແລະ​ ບໍລິສັດ 19 ຂະບວນ; ຂະບວນພຣະສົງ 108 ອົງ ແລະ​ ເຖົ້າແກ່ມົນໂທ ທັງໝົດ 3.693 ຄົນ​ ເຊິ່ງຖືວ່າຈັດຍິ່ງໃຫຍ່ກວ່າທຸກປີທີ່ເຄີຍຈັດມາ​ ແລະ​ ມີການແຂ່ງຂັນຕີກອງເສັງ ຕື່ມອີກ.​

ວັນທີ 11​ ຕຸລາ​ 2022, ກົງກັບແຮມ 1 ຄໍ່າເດືອນ 11​ລາວ, ເລີ່ມແຕ່ເວລາ 7:30 ໂມງ​ -​ 16:00 ໂມງ ພິທີແຂ່ງຂັນເຮືອຊ່ວງທຸກປະເພດ.​

ສຳລັບການແຂ່ງຂັນເຮືອຊ່ວງນັ້ນ,​ ເຈົ້ານະຄອນປາກເຊ ໃຫ້ຮູ້ວ່າ: ຈະມີການແຂ່ງຂັນໃນ 4 ປະເພດ​ ຄື: ປະເພດ 55 ສີພາຍ, 33 ສີພາຍ ແລະ 24 ສີພາຍ (ຊາຍ​ – ຍິງ) ແລະ 12 ສີພາຍ(ເຮືອກິລາ),​ ປີນີ້ ຈະຈັດເປັນ 2 ສາຍ ຄື: ສາຍເຮືອປະເພນີ​ ແລະ ສາຍກິລາ(ເຮືອສູດ); ປະຈຸບັນມີ​ ຄະນະເຮືອຊ່ວງຈາກບ້ານຕ່າງໆອ້ອມຂ້າງແຂວງ ສະເໜີເຂົ້າຮ່ວມແລ້ວ 35 ລໍາ.​ ໃນນັ້ນ​ ປະເພດ 55 ສີພາຍ(ຊາຍ)​ ມີ 3 ລໍາ,​ ປະເພດ 33 ສີພາຍ(ຊາຍ)​ ມີ 14 ລໍາ, ເຮືອຍີງ 3 ລໍາ, ປະເພດ​ 24 ສີພາຍ(ຊາຍ)​ 6 ລໍາ ແລະ 12 ສີພາຍ 9 ລໍາ;

ນອກນັ້ນ, ຍັງເຊື້ອໄດ້ເຊີນຄະນະເຮືອຊ່ວງ ຈາກແຂວງສາລະວັນ ແລະ ແຂວງເຊກອງ ແລະ ເຮືອຊ່ວງມິດຕະພາບ ຈາກຈັງຫວັດອຸບົນຣາຊະທານີ​ຣາຊະອານາຈັກໄທ ແລະຈາກແຂວງພຣະວີເຮຍ,​ ແຂວງຊຽງແຕງ ຣາຊະອານາຈັກກໍາປູເຈຍ​ ຕື່ມອີກ,​ ປັດຈຸບັນ​ ຍັງລໍການຕອບຮັບຢູ່.​

ທ່ານ ບົວລີ​ ເພັດສົງຄາມ ເຈົ້ານະຄອນປາກເຊ ກ່າວຢືນຢັນຕອນທ້າຍອີກວ່າ: ມາຮອດປະຈຸບັນນີ້ການຫ້າງຫາກະກຽມ ວຽກງານດ້ານຕ່າງໆ ສ່ວນໃຫຍ່ແມ່ນມີຄວາມພ້ອມແລ້ວ ໃນນາມຕ່າງໜ້າໃຫ້ຄະນະຮັບຜິດຊອບໃນການຈັດງານ ຂໍຮຽກຮ້ອງມາຍັງພໍ່ແມ່ປະຊາຊົນ,​ພະນັກງານ, ທະຫານ, ຕໍາຫຼວດ, ຜູ້ປະກອບການ, ນັກທຸລະກິດ ທີ່ດໍາລົງຊີວິດ ແລະເຄື່ອນໄຫວຢູ່ນະຄອນປາກເຊກໍຄືແຂວງຈໍາປາສັກ ຈົ່ງພ້ອມກັນຮ່ວມຈິດຮ່ວມໃຈ ເປັນເຈົ້າພາບ​ທີ່ດີ​ ຮ່ວມກັນ, ເຮັດໃຫ້ການຈັດງານສໍາເລັດຕາມແຜນການ, ມີຄວາມສະຫງົບ ແລະເປັນລະບຽບຮຽບຮ້ອຍ. ພ້ອມນັ້ນ, ກໍຂໍເຊື້ອເຊີນພີ່ນ້ອງຊາວລາວ, ຊາວຕ່າງປະເທດ, ເພື່ອນມິດ, ພີ່ນ້ອງບ້ານໃກ້ເຮືອນຄຽງ, ບັນດາທ່ານນັກທ່ອງທ່ຽວທັງພາຍໃນ ແລະ ຕ່າງປະເທດ ມາຮ່ວມງານຊົມ,​ ຮ່ວມເຊຍ ແລະທ່ອງທ່ຽວ ທີ່ນະຄອນປາກເຊ ຂອງພວກເຮົາດ້ວຍ.

ແຫຼ່ງຂ່າວ ແລະ ຮູບພາບ: ໜັງສືພິມຈຳປາໃໝ່ 𝐂𝐡𝐚𝐦𝐩𝐚𝐦𝐚𝐢 𝐍𝐞𝐰𝐬𝐩𝐚𝐩𝐞𝐫

ລັດຖະບານໄຂກອງປະຊຸມສະໄໝສາມັນປະຈໍາເດືອນກັນຍາ 2022

ກອງປະຊຸມລັດຖະບານສະໄໝສາມັນ ປະຈໍາເດືອນກັນຍາ 2022 ໄດ້ດໍາເນີນເປັນເວລາ 2 ວັນ ເລີ່ມແຕ່ຕອນເຊົ້າວັນທີ 22-23 ກັນຍາ 2022 ທີ່ສຳນັກງານນາຍົກລັດ ຖະມົນຕີ, ພາຍໃຕ້ການເປັນປະທານຂອງ ທ່ານ ພັນຄຳ ວິພາວັນ ນາຍົກລັດຖະມົນຕີ, ມີບັນດາທ່ານຮອງນາຍົກລັດຖະມົນຕີ, ສະມາຊິກລັດຖະບານ ແລະ ຜູ້ຕາງໜ້າຈາກບັນດາກະຊວງເຂົ້າຮ່ວມ.

ສໍາລັບເນື້ອໃນຂອງກອງປະຊຸມຄັ້ງນີ້, ຈະໄດ້ພ້ອມກັນສຸມໃສ່ປຶກສາຫາລື, ຄົ້ນຄວ້າ ແລະເປັນເອກະພາບຕໍ່ບັນຫາທີ່ສໍາຄັນຄື:

ສະຫລຸບຕີລາຄາການຈັດຕັ້ງປະຕິບັດ ວຽກງານຈຸດສຸມປະຈຳເດືອນກັນຍາ ແລະ ທິດທາງແຜນວຽກຈຸດສຸມປະຈຳເດືອນຕຸລາ 2022 ຂອງລັດຖະບານ;

ລາຍງານການກະກຽມຄວາມພ້ອມຮອບດ້ານໃຫ້ ທ່ານນາຍົກລັດຖະມົນຕີ ຈະເດີນທາງໄປເຄື່ອນໄຫວຢ້ຽມຢາມປະເທດ ສິງກະໂປ ຢ່າງເປັນທາງການ ໃນລະຫວ່າງວັນທີ 27-28 ກັນຍາ 2022 ແລະ ກະກຽມຕ້ອນຮັບການມາຢ້ຽມຢາມຂອງການນໍາຂັ້ນສູງຂອງຕ່າງ ປະເທດ;

ລາຍງານຄວາມຄືບໜ້າການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ແຫ່ງຊາດ, ແຜນງົບປະມານແຫ່ງລັດ ແລະ ແຜນເງິນຕາ ໄລຍະ 9 ເດືອນ, ທິດທາງ 3 ເດືອນທ້າຍປີ 2022 ແລະ ທິດທາງແຜນການປີ 2023; ຮ່າງຍຸດທະສາດ ການຄຸ້ມຄອງ ການປ່ຽນແປງດິນຟ້າອາກາດແຫ່ງຊາດ ຮອດປີ 2030;

ຮ່າງຍຸດທະສາດການຄຸ້ມຄອງນໍ້າ ແລະ ຊັບພະຍາກອນນໍ້າ ແຫ່ງຊາດ ຮອດປີ 2030; ຮ່າງຍຸດທະສາດ ການຄຸ້ມຄອງ ແລະ ພັດທະນາທີ່ດິນກະສິກຳ ຮອດປີ 2030 ແລະ ວິໄສທັດຮອດປີ 2040;

ລາຍງານການຫັນເອົາຫົວໜ່ວຍວິຊາການ ທີ່ມີລາຍຮັບຈາກການຄຸ້ມຄອງບໍລິຫານ ໄປສູ່ການຄຸ້ມຄອງເປັນເຈົ້າການຕົນເອງ ທາງດ້ານການເງິນເທື່ອລະກ້າວ;

ລາຍງານກ່ຽວກັບຜົນການຈັດຕັ້ງປະຕິບັດວຽກງານຈໍານວນໜຶ່ງ ຕາມທິດຊີ້ນໍາຂອງທ່ານນາຍົກລັດຖະມົນຕີ ໃນກອງປະຊຸມລັດຖະບານສະໄໝວິສາມັນ ປະຈໍາເດືອນກັນຍາ 2022 ທີ່ຜ່ານມາ.

ໃນກອງປະຊຸມ, ທ່ານນາຍົກລັດຖະມົນຕີ ໄດ້ຮຽກຮ້ອງມາຍັງບັນດາຜູ້ເຂົ້າຮ່ວມ ຈົ່ງໄດ້ພ້ອມກັນເອົາໃຈໃສ່ຄົ້ນຄວ້າ ແລະ ປະກອບຄໍາເຫັນຢ່າງເລິກເຊິ່ງດ້ວຍການສະເໜີທັດສະນະຢ່າງກົງໄປກົງມາ, ກະທັດຮັດ, ມີຈຸດສຸມ ແລະ ມີວິທີແກ້ໄຂບັນຫາທີ່ຈະແຈ້ງ ເພື່ອຮັບ ປະກັນໃຫ້ກອງປະຊຸມໃນຄັ້ງນີ້ ມີປະສິດທິຜົນສູງ ແລະ ບັນລຸຕາມຄາດໝາຍທີ່ໄດ້ກໍານົດໄວ້.

ແຫຼ່ງຂ່າວ: ຂປລ

ໃນຕອນເຊົ້າວັນທີ 21 ກັນຍາ 2022 ທ່ານ ປອ ສິນລະວົງ ຄຸດໄພທູນ ກຳມະການກົມການເມືອງສູນກາງພັກ ປະທານສູນກາງແນວລາວສ້າງຊາດ ພ້ອມດ້ວຍຄະນະນຳຈາກສູນກາງ ໄດ້ລົງເຄື່ອນໄຫວ ແລະ ຢ້ຽມຢາມເມືອງຫົງສາ ແຂວງໄຊຍະບູລີ. ໂດຍເປັນກຽດຕ້ອນຮັບຢ່າງອົບອຸ່ນຈາກທ່ານ ພົງສະຫວັນ ສິດທະວົງ ກໍາມະການສູນກາງພັກ ເລຂາພັກແຂວງ ເຈົ້້າແຂວງໄຊຍະບູລີ ພ້ອມດ້ວຍຄະນະນຳຂອງແຂວງ, ຂອງເມືອງ ແລະ ປະທານແນວລາວສ້າງຊາດ 4 ເມືອງເໜືອ ຢູ່ທີ່ເດີ່ນຍົນ ເມືອງຫົງສາ.

ການລົງເຄື່ອນໄຫວຄັ້ງນີ້, ປະທານສູນກາງແນວລາວສ້າງຊາດ ກໍ່ໄດ້ພົບປະໂອ້ລົມພະນັກງານການນຳຂອງແຂວງ, ຂອງເມືອງ ແລະ ພະນັກງານຫຼັກແຫຼ່ງ ເມືອງຫົງສາຢູ່ທີ່ສະໂມສອນເມືອງ. ໃນໂອກາດນີ້, ທ່ານ ພົງສະຫວັນ ສິດທະວົງ ກໍາມະການສູນກາງພັກ ເລຂາພັກແຂວງ ເຈົ້້າແຂວງໄຊຍະບູລີ ໄດ້ຂຶ້ນກ່າວຕ້ອນຮັບ ແລະ ພ້ອມທັງຮັບຟັງລາຍງານຫຍໍ້ການຈັດຕັ້ງເຄື່ອນໄຫວວຽກງານຮອບດ້ານຂອງສະຫະພັນແມ່ຍິງແຂວງໄຊຍະບູລີ ໃນ 9 ເດືອນ ແລະ ທິດທາງແຜນການ 3 ເດືອນທ້າຍປີ 2022, ຮັບຟັງບົດລາຍງານການນຳພາ-ຊີ້ນຳ ວຽກງານແນວລາວສ້າງຊາດແຂວງໄຊຍະບູລີ ໃນໄລຍະ 8 ເດືອນຜ່ານມາ ແລະ ທິດທາງແຜນການຕໍ່ໜ້າ.

ທ່ານ ປອ ສິນລະວົງ ຄຸດໄພທູນ ກຳມະການກົມການເມືອງສູນກາງພັກ ປະທານສູນກາງແນວລາວສ້າງຊາດໄດ້ມີຄໍາເຫັນຊົມເຊີຍຕໍ່ການນໍາພາ-ຊີ້ນໍາຂອງຄະນະການນຳແຂວງ-ເມືອງ ແລະ ສະແດງຄວາມຍ້ອງຍໍຊົມເຊີຍ ຕໍ່ຜົນສໍາເລັດທີ່ແນວລາວສ້າງຊາດແຂວງ ແລະ ສະຫະພັນແມ່ຍິງແຂວງ ສາມາດຍາດໄດ້ໃນໄລຍະຜ່ານມາ.ພ້ອມນີ້, ທ່ານກໍ່ໄດ້ໂອ້ລົມໂດຍໄດ້ຍົກໃຫ້ເຫັນຫຼາຍບັນຫາທີ່ພົ້ນເດັ່ນໃນໂລກ ແລະ ບັນຫາສຳຄັນທີ່ປະເທດເຮົາກຳລັງປະເຊີນຢູ່ໃນປະຈຸບັນ ເຊັ່ນ: ບັນຫາເສດຖະກິດ-ການເງິນ-ເງິນຕາ ແລະ ຄ່າຄອງຊີບສູງ, ບັນຫານໍ້າມັນເຊື້ອໄຟຢູ່ປະເທດເຮົາ, ບັນຫາເງິນກີບອ່ອນຄ່າ ແລະ ສິນຄ້າກະທົບໄວ.

ນອກນັ້ນ,ທ່ານຍັງໄດ້ຍົກໃຫ້ເຫັນພາລະບົດບາດ, ສິດ ແລະ ໜ້າທີ່ຂອງແນວລາວສ້າງຊາດເຊິ່ງແນວລາວທຸກຂັ້ນມີພາລະບົດບາດເຕົ້າໂຮມຄວາມສາມັກຄີຂອງປວງຊົນບັນດາເຜົ່າ, ປຸກລະດົມບັນດາເຜົ່າປົກປັກຮັກສາແລະສ້າງສາພັດທະນາປະເທດຊາດ, ເສີມຂະຫຍາຍສິດເປັນເຈົ້າຂອງປະຊາຊົນ, ຕິດຕາມກວດກາສອ່ງແສງ.

ການປະຕິບັດແນວທາງຂອງພັກ-ລັດຖະບານ ແລະ ເປັນໃຈກາງສົມທົບກັບອົງການພາຄີຕ່າງໆເຊັ່ນ: ອົງການສະຫະພັນນັກຮົບເກົ່າ, ສະຫະພັນກຳມະບານລາວ, ຄະນະຊາວໜຸ່ມປະຊາຊົນປະຕິວັດລາວ ແລະ ສະຫະພັນແມ່ຍິງລາວ. ພ້ອມນີ້, ທັງເນັ້ນໃຫ້ຈັດຕັ້ງຜັນຂະຫຍາຍ 4 ການປ່ຽນແປງຂອງວຽກງານແນວໂຮມກໍຄື:

ສ້າງການຫັນປ່ຽນດ້ານຈິນຕະນາການ, ສ້າງການຫັນປ່ຽນທາງດ້ານການເງິນ, ສ້າງການຫັນປ່ຽນໃນຮູບການ ແລະ ວິທີການປຸກລະດົມຂົນຂວາຍ ແລະ ສ້າງການຫັນປ່ຽນຮູບແບບການຮ່ວມສຳພັນ ລະຫວ່າງອົງການພາຄີດ້ວຍກັນ. ຮຽກຮ້ອງມາຍັງ ຄະນະພັກແນວລາວສ້າງຊາດແຂວງ-ເມືອງ, ອົງການຈັດຕັ້ງມະຫາຊົນ, ພະນັກງານຫລັກແຫລ່ງ, ຜູ້ຊົງຄຸນວຸດທິ, ພະນັກງານປະຕິວັດອາວຸໂສບຳນານ, ທະຫານ-ຕຳຫລວດ ຈົ່ງເຊີດຊູຄວາມຮັບຜິດຊອບໃນໜ້າທີ່ການເມືອງຂອງຕົນ, ຕັດສິນໃຈຜ່ານຜ່າຄວາມທຸກຍາກ, ເຕົ້າໂຮມຄວາມສາມັກຄີເປັນປຶກແຜ່ນ ແລະ ຕັ້ງໜ້າປຸກລະດົມກຳລັງແຮງທົ່ວປວງຊົນລາວບັນດາເຜົ່າ ປະກອບສ່ວນຢ່າງຕັ້ງໜ້າໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງ-ຂອງເມືອງ ໃຫ້ບັນລຸຜົນສຳເລັດຕາມຄາດໝາຍ.

ໃນໂອກາດ ທີ່ລົງມາເຄື່ອນໄຫວຢ້ຽມຢາມ ແລະ ເຮັດວຽກຄັ້ງນີ້, ສູນກາງແນວລາວສ້າງຊາດ ກໍ່ໄດ້ມອບເງິນໃຫ້ແນວລາວສ້າງຊາດແຂວງໄຊຍະບູລີ ຈຳນວນ 30 ລ້ານກີບ, ມອບຄອມພິວເຕີຕັ້ງໂຕະ 1 ຊຸດ ພ້ອມດ້ວຍປິ່ນເຕີ 1 ເຄື່ອງ ໃຫ້ແນວລາວສ້າງຊາດເມືອງຫົງສາ ແລະ ສູນກາງສະຫະພັນແມ່ຍິງລາວມອບເງິນໃຫ້ ສະຫະພັນແມ່ຍິງແຂວງ ຈຳນວນ 20 ລ້ານກີບ.

ແຫຼ່ງຂ່າວ: News.XBL

ສປປ ລາວ ເເບ່ງປັນຄວາມຮູ້ດ້ານການສຶກສາ ຢູ່ກອງປະຊຸມສຸດຍອດ ສະຫະປະຊາຊາດ ເພື່ອເລັ່ງແກ້ໄຂວິກິດການດ້ານການຮຽນ.

ກອງປະຊຸມສຸດຍອດວ່າດ້ວຍການຫັນປ່ຽນການສຶກສາ ໄດ້ເຕົ້າໂຮມເອົາບັນດາຜູ້ນຳດ້ານການສຶກສາຈາກທົ່ວໂລກເພື່ອມາປຶກສາຫາລືການແກ້ໄຂວິກິດການດ້ານການຮຽນທີ່ເກີດຈາກການລະບາດຂອງ ໂຄວິດ-19.

ວັນທີ 21 ກັນຍາ 2022 ຄະນະຜູ້ແທນຈາກ ກະຊວງສຶກສາທິການ ແລະ ກິລາ ແຫ່ງ ສປປ ລາວ, ພ້ອມດ້ວຍ ອົງການຢູນິເຊັບ ປະຈໍາ ສປປ ລາວ, ໄດ້ສໍາເລັດ ການເຂົ້າຮ່ວມ ກອງປະຊຸມສຸດຍອດວ່າດ້ວຍການຫັນປ່ຽນການສຶກສາ ທີ່ນະຄອນນິວຢອກ ສະຫະລັດອາເມລິກາ.ກອງປະຊຸມດັ່ງກ່າວ ໄດ້ຮັບການຊີ້ນຳໂດຍ ເລຂາທິການໃຫຍ່ອົງການສະຫະປະຊາຊາດ ເເລະ ເປັນສ່ວນໜຶ່ງຂອງກອງປະຊຸມສະມັດຊາໃຫຍ່ສະຫະປະຊາຊາດຄັ້ງທີ 77 ເຊີ່ງໄດ້ຈັດຂຶ້ນເປັນເວລາ 3 ວັນ ແຕ່ວັນທີ 17 ຫາ 19 ກັນຍາ 2022.

ກອງປະຊຸມນີ້ຍັງໄດ້ເຕົ້າໂຮມເອົາບັນດາຜູ້ນຳດ້ານການສຶກສາຈາກທົ່ວໂລກ ໂດຍມີຈຸດປະສົງເພື່ອຊອກຫາວິທີການແກ້ໄຂວິກິດການດ້ານການຮຽນໃນທົ່ວໂລກທີ່ເກີດຂຶ້ນຈາກການລະບາດຂອງພະຍາດ ໂຄວິດ-19. ການສົນທະນາໄດ້ສຸມໃສ່ຫ້າຫົວຂໍ້ສໍາຄັນ ເຊີ່ງປະກອບມີ ໂຮງຮຽນ, ຫຼັກສູດ ແລະ ການຮຽນຮູ້ , ຄູອາຈານ, ການຫັນປ່ຽນຮູບແບບ ການຮຽນເເບບດິຈິຕອນ ແລະ ການສະໜັບສະໜູນດ້ານການເງິນສຳລັບການສຶກສາ.ກ່ອນໜ້າກອງປະຊຸມໃຫຍ່ ໃນວັນທີ 19 ກັນຍາ 2022, ຄະນະຜູ້ແທນຈາກ ກະຊວງສຶກສາທິການ ແລະ ກິລາ ຂອງລາວ ກໍ່ໄດ້ເຂົ້າຮ່ວມງານ “ການຫັນປ່ຽນການສຶກສາເລີ່ມຕົ້ນໂດຍການວາງຮາກຖານຕັ້ງແຕ່ໄວເຍົາ” ໃນ ວັນທີ 17 ກັນຍາ, ສປປ ລາວ ເປັນປະເທດດຽວໃນພາກພື້ນທີ່ເປັນເຈົ້າພາບຮ່ວມຈັດງານດັ່ງກ່າວ ພ້ອມດ້ວຍ ປະເທດ ອຸສເບກິສຖານ ເເລະ ກາບອນ, ໂດຍໄດ້ຮັບການສະໜັບສະໜູນຈາກ ອົງການຢູນິເຊັບ, ອົງການຢູເນສໂກ, ທະນາຄານໂລກ, ມູນນິທິ LEGO, ມູນນິທິ Hilton, ວິທະຍາໄລຄູ ຂອງ ມະຫາວິທະຍາໄລ Columbia ແລະ ECDAN.

“ການປົກປ້ອງ ເເລະ ຜັນຂະຫຍາຍການລົງທຶນໃນການສືກສາເດັກ ກ່ອນໄວຮຽນ ເເມ່ນເປັນບັນຫາຮີບດ່ວນ ຍິ່ງກວ່າທີ່ເຄີຍມີມາກ່ອນ ໃນໄລຍະການເເຜ່ລະບາດຂອງພະຍາດ ໂຄວິດ-19 ເເລະ ເມຶ່ອພວກເຮົາພິຈາລະນາເຖີງຜົນກະທົບຂອງພະຍາດດັ່ງກ່າວຕໍ່ການພັດທະນາຂອງເດັກ, ໂດຍສະເພາະຜູ້ທີ່ມີຄວາມສ່ຽງທີ່ສຸດ,” ກ່າວໂດຍ ພະນະທ່ານ ຮອງສາດສະດາຈານ ດຣ. ພຸດ ສິມມາລາວົງ, ລັດຖະມົນຕີກະຊວງສຶກສາ ທິການ ແລະ ກິລາ. ທ່ານຍັງໄດ້ກ່າວອີກວ່າ: “ລັດຖະບານເເຫ່ງ ສປປ ລາວ ໃຫ້ຄວາມສຳຄັນເປັນຢ່າງຢິ່ງຕໍ່ການປົກປ້ອງຮັກສາສິດທິຕໍ່ການເຂົ້່າເຖີງການສຶກສາສຳລັບທຸກຄົນ ແລະ ຢືນຢັນຄືນໃໝ່ເຖີງຄຳໝັ້ນສັນຍາຂອງລັດຖະບານໃນການສະໜັບ ສະໜູນການຟື້ນຟູການສຶກສາໃນປະເທດ.”ໃນກອງປະຊຸມສຸດຍອດນີ້, ສປປ ລາວ ຍັງໄດ້ນຳສະເໜີ ການຖະແຫຼງການແຫ່ງຊາດວ່າດ້ວຍການ ປ່ຽນແປງ ການສຶກສາ ເຊັ່ນດຽວກັນ ເຊີ່ງໄດ້ຮັບການພັດທະນາຂຶ້ນໂດຍຜ່ານຂະບວນການປຶກສາຫາລືຢ່າງສົມບູນແບບ, ລວມເຖິງ ບັນດາກະຊວງ ແລະ ຄູ່ຮ່ວມພັດທະນາຕ່າງໆ ຈົນເຖີງ ຄູອາຈານ ແລະ ນັກຮຽນ.

ພາຍຫຼັງກອງປະຊຸມສຸດຍອດນີ້ ຈະໄດ້ມີການຕິດຕາມການປະຕິບັດຄຳໝັ້ນສັນຍາແຫ່ງຊາດຂອງບັນດາປະເທດຕ່າງໆ, ລວມເຖີງ ສປປ ລາວ, ຢ່າງໃກ້ຊິດ.“ມີພຽງເເຕ່ 1 ໃນ 3 ຂອງຈຳນວນເດັກນ້ອຍໃນທົ່ວໂລກທີ່ສາມາດອ່ານປະໂຫຍກ ເເລະ ເຂົ້າໃຈນິທານເເບບພື້ນຖານໄດ້. ໃນປະຈຸບັນ, ພະຍາດ ໂຄວິດ-19 ໄດ້ສົ່ງຜົນກະທົບຕໍ່ລະບົບການສຶກສາໃນທົ່ວໂລກເຮັດໃຫ້ເກີດມີວິກິດການດ້ານການຮຽນ ແລະ ໄດ້ສົ່ງຜົນຕໍ່ການຮຽນຮູ້ຂອງເດັກນ້ອຍຫຼາຍກວ່າ 90 ສ່ວນຮ້ອຍ ຂອງໂລກ. ແນວໃດກໍ່ຕາມ, ການລະບາດຂອງພະຍາດ ໂຄວິດ-19 ຍັງເປັນໂອກາດສຳລັບພວກເຮົາທີ່ຈະປ່ຽນແປງຮູບແບບ ການສຶກສາ ເເລະ ວິທີການສອນໄປໃນຮູບເເບບໃໝ່, ພ້ອມດ້ວຍເສີມສ້າງຄຸນນະພາບຂອງການສຶກສາສໍາລັບທຸກຄົນ,” ກ່າວໂດຍ ທ່ານນາງ ດຣ. ເພຍ ເຣເບລໂລ ບີຣໂຕ, ຜູ້ຕາງໜ້າ ອົງການຢູນິເຊັບ ປະຈຳ ສປປ ລາວ.

ນອກຈາກນັ້ນ, ຄະນະຜູ້ແທນຈາກ ກະຊວງສຶກສາທິການ ແລະ ກິລາ ຍັງໄດ້ເຂົ້າຮ່ວມເວທີສົນທະນາພາຍໃຕ້ຫົວຂໍ້ ການຫັນປ່ຽນການສຶກສາໄປໃນຮູບເເບບດີຈີຕອນຢ່າງສົມບູນເເບບ ເເລະ ສະເໝີພາບ, ພ້ອມຍັງໄດ້ຍົກຕົວຢ່າງໃຫ້ເຫັນເຖິງຜົນສຳເລັດຂອງ ຖານຂໍ້ມູນການຮຽນການສອນເເບບດີຈີຕອນ “ຄັງປັນຍາລາວ” ຂອງ ສປປ ລາວ.

ພ້ອມດຽວກັນນັ້ນ, ຄະນະຜູ້ແທນຈາກ ສປປ ລາວ ກໍຍັງໄດ້ພົບກັບບັນດາຜູ້ແທນຈາກປະເທດອື່ນໆ, ພາກເອກະຊົນ ແລະ ສະຖາບັນການສຶກສາອື່ນໆ ເພື່ອ ແລກປ່ຽນບົດຮຽນໃນການປັບປຸງຄຸນນະພາບການສຶກສາໃນ ສປປ ລາວ ເຊັ່ນດຽວກັນ.

ແຫຼ່ງຂ່າວ: Lao National Radio

8 ເດືອນ ດ່ານພາສີສາກົນວັງເຕົ່າ ເກັບລາຍຮັບໄດ້ 503 ຕື້ກວ່າກີບ ທ່ານ ແກ້ວອຸດອນ ພາລີຈັນ ຫົວໜ້າດ່ານພາສີສາກົນວັງເຕົ່າ ເມືອງໂພນທອງ ແຂວງຈໍາປາສັກ ໃຫ້ສໍາພາດຕໍ່ສື່ມວນຊົນແຂວງເມື່ອບໍ່ດົນມານີ້ວ່າ: ແຜນການຈັດເກັບລາຍຮັບເຂົ້າງົບປະມານຂອງດ່ານພາສີສາກົນວັງເຕົ່າ ແລະ ຫ້ອງການພາສີປະຈໍາທ່າບົກ – ວັງເຕົ່າ ສົກປີ 2022 ແມ່ນຈະໃຫ້ໄດ້ທັງໝົດ 796 ຕື້ກີບ.

ໃນນັ້ນ, ຈະໃຫ້ໄດ້ຈາກດ່ານພາສີສາກົນວັງເຕົ່າ 581 ຕື້ກີບ ແລະ ຫ້ອງການພາສີປະຈໍາ ທ່າບົກ-ວັງເຕົ່າ 215 ຕື້ກີບ. ໃນ 8 ເດືອນ ປີ 2022 ສາມາດເກັບລາຍຮັບໄດ້ 503 ຕື້ກວ່າກີບເທົ່າກັບ 63,27% ຂອງແຜນການປີ, ຖ້າທຽບໃສ່ໄລຍະດຽວກັນຂອງປີຜ່ານມາ ເພີ່ມຂຶ້ນ 44 ຕື້ກວ່າກີບ, ເທົ່າກັບ 9,65%. ທ່ານ ແກ້ວອຸດອນ ພາລີຈັນ ກ່າວຕື່ມວ່າ:

ສາເຫດທີ່ພາໃຫ້ການຈັດເກັບລາຍຮັບໄດ້ເກີນແຜນ ຍ້ອນພວກເຮົາມີກົດໝາຍພາສີ, ກົດໝາຍຂອງຂະແໜງການອື່ນທີ່ກ່ຽວຂ້ອງ ແລະ ບັນດານິຕິກໍາລຸ່ມກົດ ໝາຍ ເປັນບ່ອນອີງໃນການຈັດຕັ້ງປະຕິບັດວຽກງານວິຊາສະເພາະ, ມີເຄື່ອງມືທີ່ທັນສະໄໝນຳໃຊ້ເຂົ້າໃນການບໍລິການແຈ້ງພາສີເປັນລາຍລະອຽດດ້ວຍລະບົບເອເລັກໂຕຣນິກ (Asycuda), ການກວດກາສິນຄ້າ ເຄື່ອງຂອງ ເຂົ້າ-ອອກ ຜ່ານດ່ານດ້ວຍລະບົບສາຍແສງ (Scanner), ນໍາໃຊ້ລະບົບຄຸ້ມຄອງພາຫະນະທ່ອງທ່ຽວຢ້ຽມຢາມ, ພາຫະນະຂົນສົ່ງສິນຄ້າ, ຕູ້ບັນທຸກສິນຄ້າ (ຕູ້ຄອນເທນເນີ້) ດ້ວຍລະບົບເອເລັກໂຕຣນິກ, ສຳຄັນຄືຜູ້ປະກອບການຈິງໃຈເສຍພາສີຕາມລະບຽບການ. ສໍາລັບທິດທາງວຽກຈຸດສຸມໃນ 4 ເດືອນທ້າຍປີ, ຫົວໜ້າພາສີດ່ານສາກົນວັງເຕົ່າ ກ່າວວ່າ:

ຈະສູ້ຊົນຈັດຕັ້ງປະຕິບັດການຈັດເກັບລາຍຮັບມອບເຂົ້າງົບປະມານໃຫ້ໄດ້ຕາມແຜນການທີ່ການຈັດຕັ້ງມອບໝາຍ ຄື: 295 ຕື້ກີບ. ໃນນັ້ນ, ດ່ານພາສີສາກົນວັງເຕົ່າ ຈະສູ້ຊົນປະຕິບັດຈັດເກັບລາຍຮັບໃຫ້ໄດ້ 175 ຕື້ກີບ, ກວມ 30,12% ຂອງແຜນປີ; ຫ້ອງການພາສີປະຈໍາທ່າບົກ-ວັງເຕົ່າ ຈະສູ້ຊົນປະຕິບັດຈັດເກັບລາຍຮັບໃຫ້ໄດ້ 120 ຕື້ກີບ ກວມ 55.68%.

(ຂ່າວ: ເກດສະໜາ ແກ້ວສຸວັນນະແສງ)