ເພື່ອເປັນການຄຸ້ມຄອງ ແລະ ປົກປັກຮັກສາຊັບພະຍາກອນປ່າໄມ້, ສັດນ້ຳ ແລະ ສັດປ່າ ໃຫ້ມີຄວາມຍືນຍົງຕະຫຼອດໄປ ເຮັດໃຫ້ເນື້ອທີ່ຄວາມປົກຫຸ້ມປ່າໄມ້ໃຫ້ ບັນລຸເຖິງ 70% ຂອງເນື້ອທີ່ທົ່ວປະເທດທີ່ໄດ້ກຳນົດໄວ້ໃນແຜນຍຸດທະສາດປ່າໄມ້ດັ່ງກ່າວ ລັດຖະບານເຮົາໄດ້ມີການຈັດສັນກໍານົດຂອບເຂດ, ປັກຫຼັກໝາຍ ແລະ ຕິດປ້າຍເຂດຟື້ນຟູປ່າການປ້ອງກັນໄຟໄໝ້ລາມປ່າ, ການປຸກໄມ້ເສີມໃຫ້ເປັນປ່າພ້ອມກັບການສົ່ງເສີມເຕັກນິກ-ວິຊາການ ດ້ານແກ່ນພັນໄມ້ ແລະ ການປູກປ່າໄປຄຽງຄູ່ກັບການໂຄສະນາເຜີຍແຜ່ສຶກສາອົບຮົມໃຫ້ແກ່ປະຊາຊົນໄດ້ຮັບຮູ້, ເຂົ້າໃຈເຂົ້າຮ່ວມເປັນເຈົ້າການໃນການຟື້ນຟູປ່າໃນພື້ນທີ່ປ່າໄມ້ຊຸດໂຊມໃຫ້ກາຍເປັນປ່າທີ່ອຸດົມສົມບູນການປູກໄມ້ອຸດສາກໍາໃຫ້ຫຼາຍເພື່ອປະກອບສ່ວນເຂົ້າໃນແຜນ ການພັດທະນາເສດຖະກິດ-ສັງຄົມແຫ່ງຊາດຂອງແຂວງທີ່ຕິດພັນກັບການດໍາລົງຊີວິດຂອງປະຊາຊົນລາວບັນດາເຜົ່າ ແລະ ເພີ່ມທະວີການປ້ອງກັນ ແລະ ສະກັດ ກັ້ນຕ້ານໄຟລາມປ່າ, ຕ້ອງໄດ້ຈັດຕັ້ງປະຕິບັດພາຍໃຕ້ບັນດານິຕິກຳຄໍາສັ່ງ, ແຈ້ງການລະບຽບການກົດໝາຍກ່ຽວກັບວຽກງານຄຸ້ມຄອງປ່າໄມ້ ແລະ ການປົກປັກຮັກສາສັດປ່າ ແລະ ພືດປ່າ ໂດຍການບັງຄັບໃຊ້ກົດໝາຍໃຫ້ມີຜົນສັກສິດ.

ແນ່ໃສ່ໃນການຄຸ້ມຄອງການກວດກາຕິດຕາມການປັບໃໝ ແລະ ການດໍາເນີນຄະດີຕໍ່ກັບຜູ້ທີ່ຜ່າຝືນກະທຳຜິດໃນການທຳລາຍປ່າໄມ້ ແລະ ລ່າສັດປ່າພາຍໃນຂອບເຂດແຂວງບໍ່ແກ້ວ ມອບໃຫ້ບັນດາພະແນກການຂະແໜງ ການທີ່ກ່ຽວຂ້ອງ ແລະ ອຳນາດການປົກຄອງທຸກຂັ້ນ ຕ້ອງໄດ້ເພີ່ມທະວີຄວາມເຂັ້ມງວດໃນການເອົາໃຈໃສ່ປະຕິບັດໜ້າທີ່ຂອບເຂດສິດ ແລະ ຄວາມຮັບຜິດຊອບໃຫ້ດີ ແລະ ຖືກຕ້ອງຕາມລະບຽບກົດໝາຍ,ໃຫ້ພະແນກກະສິກໍາ ແລະ ປ່າໄມ້ແຂວງ.

ເປັນເຈົ້າການສົມທົບກັບຂະແໜງການທີ່ກ່ຽວຂ້ວງ, ອໍານາດການປົກຄອງທຸກຂັ້ນ, ຊີ້ນໍາຂະແໜງປ່າໄມ້, ກອງຄຸ້ມ ຄອງປ່າສະຫງວນ ແລະ ປ່າປ້ອງກັນ ແລະ ຫ້ອງການກະສິກຳ ແລະ ປ່າໄມ້ ເມືອງ ເພື່ອເຮັດໜ້າທີ່ກໍານົດລະບຽບການ ແລະ ມາດຕະການເຜີຍແຜ່ໂຄສະນາແນະນໍາໃນການຕິດຕາມ, ເຝົ້າລະວັງໃນການປ້ອງກັນສະກັດກັ້ນໄຟໄໝ້ປ່າ ແລະ ການລ່າສັດປ່າ ແລະ ພືດປ່າປະເພດຫວງຫ້າມຢ່າງເດັດຂາດ ໃຫ້ຈັດຕັ້ງປະຕິບັດໃນການປຶກສາຫາລື, ຄົ້ນຄ້ວາເອົາໃຈໃສ່ລົງຕິດ ຕາມກວດການຖາງປ່າເຮັດໄຮ່ຂອງປະຊາຊົນ, ໃນການແນະນຳໃຫ້ປະຊາຊົນ ຫາວິທີປ້ອງກັນໄຟໄໝ້ລາມປ່າເຂດທີ່ປະຊາຊົນຍັງບໍ່ທັນຖາງປ່າ ແລະ ຈຸດປ່າໄມ້ເພື່ອກະກຽມເນື້ອທີ່ທຳການຜະລິດກະສິກໍາຕ້ອງໄດ້ຈໍາກັດໃຫ້ຢູ່ສະ ເພາະເຂດທີ່ຈັດສັນເນື້ອທີ່ດິນໃຫ້ເທົ່ານັ້ນ, ສ່ວນເຂດທີ່ຍັງບໍ່ທັນໄດ້ຈັດສັນນັ້ນໃຫ້ ຈໍາກັດເຂດທີ່ກໍານົດໄວ້ ເຊັ່ນ: ເຂດປ່າຊຸດໂຊມ ຫຼື ດິນປ່າເຫຼົ່າໄຮ່ ແລະ ຕ້ອງຢູ່ຫ່າງຈາກແມ່ນໍ້າບໍ່ຕໍ່າກວ່າ 50 ແມັດ ຂຶ້ນໄປ, ຈາກເສັ້ນທາງ 50 ແມັດຂຶ້ນໄປກ່ອນຈະຈູດໄຮ່ ຕ້ອງສ້າງແລວກັນໄຟອ້ອມຮອບເນື້ອທີ່ໄວ້ໃຫ້ມີຄວາມກວ້າງ 3 ແມັດຂຶ້ນໄປການຈຸດໄຮ່ຕ້ອງແມ່ນຍາມເຊົ້າ ຫຼື ຍາມແລງເວລາແດດອ່ອນ ແລະ ບໍ່ມີລົມແຮງໃນເວລາຢູ່ປ່າກ່ອນຈະຖີ້ມກອກຢາສູບຕ້ອງ ໄດ້ມອດເສຍກ່ອນ, ການດັງໄຟຕ້ອງຖາງອ້ອມຮອບກອງໄຟ ແລະ ກ່ອນຈະຍ້າຍໄປບ່ອນອື່ນຕ້ອງມອດໄຟໃຫ້ຄັກແນ່ເສຍກ່ອນ.

ໃນຂອບເຂດປ່າປ້ອງກັນ, ປ່າສະຫງວນ ແລະ ປ່າຜະລິດທີ່ມີປະຊາຊົນອາໃສ ຢູ່ພາຍໃນ ແລະ ຢູ່ນອກ; ເຊິ່ງຕິດພັນກັບການ ຖາງປ່າເຮັດໄຮ່ເຮັດສວນ, ທຳມາຫາກິນການທ່ອງທຽ່ວ ແລະອື່ນໆ ຕ້ອງໄດ້ແນະນໍາປະຊາຊົນເຮັດຢູ່ ສະເພາະເຂດທີ່ໄດ້ກຳນົດໄວ້ສໍາລັບການເຮັດໄຮ່ ແລະ ສວນປູກພືດຕ່າງໆເທົ່ານັ້ນ ເຊັນ: ດິນປ່າເຫຼົ່າໄຮ່ທີ່ໄດ້ຜ່ານການຈັດສັນໃຫ້ນໍາໃຊ້, ດິນສວນປູກພືດທີ່ໄດ້ຮັບອະນຸຍາດ, ດິນສວນປູກໄມ້ອຸດສາຫະກຳທີ່ໄດ້ຂຶ້ນທະບຽນສວນປຸກ.ໃນກໍລະນີໄຟໄໝ້ລາມປ່າເກີດຂຶ້ນຢູ່ເຂດບ້ານໃດແມ່ນມອບໃຫ້ບ້ານ ນັ້ນ ແລະ ຫ້ອງການກະສິກໍາ ແລະ ປ່າໄມ້ເມືອງເປັນເຈົ້າການປຸກລະດົມປະຊາຊົນມາຊ່ວຍກັນມອດ ໄຟໃນກໍລະນີທີ່ໄຟໄໝ້ປ່າຮຸນແຮງບໍ່ສາມາດດັບມອດໄດ້ຕ້ອງຂໍຄວາມ ຊ່ວຍເຫຼືອຈາກປະຊາຊົນ, ພະນັກງານ, ທະຫານ ແລະ ຕຳຫຼວດທີ່ຢູ່ໃກ້ຄຽງເພື່ອພ້ອມກັນດັບມອດໄຟປ່າ, ສ່ວນຫ້ອງການກະສິກຳ ແລະ ປ່າໄມ້ເມືອງ ຕ້ອງຮັບຜິດຊອບເກັບກຳຂໍ້ມູນຊອກຫາສາເຫດທີ່ພາໃຫ້ເກີດໄຟໄໝ້ລາມປ່າໃຫ້ພະແນກການ, ຂະແໜງການ, ກອງກວດກາປ່າໄມ້ດໍາເນີນຄະດີ ການສືບສວນ-ສອບສວນປະຕິ ບັດຕາມລະບຽບ, ກົດໝາຍສໍາລັບ ມາດຕະການຕໍ່ຜູ້ ທີ່ລະເມີດ, ບໍ່ໃຫ້ ການຮ່ວມມື ແລະ ດຳເນີນຄະດີຢ່າງ ເຂັດຂາດຕາມທີ່ໄດ້ລະບຸໄວ້ໃນ ກົດໝາຍ ວ່າດ້ວຍປ່າໄມ້.

ແຫຼ່ງຂ່າວ: ຄວາມສະຫງົບ

ສອງກະຊວງ ປຶກສາຫາລື ກ່ຽວກັບການເຊື່ອມຕໍ່ລະບົບບໍລິຫານຖານຂໍໍ້ມູນແຮງງານແບບທັນສະໄໝ (LMIS) ແລະ ລະບົບຄຸ້ມຄອງລາຍຮັບສ່ວຍສາອາກອນ (TaxRIS).

ກະຊວງການເງິນ ແລະ ກະຊວງແຮງງານ ແລະ ສະຫວັດດີການສັງຄົມ ໄດ້ຈັດກອງປະຊຸມປຶກສາຫາລື ກ່ຽວກັບການເຊື່ອມຕໍ່ລະບົບບໍລິຫານຖານຂໍ້ມູນແຮງງານແບບທັນສະໄໝ (LMIS) ແລະ ລະບົບຄຸ້ມຄອງລາຍຮັບສ່ວຍສາອາກອນ (TaxRIS) ຂຶ້ນໃນວັນທີ 1 ມີນາ 2022ທີ່ ກະຊວງການເງິນ, ໂດຍການເປັນປະທານຮ່ວມຂອງ ທ່ານ ບຸນໂຈມ ອຸບົນປະເສີດ ລັດຖະມົນກະຊວງການເງິນ ແລະ ທ່ານ ນ ໃບຄຳ ຂັດທິຍະ ລັດຖະມົນຕີ ກະຊວງແຮງງງານ ແລະ ສະຫວັດດີການສັງຄົມ, ມີບັນດາຮອງລັດຖະມົນຕີ, ຫົວໜ້າກົມ-ຮອງກົມ, ຫົວໜ້າຫ້ອງການ-ຮອງຫ້ອງການ, ຫົວໜ້າອົງການ ພ້ອມດ້ວຍພະນັກງານຫຼັກແຫຼ່ງ ຂອງສອງກະຊວງ ເຂົ້າຮ່ວມ.

ກອງປະຊຸມປຶກສາຫາລືກ່ຽວກັບການເຊື່ອມຕໍ່ລະບົບບໍລິຫານຖານຂໍໍ້ມູນແຮງງານແບບທັນສະໄໝ ຄັ້ງນີ້, ຊຶ່ງມີຈຸດປະສົງຕົ້ນຕໍເພື່ອສ້າງຖານຂໍ້ມູນ ແລະ ຂື້ນທະບຽນ ຜູ້ອອກແຮງງານລາວ ທັງໝົດດ້ວຍລະບົບທັນສະໄຫມເພື່ອຕິດຕາມການເຄື່ອນໄຫວຂອງຕະຫຼາດແຮງງານ ໂດຍສະເພາະການປ່ຽນແປງສະພາບກ່ຽວກັບຄວາມຕ້ອງການ ແລະ ການສະໜອງແຮງງານ; ຕິດຕາມການມີລາຍຮັບຂອງແຮງງານລາວ ແລະ ແຮງງານຕ່າງປະເທດ ໃຫ້ເປັນໄປຕາມຄວາມຈິງຫຼາຍທີ່ສຸດ ເພື່ອໃຫ້ປະຕິບັດພັນທະດ້ານອາກອນລາຍໄດ້ຢ່າງເໝາະສົມ; ເປົ້າຫມາຍແມ່ນຜູ້ອອກແຮງງານລາວ ປະມານ 1,5 ລ້ານ (ໜຶ່ງລ້ານຫ້າແສນຄົນ) ຄົນໃນທົ່ວປະເທດ ທັງໃນ ແລະ ນອກລະບົບເສດຖະກິດ.

ນອກລະບົບລວມມື: ແຮງງານໃນຄົວເຮືອນ, ຜູ້ປະກອບອາຊີບອິດສະຫຼະຄ້າຂາຍອອນລາຍ, ຜູ້ເຮັດວຽກແບບກິນຕາມຜະລິດຕະພັນ ແລະ ຜູ້ອອກແຮງງານຕ່າງປະເທດທີ່ຖືກຕ້ອງ ແລະ ຍັງບໍ່ຖືກຕ້ອງຕາມກົດໝາຍ.

ພ້ອມກັນນີ້ໄດ້ມີທະບຽນ ແລະ ປະຫວັດການເຮັດວຽກພ້ອມລາຍລະອຽດທີ່ເຊື່ອຖືໄດ້; ມີປະຫວັດການຈ່າຍປະກັນສັງຄົມຂອງຕົນ, ປະຫວັດການຈ່າຍອາກອນລາຍໄດ້ຂອງຕົນ; ມີຄວາມສະດວກໃນການສ້າງ ຫລື ຍົກເລີກສັນຍາແຮງງານ; ມີຄວາມສະດວກໃນການສະຫມັກວຽກ ແລະ ເຂົ້າຖິງຂໍ້ມູນຂ່າວສານຕະຫລາດແຮງງານ; ມີເລກປະຈຳຕົວຜູ້ເສຍອາກອນ ເພື່ອຢັ້ງຢືນສະຖານະຢ່າງຖືກຕ້ອງ; ຜູ້ອອກແຮງງານໄດ້ຮັບການຄຸ້ມຄອງຕາມກົດຫມາຍແຮງງານ, ໄດ້ຮັບການຊ່ວຍເຫຼືອຢ່າງທັນການໃນກໍລະນີເກີດເຫດການຕ່າງໆທີ່ມີຜົນກະທົບຕໍ່ວຽກທີ່ຕົນເອງເຮັດ,ໄດ້ມີລະບົບຂໍ້ມູຂ່າວສານຕະຫລາດແຮງງານທີ່ທັນສະໄຫມ; ມີຂໍ້ມູນກ່ຽວກັບຄວາມຕ້ອງການ ແລະ ການສະໜອງແຮງງານ ລວມທັງສະຖານະພາບຂອງຜູ້ອອກແຮງງານ ທີ່ມີຄວາມຊັດເຈນ ຖືກຕ້ອງ ແລະ ທັນເວລາ ສາມາດນຳໃຊ້ເຂົ້າໃນການແກ້ໄຂບັນຫາດ້ານແຮງງານໄດ້ໄວຂື້ນ; ສາມາດເກັບລາຍຮັບຈາກອາກອນເງິນເດືອນ, ອາກອນລາຍໄດ້ດີຂື້ນກວ່າເກົ່າ;

ມີຂໍ້ມູນເພື່ອນຳໃຊ້ໃຫ້ແກ່ການສ້າງກຳລັງແຮງງານທົດແທນໄດ້ໃນແຕ່ລະໄລຍະ,ແຮງງານທຸກຄົນໃນລະບົບເສດຖະກິດຂອງປະເທດໄດ້ຮັບການປົກປ້ອງ ແລະ ຄຸ້ມຄອງຕາມກົດໝາຍ ເຮັດໃຫ້ສັງຄົມມີຄວາມສະຫງົບ ແລະ ປອດໄພ.ຈາກສະຖິຕິຜ່ານມາຄາດວ່າໃນ 2 ປີ ຈະສາມາດຂື້ນທະບຽນໃຫ້ຜູ້ອອກແຮງງານ ຈຳນວນ 1,5 ລ້ານຄົນ ມີຜູ້ທີ່ມີເງິນເດືອນ ສູງກວ່າ 1,3 ລ້ານກີບ (ໜຶ່ງລ້ານສາມແສນກີບ) ທີ່ຕ້ອງຈ່າຍອາກອນຈຳນວນຫລາຍກວ່າ 50% ຂອງຜູ້ອອກແຮງງານທັງຫມົດ.

ກອງປະຊຸມຄັ້ງນີ້,ບັນດາຜູ້ເຂົ້າຮວ່ມກອງປະຊຸມຂອງສອງກະຊວງກໍ່ໄດ້ຂຶ້ນປະກອບຄຳຄິດຄຳເຫັນ ແລກປຽນບົດຮຽນເຊິ່ງກັນແລກັນ ຢ່າງສ້າງສັນ ມີວິທະຍາສາດ ເພື່ອເຮັດໃຫ້ວຽກງານດັ່ງກ່າວນີ້ ມີຄວາມເປັນເອກະພາບສູງ, ພ້ອມກັນແກ້ໄຂລຸດບັນດາຂອດຂັ້ນດ້ານເອກະສານຕ່າງໆໃຫ້ມີຄວາມວອ່ງໄວໂດຍເນັ້ນການກວດການຫລັງຈ່າຍໃຫ້ມີຄວາມສັດເຈນ,ບັບປຸງນິຕິກຳໃຫ້ສອດຄ່ອງກັບຕົວຈິງ ແລະ ພ້ອມກັນນຳໄປຈັດຕັ້ງປະຕິບັດໃຫ້ມີຜົນສຳເລັດຕາມລະດັບຄາດໝາຍທີ່ວາງໄວ້.

(ຂ່າວສານຮສສ)

ລາງວັນການທ່ອງທ່ຽວແບບຍືນຍົງອາຊຽນ ແມ່ນການລິເລີ່ມຂອງ ສປປ ລາວ ໃນໄລຍະ ສປປ ລາວ ເປັນປະທານອາຊຽນໃນປີ 2016. ສໍາລັບປີ 2022 ແມ່ນມອບລາງວັນເປັນຄັ້ງທີ 3 ຊຶ່ງມີຈຸດປະສົງ ເພື່ອເປັນການສ້າງແຮງຈູງໃຈໃຫ້ແກ່ຈຸດໝາຍປາຍທາງການທ່ອງທ່ຽວອາຊຽນ ແລະ ພາກສ່ວນທີ່ກ່ຽວຂ້ອງ; ເພື່ອຮ່ວມກັນພັດທະນາຜະລິດຕະພັນການທ່ອງທ່ຽວ ແລະເພື່ອຫລຸດຜ່ອນບັນຫາດ້ານສິ່ງແວດລ້ອມ, ວັດທະນະທໍາ-ສັງຄົມ ແລະ ເສດຖະກິດ ທີ່ເກີດຈາກການຂະຫຍາຍຕົວຂອງການທ່ອງທ່ຽວຢ່າງວ່ອງໄວ.

ຂະນະດຽວກັນ ກໍໃຫ້ຄໍາແນະນຳ ແລະສ້າງແຮງຈູງໃຈທີ່ເປັນປະໂຫຍດໃຫ້ແກ່ພາກລັດ ແລະ ພາກທຸລະກິດ ເພື່ອປັບປຸງຜະລິດຕະພັນ ແລະການບໍລິການຂອງຕົນໃຫ້ໄດ້ຕາມມາດຕະຖານອາຊຽນ. ສໍາລັບຫົວຂໍ້ຂອງລາງວັນການທ່ອງທ່ຽວແບບຍືນຍົງອາຊຽນ ປີ 2022 ແມ່ນ “ການທ່ອງທ່ຽວປອດໄພ” ໂດຍເນັ້ນໃສ່ມາດຕະການສະກັດກັ້ນ ແລະ ປ້ອງກັນການ ແຜ່ລະບາດຂອງພະຍາດໂຄວິດ-19 ຢູ່ບັນດາຜະລິດຕະພັນການທ່ອງທ່ຽວ ໃຫ້ມີການພັດທະນາ ແລະ ການບໍລິການທີ່ມີຄວາມປອດໄພ. ລາງວັນການທ່ອງທ່ຽວແບບຍືນຍົງ ອາຊຽນ ປະກອບມີ 2 ລາງວັນ ຄື: ຜະລິດຕະພັນໃນຕົວເມືອງ ແລະຜະລິດຕະພັນຊົນນະບົດ.

ໃນໄລຍະຜ່ານມາ ແຂວງຫຼວງພະບາງ ກໍເຄີຍໄດ້ຮັບລາງວັນນີ້ມາແລ້ວ 2 ຄັ້ງ ຄື:

ຜະລິດຕະພັນໃນຕົວເມືອງ ແຫຼ່ງທ່ອງທ່ຽວ ພູສີ (2018) ແລະວັດຊຽງທອງ (2020) ແລະສຳລັບຫົວຂໍ້ປີ 2022 ນີ້ ແມ່ນການທ່ອງທ່ຽວທີ່ປອດໄພ ແລະທາງພະແນກ ຖະແຫຼງຂ່າວ, ວັດທະນະທຳ ແລະທ່ອງທ່ຽວ ກໍຄືຄະນະຮັບຜິດຊອບການປະເມີນ ຂັ້ນແຂວງ ເຫັນດີສະເໜີຜະລິດຕະພັນຊົນນະບົດ ແຫຼ່ງທ່ອງທ່ຽວຕາດກວາງຊີ ເຂົ້າສະໝັກຮັບລາງວັນ. ໄດ້ມີການລົງປະເມີນຕົວຈິງ ຮອບທີ 1 ໃນຂອບເຂດແຫຼ່ງທ່ອງທ່ຽວດັ່ງກ່າວ ຜົນການປະເມີນແມ່ນໄດ້ຄະແນນຜ່ານ ແຕ່ຍັງຕໍ່າຫຼາຍ, ຄະແນນລວມ ທັງ 5 ແບບຟອມ 93 ຄະແນນ, ສະເລ່ຍ 84,36% ໂດຍສະເພາະແມ່ນ:

ຄວາມສຳຄັນຂອງຊັບພະຍາກອນທາງດ້ານວັດທະນະທຳ, ສິ່ງແວດລ້ອມ ແລະຄຸນຄ່າທາງດ້ານຮີດຄອງປະເພນີຕໍ່ຊຸມຊົນທ້ອງຖິ່ນ ບໍ່ໄດ້ຮັບການສົ່ງເສີມ; ພະນັກງານນໍາທ່ຽວສະເພາະພື້ນທີ່ ຍັງບໍ່ໄດ້ຜ່ານການຝຶກອົບຮົມ, ການຮັກສາສິ່ງແວດລ້ອມຂອງຜູ້ປະກອບການອາຫານ ແລະເຄື່ອງດື່ມ ຍັງມີໜ້ອຍ; ການສະໜອງຂໍ້ມູນ ແລະອຸປະກອນການປ້ອງກັນໂຄວິດ-19 ຍັງບໍ່ພຽງພໍ. ສະນັ້ນ, ຈຶ່ງໄດ້ມີການປັບປຸງຕາມແຜນກິດຈະກໍາ ເຊັ່ນ: ໄດ້ປະກອບອຸປະກອນໃນການປ້ອງກັນພະຍາດໂຄວິດ 19, ຈັດຝຶກອົບຮົມ ປູກຈິດສຳນຶກໃຫ້ແມ່ຄ້າ, ຜູ້ປະກອບການ ແລະຜູ້ຈັດການຂອງສະຖານທີ່ຕ່າງໆ ໃຫ້ນຳໃຊ້ວັດສະດຸທຳມະຊາດ ເພື່ອປົກປັກຮັກສາສິ່ງແວດລ້ອມ (ການຫຸ້ມຫໍຜະລິດຕະພັນ ແລະອາຫານ), ຝຶກອົບຮົມກ່ຽວກັບການບໍລິການທີ່ປອດໄພຈາກເຊື້ອພະຍາດໂຄວິດ 19 ແລະປັບປຸງປ້າຍຊີ້ບອກພາຍໃນແຫຼ່ງທ່ອງທ່ຽວຕາດກວາງຊີ ໂດຍການສະໜັບສະໜູນທຶນໂຄງການພັດທະນາໂຄງລ່າງພື້ນຖານເພື່ອສົ່ງເສີມການທ່ອງທ່ຽວ ໄລຍະ 2.

ຈາກນັ້ນ, ຄະນະກໍາມະການຂັ້ນແຂວງ ກໍໄດ້ມີການລົງປະເມີນຄືນອີກ ຮອບທີ 2, ຜົນຄະແນນໄດ້ 100 ຄະແນນ, ສະເລ່ຍໄດ້ 90,90% ຢູ່ໃນເກນຜ່ານ (50% ຂຶ້ນໄປ ຫຼື 11 ຄະແນນ ສໍາລັບຜະລິດຕະພັນຊົນນະບົດ) ນໍາສະເໜີຜົນການປະເມີນຮອບສຸດທ້າຍ ໃຫ້ແກ່ຄະນະກໍາມະການຂັ້ນສູນກາງ ເພື່ອຮັບຮອງ ແລະສະເໜີເຂົ້າຮັບລາງວັນ ແລະແຫຼ່ງທ່ອງທ່ຽວນໍ້າຕົກຕາດກວາງຊີ ກໍໄດ້ຜ່ານການຮັບຮອງ ແລະໄດ້ຮັບລາງວັນການທ່ອງທ່ຽວແບບຍືນຍົງ ຜະລິດຕະພັນຊົນນະບົດ ໃນປີ 2022 ນີ້.

ພິທີມອບຮັບລາງວັນການທ່ອງທ່ຽວແບບຍືນຍົງອາຊຽນ (ແຫຼ່ງທ່ອງທ່ຽວສວນອຸທິຍານນໍ້າຕົກຕາດກວາງຊີ) ໄດ້ຈັດຂຶ້ນໃນວັນທີ 2 ມີນາ 2022 ທີ່ຫໍປະຊຸມປະຊຸມພູສີ ຫໍພິພິທະພັນແຫ່ງຊາດຫຼວງພະບາງ ໂດຍການຂຶ້ນຮັບຂອງ ທ່ານ ປອ ນາງ ສຸດາພອນ ຄົມທະວົງ ຫົວໜ້າພະແນກຖະແຫຼງຂ່າວ, ວັດທະນະທຳ ແລະທ່ອງທ່ຽວ ແຂວງຫຼວງພະບາງ ແລະ ມອບໂດຍ ທ່ານ ນາງ ສວນສະຫວັນ ວິຍະເກດ ກໍາມະການສູນກາງພັກ ລັດຖະມົນຕີ ກະຊວງ ຖະແຫຼງຂ່າວ, ວັດທະນະທຳ ແລະທ່ອງທ່ຽວ.

ຂໍ້ມູນຈາກ: ຂ່າວສານຫຼວງພະບາງ

ຮູບ: ເລາະຖ່າຍຮູບ

ວັນທີ 2 ມີນາ 2022 ທີ່ສະຖານີລົດໄຟລາວ-ຈີນ ບ້ານຊຽງລ້ອມ ນະຄອນ ຫຼວງພະບາງ ທ່ານ ຄໍາຂັນ ຈັນທະວີສຸກ ກໍາມະການສູນກາງພັກ ເລຂາພັກແຂວງ ເຈົ້າແຂວງຫຼວງພະບາງ ພ້ອມດ້ວຍການນໍາຂອງແຂວງ ແລະພະນັກງານ ໄດ້ເປັນກຽດຕ້ອນຮັບພະນະທ່ານ ບຸນຍັງ ວໍລະຈິດ ອະດິດເລຂາທິການໃຫຍ່,ອະດິດປະທານປະເທດ ແຫ່ງ ສປປ ລາວ ແລະພັນລະຍາ ພ້ອມດ້ວຍຄະນະນໍາກະຊວງ,ການນໍາຈາກສູນກາງ ທີ່ເດີນທາງມາຢ້ຽມຢາມແຂວງຫຼວງພະບາງ.

ການມາຢ້ຽມຢາມແຂວງຫຼວງພະບາງ ຄັ້ງນີ້ຂອງທ່ານ ບຸນຍັງ ວໍລະຈິດ ພ້ອມດ້ວຍຄະນະ ກໍໄດ້ໄປເດີນທ່ຽວຊົມ ສວນອຸທິຍານດອກໄມ້ ແລະທໍາມະຊາດນໍ້າຕົກຕາດຮ້ອຍຄົວເມືອງຈອມເພັດ,ໂດຍຕ້ອນຮັບຂອງທ່ານ ສາຍສະໝອນ ສີລາວົງ ເຈົ້າເມືອງ ແລະຄະນະນໍາຂອງເມືອງ,ການນໍາພາທ່ຽວຊົມອຸທິຍານດັ່ງກ່າວນີ້ໂດຍແມ່ນທ່ານ ອາຄົມ ພົມມະຫານ ປະທານສະມາຄົມນັກທຸລະກິດໜຸ່ມ ແຂວງຫຼວງພະບາງ ທັງເປັນຜູ້ອໍານວຍການສວນອຸທິຍານ ດອກໄມ້ນໍ້າຕົກຕາດຮ້ອຍຄົວ ເມືອງຈອມເພັດ ,ເຊິ່ງເປັນອີກໜຶ່ງແຫຼ່ງທ່ອງທ່ຽວຂອງເມືອງຈອມເພັດ ທີ່ໜ້າໄປສໍາພັດ,ມີອາກາດສົດຊື່ນ ອ້ອມຮອບດ້ວຍຕົ້ນໄມ້ໃຫຍ່ສີຂຽວ ແລະ ມີທົ່ງດອກໄມ້ຕາມລະດູການ ໄວ້ໃຫ້ທ່ຽວຊົມຢ່າງສວຍງາມ ແລະເປັນໜ້າປະທັບໃຈຕໍ່ຜູ້ຄົນເຂົ້າມາທ່ຽວຊົມ.

ພ້ອມນີ້ຄະນະກໍໄດ້ໄປຢ້ຽມຢາມສູນຫັດຖະກໍາ ເຄື່ອງປັ້ນດິນເຜົາ ບ້ານຈ່ານເໜືອ ເມືອງຈອມເພັດຕື່ມອີກ.ສໍາລັບສູນຫັດຖະກໍາ ເຄື່ອງປັ້ນດິນເຜົາ ຕັ້ງຢູ່ບ້ານຈ່ານເໜືອ ເມືອງຈອມເພັດ ຫ່າງຈາກຕົວເມືອງໄປທາງໃຕ້ປະມານ 3 ກິໂລແມັດ, ລຽບຕາມແຄມແມ່ນໍ້າຂອງ, ພາຍໃນສູນປະກອບດ້ວຍສູນສາທິດ ການປັ້ນໝໍ້,ຫຼໍ່ໄຫ,ຫໍວາງສະແດງເຄື່ອງປັ້ນດິນເຜົາ,ສະຖານທີ່ເຕົາອົບເຄື່ອງປັ້ນດິນເຜົາ.

ປະຊາຊົນເຂດນີ້ ມີມູນເຊື້ອໃນການປັ້ນໝໍ້,ຫຼໍ່ໄຫ ແລະປະເພດເຄື່ອງໃຊ້ທີ່ເຮັດດ້ວຍດິນ ໃຊ້ໃນຄົວເຮືອນ ແລະປະດັບເຮືອນ ມາແຕ່ສະໄໝບູຮານ ນອກນີ້ຍັງນໍາໄປຮັບໃຊ້ໃຫ້ເຈົ້າຊີວິດ ຢູ່ໃນເມືອງໃນເມື່ອກ່ອນ.ມາຮອດປັດຈຸບັນອົງການປົກຄອງແຂວງ ກໍໄດ້ຫັນເປັນສະຖານທີ່ທ່ອງທ່ຽວອີກແຫ່ງ ໄວ້ບໍລິການນັກທ່ອງທ່ຽວເຂົ້າມາທ່ຽວຊົມ ແລະຊື້ເຄື່ອງປັ້ນດິນເຜົາດັ່ງກ່າວເປັນຂອງທີ່ລະລຶກ,ພ້ອມດຽວກັນນີ້ ກໍໄດ້ຊຸກຍູ້ໃຫ້ປະຊາຊົນ ຜະລິດເປັນສິນຄ້າສົ່ງອອກ ເພື່ອສ້າງລາຍຮັບສູ່ຄົວຄອບ,ສູນຫັດຖະກໍາ ດັ່ງກ່າວນີ້ຍັງໄດ້ຮັບ ປ້າຍສັນຍາລັກເປັນ ສູນຫັດຖະກໍາ ໂອດັອບ ຂອງເມືອງຕື່ມອີກ.

ແຫຼ່ງຂ່າວ: ຂ່າວສານຫຼວງພະບາງ

ເພື່ອເປັນການເພີ່ມທະວີ ໃນການຄຸ້ມຄອງ ແລະປົກປັກຮັກສາ ປ່າສະຫງວນແຫ່ງຊາດໃຫ້ມີຄວາມເຂັ້ມງວດ ຕາມກົດໝາຍ ແລະລະບຽບການໃຫ້ມີຄວາມສັກສິດ, ສະກັດກັ້ນ ແລະແກ້ໄຂປະກົດການຫຍໍ້ທໍ້ ເຊັ່ນ: ການບຸກລຸກຖາກຖາງ-ຈັບຈອງ, ການລັກລອບຂຸດຄົ້ນໄມ້, ການລ່າສັດ ແລະອື່ນໆ ທີ່ຂັດຕໍ່ກົດໝາຍ ໃນຂອບເຂດປ່າສະຫງວນແຫ່ງຊາດທີ່ນອນໃນຂອບເຂດເມືອງລະຄອນເພັງ, ແຂວງສາລະວັນ ເຈົ້າເມືອງລະຄອນເພັງ ໄດ້ອອກຄໍາສັ່ງວ່າດ້ວຍການເພີ່ມທະວີຄວາມເຂັ້ມງວດ ໃນການຄຸ້ມຄອງ, ປົກປັກຮັກສາປ່າສະຫງວນແຫ່ງຊາດ ໃນຂອບເຂດເມືອງລະຄອນເພັງ

.

ຕາມການລາຍງານ ຂອງປ້ອງກັນຄວາມສະຫງົບ ໃຫ້ຮູ້ວ່າ: ໃນປີຜ່ານມາ, ວຽກງານກໍ່ສ້າງຮາກຖານການເມືອງ ຕິດພັນກັບການຈັດສັນຄວາມບໍ່ເປັນລະບຽບຮຽບຮ້ອຍ ຢູ່ໃນນະຄອນຫຼວງວຽງຈັນ ໄດ້ສຸມໃສ່ຈັດຕັ້ງປະຕິບັດວຽກງານທີ່ໄດ້ຮັບການມອບໝາຍໄດ້ຜົນສໍາເລັດຫຼາຍດ້ານພໍສົມຄວນ.

ໃນນີ້, ວຽກງານສະກັດກັ້ນ ແລະ ຕ້ານອຸບັດຕິເຫດ ໄດ້ເຄື່ອນ ໄຫວເຮັດໜ້າທີ່ສາມາດເຮັດໃຫ້ຄົນ ເສຍຊີວິດຫຼຸດລົງຈາກປີຜ່ານມາ ເຖິງ 49 ຄົນ.ໂດຍການຈັດຕັ້ງປະຕິບັດວຽກງານດັ່ງກ່າວ ແມ່ນສືບຕໍ່ຈັດຕັ້ງປະຕິບັດຂໍ້ຕົກລົງຂອງເຈົ້າຄອງນະຄອນຫຼວງວຽງຈັນ ວ່າດ້ວຍມາດຕະການຫຼຸດຜ່ອນອຸບັດຕິເຫດ ແລະ ຮັກສາຄວາມປອດໄພ ຕາມຖະໜົນ ແລະ ຂໍ້ຕົກລົງ ວ່າດ້ວຍການຈັດສັນ ຄວາມເປັນລະບຽບຮຽບຮ້ອຍໃນຕົວເມືອງ ແລະ ຊານເມືອງ ນະຄອນຫຼວງວຽງຈັນ ໃນນີ້:

ໂຄສະນາເຜີຍແຜ່ແນະນໍາໃຫ້ປະ ຊາຊົນຮັບຮູ້, ເຂົ້າໃຈ ກ່ຽວກັບມາດຕະການຫຼຸດຜ່ອນອຸບັດຕິເຫດ ແລະ ການຮັກສາຄວາມປອດໄຟຕາມຖະໜົນ, ຕາມ ສໍານັກງານ-ອົງການ, ໂຮງຈັກໂຮງງານ, ໂຮງຮຽນ ແລະ ບັນດາບ້ານຕ່າງໆ ມີ 706 ຄັ້ງ, ອອກຈັບ ຄວາມໄວ 8 ຄັ້ງ,ຈັດລະບຽບຕາມສາຍທາງ 796 ຄັ້ງ, ອອກກວດລົດອາທິດຈະລາຈອນ 294 ຄັ້ງ ລະບາຍການສັນຈອນ 798 ຄັ້ງ, ຂຽນໃບກ່າວ ເຕືອນລົດຜູ້ຂັບຂີ່ຈອດລົດແຄມທາງມີປ້າຍຫ້າມ ຈອດ 270 ຄົນ, ພົບເຫັນຜູ້ລະເມີດການສັນຈອນ 7.325 ຄົນ, ສຶກສາອົບຮົມກ່າວເຕືອນ 6.283 ຄົນ, ຂຽນໃບສັ່ງ 1.042 ໃບ, ກັກເອກະສານ 943 ໃບ, ກັກລົດ 43 ຄັນ ເພື່ອຍົກສູງສະຕິຂອງ ພົນລະເມືອງໃນການໃຊ້ລົດ-ໃຊ້ຖະໜົນ ແລະ ປະຕິບັດກົດລະ ບຽບຈະລາຈອນຢ່າງເຂັ້ມງວດ.ທົ່ວນະຄອນຫຼວງ ມີອຸບັດຕິເຫດເກີດຂຶ້ນ ທັງໝົດ: 734 ຄັ້ງ (ທຽບໃສ່ປີ 2020 ຫຼຸດລົງ 421 ຄັ້ງ ) ພາຫະນະເປ່ເພ 1.539 ຄັນ, ຄົນໄດ້ ຮັບບາດເຈັບ 659 ຄົນ, ຄົນເສຍຊີວິດ 142 ຄົນ (ທຽບໃສ່ປີ 2020 ເສຍຊີວິດຫຼຸດລົງ 49 ຄົນ).